Oaru in Kahsruh Mwet Lili Nuhkewa Wiyacn Christ

1, 2. (a) Mwe puhpuhlyuck fuhkah Jesus el sruhmuhn nuh sin kawuck na fototo lal ah? (b) Meac kuht enenuh in etuh ke mwe puhpuhlyuck se ke sheep ac goat uh?

JESUS el sramsram nuh sin kawuck ekahsr lal suc el arlac fototo nuh se, suc elos pa Peter, Andrew, James, ac John. Eltahl tuhfahna lohng ke el sruhmuhn kahs in puhpuhlyuck ke mwet kuhlwacnsap oaru ac lahlmwetmwet, ke muhtwacn fuhsr singucul ac ke talen ah. Jesus el ahksahfye sramsram lal uh ke sie pac kahs in puhpuhlyuck. El sruhmuhn ke sie pacl ma “Wen nuhtin mwet” ac fah nuhnuhnkuh “mwet in muhtuhnfacl nuhkewa.” Tohkoh, Jesus el sifwil pac fahk nuh sin kawuck lal inge ke sie kahs in puhpuhlyuck. El fahk muh “Wen nuhtin mwet” el ac fah sraclihk mwet uh nuh ke u luo, suc el ahkuhtweyac muh oacna sheep ac goat. El oacyacpac ahkuhtweyac ke u se ahktolu suc arlac yohk srihpac ac elos pa mwet lili wiyacn “Tohkohsrah.”​—Riti Matthew 25:31-46.

² In oacna mwet sap ah, mwet kuhlwacnsap luhn Jeova ke pacl lasr uh eltahl luhngse in etuh pac ke kahs in puhpuhlyuck se inge mweyen ma inge kalmackihn nuh ke moul kuh misac nuh sin mwet pucspucs. Jesus el fahk lah kuhtuh ac fah eis moul ma pahtpaht ac kuhtuh pac sahyac ac fah kuhnanuclac. Pa inge srihpac pwacnacng kuht enenuh in etuh lah meac kalmacn kahs in puhpuhlyuck inge ac meac kuht enenuh in oruh in eis moul ma pahtpaht. Pwacnacng ke mwe lutlut se inge, kuht ac fah topuk kihsen siyuck ekahsr inge: Jeova el kahsre kuht fuhkah in kahlwem ke mwe puhpuhlyuck inge? Kuht etuh fuhkah lah mwe puhpuhlyuck se inge sramsram yohk ke orekma in luti uh? Suc ngac enenuh in oruh orekma in luti uh? Ac efuh yohk srihpac nuh sin mwet uh eltahl in oaru ke pacl inge nuh sin “Tohkohsrah” ac mwet lili wiyacl uh?

JEOVA EL KAHSRE KUHT FUHKAH IN KAHLWEM KE MWE PUHPUHLYUCK INGE?

3, 4. (a) Meac kuht enenuh in etuh tuh kuht in kahlwem ke mwe puhpuhlyuck se inge? (b) Ke yac 1881, Watch Tower uh ahkuhtweyac fuhkah mwe puhpuhlyuck se inge?

³ In kahlwem ke kalmacn mwe puhpuhlyuck se ke sheep ac goat ah, kuht enenuh in etuh lah (1) suc “Wen nuhtin mwet,” kuh “Tohkohsrah,” suc sheep ac goat uh, ac suc mwet lili wiyacn Tohkohsrah? (2) ngac “Wen nuhtin mwet” el ac fah sraclihk, kuh nuhnuhnkuh sheep ac goat? ac (3) efuh kuhtuh seltahl pahngpahng sheep ac kuhtuh pac pahngpahng goat?

⁴ Ke yac 1881, Watch Tower se inge fahk muh “Wen nuhtin mwet,” kuh “Tohkohsrah” uh, pa Jesus. Mwe rit se inge ahkuhtweyac pac lah mwet lili wiyacn Tohkohsrah uh tiac mwet na ma ac weluhl Jesus in kol in kuhsrao, tuhsruhktuh mwet nuhkewa pac suc ac wi moul fin facluh tukun eltahl eklac mwet suwohswohs. Watch Tower se inge fahk pac muh mwet uh ac orekwelihk ke lusen Yac Sie Tausin ke Kolyuck luhn Christ ac ke mwet nuhkewa ma etahi ohiyacn luhngse luhn God ke ma nuhkewa eltahl oruh uh ac fah pahngpahng sheep.

5. Ke yac 1923, mwet luhn God uh kahlwem fuhkah ke mwe puhpuhlyuck inge?

⁵ Tok, Jeova el kahsruh mwet lal uh in kahlwem ke mwe puhpuhlyuck sac liki meet ah. Ke yac 1923, Watch Tower ke October 15 fahk muh “Wen nuhtin mwet” pa Jesus. Tuhsruhktuh ma inge orekmakihn fuhs in Bible ma ahkuhtweyac lah mwet lili wiyacn Christ ke mwe puhpuhlyuck sac pa mwet na ma ac weluhl Jesus kol, ac eltahl nohfohn fah muhta in kuhsrao ke Kolyuck lal ke lusen Yac Sie Tausin. Ma inge fahk pac lah sheep inge luhmweyuck nuh ke mwet ma muhta fin facluh ye kolyuck lal Jesus ac mwet lili wiyacl uh. Ac ke srihpen mwe puhpuhlyuck se inge fahk lah mwet inge kahsruh mwet lili wiyacn Tohkohsrah, pwacnacng orekma in sraclihk kuh nuhnuhnkuh uh ac enenuh in orek ke pacl se mwet lili akmuhsralah luhn Jesus inge srackna oasr fin facluh. Ac ma inge ac fah orek meet liki muhtwacwack Kolyuck lal ke lusen Yac Sie Tausin. Mwe lutlut sac fahk pac lah efuh sheep uh pa mwet ma luhlahlfongi kacl Jesus ac luhlahlfongi lah Tohkohsrahi inge ac fah use sie moul na wowo.

6. Ke yac 1995, kahlwem lasr ke mwe puhpuhlyuck se inge eklac fuhkah?

⁶ Ke lusen yac pucspucs, kuht nuhnkuh muh mwet uh nuhnuhnkweyuck ke inkacnek luhn orekma in luti ke lwen sahflah uh. Eltahl fin lohng pweng wo uh, eltahl oacna sheep, tuhsruhktuh eltahl fin tiac lohng, eltahl oacna goat. Tuhsruhktuh ke yac 1995, kahlwem lasr ke mwe puhpuhlyuck se inge eklac. The Watchtower srihkeyac Matthew 24:29-31 (riti) nuh ke Matthew 25:31, 32 (riti), ac ahkuhtweyac lah Jesus el ac fah nuhnuhnkuh mwet uh ke lusen lwen in ongaiyac luhlahp ke pacl se Wen nuhtin mwet el ac “tuhkuh in wolacna lal.”a​—Liye footnote.

7. Meac kalmacn mwe puhpuhlyuck se inge?

⁷ Ke pacl inge, kuht kahlwem ke mwe puhpuhlyuck se ke sheep ac goat inge. Kuht etuh lah “Wen nuhtin mwet,” kuh “Tohkohsrah” uh, pa Jesus. Mwet lili wiyacn Tohkohsrah uh pa mwet ma akmuhsralah ke ngun muhtahl ac fah weluhl Jesus kol in kuhsrao. (Rome 8:16, 17) “Sheep” ac “goat” uh luhmweyuck nuh ke mwet in muhtuhnfacl nuhkewa. Eltahl ac fah nuhnuhnkweyuck ke sahflahiyen lwen in ongaiyac luhlahp suc ac apkuhran in muhtwacwack. Ac kuht etuh lah Jesus el ac fah nuhnuhnkuh mwet uh fal nuh ke ohiyacltahl nuh sin mwet akmuhsralah suc srackna oasr fin facluh. Kuht arlacna engan lah Jeova el kahsre kuht ke lusen yac pucspucs in kahlwem ke mwe puhpuhlyuck se inge ac ke kuhtuh pac mwe puhpuhlyuck sahyac suc oasr in Matthew sapta 24 ac 25!

MWE PUHPUHLYUCK SAC LUTI KUHT LAH OREKMA IN LUTI UH ARLACNA YOHK SRIHPAC

8, 9. Efuh Jesus el pahngon sheep uh “mwet suwohswohs”?

⁸ Ke mwe puhpuhlyuck se ke sheep ac goat ah, Jesus el tiac orekmakihn kahs inge, orekma in luti. Na pwacnacng kuht etuh fuhkah lah mwe puhpuhlyuck sac luti kuht lah orekma in luti uh yohk srihpac na pwacye?

⁹ In konwacack top nuh kac uh, ma se meet kuht enenuh in esam lah Jesus el orekmakihn mwe puhpuhlyuck in luti. El tiac sramsramkihn sheep ac goat na pwacye. Ke inkacnek se pacna inge, el tiac srihke in fahk muh kais sie mwet ma ac nuhnuhnkweyuck oacna sheep eltahl enenuh in sang nuknuk ac mongo nuh sin mwet akmuhsralah, in karuhnguhnuhltahl ke eltahl mas, kuh in som muhtwacta yohrohltahl ke acn in kaclpous. Tuhsruhktuh, Jesus el ahkuhtweyac lah mwet ma oacna sheep uh eltahl “mwet suwohswohs” ke srihpen eltahl nuhnkuh ke mwet akmuhsralah uh oacna mwet lili wiyacl. Ac eltahl oaru nuh seltahl ke lusen pacl upac sahflah inge.​—Matthew 10:40-42; 25:40, 46; Luo Timothy 3:1-5.

10. Sheep uh ac kahsruh fuhkah mwet lili wiyacn Christ uh?

¹⁰ Ke pacl se Jesus el ahkuhtweyac mwe puhpuhlyuck se ke sheep ac goat inge, el sruhmuhn pac lah meac ac fah sikyak ke lwen sahflah uh. (Matthew 24:3) Ke sie mwe puhpuhlyuck, el fahk: “Pweng Wo inge ke Tohkohsrahi uh ac fah lutiyuck fin facluh nohfohn.” (Matthew 24:14) Na, meet liki na el sruhmuhn mwe puhpuhlyuck se ke sheep ac goat ah, el oruh mwe puhpuhlyuck se ke talen. Jesus el sruhmuhn mwe puhpuhlyuck se inge in luti mwet akmuhsralah uh lah eltahl enenuh in kwacfeacng ke orekma in luti uh. Tuhsruhktuh, mwet na ekahsr seltahl pa luhlah fin facluh uh ac srackna yohk orekma ma enenuh in orek! Sapkihnyuck mwet akmuhsralah ah eltahl in som luti “mwet nuhkewa” meet liki sahflah. Oacna ke kuht lotelah ke mwe puhpuhlyuck se ke sheep ac goat ah, “sheep” uh ac fah kahsruh mwet lili wiyacl Jesus uh. Ac sie ma wo emeet eltahl kuh in oruh in kahsruh mwet lili wiyacl Jesus uh pa ke orekma in luti uh. Tuhsruhktuh, yac fal in sang mani muhkwena ke orekma se inge kuh in ahkkweyacltahl na ke orekma in luti uh?

SUC NGAC ENENUH IN ORUH OREKMA IN LUTI UH?

11. Kihsen siyuck fuhkah kuhtuh mwetuh ac kuh in siyuck, ac efuh?

¹¹ Ke pacl inge, pihsen mwet tuhma lutlut lal Jesus apkuhran nuh ke million 8, ac inkaiyacltahl tiac mwet akmuhsralah. Jesus el tiac sang talen nuh seltahl, a el sang nuh sin mwet akmuhsralah wiyacl uh. (Matthew 25:14-18) Pwacnacng, sahp kuhtuh mwet uh ac siyuck, ‘Jesus el fin tiac sang talen uh nuh seltahl, yac pwacye lah eltahl enenuh in wi luti?’ Ahok. Kuht srihke liye lah efuh.

12. Meac kuht lotelah ke kahs lal Jesus ma konweyuckyak in Matthew 28:19, 20?

¹² Jesus el sapkihn mwet tuhma lutlut lal nuhkewa in luti. Tukun Jesus el sifwil moulyak, el fahk nuh sin mwet kuhlwacnsap lal ah eltahl in orek mwet tuhma lutlut ac lotweltahl in ahkos “ma nuhkewa” ma el sapkihn nuh seltahl. Pwacnacng mwet tuhma lutlut inge eltahl enenuh pac in ahkos ke Jesus el sapkihn eltahl in luti. (Riti Matthew 28:19, 20.) Arlacna kahlwem lah kuht nuhkewa enenuh in wi pac luti, finne kuht finsrak in wi moul in kuhsrao kuh fin facluh.​—Orekma 10:42.

13. Meac kuht lotelah ke aruhruhma se ma John el liye ah?

¹³ Ke puk luhn Fwackyuk, kuht lotelah lah orekma in luti uh ac fah orek sin mwet akmuhsralah ac kuhtuh pac sahyac. Jesus el sang nuh sel mwet sap John sie aruhruhma ke sie “muhtwacn suc ahkolah in macruht.” Muhtwacn se inge suli mwet uh in fahsruh ac nihm kof in moul. Muhtwacn se ma ahkolah in macruht inge el luhmweyuck nuh sin mwet akmuhsralah 144,000, suc ac fah weluhl Jesus in kol in kuhsrao. (Fwackyuk 14:1, 3; 22:17) Kof inge luhmweyuck nuh ke mwe kihsac lal Jesus ma ac fah kahsruh mwet uh in eis moul wowo suc ac fah wacngihn ma kuluk ac misac. (Matthew 20:28; John 3:16; Sie John 4:9, 10) Mwet akmuhsralah uh eltahl moniyuck in luti mwet uh ke mwe molwelah ac lah fuhkah eltahl ac kuh in eis ma wo kac. (Sie Corinth 1:23) Tuhsruhktuh, aruhruhma sac sruhmuhn pac sie un mwet suc tiac mwet akmuhsralah tuhsruhktuh oasr finsrak laltahl in moul fin facluh. Eltahl oacyacpac sapkihnyuck in suli mwet uh ac fahk: “Fahsruh!” Ac eltahl ahkos ma sapkihnyuck inge ke eltahl luti nuh sin mwet sahyac ke pweng wo uh. Pwacnacng aruhruhma se inge ahkpwacyeye lah mwet nuhkewa suc lohng ke pweng wo inge enenuh in luti mwet sahyac uh kac.

14. Kuht ac ahkos fuhkah “ma sap luhn Christ”?

¹⁴ Mwet nuhkewa suc ahkos “ma sap luhn Christ” enenuh in luti. (Galatia 6:2) Jeova el luhngse mwet nuhkewa suc alu nuh sel in ahkos ma sap se pacna inge. In pacl meet ah, el sapkihn mwet Israel ac mwet nuhkewa sahyac suc muhta yohrohltahl ah in ahkos masap lal uh. (Exodus 12:49; Leviticus 24:22) Pwacye lah mihsenge, kuht tiac enenuh in ahkos ma sap nuhkewa ma ituckyang nuh sin mwet Israel ah. Tuhsruhktuh, kuht finne mwet akmuhsralah kuh tiac, kuht enenuh in ahkos “ma sap luhn Christ.” Ma yohk srihpac emeet suc Jesus el luti nuh sesr uh pa kuht in luhngse mwet nuhkewa. (John 13:35; James 2:8) Kuht enenuh in luhngse Jeova, Jesus ac mwet nuhkewa. Ac inkacnek se ma wo emeet kuht in ahkkahlwemye luhngse inge uh pa ke pacl kuht fahkwack pweng wo ke Tohkohsrahi nuh sin mwet uh.​—John 15:10; Orekma 1:8.

15. Efuh kuht kuh in fahk muh Jesus el sapkihn mwet tuhma lutlut nuhkewa lal in wi luti?

¹⁵ Kuhtuh pacl uh kahs lal Jesus nuh sin mwet tuhma lutlut ekahsr na kuh pac in ma nuh sin mwet tuhma lutlut pucspucs. Ke sie mwe puhpuhlyuck, Jesus el oraclah sie wuhleacng nuh sin mwet tuhma lutlut 11 na, ac el wulela nuh seltahl lah eltahl ac fah weluhl kol ke Tohkohsrahi lal. Tuhsruhktuh, mwet 144,000 nohfohn ac fah weluhl in kol. (Luke 22:29, 30; Fwackyuk 5:10; 7:4-8) Ac tukun God el ahkmoulyelack Jesus, mwet tuhma lutlut ekahsr na pa lohng ma sap lal inge in luti pweng wo. (Orekma 10:40-42; Sie Corinth 15:6) Tuhsruhktuh mwet tuhma lutlut nuhkewa lal Jesus in pacl meet ah ahkos ma sap lal inge. (Orekma 8:4; Sie Peter 1:8) Mihsenge pac, kuht etuh lah kuht enenuh in wi luti, finne kuht tiac lohng puhsracl Jesus ke el fahk nuh sesr in oruh orekma se inge. Apkuhran nuh ke million 8 sesr oruh orekma in luti uh. Kuht etuh lah ke pacl se kuht som luti uh, kuht ahkkahlwemye na pwacye lah kuht fihliyac luhlahlfongi lasr kacl Jesus.​—James 2:18.

PA INGE PACL IN AHKKAHLWEMYE OARU

16-18. Kuht ac ahkkahlwemye fuhkah oaru lasr in kahsruh mwet wiyacn Christ uh, ac efuh kuht enenuh in ahkkahlwemye oaru lasr ke pacl inge?

¹⁶ Upaclah liki meet ah orekma lal Setan in lain mwet Christian akmuhsralah wiyacl Christ suc srackna moul fin facluh uh, ac el etuh la “fototo pacl luhlah lal.” (Fwackyuk 12:9, 12, 17) Tuhsruhktuh finne oasr mwe lain upac lal Satan, mwet akmuhsralah uh eltahl tahfwelah na in kol orekma in luti uh, ac arlac puhs mwet ke pacl inge ma luhngse lohng ke pweng wo uh. Kahlwem lah Jesus el wi mwet akmuhsralah uh, ac el pa koluhltahl uh.​—Matthew 28:20.

¹⁷ Kuht puhla lah sie mwe insewowo na yohk in kahsruh mwet lili wiyacn Christ in oruh orekma in fahkwack pweng wo. Kuht sang pac kahsruh ke inkacnek luhn mani ac ke kuht orekma upac in muhsahi Lohm in Toeni ac Bethel, kuh Ohfuhs luhn Mwet Loh luhn Jeova. Kuht fin oaru in ahkos mwet elder ac mukul lili sahyac ma srihsrngiyucki sin mwet kuhlwacnsap oaru ac lahlmwetmwet, kuht ahkkahlwemye lah kuht luhngse na pwacye in kahsruh mwet lili wiyacn Christ.​—Matthew 24:45-47; Hebrew 13:17.

¹⁸ Ke pacl na sa, mwet luhlah sin mwet akmuhsralah uh eltahl ac fah eis sil sahflah laltahl. Tukun ma inge, lipufacn uh ac fuhlwelah “eng ahkosr luhn facluh,” ac lwen in ongaiyac luhlahp uh ac fah muhtwacwack. (Fwackyuk 7:1-3) Meet liki muhtwacwack Armageddon, Jesus el ac fah eis mwet akmuhsralah uh nuh in kuhsrao. (Matthew 13:41-43) Pwacnacng kuht fin luhngse in nuhnuhnkweyuck oana sheep ke pacl se Jesus el tuhkuh uh, pa inge pacl in ahkkahlwemye oaru lasr nuh sin mwet akmuhsralah wiyacn Christ.