God el Ase Nu Sesr Fwinsrak in Moul Ma Patpat Fwin Fwalu

“Tu akpusiselyeyuk tari ma orekla nu ke wangin sripe . . . tusruktu oasr na fwinsrak mwomwo.”​—ROM. 8:20, New World Translation.

1, 2. (a) Efu ku fwinsrak ke moul ma patpat fwin fwalu el yok sripe nu sesr? (b) Efu ku oasr met puspus su tia lulalfongi la metu ku in eis moul ma patpat fwin fwalu?

SAAP kom esam ke engan yok lom ke pal se meet kom lotela la ke pal fwasru, metu elos fwa tia matou a mise, a elos fwa moul ma patpat fwin fwalu. (Jon 17:3; Fwakyuk 21:3, 4) Kalem la kom insemwomwo in akkalemye nu sin met puspus fwinsrak mwomwo inge su oasr ke ma Simusla. Aok, fwinsrak ke moul ma patpat el sie peng mwo su kut luti nu sin met puspus. El sang kasru nu ke nunak lasr in aksaokye moul lasr.

² Oasr alu puspus su fwak mu elos fwasr tokin Kraist tusruktu elos tia lulalfongi ke fwinsrak in moul ma patpat fwin fwalu. Baibel el luti la ngun el ku in mise, tusruktu oasr alu puspus elos luti mu oasr yurin sie met sie ngun su tia ku in mise a srakna moul fwinne sie met el mise tari a som nu in kosrao. (Ezikiel 18:20) Ke sripe se inge, oasr met puspus su tia lulalfongi la metu ku in eis moul ma patpat fwin fwalu. Ke ma inge kut ku in siyuk sesr sifwana: Ya Baibel el sang me akpayeye puspus la fwinsrak inge el paye? Fwin aok, ngea pal se meet God el akkalemye ma inge nu sin metu?

“Tu Akpusiselye Tari Ma Orekla Nu Ke Wangin Sripe . . . Tusruktu Oasr na Fwinsrak Mwomwo”

3. Fuka akwuk lun God ke metu el kalem tari ke mutaweyen me sramsram lun fwalu?

³ Akwuk lun Jeova nu sin metu el kalem tari ke mutaweyen me sramsram lun met fwin fwalu. God el akkalemye kalem la Adam el ku in moul ma patpat fwin el akos masap nukewa lal. (Genesis 2:9, 17; 3:22) Wangin alolo ka la tulik nukewa natul Adam in pal meeta elos etu ke ma koluk lun papa a nine kiyelos paenang elos tila sumwosmwos. Elos liye ke sie kutlas su fururur in kosrala inkanek in utyuk nu ke imae lun Eden, a elos akilen pa la metu elos kapek matou a mise. (Genesis 3:23, 24) Ke pal puspus somla, lusen moul lun met el fototoeni. Adam el moul ke lusen yea 930. Shem su moulla liki Sronot lulap el moul ke lusen yea 600, a tulik mokul se natul su pangpang Arfaksad el moul ke lusen yea 438. Tira, papa tumal Ebream, el moul ke lusen yea 205. Lusen moul lal Ebream oasr ke yea 175, Isaak el oasr ke yea 180, a Jekob el moul ke lusen yea 147. (Genesis 5:5; 11:10-13, 32; 25:7; 35:28; 47:28) Met puspus elos akilen la oiya se inge ke lusen moul lun metu fototola, el kalmekin la fwinsrak ke moul ma patpat el tula pa! Ya oasr sripe mwomwo lalos in lulalfongi la moul ma patpat ku in sifwilpa folokinyuk me nu sin metu?

4. Efu ku met kulansap oaru in pal meeta elos ku in lulalfongi la God el fwa sifwilpa sang nu sin metu me insemwomwo nukewa su tula lukel Adam?

⁴ Kas lun God el akkalemye: “Tu akpusiselyeyuk tari ma orekla nu ke wangin sripe . . . tusruktu oasr na fwinsrak mwomwo.” (Rom 8:20, NW) Ke fwinsrak fuka? Kas palu se meet in Baibel el akkalemye ke “fute” su fwa ‘kunausla sifwen serpent.’ (Ridi Genesis 3:1-5, 15.) Nu sin met puspus su oaru nu sin God, mwulela ke Fute se inge el orala sie pwelung mwo ke fwinsrak la God el fwa tia mulkunla akwuk lal nu sin metu. El sang me akkeye nu sel Ebel, a nu sel Noa in lulalfongi la God el fwa sifwilpa sang nu sin metu me insemwomwo nukewa su tula lukel Adam. Kalem la met luo inge elos etu a akilen la ‘orekma in kunausla kapin niyen fute se’ oasr ma eneneyuk ke sie akwuk in aksurorye sra.​—Genesis 4:4; 8:20; Hibru 11:4.

5. Mea akkalemye la oasr lulalfongi lal Ebream ke sifwil moulyuk?

⁵ Nunku kel Ebream. Ke pal se srikeyuk el, Ebream el “kise kunul Isaak, . . . mwen sefwanna isusla natul.” (Hibru 11:17) Efu ku el lungse in oru ma inge? (Ridi Hibru 11:19.) Meyen el lulalfongi ke sifwil moulyuk! Oasr sripe mwomwo lal Ebream in lulalfongi ke sifwil moulyuk. Aok, Jeova el sifwil akmwoyela laan manol Ebream a Serah elos in ku in isus tulik fwinne elos matou tari. (Genesis 18:10-14; 21:1-3; Rom 4:19-21) El lulalfongi pa ke mwulela lun Jeova nu sel. God el fwak nu sel: “Tu fute lom fwa pangonyuk in Isaak.” (Genesis 21:12) Ke ma inge, oasr sripe mwo puspus lal Ebream in lulalfongi la God el fwa akmoulyelak Isaak.

6, 7. (a) Mwuleang fuka Jeova el oru nu sel Ebream? (b) Fuka mwulela lun Jeova nu sel Ebream el sang fwinsrak nu sin met nukewa?

⁶ Ke sripen lulalfongi mwomwo lal Ebream, Jeova el orala sie mwuleang nu sel ke tulik natul, ku “fute” lal. (Ridi Genesis 22:18.) Ke pal tok “fute” se inge akkalemyeyuk la el pa Jisus Kraist. (Galetia 3:16) Jeova el fwak nu sel Ebream la “fute” lal fwa yokelik “oana itu in kosrao a oana puk su on mweanu,” kalme pa Ebream el tia etu ke pisen tulik nukewa natul meyen arlana pus. (Genesis 22:17) Tusruktu, tok pisen met nukewa su wi ke fute inge el akkalemyeyuk. Jisus Kraist a met 144,000 su fwa welul in kol ke Togusrai lal, elos wi ke “fute” inge. (Galetia 3:29; Fwakyuk 7:4; 14:1) Togusrai lun Messaia pa inkanek in oru ‘mutanfwal nukewa fwin fwalu fwa insemwomwo.’

⁷ Ebream el kofla kalem ke kalme nukewa lun mwuleang lun Jeova nu sel. Ne ouinge, el sano “sie siti su oasr foundeson su God el orala,” Baibel el akkalemye. (Hibru 11:10) Siti se inge pa Togusrai lun God. Ebream el enenu in sifwil moulyuk elan eis me insemwomwo nukewa ye koko lun Togusrai se inge. El ku in engankin moul ma patpat fwin fwalu ke inkanek lun sifwil moulyuk. A moul ma patpat ku in tuku sin met nukewa su moulla liki Armagedun ku nu selos su fwa akmoulyeyukyak liki mise.​—Fwakyuk 7:9, 14; 20:12-14.

‘Ku Su Oan In Nga Kaifwe Yu’

8, 9. Efu ku buk lal Job el akkalemye pa ke ma yok sripe puspus sayen ma upa puspus su sikyak nu sel?

⁸ Ke lusen pal inmasrlon len lal Josef, tulik nutin tulik natul Ebream a ke len lal Moses, oasr sie met su moul in pal san, el pa Job. Buk lal Job ke Baibel su simusyukla sel Moses, el akkalemye la efu Jeova el lela Job lan sun me keok upa puspus a mea saflaiyen ma sikyak kel. Buk lal Job el akkalemye ke ma upa puspus lun sie met; a el akkalemye pa ke ma puspus su ku in sang kasru nu sin met nukewa a lipufan nukewa. Buk se inge el akkalemye ke etauk a kalem yok ke me akpayeye la Jeova el kol ke inkanek sumwosmwos. A el akkalemye la oiyen oaru a fwinsrak ke moul lun met kulansap nukewa lun God fwin fwalu el oasr pa ke kusensiyuk su akkalemyeyuk in imae Eden. Fwinne Job el tia kalem ke kusensiyuk se inge, el tia na lela met kawuk tolu lal elos in oru elan nunku mu el tia sruokye oiyen oaru lal. (Job 27:5) Me srikasrak inge el akkeye lulalfongi lasr a kasre kut in akilen la kut ku in sruokye pa oaru lasr a akfulatye ku lun God.

⁹ Tokin met kawuk tolu su srike in akkeyel Job elos tari ke sramsram lalos, “Eleu mwen natul Barekel met Buz el topuk.” Mea oru elan kaskas? A el fwak: “Tu nga tingtingi ke kas, ngun in nga kaifwe yu.” (Job 32:5, 6, 18) Ma Eleu el fwak akpayeyuk ke pal se God el sifwil akinsemwomwoyel Job, a kas lal oasr kalme yok nu sin met puspus. Ma inge el sang sripe yok ke fwinsrak mwomwo nu sin met nukewa su sruokye oaru lalos nu sin God.

10. Mea akkalemye la kas lun Jeova nu sin sie met kutu pal oasr pa kalme yok nu sin met nukewa?

¹⁰ Kutu pal Jeova el akkalemye kas lal nu sin sie met, a kas lal inge oasr pa kalme yok nu sin met nukewa. Ma inge ku in liyeyuk ke kas palu lal Daniel ke kalmeyen mwemwe lal Togusra Nebukadnezzar lun an Babulon ke soko sak su enenu in pakpuki. (Daniel 4:10-27) Mwemwe se inge el akpayeyuk nu sel Nebukadnezzar, tusruktu el akkalemye pa ke ma se su yok liki. Ma inge akkalemye la kolyuk lun God fwin fwalu ke inkanek lun sie togusrai ke sruf lun Togusra Devid. A ma inge e fwa sifwil akkalemyeyuk tokin lusen sie pal su oasr ke yea 2,520, mutawauk ke 607 B.C.E.a Kolyuk lun God fwin fwalu el sifwil akkalemyeyuk ke pal se Jisus Kraist el srusrngiyuki oana Togusra in kosrao in yea 1914. Srike nunku la fuka kolyuk lun Togusrai tia pat el fwa akpayeye fwinsrak mwomwo lun met nukewa su akosten!

“Molella Liki In Oatula Nu In Luf Sa!”

11. Mea kas lal Eleu el akkalemye ke God?

¹¹ Ke pal se el sang me top nu sel Job, Eleu el kaskas ke “sie met roso yurol, sie met tutaf, sie in masrlon tausan, in fwakak nu sin met ma fwal nu sel.” Na mea fwin met roso se inge el “pre nu sin God, a el lungse el, a ou inge el liye mutal wi engan”? Eleu el fwak: “Na God el kulang nu sel, a fwak, ‘Molella liki in oatula nu in luf sa! Nga konoiyuk sie me mol! Ikwel fwa mwo liki ikwen sie tulik; el folokla nu in len in fwusr lal.’” (Job 33:23-26) Kas inge akkalemye ke lungse lun God in eis “sie me mol,” in nunak munas nu sin met nukewa su auliyuk.​—Job 33:24.

12. Kas lal Eleu el akkalemye ke fwinsrak fuka nu sin met nukewa?

¹² Kalem la Eleu el tia etu na paye oiya nukewa ke me mol, ku me lango, oana ke met palu puspus tia kalem na paye ke ma nukewa elos simusla ka. (Daniel 12:8; 1 Piter 1:10-12) Ne ouinge, kas lal Eleu el akkalemye ke fwinsrak mwo la sie len God el fwa eis me lango ku me mol a aksukosokyela met liki oiyen matou a mise. Kas lal Eleu el akkalemye ke fwinsrak mwolana ke moul ma patpat. Buk lal Job el akkalemye pa la e fwa oasr sifwil moulyuk lun met mise.​—Job 14:14, 15.

13. Mea kalmen kas lal Eleu nu sin met Kristian nukewa?

¹³ Ke pal inge, kas lal Eleu srakna oasr kalme yok nu sin million puspus sin met Kristian su fwinsrak in moulla liki kunanela lun akwuk nukewa ke pal inge. Met matou nukewa su fwa moliyukla elos fwa sifwil folokla nu in len in fwusr lalos wanginla mas a kutena ma upa ke manolos. (Fwakyuk 7:9, 10, 14-17) Sayen ma inge, fwinsrak in sifwilpa liye met nukewa su akmoulyeyakyuk su folokla nu in len in fwusr lalos sang me akkeye yok nu sin met kulansap oaru nukewa. Aok, moul ma patpat in kosrao nu sin met Kristian akmusrala a moul ma patpat fwin fwalu nu sin “sip ngie” nukewa lun Jisus el ku in eis fwal nu ke lulalfongi lalos su elos akkalemye ke me kise lun lango lun Kraist.​—Jon 10:16; Rom 6:23.

El Okomla Mise Nu Tok Liki Fwalu

14. Mea akkalemye la oasr ma se su yok liki Masap lal Moses eneneyuk nu sin met Israel elos in nunku yok ke fwinsrak lun moul ma patpat?

¹⁴ Tulik natul Adam elos ekla sie mutanfwal ke pal se elos ilyuk nu ke sie mwuleang sin God. Ke pal se Jeova el sang Masap nu selos, el fwak kas inge: “Ke ma inge komwos fwa liaung masap luk, a ma lo luk, sie met fwin oru ma inge, el fwa moul ke ma inge.” (Livitikus 18:5) Ke sripen elos tia ku in akpayeye ke moul lalos akwuk sumwosmwos nukewa ke Masap, paenang met Israel elos selngawiyuk ke inkanek lun Masap a oasr ma eneneyuk in aksukosokyelos liki me selnga inge.​—Galetia 3:13.

15. Me insemwomwo fuka ke pal fwasru Devid el simusla?

¹⁵ Tokin len lal Moses, Jeova el kasru pa met sim puspus lun Baibel in simusla ke fwinsrak lun moul ma patpat. (Sam 21:4; 37:29) Ke sie me pupulyuk, Devid sie met sim lun sam el aksafyela ma el simusla ke inse sefwanna lun met nukewa su alu nu sin God paye in eol Saion ke kas inge: “Tu ingo Jeova el sapkin me insemwomwo, aok, moul ma patpat.”​—Sam 133:3.

16. Ke inkanek lal Isaia, mea Jeova el mwulela ke pal fwasru ke “fwalu nufon”?

¹⁶ Jeova el akkalemye nu sel Isaia kas palu ke moul ma patpat fwin fwalu. (Ridi Isaia 25:7, 8.) Oana sie “me afyuf,” ku sie me luslus, ma koluk a mise el oana me aktoasr upa nu sin metu. Jeova el mwulela nu sin met kulansap lal la ma koluk a mise e fwa okomla ku etukla, “liki fwalu nufon.”

17. Kunokon fuka lun Messaia el ikasla inkanek nu ke moul ma patpat?

¹⁷ Nunku akmwoye pa ke akwuk su akkalemyeyuk ke Masap lal Moses su Asasel el enenu in oru ke goat soko. Pal se ke yea se, ke Len in Orek Iumwe, met tol fulat el ‘fwa filiye paul kemwa fwin sifwen goat mokul sokoe, a fwakak fwel metin tulik natul Israel nukewa, a el fwa filiye ma inge fwin sifwen goat sokoe, a goat sokoe fwa wis nu fwel ma koluk lalos nukewa nu sie an wangin met we.’ (Livitikus 16:7-10, 21, 22) Isaia el palye la tuku lun Messaia, su fwa oru pa kunokon inge a el usla “mas,” “asor” a “wis ma koluk lun met puspus,” a ma inge ikasla inkanek nu ke moul ma patpat.​—Ridi Isaia 53:4-6, 12.

18, 19. Fwinsrak fuka akkalemyeyuk in Isaia 26:19 a in Daniel 12:13?

¹⁸ Ke inkanek lal Isaia, Jeova el fwak nu sin met Israel: “Met mise lom fwa moul. Monin met mise luk fwa tukakak. Ngetalik a on, komwos su muta in kutkutu! Tu aunfong lom oana aunfong lun maasrik, a fwalu fwa sisak met mise.” (Isaia 26:19) Ma Simusla ke Kas Hibru ku ke buk matou el akkalemye kalem ke sifwil moulyuk lun met mise fwin fwalu. Ke sie me pupulyuk, ke pal se Daniel el apkuran in sun yea 100 matwel, Jeova el mwulela nu sel: “Kom fwa mongla, a fwa tu in me usru lom, in saflaiyen lenu.”​—Daniel 12:13.

¹⁹ Ke sripen fwinsrak ke sifwil moulyuk, Marta el ku in fwak nu sin Jisus ke tumulel wiyel su mise: “Nga etu tu el fwa sifwil moulyuk in pal in sifwil moulyuk in len se safla.” (Jon 11:24) Ya me luti lun Jisus a buk nukewa in Baibel su met tuma lutlut lal simusla ku in ekulla fwinsrak se inge? Ya Jeova el srakna akkalemye nu sin met nukewa fwinsrak mwo ke moul ma patpat fwin fwalu? Kut fwa lutlutkin me top nu ke kusensiyuk nukewa inge ke me lutlut toko.

[Footnote]

Ya Kom Ku In Akuteye?

• Met nukewa “akpusiselyeyuk ke wangin sripe,” mea fwinsrak mwomwo lalos?

• Mea akkalemye la oasr lulalfongi lal Ebream ke sifwil moulyuk?

• Kas lal Eleu nu sel Job el akkalemye fwinsrak fuka nu sin metu?

• Fuka ma Simusla ke Kas Hibru ku buk matou el akkalemye yok ke fwinsrak ke sifwil moulyuk a ke moul ma patpat fwin fwalu?

[Picture on page 11]

Kas lal Eleu nu sel Job el akkalemye ke fwinsrak la metu fwa aksukosokyeyukla liki oiyen matou a mise

[Picture on page 12]

Daniel el eis mwulela lun God la ‘el fwa tu in me usru lal, in saflaiyen lenu’