Eis Ku lun God, A Tia Oiya lun Fwalu

“A kut eis, tia oiya lun fwalu, a ku lun God, tu kut fwa ku in etu ma su God el ase yok nu sesr.”—1 KORINT 2:12, New World Translation.

1, 2. (a) Ke oiya fuka met Kristian paye elos wi pa ke meun? (b) Kusensiyuk puspus fuka kut fwa akuteye?

MET Kristian paye elos wi meuni! Met lokwalok lasr el arlana fokoko, kutasrik, a pala in orek meun wangin pakomuta lal. El orekmakin mwo me meun lal paenang el ku in kufasla met puspus. Tusruktu lela kut in tia nunku ku pulakin mu wangin ku lasr in lainul, ku wanginla kutena fwinsrak lasr in kutangulla. (Isaia 41:10) Oasr me loeyuk su kut ku in orekmakin su arlana fokoko a tia ku in musalla.

² Meun lasr el tia ke inkanek in meun na paye; ma inge el sie me pupulyuk. Met lokwalok lasr, Setan su Devil, a me meun fokoko emeet su el orekmakin pa “oiya lun fwalu.” (1 Korint 2:12, NW) Me loeyuk mwomwo lasr in lain orekma koluk lal pa ku lun God. Kut enenu in pre siyuk ke ku lun God a akkalemye ke moul lasr fwako lun ku lal, in kasre kut in moliyukla liki meun se inge a in sruokye fototo mwomwo lasr nu sin God pal nukewa. (Galetia 5:22, 23) Tusruktu, mea se inge oiya lun fwalu, a efu ku ma inge arlana fokoko oasr yen nukewa? Kut etu fuka fwin oiya lun fwalu el kufuskutla? A mea kut ku in lotela kel Jisus ke el eis ku lun God a ke el lain oiya lun fwalu?

Efu ku Oiya lun Fwalu Oasr Yen Nukewa?

3. Mea se inge oiya lun fwalu?

³ Oiya lun fwalu el tuku sin Setan, su “leum lun fwal se inge,” a ma inge lain ku lun God. (Jon 12:31; 14:30; 1 Jon 5:19) Oiya lun fwalu el sie me purakak fokoko, a ma inge mokle metu in oru ma puspus. Me purakak se inge el kol metu in lain ma lungse lun God a akwuk lal.

4, 5. Ke inkanek fuka oiya su Setan el akkeye oasr ke yen nukewa?

⁴ Fuka oiya se inge su Setan el akkeye el fwasrelik a oasr yen nukewa? Ma se meet, Setan el kiapella If in imae Eden. El oru If in lulalfongi nu sel mu oiyen sukosok liki God fwa akmwoye moul lal. (Genesis 3:13) El kikiap na paye! (Jon 8:44) Tokin ma inge, ke inkanek lun mutan se inge, el kufusella pa Adam elan seakos Jeova. Ke sripen sulela tia mwo lal Adam, metu kukakinyukla nu ke ma koluk, a ke sripe se inge oasr yurin metu oiya su lungse in fwasr tokin oiyel Setan su lungse in seakos.—Ridi Efesus 2:1-3.

⁵ Setan el kiapela pa lipufan puspus, su ekla dimon ku lipufan koluk. (Fwakyuk 12:3, 4) Kain in orekma inge in lain God sikyak ke lusen sie pal meet liki Sronot in len lal Noa. Lipufan nukewa inge elos lulalfongi mu mwo nu selos fwin elos som liki an selos in kosrao a lela elos in sifwana moulkin kena koluk fwin fwalu su tia fwal nu selos in oru. (Jud 6) Ke kasru lun lipufan koluk nukewa inge, su folokla nu ke oiya lalos meeta a tia ku in sifwilpa orekmakin mano in ikwe, Setan el “kiapela fwalu nufon.” (Fwakyuk 12:9) Sie me asor yok, meyen apkurun met nukewa elos srakna nukin la oasr me akkoluk su tuku sin dimon ku lipufan koluk puspus.—2 Korint 4:4.

Ya Oiya lun Fwalu Kufuskomla?

6. Oiya lun fwalu ku in kufuskutla fuka?

⁶ Met puspus elos tia etu ke inkanek su Setan el kiapela metu ka, tusruktu met Kristian paye elos lutiyuk ke inkanek lun Baibel ke orekma kutasrik nukewa lal. (2 Korint 2:11) Aok, oiya lun fwalu tia ku in kufuskutla, tusruktu kut fwin lela ma inge ku in akkolukye kut. Lela kut in tuni akmwoye ke kusensiyuk akosr su fwa kasre kut in etu fwin kut eis kasru ke ku lun God ku kut kufusyukla ke oiya lun fwalu.

7. Mea sie inkanek su Setan el srike in orekmakin in srikutla liki Jeova?

⁷ Sulela luk ke me akengan el akkalemye ma fuka keik? (Ridi Jemes 3:14-18.) Setan el srike in srikutla liki God ke el srufwe kut in lungse orekma sulallel. Devil el etu la Jeova el srunga kutena met su lungse orekma sulallel. (Sam 11:5) Ke ma inge, Setan el srike in orekmakin kain in me rid, petsa mukuikui, on, a me sritel ke video ku computer, su kutu ke me sritel inge purakak kena koluk lun met su sritelkin ma inge, a in etawi pa orekma lun kosro a sulallel su akkalemyeyuk ka. Setan el engan fwin insiesr lungse pa ma koluk su el akkeye, fwinne kut srakna lungse ma sumwos.—Sam 97:10.

8, 9. Kusensiyuk puspus fuka ke me akengan kut enenu in siyuk sesr sifwana?

⁸ Ke luma saye, ku lun God akkeye met nukewa su eis ma inge elos in nasnas, lungse in orek misla, a tingtingi ke pakoten. Kut enenu in siyuk sesr sifwana, ‘Ya me akengan su nga sulela kasreyu in akkeye oiya mwomwo?’ Lalmetmet lung me el “wangin kutasrik ka.” Nu selos su eis me kasru lun ku lun God elos luti oiyen moul nasnas a misla nu sin met atulani lalos, a elos tia engankin in liye akmas a orekma sulallel a kosro in loom selos ke elos mukelana muta we.

⁹ Jeova el tupan met kulansap nukewa lal in alu nu sel mukena. Tusruktu, Setan el engan fwin sie met el oru sie orekma in alu nu sel, oana ma el srike in oru nu sel Jisus. (Luk 4:7, 8) Kut ku in siyuk sesr sifwana: ‘Ya me akengan su nga sulela in oru ku liye sang kasru ngan alu nu sin God mukena? Ya sulela luk oru in fusrasr ku upa ngan lain oiya lun fwalu? Ya nga enenu in oru me aksumwos nu ke sulela luk ke me akengan ke pal tok u?’

10, 11. (a) Nunak fuka ke mani a ke ma saok puspus lun fwalu, oiya lun fwalu akkeye nu sin metu? (b) Kas lun God el akkeye kain in oiya fuka?

¹⁰ Oiya fuka nga akkalemye ke mani a ma saok puspus lun fwalu? (Ridi Luk 18:24-30.) Oiya lun fwalu el sang me purakak nu ke “lung lun muta” ke el akkeye oiyen rapku a lungse nu ke ma puspus. (1 Jon 2:16) Ma inge oru met puspus in oasr lungse yok in ekla met kasrup. (1 Timote 6:9, 10) Oiya lun fwalu ku in oru kut in lulalfongi mu me kasrup a ma saok puspus lun fwalu fwa ase moul mwomwo a misla ma patpat. (Soakas 18:11) Tusruktu, kut fwin lungse mani yok liki kut lungse God, Setan el kutangkutla. Kut enenu in siyuk sesr sifwana, ‘Ya inkanek in moul luk akkalemye la nga nunku yok in suk ke ma saok puspus a me insemwomwo ka?’

¹¹ Ke inkanek saye, Kas lun God el akkeye kut in oasr nunak sumwos ke mani a in alken in orekma in akpayeye ma enenu lasr sifwana a lun sou lasr. (1 Timote 5:8) Ku lun God kasru met nukewa su eis ma inge in etawi oiya mwo a kulang lun Jeova. Kain in met inge elos eteyuk oana met su lungse in sang, a tia met su lungse in eis mukena. Elos aksaokye met yok liki ma puspus a elos engan in sang ma oasr yurolos fwin oasr pal mwomwo lalos in oru ma inge. (Soakas 3:27, 28) A elos tia lela kutena orekma in sukok mani in yok liki orekma in kulansap lalos nu sin God.

12, 13. Tia oana sie nu ke oiya lun fwalu, fuka ku lun God ku in kasre kut in akmwoye oiyesr?

¹² Ya ella luk akkalemye la nga akkeyeyuk sin ku lun God ku oiya lun fwalu? (Ridi Kolosse 3:8-10, 13.) Oiya lun fwalu el sang me purakak nu ke orekma lun ikwe. (Galetia 5:19-21) Sie inkanek su kut ku in liye la piyeka oiya su oasr in kut pa, tia ke pal se ma nukewa mwo. A ke pal se oasr ma upa su sikyak, oana ke pal se fwin sie met lili el pulesre kut, aktoasrye kut, ku oru ma koluk nu sesr. Sayen ma inge, ke pal se kut mukena muta in loom sesr, ku in kalem pa fwin ku lun God ku oiya lun fwalu pa oasr in kut. Kut enenu in tuni kut sifwana. Siyuk sum sifwana, ‘Ke lusen malem onkosr somla, ya nga akkalemye oiya mwo oana oiyen Kraist, ku ya nga sifwilpa akkalemye oiya tia mwo luk oana ke kas luk a ke ella luk?’

¹³ Ku lun God ku in kasre kut in “sisla [oiyen] met matu wi orekma lal” a nukomang oiyen “met sasu.” Ma inge fwa kasre kut in akmwoye ella lasr in kulang a mwo yok liki meeta. Kut fwa inse mulala in nunak munas nu sin sie sin sie, fwinne oasr sripe mwomwo lasr in fwak kas in lain nu sin sie met. Kut fwa tia folokin ma sesumwos su orek nu sesr ke “men nukewa, a selung, a mulat a mwomwon, a wenteis.” A, kut fwa kafweang yok in “mwo insiesr” a yok pakomuta.—Efesus 4:31, 32.

14. Mea nunak lun met puspus ke Kas lun God?

¹⁴ Ya nga akkalemye sunak a lungse nu ke akwuk mwomwo lun Baibel ke oiyen moul nasnas? (Ridi Soakas 3:5, 6.) Oiya lun fwalu el lain Kas lun God. Met nukewa su kufusyukla ke oiya lun fwalu elos pulesru ma simusla puspus in Baibel su elos nunku mu tia fwal, a ke ma inge elos orekmakin fasin a lalmetmet lun met. (2 Timote 4:3, 4) Kutu met elos pulesru Kas lun God nufon. Met inge elos kusensiyukkin a nunku mu Baibel el tia arlana yok sripe a paye, pasis elos orekmakin na ma mwo nu ke mutalos sifwana. Elos tia akfulatye akwuk nasnas lun Baibel ke orekma lun kosro, mokul nu sin mokul ku mutan nu sin mutan a ke divorce. Elos luti mu “ma koluk mwo, a ma mwo koluk.” (Isaia 5:20) Ya oiya lun fwalu inge kufuskutla? Ya kut fungfung nu ke lalmetmet lun met, wekunang nunak lasr sifwana, fwin kut sun ma upa? Ku ya kut kafweang in akos kas in kasru lun Baibel ka?

15. Tu kut in tia fungfung a lulalfongi nu ke lalmetmet lasr sifwana, mea kut enenu in oru?

¹⁵ Ku lun God kasre kut in oasr sunak yok ke Baibel. In oana met sim lun sam, kut nunku ke kas lun God oana sie lam nu ke niyesr a kalem nu ke inkanek lasr. (Sam 119:105) Kut tia lulalfongi ke lalmetmet lasr sifwana, a kut lulalfongi yok nu ke Kas lun God in kasre kut in akilen ma mwo liki ma koluk. Kut lotela in akkalemye sunak nu ke Baibel a kut akkalemye pa lungse ke masap lun God.—Sam 119:97.

Lutlut Ke Me Srikasrak lun Jisus

16. Mea eneneyuk kut in etawi pa “nunak lun Kraist”?

¹⁶ Kut enenu in akkeye in kut “nunak lun Kraist” tu kut in eis ku lun God. (1 Korint 2:16) Kut fwin lungse in oasr ‘nunak sefwanna oana nunak lun Kraist Jisus’ kut enenu in etu ke inkanek in nunak a orekma lal a kut enenu in etawi ma inge. (Rom 15:5; 1 Piter 2:21) Lela kut in loang akmwoye ke kutu inkanek su kut ku in oru pa ma inge.

17, 18. (a) Mea kut lotela kel Jisus ke pre? (b) Efu ku kut enenu in kafweang in “siyuk”?

¹⁷ Pre ke ku lun God. Meet liki el sun ma upa puspus, Jisus el pre siyuk ke ku lun God in kasrel. (Luk 22:40, 41) Kut enenu pa in siyuk sin God ke ku lal. Jeova el lungse na paye in sang ma inge nu sin met nukewa su siyuk wi lulalfongi lalos ka. (Luk 11:13) Jisus el fwak: “Siyuk, a fwa etukot nu sumwos; suk, a komwos fwa konoiyuk; tomwolak, a fwa igasla nu sumwos. Tu met e nukewa su siyuk eis a el su suk konoiyuk, a nu sel tu tomwolak, a fwa ikasla.”—Mattu 7:7, 8.

¹⁸ Kut fwin siyuk ke ku lun Jeova a ke kasru, kut tia enenu in sa in fuleak in siyuk ka. Saap kut enenu in pre ke ma sepana pal puspus a orekmakin pa pal yok lasr in sramsram nu sin Jeova. Oasr pal, Jeova el lela met su pre a siyuk ke kasru in akkalemye nunak paye a lulalfongi paye lalos meet liki el topuk pre lalos.a

19. Mea Jisus el oru pal nukewa, a efu ku kut enenu in etawel?

¹⁹ Akos Jeova ke inkanek nukewa. Jisus el oru pal nukewa ma puspus su ku in akinsemwomwoye Papa tumal. Oasr sie pal, su nunak lun Jisus ke inkanek in akwanginyela sie ma upa el siena liki ma Papa tumal el lungse ka. Ne ouinge, el fwak nu sin Papa tumal wi lulalfongi yok lal: “Tia ma lungse luk, a ma lungse lom in orek.” (Luk 22:42) Siyuk sum sifwana, ‘Ya nga akos God fwinne tia fusrasr in oru ma inge?’ Akosten nu sin God el yok sripe nu ke moul. Kut sowemol nu sel a kut enenu in aksol ke inkanek nukewa meyen el pa Orekutla a el pa Sropon moul lasr, a el pa ase me kasru tu kut tafwela in moul nu ke pal se inge. (Sam 95:6, 7) Wangin kutena me ayaol nu ke akosten lasr. Kut tia ku in eis me insemwomwo lun God fwin kut tia aksol.

20. Jisus el orekmakin yok moul lal nu ke ma yok sripe fuka? A fuka kut ku in etawel?

²⁰ Kafweang in eis etauk yok ke Baibel. Ke pal se el lain me srufwe lal Setan in akkolukye lulalfongi lal, Jisus el orekmakin ma Simusla. (Luk 4:1-13) Ke pal se el sramsram nu sin met puspus lun alu su lainul, Jisus el orekmakin Kas lun God in akkalemye orekma sito lalos. (Mattu 15:3-6) Moul lal Jisus nufon el orekmakin in eis etauk ke masap lun God a in akpayeye ma inge. (Mattu 5:17) Kut lungse pa in kafweang in nekla nunak lasr ke Kas lun God su me akkeye nu ke lulalfongi lasr. (Filippai 4:8, 9) Kutupal upa nu sin kutu met lili wiyesr in oakiye pal nu ke lutlut lalos sifwana a tukeni lutlut lun sou. Mwo kut in orala akwuk in orekmakin pal nu ke lutlut lasr sifwana a lutlut lun sou, liki na in liye a in suk fwin srakna oasr pal lasr in oru ma inge.—Efesus 5:15-17.

21. Akwuk fuka kut ku in orekmakin in kasre kut in etu Kas lun God ke inkanek yok a orekmakin ma inge?

²¹ “Met kulansap oaru a lalmetmet” elos kasre kut in oasr pal lasr nu ke lutlut lasr sifwana a ke tukeni lutlut lun sou, ke elos orala akwuk ke Tukeni Lutlut lun Sou ke sie eku ke kais sie wik. (Mattu 24:45) Ya kom orekmakin mwo akwuk se inge? Ke pal se kom oru akwuk mwomwo lom in lutlut, ya kom ku in lutlutkin pa ke ma Jisus el luti ke me lutlut su kom sulela in lutlutkin, tu in kasre kom in etu ke nunak lun Kraist? Kom ku in orekmakin Watch Tower Publications Index in kasre kom in koneak ke me akuteye ke me lutlut su kom lungse in etu. Ke sie me pupulyuk, mutawauk in yea 2008 nu ke 2010, magasin se inge su orek nu sin met rid puspus el akkalemye ke me lutlut 12 su oasr ke sifwe se inge “Mea Kut Lotela Kel Jisus.” Saap kom lungse in orekmakin me lutlut puspus inge ke lutlut lom. Mutawauk in yea 2006, magasin se inge Awake! el akkalemye ke me lutlut se inge “Kalweni Nu Sin Sou?” Kusensiyuk puspus su oasr ka orekla in kasre kom in akyokye a akloalye etauk lom ke Kas lun God. Efu ku kom tia orekmakin pa me lutlut inge su akkalemye ke me rid inge ke Tukeni Lutlut lun Sou kais kutu pal?

Kut Ku In Kutangla Fwalu

22, 23. Mea kut enenu in oru in kutangla fwalu?

²² Kut enenu in lain oiya lun fwalu, tu ku lun God in kol kut. Tia fusrasr in lain oiya lun fwalu. Oasr me eneneyuk in kafweang yok in lain ma inge. (Jud 3) Tusruktu kut ku in kutangla! Jisus el fwak nu sin met tuma lutlut lal: “Fwin fwalu komwos fwa ongoiye, a komwos in engunak [“in pulaik na,” NW]! Nga kutangla fwalu tari.”—Jon 16:33.

²³ Kut ku pa in kutangla fwalu kut fwin lain oiyen ma inge a oru ke ku lasr kewa in eis ku lun God. Paye la, “God el fwin wi kut, su ku in lain kut?” (Rom 8:31) Ke inkanek in eis ku lun God a in akos masap a kas in kasru su akkalemyeyuk in Baibel, kut fwa koneak engan, misla, insemwomwo a kas in mwulela ke moul ma patpat ke fwalu sasu su apkuran in tuku.

[Footnote]

Ya Kom Esam?

• Efu ku oiya lun fwalu oasr yen nukewa?

• Kusensiyuk akosr fuka kut enenu in siyuk sesr sifwana?

• Ma tolu fuka kut lotela kel Jisus ke inkanek mwo in eis ku lun God?

[Petsac ke sra 3]

Fuka kutu sin lipufan elos ekla dimon?

[Petsac ke sra 5]

Setan el orekmakin oiya lun fwalu in kufusla met, tusruktu kut ku in sukosokla liki me akkoluk lun ma inge