Yac Kom Ac Fah “Taran ac Sano”?

1, 2. (a) Meac Jesus el ahkkahlwemye muh ac sikyak ke lwen sahflah? (b) Kihsen siyuck fuhkah kuht ac fah lutlutkihn uh?

SRIHKE luhmahlah ke nuhnak lom ke Jesus el muhta ke Finohl Olive ngweti liye tempuhl luhn acn Jerusalem. El wi mwet tuhma lutlut ahkosr lal ah, Peter, Andrew, James, ac John. Eltahl lohacng ahkwoyac nuh sel Jesus ke el sruhmuhn nuh seltahl sie kahs pahluh na usrnguck. Kahs pahluh se inge ahkkahlwemye ma ac fah sikyak ke lusen lwen sahflah ke facl kuluk se inge, ke Jesus el ac fah kol ke Tohkohsrahi luhn God. Jesus el fahk nuh seltahl lah ke lusen lwen sahflah, “mwet kuhlwacnsap oaru ac lahlmwetmwet” lal ac fah aholuhl in kihte mwe mongo in ngun ke pacl fal nuh sin mwet kuhlwacnsap nuhkewa lal fin facluh.—Matthew 24:45-47.

² Tohkoh, ke kahs pahluh sac pacna, Jesus el ahkkahlwemye mwe puhpuhlyuck se ke muhtwacn fuhsr singucul. (Riti Matthew 25:1-13.) Ke mwe lutlut se inge, kuht ac lutlutkihn kihsen siyuck inge nuhkewa: (1) Meac mwe lutlut yohk ke mwe puhpuhlyuck inge? (2) Mwet kuhlwacnsap oaru uh eltahl orekmakihn fuhkah kahs in kahsruh ke mwe puhpuhlyuck inge, ac fuhkah sahflahiyen ma inge? (3) Ke pacl inge, ma wo fuhkah kais sie sesr kuh in eis ke mwe puhpuhlyuck lal Jesus inge?

MEAC MWE LUTLUT KE MWE PUHPUHLYUCK INGE

3. Ke pacl meet ah, mwe rit nahtuhsr uh ahkuhtweyac fuhkah mwe puhpuhlyuck ke muhtwacn singucul ah, ac meac ma inge oruh?

³ Ke mwe lutlut tari ah, kuht lotelah lah ke pacl inge mwet kuhlwacnsap oaru eltahl ekuhllah inkacnek in ahkuhtweyac laltahl ke kuhtuh ma suhmuhslah in Bible uh. Ke pacl inge, mwet kuhlwacnsap oaru eltahl lohacng yohk nuh ke mwe lutlut yohk ma kuh in orekmakihnyuck ac tilac arlac lohacng yohk nuh ke ma ac kuh in luhmweyuck nuh kac kuh kalmacn kahs pahluh. Ke sie mwe puhpuhlyuck, nuhnkuh ke mwe luti lal Jesus ke muhtwacn fuhsr singucul ah. Meet, mwe rit nahtuhsr uh luti muh lahm, oil, ac suhfah in nwenyuck sac luhmweyuck nuh ke sie ma, kuh sie mwet. Yac lohacng yohk lasr nuh ke kais sie ip srihsrihk ac kuh in ahkwacngihnyelah mwe lutlut yohk srihpac ke mwe puhpuhlyuck se? Top nuh ke kihsen siyuck se inge arlac yohk srihpac.

4. Ke mwe puhpuhlyuck sac, kuht etuh fuhkah lah (a) suc mukul pihsrlac sac? (b) suc muhtwacn fuhsr ah?

⁴ Kuht in tuni ahkwoyac kahs na yohk srihpac ke mwe puhpuhlyuck lal Jesus ah. Ma se meet, nuhnkuh ke mwet ma sruhmuhnyuck ke mwe puhpuhlyuck se ke muhtwacn fuhsr singucul ah. Suc mwet pihsrlac sac, kuh mukul se ma ac fah pahyuck inge? El pa Jesus. Kuht etuh ma inge mweyen meet liki pacl sac, Jesus el ahkkahlwemye kacl sifacna muh el oacna mwet pihsrlac se. (Luke 5:34, 35, BMK) Suc muhtwacn fuhsr inge? Eltahl pa “u srihsrihk” se ke Mwet Christian akmuhsralah. Kuht etuh fuhkah? Ke mwe puhpuhlyuck sac, muhtwacn fuhsr ah eltahl enenuh in ahkolah ac ahkosack lahm laltahl ke pacl se mukul pihsrlac sac tuhkuh. Ingena, lohacng ahkwoyac nuh ke ma Jesus el fahk nuh sin mwet tumal lutlut akmuhsralah lal ah: “Loseni infulwowos in kuh, ac ahkosack lahm lowos an, tuh kowos in ahkolah nuh ke kuhtwena ma ac sikyak, oacna mwet kuhlwacnsap suc tuhpan fohlohkoh lun mwet kacto lalos liki kuhfwen macruht uh.” (Luke 12:32, 35, 36) Mwet sap Paul el puhpuhlyuckkihn mwet tuhma lutlut akmuhsralah luhn Christ nuh ke muhtwacn fuhsr nwacsnwacs. (Luo Corinth 11:2) Ke ma inge kuht kahlwem kac lah kahs in kahsruh ac kahs in sensen ma ituckyang nuh sin muhtwacn fuhsr singucul ke Matthew 25:1-13 ma nuh sin mwet akmuhsralah lal Jesus uh.

5. Jesus el ahkkahlwemye fuhkah puhlan pacl se suc mwe puhpuhlyuck lal inge sruhmuhnyuck uh?

⁵ Ma se tok uh, puhlan pacl fuhkah se kahs in kahsruh lal Jesus inge sruhmuhnyuck uh? Ma Jesus el fahk ke sahflahiyen mwe puhpuhlyuck sac kuh in kahsre kuht in etuh. El fahk: “Mwet pihsrlac el tuhkuh.” (Matthew 25:10) Ke July 15, 2013, Watchtower, kuht lotelah lah kahs pahluh lal Jesus in Matthew sapta 24 ac 25 sruhmuhn pacl oalkosr ke “tuhkuh” lal Jesus. Ke Jesus el sramsramkihn “tuhkuh” lal uh, el kalmackihn nuh ke puhlan pacl in ongoiye luhlahp ke el ac tuhkuh in nuhnuhnkuh ac kuhnauslah facl kuluk se inge. Pa oruh kuht kuh in fahk lah mwe puhpuhlyuck lal Jesus ah ma nuh ke lwen sahflah ac el fah tuhkuh ke pacl in ongoiye luhlahp.

6. Mwe lutlut yohk srihpac fuhkah tuhkuh ke mwe puhpuhlyuck sac?

⁶ Mwe lutlut yohk srihpac fuhkah kuht lotelah ke mwe puhpuhlyuck se inge? Esam kuhtuh pac fuhs ac ma sihmlac in Bible uh. Ke Matthew sapta 24, Jesus el ahkuhtweyac ke “mwet kuhlwacnsap oaru ac lahlmwetmwet.” Mwet kuhlwacnsap inge pa u srihsrihk se ke mwet akmuhsralah suc fah kol mwet tuhma lutlut nuhkewa luhn Christ ke lusen lwen sahflah. Jesus el sensenkihn mukul nuhkewa inge eltahl in sruokyacna ohiyacn oaru laltahl. Ke sapta tohkoh an, Jesus el orekmakihn mwe puhpuhlyuck ke muhtwacn fuhsr singucul ah in sang kahs in kahsruh nuh sin mwet akmuhsralah nuhkewa lal ke lwen sahflah. Mwe lutlut yohk srihpac nuh seltahl uh pa in “taran ac sano,” tuh mwe insewowo laltahl in som nuh in kuhsrao in tiac tuhlac. (Matthew 25:13) Ingena, lwelah kuht in tuni ahkwoyac mwe puhpuhlyuck sac ac kuht in liye lah fuhkah mwet akmuhsralah ah orekmakihn kahs in kahsruh inge.

MWET AKMUHSRALAH UH ELTAHL OREKMAKIHN FUHKAH KAHS IN KAHSRUH KE MWE PUHPUHLYUCK?

7, 8. (a) Efuh kuh muhtwacn fuhsr lahlmwetmwet ah ahkolah? (b) Mwet akmuhsralah uh ahkolah fuhkah?

⁷ Ke mwe puhpuhlyuck se inge, Jesus el ahkkahlwemye in kahlwem lah muhtwacn lahlmwetmwet ah eltahl ahkolah ke pacl se mukul pihsrlac sac tuhkuh, ac eltahl tiac oacna muhtwacn lahlfon ah. Efuh? Mweyen eltahl ahkolah, taran ac sano. Muhtwacn fuhsr singucul ah eltahl enenuh in sano na ac oruh lahm laltahl in fihrihr ke lusen fong fohn sac. Muhtwacn lahlmwetmwet lihmekohsr ma tiac oacna muhtwacn lalfon lihmekohsr ah, eltahl ahkolah mweyen eltahl us lahm laltahl ac kuhtuh pac suhfah in oil. Mwet Christian akmuhsralah uh eltahl ahkolah fuhkah nuh ke tuhkuh lal Jesus uh?

⁸ Mwet akmuhsralah uh ahkolah in ahkpwacyeye kunohkohn laltahl uh nwe ke sahflah. Eltahl etuh lah ke orekma in kuhlwacnsap laltahl nuh sin God, eltahl enenuh in fuhleack kuhtwena ohiyac kuh moul kahsruhp ke facl lal Setan uh, ac eltahl inse muhlahlah in oruh ma inge. Eltahl arlacna ke sruokyac oaru laltahl in kuhlwacnsuhpuh Jeova, tiac ke srihpen sahflah uh apkuhran me, a mweyen eltahl luhngse na pwacye God ac Wen nahtuhl. Eltahl sruokyac na oaru laltahl ac tiac lwelah ohiyac kuluk luhn facluh oacna in luhngse ma pucspucs, moul fohkfohk, ac nuhnkuh kac sifacna in ahkkulukyacltahl. In oacna ke muhtwacn fuhsr lahlmwetmwet ah ahkolah wi lahm laltahl, mwet akmuhsralah uh tahfwelah in tohlack kahlwem fin facluh. Eltahl mongfihsracsr tuhpan na tuhkuh luhn mwet pihsrlac sac, el finne pahtlac in tuhkuh.​—Philippi 2:15.

9. (a) Kahs in sensen fuhkah Jesus el ahkkahlwemye ke ohiyacn mwetkeli? (b) Mwet akmuhsralah eltahl topuk fuhkah kahs in kwacfe inge: “Mwet pihsrlac el a tuhkuh inge”? (Liye pac footnote.)

⁹ Ohiyac se ahkluo ma kahsruh muhtwacn fuhsr lahlmwetmwet inge in ahkolah uh pa ke eltahl mongfihsracsr in sano. Tuhsruhktuh ke mwe puhpuhlyuck sac, muhtwacn fuhsr singucul ah eltahl “muhtwacwack in mwetkeli ac mutullac” ke pacl se eltahl sano mukul pihsrlac se ma pahtlac in tuhkuh ah. Pwacnacng, yac mwet Christian akmuhsralah ke pacl inge uh kuh pac in “mutullac” kuh kihfucsyucklac nuhnak la nuh ke kuhtuh pacna ma sahyac ke eltahl sano tuhkuh luhn Christ? Ahok. Jesus el etuh lah finne mwet se arlacna pwacr ac engan, el kuh pac in muhnahslah kuh lohsrlah ke pacl se el tuhpan tuhkuh lal uh. Pwacnacng mwet Christian akmuhsralah suc arlac oaru eltahl kwacfeacng in sang kuhiyacltahl ke eltahl taran ac sano. Fuhkah? Ke mwe puhpuhlyuck sac, muhtwacn fuhsr singucul ah nohfohn topuk puhsra se ma fahk: “Mwet pihsrlac el a tuhkuh inge!” Tuhsruhktuh, muhtwacn lahlmwetmwet lihmekohsr ah muhkwena pa taran ac sano ah. (Matthew 25:5, 6; 26:41) In oacpacna, ke lusen lwen sahflah uh, mwet Christian akmuhsralah suc oaru eltahl topuk kahs in kwacfe inge: “Mwet pihsrlac el a tuhkuh inge!” Eltahl luhlahlfongi ke mwe ahkpwacyeye na kuh lah Jesus el ac apkuhran in tuhkuh, ac eltahl ahkolah nuh ke tuhkuh lal uh.a (Liye footnote.) Tok, kuht ac tuni sahflahiyen kahs in puhpuhlyuck lal Jesus ah, suc sruhmuhnyuck yohk ke sie puhlan pacl.

MWE INSEWOWO NUH SIN MWET LAHLMWETMWET AC MWE KAI NUH SIN MWET LAHLFON

10. Meac kuht kuh in nuhnkuh nuh sesr sifacna ac siyuck ke sramsram se inmahsrlon muhtwacn lahlmwetmwet ac muhtwacn lahlfon ah?

¹⁰ Apkuhran nuh ke sahflahiyen mwe puhpuhlyuck sac, muhtwacn lahlfon ah siyuck sin muhtwacn lahlmwetmwet ah in sang kuhtuh oil in lahm laltahl ah. Tuhsruhktuh muhtwacn lahlmwetmwet ah tiac na kahsreltahl. (Riti Matthew 25:8, 9.) Yac oasr pacl ma mwet Christian akmuhsralah uh eltahl tiac sang kahsruh nuh sin mwet ma enenuh? Esam lusen pacl se ma mwe puhpuhlyuck inge luhmweyuck nuh kac uh. Jesus, Mwet Pihsrlac sac tuhkuh in oruh nuhnuhnkuh ke apkuhranyang nuh ke sahflahiyen lwen in ongaiyac luhlahp. Ke srihpac se inge, sramsram se laltahl inge kuh pac in luhmweyuck nuh ke ma sikyak meet liki na sahflahiyen lwen in ongaiyac luhlahp uh. Efuh kuh kuht fahk ouinge? Mweyen ke pacl se mwet akmuhsralah uh eis tari sil sahflah laltahl.

11. (a) Meac ac fah sikyak meet liki na muhtwacwack lwen in ongaiyac luhlahp uh? (b) Meac kalmac ke muhtwacn lahlmwetmwet ah fahk nuh sin muhtwacn lahlfon ah in som moul oil laltahl?

¹¹ Ke ma inge, meet liki muhtwacwack lwen in ongaiyac luhlahp uh, mwet akmuhsralah oaru nuhkewa fin facluh ac fah eis sil sahflah laltahl. (Fwackyuk 7:1-4) Ke pacl sac fahlac, arlacna kahlwem lah eltahl ac fah som nuh inkuhsrao. Tuhsruhktuh, nuhnkuh ke yac ekahsr meet liki na lwen in ongaiyac luhlahp uh. Meac ac fah sikyak nuh sin mwet akmuhsralah ma tiac taran ac sano kuh tilac oaru? Eltahl ac tiac eis sil sahflah laltahl uh. Ke pacl sac, kuhtuh mwet Christian oaru uh ac fah akmuhsralah. Ke pacl se ma lwen in ongaiyac luhlahp uh muhtwacwack, mwet lahlfon uh ac lut in liye ke kuhnanuclac Babylon Luhlahp. Sahp ac tuh fah pa inge pacl se eltahl akihlenack lah eltahl tiac ahkolah nuh ke tuhkuh lal Jesus uh. Meac ac sikyak fin eltahl siyuck kahsruh ke pacl sacn? Top kac uh oasr ke mwe puhpuhlyuck sac. Muhtwacn lahlmwetmwet ah tiac sang oil laltahl ah nuh sin muhtwacn lahlfon ah, a eltahl fahk nuh seltahl in som ac moul oil laltahl. Ke srihpen “sun infulwacn fong,” wacngihn mwet in kuhka oil nuh seltahl. Pahtlac tari!

12. (a) Ke lusen lwen in ongaiyac luhlahp, meac ac sikyak nuh sin kuhtwena mwet akmuhsralah suc tilac oaru meet liki na muhtwacwack sil sahflah uh? (b) Meac ac sikyak nuh sin mwet ma oacna muhtwacn lahlfon lihmekohsr ah?

¹² Ke lusen lwen in ongaiyac luhlahp uh, mwet akmuhsralah oaru uh ac tiac kuh in kahsruh kuhtwena mwet ma tilac oaru. Ac pahtlac tari. Pwacnacng, meac ac sikyak nuh sin mwet ma tilac oaru inge? Lohacng nuh ke ma sikyak nuh sin muhtwacn lahlfon ma som moul oil ah. “Mwet pihsrlac el tuhkuh. Muhtwacn lihmekohsr ma lahlmwetmwet uh weluhl utyak nuh ke kuhfwen macruht uh, na kauli sruhnguhl ah.” Ke Jesus el tuhkuh in wolacna lal apkuhran nuh ke lwen in ongaiyac, el ac oracni mwet akmuhsralah oaru lal uh nuh in kuhsrao. (Matthew 24:31; 25:10; John 14:1-3; Sie Thessalonica 4:17) Tuhsruhktuh, Jesus el ac tiac eis mwet seoaru uh. Oacna muhtwacn lahlfon lihmekohsr ah, sahp eltahl ac fahk: “Leum! Leum! Ikacslah nuh sesr!” Tuhsruhktuh, meac Jesus el ac fahk nuh seltahl? Mwe ahsor lah el ac fahk nuh seltahl top se pacna ma el fahk nuh sin mwet ma oacna goat uh: “Tiac kuh! Nga tiac etwekomtacl!”​—Matthew 7:21-23; 25:11, 12.

13. (a) Efuh kuht tiac enenuh in nuhnkuh muh mwet akmuhsralah pucspucs lal Christ uh ac eklac mwet seoaru? (b) Efuh kuht kuh in fahk muh mwe puhpuhlyuck lal Jesus uh ahkkahlwemye lah el luhlahlfongi mwet Christian akmuhsralah lal uh? (Liye petsac se meet ke mwe lutlut inge.)

¹³ Yac kalmacn fahk lal Jesus inge pa inkaiyen mwet akmuhsralah uh ac tilac oaru ac enenuh in aholyucklac? Moh. Esam lah, ke Matthew sapta 24, Jesus el sensenkackihn mwet kuhlwacnsap oaru ac lahlmwetmwet eltahl in tiac eklac oacna mwet kuhlwacnsap kuluk se. Tiac kalmac pa Jesus el etuh muh ma inge ac sikyak. Tuh in oacna, kahs in puhpuhlyuck ke muhtwacn fuhsr singucul ah, ma inge kahs in sensen se na. Oacna ke lihmekohsr sin muhtwacn fuhsr ah lahlfon ac lihmekohsr seltahl lahlmwetmwet, kais sie mwet Christian akmuhsralah uh enenuh in sulaclah eltahl in ahkolah, sano ac taran. Fin tiac, el kuh in eklac sie mwet lahlfon kuh seoaru. Paul el ahkkahlwemye kahs in sensen se pacna inge nuh sin mwet akmuhsralah wiyacl ah. (Riti Hebrew 6:4-9; ac tuni nuh ke Deuteronomy 30:19.) Kahs in sensenkackihn lal ah arlacna kuh, tuhsruhktuh el oacyacpac luhlahlfongi ke mwet lili wiyacl ah, lah eltahl ac fah eis mwe insewowo laltahl uh. Kahs in sensen ke mwe puhpuhlyuck se ke muhtwacn fuhsr singucul inge ahkkahlwemye lah oasr sel Jesus luhlahlfongi se pacna inge nuh sin mwet akmuhsralah. El etuh lah kais sie sin mwet kuhlwacnsap akmuhsralah lal uh kuh in oaru na ac eis mwe insewowo laltahl kac.

MWE INSEWOWO FUHKAH “KUHTUH PAC SHEEP” SAHYAC LUHN CHRIST ELTAHL KUH IN ENGANKIHN?

14. Efuh “kuhtuh pac sheep” sahyac uh kuh pac in insewowokihn kahs in puhpuhlyuck ke muhtwacn fuhsr singucul ah?

¹⁴ Mwe puhpuhlyuck lal Jesus inge ma nuh sin mwet Christian akmuhsralah. Tuhsruhktuh, yac “kuhtuh pac sheep” sahyac uh kuh in eis mwe insewowo ke kahs in puhpuhlyuck lal Jesus uh? (John 10:16) Ahok! Pweng ke mwe puhpuhlyuck inge uh arlac fihsracsr ac kahlwem: “Taran ac sano.” Ac Jesus el tuh fahk pac muh: “Ma nga fahk nuh suwos uh, nga fahk nuh sin mwet nuhkewa: Taran ac sano!” (Mark 13:37) Jesus el enenuh na mwet tuhma lutlut lal nuhkewa uh in ahkolah, taran ac sano. Oacyacpac, mwet Christian nuhkewa kuh in etahi mwe srihkasrak wo luhn mwet akmuhsralah uh, suc sang orekma in luti uh in pa yohk srihpac emeet ke moul laltahl uh. Esam lah muhtwacn lahlfon ah siyuck sin muhtwacn lahlmwetmwet ah in sang kuhtuh oil laltahl ah. Nguhsr laltahl ah ahkacsmakihnye kuht lah ma kunen kais sie sesr in sruokyac na oaru lasr nuh sin God, in ahkolah, taran ac sano. Wacngihn mwet sahyac kuh in oruh ma inge lasr. Kais sie sesr ac fah nuhnuhnkweyuck sel Jesus Christ, mwet nuhnuhnkuh suwohs suc ac kuhracna tuhkuh. Pwacnacng, kuht enenuh na in ahkolah!

15. Efuh kuh macruht lal Christ ac muhtwacn kiacl uh mwe engan na yohk se nuh sin mwet Christian pwacye nuhkewa?

¹⁵ Mwet Christian nuhkewa uh engan ke macruht se ma fwack ke kahs in puhpuhlyuck lal Jesus uh. Ke pacl fahsruh uh, tukun mweun ke Armageddon, mwet Christian akmuhsralah uh fah eklac muhtwacn kiacl Christ. (Fwackyuk 19:7-9) Oasr ma wo suc mwet nuhkewa fin facluh ac fah engankihn ke macruht se in kuhsrao inge. Efuh? Mweyen ma inge ac use sie government suwohswohs nuh sin mwet nuhkewa fin facluh. Finne kuht finsrak in wi moul ma pahtpaht in kuhsrao kuh fin facluh, lwelah kuht in kwacfeacng in ahkolah, taran ac sano. Kuht fin oruh ouinge, kuht ac kuh in engankihn moul na wowo ke pacl fahsruh suc Jeova el ahkolah nuh sesr!