Kom Ku In Kalem Fuka ke Baibel?

3. Eis Me Kasru Su Tuku Sin Met Puspus Saye

Ke pal se mokul se inge John Eyre el oru fwufwasryesr upa lal in sasla liki yen mesis su pangpang Nullarbor Plain, met puspus su muta in an se inge elos lotel Eyre ke inkanek in eis kof liki eol srisrik ke puku a liki sak eucalyptus. Ke sripen el eis me kasru lun met puspus su oasr etauk yok ke oiyen yen mesis inge, paenang Eyre el tia mise a el moulla liki yen mesis inge.

IN OANA ke me pupulyuk inge el akkalemye, in akpayeye sie orekma upa oasr ma eneneyuk ke me kasru su tuku sin sie met su oasr etauk yok lal ka. Ma inge el paye pa fwin kom mutawauk in lutlutkin Baibel.

Jisus el etu la met tuma lutlut lal elos enenu me kasru sin met puspus in eis etauk a kalem ke Baibel. Ke sie pal, “el ikasla nunkalos, tu elos in etu ma Simusla.” (Luk 24:45) Jisus el etu a akilen la met puspus su rid Baibel elos enenu kasru in kalem ke me luti nukewa lun Baibel.

Me Kasru Sin Su?

Jisus el sapkin met tuma lutlut paye lal in kasru met puspus in eis etauk ke Baibel. Meet liki el som nu in kosrao, Jisus el sapkin nu selos: “Ke ma inge komwos som, a oru met in mutanfwal nu kemwa tu elos in met tumal lutlut, . . . luti nu selos in liaung ma nu kemwa Nga sapkin nu sumwos.” (Mattu 28:19, 20) Orekma yok lun met Kristian pa in luti, wekunang in akuteye la fuka me lutlut yok sripe lun Baibel ku in orekmakin ke moul in len nukewa. Aok met Kristian paye elos kasru met puspus in eis etauk ke Baibel.

Tia pat tokin Jisus el fwak masap inge nu sin met tuma lutlut puspus lal, oasr sie ma yok sripe sikyak. Baibel el akkalemye ke sie met kol lulap lun an Itiopia su ridi kas palu lal Isaia su upa nu sel in kalem ka. In fwal nu ke ma Baibel el akkalemye, fus puspus inge el akkalemye kas inge: “El kololla oana soko sip nu ke anwuki, a oana soko lam misla ye mutun met kalkul lal, ouinge el tia oalngelik oalul. In fwokpap nununku lal etukla. A su fwa fwakak fwil lal? Tu moul lal etukla liki fwalu.”​—Orekma 8:32, 33; Isaia 53:7, 8.

Met kol se inge el siyuk sel Filip, sie met Kristian su oasr etauk yok lal ke ma Simusla: “Nga siyuk sum, ke su met palu el kaskas [kin] ma inge? Kel sifwana, ku ke siena met?” (Orekma 8:34) Met Itiopia se inge su paye insiel el som tari nu Jerusalem in alu nu sin God, a kalem la el pre siyuk ke me kasru. Kalem la, el akkalemye inse pusisel ke el ridi kas palu se inge a el lungse na paye in kalem ka. Tusruktu met kol se inge el srakna tia ku in kalem ke ma simusla inge. Ke inse pusisel lal, el siyuk Filip in kasrel. Me akuteye lal Filip oru mokul se inge in arlana insemwomwo paenang el eis me akkeye yok a el ekla sie met Kristian.​—Orekma 8:35-39.

Met Lo lun Jeova elos oru pa orekma su Filip a met Kristian in century se meet elos oru. Ke an 235 kutu, Met Lo elos inse mulala in sang kasru nu sin met puspus in etu a kalem ke ma Baibel el luti na paye. Elos oru ma inge ke inkanek lun lutlutkin kais sie sifwe ku me lutlut lun ma Simusla. Inkanek mwomwo inge in lutlutkin kais sie sifwe ku me lutlut yok lun Baibel oasr ma eneneyuk in tuni yok ke ma Baibel el akkalemye ke sie me lutlut.a​—Liye pok se inge “Me Top Mwomwo nu ke Kusensiyuk Puspus ke Baibel.”

“Kusensiyuk Nukewa Luk Topukyuk”

Steven, Valvanera, a Jo-Anne, su akkalemyeyuk ke me lutlut se meet, elos mutawauk in lutlutkin Baibel yurin Met Lo lun Jeova. “Nga lut ke kut srike akwuk puspus lun Baibel ku ma simusla puspus, pal nukewa me top ke kusensiyuk luk el oasr ke ma simusla puspus inge,” Steven el fwak. “Meet liki lutlut luk ke Baibel, wangin kutena met akkalemye nu sik la fuka in oru ma inge. Sie me insemwomwo yok in etu la lutlut lun Baibel el tia sie me sramsram inmasrlon met lutlut puspus su tia ku in sang me top mwomwo ke kusensiyuk puspus a nunak su lain sie sin sie ke ma paye ke God a ke Baibel.”

Valvanera el insese ka. “Ma nukewa su Nga lotela sin Met Lo el mwo, kupasr nu sin sie sin sie a oasr kalme yok,” el fwak. “Nga lotela la Nga tia enenu in lulalfongi ke me luti puspus ke sripen ‘alu luk’ el luti ma inge, a ke sripen oasr me akuteye mwomwo a sumwos ke ma nukewa.” Jo-Anne el fwak: “Ke sripen kusensiyuk nukewa luk eis me top su tuku ke Baibel paenang ma inge akkeye sunak luk nu sin God su orala ma inge, meyen el etu la oasr kain in kusensiyuk puspus lun metu a el akpayeye la me top mwomwo nu ke kusensiyuk nukewa simusyukla in Baibel.”

Ya oasr Met Lo lun Jeova su kom etu? Efu ku kom tia siyuk sel in akkalemye nu sum ke sie akwuk in lutlutkin Baibel? Fwin wangin Met Lo kom etu, nunak munas simla nu selos orekmakin address su oasr ke sra ak 2 ke magasin se inge. Ke kasru lun ngun mutal lun God, sie nunak mwomwo su lungse in eis me lutlut mwomwo, a kasru lun sie met luti mwomwo ke Baibel, paye la Kas lun God el tia sie buk su upa in kalem nu sum. Kom ku in kalem ke Baibel!

[Footnote]

[Box/​Picture on page 8]

Me Top Mwomwo nu ke Kusensiyuk Puspus ke Baibel

Kutu me lutlut su Met Lo lun Jeova elos orekmakin ke akwuk lalos in lutlutkin Baibel nu sin metu pa:

• Mea akwuk lun God ke fwalu?

• Met mise elos oasr oya?

• Ya kut moul ke “len safla”?

• Efu ku God el lela me keok?

• Fuka in oru moul in sou luk in insemwomwo?

[Pictures on page 7]

Kom fwin lungse in eis etauk yok ke Baibel . . . kom enenu in pre ke ngun mutal lun God, akola nunak lom in lulalfongi ke ma kom rid, eis kasru sin met puspus saye