Ku lun God Akkeye Kut in Lain Me Srufwe A in Kutangla ke Me Akmunas Nukewa
“Komwos fwa eis ku, ke ku lun God el tuku nu fwomwos.”—OREKMA 1:8, NW.
1, 2. Me kasru fuka Jisus el mwulela nu sin met tumal lutlut nukewa, a efu ku elos enenu pa ma inge?
JISUS el etu la met tuma lutlut lal elos tia ku in akpayeye ma nukewa su el sapkin nu selos fwin elos fungfung a lulalfongi mukena ke ku lalos sifwana. Arlana kalem la elos enenu ku yoklana se inge, meyen elos enenu in luti peng mwo nu sin met nukewa yen nukewa in pal san, a ikwen metu oana elos arlana munas, sayen ma inge met su lainelos arlana ku. Ke ma inge, meet liki el somwak nu in kosrao, Jisus el mwulela nu sin met tumal lutlut nukewa: “Komwos fwa eis ku, ke pal se ku lun God el tuku nu fwomwos, a komwos fwa met orek lo keik in Jerusalem, a in fwal Juda na fon, a in Samaria, a nu ke yen loesilanu fwalu.”—Orekma 1:8, NW.
2 Kas in mwulela se inge akpayeyuk in Pentecost 33 C.E. ke pal se ku lun God oru met tuma lutlut lun Jisus Kraist in arlana ku in nekla Jerusalem ke me luti lalos. Wangin kutena me lain ku in tulokinye orekma lalos inge. (Orekma 4:20) ‘Pal e nukewa nu ke saflaiyen akwuk lun ma puspus inge,’ met kulansap oaru nukewa lun Jisus, wekutyang ke pal inge, enenu na paye ku inge su God el sang nu selos in pal meeta a ase nu sesr ke pal inge.—Mattu 28:20.
3. Mea ku lun Jeova ku in kasre kut in oru?
3 Jisus el mwulela nu sin met tumal lutlut nukewa la ‘elos fwa eis ku ke pal se ku lun God tuku nu selos.’ Ma inge akkalemye la oasr kasru yok lun ku lun God nu sesr. Aok ku lun God ku in akkeye kut. Ke ma inge ku su God Fulatlana el ase nu sin met kulansap lal ku in akkeye kut a ase nu sesr ke oiyen ituftuf tu kut in akpayeye mwulela lasr nu sin God oana met Kristian, a fwin eneneyuk, ma inge fwa ku in kasre kut in lain me kufusla a me lain nukewa nu sesr.—Ridi Maika 3:8; Kolosse 1:29.
4. Mea kut e fwa lutlutkin ke me lutlut se inge, a efu?
4 Ku su ituku nu sesr sin God ke inkanek lun ku lal el akkalemyeyuk fuka? Fuka ku lun God ku in mokle kut in oru ma puspus nu ke kain in oiya puspus su sikyak? Ke kut kafweang in suk in kulansapu God ke oaru, kut ku in sun kain in ma upa puspus, su sikyak ke sripen orekma lal Setan, ke inkanek lun akwuk koluk puspus ke pal inge, ku ke sripen oiyen sesumwos lasr. Arlana yok sripe kut in akwanginyela me kutong nukewa inge tu kut in muteng oana sie met Kristian, in wi pal nukewa ke orekma in sulkakin peng mwo, a in karungin fototo mwomwo lasr nu sin Jeova. Lela kut in lutlutkin inkanek mwomwo puspus su ku lun God kasre kut in lain me srufwe a in muteng a kutangla kut fwin pulakin totola a asor yok.
Akkeyeyuk in Lain Me Srufwe
5. Pre el ku in akkeye kut fuka?
5 Jisus el luti met tumal lutlut nukewa in pre: “A tia kol kut in mel, a eiskutla liki ma koluk.” (Mattu 6:13) Jeova el tia som liki met kulansap oaru nukewa lal su siyuk ouinge. Ke sie pa pal Jisus el fwak la ‘Papa . . . su in kosrao el fwa sang ku lal nu selos su siyuk sel.’ (Luk 11:13) Sie me akkeye yok pa inge ke sripen Jeova el mwulela in ase nu sesr ku lal, sie me kasru na yok in oru ma sumwos! Ne ouinge, tia kalmen ma inge la Jeova el a fwa tia lela kut in sun me srufwe. (1 Korint 10:13) Tusruktu kut fwin sun me srufwe, pa inge pal kut in kafweang in pre siyuk ke kasru.—Mattu 26:42.
6. Me top lun Jisus ke me srufwe nukewa lal Setan el fwal nu ke mea?
6 Jisus el orekmakin ma simusla in sang topuk nu ke me srufwe puspus lun Devil. Arlana kalem la oasr ke nunak lun Jisus Kas lun God ke pal se el sang topuk nu sel Devil ke: “Ma simusla . . . Ma simusla pa . . . Fwala, Setan! Tu ma simusla, ‘Kom fwa alu nu sin Jeova God lom, a kulansap nu sel mukena.’” Lungse nu sin Jeova a ke Kas lal oru Jisus in pulesru me srufwe nukewa su Met sruf se inge el oru nu sel. (Mattu 4:1-10) Tokin Jisus el lain ke pal puspus me srufwe nukewa lal, Setan el som lukel.
7. Baibel el kasre kut fuka in lain me srufwe?
7 Ke sripen Jisus el fungfung a lulalfongi nu ke ma Simusla in lain me srufwe nukewa lun Devil, kut enenu pa in lulalfongi yok ke ma simusla ke pal inge! Aok, in kasre kut in lain Devil, kut enenu in oru sulela paye lasr in etu akwuk mwomwo nukewa lun God a in orekmakin ma inge ke inkanek nukewa. Met puspus elos eis me akkeye yok in moulkin akwuk mwomwo lun Baibel ke elos lutlutkin ma Simusla a elos eis kalem a aksaokye etauk lun God a ma sumwosmwos lal. Paye la, “kas lun God” el ku a ku in akilen “nunak a papu lun inse.” (Hibru 4:12) Fwin sie met el rid a nunku yok ke ma Simusla pal nukewa, el ku in eis ‘etauk ke ma paye lun Jeova.’ (Daniel 9:13) Aok arlana paye ma inge, paenang kut enenu in sifwilpa nunku yok ke ma Simusla su ku in sang kasru in aksumwosye me munas lasr.
8. Ke inkanek fuka kut ku in eis ku lun God?
8 Sayen el etu ma Simusla, Jisus el ku in lain me srufwe nukewa meyen el tingtingi ke ku mutal lun God. (Luk 4:1) Tu kut in ku pa in lain me srufwe oana Jisus, kut enenu in akfototoye kut nu sin Jeova ke kut orekmakin akwuk nukewa lal in ase nu sesr ku lal. (Jemes 4:7, 8) Akwuk mwomwo inge pa in lutlutkin Baibel, pre, a in asrouki nu sin met lili wiyesr. Met lili puspus elos aksaokye ma lane su tuku ke kafweang lasr in oru orekma nukewa lasr in kulansap nu sin God, a ma inge kasre kut in oru nunak lasr in nunku akwoye ke me luti mwomwo lun God su ku in akkeye kut.
9, 10. (a) Kain in me srufwe fuka sikyak pal nukewa in an sum? (b) Fuka orekma in sifwilpa nunku a pre ku in akkeye kom in lain me srufwe fwinne ke pal se kom pulakin ulla?
9 Me srufwe puspus fuka kom enenu in lain? Ya kom srufweyuk in orek kato ku orek luma ku orek fung nu sin sie mutan ku mokul su kom tia payuk nu se? Kom fwin tia payuk, ya kom orek ako nu sin sie met su tia lulalfongi nu sin Jeova? Ke pal se met Kristian elos liye television ku orekmakin Internet, elos ku in srufweyuk in ngetang nu ke ma fokfok. Ya ma inge sikyak nu sum, fwin aok, oiya fuka kom akkalemye ke kom liye ka? Sie inkanek mwo in sifwilpa nunku yok la fuka sie inkanek sito ku in kol nu ke orekma koluk upa. (Jemes 1:14, 15) Nunku ke asor yok su orekma koluk ku in oru nu sin Jeova, a nu sin congregation, a nu sin sou lom. Tusruktu, sie conscience mwo a nasnas, ku in oasr yurin met Kristian ke sripen elos oaru in akpayeye akwuk mwomwo lun God. (Ridi Sam 119:37; Soakas 22:3.) Pal nukewa kom sun kain in me srufwe inge, kom in pre a siyuk ke ku su eneneyuk in kasre kom in lain ma inge.
10 Oasr ma saye su kut enenu in esam ke me srufwe lun Devil. Setan el srufwel Jisus tokin El lalo ke lusen len 40 yen mesis. Wangin alolo ka la Devil el nunku mu pa inge ‘pal mwomwo’ in srufwe oiyen oaru lal Jisus. (Luk 4:13) Setan el suk pa ke pal mwomwo in srufwe oiyen oaru lasr. Ke ma inge, arlana yok sripe kut in oru lulalfongi lasr in fokoko pal nukewa. Setan el lungse in srufwe met ke pal se el liye la met se inge el arlana munas. Ke ma inge pal nukewa kut pulakin mu kut ulla ku asor yok a munasla, kut enenu in akpayeye la kut pre siyuk sin Jeova ke me kasru lal a ke ku lal.—2 Korint 12:8-10.
Ku lun God Kasre Kut in Kutangla ke Kut Ulla a Fosrnga
11, 12. (a) Efu ku met puspus elos pulakin asor a munasla ke pal inge? (b) Mea ku in akkeye kut in lain asor yok lasr?
11 Oana ke sripen kut met sesumwos, oasr pal kut pulakin asor yok a munasla. Ma inge ku in sikyak nu sesr ke pal inge meyen kut oasr ke sie pal su oasr ma upa puspus sun kut. Kut oasr tari ke lusen pal su upa emeet su met nukewa soenna liye a pula. (2 Timote 3:1-5) Ke Armagedun el apkurun in tuku, oasr ma upa puspus ke akwuk in suk ma enenu lun moul, ke ma enenu ke nunak a pulakin, a kutupa me fosrnga yokyokelik. Ke ma inge, tia sie me lut fwin oasr kutu met su pula a koneak la arlana upa in akpayeye kunokon lalos in sang me karungin a in sang ma enenu lun sou lalos. Elos ulla, foroti, munasla, a oasr pal elos mulala. Fwin ma inge sikyak nu sum, kom ku in muteng a kutangla fuka ke ma upa nukewa?
12 Esam pa, la Jisus el mwulela nu sin met tuma lutlut lal la el e fwa sang nu selos sie me kasru, me kasru inge pa ku lun God. (Ridi Jon 14:16, 17.) Pa inge ku su fokoko emeet in kosrao a fwin fwalu. Ke inkanek lun ku inge, Jeova el ku in ase nu sesr ku “arlana yok” su kut enenu in muteng ke kutena me srufwe. (Efesus 3:20) Poul el simusla la, kut fwin fungfung nu ka, kut ku in eis “yoklana lun ku,” fwinne kut “eoikusyuk apunla.” (2 Korint 4:7, 8) Jeova el tia mwulela in akwanginyela me fosrnga, tusruktu el fwak nu sesr la ke inkanek lun ku lal, el e fwa ase nu sesr ku in muteng a kutangla ka.—Filippai 4:13.
13. (a) Fuka sie met fwusr el eis ku in kutangla ke sie ma upa su sikyak nu sel? (b) Ya kom etu pa ke me pupulyuk su oana sie?
13 Nunku akmwoye ke me srikasrak lal Stephanie, su oasr ke yea 19 matwe a el oru orekma lun regular pioneer. Ke pal se el yea 12, el sun stroke a manol matoltol la a koneakyuk la oasr futi yok se ke brain lal. Mutawauk in pal san, pal luo laslasla el, el eis kain in akwuk ke ono su pangpang radiation, a el sun pa stroke ke pal luo, su oru elan tia ku in mukuikui ke leyen lese ke laan manol, a okokla pa mutal. Stephanie el tia orekmakin ku lal nu ke ma puspus saye, a el lungse in orekmakin ku lal nu ke ma yok sripe puspus, oana in wi meeting nukewa lun congregation, a in wi ke orekma in sulkakin peng mwo. Ne ouinge, el pulakin ku lun God kasrel in muteng ke oiya puspus. Me rid puspus su tuku in Baibel su akkalemye ke experience puspus lun met Kristian wiyesr sang me akkeye nu sel ke pal se el pulakin asor yok. Brother a sister elos sang kasru nu sel ke elos supwela leta nu sel, ku ke pal se elos sramsram nu sel in akkeyel meet liki a tokin meeting. Met su lungse in lutlut elos akkalemye engan lalos ke ma Stephanie el luti nu selos ke elos tuku nu in loom sel in lutlut ke Baibel. Ke sripe inge, Stephanie el arlana engan ka a el lungse na paye in sang kulo nu sin Jeova. Ma simusla su el lungse na paye pa Sam 41:3, su el lulalfongi mu akpayeyuk nu sel.
14. Mea kut enenu in tia oru kut fwin pulakin asor a fosrnga yok, a efu?
14 Kut fwin totola ku pulakin me fosrnga yok, kut tia enenu in nunku mu inkanek mwo in kutangla ka pa in tia oru kutu orekma lasr in alu nu sin God. Kut fwin oru, pa inge inkanek koluk emeet kut ku in oru. Efu? Meyen orekma mwomwo inge oana lutlut lasr sifwana a lutlut lun sou ke Baibel, orekma in sulkakin peng mwo nu sin met puspus, a in wi ke meeting nukewa pa inkanek mwomwo su kut ku in eis ku lun God su ku in akkeye kut. Aok, orekma nukewa lasr oana met Kristian arlana sang me akkeye nu sesr pal nukewa. (Ridi Mattu 11:28, 29.) Ke pal puspus su met lili wiyesr elos tuku ke meeting elos pulakin fosrnga yok, tusruktu tokin meeting a pal in folok nu ke loom selos, elos pulakin mwo meyen elos akkeyeyuk ka, a in oana ke kas in pupulyuk, battery lalos arlana chargeye paenang arlana fokoko!
15. (a) Ya Jeova el mwulela la el fwa oru moul lun sie met Kristian in arlana fusrasr? Akuteye fwal nu ke ma Simusla. (b) Mea God el mwulela nu sesr, a kusensiyuk fuka kut enenu in siyuk sesr sifwana?
15 Aok, kut tia na fwak la kut tia enenu in kafweang yok in oru kunokon lasr oana sie met Kristian. Paye la kafweang yok eneneyuk nu sesr tu kut in sruokye oiyen oaru lasr oana met Kristian. (Mattu 16:24-26; Luk 13:24) Ne ouinge, ke inkanek lun ku lal, Jeova el ku in akkeye met su totola. “Elos su sano Jeova fwa aksasuye ku lalos. Elos fwa sokak ke po soksok oana ikul. Elos fwa kasrusr, a tia totola; elos fwa fwufwasryesr, a tia mulalla,” met palu Isaia el simusla. (Isaia 40:29-31) Ke ma inge, arlana mwo kut in siyuk sesr sifwana, Mea sripe paye paenang kut nunku mu orekma lasr oana sie met Kristian ku in oru kut in ulla a totola?
16. Mea kut ku in oru in akwanginyela kutena ma su oru kut in totola a asor yok?
16 Kas lun God el kaifwe kut in ‘akpayeye ma yok sripe puspus.’ (Filippai 1:10) Poul el pupulyukkin moul lun met Kristian nu ke kasrusr in akutun, a el akkalemye kas in kasru inge: “Lela kut in ouyepa sisla ma toasr nu kemwa . . . , a lela kut in moniyuk in kasrusr lun akutun, su filiyuki tari ye mutasr.” (Hibru 12:1) Me lutlut yok sripe su el lungse in fwak pa kut in tia oru kutena orekma su tia eneneyuk, me aktoasr su tia eneneyuk, su ku in oru kut in totola. Saap kutu sin met lili wiyesr elos srike in oru ma puspus su alukela ma fwal. Ke ma inge kom fwin pulakin totola a fosrngela, kom ku in eis ma lane ka kom fwin tuni akmwoye ke lupan pal su kom orekmakin in oru orekma in suk ma enenu lom, kom ku pa in etu ke pal su kom oru travel lom in akengunye kom, a ke orekma lom in oru sports ku kutupa me akengan. Nunak sumwos a oiyen fwokpap fwa ku in akkeye kut in akilen ke ma kut tia ku in oru a kut in tia oru kutena orekma su tia eneneyuk.
17. Efu ku kutu met lili elos asor a munasla, tusruktu kas in mwulela fuka Jeova el fwak nu sesr ka?
17 Saap kutu met lili elos pulakin pa asor yok a munasla ke sripen saflaiyen akwuk koluk puspus inge soenna tuku oana ke ma kut nunku ka. (Soakas 13:12) Tusruktu, kutena met su pulakin ouinge elos ku in eis me akkeye ke kas mwomwo su simusyukla in Hebakkuk 2:3: “Tu aruruma se inge srakna on nu ke pal pakiyuki, a aksaye nu ke safla, a fwa tia kikiap. Fwinne pat, sano nu ka; tu paye a fwa tuku. A fwa tia pat.” Jeova el mwulela nu sesr la saflaiyen akwuk koluk puspus inge e fwa tuku ke pal fwal oana ma el pakiye tari!
18. (a) Mwulela fuka akkeye kom? (b) Me lutlut toko e fwa me kasru yok nu sesr ke inkanek fuka?
18 Paye la, met kulansap nukewa lun Jeova elos tupan nu ke len se su me totola a me asor e fwa wanginla, ke pal se met matu nukewa elos fwa engankin “len in fwusr lalos.” (Job 33:25) Fwinne ke pal inge kut ku in pulakin ku ke insiesr ke inkanek lun orekma lun ku lun God nu sesr ke kut wi ke kain in orekma nukewa in kulansap nu sin God su akkeye kut. (2 Korint 4:16; Efesus 3:16) Kom fwin pulakin la kom totola nik kom lela ma inge in tulokinkomi in tia eis me insemwomwo ma patpat. Ma upa nukewa, su tuku ke me srufwe, ku tuku ke sripen kut pulakin totola ku asor yok a fosrnga, ma inge a fwa wanginla ke pal na sa, me keok nukewa fwa wanginla ke fwal sasu lun God. Ke me lutlut toko, kut e fwa tuni akmwoye ke inkanek mwo su ku lun God ku in akkeye met Kristian in tu ku ke me kalyai, in lain me akkoluk lun met asrouki, a in muteng ke kain in ma upa saye.
Kom E Topuk Fuka?
• Orekma lasr in ridi Baibel el akkeye kut fuka?
• Pre a in sifwilpa nunku yok ka ku in akkeye kut fuka?
• Fuka kom ku in akwanginyela sripe puspus lun me asor yok?
[Petsac ke sra 18]
Meeting nukewa lun congregation ku in akkeye kut