Kom Akola A Moniyuk!

“Ke ma inge sano, tu komwos tia etu len sa ku aur sa.”—MATTU 25:13.

KE SIE sramsram safla laltal in Baibel, Jisus el mwolela: “Nga sa in tuku.” Met sap lal, Jon el topuk: “Amen! Fwasru, Leum Jisus.” Met sap el lalalfongi na paye la Jisus el e tuku. Jon el sie sin met sap su siyuk kusensiyuk sel Jisus: “Ma inge fwa sikyuk nge, a mea akulin oasr tari [Greek, pa·rou·siʹa] lom a saflaiyen akmwuk inge?” Aok, Jon el ngetuk nu ke tuku lun Jisus ke pal fwasru.​—Fwakyuk 22:20; Mattu 24:3.

² Kain in lalalfongi inge arulanu srikla misinge. Alu puspis elos luti ke “tuku” lun Jisus, tusruktu arulanu supus sin met ke alu inge elos sano na paye pal inge. Elos moul oanu Jisus el e tia tuku. Buk inge The Parousia in the New Testament el fwak: “Arulanu srik me purakak lun fwinsrak ke Parousia ke moul, nunuk a ke orekma lun alu. . . . yok salkeya na paye alu in oru kunokon lalos in akauliyuk metu ke orekma lun missionary in sulkakin gospel, arulanu munas ku wanginla.” Tusruktu ma inge tia sikyuk nu sin met nu kemwa!

³ Met tuma lutlut paye lun Jisus elos insemwomwo in sano saflaiyen akmwuk koluk se inge ke len lasr. Fwinne kut oaru in oru ou inge, tusruktu kut enenu in srukye nunuk sumwos ke ma nu kemwa su kapsreni oasr tari lun Jisus a kaifweung in orekma fwal nu ke ou inge. Ma inge ku in kasru kut in ‘muteng nu ke safla a moul.’ (Mattu 24:​13) Ke pal se el akkalemye kas palu su kut ku in konaok in Mattu sapter 24 a 25, Jisus el sang kas in kai mwomwo su kut ku in orekmakin, nu ke insemwomwo ma patpat lasr. Koanon sapter 25 pa me pupulyuk su komwos etu tari, wekunang me pupulyuk ke mutan virgin siengoul (mutan virgin lalmetmet a mutan virgin lalfon) a ke me pupulyuk ke talen. (Mattu 25:​1-​30) Ma lane fuka kut ku in eis ke me pupulyuk puspis inge?

Akola Pal Nu Kemwa, Oanu Mutan Virgin Limekosr Elos Oru!

⁴ Saap kom lungse in sifwilpa ridi me pupulyuk ke mutan virgin su ku in konoiyukyuk in Mattu 25:​1-​13. Akmwuk lun me pupulyuk se inge pa ke sie akmwuk in payuk lun met Ju su oru mokul in som nu in loom sin papa tuman mutan in esel a wisella nu ke loom sel sifwanu (ku loom sin papa tumal). Akmwuk ou inge in orani met on a me sritel ke on ku in tukeni, a pal in tuku na paye lal wangin met ku in etu. Ke me pupulyuk inge, mutan virgin siengoul elos sano ke fong ke tuku lun met pusla. A limekosr selos lalfon meyen elos tia wis oil fwal nu ke lam lalos paenang elos enenu in sifwil som a moli pa kutu. Mutan limekosr saye elos lalmetmet meyen elos wis oil nu ke lam a sufan oil elos in mu ku in nekla lam lalos fwin eneneyuk ke pal in san lalos. Mutan limekosr na inge pa akola fwal nu ke pal se met pusla el tuku. Ke ma inge, elos mukena pa sapkinyuk in ilyuk nu ke kofwo. Ke pal se ma virgin lalfon limekosr elos tuku, elos patla tari a elos tia ku in utyuk.

⁵ Luma puspis ke me pupulyuk se inge ku in akilenyuk kalme ya. Ke sie me pupulyuk, in oanu Ma Simusla el sramsramkin kel Jisus oanu sie met pusla. (Jon 3:​28-​30) Jisus el sifwanu pupulyukunul nu sin sie mwen nutin togusra su oru kofwen mari lal. (Mattu 22:​1-​14) A Baibel el pupulyukunul Kraist nu ke sie mokul tuma. (Efesus 5:​23) Ke ma inge, oasr sie me purakak lun inse, meyen ke kutu fus met Kristian akmusrala elos akkalemyeyuk oanu “mutan pusla” lun Kraist, tusruktu ke me pupulyuk inge el tia sramsram ke sie mutan pusla. (Jon 3:​29; Fwakyuk 19:7; 21:​2, 9) Aok, el sramsram, ke pal se el fwak ke virgin siengoul, a ke fus saye met akmusrala elos akkalemyeyuk oanu sie virgin su mwoleyukla in payuk, nu sin Kraist.​—2 Korint 11:2.a

⁶ Sayen aketeye puspis inge a kutupa kas palu su orekmakinyuk, kut ku in lalalfongi na paye la oasr ma kut ku in lotela ke me pupulyuk inge. Ke sie me pupulyuk, tuni akmwoye meyen Jisus el aksafyela me pupulyuk ke kas inge: “Ke ma inge sano, tu komwos tia etu len sa ku aur sa.” Aok, me pupulyuk inge el akkalemye ma enenu nu sin kais sie sesr in akola ke pal safla lun akmwuk koluk inge su arulanu futotoeni. Safla se inge fwa tuku na paye, fwinne kut tia ku in fwak nge. Ke ma inge, loang akmwoye ke oiye puspis su u luo lun mutan virgin inge elos akkalemye.

⁷ Jisus el fwak: “A limekosr selos lalfon.” Ya ma inge sikyuk ke sripen elos tia lalalfongi mu met pusla el e tuku? Ya elos som liki in suk me akengun? Mo tia. Jisus el fwak la virgin limekosr inge elos “illa in sun met pusla.” Elos etu la el e tuku, a elos lungse in wi, in akesrui nu ke “kofwen mari.” Tusruktu, ya elos akola na paye? Elos soanel kitin pal, nu ke “infwulwen fong,” tusruktu elos tia akola na paye nu ke tuku lal ke kutena pal​—fwin sa ku pat liki ma elos fwinsrak nu ka.

⁸ Ma limekosr saye​—elos su Jisus el pangon lalmetmet​—elos ouyepa illa a wis lam lalos su fururrur, a in sano tuku lun met pusla. Elos enenu pa sano, tusruktu elos “oaru a lalmetmet.” Kas Greek inge su langasla “oaru a lalmetmet” in ouyepa kalmen “met etauk, orekmakin lalmetmet.” Virgin limeksor inge elos akkalemye la elos lalmetmet ke elos wis sufa su oasr oil ka in akola in orekmakin sang nekla lam fwin eneneyuk. Aok elos arulanu nunku a akola yok in osun nu sin met pusla paenang elos srunga in kitela oil lalos. Akola lalos inge tia wangin sripe, me akpayeye ke ma inge kalem, ke pal se ma met pusla el tuku elos sano a akola na paye. Elos nu kemwa su “akola elos oelul utyuk nu ke kofwen mari; a mutonoaoa kauli.”

⁹ Jisus el tia luti ke oiye su enenu in akkalemyeyuk ke pal orek kofwen mari, ku in kai ke oiye akesrui. Ma el lungse yok in akkalemye pa: “Ke ma inge sano, tu komwos tia etu len sa ku aur sa.” Siyuk sum sifwanu, ‘Ya Nga akola na paye nu ke oasr tari lun Jisus?’ Kut lalalfongi tari la Jisus el inge eis tari ku lal in kol in kosrao, tusruktu ya kut nunku yok na paye la ‘Mwen nutin met el tuku in pukunyeng in kosrao ke ku lulap a mwolanu’? (Mattu 24:30) Ke “infwulwen fong,” pal in tuku lun met pusla futoto inge liki na meet in oanu ke pal se ma mutan virgin elos tufwanu illa in sunol. E fwa oupanu, ke pal in tuku lun Mwen nutin met in kunausla akmwuk koluk se inge futoto inge liki na meeta ke pal se ma kut tufwanu mutamwauk in sano tuku lal. (Rom 13:11-​14) Ya kut oaru na nu ke pal kut sano, a akola yok meyen pal futotoeni?

¹⁰ In akos ma sap inge “ke ma inge, sano,” enenu in akola pal nu kemwa. Mutan virgin limekosr elos lela oil lalos in lusr a elos som in sifwil moli kutu. Sie met Kristian ke len inge el ku in oupanu fuleak lalalfongi lal in filiye nunuk lal ke kutena ma saye paenang el tia akola na paye nu ke tuku lun Kraist su arulanu apkurun. Ma inge sikyuk nu sin met Kristian puspis ke century se meet. Paenang ku pa in sikyuk nu sin kutu met misinge. Ke ma inge lela kut in siyuk sesr sifwanu, ‘Ya ma inge sikyuk nu sik?’​—1 Tessalonika 5:​6-8; Hibru 2:1; 3:​12; 12:3; Fwakyuk 16:15.

Akola Pal Nu Kemwa Meyen Pal Safla Futotoeni

¹¹ Ke me pupulyuk lal toko, Jisus el tia kaifwe nu sin met tuma lutlut lal in akola mukena. Tokin el sramsram nu selos ke mutan virgin lalmetmet a mutan virgin lalfon, el akkalemye pa nu selos ke sie me pupulyuk ke talen. (Rid Mattu 25:14-​30.) Ke luma puspis, ma inge apkurun in oanu sie ke me pupulyuk lal ke mina, su Jisus el akkalemye nu selos meet meyen met puspis “elos nunku mu tu togusrai lun God fwa sikme kitinmisinge.”​—Luk 19:11-​27.

¹² Ke me pupulyuk lal ke talen, Jisus el sramsram ke sie mokul su meet liki el fwafwasyesr nu ke an saye, el pangon na met kulansap tulo lal. El sang talen limekosr nu sin sie, talen luo nu sin sie, talen se nu sin se​—“nu sin kais sie selos fwal nu ke ku lal.” Oiye inge, pa talen se ke silfer pa inge, lupan mani se pa inge su ke pal ingo sie met orekma el enenu in orekma ke lusen yiu 14 meet liki el ku in eis lupa se inge​—mani lulap se pa inge! Ke pal se ma mokul se inge el tuku, el lolngok yurin met kulansap lal in siyuk ke ma elos oru ke lusen “pal loes” ma el wangin. Met kulansap luo elos oru in oasr kapek ke pal luo mani lal su el sang nu selos. El fwak: “Mwo orekma lom” a el mwolela nu sin kais sie selos kunokon yok, a el fwak: “Kom ilyuk nu in engun lun leum lom.” Meyen el fwak la leum el siyuk ma pukanten alukela ma fwal, paenang met kulansap su oasr talen siefwunnu el tia oru in kapek talen lal ke kutena inkanek. El okanla mani, a el tia pa filiye ke bank tu in oasr kapek. Leum el pangnol “met kulansap koluk a alsrungesr” meyen el tia orekma fwal nu ke lungse lun leum lal. Ke saflaiye, talen se etukla lukel, a sisila met kulansap se likin loomu “a fwa oasr tung a ngangorngor in mwusel.”

¹³ Sifwilpa, kut kalem la me sramsram inge nu kemwa oasr kalme yok. Ke sie me pupulyuk, Jisus, el lumeyuk nu sin mokul inge su fwafwasyesr a som nu in an saye, el likiye met tumal lutlut lal, a som nu in kosrao, a sano ke lusen pal loes nu ke el eis ku lun togusra.b (Sam 110:​1-4; Orekma 2:​34-​36; Rom 8:​34; Hibru 10:12, 13) Aok, sifwilpa, kut ku in akilen sie me lutlut yok ku akmwuk su kut nu kemwa enenu in orekmakin ke moul lasr. Mea ma inge?

¹⁴ Fwinne fwinsrak lasr in moul ma patpat in kosrao ku moul ma patpat ke sie Paredais fwin fwalu, me pupulyuk lal Jisus akkalemye la kut enenu in kaifweung ke orekma lun met Kristian. Aok, kas in luti lun me pupulyuk se inge ku in akkalemye ke kas siefwunnu: Moniyuk. Met sap nu kemwa elos akkalemye me srikasrak mutamwauk Pentekost 33 C.E. nu tok. Kut ku in rid: “A ke kutupa kas puspis el [Piter] kaskas, a kaifwe nu selos, a fwak: ‘Komwos sifwanu molikomwosla liki fwil ku se inge.’ ” (Orekma 2:​40-​42) A me insemwomwo yok na paye el eis ke sripen kaifweung lal inge! Ke pal se kutu met elos akesrui nu sin met sap ke orekma in luti lun met Kristian, elos inge akkalemye pa moniyuk, a peng mwo “yokelik in fwal nu kemwa.”​—Kolosse 1:​3-6, 23; 1 Korint 3:​5-9.

¹⁵ Esamye koanon me pupulyuk inge​—ke kas in palu ke oasr tari lun Jisus. Oasr me akpayeye puspis lasr su akkalemye la pa·rou·siʹa lun Jisus srakna fwasr a kitin pal lula na saflaiye. Esam kas se su Jisus el akkalemye ke futotoeni lun “safla” a orekma su met Kristian elos enenu in oru. “A mwosasu inge lun togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla a fwa tuku. (Mattu 24:14) Ke kut lotela ma inge in nunuk lasr, kain in met kulansap fuka oasr yurosr? Siyuk sum sifwanu: ‘ya fwal Nga in fwak mu Nga oanu met kulansap se su okanla ma etukyung nu sel, a saap el kurunganang na ma lal sifwanu? Ku anu oasr eteye la Nga oanu elos su mwo a oaru? Ya Nga kaifweung na paye in akkapye ma lun Leum pal nu kemwa?’

Akola a Moniyuk ke Lusen Pal In Oasr Tari Lal

¹⁶ Aok, sayen me pupulyuk a kas palu lal su oasr kalme, me pupulyuk luo inge akkalemye nu sesr ke me aketeye kalem su tuku ke kas lun Jisus sifwanu. Pa inge kas in luti lal: Akola; akkalemye moniyuk, yokna fwin akul ke pa·rou·siʹa lun Kraist ku in liyeyuk. Ma inge sikyuk ingenu. Ke ma inge ya kut akkalemye la kut akola a moniyuk na paye?

¹⁷ Ma wiel Jisus su pangpang Jemes el wangin Fwin Eol Olive meet paenang el tia long kas palu lun Jisus; tusruktu el lotela ma inge tok, a el akilen ma saok su tuku ka. El simusla: “Ke ma inge met lili, komwos in mongfwusesr nu ke pal se Leum el oasr tari. Liye! Met imae el tupan fwako saok fwalu, a el mongfwusesr ka nu ke pal se el eis af meet a af tok. Komwos in ouyepa mongfwusesr; komwos in akkeye insiomwos, tu tuku lun Leum apkurun me.​—Jemes 5:​7, 8.

¹⁸ Meyen God el akkalemye nu sel la el akola in oru nununku upa nu selos nu kemwa su orekmakin me kasrup lalos ke inkanek sesumwos, paenang Jemes el kaifwe nu sin met Kristian in mongfwusesr ke elos sano Jeova in oru orekma. Sie met Kristian su tia mongfwusesr el ku in ekla sie met su lungse in suk foloksak, el pa oasr sumwos in aksumwosye ma sesumwos su kutu met elos oru. Tusruktu, tia enenu in ou inge, meyen pal in nununku el e tuku na paye. Me pupulyuk ke met imae akkalemye ou inge, oanu Jemes el aketeye.

¹⁹ Sie met Israel su orek imae el taknelik fute lal a enenu in sano, ma se meet, ke sra, na ke kapek lun sak, isus fwako, a saflaiye kosrani. (Luk 8:​5-8; Jon 4:​35) Ke lusen malem puspis, oasr pal yok nunkeye ke me fosnga. Ya af se meet e tuku a fwal? A fuka af se tok? Ya wet won srisrik ku paka fwa kunausla fwokinsak? (Srike liye Joel 1:4; 2:​23-​25.) Fwinne ou inge, in ma nu kemwa, met imae lun an Israel elos enenu in lalalfongi Jeova a ke pulanpal su el oakiye. (Duteronomi 11:14; Jeremaia 5:​24) Mongfwusesr lun met imae ku in oasr ke lalalfongi wi fwinsrak. Ke lalalfongi el etu la kutena ma el fwinsrak ka ma inge fwa tuku. Payenu la e tuku!

²⁰ Fwinne sie met imae el etu nge pal in kosrani, tusruktu met Kristian ke century se meet tia ku in etu ke pal in oasr tari lun Jisus. Paye, oasr lun Jisus fwa sikyuk na paye Jemes el simusla: “Tu oasr tari [Greek, pa·rou·siʹa] lun Leum apkurun me.” Ke pal se Jemes el simusla kas inge, akul su orek fwin fwalu nu fon ke oasr tari lun Kraist sonna sikyuk. Tusruktu ma inge nu kemwa ku in liyeyuk na paye ke pal inge! Paenang mea pulakin lasr ke pal inge? Akul arulanu kalem. Kut ku in liye ma inge. Kut ku in fwak na paye, ‘Nga liye na paye akul su akpayeyuk.’ Kut ku in lalalfongi in la, ‘Oasr tari lun Leum el tuku tari, a saflaiyen ma inge arulanu futoto.’

²¹ Ke sripe se inge, kut enenu in filiye ke insiesr a orekmakin me lutlut yok su tuku ke me pupulyuk luo lun Jisus su kut tufwanu tuni. El fwak: “Ke ma inge sano, tu komwos tia etu len sa ku aur sa.” (Mattu 25:13) Wangin alollo la pa inge pal kut nu kemwa fwal in akkalemye moniyuk ke orekma lasr in oanu orekma lun met Kristian. Lela kut in akkalemye ke moul lasr ke len nu kemwa la kut kalem ke ma Jisus el aketeye. Lela kut in akola pal nu kemwa! Lela kut in moniyuk!

[Footnotes]

Ya Kom Esam?

◻ Mea me lutlut yok su kom ku in eis ke me pupulyuk ke mutan virgin lalmetmet a mutan virgin lalfon?

◻ Ke inkanek lun me pupulyuk ke talen, kain in kai mwo fuka Jisus el sot nu sum?

◻ Ke inkanek fuka mongfwusesr lom futoto nu ke pa·rou·siʹa oanu mongfwusesr lun met imae Israel?

◻ Efu kut ku in fwak la pa inge pal su purakak insiesr a sie pal su tia fwusesr nu sesr in moul?

[Study Questions]

1. Met sap Jon el ngetuk nu ke mea?

2. Fwin ke oasr tari lal Jisus, mea ma sikyuk ke alu puspis?

3. (a) Mea met Kristian paye elos pula ke pa·rou·siʹa? (b) Mea kut akola in tuni ke pal inge?

4. Mea me sramsram yok ke me pupulyuk ke mutan virgin?

5. Mea Ma Simusla su akkalemye kalmen me pupulyuk ke mutan virgin?

6. Jisus el sang kas in kaifwe fuka ke pal se ma el aksafyela me pupulyuk lal ke mutan virgin?

7. Ke inkanek fuka mutan virgin limekosr ke me pupulyuk elos tia lalmetmet?

8. Fuka mutan virgin limekosr ke me pupulyuk elos akkalemye la elos lalmetmet?

9, 10. Mea me lutlut yok ke me pupulyuk ke mutan virgin, a kain in kusensiyuk fuka kut enenu in siyuk sesr sifwanu?

11. Kain in me pupulyuk fuka Jisus el sang tok, a ma inge apkurun in oanu sie ke mea?

12. Mea me sramsram yok ke me pupulyuk ke talen?

13. Mea me akpayeye su akkalemye la Jisus el pa oanu leum ke me pupulyuk?

14. Me pupulyuk ke talen el akkalemye ma enenu yok ke mea?

15. Ke inkanek mwo fuka kut enenu in orekmakin me lutlut yok ke me pupulyuk ke talen?

16. Mea me sramsram yok ke me pupulyuk luo su kut tuni el akkalemye nu sum?

17, 18. Mea met tuma lutlut Jemes el kai fwin ke oasr tari lal Jisus?

19. Met imae Israel el enenu in akkalemye kain in mongfwusesr fuka?

20. Fuka kut ku in akkaleye mongfwusesr fwal nu ke kai lal Jemes?

21. Mea kut sulela na paye in oru?

[Pictures on page 29]

Me lutlut fuka kom lotela ke me pupulyuk ke mutan virgin a ke me pupulyuk ke talen?