“Tuh Ouinge Wo Ye Motom”

1. “Ngun muhtahl oruh tuh Jesus elan sesseslah ke engan.” Efuh? (Liye petsac se meet ke mwe lutlut se inge.)

SRIHKE luhmahlah ke nuhnak lom muh kom liye ke pacl se “Ngun muhtahl oruh tuh Jesus elan sesseslah ke engan.” Sahp isracsr na luhlahp se oan ke muhtahl ac arlac kahlwem luhpan enganwack lal. Efuh? El tuhfahna suhpwaclah mwet tuhma lutlut 70 lal ah in som luti pweng wo ke Tohkohsrahi luhn God. Ke srihpen arlacna puhs mwet lokoalok suc lain pweng wo uh, Jesus el ke etuh lah eltahl ac oruh fuhkah kunohkohn laltahl uh. Mwet lokoalok inge pa mwet sihm ac mwet Pharisee suc lahlmwetmwet ac eis lutlut yohk. Eltahl ke mwet ah in liyacl Jesus oacna mwet in kamtuh se na ac mwet tuhma lutlut lal ah oacna “mwet na lusrohngtwen suc tiac wi lutlut.” (Orekma 4:13; Mark 6:3) Finne ouinge, mwet tuhma lutlut ah arlacna engan ke pacl se eltahl fohlohk liki kunohkohn laltahl ah. Finne oasr mwe lain kuh mwe ahkkuluk sin demon pucspucs, eltahl tiac tui ke orekma in luti laltahl. Efuh kuh eltahl srackna kuh in engan ac puhlaik?​—Riti Luke 10:1, 17-21.

2. (a) Fuhkah mwet tuhma lutlut lal Jesus ah luhmweyuck nuh ke tuhlihk fuhsr? (b) Meac kahsruh mwet tuhma lutlut lal Jesus ah in srukyac mwe luti loal ac pwacye in Bible uh?

² Akihlen ma Jesus el fahk nuh sin Jeova inge: “Nga sot kuloh nuh Sum, O Pahpah, Leum luhn kuhsrao ac facluh tuh Kom okanlah ma inge liki mwet lahlmwetmwet ac mwet etwacack, ac fahkwack ma inge nuh sin tuhlihk fuhsr. Ahok, Pahpah, tuh ouinge wo ye motom.” (Matthew 11:25, 26, BMK) Efuh Jesus el pahngon mwet tuhma lutlut lal ah tuhlihk fuhsr? Mweyen eltahl tiac oacna mwet sihm ac mwet Pharisee suc eis lutlut yohk ac sifacna nuhnkuh muh eltahl lahlmwetmwet, a mwet tuhma lutlut lal Jesus ah engan in lutiyuck oacna tuhlihk fuhsr. Eltahl etwaclah nuhnak in puhsisacl, ac in tiac inse fuhlwact. (Matthew 18:1-4) Ke srihpen eltahl inse puhsisacl, Jeova el orekmakihn ngun muhtahl lal in kahsreltahl tuh eltahl in kahlwem ke mwe luti loal ac pwacye in Bible uh. Tuhsruhktuh mwet kol inse fuhlwact luhn mwet Jew eltahl lohsrlah sel Satan ac ke ohiyacn inse fuhlwact laltahl sifacna.

3. Meac kuht ac fah lotelah ke mwe lutlut se inge?

³ Kahlwem lah pa inge srihpac pwacnacng Jesus el arlacna engan. El engan in liye lah Jeova el ahkkahlwemye mwe luti loal ac pwacye in Bible uh nuh sin mwet puhsisacl, finne etwacack laltahl uh yohk kuh srihk. Pa inge inkacnek in luti suc wo ye muhtuhn God, ac God el tiac ekyek. El ahkkahlwemye lah fuhkah inkacnek in luti inge srackna wo ye muhtahl? Ke mwe lutlut inge, kuht ac lotelah lah Jeova el ahkkahlwemye fuhkah mwe luti loal ac pwacye in Bible uh nuh sin mwet inse puhsisacl ke pacl inge.

AHKUHTWEYAC NUH SIN MWET NUHKEWA MWE LUTI LOAL AC PWACYE

4. Ke inkacnek fuhkah Tower in San suc ahkfihsracsryeyucklac kahs kac uh oacna sie mwe sang?

⁴ Ke yac ekahsr somlah ah, kahs in kahsruh ma oreklac sin u luhn Jeova ahkkahlwemyeyuck ingena ke inkacnek fihsracsr ac kahlwem liki meet ah. Nuhnkuh ke mwe puhpuhlyuck tolu inge. Ma se meet, oasr Tower in San ke kahs English suc ahkfihsracsryeyucklac kahs kac uh tuh mwet uh in kahlwem kac.a (Liye footnote.) Ma inge sie mwe sang nuh sin mwet pucspucs suc upac nuh se in rit kuh in fahk ke sie kahs sahyac. Sucu pucspucs eltahl konwacack lah ke srihpen kahs English suc ahkfihsracsryeyucklac kahs kac inge, tuhlihk nahtuhltahl uh kuh in kahlwem pac ke Tower in San uh liki na meet ah. Puhs mwet sihm lwacta in ahkkahlwemye kuloh nuh sin Governing Body. Sie muhtwacn lili el fahk lah meet el sahngweng in top ke pacl in lutlut ke Tower in San. Tuh ke pacl inge, el tilac. Tukun el orekmakihn kahs English ma ahkfihsracsryeyucklac inge, el sihmlac ac fahk: “Ingena, nga top puhs liki pacl se, ac wacngihnlac sahngweng se luhk ah. Nga kuloh nuh sin Jeova ac nuh sumtacl.”

5. Meac kuhtuh ma wo ke New World Translation of the Holy Scriptures ma ahksasucyeyucklac?

⁵ Ma se ahkluo, ahksasucyeyucklac New World Translation of the Holy Scriptures ke kahs English muhkwena, ac ke October 5, 2013, ma inge muhtwacwack in kihtakatlah ke sie toeni suc orek ke yac nuhkewa.b (Liye footnote) Ke inkaiyen ma suhmuhslah inge suhpuhseni kahs ma orekmakihnyuck kac uh. Tuhsruhktuh, kalmeyac ac koano uh tiac eklac, ac oacyacpac fihsracsr ac kahlwemi liki na meet ah. Ke sie mwe puhpuhlyuck, ke Job 10:1, meet kahs 27 kac, a ingena kahs na 19. Ke Soakas 8:6, meet kahs 20 kac, a ingena kahs na 13. Fuhs luo inge kahlwemi liki meet ah ke ahksasucyeyucklac uh. Arlac kahlwem lah ma inge pwacye ke srihpen sie mwet akmuhsralah suc arlac oaru ke kuhlwacnsap lal ke lusen yac pucspucs el fahk: “Nga tuhfahna ritelah puk lal Job ke Bible ma ahksasucyeyucklac, ac nga puhla muh pa inge pacl se meet ma nga kahlwem kac!” Puhkantwen mwet ma fahk oacpacna inge.

6. Ke srihpen etwacack lasr ke Matthew 24:45-47 kahlwem liki meet ah, meac puhlakihn lom kac?

⁶ Ma se ahktolu, nuhnkuh ke kuhtuh ma ahkwoyeyucklac ke kahlwem lasr ke kais kuhtuh ma suhmuhslah. Ke sie mwe puhpuhlyuck, ke July 15, 2013 Watchtower, kahlwemack liki meet ah mwe ahkuhtweyac ke “mwet kuhlwacnsap oaru ac lahlmwetmwet.” (Matthew 24:45-47) Mwe lutlut inge ahkuhtweyac lah mwet kuhlwacnsap oaru uh pa Governing Body, kuh U se ma Karihngihn Congregation Nuhkewa luhn Mwet Loh luhn Jeova Fin Facluh Nohfohn. Ac “mwet kuhlwacnsap wiyacl” uh pa mwet akmuhsralah ac “kuhtuh pac sheep” sahyac suc kihteyuck sin mwet kuhlwacnsap oaru. (John 10:16) Kuht engan in etwaclah ma pwacye uh ac in luti ma inge nuh sin kuhtuh pac mwet sahyac. Meac kuhtuh pac inkacnek sahyac ma Jeova el ahkkahlwemye lah mwe luti fihsracsr ac kahlwem pa wo ye muhtahl uh?

MWE AHKUHTWEYAC FIHSRACSR KE MA SUHMUHSLAH UH

7, 8. Meac kuhtuh mwe puhpuhlyuck nuh ke ma suhmuhslah in Bible suc luhmahlah sie ma yohk suc ac fah sikyak ke pacl fahsruh uh?

⁷ Kom fin kuhlwacnsuhpuh Jeova ke lusen yac pucspucs, sahp kom akihlen kuhtuh ma eklac ke inkacnek ma mwe rit nahtuhsr uh ahkuhtweyac kuhtuh ma suhmuhslah ke Bible uh. Ke pacl meet ah, kwacna fwack muh kuhtuh ma suhmuhslah uh luhmweyuck nuh ke sie ma yohk suc ac fah sikyak ke pacl fahsruh uh. Kalmacn sie ma suhmuhslah kuh in luhmweyuck nuh ke sie mwet, sie ma, kuh sie ma sikyak. Yac oasr srihpac wo nuh kac in ahkuhtweyac ma suhmuhslah in Bible uh ke inkacnek ouinge? Ahok. Ke sie mwe puhpuhlyuck, Jesus el sruhmuhn “mwe akucl suc tuh sikyak nuh sel mwet pahluh Jonah.” (Riti Matthew 12:39, 40.) Jesus el ahkuhtweyac lah lusen pacl se Jonah el muhta ke insiacn ik soko ah, ma inge luhmahlah lusen pacl se ma Jesus el ac fah oan in kuclyuck uh.

⁸ Oasr pac ma suhmuhslah sahyac in Bible ma luhmahlah sie ma na yohk ke pacl fahsruh uh. Mwet sap Paul el ahkuhtweyac kuhtuh sin ma inge. Ke sie mwe puhpuhlyuck, inmahsrlol Abraham nuh sel Hagar ac Sarah luhmweyuck nuh ke fototo luhn Jeova nuh sin muhtuhnfacl Israel ac nuh sin u luhn God inkuhsrao. (Galatia 4:22-26) Ke inkacnek se pacna inge, lohm nuknuk muhtahl, tempuhl, Lwen in Elah Ma Kuluk, mwet tol fuhlwact, ac kuhtuh pac ohiyac nuh ke Ma Sap uh, ma inge kewa “luhmah se na ma in akihlenyac ma wo suc ac sikyak in pacl fahsruh.” (Hebrew 9:23-25; 10:1) Ke pacl se kuht lutlut ke ma suhmuhslah in Bible inge ac ma luhmweyucklac nuh kac uh, ma inge ahkkweye luhlahlfongi lasr uh. Tuhsruhktuh, yac kalmac pa kais sie mwet, kais sie ma, ac kais sie ma sikyak ma sihmlac in Bible uh luhmweyuck nuh ke sie mwet kuh sie ma pacl nuhkewa?

9. In pacl meet ah, ahkuhtweyucki fuhkah ma suhmuhslah in Bible kacl Naboth?

⁹ In pacl meet ah, mwe rit nahtuhsr uh kwacna ahkuhtweyac lah sie mwet, sie ma, ac sie ma sikyak ke kais kuhtuh ma suhmuhslah uh luhmahlah sie pacna mwet kuh sie pacna ma. Ke sie mwe puhpuhlyuck, Kasra Jezebel, el suhlallacl ac oruh acnwucki Naboth tuh Ahab suc mukul tuhmwacl el in kuh in eslah nien grape lal Naboth ah. (Sie Tokosra 21:1-16) Ke yac 1932, The Watchtower uh ahkuhtweyac lah Ahab ac Jezebel luhmweyuck nuh kacl Satan ac u lal. Naboth el luhmweyuck nuh kacl Jesus, ac misac lal Naboth luhmweyuck nuh ke misac lal Jesus. Tuhsruhktuh, ke yac 1961, puk se inge “Let Your Name Be Sanctified,” fahk lah Naboth el luhmweyuck nuh ke mwet akmuhsralah, ac Jezebel el luhmweyuck nuh ke alu luhn mwet Christian kikiacp. Oacyacpac, acnwucki lal Naboth sel Jezebel ah, luhmweyuck nuh ke mwe kalyei ma mwet akmuhsralah eltahl puhla ke lwen sahflah. Ke lusen yac pucspucs, mwe ahkuhtweyac inge arlac ahkkweye luhlahlfongi luhn mwet luhn God uh. Pwacnacng, efuh ahkuhtweyac lasr kac uh eklac ke pacl inge?

10. Ke inkacnek fuhkah mwet kuhlacnsap oaru eltahl lohacng ahkwoyac ac arlac taran ke mwe ahkuhtweyac nuh ke ma suhmuhslah in Bible liki meet ah? (b) Meac mwe rit nahtuhsr ke pacl inge uh ahkuhtweyac yohk nuh kac?

¹⁰ Ke lusen yac ekahsr somlah ah, Jeova el kahsruh “mwet kuhlacnsap oaru ac lahlmwetmwet” eltahl in lohacng ahkwoyac ac arlac taran liki meet ah. Ke inkacnek fuhkah? Ingena, mwet kuhlacnsap oaru uh taran ke pacl eltahl fahk muh sie ma suhmuhslah ke Bible uh luhmweyuck nuh ke sie ma yohk. Eltahl ahkuhtweyac na ouinge fin oasr srihpac wo ac kahlwem suc tuhkuh ke Bible. Kuhtuh mwe ahkuhtweyac ke kain in mwe luhmah inge meet upac nuh sin mwet in kahlwem kac, in esam, kuh in orekmakihn. Yohk liki na, ke pacl ma eltahl lohacng ahkwoyac nuh ke kalmac yohk luhn ma suhmuhslah in Bible uh, tuhlac mwe lutlut kuh kahs in kahsruh ma yohk srihpac kac uh. Pwacnacng, mihsenge mwe rit nahtuhsr uh ahkuhtweyac yohk nuh ke mwe lutlut fihsracsr ma kuh in orekmakihnyuck oacna luhlahlfongi, muhtweng, luhngse yohk nuh sin God, ac kuhtuh pac ohiyac sacohk ma kuht kuh in lotelah ke ma suhmuhslah in Bible uh.c​—Liye footnote.

11. Fuhkah tuh ingena kuht kuh in kahlwem ke mwe sramsram kacl Naboth, ac mwe srihkasrak lal uh kahsre kuht fuhkah?

¹¹ Ke pacl inge, etwacack lasr ke mwe sramsram kacl Naboth in Bible uh arlacna kahlwem ac fihsracsr liki meet ah. Misac lal Naboth tiac luhmweyuck nuh kacl Jesus kuh mwet akmuhsralah. Tuhsruhktuh, el misac ke srihpen el kwacfeacng in oaru na nuh sin God. El srukyac na ohiyacn ahkostwen lal nuh ke Ma Sap luhn Jeova uh, finne ke mwe kalyei na upac ma el sun sin mwet kol na kuh in pacl sac. (Oyekyuk 36:7; Sie Tokosra 21:3) Ma inge mwe srihkasrak na wo se nuh sin mwet kuhlwacnsap nuhkewa luhn God ke pacl inge suc muhtweng finne eltahl sun kain in mwe kalyei na upac. (Riti Luo Timothy 3:12.) Mwet Christian nuhkewa kuh in kahlwem, esam, ac orekmakihn mwe lutlut yohk srihpac inge in ahkkweye luhlahlfongi laltahl uh.

12. (a) Efuh kuht in tiac nuhnkuh muh mwe sramsram in Bible uh wacngihn kalmac sahyac? (b) Efuh kuht kuh in kahlwem ke Bible, weacng mwe luti loallacna luhn God? (Liye footnote.)

¹² Yac fal kuht in nuhnkuh muh mwe sramsram in Bible uh mwe lutlut yohk muhkwena, ac wacngihn kalmac sahyac kac? Moh. Mwe rit nahtuhsr uh tiac ahkuhtweyac kais kuhtuh ma suhmuhslah uh oacna mwe luhmah, ac ahkuhtweyac yohk nuh kac lah fuhkah sie mwe sramsram in Bible kuhpahsr nuh ke sie pac. Ke sie mwe puhpuhlyuck, oaru lal Naboth finne mwe kalyei ac misac lal ah ahkacsmakihnye kuht ke oaru luhn Christ ac mwet akmuhsralah. Tuhsruhktuh, kuht ahkacsmakihnyeyuck pac ke oaru luhn “kuhtuh pac sheep” pucspucs sahyac. Kuht kuh in liye ac arlac kahlwem kac lah Jeova el luti kuht fuhkah ke inkacnek na fihsracsr.d—Liye footnote.

MWE AHKUHTWEYAC FIHSRACSR KE MWE PUHPUHLYUCK LAL JESUS

13. Mwe srihkasrak fuhkah ahkkahlwemye lah ke pacl inge kuht ahkuhtweyac me puhpuhlyuck lal Jesus uh ke inkacnek ma fihsracsr ac kahlwem?

¹³ Jesus Christ pa Mwet Luti se ma wo emeet suc moul fin facluh. El luhngse orekmakihn mwe puhpuhlyuck ke luti lal uh. (Matthew 13:34) Mwe puhpuhlyuck uh wo ke srihpen ma inge ahkuhtweyac mwe luti upac uh ke sie inkacnek fihsracsr suc kuh in oruh kuht in nuhnkuh kac ac sun insiacsr. Ke yac ekahsr somlah ah, mwe rit nahtuhsr uh ahkuhtweyac mwe puhpuhlyuck lal Jesus uh ke inkacnek na fihsracsr ac kahlwem. Ke sie mwe puhpuhlyuck, The Watchtower ke July 15, 2008 kahsre kuht in kahlwem na pwacye ke mwe puhpuhlyuck lal Jesus ke mwe ahkpulohl, fihten mustard ac koa se. Ingena kuht kuh in liye lah mwe puhpuhlyuck inge luhmweyuck nuh ke Tohkohsrahi luhn God, suc mwe kahsruh nuh sin mwet pucspucs in lain facl kuluk se inge ac in eklac sie mwet tuhma lutlut luhn Christ.

14. (a) Ke pacl meet ah, kuht ahkuhtweyac fuhkah mwe sramsram ke mwet Samaria na kuhlwacng sac? (b) Meac kahlwem lasr ingena ke mwe puhpuhlyuck lal Jesus inge?

¹⁴ Kuht ac kahlwem fuhkah ke ip srihsrihk nuhkewa ke mwe sramsram, kuh mwe puhpuhlyuck ma orek sel Jesus ah? Kuhtuh sin mwe sramsram lal inge mwe luhmah ac kahs pahluh. Kuhtuh pac luti nuh sesr ke mwe lutlut na yohk srihpac. Tuhsruhktuh, piyac kac mwe sramsram ma mwe luhmah se na ac ma oyac kac tiac? Ke lusen yac ekahsr somlah ah, top nuh ke kihsen siyuck se inge arlacna kahlwemack liki meet ah. Ke sie mwe puhpuhlyuck, nuhnkuh ke inkacnek kuht orekmakihn in ahkuhtweyac mwe sramsram ke mwet Samaria na kuhlwacng sac. (Luke 10:30-37) Ke yac 1924, The Watch Tower uh fahk lah mwet Samaria sac luhmweyuck nuh kacl Jesus. Ac innek soko ma puhtati Jerusalem nuh Jericho luhmweyuck nuh ke yohkyohkwelihk ke ma upac luhn mwet uh, muhtwacwack ke orekma in lain ma sikyak ke imac Eden ah. Oacyacpac, mwet pihsrapasr ke innek soko ah luhmweyuck nuh ke business luhlahp ac mwet rahpkuh suc orek business. Mwet tol ac mwet Levi sac luhmweyuck nuh ke alu luhn mwet Christian kikiacp. Tuhsruhktuh mihsenge, mwe rit nahtuhsr uh orekmakihn mwe puhpuhlyuck se inge in ahkacsmakihnye mwet Christian nuhkewa in tiac sulohsohl mwet. Kuht enenuh in kahsruh mwet nuhkewa suc enenuh kahsruh, yohk na in kahsreltahl etwaclah ma pwacye ke God. Ma inge ahkenganye kuht in liye lah fuhkah Jeova el oruh ma pwacye uh in kahlwem.

15. Meac kuht ac fah ahkuhtweyac ke mwe lutlut tok uh?

¹⁵ Ke mwe lutlut se tok uh, kuht ac fah ahkuhtweyac mwe puhpuhlyuck lal Jesus ke muhtwacn virgin singucul ah. (Matthew 25:1-13) Meac Jesus el luhngse mwet tuhma lutlut lal ah in kahlwem kac ke mwe puhpuhlyuck na kuh se inge? Yac kais sie mwet, kais sie ma, ac kais sie ma sikyak ke mwe puhpuhlyuck inge luhmweyuck nuh ke sie ma yohk suc fah sikyak ke pacl fahsruh uh? Kuh el luhngse kuht in lotelah mwe lutlut yohk srihpac ma ac fah kahsre kuht ke lusen lwen sahflah? Kuht ac fah liye.