Luhlahlfongi Jeova Pacl Nuhkewa!

1-3. Luhlahlfongi lal Paul nuh sin Jeova ahkkweyeyuck fuhkah? (Liye petsac se meet ke mwe lutlut inge.)

KOM fin pa sie mwet Christian fin acn Rome ke pacl luhn mwet sap ah, kom muhta ke sie puhlan pacl na sensen. Mwet Christian meet ah kalyeiyuck na upac sin mwet Rome. Mwet Rome ah ahkkulukyacltahl fahk muh eltahl pa oraclah e na luhlahp se fin acn Rome ac fahk pac muh eltahl sruhnga mwet. Puhs sin mwet lili Christian wiyom inge sruhoh ac kaclpous. Kuhtuh ngalngucluh ac mahnoltahl muhsahlsahluh sin kosro. Kuhtuh pac patpucti nuh ke sru, na tohkoh eltahl moul na ah mwet Rome inge fuhreack mahnoltahl, in muh kahlwem ke fong uh. Penganuh lwen kom etuh lah sie sin ma inge ac kuh pac in sikyak nuh sum.

² Ke lusen pacl na upac se inge, mwet sap Paul el sisiyang nuh in presin. Sahp el nuhnkuh lah mwet lili Christian wiyacl inge ac kahsrel ke srihpen sruhoh sahflah se lal ah wacngihn mwet kahsrel. Tuhsruhktuh Jesus el kahsrel Paul. Paul el suhmuhslah: “Leum el tu yuruk ac ahkkweye yuc.” Jesus el sang kuh nuh sel Paul in fal nuh ke ma el enenuh. Paul el suhmuhslah pac lah el “moliyucklac liki in oalin laion uh.”​—Luo Timothy 4:16, 17, BMK.a (Liye footnote.)

³ Paul el esam ke pacl se Jeova el tuh kahsrel in pacl meet ah. Pwacnacng yohk luhlahlfongi lal lah Jeova el ac fah sang kuh ma el enenuh tuh el in muhtwacnglah ma upac ma el sun inge ac ke pacl fahsruh uh. El arlacna luhlahlfongi ma inge pwacnacng el suhmuhslah: “Leum El ac fah moliyuclac liki ma kuluk nuhkewa.”(Luo Timothy 4:18) Paul el lotwelah lah el finne sun ma upac inge ac mwet lili wiyacl koflah in kahsrel, el luhlahlfongi lah Jeova ac Jesus ac tuhfah kahsrel. Pwacnacng wacngihn kuhtwena nuhnak in ahlohloh lal.

PACL WO LASR IN LUHLAHLFONGI JEOVA

4, 5. (a) Suc kuh in usot nuh sum kahsruh ma kom enenuh pacl nuhkewa? (b) Kom ac oruh fuhkah fototo lom nuh sin Jeova in arlacna fokokoi?

⁴ Yac kom nuh puhla tari ke pacl se ma upac uh sun kom a kom muhkwena, wacngihn mwet in kahsre kom? Sahp wacngihnlac orekma lom kuh ahkkulukyeyuck kom ke acn in lutlut ah. Sahp kom sun mas na upac se kuh sie pacna ma upac sahyac. Mwet ekahsrlac kom siyuck kahsruh se tari tuh, kom suhpwacrlac ke srihpen eltahl tiac usot kahsruh ma kom enenuh an. Pwacye lah wacngihn sie mwet fin facluh ac kuh in ahkwoyelah kuhtuh sin ma upac uh. Na pa meac kom kuh in oruh? Bible uh fahk kuht in “luhlahlfongi LEUM GOD.” (Soakas 3:5, 6) Tuhsruhktuh, yac kom kuh in luhlahlfongi na pwacye lah el ac fah kahsre kom? Ahok! Kuht kuh in riti ke mwe puhpuhlyuck pucspucs in Bible ma oruh kuht luhlahlfongi lah Jeova el kahsruh na pwacye mwet lal uh.

⁵ Nimet kom toasrlah ke pacl se mwet uh tiac na usot kahsruh ma kom enenuh uh. Tuhsruhktuh, in oacna Paul, nuhnkuh ke pacl upac ingacn oacna sie pacl wo lom in luhlahlfongi Jeova ke insiom kewa. Pa pac inge sie pacl na wo kom in tuni ke moul lom sifacna lah el luhngse kom. Luhlahlfongi lom ac fototo lom nuh sin Jeova ac fah arlacna fokokoi.

KUHT ENENUH IN LUHLAHLFONGI JEOVA

6. Efuh kuhtuh pacl uh tiac fihsracsr in luhlahlfongi Jeova ke pacl se kuht sun ma upac uh?

⁶ Sahp oasr ma upac sikyak nuh sum ma kom toasrlah kac. Kom srihke ma nuhkewa kom kuh in oruh ke ma upac lom an ac kom puhruhe pac nuh sin Jeova in suk ke kahsruh lal. Yac kom kuh in mongi ke srihpen kom luhlahlfongi muh el ac fah kahsre kom? Ahok, kom kuh! (Riti Psalm 62:8; Sie Peter 5:7.) Kom fin luhngse in arlacna fototo inmahsrlom nuh sin Jeova, yohk srihpac kom in etwaclah in luhlahlfongel. Tuhsruhktuh, tiac fihsracsr in oruh ma inge pacl nuhkewa. Efuh? Sie srihpac an pa Jeova el tiac suhlahklahk in topuk puhruhe uh pacl nuhkewa.​—Psalm 13:1, 2; 74:10; 89:46; 90:13; Habakkuk 1:2.

7. Efuh kuh Jeova el tiac sa in topuk puhruhe lasr uh pacl nuhkewa?

⁷ Efuh kuh Jeova el tiac sa in topuk puhruhe lasr uh? Bible uh fahk lah Jeova el oacna Pahpah se tuhmwacsr. (Psalm 103:13) Sie pahpah el ac tiac sang ma nuhkewa ma tuhlihk se siyuck sel ac el tiac pac sa in sang. Sie pahpah el etuh lah ke tuhlihk se luhngse in eis sie ma, ke kihtin pacl ah na el kuh in sruhngaclah. Pahpah se el etuh pac ma ac wo nuh sin tuhlihk nahtuhl uh, ac el etuh lah fuhkah ma inge ac kuh in ahkkulukye mwet sahyac. El etuh lah meac tuhlihk se nahtuhl uh enenuh ac el etuh lah piyac pacl fal elan eis uh. Pahpah se fin sa in sang ma nuhkewa ma tuhlihk se siyuck kac, pahpah sacn ac kuh in eklac mwet kuhlwacnsap se luhn tuhlihk nahtuhl an. Jeova, Pahpah tuhmasr inkuhsrao, el luhngse kuht. Oacna Mwet Orekuhtlac suc arlacna lahlmwetmwet, el etuh ma kuht enenuh uh, ac el sulaclah pacl se ma wo emeet elan use ma kuht siyuck kac uh. Wo kuht in sano ac liye lah Jeova el topuk fuhkah puhruhe lasr uh.​—Liye nuh ke Isaiah 29:16; 45:9.

8. Meac Jeova el wuhlelah nuh sesr ke ma kuht kuh in muhtwacnglah kac?

⁸ Esam pac lah Jeova el etuh ma kais sie mwet kuh ac tiac kuh in muhtweng kac. (Psalm 103:14) Pwacnacng el use nuh sesr kuh ma kuht enenuh uh. Pwacye lah kuhtuh pacl uh kuht puhla muh kuht tilac kuh in muhtweng ke ma upac lasr uh. Tuhsruhktuh, Jeova el wuhlelah nuh sesr lah fin upaclac nuh sum in muhtweng ke sie mwe sruhf, el ac fah “sot inkacnek in muhtwacnglah ac in kahingkuhnlah ma inge.” (Riti Sie Corinth 10:13.) Ke ma inge, kuht kuh in luhlahlfongi lah Jeova el etuh luhpan ma kuht kuh in muhtweng kac.

9. Meac kuht enenuh in oruh kuht fin puhruhe siyuck kahsruh sin Jeova tuhsruhktuh el tiac sa in topuk kuht?

⁹ Kuht fin puhruhe siyuck ke kahsruh sin Jeova tuhsruhktuh el tiac sa in topuk, kuht enenuh in mongfihsracsr. Esam lah Jeova el arlacna luhngse in kahsre kuht, tuhsruhktuh el mongfihsracsr in sano na pacl se ma wo emeet elan use ma kuht enenuh uh. Bible uh fahk nuh sesr: “LEUM GOD El soano na in fahkwack kuhlwacng ac pahkotwen lal nuh suwos, mweyen El oruh ma suwohs pacl e nuhkewa. Insewowo elos nuhkewa suc fihliyac luhlahlfongi lalos in LEUM GOD.”​—Isaiah 30:18.

“OALIN LAION UH”

10-12. (a) Meac kuh in oruh in upac in karihngihn sie mwet in sucu lasr suc mas? (b) Ke kom luhlahlfongi Jeova ke pacl upac, ma inge ac kahsruh fototo lom nuh sel fuhkah? Sang sie mwe puhpuhlyuck an.

¹⁰ Sahp ma upac lom uh arlacna upac pwacnacng kom kuh in puhla oacna ma Paul el puhla ac enenuh in moullac liki “oalin laion uh.” (Luo Timothy 4:17, BMK) Ke pacl upac inge, arlacna yohk srihpac kom in luhlahlfongi Jeova. Ke sie mwe puhpuhlyuck, sahp kom karihngihn sie mwet in sucu lom suc mas. Kom puhruhe nuh sin Jeova ac siyuck elan kahsre kom in oruh sulaclah wo ac in kuh.b (Liye footnote.) Kom kuh in puhla mislac ke kom etuh lah Jeova el liye ac kahlwem ke ohiyac ma kom oasr kac uh. El ac fah kahsre kom in muhtwacnglah ac in oaru nuh sel.​—Psalm 32:8.

¹¹ Sahp kom tiac kahlwem inkacnek suc Jeova el kahsre kom kac uh. Sahp doctor pucspucs eltahl tiac insese nuh ke ma enenuh in orek uh. Kuh kom finsrak tuh sucu lom sifacna in ahkkweye kom, tuhsruhktuh luhman eltahl oruh upaclah liki na meet ah. Luhlahlfongi Jeova pacl nuhkewa elan usot kuh nuh sum. Tahfwelah na in kaluckyang nuh yohrohl. (Riti Sie Samuel 30:3, 6.) Tok, ke kom akihlen inkacnek ma Jeova el kahsre komlac kac uh, fototo lom nuh sel uh ac kuhi liki na meet ah.

¹² Pa inge ma Linda el puhla.c (Liye footnote.) El muhta karihngihn pahpah ac ninac kiyacl suc mas ke lusen pacl na loeloes se meet liki eltahl misac. El fahk: “Ke pacl upac sac, nga, mukul tuhmuhk ah, ac tuhlihk mukul se wiyuck, kwacna nihkihn lah meac kuht ac oruh. Oasr pacl kuht puhla muh wacngihn na pwacye ma kuht kuh in oruh. Tuhsruhktuh, ingena ke nga sifwil pac nuhnkuh kac uh, kuht kahlwem na pwacye kac lah Jeova el ahkpwacyeye fuhkah nuh sesr lah el wi kuht. El ahkkweye kuht, ac use ma na fal nuh ke enenuh lasr, finne ke atac ah oacna in muh wacngihn na ma kuht kuh in sifwil pac oruh.”

13. Luhlahlfongi lal Rhonda kahsrel fuhkah in muhtwacnglah kais sie mwe kweok ma el sun?

¹³ Luhlahlfongi yohk lasr nuh sin Jeova ac fah kahsre kuht pac in muhtweng ke mwe kweok. Pa inge ma sikyak nuh sel Rhonda. Mukul tuhmwacl ah, suc tiac sie sin Mwet Loh luhn Jeova, el ke eltahl in fahsrelihk. Ke lusen pacl sac pacna, tuhlihk mukul se wiyacl ingacn konwacack lah el wi mas na upac se pahngpahng lupus. Ac mahlwem na ekahsr tohkohyang an, muhtwacn kiyacn tuhlihk mukul se wiyacl inge misac. Ke Rhonda el muhtwacwack in kuhi ke ma upac nuhkewa suc sonol inge, el muhtwacwack in regular pioneer. Tuhsruhktuh tukun ma inge ninac kiyacl ah misac. Rhonda el ac muhtwacnglah fuhkah ma upac inge nuhkewa? El fahk: “Nga sramsram nuh sin Jeova lwen nuhkewa, finne nuh ke ma na srihsrihk suc nga enenuh in oruh sulaclah luhk nuh kac. Ke nga oruh ma inge, Jeova el eklac ma na pwacye se sihk. Ma inge lutiyuc in luhlahlfongel ac tiac luhlahlfongiyuc sifacna kuh mwet sahyac. Ac kahsruh ma el use nuh sihk ah ma na pwacye, enenuh nuhkewa luhk ah el fosrngahkihn. Ke ma inge, nga puhla lah Jeova el wiyuc ac kahsreyuc ke ma upac luhk nuhkewa.”

14. Jeova el ac kahsre kom fuhkah fin mwet se in sucu lom el sisilac?

¹⁴ Nuhnkuh pac ke sie ma upac. Sie mwet ke sucu lom an el fin sisilac liki congregation uh. Kom etuh ma Bible uh fahk ke mwet sisilac uh. (Sie Corinth 5:11; Luo John 10) Tuhsruhktuh, ke srihpen kom luhngse mwet sacn, sahp kom puhla muh arlacna upac kuh kom tiac kuh in ahkos masap luhn Bible ke mwet sisilac uh.d Yac kom kuh in luhlahlfongi lah Pahpah tuhmom inkuhsrao el ac fah usot nuh sum kuh kom in oaru nuh sel ac ahksol? Yac kom kuh in nuhnkuh muh pacl se ingacn sie pacl na wowo kom in kaluckyang kuh fototo nuh sin Jeova?

15. Efuh kuh Adam el seahkos masap luhn Jeova?

¹⁵ Ke ohiyac sepacna inge, nuhnkuh ke ma sikyak nuh sel Adam, mukul se emeet ah. Yac el luhlahlfongi muh el kuh in seahkos Jeova ac srackna moul? Moh, Adam el tiac “kiacpweyucklac.” (Sie Timothy 2:14) Pwacnacng efuh kuh el seahkos Jeova? Adam el kang fukun sahk se ma muhtwacn kiyacl ah sang nuh sel ah mweyen el luhngse muhtwacn kiyacl ah yohk liki Jeova. El lohng puhsren muhtwacn kiyacl ah liki na in lohng puhsren Jeova.​—Genesis 3:6, 17.

16. Suc kuht enenuh in luhngse yohk emeet uh, ac efuh?

¹⁶ Sulaclah se lal Adam ah luti nuh sesr lah luhngse lasr nuh sin Jeova uh enenuh in yohk liki na luhngse lasr nuh sin kuhtwena mwet sahyac. (Riti Matthew 22:37, 38.) Ac luhngse lasr nuh sin Jeova fin fokokoi na pwacye, kuht ac kuh in kahsruh sucu lasr uh ke inkacnek ma wo emeet, eltahl finne kuhlwacnsuhpuh Jeova kuh tiac. Pwacnacng tahfwelah na in ahkkweye luhngse lom nuh sin Jeova ac luhlahlfongi lom nuh sel uh. Kom fin elyah ke mwet in sucu lom suc sisilac, puhruhe nuh sin Jeova ac fahk nuh sel ma nuhkewa kom puhla an.e (Liye footnote.) (Rome 12:12; Philippi 4:6, 7) Kom finne kweok na pwacye, nuhnkuh ke ohiyac ma kom oasr kac an in oacna sie pacl na wowo se kom in oruh fototo lom nuh sin Jeova in kuh liki meet ah. Na kom fah kuh in luhlahlfongel ac etuh lah kom fin ahkos masap lal uh, ma inge ac fah usot ma ac wo emeet.

KE KUHT SOANO

17. Meac kuht kuh in luhlahlfongi muh Jeova el ac fah oruh ke kuht kahfofo ke orekma in luti uh?

¹⁷ Efuh kuh Jeova el molwelah Paul liki “oalin laion uh”? Paul el fahk: “Tuh keik wosasuc fah sulkackihnyuckwelihk.” (Luo Timothy 4:17, BMK) Jeova el oacyacpac use nuh sesr orekma in luti pweng ke “wosasuc,” ac el pahngon kuht in ‘weluhl in oruh orekma lal.’ (Sie Thessalonica 2:4; Luo Corinth 6:1) Kuht fin kahfofo ke orekma se inge, kuht kuh in luhlahlfongi lah Jeova el ac fah use ma nuhkewa ma kuht enenuh uh. (Matthew 6:33) Ac oruh pac in fihsracsr nuh sesr in soano Jeova elan topuk puhruhe lasr uh.

18. Kom ac muhsaheack luhlahlfongi lom nuh sin Jeova ac oruh fototo lom nuh sel in kuh liki meet ah fuhkah?

¹⁸ Pwacnacng orekmakihn lwen nuhkewa in oruh fototo lom nuh sin Jeova in kuhi liki na meet ah. Ke pacl se ma upac uh sikyak ac kom muhtwacwack in fosrngah kac, orekmakihn pacl sacn in kaluckyang nuh yurin Jeova. Rit, lutlut, ac nuhnkuh yohk ke Kahs luhn God. Tahfwelah na in puhruhe nuh sin Jeova ac in kahfofo ke orekma in kuhlwacnsuhpwacl. Kom fin oruh ma inge, kom kuh in luhlahlfongi lah Jeova el ac fah kahsre kom in muhtweng ke ma upac nuhkewa lom ke pacl inge ac ke kuhtwena ma suc ac fah kuh in sikyak ke pacl fahsruh uh.