Totola Tusruk Tia Mulalla
“Jeova, Met Orala tafwunyen fwalu, . . . el sang ku nu selos su mulalla; a nu sel su wangin ku lal el akyokye ku.”—ISAIA 40:28, 29.
1, 2. (a) Me solsol mwo fuka sapkinyuk nu sin met nukemwa su oru alu paye? (b) Mea ku in orala me sensen nu ke oiya lun ngun lasr?
OANA met tuma lutlut lun Jisus, kut etu na paye kalmen me solsol mwolana lal: “Fwasru nu yuruk, komwos nukemwa su orekma a fwuni, a Nga fwa sot mongle nu sumwos. . . . Tu srenena luk fusresr a me utuk luk mulalla.” (Mattu 11:28-30) “Pal in mutalelik . . . su fwa tuku ye mutun Jeova” sang pa nu sin met Kristian nukemwa.” (Orekma 3:19, NW) Kom sifwana pula a liye insemwomwo paye su tuku ke etauk lom ke sripen lutlut Baibel, insemwomwo nu ke fwinsrak paye ke pal fwasru, a in orekmakin masap lun Jeova ke moul lasr.
2 Fwinne oinge, kutu sin met kulansap lun Jeova oasr pal elos pulakin totola ke nunak lalos. Kutu pal me akmunas ku in sikyuk. Ke kutu pal ma sikyuk su tia mwo ku in pulakinyuk ke lusen pal loeloes. Ke sripen pal u tia tui, oasr kutu met ku in pulakin la kunokon lalos in oana sie met Kristian ekla nu ke me utuk toasr a tille sie me utuk su orala me insemwomwo in oana ma Jisus el mwolela tari. Kain in pulakin tia mwo inge ku in orala me sensen upa nu ke futoto lun sie met Kristian nu sin Jeova.
3. Efu ku Jisus el sang kas in kai su koneyukyak in Jon 14:1?
3 Tia pat tokin sruu in anwuki el, Jisus el fwak nu sin met tuma lutlut lal: “Nikmet lela insiomwos in toasr. Komwos lalalfongi God, komwos in oayepa lalalfongi yu.” (Jon 14:1) Jisus el fwak kas inge nu sin met sap nukemwa ke elos apkuran in sun kain in ma upa puspus. Oasr kolyai upa fwa sikyuk tok. Jisus el etu la met sap nukemwa lal ku in aktukulkulyeyuk ke sripen me asor yok. (Jon 16:1) Fwin wangin karunginye, oasr me asor puspus ku in akmunasye oiya lun ngun lalos a oralos in tula lalalfongi lalos nu sin Jeova. Ma inge sikyuk pa nu sin met Kristian in pal inge. Inse toasr su pulakinyuk ke lusen pal loeloes ku in paenang me asor yok, a insiesr ku in aktoasryeyuk. (Jeremaia 8:18) Pulakin lun nunak lasr ku in akmunasye kut. Ke sripen ma upa inge, kut ku in munasla ke nunak a ma lun ngun oana met su muta in ma upa, oru tula kena lasr in alu nu sin Jeova.
4. Mea ku in kasre kut in karunganang ngun lun insiesr in tia totola?
4 Arulanu fwal me kai lun Baibel: “Ke arulanu oaru kom liaung insiom, tu ma lun moul sikyuk ka me.” (Soakas 4:23) Baibel el sang me kai mwomwo su kare kut in karunganang insiesr nu ke ma lun ngun in pal in me asor yok a me akmunas lun ngun. Tusruktu, kut enenu in akilen meet la mea paenang kut in munasla.
Alu lun Met Kristian Tia Oru Ma Upa
5. Oiya fuka lain sie sin sie ke orekma lun met tuma lutlut oana met Kristian?
5 Paye, in moulkin moul in met Kristian kaifweang eneneyuk. (Luk 13:24) Paye la Jisus el fwak: “El su tia wis sak soko lal sifwanu a fwasr tukuk el koflanu met tumuk lutlut.” (Luk 14:27) Ke mutamwauk, kas inge akfosyeak kas lun Jisus su fwak ke me utuk lal tia toasr a fusresr, tusruktu payeiyen kas inge wangin me lain ka.
6, 7. Efu ku inkanek in alu lasr tia me aktotoye?
6 Orekma upa a kaifweang eneneyuk, fwinne oru sie met in ulle ke mano, meyen ma inge ku in orala me insemwomwo a me sang mongle fwin orek ke inkanek su oasr nien sun mwo ka. (Ekklisiastis 3:13, 22) Ya oasr kutu pa nien sun mwo su mwo liki orekma in sang ma lo ke kas paye lun Baibel nu sin met tulan lasr? Sayen ma inge, kaifweang lasr fwinne keok in moulkin moul fwal nu ke masap fulat lun God ma inge ma na srisrik fwin srikeyuk nu ke me insemwomwo nukemwa su kut engunkin ke fwako lun kaifweang lasr. (Soakas 2:10-20) Fwinne ke pal in kolyaiyuk, kut insemwomwo in pulakin me keok ke sripen Togusrai lun God.—1 Piter 4:14.
7 Me utuk lun Jisus el me sang mongle paye, yokna fwin srikeyuk nu ke moul fokfok in ngun su sun met puspus su srakna muta ye me utuk toasr lun alu kikiap. Oasr lungse paye lun God nu sesr a el tia siyuk me siyuk alukela ma fwal nu sesr. “Masap nukemwa lun Jeova tia toasr.” (1 Jon 5:3) Alu lun met Kristian paye, oana Ma Simusla el akkalemye, tia orekmakin ma upa. Arlana kalem, la alu lasr tia me aktotoye ku me akmunasye.
“Sisla Me Toasr Nukemwa”
8. Ke pal puspus mea paenang totola lun ngun?
8 Kutena me aktotoye ngun su kut pula ke pal puspus tuku ke me utuk toasr su kut eis ke akwuk koluk lun fwal se inge. Ke sripen “fwalu nu fon on in ku lun met koluk se,” paenang kut rauniyukla ke ku puspus su ku in akmunasye kut a kunausla sumwos mwomwo lasr ku oiya mwo lasr oana sie met Kristian. (1 Jon 5:19) Orekma puspus su tia yok sripe ku in akupaye a akkolukye orekma nukemwa lasr oana met Kristian. Kutupa me utuk inge ku in aktoasrye kut a ku pa in kunausla ma lun ngun lasr. Arlana fwal, ke Baibel el kaifwe nu sesr in “sisla me toasr nukemwa.”—Hibru 12:1-3.
9. In suk ma puspus ke ma lun ikwe fuka ma inge ku in aktoasrye kut?
9 Nu ke me pupulyuk, akwuk lun fwalu orekmakin pal yok lalos in ekla met pengpeng, in nunku ke mani, me akengun, in oru fwafwasryesr in me insemwomwo, a kutu pa nien sun ke ma lun ikwe su ku in akkolukye nunak lasr. (1 Jon 2:15-17) Kutu sin met Kristian in century se meet elos suk me kasrup su oru moul lalos in upala. Met sap Poul el aketeye: “Elos su lungse tu elos in kasrup elos putatyung nu in me sruf a me kaisrip a lung in ikwe puspus su lalfon a me fosnga, su akmwalomye met in kunausten a nien tula. Tu lungse mani okan kain koluk nukemwa, a kutu ke elos suk ma inge, elos tafongla liki lalalfongi a sifwana fwaksilosi ke me asor puspus.”—1 Timote 6:9, 10.
10. Mea kut ku in lotela ke me kasrup in oana ke me pupulyuk lun Jisus ke met taknelik fute?
10 Kut fwin pulakin totola a inse musalla ke kulansap lasr nu sin God, ya ma inge tia ma ke sripen kaifweang lasr in suk me kasrup puspus su kupowiye ma lun ngun lasr? Paye ma inge ku in sikyuk, oana me pupulyuk lun Jisus ke met taknelik fute el akkalemye. Jisus el fwak ke “nunkalanu fwalu a kutasrik lun me kasrup a lung nu ke ma puspus saye” oana kokol su “kupowiye” futen kas lun God su oasr ke insiesr. (Mark 4:18, 19) Ke sripe se inge, Baibel el kai kut: “Komwos in tia lungse mani, komwos in insemwomwo ke ma su on yurumwos. Tu el sifwana fwak: ‘Nga fwa tia na filikomla a Nga tia na som liki kom.’ ”—Hibru 13:5.
11. Fuka kut ku in sisla ma puspus su aktoasrye kut?
11 Kutu pal, ma su akupaye moul lasr, tia ma ke orekma in suk ma puspus, a ma kut oru ke ma puspus su oasr tari. Kutu met elos ku in pulakin totola ke nunak su tuku ke mas upa, mise lun met elos lungse, ku kutu pa ma upa su wise me asor. Elos suk me enenu in sang aksumwosye ke kais kutu pal. Oasr sie seanyen elos sulela in sisla kutu me akengan lalos a project puspus lalos su tia yok sripe. Elos tuni ma lalos a oreni ma puspus ke project lalos nu ke sie pok a sisla ma inge. Kais kutu pal, kut ku in eis ma lane ke kut nunku a tuni oiya lasr a ma puspus lasr, a sisla me aktoasr nukemwa su tia eneneyuk tu kut in tia totola a mulalla in moul lasr.
Nunak Sumwos a Inse Fulpap Yok Sripe
12. Mea kut enenu in etu ke ma tafongla lasr sifwana?
12 Kais kutu srisrik munasla moul lasr ke sripen ma koluk lasr sifwana, fwinne ke ma srisrik. Paye kas lal Devid: “Tu ma sito luk elos alukela sifwuk; oana sie me utuk toasr elos toasrlanu nu sik.” (Sam 38:4) Pal puspus, me aksumwos mwomwo ku in kasre kut liki me utuk toasr.
13. Fuka nunak sumwos el ku in kasre kut in oasr sie nunak mwo nu ke orekma in luti lasr?
13 Baibel el kaifwe kut in akyokye “lalmetmet paye a ku in nunuk.” (Soakas 3:21, 22) “Lalmetmet lung me pa . . . sumwosmwos,” Baibel el fwak. (Jemes 3:17) Kutu met elos pulakin ma upa ke sripen elos lungse in oru pa oana ma kutu met elos oru ke orekma in luti lun met Kristian. Tusruktu, Baibel el kaifwe kut: “A lela kais sie met in sifwana srike orekma lal, a na e fwa oasr sripen konkun lal kel sifwana, a tia ke met tulan lal. Tu kais sie met fwa sifwana wis me toasr lal.” (Galetia 6:4, 5) Paye, me srikasrak mwo lun met Kristian wiyesr ku in akkeye kut in kulansupal Jeova ke inse kemwa, tusruktu lalmetmet paye a nunak sumwos fwa kasre kut in oakiye nien sun paye fwal nu ke ku lasr.
14, 15. Fuka kut ku in akkalemye lalmetmet paye in karungin ma enenu lasr ke mano a pulakin lasr?
14 Nunak sumwos lasr fwinne ke ma puspus su tia arulanu yok sripe ku in kasre kut in tia pulakin totola. Ke sie me pupulyuk, ya kut kaifweang in oru sie oiya mwo su ku in kasre kut in oasr mano fukoko? Nunku ke me srikasrak lun sie seanyen su kulansap ke sie branch ofus lun Met Lo lun Jeova. Elos liye tari ke saokiyen lalmetmet paye su kasru yok in tia totola. Mutan kiel el fwak: “Fwinne oasr orekma puspus lasr, kut kaifweang in motul ke pal fwal ke eku nukemwa. Kut asrosr pa pal nukemwa. Ma inge kasre kut na paye. Kut lotela tari la oasr saflaiyesr, a kut oru ma puspus in fwal nu ke ma inge. Kut srike in tia oru ku lasr sifwana in oana elos su arulanu fukoko.” Ya kut kang pal nukemwa mongo mwomwo a eis mongle fwal? In karunganang mwo manosr ku in sang me kasru mwomwo in akfusesrye pulakin lun nunak in keok a in tia munasla ke ma lun ngun.
15 Kutu sesr oasr me enenu sakuruk lasr. Ke sie me pupulyuk, sie sister Kristian wiyesr el kulansap tari ke orekma lun forfor pal nukemwa ke territory puspus su arulanu upa. El sun mas upa puspus, wekunang cancer. Mea kasrel in kutangla ke pal ma upa inge sikyuk? El fwak: “Arulanu yok sripe nu sik in orekmakin pal ngan mukena muta a engankin misla mwomwo. Ke nga pulakin yokyokelik lun ma upa a totola apunyula, nga enenu in silaklak eis pal in mongle a in mukena muta tu nga fwa ku in mongle a rid.” Lalmetmet paye a etu nunak kasre kut in akilen a in akinsemwomwoye me enenu lasr a in fwasr liki me aktotoye ngun.
Jeova El Akkeye Kut
16, 17. (a) Efu ku in karungin mano lun ngun lasr arlana yok sripe? (b) Mea weang orekma lasr ke len nukemwa?
16 Paye, in karungin mano lun ngun lasr, arulanu yok sripe. Fwin oasr futoto paye lasr nu sin Jeova God, kut ku in pulakin totola lun mano, tusruktu kut tia ku in totola in oru alu lasr nu sel. Jeova pa “sang ku nu selos su mulalla; a nu sel su wangin ku lal el akyokye ku.” (Isaia 40:28, 29) Met sap Poul, su pula ma paye lun kas inge, el simusla: “Ke ma inge kut tia fuleak, a fwinne wanginla ku lun manosr, a insiesr aksasuyeyuk len nukemwa.”—2 Korint 4:16.
17 Tuni kas inge “len nukemwa.” Ma inge akkalemye la kut akmwesasye kut sifwana a orekmakin moul lasr nu ke me sang lun Jeova len nukemwa. Sie missionary su oaru in oru orekma in kulansap lal ke lusen yea 43 oasr pal el pulakin totola ke mano a me asor. Tusruktu el tia mulalla. El fwak: “Nga oru pal nukemwa in toang tukakek tu meet liki nga mutamwauk in oru kutena orekma, Nga ku in eis pal in pre nu sin Jeova a rid Kas lal. Oiya inge ke len nukemwa kasre yu in muteng ne ke pal inge.” Kut ku in tupan ke ku lun Jeova kut fwin oru pal nukemwa, aok “len nukemwa,” in pre nu sel a nunku ke oiya mwolana puspus lal a ke mwolela nukemwa lal.
18. Me pwarak fuka Baibel el sang nu sin met oaru puspus su matou tari ku mas??
18 Ma inge ku in sang kasru paye nu selos su pulakin asor ke sripen matou a mas. Met puspus su oinge ku in pulakin asor, tia ke sripen elos srike moul lalos sifwana nu sin kutupa met, a ke sripen elos srike ma elos ku in oru ke pal inge nu ke ma elos orala in pal meeta. Sie me insemwomwo yok in etu la Jeova el akfulatye met matou! Baibel el fwak: “Sifwe fiyaea sie tefuro lun mwolana fwin koneyukyak in inkanek lun sumwosmwos.” (Soakas 16:31) Jeova el etu ma puspus su kut tia ku in oru a el arlana aksaokye alu lasr nu sel ke inse kemwa fwinne oasr me munas puspus lasr. A orekma mwo su kut orala tari oasr in nunak lun God a el tia ku in mwulkinkutla. Ma simusla el mwolela nu sesr: “Tu God el tia sesumwos in mwulkunla orekma lomwos, a lungse su komwos fwakak nu ke El, ke komwos kasru met mwo meeta a oayepa inge.” (Hibru 6:10) Paye kut arulanu insemwomwo in oasr inmasrlosr akpayeye oaru lalos nu sin Jeova ke lusen yea puspus!
Nik Met Fuleak
19. Kut fwa akinsemwomwoyeyuk fuka ke kut kafofo in oru ma mwo?
19 Met puspus elos lalalfongi mu in orekma yok pal nukemwa ku in aksrikye pulakinyen totola lun mano. Ke inkanek oinge, in oru ma lun ngun pal nukemwa ku in kasre kut in aksrikye kutena kain in pulakin lun totola in nunak a in ngun. Baibel el fwak: “A lela kut in tia totola in oru mwo, tu in pal fwal kut fwa kosrani, kut fwin tia mulalla. Ke ma inge oana oasr pal fwal yurosr lela kut in oru mwo nu sin met nukemwa, a yokna nu selos su sou lun lalalfongi.” (Galetia 6:9, 10) Tuni kas se “oru mwo” a “oru ma mwo.” Ma inge akkalemye la kut enenu in orekma. In oru orekma mwo nu sin met puspus ku in kasre kut in tia totola ke orekma in kulansap lasr nu sin Jeova.
20. In lain me asor, asrouki lun su kut enenu in fwasr liki?
20 Ke inkanek saye, in asrouki a wi orekma yurin met puspus su pilesru masap lun God ku in ekla sie me utuk upa. Baibel el sang kas in sensen nu sesr: “Sie eot me toasr, a oayepa puk—a mulat lun sie met lalfon toasr liki ma luo inge.” (Soakas 27:3) In lain me asor a pulakinyen totola, kut enenu in fwasr liki asrouki lun met puspus su nunku ke ma koluk pal nukemwa a lungse in liye ma tafongla a akkolukye kutu met.
21. Fuka kut ku in akkeye met nukemwa ke pal in meeting nukemwa lun met Kristian?
21 Meeting nukemwa lun met Kristian pa sie inkanek su Jeova el ku in ase nu sesr ku lun ngun. Ke meeting nukemwa oasr pal mwomwo lasr in akkeye sie sin sie a oasr pa kas in kasru a asrouki su ku in akinsemwomwoye kut. (Hibru 10:25) Met nukemwa ke congregation elos enenu in sang me akkeye ke elos sang me top lalos ke pal in meeting ku ke pal se elos oru kunokon lalos ke platform. Elos su oru kolyuk lalos oana met luti pa oasr kunokon yok in akkeye met puspus. (Isaia 32:1, 2) Fwinne oasr enenu in sang kas in kasru ku me kai, inkanek inge enenu in orek ke pusra mwo su akinsemwomwoye met. (Galetia 6:1, 2) Lungse lasr nu sin met puspus fwa kasre kut yok in kulansupal Jeova tia totola.—Sam 133:1; Jon 13:35.
22. Fwinne kut met sesumwos, efu kut ku in pulaik?
22 In alu nu sin Jeova ke pal safla inge enenu in kaifweang paye. Met Kristian nukemwa elos pulakin pa me akkoluk su sikyuk ke totola lun nunak, pulakin me aktoasr, a ma upa puspus. Ke sripen kut sesumwos, paenang kut munas, oana alu fok. Tusruktu, Baibel el fwak: “A ma saok inge oasr yurosr in alu fok, tu yoklanu lun ku fwa ma sin God me, a tia ma sesr sifwana.” (2 Korint 4:7) Aok, kut ku in totola, tusruktu lela kut in tia mulalla ku fuleak. A, lela kut in “pulaik a fwak: ‘Jeova el met kasru luk.’ ”—Hibru 13:6.
Sie Kalweni Futoto
• Mea kutu mea utuk toasr su kut ku in sisla?
• Fuka kut ku in wi oru “ma mwo” nu sin met lili Kristian wiyesr?
• Fuka Jeova el kasre kut fwin kut pulakin totola ku munasla?
[Picture on page 17]
Jisus el etu la fwin oasr pulakinyen me asor ke lusen pal loes ma inge ku in orala ma upa lun met sap nukemwa
[Picture on page 18]
Kutu met elos sisla kutu me akengan a project lalos sifwana su tia yok sripe
[Picture on page 20]
Jeova el aksaokye na paye alu lasr ke inse kemwa, fwinne oasr kutu ma su kut tia ku in oru