Lutlut ke Mwe Puhpuhlyuck ke Talen

1, 2. Efuh Jesus el ahkuhtweyac mwe puhpuhlyuck ke talen?

JESUS el ahkuhtweyac mwe puhpuhlyuck ke talen nuh sin mwet akmuhsralah lal tuh eltahl in kahlwem ke ma kunacltahl uh. Tuhsruhktuh mwe puhpuhlyuck se inge ma nuh sin mwet tuhma lutlut nuhkewa lal Jesus. Pwacnacng, fin oasr finsrak lasr in moul in kuhsrao kuh fin facluh, kuht enenuh in kahlwem ke kalmacn mwe puhpuhlyuck inge.

² Ngac Jesus el ahkuhtweyac mwe puhpuhlyuck se inge? Ke pacl se el ahkuhtweyac nuh sin mwet tuhma lutlut lal mwe akucl ma ac fah ahkkahlwemye muh el Tohkohsrahlac ac lah lwen sahflah uh muhtwacwack. (Matthew 24:3) Pwacnacng, mwe puhpuhlyuck ke talen uh kuhpahsr pac nuh ke mwe akucl inge ac ma inge ahkpwacyeyuck ke pacl inge.

3. Meac kuht lotelah ke mwe puhpuhlyuck nuhkewa ke Matthew 24 ac 25?

³ Ke Jesus el ahkuhtweyac mwe puhpuhlyuck ke talen inge, el ahkuhtweyac pac ke kain in mwe puhpuhlyuck tolu sahyac ma kuhpahsr nuh ke mwe akucl ke lwen sahflah uh. Mwe puhpuhlyuck inge nuhkewa ahkuhtweyac ke kain in ohiyac ma enenuh in oasr yurin mwet tuhma lutlut lal ah. Kuht kuh in riti kahs in puhpuhlyuck lal inge ke Matthew 24:45 nuh ke 25:46. Mwe puhpuhlyuck se meet ah ma ke mwet kuhlwacnsap oaru, sie un mwet akmuhsralah srihsrihk suc oasr kunohkohn la in luti mwet luhn Jeova uh. Eltahl enenuh in oaru ac lahlmwetmwet.a (Liye footnote.) Mwe puhpuhlyuck se tohkoh ah ma ke muhtwacn fuhsr singucul. Ke mwe puhpuhlyuck sac, Jesus el sensenkihn mwet akmuhsralah eltahl in ahkolah, taran ac sanob (Liye footnote.) Tohkoh, Jesus el ahkuhtweyac mwe puhpuhlyuck ke talen tuh el in luti mwet akmuhsralah nuhkewa lah eltahl enenuh in orekma upac in karihngihn ma kunacltahl oacna mwet Christian. Tok, Jesus el ahkuhtweyac mwe puhpuhlyuck ke sheep ac goat, suc sramsramkihn mwet ma oasr finsrak la in muhta fin facluh. El ahkkahlwemye in kahlwem lah eltahl enenuh in oaru ac sang kuhiyacltahl nohfohn in kahsruh mwet akmuhsralah nuhkewa wiyacl uh.c (Liye footnote.) Mwe lutlut se inge ac fah ahkuhtweyac kalmacn mwe puhpuhlyuck ke talen inge.

SIE LEUM SUC SANG MANI NA YOHK NUH SIN MWET KUHLWACNSAP LAL

4, 5. (a) Suc leum se ke mwe puhpuhlyuck sac luhmweyuck nuh kac? (b) Ekahsr luhpah talen se?

⁴ Riti Matthew 25:14-30. Ke mwe puhpuhlyuck se ke talen ah, Jesus el sruhmuhn sie leum suc ac som nuh sahyac. Ke sie pac mwe puhpuhlyuck suc apkuhran nuh kac, Jesus el sruhmuhn sie leum suc som in suk el in Tohkohsrahlac.d (Liye footnote.) (Luke 19:12) Ke lusen yac pucspucs, mwe rit nahtuhsr uh fahk lah ke mwe puhpuhlyuck luo inge, mukul se inge luhmweyuck nuh kacl Jesus, suc som nuh in kuhsrao ke yac 33. Tuhsruhktuh, Jesus el tiac eklac Tohkohsrah ke pacl se na ma el som nuh in kuhsrao ah. El sano nwe ke yac 1914, ke pacl se mwet lokoalok lal ah “oana sie ma loangeyacn niyacl.”​—Hebrew 10:12, 13.

⁵ Jesus el fahk lah ke mwe puhpuhlyuck se inge, oasr talen oalkosr luhn leum sac. Luhpah na yohk se pa inge.e (Liye footnote.) Meet liki leum sac som, el sang mani se inge nuh sin mwet kuhlwacnsap tolu lal. El fahk nuh seltahl in orekmakihn ac ahkkapye mani lal inge. Oacna ke mani inge arlac sacohk nuh sin leum se inge, oasr sie ma suc arlac sacohk nuh sel Jesus. Meac se inge? Pa orekma ma el oruh ke el srackna oasr fin facluh ah.

6, 7. Meac talen uh luhmweyuck nuh kac?

⁶ Orekma in luti uh sie ma na yohk srihpac nuh sel Jesus. Ke sahflahiyen orekma in luti lal ah, puhs mwet eklac mwet tuhma lutlut lal. (Riti Luke 4:43.) El etuh lah srackna yohk orekma luhlah ac srackna puhs mwet ac fah lohng pweng wo uh. El fahk nuh sin mwet tuhma lutlut lal ah: “Ngetlah liye imac ahkwoyac. Fahko kac mahtuhlah inge, ac ahkolah nuh ke kosrwacni!” (John 4:35-38) Sie mwet imac wo el ac tiac sislah imac se lal suc ahkolah tari nuh ke kosrwacni. Nuhnak lal Jesus ah oacpacna inge. Meet liki na el fohlohk nuh in kuhsrao, Jesus el sap nuh sin mwet tuhma lutlut lal ah: “Kowos som nuh yurin mwet . . . ac oruh tuh elos in mwet tuhmuhk lutlut.” (Matthew 28:18-20) Ke inkacnek se inge, Jesus el sang sie mwe kahsruhp na sacohk, suc pa kunohkohn na yohk srihpac se in luti.​—Luo Corinth 4:7.

⁷ Oacna leum se ma sang mani lal nuh sin mwet kuhlwacnsap lal ah, Jesus el sang nuh sin mwet akmuhsralah lal ah orekma in orek mwet tuhma lutlut. (Matthew 25:14) Pwacnacng talen inge luhmweyuck nuh ke kunohkohn laltahl in luti ac in orek mwet tuhma lutlut.

8. Finne kain in luhpah ke talen pa ituckyang nuh sin kais sie mwet kuhlwacnsap, meac leum sac el ke eltahl nohfohn na in oruh?

⁸ Jesus el fahk lah leum sac sang talen lihmekohsr nuh sin mwet kuhlwacnsap se meet ah, talen luo nuh sin mwet kuhlwacnsap se ahkluo ah, ac talen se nuh sin mwet kuhlwacnsap se ahktolu ah. (Matthew 25:15) Leum sac sang kain in luhpah nuh sin kais sie sin mwet kuhlwacnsap lal inge, tuhsruhktuh el luhngse kais sie seltahl in sang kuhiyacltahl in ahkyohkye mani lal inge. Ke inkacnek se pacna inge, Jesus el luhngse mwet akmuhsralah lal ah in sang kuhiyacltahl nohfohn ke orekma in luti laltahl uh. (Matthew 22:37; Colossae 3:23) In Pentecost ke yac 33, mwet tuhma lutlut lal Jesus ah muhtwacwack in orek mwet tuhma lutlut ke mwet in muhtuhnfacl nuhkewa. Ac ke kuht riti Bible, ke puk luhn Orekma, kuht liye lah arlac kahlwem luhpan kwacfeacng yohk laltahl uh.f (Liye footnote.)​—Orekma 6:7; 12:24; 19:20.

KE LUSEN LWEN SAHFLAH MWET KUHLWACNSAP UH OREKMAKIHN TALEN

9. (a) Meac mwet kuhlacnsap oaru luo ah oruh ke mani laltahl ah, ac meac kuht lotelah ke ma inge? (b) Meac mwet ma finsrak in wi moul ma pahtpaht fin facluh eltahl enenuh in oruh?

⁹ Mwet kuhlacnsap luo, suc orekmakihn wo mani luhn leum sac, eltahl luhmweyuck nuh ke mwet oaru akmuhsralah wiyacsr ke lusen lwen sahflah. Yohk na ke yac 1919 ah me, eltahl sang kuhiyacltahl ke orekma in luti uh. Ke mwe puhpuhlyuck sac, kais sie sin mwet kuhlacnsap luo ah eis siena luhpah, tuh tiac kalmac pa ac oasr u luo ke mwet oaru akmuhsralah. Mwet kuhlacnsap luo ah kewa orekma upac ac pacl luoiyac mani ma ituckyang nuh seltahl ah. Tuhsruhktuh, yac mwet akmuhsralah uh muhkwena pa enenuh in kwacfeacng ke orekma in luti uh? Moh. Mwe puhpuhlyuck lal Jesus ke sheep ac goat luti kuht lah mwet ma finsrak in wi moul ma pahtpaht fin facluh eltahl enenuh in kahsruh mwet lili akmuhsralah wiyacltahl uh ke orekma in luti ac in oaru nuh seltahl. Eltahl arlacna engan in kahsreltahl ke kunohkohn na wowo inge? Ahok, mwet luhn Jeova uh “u sefanna,” ac eltahl nohfohn tuhkweni moniyuck ke orekma in luti ac orek mwet tuhma lutlut.—John 10:16.

10. Ip oyac ke mwe akucl sac ahkpwacyeye lah kuht moul ke lwen sahflah?

¹⁰ Jesus el luhngse mwet tuhma lutlut nuhkewa lal in kwacfeacng ac oruh in puhseni mwet tuhmal lutlut. Pa inge ma mwet tuhma lutlut lal ah oruh in pacl meet ah. Ke ahkpwacyeyuck kahs in puhpuhlyuck lal Jesus ke talen ke lwen sahflah inge, yac mwet tuhma lutlut lal uh oruh orekma se inge? Ahok. Emeet me na, soenna oasr pacl se ma mwet na puhkantwen lohng pweng wo uh ac eklac mwet tuhma lutlut. Ke srihpen orekma upac ma orek sin mwet tuhma lutlut nuhkewa lal Jesus, tausin pucspucs sin mwet bacptaislac ke kais sie yac. Ac mwet inge wi pac ke orekma in luti uh. Orekma inge nuhkewa ac ma wo suc tuhkuh kac uh, ahkkahlwemye na pwacye lah orekma in luti uh sie ip na yohk srihpac ke mwe akucl ma Jesus el sruhmuhn muh ac fah orek ke lwen sahflah uh. Wacngihn ahlohloh kac lah Jesus el engan sin mwet orekma lal uh.

LEUM SAC AC TUHKUH KUH FOHLOHK NGAC?

11. Kuht etuh fuhkah lah Jesus el ac fohlohk kuh tuhkuh ke lwen in ongaiyac luhlahp?

¹¹ Jesus el fahk: “Tukun pacl na loeloes se, leum se luhn mwet kuhlwacnsap inge fohlohkoh ac siyuck selos koanon orekma lalos.” (Matthew 25:19) Leum sac, suc pa Jesus, el ac fah oruh ma inge ke sahflahiyen lwen sahflah. Kuht etuh fuhkah? Ke kahs pahluh lal suc oasr in Matthew sapta 24 ac 25, Jesus el fahk pacl puhs ke tuhkuh lal uh. Ke sie mwe puhpuhlyuck, el fahk lah mwetuh ac fah “liye Wen nuhtin Mwet el tuhkuh inkuhsrao me fin puhkuhnyeng uh.” Ma inge sramsramkihn sie pacl ke lwen in ongaiyac luhlahp ke Jesus el ac fah nuhnuhnkuh mwet uh. El oacyacpac sensenkackihn mwet tuhma lutlut lal ma moul ke lusen lwen sahflah inge, eltahl in taran ac sano. El fahk: “Kowos tiac etuh lwen se Leum lowos el ac tuhkuh” ac, “Wen nuhtin Mwet el ac tuhkuh ke sie ao ma kowos tiac etuh kac.” (Matthew 24:30, 42, 44) Pwacnacng ke mwe puhpuhlyuck ke talen sac, Jesus el sruhmuhn pac ke pacl se el ac fah tuhkuh kuh fohlohk in nuhnuhnkuh mwet uh ac kuhnauslah oakwuck lal Satan uh.g​—Liye footnote.

12, 13. (a) Meac Leum sac fahk ke mwet kuhlwacnsap luo ah, ac efuh? (b) Ngac mwet akmuhsralah uh ac fah eis sil sahflah laltahl uh? (Liye pac pohk se inge, “Tukun Eltahl Misac Nuhnuhnkweyuck lah Oasr Srihpacltahl.”) (c) Meac mwet nuhkewa suc kahsruh mwet akmuhsralah uh fah eis?

¹² Ke Leum sac fohlohk liki acn el som nuh we ah, el liye lah mwet kuhlwacnsap se ma ituckyang talen lihmekohsr nuh se ah el laheslah ke talen lihmekohsr pac. Ac mwet kuhlwacnsap se ma ituckyang talen luo nuh se ah el laheslah ke talen luo. Leum sac fahk nuh sin kais sie seltahl: “Kom mwet kuhlwacnsap wo ac oaru. Wona orekma lom. Kom oaru in liyacacng ma puh, inge nga ac fah sot tuh kom in karihngihn ma puhs.” (Matthew 25:21, 23) Meac Leum, Jesus, el ac fah oruh ke el tuhkuh kuh fohlohkoh ke pacl fahsruh uh?

¹³ Meet liki na lwen in ongaiyac luhlahp, God el ac ahkkahlwemye insese lal ke orekma upac luhn mwet akmuhsralah ma srackna oasr fin facluh ke pacl sac. Pa inge sil sahflah laltahl uh. (Fwackyuk 7:1-3) Na, meet liki Armageddon, Jesus el ac tuhfah eisacltahl nuh inkuhsrao. Ac meac fah sikyak nuh sin mwet ma oasr finsrak la in moul fin facluh, suc kahsruh mwet akmuhsralah ke orekma in luti uh? Eltahl ac fah nuhnuhnkweyuck oacna sheep. Ac eltahl ac fah moul fin facluh ye kolyuck ke Tohkohsrahi luhn God.—Matthew 25:34.

MWET KUHLWACNSAP KULUK AC ALSRUHNGESR SE

14, 15. Yac Jesus el fahk muh puhs mwet akmuhsralah ma ac kuluk ac alsruhngesr? Ahkuhtweyac.

¹⁴ Ke mwe puhpuhlyuck sac, oasr pac mwet kuhlwacnsap se suc ituckyang talen se nuh se. El tiac orekmakihn in ahkyohkye mani luhn leum lal ah, ac el tiac pacna fihliyac ke bank in oasr kap kac. Tuhsruhktuh, el pihkihnyac mani sac. Leum sac fahk muh mwet kuhlwacnsap sac kuluk ac alsruhngesr. El eslah talen sac luhkel ac sang nuh sin mwet kuhlwacnsap se meet ah. Tohkoh, el sislah mwet kuluk sac “nuh in lohsr lihkihnum uh,” ac pa ingacn acn ma mwet kuhlwacnsap sac tuhng we ah.​—Matthew 25:24-30; Luke 19:22, 23.

¹⁵ Ke pacl se Jesus el fahk muh sie sin mwet kuhlwacnsap tolu ah kuluk ac alsruhngesr, tiac kalmacn ma el fahk uh pa sie tahfuh tolu ke mwet akmuhsralah uh ac oacna mwet kuhlwacnsap se inge. Kuht etuh ma inge ke kuht tuni kalmeyacn mwe puhpuhlyuck se inge nuh ke mwe puhpuhlyuck luo pac sahyac. Ke mwe puhpuhlyuck ke mwet kuhlwacnsap oaru ac lahlmwetmwet, Jesus el sruhmuhn sie mwet kuhlwacnsap kuluk suc ahkkulukye mwet kuhlwacnsap sahyac ah. Tiac kalmacn ma Jesus el fahk inge pa kuhtuh sin mwet kuhlwacnsap oaru ac lahlmwetmwet uh ac eklac kuluk. Tuhsruhktuh, el sensenkihn mwet akmuhsralah eltahl in tiac oacna mwet kuhlwacnsap kuluk sac. Na, ke mwe puhpuhlyuck se ke muhtwacn fuhsr singucul ah, Jesus el sruhmuhn ke muhtwacn lahlfon lihmekohsr. El tiac srihke in fahk muh tahfuh sin mwet akmuhsralah uh ac lahlfon. Tuhsruhktuh, Jesus el sensenkihn ma ac sikyak fin eltahl tiac ahkolah, taran ac sano.h (Liye footnote.) In oacpacna ke mwe puhpuhlyuck ke talen, Jesus el tiac srihke in fahk muh puhs mwet akmuhsralah ke lusen lwen sahflah ac fah kuluk ac alsruhngesr. Tuhsruhktuh, Jesus el sensenkihn mwet akmuhsralah lal ah in tiac oacna mwet kuhlwacnsap kuluk sac, a eltahl in tahfwelah na in kwacfeacng ke orekma in luti uh, in ‘orekmakihn mani ac laheslah.’​—Matthew 25:16

16. (a) Meac ma luo kuht lotelah ke mwe puhpuhlyuck ke talen ah? (b) Mwe lutlut se inge kahsre kuht fuhkah in kahlwem ke mwe puhpuhlyuck ke talen? (Liye pohk se inge, “Meac Kuht Enenuh In Kahlwem kac ke Mwe Puhpuhlyuck se ke Talen ah?”)

¹⁶ Meac ma luo kuht lotelah ke mwe puhpuhlyuck ke talen inge? Ma se meet, Jesus el sang nuh sin mwet tuhma lutlut lal ah sie mwe kahsruhp na sacohk, suc kunohkohn na yohk srihpac in luti ac orek mwet tuhma lutlut. Ma se ahkluo, Jesus el luhngse kuht nuhkewa in kwacfeacng ke orekma in luti uh. Kuht fin muhtwacnglah orekma se inge ac ahkos pacl nuhkewa ac oaru na nuh sel Jesus, kuht kuh in luhlahlfongi lah el ac fah ahkinsewowoye kuht kac.​—Matthew 25:21, 23, 34.