Orekmakin Mwo Moul Lom Oana Sie Met su Tia Payuk
“El su ku in eis ma se inge, lela lan eis.”—MATTU 19:12.
1, 2. (a) Nunak fuka Jisus, Poul, a kutupa met elos akkalemye ke moul lun sie su tia payuk? (b) Efu ku kutu met elos nunku mu moul su tia payuk el tia sie me sang?
AKWUK ke payuk el sie me sang lun God su arlana yok sripe nu sin metu. (Soakas 19:14) Ne ouinge, oasr met Kristian puspus su tia payuk elos engunkin pa moul mwomwo. Mokul matou se inge su pangpang Harold, el yea 95 matwe, su tia payuk, el fwak: “Nga engun ke pal nukewa nga wi muta yurin met puspus a akkalemye kulang nu selos, a ke pal se nga mukelana muta nga tia na pulakin asor. Nga ku in fwak la ke sripen nga lolap paenang oiya se inge oana sie me sang mwomwo su oasr yuruk.”
2 Paye la, Jisus a met sap Poul elos akkalemye ke oiya su tia payuk, oana sie me sang sin God. (Ridi Mattu 19:11, 12; 1 Korint 7:7.) Tusruktu, tia met nukewa su tia payuk elos oru sulela lalos in ouinge. Kutupal upa nu sin met puspus in koneak ke mutan ku mokul su elos e fwa payukyak nu se. Ku tokin yea puspus elos engunkin moul in payuk, kutu met elos fwasrelik ku divorce, ku mutan ku mokul tumalos mise, paenang elos sifwilpa mukelana muta. Ke ma inge, ke oiya fuka moul lun sie met su tia payuk el sie me sang? A fuka met Kristian su tia payuk elos ku in akpayeye ma mwomwo ke moul lalos?
Sie Me Sang Mwo su Wangin Ma Oana
3. Oiya mwomwo fuka met Kristian su tia payuk elos engunkin?
3 Oasr pal yok a sukosok lun sie met su tia payuk liki sie met su payuk tari. (1 Korint 7:32-35) Oiya inge ku in orala pal mwomwo nu sel in akyokye orekma in luti lal, in akyokyelik lungse lal nu sin met puspus, a in akfototoyel nu sin Jeova. Ke ma inge, oasr met Kristian puspus elos aksaokye ma lane puspus su tuku ke sripen elos tia payuk, a elos oru sulela lalos in “eis ma se inge,” fwinne ke sie lusen pal na. Oasr kutu met su tia nunku in lolap pal nukewa, tusruktu ke sripen oasr ma ekyek ke moul lalos, elos pre nu sin God ke oiya su sikyak nu selos a elos akilen la ke kasru lun Jeova elos ku in pulakin misla ke insielos. Ke ma inge, elos inse mulala in eis ma ekyek ke moul lalos inge a elos sulela in orekmakin pal lalos in oana sie met su tia payuk.
4. Efu ku met Kristian su tia payuk elos ku in pulakin la ma nukewa oasr yurolos ke orekma in kulansap lalos nu sin God?
4 Met Kristian su tia payuk elos etu la elos tia enenu in payukyak in kaksakinyuk a aksaokyeyuk sin Jeova a sin u lal. God el akkalemye lungse lal nu sin kais sie sesr. (Mattu 10:29-31) Wangin kutena met a kutena ma su ku in srikutla liki lungse lun God. (Rom 8:38, 39) Kut fwin payuk ku tia payuk, oasr sripe mwomwo lasr in pulakin la ma nukewa oasr yurosr ke orekma lasr nu sin God.
5. Mea eneneyuk nu sin met lolap in engunkin me insemwomwo yok su tuku ke oiya su tia payuk?
5 Ke ma inge, fuka met Kristian su tia payuk ke pal inge, fwinne elos mokul ku mutan, srakna fwusr ku matu tari, elos lolap ke sripen pa inge sulela lalos ku ke sripen elos tia ku in koneak met su elos lungse in payuk nu se, elos ku in orekmakin moul lalos ke inkanek mwo emeet? Lela kut in lutlutkin kutu me srikasrak mwomwo ke congregation lun met Kristian in pal meeta a lela kut in liye la mea kut ku in lotela ka.
Tia Payuk ke Pal in Fwusr
6, 7. (a) Kunokon fuka an akosr natul Filip elos eis ke orekma in kulansap nu sin God? (b) Ke inkanek puspus fuka Timote el orekmakin mwo yea puspus ke moul in tia payuk lal, a el eis me insemwomwo fuka ke sripen el inse mulala in kulansap ke pal in fwusr lal?
6 Met fwakak peng mwo se inge su pangpang Filip el oasr an akosr natul su akkalemye pa moniyuk oana papa tumalos in fwakak peng mwo. (Orekma 21:8, 9) Orekma in palye el sie me sang su tuku ke ku lun God, a mutan fwusr inge elos orekmakin me sang inge in akpayeye Joel 2:28, 29.
7 Timote el sie met fwusr su orekmakin mwo moul in tia payuk lal. Mutawauk ke pal se el tulik srisrik Iunis nine kiyel, a Lois nine matou kiyel elos lotel ke “Baibel mutal.” (2 Timote 1:5; 3:14, 15) Tusruktu kalem la elos ekla met Kristian ke pal se meet Poul el muteta in an Listra, an se su elos muta we, in yea 47 C.E. Tokin yea luo, ke pal se Poul el muteta ke pal akluo, saap Timote el oasr tari ke yea sengoul yuh kutu ku yea 20. Paye la el srakna fwusr a tufwana etu ma paye, ne ouinge oasr “peng mwo kel” yurin met Kristian elder in an Listra a an Aikonium. (Orekma 16:1, 2) Ke ma inge Poul el sulel Timote in welul ke orekma in fwufwasryesr lal. (1 Timote 1:18; 4:14) Kut tia ku in fwak na paye fwin Timote el tia payuk ke lusen moul lal nufon. Tusruktu kut etu la oana sie met fwusr, el engun in eis me solsol lal Poul, a ke lusen yea puspus, el engunkin orekma in kulansap lal oana sie missionary a met liaung fwinne el tia payuk.—Filippai 2:20-22.
8. Mea kasrel Mark in akpayeye akwuk mwomwo lal ke orekma in kulansap nu sin God, a me insemwomwo fuka el eis ke sripen el oru ma inge?
8 Ke pal in fwusr lal, met tuma lutlut se inge su pangpang Mark el orekmakin pa moul lal oana sie met su tia payuk ke inkanek mwomwo. El a nine kiyel, su pangpang Mary, a cousin se lal inge Barnabas elos wi ke congregation su oasr in Jerusalem in century se meet. Sou lal Mark saap arlana mwo moul lalos, meyen oasr pa loom selos sifwana in siti se inge a oasr met kulansap lalos. (Orekma 12:12, 13, NW) Tusruktu, fwinne oasr moul mwomwo lal a el srakna fwusr, Mark el tia nunku kel sifwana. A el tia engun in suk moul mwomwo nu sel sifwana ke el suk inkanek in payuk a muta na ke sie an. Asrouki mwomwo lal yurin met sap puspus ke el srakna fwusr sang kasru nu sel in akkeye lungse lal in wi ke orekma lun missionary. Ke ma inge el lungse na paye in welul Poul a Barnabas ke fwufwasryesr lalos oana missionary ke pal se meet, a el orekma oana met in kasru nu selos. (Orekma 13:5) Tok, el welul Barnabas, a tokin pal loeloes el welul Piter in oru orekma in kulansap lalos fwin an Babulon. (Orekma 15:39; 1 Piter 5:13) Putaka Mark el tia payuk, kut tia etu na paye. Tusruktu el akkeye oiya mwomwo paenang el eteyuk oana sie met su lungse na paye in kulansap nu sin met puspus a lungse in kafweang ke orekma in kulansap nu sin God.
9, 10. Pal mwomwo puspus fuka oasr ke pal inge nu sin met Kristian fwusr su tia payuk in akyokye orekma in kulansap lalos? Sang sie me pupulyuk.
9 Oasr met fwusr puspus ke congregation ke pal inge elos engun pa in orekmakin pal lalos ke elos soenna payuk in akyokye pal lalos ke orekma in kulansap nu sin God. In oana Mark a Timote, elos akilen la oiyen moul lalos oana met lolap ku in sang pal mwomwo elos in ‘orekma nu sin Leum wangin me ikololosi.’ (1 Korint 7:35) Sie oiya na mwomwo pa inge. Met su tia payuk oasr pal a inkanek puspus lalos in kulansap nu sin God, oana orekma lun pioneer, a elos ku in sulkakin peng mwo ke an su oasr ma enenu yok ke met fwakak peng mwo lun Togusrai. Sayen ma inge elos ku pa in lutlut ke kas sasu, sang kasru nu ke orekma in musaela Kingdom Hall ku branch ofus, wi ke Ministerial Training School, a oru orekma in kulansap in Bethel. Kom fwin srakna fwusr a soenna payuk, ya kom orekmakin pal mwomwo lom inge ke inkanek mwo emeet?
10 Oasr sie brother su pangpang Mark el mutawauk in oru orekma lun pioneer meet liki el sun yea longoul, el wi ke Ministerial Training School, a el wi ke kain in orekma puspus fwin fwalu nufon. Ke pal se ma el esam ke yea 25 somla su el oru orekma lun pioneer, el fwak kas inge: “Nga kafweang in akkeye met lili nukewa ke congregation, welulos ke orekma in luti peng mwo, nga muteta nu yurolos in akkeyelos, nga suli elos nu in loom sik in wi yu mongo, a nga orala pa akwuk kut in oru tukeni lasr in akkeye sie sin sie. Ma nukewa inge oru ngan insemwomwo na paye.” In oana ke ma Mark el fwak inge, engun yok ke moul tuku ke orekma in sang, a moul su orekmakinyuk in kulansap nu sin God ku in orala pal mwomwo in sang nu sin met puspus. (Orekma 20:35) Met fwusr puspus ke pal inge, fwinne tia oana sie ma elos insemwomwokin ke moul lalos, tia oana sie oiyen ituftuf ku sumat lalos, ku ma sikyak ke moul lalos, oasr orekma puspus su met fwusr ku in oru nu ke orekma lun Leum ke pal inge.—1 Korint 15:58.
11. Mea kutu ma lane fwin sie met el tia silaklak in payuk?
11 Paye la, met fwusr puspus elos lungse in payuk tok, ne ouinge oasr sripe mwomwo in tia silaklak in payuk. Arlana mwo fwin met fwusr elos ku in sano nu ke pal se elos alukela tari ke pal in fwusr lalos su elos tila nunku yok ke kena lun ikwe su arlana fokoko. Kom enenu pal loes in etu a eis kalem keim sifwana a eis experience ke moul su kom enenu in kasre kom in sulela ke sie mutan ku mokul su fwal kom in payuk nu se. Kas in mwulela lom su kom fwa oru ke pal in payuk el sie sulela yok sripe, sie sulela su oan ke lusen moul lom.—Ekklisiastis 5:2-5.
Tia Payuk ke Pal sie Met el Matou
12. (a) Fuka Ana mutan katinmas se el muteng a kutangla ke ma ekla su sikyak ke moul lal? (b) Kunokon fuka el eis?
12 Mutan se inge su pangpang Ana, su akkalemyeyuk ke Gospel lal Luk, kalem la el arlana asor ke pal se mokul tumal mise tokin yea itkosr su elos payuk. Kut tia etu fwin oasr tulik natulos ku fwin el sifwilpa nunku in payuk tokin mokul tumal mise. Tusruktu Baibel el akkalemye la ke pal se el yea 84, el srakna mutan katinmas. In fwal nu ke ma Baibel el akkalemye, kut ku in fwak la Ana el orekmakin moul lal oana sie katinmas in akfototoyel nu sin Jeova. El “tia som liki in tempel, a el alu nu sin God wi lalo a pre fong a len.” (Luk 2:36, 37) Aok, orekma lal in alu nu sin God pa ma yok sripe emeet ke moul lal. Paye la oasr ma eneneyuk nu sel in kafweang yok ka, ne ouinge God el akinsemwomwoyel na paye. El pulakin insemwomwo yok ke pal se el liyel Jisus ke el tulik srisrik, a el sang ma lo nu sin met puspus ke oiyen sukosok su Messaia el fwa oru.—Luk 2:38.
13. (a) Mea akkalemye la Dorkas el wi ke orekma puspus ke congregation? (b) Kulang a oiya mwo lal Dorkas el akinsemwomwoyeyuk fuka?
13 Oasr siepa mutan su pangpang Dorkas, ku Tabita, su muta in an Joppa, sie seaport ku nien ai lun oaku in pal meeta fwin an Jerusalem. Ke sripen Baibel el tia akkalemye ke mokul tumal, kalem la el tia payuk in pal san. Dorkas el “seseslana ke orekma mwo a me pakomuta su el oru.” Kalem la el orala kain in nuknuk nu sin mutan katinmas a nu sin met puspus saye su oasr ma enenu yok, a elos lungsel na paye ke sripen orekma mwomwo lal inge. Ke ma inge ke pal se el pulakin mas a mise, met nukewa ke congregation elos supwela met in siyuk sel Piter in akmoulyeak met lili kulo se inge. Ke pal se peng ke sifwil moulyuk lal fwasrelik fwin an Joppa nufon, oasr met puspus su wi ke lulalfongi. (Orekma 9:36-42) Saap Dorkas el wi pa in sang kasru nu sin kutu met inge ke inkanek lun kulang yok lal.
14. Mea akkeye met Kristian puspus su tia payuk in akfototoyelos nu sin Jeova?
14 In oana Ana a Dorkas, met lili ke congregation puspus ke pal inge ke elos matu tari elos srakna lolap, ku kutu selos katinmasla. Kutu selos tia koneak sie mokul ku mutan su fwal nu selos in payukyak nu se. Kutu selos orek divorce ku katinmasla. Ke sripen wangin mokul ku mutan kiyelos su elos ku in akkalemye ma on ke nunak a insielos, paenang elos lotela in fungfung yok nu sin Jeova. (Soakas 16:3) Silvia, sie sister su kulansap in Bethel ke lusen yea 38 kutu, el liye oiya se inge oana sie me insemwomwo. “Kutupal nga totola a pulakin la nga tila ku in fokoko pal nukewa,” el fwak. “Nga nunku a siyuk sik sifwana, la ‘Su e fwa akkeye yu?’” Tusruktu el fwak pa: “In lulalfongi la Jeova el etu na paye ma nga enenu liki ma nga etu sang kasru nu sik ngan fototo nu sel liki meeta. A me akkeye tuku pal nukewa, kutupal ke inkanek su nga tia nunku ka.” Pal nukewa kut kafweang in akfototoye kut nu sin Jeova, el akkalemye pa oiya mwomwo lal ke inkanek mwomwo.
15. Fuka met Kristian su tia payuk elos ku in ‘akyokyelik’ ke lungse lalos?
15 Oiyen tia payuk sang pal mwomwo in ‘akyokyelik’ ke lungse. (Ridi 2 Korint 6:11-13.) Sie sister wiyesr su pangpang Jolene, el tia payuk, el orekmakin yea 34 ke orekma lun pioneer, el fwak: “Nga kafweang in orala kawuk mwomwo nu sin met puspus su matwelos oana nga, a nu sin kain in met nukewa. Oiyen moul su tia payuk el sie pal mwomwo in orekmakin pal lom nu sin Jeova, nu sin sou lom, a nu sin met lili wiyom, oayepa nu sin met atulani lom. Ke nga matula inge, insemwomwo luk yokelik ke oiyuk inge su ngan tia payuk.” Met matou, met munas ku mas, papa ku nine su wangin mokul ku mutan kiyel, met fwusr, a kutupa ke congregation elos aksaokye me kasru sin met lili puspus su tia payuk. Aok, pal nukewa kut akkalemye lungse nu sin met puspus, kut pulakin engun ka. Ya kom ku in ‘akyokyelik’ pa lungse lom nu sin met puspus?
Met Puspus su Oru Sulela in Tia Payuk ke lusen Moul Lalos
16. (a) Efu ku Jisus el tia payuk ke lusen moul lal? (b) Fuka Poul el orekmakin mwo pal lal oana sie met su tia payuk?
16 Jisus el tia na payuk; el akola a akpayeye ma kunel in sulkakin peng mwo a luti metu. El kafweang in fwufwasryesr in sun yen nukewa, el orekma pa mutawauk toang in lututang nu ke fongeni, a ke saflaiye el kisekin moul lal sifwana. Ke sripen el tia payuk paenang ma inge kasrel in aksafyela orekma lal. Met sap Poul el fwufwasryesr pa ke lusen mail puspus a el sun kain in ma upa puspus ke el oru orekma lal in sulkakin peng mwo. (2 Korint 11:23-27) Saap Poul el payukyak meet liki el ekla sie met Kristian, ne ouinge el oru sulela in tia sifwil payuk tokin el srusrngiyuki oana sie met sap. (1 Korint 7:7; 9:5) Ke sripen elos nunku yok ke orekma in sulkakin peng mwo, Jisus a Poul elos akkeye met Kristian puspus in etawi me srikasrak mwomwo lalos. Ne ouinge, elos tia sapkin nu sin met kulansap lun God in tia payukyak.—1 Timote 4:1-3.
17. Fuka kutu met ke pal inge elos fwasr tokin me srikasrak lun Jisus a Poul? (b) Efu ku kut ku in lulalfongi la Jeova el aksaokyelos su lafwekunelosla sifwana?
17 Ke pal inge, kutu met lili elos oru pa sulela mwomwo lalos in tia payuk tu elos in ku in akpayeye orekma lalos in sulkakin peng mwo. Harold, su akkalemyeyuk tari ke me lutlut se inge, el engunkin orekma in kulansap in Bethel ke lusen yea 56 kutu. El fwak: “Ke nga orekma tari in Bethel ke lusen yea sengoul, nga liye siyanyen puspus elos enenu in som liki Bethel meyen elos mas, ku elos enenu in sang kasru a karungin papa ku nine kiyelos su matou tari. Papa a nine kiyuk elos mise tari. Tusruktu nga lungse na paye in muta in Bethel pasis nga srunga in sang kutena me sensen nu ke kunokon mwomwo luk inge, a pa inge sripe paenang nga tia payukyak.” Ke oiya su oana sie, ke yea puspus somla, sie pioneer su pangpang Margaret el fwak: “Oasr pal mwomwo puspus ke moul luk su ngan ku in payukyak, tusruktu nga nunku yok ke orekma luk oana sie pioneer paenang nga tia na payuk. A, nga orekmakin oiyen sukosok luk in kafweang in kafofo pal nukewa ke orekma in luti peng mwo, a ma inge oru ngan pulakin insemwomwo yok.” Paye la, Jeova el fwa tia mwulkunla kutena met Kristian su lafwekunelos sifwana in oru meet alu paye ke moul lalos.—Ridi Isaia 56:4, 5.
Orekmakin Pal Mwomwo Lom Ke Inkanek Mwo Emeet
18. Fuka met lili puspus elos ku in akkeye a sang kasru nu sin met Kristian nukewa su tia payuk?
18 Met Kristian nukewa su tia payuk a oru ke ku lalos kewa in kulansap nu sin Jeova arlana fwal kut in sang kas in kaksak a me akkeye paye nu selos. Kut lungse kais sie selos, a kut akilen oiya mwomwo lalos a kut engun ke ma nukewa su elos oru ke congregation. Elos fwa tia pulakin asor kut fwin akkalemye nu selos la kut ‘ma lelos a ma loulos a nine kiyelos a tulik natulos.’—Ridi Mark 10:28-30.
19. Mea kom ku in oru in orekmakin moul in tia payuk lom ke inkanek mwo emeet?
19 Kom fwin oru sulela lom in tia payukyak, ku kom tia payuk ke kutena sripe, lela me srikasrak nukewa inge su tuku in ma Simusla a ke me srikasrak su sikyak ke pal inge su kut oasr ka sang me akkeye yok nu sum la kom ku in moulkin sie moul mwomwo. Moul lun sie met su tia payuk el oana sie me sang mwomwo su kutu met nunku mu elos ku in eis, a kutu met nunku mu elos tia ku in eis. Kutu selos aksaokyeyuk orekma lalos ke pal na sa, tusruktu kutu selos aksaokyeyuk tokin yea puspus. Ke ma inge, oiya mwomwo lasr arlana yok sripe nu ka. Mea kom ku in oru in orekmakin moul in tia payuk lom ke inkanek mwo emeet? Kom in akfototoye kom nu sin Jeova, a kafweang in oru ma puspus ke orekma in kulansap nu sin God, a akyokyelik lungse lom nu sin met puspus. In oana ke moul in payuk, moul su tia payuk ku in sie me insemwomwo yok kut fwin etawi nunak lun God ka a orekmakin mwo me sang mwomwo se inge.
Ya Kom Esam?
• Ke inkanek puspus fuka oiya su tia payuk el sie me sang?
• Fuka oiya su tia payuk el sie me insemwomwo ke pal in fwusr?
• Pal mwomwo fuka oasr yurin met Kristian su tia payuk in akfototoyelos nu sin Jeova a in akyokyelik ke lungse lalos?