Baptais In En Papa, Mwen a Ngun Mutal

“Ke ma inge komwos som, a oru met in mutanfwal nu kemwa tu elos in met tumal lutlut, baptaiselosla in En Papa, a Mwen, a ngun mutal.”—MATTU 28:19.

1, 2. (a) Mea sikyak in Jerusalem in Pentecost 33 C.E.? (b) Efu ku met puspus in pal se elos mokleyuk in eis baptais?

OASR u lulap sin met in an Jerusalem su tuku liki mutunfwal puspus. In len lun Pentecost 33 C.E., oasr sie kofwo su arlana yok sripe orek we a oasr met muteta puspus wi pa ka. Tusruktu oasr sie ma sakuruk su sikyak, a tokin ma inge met sap Piter el sang sie me sramsram na mwomwo su oasr kasru yok nu sin met puspus. Kutu sin met Ju a met proselyte su piselos oasr ke 3,000 eis me akkeye yok a kas lal Jisus sun insielos, paenang elos auliyuk, a baptaisla ke kof. Ke ma inge elos weang nu ke congregation lun met Kristian su tufwana oakiyuki in pal san. (Orekma 2:41) Paye la orekma in baptaisela met puspus inge ke lulu in kof puspus fwin an Jerusalem oru met puspus saye su liye ma inge in arlana lut!

² Mea oru met puspus in eis baptais? In len se inge oasr “pusra se tuku in kosrao me pusrpusr oana kusan eng lulap.” Ke sie infwokil lung ke loomu, oasr met tuma lutlut lun Jisus su piselos oasr ke met 120 nenela ke ngun mutal ku ku lun God. Tokin ma inge, met fulat a mutan elos tukeni nu sie a elos arlana lut in long met tuma lutlut inge elos “kaskas ke kutena loa.” Ke pal se elos long ma Piter el fwak, wekunang me sramsram lal ke mise lun Jisus, oasr met puspus we su “fwakisye insielos.” Mea elos enenu in oru? Piter el topuk: “Komwos in auliyuk, a komwos nu kemwa in baptaisla in en Jisus Kraist . . . , a komwos fwa eis me sang lun ngun mutal.”—Orekma 2:1-4, 36-38.

3. Ke len in Pentecost, mea met Ju a met proselyte su auliyuk elos enenu in oru?

³ Nunku ke oiyen met Ju a met proselyte nukewa inge su longol Piter. Elos lulalfongi tari nu sin Jeova oana God lalos. A oasr tari etauk lalos ke ngun mutal, la ma inge pa ku lun God su orekmakinyuk in orala ma nukewa a ke ma puspus saye. (Genesis 1:2; Met Nununku 14:5, 6; 1 Samuel 10:6; Sam 33:6) Tusruktu srakna oasr ma eneneyuk saye nu selos. Arlana yok sripe nu selos in etu, in kalem a eis inkanek lun God ke molela, pa Jisus su Messaia. Ke ma inge, Piter el akkalemye kalem ke ma eneneyuk nu selos in “baptais in en Jisus Kraist.” Meet liki pal se inge, Jisus su akmoulyeyukyak tari el sapkin Piter a met sap puspus saye in baptaisela met puspus “in en Papa, Mwen a ngun mutal.” (Mattu 28:19, 20) Ma inge oasr kalme yok nu selos in century se meet, a oayepa ke pal se inge. Mea kalmen ma inge?

In En Papa

4. Nu sin met nukewa in pal meeta su alu nu sin Jeova, ma ekla fuka sikyak?

⁴ In oana ke ma akkalemyeyuk tari, elos nukewa su porongo me sramsram lal Piter elos alu tari nu sin Jeova. Elos kafweang pa in akos Masap lal, a pa inge sie sripe paenang met puspus su tuku liki an puspus elos tuku pa nu in Jerusalem. (Orekma 2:5-11) Tusruktu, God el ekulla akwuk lal nu sin met inge. El sisla met Ju oana mutunfwal saoklana lal; ke sripen orekma lalos su tila akos Masap lal ke inkanek su el sapkin nu selos meet in akinsemwomwoyel. (Mattu 21:43; Kolosse 2:14) Fwin met su longol elos na pa lungse in sruokye fototo mwo lalos nu sin Jeova, oasr ma saye su elos enenu in oru.

5, 6. Mea met Ju a met proselyte in century se meet elos enenu in oru in oasr fototo mwo lalos nu sin God?

⁵ Paye la elos tia enenu in forla liki Jeova, su Sropon moul lalos. (Orekma 4:24) Mo tia ouinge, meyen met nukewa su porongo me sramsram lal Piter elos ku in liye a kalem na paye ka la Jeova el Papa tumalos su kulang. El supwema Messaia in molelosla a el lungse in sang nunak munas nu selos nukewa su Piter el fwak: “Lela sou lal Israel in arulanu etu, tu God el oral Jisus inge Leum a Kraist, el su komwos unilye fwin sak soko.” Aok, met nukewa su orekmakin kas lal Piter oasr sripe yok lalos ke pal inge in aksaokye ma Jeova God el oru nu sin met nukewa su lungse in insemwomwokin fototo mwomwo nu sel!—Ridi Orekma 2:30-36.

⁶ Paye, met Ju a met proselyte nukewa in pal se inge elos lotela la fototo mwo nu sin Jeova oasr ma eneneyuk nu selos in akilen a in akfulatyel oana God su orala akwuk nu ke molela ke inkanek lun Jisus. Ke ma inge, kom ku in kalem ka la, efu ku elos auliyuk ke ma koluk lalos, wekunang orekma lalos in uniye Jisus, fwinne elos etu ku nukin ma inge. A kalem la ke len puspus toko ‘elos muta a kafweang in porongo me luti lun met sap.’ (Orekma 2:42) Elos ku in “kalukyang nu ke tron lun kulang” a in sukosok in sramsram a siyuk ke kulang lun God.—Hibru 4:16.

7. Fuka met puspus ke pal inge elos ekulla nunak lalos ke God a baptaisla in en Papa?

⁷ Ke pal inge, million sin met su tuku liki kain oiya nukewa elos lotela ke Baibel ma paye kel Jeova. (Isaia 2:2, 3) Kutu selos tia lulalfongi mu oasr God, ku kutu met inge elos etu la oasr God tusruktu tia lulalfongi la God el karungin metu, tusruktu ke pal inge elos lulalfongi na paye la oasr God su orala ma nukewa su elos ku in engunkin fototo mwomwo nu sel. Kutu selos alu nu sin god kikiap su oasr muta tolu a nu ke kain in ma srulela puspus. Ke pal se inge elos lotela la Jeova el mukena pa God fulatlana, a elos orekmakin in el ke elos pang nu sel. Oiya inge el fwal nu ke ma Jisus el fwak nu sin met tuma lutlut lal elos in baptaisla in en Papa.

8. Met puspus su nukin la elos usrui ma koluk sel Adam, mea elos enenu in etu a akilen ke Papa?

⁸ Elos lotela pa la oasr ma koluk elos usrui sel Adam. (Rom 5:12) Me luti se inge el ma sasu nu selos tusruktu elos enenu in lulalfongi ka la ma inge paye. Kain in met inge ku in pupulyukkin nu sin sie met mas su nukin la el mas. Saap oasr kutu akul ka, oana el ku in pulakin ngal kutupal. Tusruktu, ke sripen el tia som nu yurin kutena taktu in liye ke mas lal, paenang el ku in nunku mu el fokoko a tia mas. Tusruktu, payeiye pa el mas. (Liye pa 1 Korint 4:4.) Na fuka fwin oasr taktu na sumat su koneak la oasr mas upa lal? Ya el fwa tia suk a eis sie akwuk in ono in unwela mas lal? Ka inkanek ouinge, ke pal se elos lotela ke ma koluk su elos usrui, met puspus inge elos lulalfongi ke ma Baibel el fwak ke “mas inge su koneyakyuk” yurin met nukewa. A elos eis etauk a kalem ka la God el akkalemye nu sin metu akwuk in “unwela” ma koluk su oana mas upa. Aok, met nukewa su srela liki Papa elos enenu in forla nu sel su ku in “unwela” mas lalos.—Efesus 4:17-19.

9. Akwuk fuka God el orala tu kut in engunkin fototo mwomwo nu sel?

⁹ Kom fwin mwulela tari moul lom nu sin Jeova God a kom baptais tari oana sie met Kristian, kom etu na paye la arlana mwo in oasr fototo mwomwo nu sel. Kom ku in engunkin na paye a sang kulo meyen Papa tumom, Jeova God el arlana kulang. (Ridi Rom 5:8.) Fwinne Adam a If elos oru ma koluk nu sel, God el orala akwuk mwomwo tu tulik natulos, wekunang kut nukewa, ku in srakna engunkin fototo mwomwo nu sel. Ke pal se el oru ma inge, God el pulakin pa ke ngal upa in liye Mwen kulo natul el keok a mise. Ya etauk lasr ke akwuk inge lun God tia kasre kut in akilen ku lun God a in akos masap nukewa lal ke sripen kut lungse el? Kom fwin soenna oru ma inge, oasr sripe mwomwo lom in mwulela moul lom nu sin God a in eis baptais.

In En Mwen

10, 11. (a) Ke inkanek fuka kom sowemol nu sin Jisus? (b) Mea nunak lom ke sripen Jisus el mise oana sie met lango?

¹⁰ Lela kut in sifwilpa nunku ke ma Piter el fwak nu sin u lulap. El akkalemye yok in lulalfongel Jisus, a orekma inge el eneneyuk a kol nu ke orekma in eis baptais “in en Mwen.” Efu ku ma inge yok sripe in pal meeta, a ke pal inge? Aok, orekma mwo lasr in lulalfongel Jisus a in baptaisla inel el kalmekin la kut akilen kunokon ke fototo lasr nu sin God su Orekutla. Jisus el enenu in srupusrak nu ke sak soko tu elan ku in akwanginyela me selnga lun Masap sin met Ju; tusruktu, mise lal el orala me insemwomwo su yok liki ma inge. (Galetia 3:13) El me kise lun lango su met nukewa enenu. (Efesus 2:15, 16; Kolosse 1:20; 1 Jon 2:1, 2) In akpayeye ma inge, Jisus el muteng ke orekma sesumwos, kaskas koluk, me akkeok, a saflaiye pa mise. Ya kom aksaokye na paye me kise lal? Srike lumala ke nunak lom la kom sie tulik srisrik su oasr ke yea 12 matwe su oasr pa ke oak lulap soko inge Titanic, oak soko su musalla in yea 1912 ke sripen el fwakisye iceberg na lulap. Kom srike in srola nu ke soko roea ku sie oak srisrik, su on fwin titanic tusruktu ma inge nenela tari sin met. Kom liye la oasr sie mokul su oasr tari ke lifeboat el ngok mutun mutan wiyel, el sulpa sroang nu fwin oak lulap, soko pana inge a eis kom a filikomi nu in lifeboat. Mea pulakin lom ke orekma mwo lal inge nu sum? Paye la kom arlana sang kulo nu sel. Kom ku in kalem ke insemwomwo yok lun tulik mokul se inge su moliyukla liki ongoiye se inge.a Aok, Jisus el orala nu sum ma se su yok liki ma inge. El mise tu kom in ku in eis moul ma patpat, a tia in moul ke lusen yea puspus mukena.

¹¹ Mea pulakin lom ke pal se kom lotela ke Mwen nutin God el oru nu sum? (Ridi 2 Korint 5:14, 15.) Paye la kom lungse na paye in sang kulo ka. Ma inge sang kasru yok nu sum in mwulela moul lom nu sin God a in ‘tia sifwil moul nu sum sifwana, a nu sel su mise keim.’ In baptaisla in en Mwen kalmekin la kom akilen ma Jisus el orala nu sum a in akos pa ku lal oana “Leum a Met Lango.” (Orekma 5:31) Meet liki ma inge, paye la kom tia fototo nu sin God su orekomla, a wangin na paye fwinsrak lom. Tusruktu ke sripen kom akkalemye lulalfongi lom nu ke sran Jisus Kraist a kom eis baptais, paenang ke pal inge oasr fototo mwomwo lom nu sin God. (Efesus 2:12, 13) Met sap Poul el simusla kas inge: “A in pal somla komwos sriyukla a met lokwalok insiomwos ke orekma koluk lomwos. A inge [God] el iumwekomwosla in monin ikwel [Jisus] ke mise, in fwakkomwosyuk mutal a suwosna a wangin metumwos ye mutal.”—Kolosse 1:21, 22.

12, 13. (a) Fuka baptais lom ke en Mwen ku in kasru nu ke oiya lom fwin oasr sie met su aktoasrye kom? (b) Oana sie met Kristian su baptais in en Jisus, kunokon fuka oasr yurom?

¹² Fwinne kom baptais tari in en Mwen, kom etu na paye ke oiyen sesumwos lom. Etauk lom ke me munas lom el ku in kasre kom len nukewa. Ke sie me pupulyuk, fwin oasr sie met su aktoasrye kom, ya kom esam pal nukewa la kom a met se inge sesumwos? Komwos kewa enenu nunak munas ke ma koluk lomwos, ke ma inge komwos kewa enenu in sang nunak munas nu sin sie sin sie. (Mark 11:25) In akkalemye kalem ma enenu se inge, Jisus el fwak ke sie me pupulyuk: Oasr sie leum su nunak munas nu ke mise lun sie met kulansap su oasr ke talen tausan sengoul (60 million denarii). Tok, met kulansap se inge el tia sang nunak munas nu sin sie pa met kulansap su oasr mise nu sel ke 100 denarii. Jisus el akkalemye kalem ke me lutlut yok se inge: Jeova el fwa tia nunak munas ke ma koluk lun sie met su srunga in nunak munas nu sin met lel. (Mattu 18:23-35) Aok, kalmen baptais ke in en Mwen pa kut in akilen ku lun Jisus a in kafweang in akos me srikasrak a me luti lal, wekunang me luti se inge in inse mulala in sang nunak munas ke ma koluk lun met puspus.—1 Piter 2:21; 1 Jon 2:6.

¹³ Ke sripen kom sesumwos, kom tia ku in etawi Jisus ke oiya nukewa. Ne ouinge, in fwal nu ke mwulela lom nu sin God ke inse kewa lom, kom lungse in etawi Jisus ke ku lom kewa. Oasr ma eneneyuk nu sum in kafweang in sisla oiyen met matu a nukomang met sasu. (Ridi Efesus 4:20-24.) Kom fwin sunakin sie met kawuk lom, paye la kom lungse in lutlut ke me srikasrak lal a oiya mwo puspus lal. Ke inkanek oapana inge, kom lungse pa in lutlut kel Kraist a in etawel.

14. Kom ku in akkalemye fuka la kom akilen ku lun Jisus oana sie Togusra in kosrao?

¹⁴ Oasr sie pa inkanek kom ku in akkalemye la kom kalem ke ma eneneyuk nukewa in baptaisla in en Mwen. God el “likiye ma nukewa ye niyel [Jisus], a esalang lan sifwen ma nukewa nu ke congregation.” (Efesus 1:22) Ke ma inge, kom enenu in akfulatye akwuk su Jisus el orekmakin in kol met nukewa su mwulela moul lalos nu sin Jeova. Kraist el orekmakin met sesumwos ke congregation, yokna met elder puspus su el srusrngiye. Met elder inge elos srusrngiyuki “in aksumwosye met mwo, nu ke orekma in kulansap nu ke musaiyuk monin Kraist.” (Efesus 4:11, 12) Oasr pal met sesumwos ku in oru ma koluk a tafongla, ne ouinge Jisus oana Togusra ke Togusrai in kosrao el ku in aksumwosye ma inge ke pal a inkanek mwo lal. Ya kom lulalfongi ma inge?

15. Kom fwin a eis baptais ke pal fwasru, me insemwomwo fuka kom ku in tupan ka tokin baptais lom?

¹⁵ Aok, oasr kutu su soenna mwulela moul lalos nu sin Jeova a soenna eis baptais. Fwin kom soenna, ya kom kalem ke ma akuteyuki tari lung la in akfulatye Mwen pa arlana sumwos in oru a kom fwa ku in akkalemye la kom sang kulo ka? Baptais in en Mwen fwa oru kom in oasr fwinsrak mwo in eis me insemwomwo puspus.—Ridi Jon 10:9-11.

Ke En Ngun Mutal

16, 17. Mea kalmen in baptais in en ngun mutal nu sum?

¹⁶ Mea kalmen in eis baptais in en ngun mutal? In oana ke ma akuteyuki tari, met puspus su long kas lal Piter in len lun Pentecost elos etu ke ngun mutal. Aok, elos ku in liye me akpayeye ke mutalos sifwana la God el tafwela in orekmakin ngun mutal. Piter el sie sin met inge su “seseslana ke ngun mutal a mutawauk in kaskas ke kutena loa.” (Orekma 2:4, 8) Kas inge “in en” tia kalme pal nukewa la inen met pa sramsramkinyuk. Ke pal inge, oasr ma puspus su akpayeye ke “in en guferment,” su tia sie met. Ma inge orek ke ku lun guferment. Ke inkanek oapana inge, sie met su baptais in en ngun mutal el akilen la ngun mutal el, tia sie met, tusruktu ma inge ku lun Jeova. A baptais inge kalmekin la sie met el akilen kunokon lun ngun mutal nu ke akwuk lun God.

¹⁷ Ya kom tia eis etauk ke ngun mutal ke inkanek lun lutlut Baibel? Ke sie me pupulyuk, kom kalem ka la Baibel el simusyukla ke kasru lun ngun mutal. (2 Timote 3:16) Ke kom kapkapek ke etauk lom ke ma paye, ma inge kasre kom kalem na paye ka la ‘Papa tumasr in kosrao el sang ngun mutal lal nu sin met nukewa su siyuk sel,’ wekunang kom. (Luk 11:13) Saap kom pulakin la ngun mutal el orekma pa ke moul lom. Ke oiya saye, fwin kom fwa baptais in en ngun mutal, mwulela lun Jisus la Papa el sang ngun mutal el kalmekin la oasr me insemwomwo puspus su kom ku in eis ke pal se kom eis ngun mutal.

18. Me insemwomwo puspus fuka ku in eis sin met nukewa su baptais in en ngun mutal?

¹⁸ Arlana kalem la ke pal inge, Jeova el sang kasru a kol congregation lun met Kristian ke inkanek lun ku lal. Ku se inge el kasre kut pa oana met se met se ke orekma lasr len nukewa. Baptais ke inen ngun mutal akkalemye la kut kalem na paye ke orekma lun ma inge nu ke moul lasr a kut lungse in akos kolyuk lun ngun inge. Tusruktu, kutu met elos nunku la fuka kut ku in akpayeye mwulela nu sin Jeova a fuka ngun mutal el sang kasru nu ka. Kut fwa akuteye ma inge ke me lutlut toko.

[Footnote]

Ya Kom Esam?

• Mea kalmen baptais in en Papa nu sum?

• Mea kalmen baptais in en Mwen?

• Kom ku in akkalemye fuka la kom kalem ke yok sripaiyen baptais in en Papa a Mwen?

• Mea kalmen baptais in en ngun mutal?

[Petsac ke sra 12]

Tokin Pentecost 33 C.E., met tuma lutlut sasu elos mutawauk in engunkin fototo fuka nu sin Papa?

[Credit Line]

By permission of the Israel Museum, Jerusalem