Ya Kut Ku In Kalem ke Baibel?
“Sou luk elos rid Baibel ke Sunday nukewa. Nga tia arla engunkin in oru ma inge. Nga lulalfongi la Baibel el Kas lun God, tusruktu ma nukewa nga ridi arlana upa ngan kalem ka.”—Steven, sie mokul Britain el fwak.
“Ke pal se nga oasr ke yea 17, nga srike in ridi Baibel. Nga koneak la arlana upa in kalem ka, paenang nga tui.”—Valvanera, sie mutan Spain el fwak.
“Nga ridi Baibel ke pal se meyen nga nunku mu pa inge kunokon lun sie met ke Catholic el ku in oru, ke ma inge nga ridi. Nga aksafyela nufon ke lusen yea tolu! Tusruktu nga tia ku in kalem ke ma nukewa nga ridi ka.”—Jo-Anne, sie mutan Australia el fwak.
BAIBEL pa buk se ma pengpeng liki buk nukewa fwin fwalu. El srakna akilenyuk ke pengpengiya yok liki buk nukewa su kukakinyuk nu sin metu, oasr tari yurin met puspus, lungasyukla tari ke kas puspus, a orekla pa nu ke audio tapes, CD puspus, DVD puspus sayen Baibel su eneneyuk yok ke pal inge. Tusruktu, met nukewa su eis Baibel natulos elos fwakak la arlana upa in eis etauk paye a sumwos ka. Ya kom pulakin pa mu paye ma inge nu sum sifwana?
Ya God El Lungse Kut in Kalem Ke Kas Lal?
“Baibel nukewa etuku ke ngun lun God,” Baibel el fwak. (2 Timote 3:16) Aok, Jeova God el ase nu sesr Baibel. Ya el lungse kut in kalem ke Kas lal? Ku el lela kutu na sin metu in eis etauk yok ka a tia met nukewa, oana nu sin kain in met su oasr wal fulat lal ke alu ku met su eis lutlut lulap lal?
Srike nunku ke kutu fus in Baibel inge:
“Tu masap se inge su nga sapkin nu sum misenge, a tia arlana upa nu sum, ku on loes liki kom.”—Duteronomi 30:11.
“Igasyen kas lom me sang kalem, el sang etauk nu selos su tia arulana lalmetmet.”—Sam 119:130.
“In aur sana [Jisus] el engun ke ngun mutal, a fwak: ‘Nga sot kulo nu sum, O Papa, Leum lun kosrao a fwalu, tu kom mwukunla ma inge liki met lalmetmet a met lalkung, a fwakak nu sin tulik fwusr.’”—Luk 10:21.
Aok, God su Orala Baibel, el lungse kom in kalem ke Kas lal! Tusruktu, nu sin met nukewa su lungse in kulansap nu sel elos koneak la arlana upa nu selos in eis etauk paye a sumwos ke kas lal. Mea mwo a ku in sang kasru metu? Me lutlut se toku fwa akuteye ke inkanek mwomwo tolu su fwa ku in kasre kom in eis etauk yok a kalem ke Baibel.