Mea Len Lun Jeova Fwa Akkalemye

“Len lun Jeova e fwa tuku oana sie met pusrapasr, . . . a fwalu a ma su on lu e fwa akkalemyeyuk.”—2 PITER 3:10, New World Translation.

1, 2. (a) Akwuk koluk nukewa ke pal inge fwa aksafyeyukla fuka? (b) Kusensiyuk fuka kut fwa lutlutkin?

AKWUK puspus lun fwalu ke pal inge orekla fwal nu ke nunak lun met mu elos ku in sifwana kololos fwinne wangin kasru lun Jeova. (Sam 2:2, 3) Ya kutena ma su oakiyuki ke ma kikiap ku in tu ma patpat? Mo tia ku! Tusruktu kut tia ku in tupan fwal lal Setan in aksafyela akwuk koluk nukewa lal. A, ma inge fwa kunausyukla sin God ke pal pakiyuki a ke inkanek sakuruk lal. Nununku lun God nu ke fwal koluk se inge fwa akkalemye kalem ke nununku sumwos lal a ke lungse lal.—Sam 92:7; Soakas 2:21, 22.

² Met sap Piter el simusla: “Tusruktu len lun Jeova e fwa tuku oana sie met pusrapasr, a kosrao e fwa wanginla wikin ngurngur lulap, a ma puspus su arlana fwol e fwa kofelik, a fwalu a ma su on lu e fwa akkalemyeyuk.” (2 Piter 3:10, NW) Mea kalmen “kosrao” a “fwalu” su simusyukla ke fus se inge? Mea kalmen “ma puspus” su fwa kofelik? A mea kalmen kas lal Piter inge “fwalu a ma su on lu” e fwa “akkalemyeyuk”? Kut fwin etu me top nu ke kusensiyuk nukewa inge fwa kasre kut in akola nu ke ma sikyak sakuruk puspus su apkuran in sikyak ke pal na fototo fwasru.

Kosrao a Fwalu Su Fwa Wanginla

3. Mea se inge “kosrao” su akkalemyeyuk in 2 Piter 3:10, a ma inge fwa wanginla fuka?

³ Fwin orekmakin in Baibel ke kas in pupulyuk, kas se inge “kosrao” el kalmekin pal nukewa nu ke ku su oru kolyuk, su fulat liki met nukewa su oasr ye kolyuk lalos. (Isaia 14:13, 14; Fwakyuk 21:1, 2) “Kosrao su fwa wanginla” el lumeyuk nu ke kolyuk lun metu nu sin met nukewa su tia kulansap nu sin God paye. Wanginla lun ma inge nukewa wikin “ngurngur lulap,” ku pusra yok, el akkalemye ke inkanek su kosrao inge fwa kunausyukla.

4. Mea se inge “fwalu,” a ma inge fwa kunausyukla fuka?

⁴ Kas se inge “fwalu” el lumeyuk nu ke un met nukewa su srelosla liki God. Fwalu, ku un met in len lal Noa a ke sripen masap lun God, aksafyeyukla ke inkanek lun Sronot. “A kosrao a fwalu, su ouinge, ke kas sana karunginyukyung nu ke e, nu ke len nununku a kunausla lun met koluk.” (2 Piter 3:7) Sronot in pal meeta kunausla met koluk nukewa ke pal sefwanna, tusruktu kunausten ke pal fwasru e fwa mutawauk in sikyak ke lusen pal in “ongoiye lulap.” (Fwakyuk 7:14) Ke mutaweyen ongoiye lulap se inge, God el fwa mokle met kol puspus lun politic lun fwal se inge in kunausla “Babulon Lulap,” a ma inge akkalemye la el srunga na paye alu kikiap su oana mutan kosro. (Fwakyuk 17:5, 16; 18:8) A ke pal in meun lun Armagedun, su saflaiyen ongoiye lulap, Jeova el fwa akwanginyela akwuk nukewa lal Setan.—Fwakyuk 16:14, 16; 19:19-21.

“Ma Puspus . . . Fwa Kofelik”

5. Ma puspus el lumeyuk nu ke mea?

⁵ Mea kalmen “ma puspus” su fwa “kofelik”? Kas inge “ma puspus” su Piter el simusla el kalmekin nu ke oiya puspus su oru fwalu in akkalemye oiya koluk puspus, ella su tia mwo, inkanek sufwal a niyen sun. Wekunang ‘oiyen fwalu,’ su “orekma inge in mwen nutin seakos.” (1 Korint 2:12; ridi Efesus 2:1-3.) ‘Oiyen seakos’ se inge oasr yen nukewa fwalu. Ma inge oru metu in nunku, in orala me lemlem, a orekma lalos fwal nu ke inkanek su akkalemye nunak lal Setan, su inse fulat a seakos, su “leum in ku lun engyengu.”

6. Fuka oiya lun fwalu akkalemyeyuk?

⁶ Ke ma inge, met nukewa su akkolukyeyuk ke oiyen fwalu elos lela nunak a insielos in kufusyukla sin Setan, fwinne elos etu ku tia, a elos akkalemye pa nunak a oiya lal. Ke sripe se inge, elos oru ma elos lungse, a tia nunku ke ma lungse lun God. Elos akkalemye oiyen inse fulat a nunku kelos sifwana. Elos lungse pa in lain met kol lalos, a tia tulokinye kena lalos nu ke “lung lun ikwe a lung lun muta.”—Ridi 1 Jon 2:15-17.a

7. Efu ku kut enenu in “karungin insiesr”?

⁷ Ke ma inge, arlana yok sripe kut in “karungin insiesr” ke kut oru sulela mwomwo fwal nu ke ma kut lotela ke akwuk mwomwo lun God, ke sulela lasr ke me asrouki, ma kut lungse in rid, ke me akengun, a ke Web sites ke Internet su kut lungse in liye. (Soakas 4:23) Met sap Poul el simusla: “Komwos in liyekomwosyung: tu wangin met in eis insiomwos ke luti in lalmetmet lal a kutasrik lusrongten, oana sramsram matu lun met, oana sramtauk lun fwalu, a tia oana Kraist.” (Kolosse 2:8) Kut enenu in akos masap se inge yokna ke len lun Jeova arlana apkuran. Meyen mulat upa lun God e fwa oru “ma puspus” ke akwuk lal Setan in kofelik ku wanginla, a akkalemye la akwuk nukewa inge fwa tia tu ke mulat upa lun God. Ma inge akesmakinye kut ke kas su simusyukla in Malakai 4:1: “Tu, liye, len se a tuku, su fwa furur oana sie fwunyu; a met fulang nu kemwa, a elos nu kemwa su orek ma koluk, fwa sruin maa pao. A len se su a fwa tuku fwa furrelosyuk.”

“Fwalu a Ma Nukewa Lu Fwa Akkalemyeyuk”

8. Ke inkanek fuka fwalu a orekma lun ma inge fwa “akkalemyeyuk”?

⁸ Mea Piter el lungse in akkalemye ke pal se el simusla la “fwalu a ma nukewa lu fwa akkalemyeyuk”? Piter el lungse in akkalemye la ke pal in ongoiye lulap, Jeova el fwa akkalemye fwal koluk se inge su oasr ye kolyuk lal Setan, a fwakulak sifwana la fwalu el lain God a lain akwuk lun Togusrai lal paenang fwal in kunausyukla. Isaia 26:21 el akkalemye kas palu se inge ke pal inge: “Jeova el illa liki an sel in kai met fwalu ke ma koluk lalos, fwalu pa fwa fwakak sral, a fwa tia sifwil afwunye met anwuk lal.”

9. (a) Ma fuka kut enenu in pulesru, a efu? (b) Mea kut fwa akkeye, a efu?

⁹ Ke len lun Jeova, met nukewa su etawi oiya koluk lun fwalu fwa akkalemye ella paye lalos, aok elos fwa uniye sie sin sie. Paye la, kain in me akengun puspus ke pal inge el akkeye nunak lun met puspus nu ke pal se kais sie met elos “fwa sruokye poun met tulan lal a paul fwa tuyuk lain poun met tulan lal.” (Zekaraia 14:13) Ke ma inge arlana yok sripe kut in pulesru kutena movie, buk, video games, a ma nukewa, su ku in akkeye kain in oiya koluk su me srungeyuk nu sin God, oana inse fulat, a lungse ke ma sulallel! (2 Samuel 22:28; Sam 11:5) Aok, lela kut in akkeye fwako su tuku ke ku lun God, meyen oiya mwomwo inge fwa akpayeye la kut ku in tu ku ke mulat lun God su oana sie ma fwol upa.—Galetia 5:22, 23.

Sie “Kosrao Sasu a Fwalu Sasu”

10, 11. Mea kalmen “kosrao sasu” a “fwalu sasu”?

¹⁰ Ridi 2 Piter 3:13. “Kosrao sasu” pa Togusrai lun God in kosrao, su oakiyuki in yea 1914 ke pal se ‘pal pakiyuki lun mutunfwal puspus’ aksafyeyukla. (Luk 21:24) Jisus Kraist pa togusra lun guferment se inge a oasr met 144,000 welul in kol, a pus selos eis tari me insemwomwo lalos in moul in kosrao. Ke buk lun Fwakyuk, met sulosolla inge elos akkalemyeyuk oana “siti mutal, Jerusalem sasu, oatui yurin God me, ako tari oana mutan pusla yunla nu sin mogul tumal.” (Fwakyuk 21:1, 2, 22-24) In oana ke an Jerusalem in pal meeta pa an se ma met Israel elos oru kolyuk lun guferment lalos, Jerusalem sasu su petsaela met akmusrala nukewa a Jisus su oana mokul tumal elos orala guferment ke akwuk sasu. Siti se inge su oasr in kosrao fwa ‘oatui in kosrao me,’ su kalme pa elos pa sang karungin a kasru yok nu fwalu.

¹¹ “Fwal sasu” kalmekin nu ke u sasu lun metu su akkalemye la elos lungse na paye in akos Togusrai lun God. Oiya mwomwo su oasr misla yok oana paredais su met kulansap lun God elos engunkin ke pal inge e fwa akpayeyuk yok ke ‘fwalu kato a mwolana su e fwa tuku.’ (Hibru 2:5) Kut ku in moul fuka ke akwuk sasu se inge?

Akola nu ke Len Lulap lun Jeova

12. Efu ku ke pal se len lun Jeova tuku ma inge fwa me lut na lulap nu sin met nukewa fwalu?

¹² Met sap Poul a Piter elos palye tari la len lun Jeova e fwa tuku “oana sie met pusrapasr,” arlana sa, ke pal se metu tia nunku ka. (Ridi 1 Tessalonika 5:1, 2.) Met Kristian paye, su sano a tupan ke len se inge, elos fwa lut pa ke sripen ma inge tuku ke pal su arlana sa. (Mattu 24:44) Tusruktu, met lun fwalu elos fwa lut ma lulap ka. Poul el simusla: “Ke elos fwak: ‘Misla a nikmet sangeng!’ na kunausten a fwa sa tuku nu fwelos, oana mwaoik nu sin sie mutan su putete; a elos fwa tia ku in kaengla.”—1 Tessalonika 5:3.

13. Mea kut enenu in oru tu kut in tia kiapeyukla fwin metu elos fwak “Misla a nikmet sangeng!”?

¹³ Kas inge lun metu “Misla a nikmet sangeng!” pa sie kas kikiap su tuku sin dimon; ne ouinge kas inge tia kiapela met kulansap lun Jeova. Poul el simusla: “A komwos, met lili, tia muta in losr, . . . tu len sa in sun komwos oana sie met pusr, tu komwos nukewa mwen nutin kalem a mwen nutin len.” (1 Tessalonika 5:4, 5) Ka ma inge lela kut in kafweang in oasr ke kalem pal nukewa, a kut in fwasr liki akwuk koluk nukewa ke fwal lun Setan su oasr ke losr upa. Piter el simusla: “Met kulu, meyen komwos etu ma inge meet, liyekomwosyung tu komwos in tia sremla [met luti kikiap ke congregation lun met Kristian], ke srifwe lun met koluk a komwos putatla liki ku lomwos.”—2 Piter 3:17.

14, 15. (a) Ke inkanek fuka Jeova el akfulatye kut? (b) Kas in esmakin fuka kut enenu in nunku akmwoye pal nukewa?

¹⁴ Loang akmwoye ka la Jeova el tia akkalemye nu sesr in ‘liyekutyang’ mukena a tokin ma inge wanginla kutena me kasru su el oru. A, el akfulatye kut ke el ase nu sesr ‘etauk mwomwo’ ke ma e fwa sikyak ke pal na fototo fwasru.

¹⁵ Tusruktu, sie me asor meyen kutu met lili elos tia loang ke kas in esmakin, kutu elos tia arlana lulalfongi ke ma enenu in sano pal nukewa a tia motul. ‘Kut long tari kas in me esmakin oapana inge ke lusen pal loeloes,’ saap elos fwak. Tusruktu, met inge elos enenu in esam la ke pal se elos fwak kas inge, elos akkalemye la elos tia arla lulalfongi nu sin met kulansap oaru a lalmetmet, a elos inse luo pa ke kas lun Jeova a ke Mwen natul. Kafweang in “sano nu ka,” Jeova el fwak. (Hebakkuk 2:3) Jisus el fwak pa: “Ke ma inge sano, tu komwos tia etu in len su Leum lomwos fwa tuku.” (Mattu 24:42) Sayen ma inge, Piter el simusla: “Yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun God!” (2 Piter 3:11, 12) Met kulansap oaru a lalmetmet a Governing Body lal elos nunku akmwoye ke kas in esmakin mwomwo inge pal nukewa!

16. Oiya fuka kut enenu in tia akkalemye, a efu?

¹⁶ Aok, “met kulansap koluk” pa fwak mu Leum el patla na in tuku. (Mattu 24:48) Met kulansap koluk elos wi ke u se su akkalemyeyuk in 2 Piter 3:3, 4. Met sap Piter el simusla: “Tu in len safla met aksruksruk, a fwa tuku in aksruksruke, a fwafwasryesr oana lung koluk lalos sifwana,” a elos angon met nukewa su kafweang in sano a nunku akmwoye ke len lun Jeova. Aok, elos tia nunku akmwoye in sang kasru nu ke ma lun Togusrai, a met aksruksruk inge elos nunku yok kelos sifwana a ke lungse koluk lalos sifwana. Lela kut in tia akkeye kain in nunak tia mwo inge su lungse in seakos! A, lela kut in “nunku tu mongfusesr lun Leum lasr molela” ke kut kafweang in akkafofoye kut nu ke orekma lasr in sulkakin peng mwo lun Togusrai a in oru met tuma lutlut. A in tia fosrngala yok ke pal lun ma puspus su fwa sikyak su ma lun Jeova God.—2 Piter 3:15; ridi Orekma 1:6, 7.

Lulalfongi God lun Molela

17. Oiya fuka met Kristian elos akkalemye nu ke kas in kaifwe lun Jisus in kaengla liki Jerusalem, a efu?

¹⁷ Tokin met meun lun an Rom elos sruokye an Judea in yea 66 C.E., met Kristian elos akos kas lun Jisus in kaengla liki siti lun Jerusalem ke pal na sa. (Luk 21:20-23) Efu ku elos oru ma inge? Wangin alolo ka la elos nunku pal nukewa ke kas in sensen lun Jisus. Paye la, elos etu la sulela lalos inge ku in sang ma upa nu selos, oana ke ma Jisus el fwak tari. Tusruktu ke pal sepana inge, elos etu pa la Jeova el fwa tia som liki met oaru nukewa lal.—Sam 55:22.

18. Kas lun Jisus in Luk 21:25-28 kasre kom fuka ke nunak lom ke ongoiye lulap su apkuran in tuku?

¹⁸ Kut enenu pa in lulalfongi nu sin Jeova ke inkanek nukewa, meyen el mukena pa ku in molikutla ke pal se ongoiye lulap sikyak nu ke akwuk se inge su wangin ma oana ke me sramsram lun metu. Oasr pal tokin mutaweyen ongoiye lulap, tusruktu meet liki Jeova el oru nununku lal nu sin met nukewa, metu fwa “munasla ke sangeng, a ke tawinu ma a fwa tuku nu fwin fwalu.” Tusruktu, ke pal se met lokwalok nukewa lun God elos rarrar ke sangeng lalos, met oaru nukewa lun Jeova elos fwa tia sangeng. A, elos fwa engun meyen elos etu la molela lalos apkuran me.—Ridi Luk 21:25-28.

19. Mea fwa akuteyuki ke me lutlut toko?

¹⁹ Aok, oasr pal fwasru mwomwo nu selos nukewa su kafweang in srelosla liki fwalu a ke “ma puspus” ka! In oana ke me lutlut toko el akkalemye, kut fwin lungse in eis moul, kut enenu in oru ma nukewa su eneneyuk saye liki na in fwasr liki ma koluk. Kut enenu in akkeye oiya mwomwo puspus su akengunye Jeova a oru orekma puspus su me akinsemwomwoye nu sel.—2 Piter 3:11.

[Footnote]

Ya Kom Ku In Akuteye?

• Mea kalmen . . .

‘kosrao a fwalu’ ke pal inge?

“ma puspus”?

‘kosrao sasu a fwalu sasu’?

• Efu ku kut filiye lulalfongi yok lasr nu sin God?

[Petsac ke sra 5]

Fuka kom ku in “liaung insiom” a kafweang in srikomla liki fwalu?

[Petsac ke sra 6]

Kut akkalemye fuka la kut nunku ke “mongfusrasr lun Leum lasr molela”?