“Oiyen Met Fuka E Fwa Fwal Nu Sumwos!”
“Ke ma inge, meyen ma inge nu kemwa fwa kunausyukla ou inge, yen met su fwa fwal nu sumwos in muta in moul mutal a sumwosmwos!”—2 PITER 3:11.
1. Efu ku leta akluo lal Piter el me kaifwe mwomwo nu sin met Kristian in len lal?
KE PAL se met sap Piter el simusla leta akluo lal nu sin congregation lun met Kristian, elos sun ku mutengla tari ke kain me kalyai upa, tusruktu ma inge tia akmunasye moniyuk lalos a srakna oasr kapkapek yok ka. Ke sripe se inge, Devil el sifwilpa orekmakin siepa na inkanek koluk, su el orekmakin ke pal puspus in pal somla. In oana ke ma Piter el akkalemye, Setan el srike in akkolukye met lun God ke inkanek lun met luti kikiap puspus su “mutalos sesesla ke kosro” a “insielos pala ke rapku.” (2 Piter 2:1-3, 14; Jud 4) Leta akluo lal Piter el sie me akkeye nu selos in sruokye oiyen oaru lalos.
2. Piter akluo sapta 3 el sramsram yok ke mea? A kusensiyuk fuka kut enenu in siyuk sesr sifwana?
2 Met sap Piter el simusla: “A nga nunku tu fwal, ke lusen pal nga muta in loom inge, in purikkomwosyuk in akesmakinye komwos, a nga etu tu nga fwa sa in sarukla loom luk inge . . . Aok, nga fwa akkeye yu in alken tu in pal nukewa, komwos fwa ku in esmakin ma inge tokin mise luk.” (2 Piter 1:13-15) Aok, Piter el etu la mise lal apkuran, tusruktu el lungse tu kas in kaifwe lal in esamyuk pal nukewa. A pa inge ma sikyak, kas in esmakin lal simusyukla in Baibel a kut nukewa ku in rid ka ke pal inge. Sapta 3 ke leta akluo lal Piter el me purakak nunak lasr, meyen ma inge sramsramkin yok ke “len safla” lun akwuk lun ma puspus inge a ke kunausla lun kosrao a fwalu su lumeyuk nu ke guferment a un met su srela liki God. (2 Piter 3:3, 7, 10) Mea kas in kasru lal Piter nu sesr? Kut fwin orekmakin kas in kasru lal, ma inge ku in kasre kut fuka in eis me insemwomwo lun Jeova?
3, 4. (a) Mea Piter el akkalemye yok ke leta lal? A kas in sensen fuka el sang? (b) Me lutlut yok tolu fuka kut fwa lutlutkin?
3 Tokin Piter el simusla ke wanginla lun fwal lal Setan, el simusla pa ouinge: “Yen met su fwa fwal nu sumwos in muta in moul mutal a sumwosmwos!” (2 Piter 3:11, 12) Ke kas inge Piter el akkalemye kalem la met su oru ma lungse lun God a akkalemye oiya mwomwo puspus su akinsemwomwoyel ku in moliyukla liki “len in foloksak” lun God su e fwa tuku. (Isaia 61:2) Ke ma inge, met sap se inge el akkalemye pa: “Tu ou inge komwos, met kulu, meyen komwos etu ma inge meet, liyekomwosyung tu komwos in tia sremla ke srifwe lun met koluk [met luti kikiap], a komwos putatla liki ku lomwos.”—2 Piter 3:17.
4 Piter el sie selos su “etu ma inge meet,” el etu la in len safla, met Kristian elos enenu in arlana taran in kasrelos sifwana in sruokye oiyen oaru lalos. Tok, met sap Jon el akkalemye la efu ouinge. El liye ke aruruma la Setan el sisila liki in kosrao a el “mulat ma lulap” nu selos “su liaung masap lun God, a srukye lo lun Jisus.” (Fwakyuk 12:9, 12, 17) Met kulansap akmusrala nukewa lun God wekunang met nukewa ke u lun “sip ngie” elos fwa eis kutangla. (Jon 10:16) Tusruktu, fuka nu sin kais sie sesr? Ya kut sruokye oiyen oaru a paye lasr? Kut ku in eis kasru in akpayeye ma inge kut fwin kafweang in (1) akkeye oiya mwomwo su ku in akinsemwomwoye God, (2) in karungin oiyen nasnas, wangin tun a meta, a (3) in oasr nunak sumwos fwin oasr me srufwe sikyak. Lela kut in lutlutkin me lutlut yok inge.
Akkeye Oiya Mwomwo Su Ku In Akinsemwomwoye God
5, 6. Oiya mwomwo puspus fuka kut enenu in kafweang in akkeye? A efu ku ‘kafweang yok’ eneneyuk nu ka?
5 Ke mutaweyen leta akluo lal, Piter el simusla: “Aok, meyen ma inge, akkeye komwos in alken, a toeni mwona nu ke lulalfongi lomwos, a etauk nu ke mwona lomwos, a sifwana liaung nu ke etauk lomwos, a mongfusrasr nu ke sifwana liaung lomwos, a mutal nu ke mongfusrasr lomwos, a lungse lun met lili nu ke mutal lomwos, a lungse nu ke lungse lun met lili lomwos. Tu ma inge fwin ma lomwos a tingtinginu, na ma inge fwa oru tu komwos in tia alsrangesr a tia talap nu ke lalmetmet lun Leum lasr Jisus Kraist.”—2 Piter 1:5-8.
6 Paye, kut enenu in ‘kafweang yok’ in oru orekma puspus su ku in kasre kut in akkeye oiya mwomwo nukewa su ku in akinsemwomwoye God. Ke sie me pupulyuk, kafweang yok eneneyuk in wi ke meeting nukewa ke congregation, in rid Baibel len nukewa, a in oru lutlut lasr sifwana pal nukewa. A kafweang yok lasr a akwuk mwomwo eneneyuk pa in akpayeye Tukeni Lutlut lun Sou ke inkanek mwo a in orek pal nukewa. Tusruktu, kut fwin pala tari in akpayeye akwuk mwomwo lasr nu ka, arlana fusrasr in oru orekma nukewa inge, yokna kut fwin liye tari me insemwomwo puspus su tuku ka.
7, 8. (a) Mea kutu met lili elos fwak ke Tukeni Lutlut lun Sou? (b) Ma lane fuka kom eis ke tukeni lutlut lun sou?
7 Oasr sie sister su akkalemye ma mwomwo ke akwuk ke tukeni lutlut lun sou, el simusla ouinge: “Ma inge kasre kut in lotela ke me lutlut puspus.” Sie pa sister el fwak: “Paye la nga srunga akwuk ke lutlut lun congregation ke buk in aksafyela. Meeting se inge pa ma nga lungse emeet. Tusruktu ke pal inge, su oasr sie eku su kut oru Tukeni Lutlut lun sou, nga akilen la Jeova el etu ma kut enenu a la ngea kut enenu ma inge.” Oasr pa sie sifwen sou el fwak: “Tukeni lutlut lun sou kasre kut na paye. Tukeni lutlut lasr su akfwalye nu ke ma enenu lasr oana sie siyanyen arlana mwo! Nga a mutan kiyuk kut pulakin la kut kapkapek in akkalemye fwako lun ngun mutal, a kut insemwomwo yok ke pal inge ke kut oru orekma lasr in sulkakin peng mwo.” Sie pa sifwen sou el fwak ouinge: “Tulik nutusr elos sifwana oru research lalos a elos lotela ma puspus, ke ma inge elos engun in oru ma inge. Akwuk mwomwo inge oru kut in lulalfongi yok la Jeova el etu na paye ma enenu lasr a el topuk pre lasr.” Ya kom akkalemye pa kain in nunak inge ka oana nunak lun met lili puspus inge ke tukeni lutlut lun sou?
8 Nik kom lela ma puspus su tia yok sripe in kunausla akwuk lomwos ke tukeni lutlut lun sou. Sie siyanyen elos fwak, “Ekun Thursday nukewa ke lusen wik akosr, oasr ma se su sikyak ke sou lasr su oru kut in lukun na tia akpayeye tukeni lutlut lun sou, tusruktu, kut tia lela ma inge in kunausla akwuk lasr.” Aok, oasr pal komwos enenu in akfwalye schedule lomwos. Ne ouinge, lela kom in tia fuleak in oru Tukeni Lutlut lun Sou lom, aok lela kom in akpayeye ma inge ke wik nukewa!
9. Ke inkanek fuka Jeova el kasrel Jeremaia? A mea kut ku in lotela ke me srikasrak lal?
9 Met palu Jeremaia el sie me srikasrak mwomwo nu sesr. El enenu kas in akkeye su tuku sin Jeova, a el aksaokye ma inge. Kas in akkeye inge kasrel in kaskaskin kas lun God wi mongfusrasr lal nu sin met puspus su srunga in long. “Tu kas lun Jeova . . . oana sie e furur kaliye in srik,” el fwak. (Jeremaia 20:8, 9) Kas in akkeye su tuku sin God kasrel pa in muteng ke pal in ma upa nu ke pal se Jerusalem kunausyukla. Ke pal inge, oasr yurosr buk nukewa lun Baibel su Kas lun God simusyukla ka. Kut fwin alken in lutlutkin ma inge a oasr yurosr nunak lun God ke ma puspus, kut fwa ku in engun in muteng ke orekma in luti lasr, a kut ku in sruokye oiyen oaru lasr fwin oasr pa me srufwe puspus, a kut ku in sruokye oiyen moul nasnas, oana ke ma Jeremaia el oru.—Jemes 5:10.
Kafweang in “Wangin Tun a Meta”
10, 11. Efu ku kut enenu in alken in karungin kut in “wangin tun a meta,” a ma eneneyuk fuka kut in oru?
10 Oana met Kristian, kut etu la kut moul tari ke len safla. Ke ma inge, kut tia lut fwin oasr ma puspus fwin fwalu su me srungeyuk nu sin Jeova, oana oiyen rapku, kosro a kain in ma fokfok nukewa, a orekma sulallel a akmas. Orekma kutasrik lal Setan ku in akfototoyeyuk ke kas inge: ‘Fwin met kulansap lun God tia ku in aksangengyeyuk, saap elos ku in akkolukyeyuk.’ (Fwakyuk 2:13, 14) Ke ma inge, kut enenu in esam kas in kaifwe lal Piter: “Komwos in alken in akkeye komwos tu komwos fwa konoiyukyak ye mutal in misla, wangin tun a kuiye.”—2 Piter 3:14.
11 Ke fus se inge Piter el sifwilpa akkalemye kas in kaifwe su el simusla meet ke el fwak “alken.” Kalem la, Jeova su oru Piter in akkalemye kas inge, el etu la kut enenu in kafweang yok in “wangin tun a meta,” tia akfokfokyeyuk ke me srungeyuk lun fwal lun Setan. Kut enenu pa in kafweang yok in karungin insiesr in tia akkolukyeyuk ke kena koluk. (Ridi Soakas 4:23; Jemes 1:14, 15.) Kut enenu pa in tu ku a pulaik nu sin met puspus su nunku yok ke inkanek in moul lasr oana met Kristian a elos su “kaskas koluk lain [kut].”—1 Piter 4:4.
12. Kas in kasru fuka akkalemyeyuk in Luk 11:13?
12 Ke sripen oiyen sesumwos lasr, arlana upa in oru ma sumwos. (Rom 7:21-25) Inkanek sefwanna su kut ku in eis kutangla ka pa kut fwin forla nu sin Jeova, el su sang ku lal nu selos nukewa su siyuk na paye ka. (Luk 11:13) Ku su tuku sin God, ku in kasre kut in akkeye oiya mwomwo puspus su ku in akinsemwomwoye God. A ma inge ku in kasre kut in muteng ke me srufwe nukewa su kut sun ke moul lasr, a ke ma upa nukewa, su yokyokelik ke len lun Jeova apkuran me.
Lela Me Srufwe Nukewa In Akkeye Kom
13. Fwin oasr me srufwe su sun kut ke moul lasr, mea fwa kasre kut in muteng?
13 Ke kut srakna moul ke akwuk lun fwal se inge, kut e fwa sun kain in me srufwe puspus. Kom tia enenu in munasla ka, a kom in nunku ke ma upa nukewa oana sie pal mwomwo in akpayeye lungse lom nu sin God, a in akkeye lulalfongi lom nu sel a ke kas lal. Met tuma lutlut Jemes el simusla: “Met lili luk, komwos in oekla oana me akengun nu kemwa, ke me sruf puspus apinkomwosla, a komwos etu tu me akpayeye lalalfongi lomwos orekma fulpap.” (Jemes 1:2-4) Esam pa la “Leum [Jeova] el etu fuka in eisla met mwo liki me srifwe.”—2 Piter 2:9.
14. Me srikasrak lal Josef el akkeye kom fuka?
14 Nunku ke me srikasrak lal Josef, tulik mokul natul Jekob, su kukakinyukla oana met sruo sin mokul puspus wiyel. (Genesis 37:23-28; 42:21) Ya lulalfongi lal Josef munasla ke sripen orekma koluk lalos? Ya el toasr ke sripen God el lela ma koluk inge in sikyak nu sel? Kas lun God el akkalemye la el tia! Sayen ma inge, tia pa inge saflaiyen me srufwe lal Josef. Tok, mutan kiyen leum lal el fwak mu Josef el lungse in akkolukyel paenang el filiyuki nu in prison. Ne ouinge, el tu na ku a tia munasla ke lulalfongi lal nu sin God. (Genesis 39:9-21) Aok, el lela me srufwe puspus in akkeyel, a ke ma inge God el akinsemwomwoyel ke inkanek yok.
15. Mea kut ku in lotela ke me srikasrak lal Neomi?
15 Paye la, me srufwe ku in akasorye kut ku ku in akmunasye kut. Saap Josef el pulakin pa ouinge ke pal puspus. Met kulansap puspus saye lun God elos pulakin pa ouinge. Nunku kel Neomi, su mokul tumal a tulik mokul luo natul mise. El fwak: “Nik komwos pangon yu Neomi, pangon yu Mara [kalme pa Men], tu el su Kulanu el oru ma men nu sik.” (Rut 1:20, 21) Kut ku in kalem ke oiya su Neomi el akkalemye ka. Oana Josef, Neomi el tia tula lulalfongi lal nu sin God, a el tia pa kunausla oiyen oaru lal. Ke ma inge, Jeova el akinsemwomwoye mutan oaru se inge su saok nu sel. (Rut 4:13-17, 22) Sayen ma inge, ke paredais su fwa tuku, el fwa akwanginyela ma koluk nukewa su Setan el oru a kunausla pa fwal koluk lal. “Ma meeta fwa tia esamyuk, ku nunkauk ka.”—Isaia 65:17.
16. Oiya fuka kut enenu in akkalemye ke pre lasr, a efu kut enenu in oru ouinge?
16 Lungse lun God fwa akkeye kut pal nukewa, fwinne ke pal se kut sun kain in me srufwe upa puspus. (Ridi Rom 8:35-39.) Paye la Setan el fwa tia tui in akmunasye kut, tusruktu el fwa tia eis kutangla lal ka kut fwin sruokye “nunak sumwos” lasr a “sano ke pre” pal nukewa. (1 Piter 4:7) Jisus el fwak: “A komwos in sano pal e nu kemwa, a pre, tu komwos in ku in kaengla liki ma inge nu kemwa su fwa sikyuk, a in tu ye mutun Mwen nutin met.” (Luk 21:36) Ke kas su orekmakinyuk in pal meeta, Jisus el orekmakin sie kas su akkalemye ke kain in pre su tuku na paye ke inse. Ke el kaifwe kut in pre su tuku ke insiesr, Jisus el akkalemye kalem la kut enenu in nunku akmwoye ke orekma lasr a oiyesr su kut akkalemye nu sel a nu sin Papa tumal. Met nukewa su akkalemye oiya mwomwo su akinsemwomwoye God fwa oasr fwinsrak lalos in moulla liki len lun Jeova.
Moniyuk Pal Nukewa ke Orekma in Kulansap nu sin Jeova
17. Fwin upa in sulkakin peng mwo ke an sum, fuka kom ku in eis me akkeye ke me srikasrak mwomwo lun met palu puspus in pal meeta?
17 Kafweang lasr in wi pal nukewa ke orekma nukewa in kulansap nu sin God ku in akkeye kut. Kut esamek kas lal Piter inge: “Ke ma inge, yen met su fwa fwal nu sumwos in muta in moul mutal a sumwosmwos!” (2 Piter 3:11) Orekma in sulkakin peng mwo pa sie inkanek arlana yok sripe in moulkin pal nukewa moul mutal a sumwosmwos. (Mattu 24:14) Paye la, ke kutu an orekma in sulkakin peng mwo arlana upa in oru, saap ke sripen metu elos srunga in long ku elos lain, ku saap ke sripen metu elos arlana kafofo len nukewa in suk ku oru me fosrnga ke moul lalos. Met kulansap lun Jeova in pal meeta elos sun pa kain in oiya puspus inge. Ne ouinge, elos tia fuleak, a elos folokla nu yurin met “len nukewa” a akkalemye kas lun God nu selos. (2 Kronikel 36:15, 16; ridi Jeremaia 7:24-26.) Mea kasrelos in muteng? Elos nunku ke orekma lalos oana nunak lun Jeova ka, a tia oana nunak lun met lun fwalu. Oayepa, elos aksaokye na paye kunokon inge in pangonyuk elos ke inen God.—Jeremaia 15:16.
18. Mea orekma in luti peng mwo lun Togusrai ku in oru nu ke orekma in akfulatye inen God ke pal fwasru?
18 Oasr pa yurosr kunokon mwomwo in sulkakin inen Jeova a akwuk lal. Nunku ke ma inge: Met lokwalok lun God elos tia ku in fwak mu wangin met su fwakak kel a ke akwuk lal ke pal se elos oru nununku lal nu selos. Aok, in oana Fero in pal meeta, elos fwa etu la Jeova pa orek meun nu selos. (Exodus 8:1, 20; 14:25) Ke pal sepana, Jeova el fwa akfulatye met kulansap oaru nukewa lal, ke el oru in arlana kalem la elos fwa met tutafpo lal.—Ridi Ezikiel 2:5; 33:33.
19. Kut ku in akkalemye fuka la kut lungse in orekmakin mwo mongfusrasr lun Jeova?
19 Ke saflaiyen leta akluo lal, Piter el simusla nu sin met Kristian wiyel nukewa: “A komwos in nunku tu mongfusesr lun Leum lasr molela.” (2 Piter 3:15) Aok, lela kut in kafweang in orekmakin mwo mongfusrasr lun Jeova. Ke inkanek fuka? Kut fwin akkeye oiya mwomwo su ku in akinsemwomwoyel, a kut fwin kafweang in “wangin tun a meta,” a kut fwin akkalemye nunak sumwos ke me srufwe nukewa, a ke inkanek in akkafofoye kut nu ke orekma in sulkakin Togusrai pal nukewa. Kut fwin oru ma inge, kut ku in fwinsrak in eis me insemwomwo puspus ke pal se ‘kosrao sasu a fwalu sasu’ akpayeye tari.—2 Piter 3:13.
Ya Kom Esam?
• Kut ku in akkeye fuka oiya mwomwo su ku in akinsemwomwoye God?
• Fuka kut ku in karungin kut pal nukewa in “wangin tun a meta”?
• Mea kut ku in lotela kel Josef a Neomi?
• Efu ku sie kunokon na mwomwo in wi pal nukewa ke orekma in sulkakin peng mwo?
[Petsac ke sra 9]
Mea fwa kasre kom oana mokul payuk in akkeye oiya mwomwo puspus su ku in akinsemwomwoye God nu sum sifwana a nu sin sou lom?
[Petsac ke sra 10]
Mea kut ku in lotela ke inkanek mwo lal Josef in muteng ke me srufwe nukewa?