Kom Ku In Kalem Fuka ke Baibel?
2. Ridi Ke Sie Nunak Mwomwo
Ya oasr met kawuk lom el akkolukye sie met su kom soenna osun nu se ku etal na paye? Paenang ke pal se kom osun nu sin met se inge, ya ma kom long sin met kawuk lom oru kom in tia ku in liye ku akilen oiya mwomwo puspus lun met se inge? Ke ma inge oiya se inge ku in sikyak kut fwin sramsram ke Baibel.
MET sap Poul el sang kas in sensen ke ma ku in sikyak kut fwin tia ridi Baibel ke sie nunak mwo su akola in long. Sin kutu met Ju in pal meeta, Poul el simusla kelos: “Nga orek ma lo nu selos, tu elos moniyuk nu sin God, a tia fwal nu ke etauk.”—Rom 10:2.
Kutu sin met Ju in century se meet elos srunga in lulalfongi la Jisus pa Messaia, fwinne Ma Simusla ke kas Hibru akkalemye kalem ka. Jisus lun an Nasaret el fwal nu ke me akuteye nukewa ke Messaia ke Ma Simusla ke kas Hibru a akpayeyuk pa kas palu nukewa ke ma Messaia el fwa oru. Tusruktu, kain in nunak su tia ku in ekulla kutongye met Ju puspus in len lal in eis kalem ke Kas lun God.
Mea kut ku in lotela ke me sramsram inge in Baibel? Arlana yok sripe in rid Baibel ke sie nunak mwo su akola in long. Sie nunak in srisri su tia ku in ekulla ku in kutongye sie met rid in kalem ke ma paye lun Baibel.
Ke sie me pupulyuk, sie professor su lutlut ke alu in an North Carolina, U.S.A., el akkalemye Baibel oana “simla sin met puspus a koanon ma inge pa nunak lun met, su pus ke ma inge tia oana sie nu sin sie sin sie a wangin sie ke ma inge sang me kol sumwos la fuka kut enenu in moul.” Fwin sie met el nunku mu Baibel el oana sie buk simusyukla sin met a tia sin God, saap met se inge el ku in pulesru me kolyuk ku me lutlut yok sripe su el srunga.
Ke oiya saye, Baibel el akkeye kut in moniyuk in lutlutkin ma inge. Ma ke met Berea ke len lal Poul, ma Simusla el akkalemye: “Elos eis kas inge ke insielos kemwa, a suk in ma Simusla len nukewa in liye ma inge la paye, ku sito.” (Orekma 17:11) Oana met Berea, kut enenu in rid Baibel ke nunak mwomwo lasr su lungse in eis etauk sumwos a paye. Rid Kas lun God ke sie nunak mwo, a lungse na paye in etu a koneak kas mwolana a paye lun God su orala ma inge.