Apkurun In Akpayeyuk Fwalu Nufon Fwa Paredaisla!

“Papa tumasr su in kosrao, em in akmutalyeyuk, togusrai lom in tuku, ma lungse lom in orek, oana in kosrao, oinge fwin fwalu.”​—Mattu 6:9, 10, The Jerusalem Bible.

PRE se inge el arulanu pengpeng, a eteyuk sin met puspus oana Pre lun Leum, el akkalemye fwinsrak nu sin metu. Ke inkanek fuka?

In oana ke Pre lun Leum el akkalemye, Togusrai lun God fwa akpayeye ma lungse lun God fwin fwalu oana ke ma lungse lun God orek in kosrao ke pal inge. A ma lungse lun God pa in oru fwalu nufon nu ke sie Paredais. (Fwakyuk 21:1-5) Ke ma inge mea se inge Togusrai lun God, a el fwa sifwil folokonak fuka Paredais fwin fwalu?

Sie Guferment Paye se su Oakiyuki sin God

Togusrai lun God el sie guferment na paye. Nu ke kutena kain in guferment in fwasr mwo, el enenu met kol puspus, masap, a met puspus su muta ye koko lal. Ya Togusrai lun God el akpayeye ma eneneyuk nukewa inge? Loang akmwoye nu ke me top lun Baibel ke kusensiyuk tolu inge:

Su met kol puspus ke Togusrai lun God? (Isaia 33:22) Jeova God el srusrngiye Mwen nutul, Jisus Kraist, in oru kolyuk lal ke Togusrai. (Mattu 28:18) Ye kolyuk lun Jeova, Jisus el sulela u srisrik lun met puspus su tuku liki “sruf nu kemwa, a kaskas nu kemwa, a fwil nu kemwa, a mutanfwal nu kemwa” su fwa welul in kol oana “togusra fwin fwalu.”​—Fwakyuk 5:9, 10.

Masap fuka Togusrai lun God el orala nu sin met nukewa su muta ye kolyuk lal? Kutu sin masap inge el sapkin met nukewa su oasr ye kolyuk lun Togusrai in orala orekma mwomwo. Jisus el akkalemye masap su yok sripe emeet liki masap nukewa inge, ke el fwak: “‘Kom fwa lungsum Jeova God Lom ke insiom kemwa, a ke ngunum kemwa, a ke nunkom kemwa.’ Pa inge masap se yok a masap se meet. A ma se akluo oana inge, ‘Kom fwa lungsum met tulan lom oanu kom sifwana.’”​—Mattu 22:37-39.

Kutu pa masap saye el sapkin met nukewa ye kolyuk lun Togusrai lun God elos in fwasr liki kutena kain in orekma tia mwo. Ke sie me pupulyuk, Baibel el akkalemye kalem ke kas inge: “Komwos in tia kiapeyukla! Wangin met pukas, ku met alu nu ke me srulela, ku met kosro, ku met lung in ikwe, ku mokul su orekma koluk nu sin mokul ku met pusrapasr, ku met rapku, ku met srui, ku met aksruksruk koluk, ku met eis laesla, fwa eis usru lalos in togusrai lun God.”​—1 Korint 6:9, 10.

Su Met Puspus su Muta Ye Kolyuk lun Togusrai lun God? Jisus el pupulyukkin met nukewa su muta ye kolyuk lun Togusrai lun God oana sip. El fwak: “Elos fwa long pusrek; a elos fwa u sefwanna a met sropu sefwanna.” (Jon 10:16) Sie met fwin lungse in oasr ye kolyuk lun Togusrai lun God, tia fwal elan fwak mukena la el akos a fwasr tokin Met Seperd Mwomwo, Jisus, a el enenu in oru ma el sapkin. Jisus el fwak: “Tia met nukewa su fwak nu sik, ‘Leum, Leum,’ fwa ilyuk nu in togusrai in kosrao, a el na su oru ma lungse lun Papa tumuk su in kosrao.”​—Mattu 7:21.

Ke ma inge, elos nukewa su oasr ye kolyuk lun Togusrai lun God elos orekmakin a akfulatye inen God, Jeova, oana ma Jisus el oru. (Jon 17:26) Elos akos masap lun Jisus in luti met puspus ke “mwosasu lun togusrai.” (Mattu 24:14; 28:19, 20) A elos akkalemye lungse paye nu sin sie sin sie.​—Jon 13:35.

Fwa “Kunausla Elos su Kunausla Fwalu”

Ma sikyak puspus fwin fwalu ke pal inge akkalemye la Togusrai lun God el apkurun na paye in oru ma puspus in oasr ekla yok nu fwin fwalu. Kut etu fuka ma inge? Tausan luo yea somla, Jisus el akkalemye ke kain in akul puspus su fwa akkalemye la “togusrai lun God el apkurun na.” (Luk 21:31) Oana ke ma akkalemyeyuk ke me lutlut tari a, me akul puspus inge liyeyuk arulanu kalem fwin fwalu nufon.

Mea fwa sikyak tok? Jisus el topuk: “Tu in pal sa a fwa ongoiye lulap, oana tia liyeyuk ke mutamweyen fwalu nu inge, mo, a fwa tia nu tok.” (Mattu 24:21) Ongoiye lulap inge el tia orek sin metu. A, ma inge orekma lun God in sang kunausla met nukewa su kunausla fwalu. (Fwakyuk 11:18) Met koluk nukewa, su orekma koluk lalos oru me sensen upa paenang fwalu el apkuran na in musalla, elos fwa “mwotla liki fwalu.” Tusruktu met sumwosmwos, su God el insemwomwo kelos, “fwa mutana we.”​—Soakas 2:21, 22.

Oasr sripe mwomwo puspus lun Jeova God in oru orekma inge. Efu? Nunku ke me pupulyuk inge: Srike nunku ka la fwin oasr sie loom sum su oasr met puspus rent ku orekmakin. Kutu sin met su muta we elos mwo a kulang; elos moli rent lalos a karungin mwo loom selos. Tusruktu, kutu sin met su muta we elos oru orekma koluk a kunausla misla we a elos nunku kelos sifwana; elos srunga in moli rent a elos kunausla loom inge. Fwinne oasr masap a kas in sensen su akkalemyeyuk tari nu selos, a elos tafwela na in akkalemye oiya koluk lalos. Mea kom fwa oru ka? In oapana ke met se su ma la loom san, paye la kom fwa lungse in lusla met koluk nukewa inge liki loom san.

Ke inkanek oinge, Jeova God, su Met Orala fwalu a ma nukewa su oasr ka, oasr sumwos lal in oru sulela lal la su el fwa lela in muta fwin fwalu. (Fwakyuk 4:11) Jeova el fwak la akwuk lal pa in eisla liki fwalu met koluk nukewa su tia loang nu ke ma lungse lal a akkolukye sumwos lun met puspus saye.​—Sam 37:9-11.

Paredais el Sifwilpa Folokinyukyak

Tia pat, Togusrai lun God ye poun Jisus Kraist fwa kol fwin fwalu. Jisus el pangon mutamwauk sasu inge oana “orekma in aksasuye ma nukewa.” (Mattu 19:28, New International Version) Ma puspus su fwa sikyak in pal sa fwa oana mea? Loang akmwoye nu ke mwulela puspus su Baibel el akkalemye:

Sam 46:9. “El aksafyela meun nu ke saflaiyen fwalu.”

Isaia 35:1. “Yen mesis a fwal pao fwa insemwomwo; a an musrasra fwa engun, a fwarngelik oana ros.”

Isaia 65:21-23. “A met sulela luk fwa engun pat ke orekma lun paulos. Elos fwa tia orekma ke wangin sripe, ku isus nu ke ongoiye.”

Jon 5:28, 29. “Tu aur se a fwa tuku, ke elos nu kemwa su muta inkulyuku fwa long pusral [Jisus] a fwa tuku liki.”

Fwakyuk 21:4. “[God] el fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal; tu ma meeta wanginla.”

Sripe Puspus Fwal in Lulalfongi Ka

Ya kom lulalfongi ke mwulela puspus su Baibel el akkalemye? Baibel el akkalemye la met puspus elos fwa tia lulalfongi. El akkalemye: “Tu in len safla met aksruksruk . . . a fwafwasryesr oana lung koluk lalos sifwana a fwak: ‘Piye mwuleung lun tuku lal? Tu in len ingo me ke papa tumasr elos mise, ma nukewa on oana ke mutamwauk ke ma orekla.’” (2 Piter 3:3, 4) Tusruktu met aksruksruk nukewa inge elos tafongla na paye. Nunku ke sripe akosr inge la efu ku kom ku in lulalfongi ke ma Baibel el akkalemye:

(1) God el kunausla met koluk nukewa in pal meeta. Sronot in len lal Noa el sie me pupulyuk na mwomwo ka.​—2 Piter 3:5-7.

(2) Kas lun God el paye ke inkanek sumwos ke ma puspus su sikyak fwin fwalu.

(3) Ma nukewa el tia “on oana ke mutamwauk ke ma orekla.” Ke sie oiya su soenna sikyak in pal meeta, planet lasru el sun me akkoluk puspus su tuku ke akwuk lun met puspus, ke oiyen moul fokfok, a ke orekma in kunausla lun anu.

(4) “Peng mwo lun togusrai” el sulkakinyukelik ke pal inge fwin fwalu nufon, su akkalemye la tia pat “safla e fwa tuku.”​—Mattu 24:14.

Met Lo lun Jeova elos suli kom in lutlutkin Kas lun God, Baibel, yurolos tu kom in ku in lotela kutupa ke me fwinsrak nu ke moul ma patpat ye kolyuk lun Togusrai lun God. (Jon 17:3) Aok, oasr sie pal ke pal fwasru fwa oasr ma mwomwo nu sin met puspus. Pal mwolanu se inge el arlana apkurun in tuku! Ya kom sie sin met puspus su fwa wi muta ke pal mwomwo se inge?

[Blurb on page 5]

Met nukewa su fwak mu ma nukewa su on inge el srakna oana ma in pal meeta elos tafongla na paye

[Picture on page 6]

Ya kom sie sin met puspus su fwa wi muta ke pal mwomwo inge?