Lulalfongi Jeova ke Safla lun Akwuk Inge Arlana Apkuran
“Komwos lulalfongi Jeova ma patpat.”—ISAIA 26:4.
1. Mea ma tia oana sie inmasrlon met kulansap lun God a met puspus ke fwalu?
KUT muta ke sie fwalu su million puspus sin met elos tia etu la su ku mea elos ku in lulalfongi. Saap elos pulakin ouinge ke sripen elos aktoasryeyuk pa ke pal puspus. Oiya se inge tia oana sie nu sin met kulansap nukewa lun God! Ke sripen elos eis kasru ke lalmetmet lun God, elos etu na paye la tia mwo in filiye lulalfongi lalos ke fwal se inge, ku nu sin “met fwisrak” ku met kol lun fwalu. (Sam 146:3) A, elos lulalfongi nu sin Jeova ke oiya nukewa ke moul lalos a ke pal fwasru lalos, meyen elos etu la el lungselos a el akpayeye Kas lal pal nukewa.—Rom. 3:4; 8:38, 39.
2. Mea Josua el fwak ke oaru a paye lun God?
2 Josua in pal meeta el fwak la God el ku in lulalfongiyuk. Ke saflaiyen moul lal, el fwak nu sin met Israel wiyel: “Komwos etu in insiomwos kemwa a in ngunumwos kemwa tu wangin ma tula liki ma mwo nu kemwa su Jeova God lomwos el fwak keyumwos. Ma nu kemwa akpayeyuk tari nu sumwos.”—Josua 23:14.
3. Mea inen God el akkalemye kel?
3 Jeova el akpayeye mwulela nukewa lal, ke sripen lungse lal nu sin met kulansap lal nukewa a yok liki nukewa ke el sifwana. (Exodus 3:14; 1 Samuel 12:22) Kas in mutamwauk nu ke leng lun Baibel inge The Emphasized Bible, lal J. B. Rotherham, el akuteye la kalmen inen God pa el ku in oru ma nukewa in akpayeye mwulela lal nukewa. Ke pal se kut long ke inel, kut esam la el oru ma el fwak pal nukewa. El ku in oru ma el enenu in oru ke kutena pal a kutena an. Wangin kutena ma su upa nu sel in oru. God el e fwa akpayeye kalmen inel pal nukewa.
4. (a) Mea Isaia 26:4 el kaifwe kut in oru? (b) Mea kut fwa lutlutkin ke me lutlut inge?
4 Siyuk sum sifwana: ‘Ya nga etel Jeova na paye paenang nga lulalfongi yok nu sel? Ya nga ngetak nu ke pal fwasru wi lulalfongi, meyen nga etu la God el etu ma nukewa a ku in akpayeye ma nukewa?’ Isaia 26:4 el akkalemye: “Komwos lulalfongi Jeova ma patpat, tu in Jeova aok, Jeova, oasr sie Eot ku su on ma patpat.” Paye, la God el tila orekmakin mwenmwen ke pal inge in sang kasru metu oana ma el oru in pal meeta. Ne ouinge, oana “Eot ku su on ma patpat,” metu elos ku in lulalfongi nu sel “pal nukewa.” God lasr su oaru a paye el kasru fuka met kulansap oaru lal ke pal inge? Lela kut in nunku akmwoye ke inkanek tolu: El akkeye kut fwin kut suk me kasru lal in lain me srufwe, el kasre kut fwin kut sun met su tia insemwomwo in long a kut fwin sun me lain upa, a el ase nu sesr ku ke pal se oasr me fosrnga su aktoasrye kut. Ke kut tuni akmwoye oiya puspus inge, lela kom in nunku la fuka kom ku in akkeye lulalfongi lom nu sin Jeova.
Lulalfongi God Ke Pal se Kut Srufweyuk in Oru Ma Koluk
5. Piya oiya su lulalfongi lasr nu sin God ku in srufweyuk ke inkanek yok?
5 Arlana yok sripe in lulalfongi nu sin Jeova ke mwulela lal ke Paredais ku ke sifwil moulyuk, su kut lungse na paye in liye la akpayeye. Tusruktu saap arlana upa in lulalfongi nu sel ke pal se kut oru sulela lasr fwin kut akos akwuk lal ke oiyen moul nasnas ku tia. A in lulalfongi na paye ke insiesr la in akos nu ke inkanek a akwuk fulat nukewa lal pa sumwos a fwa kol nu ke me insemwomwo yok. Togusra Solomon el simusla kas in kaifwe inge: “Lulalfongi Jeova ke insiom kemwa, a tia fungla nu ke etauk lom sifwana. Kom fwakulak inkanek lom nu kemwa, a el fwa akkalemye inkanek lom.” (Soakas 3:5, 6) Loang akmwoye ke fus inge orekmakin kas se inge “inkanek.” Aok, fwinsrak lasr oana met Kristian akkalemye la kut lulalfongi God, a sayen ma inge inkanek nukewa in moul lasr enenu in akkalemye lulalfongi lasr nu sin God. Kut ku in akkalemye fuka lulalfongi inge fwin oasr me srufwe sikyuk?
6. Kut ku in akkeye fuka sulela lasr in sisla nunak koluk?
6 Kut enenu in aknasnasye nunak lasr meet kut fwin lungse in forla liki ma koluk. (Ridi Rom 8:5; Efesus 2:3.) Ke ma inge, fuka kom ku in akpayeye sulela mwo lom in sisla nunak koluk? Loang akmwoye ke inkanek limekosr inge: 1. Suk kasru lun God ke inkanek lun pre. (Mattu 6:9, 13) 2. Sifwilpa nunku ke me srikasrak lun met nukewa simusyukla in Baibel su tia porongo Jeova a nu sin met nukewa su porongo pusral. A liye la mea sikyuk nu selos. (1 Korint 10:8-11) 3. Nunku yok ke me asor yok a me akkoluk nu ke nunak a ke pulakin lom su ma koluk ku in oru nu sum a nu sin met su kom lungse. 4. Nunku la mea pulakin lun God fwin sie met kulansap lal el oru ma koluk upa. (Ridi Sam 78:40, 41.) 5. Nunku ke lupan insemwomwo su Jeova el pula ke pal se el liye sie met kulansap oaru lal el pulesru ma koluk a oru ma mwo, ke pal se el oasr ye mutan met puspus, ku fwinne el mukelana muta. (Sam 15:1, 2; Soakas 27:11) Kom ku in akkalemye pa la kom lulalfongi Jeova ke kom oru ma sumwos.
Lulalfongi God Ke Pal se Kut Sun Met su Srunga in Long a Me Lain
7. Ma upa ku me srike fuka Jeremaia el sun, a mea pulakin lal kutupal?
7 Met lili puspus wiyesr elos kulansap ke territory puspus su arlana upa. Met palu Jeremaia el oru orekma in kulansap lal ke togusrai lun an Juda ke lusen len safla lun togusrai se inge su oasr ma upa puspus. Lulalfongi lal nu sin Jeova srufweyuk len nukewa meyen el akkalemye akosten lal in fwakak kas in nununku lun God. Oasr pa sie pal, ke met sim oaru lal, su pangpang Beruk, el torkaskas la el totola. (Jeremaia 45:2, 3) Ya Jeremaia el fuleak ke me akmunas inge? Oasr pal, el pulakin asor yok a munasla. El fwak: “Ke in selngawiyuk len sa ke nga isusla! Efu nga ku illa liki inse in liye orekma upa a asor, tu len luk in wanginla ke mekin?”—Jeremaia 20:14, 15, 18.
8, 9. In fwal nu ke Jeremaia 17:7, 8 a Sam 1:1-3, mea kut enenu in oru tu kut in isus fwako mwo pal nukewa?
8 Ne ouinge, Jeremaia el tia fuleak. El tafwela na in lulalfongi nu sin Jeova. Ke sripe inge, met palu oaru se inge el liye la kas lun Jeova sifwana su simusyukla in Jeremaia 17:7, 8 el akpayeyuk, el fwak: “Insemwomwo met se su lalalfongi Jeova, a Jeova el insese yurol. Tu el fwa oana soko sak eoki sisken kofu, su kapla okal sisken infwal a fwa tia sangeng ke fwol tuku, a sral fwa folfol. A fwa tia nunkala in yea in tuka, ku in tila oswe fwako.”
9 In oana soko sak mwo a fokoko su “eoki sisken kofu,” Jeremaia el ‘oswe fwako’ pal nukewa. El srunga in akkolukyeyuk sin met aksruksruk koluk su raunella. A, el fungyung nu sin Jeova su Sropon “kof” su sang moul a el filiye ke insiel ma nukewa Jeova el fwak nu sel. (Ridi Sam 1:1-3; Jeremaia 20:9) Paye la Jeremaia el sie me srikasrak na mwomwo nu sesr, yokna nu sin met lili puspus su kulansap nu sin God ke territory puspus su arlana upa! Fwin ma inge sikyuk nu sum, sruokye ku lulalfongi nu sin Jeova, su fwa kasre kom in mongfusresr a muteng ke kom ‘fwakak el nu sin met puspus.’—Hibru 13:15.
10. Me insemwomwo fuka oasr yurosr, a mea kut enenu in siyuk sesr sifwana?
10 Jeova el ase nu sesr ma puspus in kasre kut ke ma upa puspus su kut pulakin ke moul in len safla inge. Wekunang nu ke ma inge, pa el ase nu sesr Baibel, su lungasyukla kalem a sumwos nu ke kas puspus. El orala akwuk mwomwo in oasr me mongo ku me lutlut mwomwo ke pal fwal in akkeye fototo lasr nu sel ke inkanek lun met kulansap oaru a lalmetmet. A el ase nu sesr met asrouki mwomwo ke u lulap lun met lili wiyesr su ku in akkeye kut ke pal in meeting a tukeni lulap nukewa lasr. Ya kom orekmakin yok akwuk mwo nukewa inge? Met nukewa su oru ouinge elos “fwa on ke engun insie.” Tusruktu, nu selos nukewa su srunga in porongo God, elos “fwa tung ke toasr insie a fwa wowoyuk ke inse musalla.”—Isaia 65:13, 14.
Lulalfongi God Ke Pal se Oasr Me Fosrnga
11, 12. Ke sripen oasr ma upa puspus fwin fwalu, mea inkanek mwo su akkalemye lalmetmet paye?
11 In oana ke ma palyeyuk tari, metu elos pulakin ma upa puspus. (Mattu 24:6-8; Fwakyuk 12:12) Fwin oasr sronot sikyuk, paye la kut e fwa kasrusr nu ke an fulat ku in fwanyuk nu fwin mangon loomu. Ke inkanek ouinge, ke ma upa lun fwalu yokyokelik, million puspus sin met elos suk me loeyuk su ku in kasrelos, ke akwuk lun mani, ke politic, ke u puspus su kupasr nu ke alu, wekunang akwuk lun science a technology. Tusruktu ma nukewa inge tia ku in orala me loeyuk paye nu sin metu. (Jeremaia 17:5, 6) Ke oiya saye, met kulansap lun Jeova nukewa, oasr me loeyuk paye lalos, me loeyuk se inge pa “Eot ku su on ma patpat.” (Isaia 26:4) Met sim lun sam el akkalemye: “[Jeova] El mukena eot luk a lango luk, el tauer fulat luk.” (Ridi Sam 62:6-9.) Kut oru fuka Eot se inge in me loeyuk lasr?
12 Kut fulyung nu sin Jeova ke kut porongo Kas lal, su tia oana sie ke lalmetmet lun met pal nukewa. (Sam 73:23, 24) Ke sie me pupulyuk, met su kufusyukla ke lalmetmet lun met saap elos fwak: ‘Oasr moul sefwanna lom; orekmakin ma inge ke inkanek yok.’ ‘Kafweang in kapkapek ke orekma mwomwo lom.’ ‘Kafweang in eis mani pukanten.’ ‘Moli ma se inge, moli ma se ingo.’ ‘Kom in travel; engankin ma puspus lun fwalu.’ Tusruktu, lalmetmet lun God el fwal nu ke kas in kasru inge: “A elos su orekmakin fwalu, oana elos su tia arulanu orekmakin ka; tu fasin lun fwal se inge wanginla.” (1 Korint 7:31) Ouyepa, Jisus el kaifwe kut in oru meet ma lun Togusrai a in kafweang in elosak ‘ma saok in kosrao,’ su tia ku in tula we.—Matt. 6:19, 20.
13. Ke kut nunku ke 1 Jon 2:15-17, mea kut enenu in siyuk sesr sifwana?
13 Ya oiya a nunak lom ke “fwalu” a ke “ma su on in fwalu” akkalemye lulalfongi yok lom nu sin God? (1 Jon 2:15-17) Ya me insemwomwo puspus su Jeova el usot nu sum a ke inkanek puspus su kom ku in akyokye orekma in kulansap lom nu sel pa ma mwo a ma yok sripe emeet nu sum liki ma puspus su fwalu ku in usot nu sum? (Filippai 3:8) Ya kom kafweang in karungin ‘mutom in mwo’? (Mattu 6:22) Aok, God el srunga kom in senunku ku pulesru kunokon lom, yokna fwin oasr sou lom su kom enenu in karungin. (1 Timote 5:8) Tusruktu el tupan met kulansap nukewa lal in lulalfongi yok nu sel, a tia ke fwal se inge lal Setan su apkuran in wanginla.—Hibru 13:5.
14-16. Fuka kutu met elos eis ma lane ke elos sruokye sie ‘muta mwo’ a oru meet ma lun Togusrai?
14 Nunku ke me srikasrak lal Richard a Ruth, su oasr tulik tolu natulos. Richard el fwak: “Nga pula na paye la nga ku in oru ma puspus nu sin Jeova. Nga engunkin sie moul mwomwo tusruktu nga pula la nga sang nu sin God pal na lula luk. Tokin nga pre ke ma inge a tokin nga nunku ke ma su ku in sikyuk, Nga a Ruth insese ka la nga fwa siyuk sin met kol luk in aksrikyela pal in orekma luk nu ke len akos na kais sie wik, fwinne oasr ma upa ke mani su pulakinyuk ke an sesr. Boss luk el approviye me siyuk luk, a nga mutamwauk in orekma fwal nu ke akwuk sasu ke orekma luk ke lusen malem se.” Mea pulakin lal Richard ingena?
15 Richard el fwak: “Molin orekma luk el srik liki percent 20 ke molin orekma nga oru meeta, tusruktu ingena oasr kutupa len 50 kais sie yea su nga ku in orekmakin in muta yurin sou luk a in sang akpa nu sin tulik nutik. Nga akyokye pal luk ke orekma in forfor pal luo, pisen met nga lutlut Baibel nu se puseni nu ke pal tolu, a nga orekmakin pal yok in karungin congregation. A ke sripen nga mwesas in kasru tulik nutusr, Ruth el ku in wi ke orekma lun auxiliary pioneer kais kutu pal. Nga sulela in sruokye akwuk inge ke lusen pal loeloes fwin ku.”
16 Roy a Petina, su srakna oasr tulik mutan natul muta yurolos, elos aksrikyela lusen pal in orekma lalos tu elos ku in wi ke orekma in luti pal nukewa. Roy el fwak: “Nga orekma len tolu ke wik se, a Petina el orekma len luo. Ouyepa, kut som liki loom lulap sesr a kut muta ingena ke loom srisrik, tu fusrasr nu sesr in karungin. Kut wi orekma lun pioneer meet liki oasr tulik mokul a mutan nutusr, a tia tula ke nunak lasr kena inge in pioneer. Ke ma inge ke pal se tulik nutusr elos matula, kut sifwilpa sroang nu ke orekma in luti pal nukewa. Wangin kutena lupan mani ku in srikeye ke me insemwomwo puspus su kut eis.”
Lela “Misla lun God” Liaung Insiom
17. Ke sripen ma e fwa sikyak ke pal fwasru tia eteyuk, fuka ma Simusla akkeye kom?
17 Wangin kutena sesr etu mea lutu fwa ase nu sesr, meyen “pal a ma sikyuk” tuku nu selos nu kemwa. (Ekklisiastis 9:11) Tusruktu, ke sripen ma su e fwa sikyak lutu a ke pal fwasru tia eteyuk, ma inge tia enenu in eisla yurosr inse misla, oana ma sikyuk nu sin met nukewa su wangin yurolos inse misla su tuku ke fototo mwomwo nu sin God. (Mattu 6:34) Met sap Poul el simusla: “Nik komwos nununkala in kutena ma; a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela ma eteyuk nu kemwa, fwa liaung insiomwos a nunkomwos.”—Filippai 4:6, 7.
18, 19. Ke inkanek puspus fuka God el akkeye kut? Sang me pupulyuk.
18 Oasr met lili puspus wiyesr ke pal in ma upa elos pulakin inse misla su tuku sin Jeova. Sie sister wiyesr el fwak: “Sie taktu su oru laslas el srike pal puspus in aksangengye yu in eis sra. ‘Mea sripen kom srunga in eis sra?’ pa inge sie nu ke kas se meet el fwak nu sik. A kutu pa pal, nga pre nu sin Jeova in ase misla nu sik, a tokin ma inge nga pula la oasr misla yuruk. Nga pulakin fokoko oana eot. Fwinne nga munas ke sripen srikla sra ke monuk, nga ku in sang akuteye ke sripe mwomwo fwal nu ke ma Simusla la efu nga srunga in eis sra.”
19 Oasr pal God el ase me kasru su eneneyuk ke inkanek lun me akkeye su tuku sin met lili wiyesr ku ke inkanek lun me lutlut mwomwo su tuku ke kas lun God ke pal fwal. Saap kom long sin brother ku sister el fwak: “Me lutlut se inge pa ma nga enenu na paye. Ma inge simusyukla nu sik!” Aok, kutena me enenu ku ma sikyuk nu sesr, Jeova el fwa akpayeye lungse lal nu sesr fwin kut lulalfongi nu sel. Aok, kut “sip” natul, a el lungse kut in pangonyuk nu ke el.—Sam 100:3; Jon 10:16; Orekma 15:14, 17.
20. Efu ku met kulansap lun Jeova elos fwa muta in misla ke pal se fwal lal Setan sun saflaiye?
20 Ke “len in kasrkusrak lun Jeova” arlana apkuran, ma nukewa su fwal lal Setan inge filiye lulalfongi lalos fwa kunausyukla. Gold, silver, a me kasrup puspus saye fwa tia ase me loeyuk a misla paye. (Zefenaia 1:18; Soakas 11:4) Me loeyuk sefwanna fwa “Eot ku [lasr] su on ma patpat.” (Isaia 26:4) Ke ma inge lela kut in akkalemye lulalfongi paye lasr nu sin Jeova ingena ke kut akosten in fwasr ke inkanek sumwosmwos lal. Kutupa inkanek saye pa ke kut fwakak peng mwo lun Togusrai fwinne kut sun met su srunga in long ku me lain, a ke kut sang me fosrnga a ma upa nukewa lasr nu sel. Ke kut oru ma inge nukewa, kut fwa ‘muta in misla, moul lasr a fwa mwo, a kut a fwa tia enenu in sangeng ke kutena ma.’—Soakas 1:33, New Kosraean Version.
Ya Kom Ku In Akuteye?
Fuka kut ku in lulalfongi nu sin God
• fwin srufweyuk in oru ma koluk?
• fwin sun met su srunga in long ku me lain?
• fwin oasr me fosrnga a ma upa?
[Petsac ke sra 8]
Kafweang lasr in sruokye akwuk nukewa lun God kol nu ke me insemwomwo
[Petsac ke sra 10]
“Jeova el sie Eot ku su on ma patpat”