Fwufwasryesr ke Ngun a Moulkin Moul Fwal nu ke Mwulela Lom
“Komwos in fwafwasryesr ke ngun, a komwos fwa tia akpayeye lung lun ikwe.”—GALETIA 5:16.
1. Orekma in baptais fuka orek ke len in Pentecost?
KE PAL se met tuma lutlut lun Jisus elos kaskaskin kas pukanten ke len in Pentecost 33 C.E., elos ku in oru ma inge ke sripen elos baptaisla ke ngun mutal. Tokin ma inge elos akkalemye me sang lun ngun inge. (1 Korint 12:4-10) Mea fwako mwo lun me sang inge a lun me sramsram su Piter el oru? Oasr met puspus su “fwakisye insielos.” Ke inkanek lun kas in akkeye lal Piter, elos auliyuk a baptaisla. Ma simusla el akkalemye ka: “Na elos su eis kas lal elos baptaisla, a in len sa akurun tolu tausen met toeni nu selos.” (Orekma 2:22, 36-41) In oana ke ma Jisus el sapkin, elos enenu in baptais ke kof in en Papa, Mwen, a ngun mutal.—Mattu 28:19.
2, 3. (a) Akuteye ma tia oana sie inmasrlon baptais ke ngun mutal a baptais in en ngun mutal. (b) Efu ku baptais ke kof el eneneyuk nu sin met nukewa su ekla met Kristian paye ke pal inge?
2 Tusruktu, ya oasr ma tia oana sie inmasrlon baptais ke ngun mutal a baptais in en ngun mutal? Aok. Met su baptais ke ngun mutal elos sifwilpa isusla oana mwen akmusrala nutin God. (Jon 3:3) God el akmusraelosla in orekma oana togusra a met tol ke Togusrai lal in kosrao, a elos wi ke u lun met su pupulyukkin oana monin Kraist. (1 Korint 12:13; Galetia 3:27; Fwakyuk 20:6) Ke ma inge baptais ke ngun mutal, pa kain in baptais su Jeova el oru ke len in Pentecost fwasru, ke el sulela met puspus in welul Jisus oana met usru yurol in kosrao. (Rom 8:15-17) Tusruktu mea kalmen baptais in en ngun mutal, su orek pal nukewa ke pal in toeni lulap nukewa lun met lo lun Jeova ke pal inge?
3 Met Kristian paye elos baptais ke kof oana sie me akul ke mwulela paye lalos nu sin Jeova God. Met Kristian su oasr fwinsrak in kosrao elos baptais pa ke kof. Tusruktu baptais ke kof el sie step su eneneyuk pa nu sin million puspus sin mokul a mutan ke pal inge su oasr fwinsrak lalos in moul ma patpat fwin fwalu. Baptais ke kof in en Papa a Mwen a ngun mutal el sie step su eneneyuk nu sin met su oasr fwinsrak in kosrao a nu selos su oasr fwinsrak in moul ma patpat fwin fwalu in akinsemwomwoye God. Met Kristian nukewa su baptais tari elos enenu in kafweang in “fwufwasryesr ke ngun.” (Ridi Galetia 5:16.) Ya kom fwufwasryesr ke ngun a ke ma inge kom moulkin moul fwal nu ke mwulela lom?
Mea Kalmen in “Fwufwasryesr ke Ngun”
4. Mea kalmen in “fwufwasryesr ke ngun”?
4 Orekma lom in “fwufwasryesr ke ngun” el kalmekin la kom eis orekma lun ngun mutal nu sum, a kom lela ma inge in oasr fwako mwomwo ke moul lom. Ke kas saye, oasr kasru yok lun ngun mutal nu ke moul a orekma lom len nukewa. Galetia sapta 5 akkalemye ma tia oana sie ke met su akkalemye fwako lun ngun mutal a met su oru orekma lun ikwe.—Ridi Galetia 5:17, 18.
5. Kom fwin fwufwasryesr ke ngun, kom enenu in tia oru orekma fuka?
5 Fwin kom fwufwasryesr ke ngun mutal, kom fwa tui in oru orekma nukewa in ikwe. Wekunang ma inge pa “kosro, fokfok, sarnget, alu nu sin me srulela, sufwe, srunga, amei, lemta, koskusrok, kineuk, srisri, srukasrak kas, sok, srui, mwowon.” (Galetia 5:19-21) Ke kas in pupulyuk, komwos “uniye orekma lun monumwos ke ngun.” (Rom 8:5, 13) Ma inge ku in kasre kom in nunku akmwoye ke ma puspus lun ngun a akos kolyuk lun ma inge, a in tia lela kom sifwana in oru kena koluk lun ikwe.
6. Sang me pupulyuk ke ma eneneyuk in akkalemye fwako lun ngun ku ku lun God ke moul lom.
6 Ke sripen ngun mutal el orekma ke moul lom, kom akkalemye oiya mwomwo su akinsemwomwoye God, pa “fwako lun ngun mutal.” (Galetia 5:22, 23) Ne ouinge, kom akilen la kom enenu in kafweang na paye in oru ma inge. Lela kut in orekmakin me pupulyuk se inge ke sie met imae su orekma ke imae lal. Aok, kalem lun fwatu a kof eneneyuk nu ke sak nukewa el ikwie; fwin wangin kof a kalem lun fwatu el tia ku in kosrani kutena fwako ka. Kut ku in pupulyukkin ngun mutal ku ku lun God ke kalem lun fwatu. Kut enenu ma inge in kasre kut in akkalemye fwako lun ngun mutal. Ne ouinge, mea met imae se el ku in kosrani fwin el tia alken in orekma ke imae lal? (Soakas 10:4) Aok, inkanek mwomwo su kom akkeye insiom e fwa kasre kom na paye in akkalemye fwako puspus lun ngun mutal ke moul lom. Ke ma inge siyuk sum sifwana, ‘Ya nga lela ngun mutal in orala fwako mwomwo ke moul luk ke nga kafweang pa in akkalemye ma inge?’
7. Efu ku lutlut a orekma in nunku yok ke ma kom lotela tari el arlana yok sripe kom fwin lungse in akkeye fwako lun ngun mutal?
7 Met imae se el enenu in aksroksrokye sak sonel fwin el lungse in kosrani fwako pukanten. Ke inkanek oapana inge, fwin kom lungse in akkeye fwako lun ngun mutal ke moul lom, kom enenu in eis kof lun ma paye su oasr in Baibel a ke inkanek lun congregation lun met Kristian ke pal inge. (Isaia 55:1) Kalem la kom akkalemye nu sin met puspus la Baibel el orekla ke kasru lun ngun mutal. (2 Timote 3:16) A met kulansap oaru a lalmetmet elos orala me rid puspus in kasre kut in eis kalem yok ke ma paye su oasr in Baibel su pupulyukkinyuk oana kof nasnas. (Mattu 24:45-47) Ke ma inge, kut fwin lungse me kasru yok su tuku ke ngun mutal ku ku lun God, kut enenu in rid a nunku yok ke Kas lun God. Kom fwin oru ma inge, kom etawi me srikasrak mwomwo lun met palu puspus su “siyuk a suk akloye” ke me rid a me lutlut su orekla tari. Aok fwinne lipufan puspus elos lungse na paye in eis etauk ke Fute se su God el mwulela a ke congregation lun met Kristian akmusrala.—Ridi 1 Piter 1:10-12.
Ku lun God ku in Kasre Kom Fuka?
8. Efu ku arlana yok sripe nu sum in siyuk Jeova ke ngun mutal lal?
8 Oasr kutupa ma eneneyuk sayen orekma mwo lom in lutlutkin ma Simusla a in sifwilpa nunku ka. Kom enenu in kafweang in siyuk ke kasru lun Jeova. El ku in “orala arulana yok liki ma nu kemwa kut siyuk, ku nunku.” (Efesus 3:20; Luk 11:13) A kom e topuk fuka fwin oasr sie met siyuk sum ouinge: “Efu ku nga kafweang in siyuk sin God fwin el etu tari ‘ma puspus su nga enenu meet liki nga siyuk sel ka’?” (Mattu 6:8) Aok, orekma lom in pre siyuk ke ngun mutal, kom akilen la kom lulalfongi nu sin Jeova. Ke sie me pupulyuk, fwin oasr sie met su siyuk sum ke kasru, paye la kom e fwa oru ke ku lom kewa in kasrel. Sripe mwo paenang kom lungse in kasrel pa ke el akkalemye lulalfongi lal nu sum la kom fwa kasrel. (Srike liye Soakas 3:27.) Ke inkanek ouinge, Jeova el insemwomwo ke kom siyuk sel ke ngun mutal lal, a el fwa usot ma inge nu sum.—Soakas 15:8.
9. Fuka meeting nukewa ke congregation ku in kasre kom in eis kasru su tuku ke ku lun God?
9 Kom ku in aksaokye pa ke siepa inkanek su kom ku in eis kasru lun ngun mutal, pa in wi ke meeting nukewa, a toeni lulap nukewa. Orekma mwo lom in wi nu ke tukeni nukewa inge a in loang akmwoye ke program nukewa el arlana yok sripe. Ma inge ku in kasre kom in eis kalem yok ke “ma loal lun God.” (1 Korint 2:10) Oasr pa ma lane puspus kom fwin sang me top mwomwo pal nukewa. Srike nunku ke meeting nukewa su kom wi ke wik akosr somla. Pal ekasr kom srukak poum, sang me top lom, a in akkalemye lulalfongi lom? Ya kom liye la kom ku in akmwoye orekma lom in sang me top ke pal in meeting? Kom fwin liye kom enenu in orala me aksumwos nu ka, kom in akpayeye sulela lom in oru ma inge ke wik puspus toko. Jeova el fwa liye la kom lungse na paye in sang me top mwomwo a el fwa sot nu sum ngun mutal lal, su ku in kasre kom in eis ma lane yok ke meeting nukewa.
10. Kom fwin fwufwasryesr ke ngun, me solsol fuka kom enenu in fwak pa nu sin met puspus?
10 Kom fwin fwufwasryesr ke ngun kom lungse pa in akos me solsol su oasr in Fwakyuk 22:17: “Ngun a mutan pusla eltal fwak: ‘Fwasru!’ A el su long, lan fwak: ‘Fwasru!’ A el su malu, lan fwasru; el su lungse, lela lan eis kof in moul, tia mol.” Ku lun God su orekma yurin met akmusrala nukewa, akkalemye me solsol se inge ke kof in moul. Kom fwin eis tari me solsol se inge in “fwasru!” ya kom lungse in fwak pa, “Fwasru”? Aok sie me insemwomwo yok in wi oru orekma se inge in molela moul lun met puspus!
11, 12. Fuka ngun mutal el sang kasru nu ke orekma in sulkakin peng mwo?
11 Orekma saoklana se inge el akpayeye ke pal inge ye kolyuk lun ngun mutal. Ma simusla el akkalemye ke kasru lun ngun mutal nu sin missionary puspus in ikasla territory sasu in century se meet. “Ngun mutal igololosi” met sap Poul a met puspus su welul elos in tia “fwakak kas in Esia”; a ngun mutal tia fulelosla in som nu Bitinia. Kut tia etu ke oiya su ngun mutal tia fulelosla in som nu ke an puspus inge, tusruktu arlana kalem la ngun el kol Poul nu ke an puspus in an Europe. El eis sie aruruma ke sie met Macedonia su siyuk ke kasru.—Orekma 16:6-10.
12 Ke pal inge, ku lun Jeova el kasru pa orekma in luti peng mwo fwin fwalu nufon. Wangin aruruma ke inkanek lun mwenmwen orekmakinyuk in sang me kolyuk nu ka, tusruktu Jeova el kasru met akmusrala ke inkanek lun ngun mutal. A ku lun God el akkeye met lili puspus in oru ke ku lalos kewa in sulkakin a luti peng mwo. Wangin alolo ka la kom mutawauk pa in wi nu ke orekma saoklana se inge. Ya kom ku in akyokye insemwomwo lom nu ke orekma mwomwo se inge?
13. Kom ku in akos fuka kolyuk lun ngun mutal? Sang me pupulyuk.
13 Kom ku in akos kolyuk lun ngun mutal kom fwin orekmakin me lutlut mwomwo nu sin met kulansap nukewa lun God. Nunku ke mutan fwusr se inge su pangpang Mihoko fwin an Japan. Oana sie pioneer sasu, el nunku mu el tia fwal in oru return visit nu sin met puspus; el pulakin mu el tia etu inkanek mwo in sramsram nu sin met in oru elos in loang akmwoye. In pal san, oasr kas in kasru mwomwo su akkalemyeyuk in Orekma Lun Togusrai Lasr ke inkanek mwomwo in oru orekma in sifwilpa muteta nu yurin met. Ke pal sepana inge, buk srisrik se inge Sie Moul Mwomwo—Kom Ku In Eis Fuka ke kas Sepanese orekla. Yok na paye kasru lun buk srisrik se inge ke orekma in luti nu sin met Sepanese. Mihoko el orekmakin kas in kasru mwomwo inge ke inkanek mwo in orekmakin buk srisrik se inge, yokna ke inkanek mwo in oru orekma in sifwilpa muteta nu yurin met puspus su lungse in lutlut. Tia pat el oru lutlut Baibel nu sin met puspus su in pal somla elos srunga in lutlut. El fwak, “Oasr tulik lutlut puspus luk, oasr pal nga lutlut nu sin met 12, ke sripe se inge nga siyuk sin kutu selos in sano kitin pal meet liki nga ku in oru lutlut lun Baibel nu selos!” Aok, kom fwin fwufwasryesr ke ngun, a kom orekmakin kas in kasru nu sin met kulansap nukewa lun Jeova, kom ku in kosrani fwako mwo puspus.
Lulalfongi ke Ngun lun God
14, 15. (a) Met puspus su sesumwos elos ku in akpayeye fuka mwulela lalos nu sin God? (b) Kom ku in koneak fuka met kawuk mwomwo?
14 Oana sie met luti, kom enenu in akpayeye orekma in luti peng mwo. (Rom 10:14) Saap kom nunku mu kom tia arlana fwal in akpayeye kunokon mwomwo inge. Tusruktu in oana ke ma God el oru nu sin met akmusrala, el fwa oru kom in fwal pa nu ke orekma se inge. (Ridi 2 Korint 3:5.) Kom ku in akpayeye mwulela lom ke kom arlana moniyuk a in lulalfongi ke ku lun God.
15 Aok, ke sripen kut met sesumwos paenang ke pal puspus tia fusrasr nu sesr in akpayeye mwulela lasr nu sin Jeova God su arlana sumwosmwos. Sie ma upa pa kutu sin met su kom asrouki nu se in pal somla elos lut a nunku mu arlana sakuruk oiya sasu ke moul lom a elos ku in ‘kaskas koluk lain kom.’ (1 Piter 4:4) Tusruktu, nik kom mwulkunla la kom orek kawuk nu sin met kawuk sasu, nu sin Jeova a Jisus Kraist, a ma inge arlana yok sripe. (Ridi Jemes 2:21-23.) Arlana yok sripe pa in etu met lili wiyesr ke congregation, su wi ke ‘u lun met lili’ fwin fwalu nufon. (1 Piter 2:17; Soakas 17:17) Jeova el fwa kasre kom ke inkanek lun ngun lal in oasr met kawuk puspus su fwa akkeye kom pal nukewa.
16. Efu ku kom ku pa in ‘engun ke munas’ oana Poul?
16 Fwinne met kawuk mwomwo ke congregation elos kasre kom ka, saap kom liye pa la upa in muteng ke ma upa len nukewa. Ma upa inge su kom muteng ka ku in oru kom in arlana asor a totola, su oana kom sun ma upa puspus su wangin saflaiye. Pa inge pal su kom enenu in forla nu sin Jeova, siyuk sel ke ngun mutal ku ku lal. Met sap Poul el simusla: “Tu ke nga munas, na nga ku.” (Ridi 2 Korint 4:7-10; 12:10) Poul el etu la ku lun God ku in kasru met in akmwoye me munas lalos. Ke ma inge, pal nukewa su kom pulakin mu kom munas a enenu kasru, ku lun God ku in akkeye kom. Poul el simusla la el ku in pulakin ‘engun ke munas.’ Ke pal se el munas, el pulakin la ngun mutal el kasrel a akkeyel. Kom ku pa in pulakin ouinge!—Rom 15:13.
17. Ngun mutal el ku in kasre kom fuka ke kom kafweang in akwot in akpayeye akwuk lom?
17 Kut enenu ku lun God in kasre kut in akpayeye mwulela lasr nu sel. Srike lumala ke nunak lom la kom pa captain lun soko oak. Akwuk su kom lungse in akpayeye pa in kulansap nu sin Jeova ma patpat. Ngun mutal el oana eng su ukye nes ke oak okwum tu kom in sun an se ma kom lungse in sun. Kom srunga ngun lun fwal lal Setan su lumeyuk mu eng koluk ku ngun koluk su soksok fwin fwalu su kut tia ku in liye ke mutasr su uk ku fungulye nes ke oak soko meyen kom fwa tia sun an se su kom lungse in sun. (1 Korint 2:12) Ke kas in pupulyuk, ma kom enenu in oru pa in akilen la piya eng mwomwo a orekmakin ma inge. Eng mwomwo inge pa ngun mutal. Ke inkanek lun Kas lun God a u lal, ngun mutal fwa kasre kom in fwasr ke inkanek sumwos.
18. Sulela fuka kom lungse na paye in akpayeye ke pal inge, a efu?
18 Kom fwin lutlutkin Baibel yurin Met Lo lun Jeova, a kom engunkin in wi ke tukeni nukewa lalos, tusruktu kom soenna mwulela moul lom a soenna eis baptais, kom enenu in siyuk sum sifwana, ‘Efu ku nga alolo ka in oru?’ Kom fwin akilen orekma lun ngun mutal in akpayeye ma lungse lun God ke pal inge, ke ma inge kom in akpayeye step nukewa su kom lotela mu sumwos in oru. A Jeova el fwa akinsemwomwoye kom ke inkanek yok. El fwa usot nu sum ku lal. Kom fwin baptaisla tari ke yea puspus somla, paye la kom pulakin tari kasru lun ngun mutal ke moul lom. Kom liye a pulakin ke inkanek mwo su God el akkeye kom ke inkanek lun ku lal. Ma inge ku in sikyak nu sum pal nukewa, aok nu tok ma patpat. Ke ma inge kom in akpayeye sulela lom in kafweang in fwufwasryesr ke ngun mutal.
Ya Kom Esam?
• Mea kalmen in “fwufwasryesr ke ngun”?
• Mea ku in kasre kom in kafweang in “fwufwasryesr ke ngun”?
• Kom ku in akpayeye fuka mwulela lom nu sin God?
[Petsac ke sra 17]
Orekma lom in akmwoye a akola insiom pal nukewa enenu kafweang yok
[Petsac ke sra 19]
Ya oasr kasru yok lun ngun lun God ke moul lom?