Pahyuck “in Leum Muhkwena” Yac Srackna Fal nuh ke Pacl Inge?

Kuhtuh sin mwet kuhlacnsap luhn God suc srackna lolacp eltahl fahk pacna kahs inge. Eltahl etuh la Jeova el luhngse mwet kuhlacnsap lal in pahyuck nuh sin mwet suc el luhngse “in Leum muhkwena,” kalmac pa, nuh sin mwet Christian pwacye muhkwena. (Sie Corinth 7:39) Na efuh kuh kuhtuh sin Mwet Christian eltahl fahk ma inge?

UH KUH KUHTUH SELTAHL ALOHLOH?

Mwet Christian suc fahk ma inge eltahl nuhnkuh muh muhtwacn lili uh puhs liki mukul lili ke congregation. In acn pucspucs, pwacye ma inge. Ke sie mwe puhpuhlyuck, in acn Korea, percent 57 pa muhtwacn Christian lolacp, ac percent 43 na pa mukul lili we uh. Ac in acn Colombia, percent 66 pa muhtwacn lili ac percent 34 na pa mukul lili.

Ke kuhtuh pac acn sahyac, pahpah ac ninac suc tiac Mwet Loh, sahp eltahl ke in yohk mani luhn mukul, yohk molin orekma lal, oasr lohm ac stosah ukwacl sifacna, na fah eltahl kuh in pahyuck nuh sin tuhlihk muhtwacn nahtuhltahl. Ac kuhtuh sin mukul lili suc lolacp sahp eltahl tiac kuh in ahkfalye ma inge. Ke srihpac se inge, kuhtuh muhtwacn lili uh ahlohloh fin eltahl kuh in konwacack sie mukul Christian ma eltahl ac kuh in pahyuck nuh se.a​—Liye footnote.

LUHLALFONGI NUH SIN JEOVA ARLACNA YOHK SRIHPAC

Fin oasr pacl kom puhla pac ouinge, kom kuh in luhlahlfongi lah Jeova el etuh na pwacye ma kom puhla ac nuhnkuh uh.—Luo Chronicle 6:29, 30.

Ke Bible uh, Jeova el sapkin kuht in pahyuck in Leum muhkwena. Efuh? Mweyen el etuh ma ac wo nuh sin mwet lal uh. El luhngse in karihngihn mwet kuhlacnsap nuhkewa lal liki ahsor ac ngal suc tuhkuh ke sie sulaclah suc tiac wo, ac el luhngse pac eltahl in insewowo ke moul laltahl. In lwen lal Nehemiah, mwet Jew pucspucs eltahl pahyuck nuh sin muhtwacn suc tiac kuhlwacnsuhpuh Jeova. Pasis Nehemiah el sruhmuhn nuh seltahl ke mwe srihkasrak kuluk lal Solomon. ‘God el luhngse el ac oruh tuh elan tohkohsrah fin Israel nohfohn. Finne ouinge, a muhtwacn sahyac uh ahkkulukyacllah.’ (Nehemiah 13:23-26) Jeova el etuh lah kahs in acsmak nuhkewa lal arlac wo nuh sesr, ac pa inge srihpac pwacnacng el sapkin mwet Christian nuhkewa in pahyuck na nuh sin mwet suc kuhlacnsap nuh sin Leum. (Psalm 19:7-10; Isaiah 48:17, 18) Kuht arlac engan ke srihpen El acse nuh sesr kahs in kahsruh suc arlacna wo ac fal nuh sesr. Kuht fin ahksol Jeova oacna Mwet Kol lasr, kuht akihlen lah oasr suwohs lal in fahk nuh sesr ma kuht enenuh in oruh.​—Soakas 1:5.

Pwacye lah, kom tiac luhngse in “kuhpahsryang nuh sin mwet tiac luhlahlfongi,” kalmac pa, in pahyuck nuh sin sie mwet suc tiac luhngse Jeova. Mwet sacn ac kuh in oruh kom in tui ke kuhlwacnsap lom nuh sin God. (Luo Corinth 6:14) Kahs in kahsruh luhn God uh wo ac fal pacl nuhkewa, ac puhs sin mwet Christian ke pacl inge eltahl sulaclah in ahkos Jeova. Tuhsruhktuh, kuhtuh seltahl sulaclah in tiac ahkos kahs in kahsruh inge.

SRACKNA FAL NUH KE PACL INGE

Maggy, sie muhtwacn lili fin acn Australia, el ahkuhtweyac ma sikyak ke pacl se el muhtwacwack in ahko nuh sin sie mukul suc tiac wi luhlahlfongi uh.b (Liye footnote.) El fahk: “Puhs pacl nga tiac wi miting ke srihpen nga ke weluhl. Muhnahslah na pwacye fototo luhk nuh sin Jeova ke pacl sac.” Sie pac muhtwacn fuhsr suc muhta fin acn India, inel pa Ratana, el ahko pac nuh sin classmate se lal suc muhtwacwack in lutlut ke Bible. Tuhsruhktuh, mukul se inge el luhngse na in lutlut ke Bible tuh elan kuh in kawuck nuh sel. Sahflahiyac ah pa, muhtwacn se inge tilac kuhlacnsuhpuh Jeova ac el welah sie pacna alu sahyac tuh el in kuh in pahyuck nuh sin mukul sac.

Ndenguè suc muhta fin acn Cameroon el yac 19 matwacl ke el pahyuck nuh sin sie mukul suc tiac kuhlwacnsuhpuh Jeova. Meet liki eltahl pahyuck, mukul sac wuhlelah nuh sel Ndenguè muh el kuh in tahfwelah na kuhlwacnsap oacna sie Mwet Loh. Tuhsruhktuh, wik luo tukun eltahl pahyuckyak, mukul sac fahk nuh sel lah el ac tiac lwelah Ndenguè el in sifwil wi ke toeni luhn congregation inge. Muhtwacn lili se inge fahk: “Nga arlacna ahsor ac tung upac. Nga akihlen lah nga tiac kuh in sifwil pac oruh sulaclah luhk sifacna. Inge, nga auli na pwacye kac.”

Ahok oasr kuhtuh sin muhtwacn Christian suc pahyuck nuh sin mwet ma tiac kuhlwacnsuhpuh Jeova, tuhsruhktuh srackna kuhlwacng ac wo nuh sin muhtwacn kiyacltahl uh. Tuhsruhktuh, finne mukul tumom an tiac kuhlacnsapuh Jeova el kuhlwacng, na meac ma inge kuh in oruh nuh ke fototo lom nuh sin Jeova? Meac puhlakihn lom ke kom tiacna porongo kahs in kahsruh suc El sot nuh sum tuh kom in engankihn moul lom? Ac yohk liki nuhkewa, meac puhlakihn luhn Jeova ke ma kom oraclah uh?​—Soakas 1:33.

Mukul ac muhtwacn lili fin facluh nohfohn suc ahkos kahs in kahsruh luhn Jeova in pahyuck “in Leum muhkwena,” eltahl luhlahlfongi na pwacye lah pa inge sulaclah ma wo emeet eltahl in oruh uh. Mukul ac muhtwacn lili lolacp uh luhngse na pwacye in ahkenganye Jeova ke eltahl pahyuck nuh sin mwet ma alu pac nuh sel. Michiko suc muhta fin acn Japan, el ke ahkos na pwacye God, finne mwet in sucu lal eltahl srihke in kwacfel in pahyuck nuh sin mukul ma tiac luhngse Jeova. In weacng ma upac lal inge el liye ke kuhtuh sin kawuck lal inge pahyuck nuh sin mwet Christian ke congregation, tuhsruhktuh el srackna lolacp. El fahk: “Nga fahk nuh sihk sifacna muh ke srihpen Jeova el sie ‘God suc insewowo,’ pasis insewowo lasr uh tiac ma tuhkuh ke srihpen kuht pahyuck kuh tiac. Nga luhlahlfongi pac lah el ac fah acse kena luhn insiacsr. Ke ma inge kuht fin tiac kuh in konwacack sie mukul kuh muhtwacn finne kuht luhngse in pahyuck, wo kuht in muhtawihn lolacp ke kihtin pacl.” (Sie Timothy 1:11) Tok kuhtuh, Michiko el pahyuck sin sie mukul lili suc wo elah, ac el engan ke srihpen el porongo kahs in kahsruh luhn Jeova.

Kuhtuh sin mukul lili eltahl soano pac in konwacack sie muhtwacn suc el ac fah pahyuck nuh se. Ke sie mwe puhpuhlyuck, Bill suc muhta fin acn Australia el fahk lah oasr pacl el pwar pac sin muhtwacn suc tiac Mwet Loh. Tuhsruhktuh, el tiac arlac orek kawuck nuh seltahl mweyen el sruhnga in muhtwacwack ke sie ahko suc ac kuh in oruh elan ‘wi mwet suc tiac luhlahlfongi.’ Ke yac pucspucs, el ke pac orek kawuck nuh sin kuhtuh muhtwacn lili sahyac, tuhsruhktuh eltahl tiac arlac ke kawuck nuh sel, siena ma eltahl puhla kacl. Bill el soano yac 30 nuh ke el konwacack sie muhtwacn Christian suc oasr pac oakwuck ma oacna sie nuh ke oakwuck lal. El fahk: “Nga tiac auli. Nga puhla muh God el ahkinsewowoyeyuc mweyen kuht kuh in tuhkweni oruh orekma in sulkackihn pweng wo, tuhkweni lutlut, ac tuhkweni alu nuh sin God. Nga insewowo in etwacllah ac asruoki yurin kawuck pucspucs luhn muhtwacn kiyuck ah mweyen eltahl kuhlwacnsap pac nuh sin Jeova. Kuht orekmakihn kahs in kahsruh luhn Bible ke moul in pahyuck lasr uh.”

KE KUHT SOANO JEOVA

Meac kom kuh in oruh ke kom luhlahlfongi ke kahs in kahsruh luhn Jeova ac soano nwe ke pacl se kom konwacack sie mukul kuh muhtwacn suc kuhlacnsap pac nuh sel? Kom kuh in nuhnkuh kac lah efuh kom tiac pahyuck. Kom fin nuhnkuh muh srihpac uh pa mweyen kom luhngse in ahkos masap luhn Jeova, kom kuh in luhlahlfongi lah ma inge kuh in oruh Jeova el in arlacna engan. (1 Samuel 15:22; Soakas 27:11) Oacyacpac, tafwela na in puhruhe nuh sin Jeova pacl nuhkewa ac fahk nuh sel ke ma kom puhla. (Psalm 62:8) Ke kom sang kuhiyom kewa in lain mwe srihfe ac kena kuluk uh, fototo lom nuh sin Jeova ac fah wolac lwen nuh ke lwen. Kom kuh in luhlahlfongi lah Jeova el nuhnkuh ke kena luhn insiom ac mwe enenuh lom mweyen kom sacohk sel. El tiac wuhlelah nuh sin kuhtwena mwet sie mukul kuh muhtwacn suc el ac fah pahyuck nuh se. Tuhsruhktuh kom fin enenuh na pwacye in pahyuckyak, Jeova el etuh inkacnek wo emeet in ahkfalye mwe enenuh lom inge.​—Psalm 145:16; Matthew 6:32.

Sahp kuhtuh pacl kom oacna David, mwet sihm luhn sam, suc fahk ouinge: “Topuk yuc inge, LEUM GOD. Wacngihnlac finsrak luhk. Nik kom wihkihnkomlac likiyuc.” (Psalm 143:5-7, 10) Nik kom fuhlweack. Sang pacl nuh sin Jeova in ahkkahlwemye nuh sum lah meac el luhngse kom in oruh. Lohng pusren Jeova ke kom riti Bible ac nuhnkuh yohk ke ma kom ritelah. Ma inge ac fah kahsre kom in etuh la meac Jeova el siyuck sum ac lah el kahsruh fuhkah mwet kuhlacnsap pucspucs lal in pacl meet ah. Ke kom lohngohl, kom ac fah luhlahlfongi muh kom kuh in porongo kahs lal pacl nuhkewa.

Meac kom kuh pac in oruh tuh kom in engan ac kahfofo ke kom soenna pahyuck uh? Kom kuh in ahkwoye fototo lom nuh sin Jeova ac ahkkapye pac sie ohiyac na wowo. Kom kuh pac in lotwelah in ahkkahlwemye kuhlwacng, in alken in orekma, in wo nuh sin mwet uh, ac in oaru nuh sin Jeova. Kain in ohiyac wowo inge enenweyuck na pwacye nuh ke sie moul in pahyuck wowo. (Genesis 24:16-21; Ruth 1:16, 17; 2:6, 7, 11; Soakas 31:10-27) Suk meet Tohkohsrahi ke kom moniyuck in oruh orekma in luti ac ke kain in orekma ke congregation lom an. Ma inge nuhkewa ac fah karihngihn kom in fahsr liki sulaclah ma tiac wo. Bill el fahk ke yac pucspucs suc el lolacp: “Pacl uh arlac sa in somlah! Nga orekmakihn pacl inge in kuhlwacnsuhpuh Jeova oacna sie pioneer.”

Masap luhn Jeova ke oakwuck in pahyuck “in Leum muhkwena” tiac oakwuck mahtuh kuh ma na in pacl meet ah. Kom fin ahkos masap inge, ac kuh in kahsre kom in ahkfuhlwactye Jeova ac kom ac fah eis mwe insewowo yohk. Bible uh ahkkahlwemye: “Insewowo mwet se suc sangeng sin Jeova, suc arlacna engan ke ma sap Lal. Kahsruhp ac mani pucspucs oan in lohm sel; ac suwohswohs lal in oan ma pahtpaht.” (Psalm 112:1, 3, BMK) Ke ma inge lwelah kom in esam ac porongo masap se luhn God inge in pahyuck “in Leum muhkwena.”