Oasr Ma Upa Puspus Ke Pal Inge

BAIBEL el akkalemye la metu fwa sun “ongoiye puspus.” El akkalemye ke pal inge oana “len safla.” (2 Timote 3:1-5; 2 Piter 3:3-7) Jisus Kraist el akkalemye ke kain in pal inge ke pal se el sang me top nu ke kusensiyuk su siyukyuk sin met tuma lutlut puspus lal ke “saflaiyen akwuk lun ma puspus.” (Mattu 24:3, New World Translation) Ya kut moul ingena ke len safla? Srike liye ma Baibel el palye tari ka ke report puspus su akkalemyeyuk ten, a tokin ma inge kom sifwana akkalemye me top nu ka.

Ma Baibel el palye tari ka pa: mutanfwal puspus fwa lain sie sin sie​—Luk 21:10; Fwakyuk 6:4.

Mea report su tufwana orek el akkalemye: “Ke lusen yea 100 kutu somla pisen met su mise ke meun el oasr ke pal tolu pus liki met nukewa su mise ke meun ke yea 1900 somla, nu ke pal in isusla lun Kraist.”​—Worldwatch Institute.

Ma Baibel el palye tari pa: sral ke mongo a mas upa​—Luk 21:11; Fwakyuk 6:5-8.

Mea report su tufwana orek el akkalemye: In yea 2004 oasr pisen met su motkoeyuk mu oasr ke 863 million fwin fwalu arulanu srikla mongo nelos, su pise inge el 7 million pus liki pisen met su srikla mongo nelos in yea 2003.​—United Nations Food and Agriculture Organization.

Oasr billion se kutu sin met elos muta ke an su tia mwo a arulanu iktok a srikla loom selos; 2.6 billion met wangin akwuk mwomwo ke loom fwasr a an in sisi kutkut lalos; oasr 1.1 billion sin met su wangin kof mwo a nasnas nimelos.​—Worldwatch Institute.

Kain in mas se inge malaria el akkolukye 500 million sin met; oasr 40 million met eis kain in mas inge HIV-AIDS; mas inge tuberculosis el uniye met 1.6 million in yea 2005.​—World Health Organization.

Ma Baibel el palye tari pa: ke orekma in kunausla fwalu​—Fwakyuk 11:18.

Mea report su tufwana orek el akkalemye: “Orekma puspus lun metu el orala fwako koluk su ku in akwanginyela ma orakrak puspus a sak puspus ke pal na fototo fwasru.” “Apkuran nu ke luo tafwu tolu ke ma puspus su tuku ke ecosystem lun fwalu in sang kasru nu ke moul el sriksrikeni ke pal inge fwin fwalu nufon.”​—Millennium Ecosystem Assessment.

“Orekma lun met su orala fwako koluk in oasr greenhouse gases el oru pulanpal lun Fwalu in oasr ekla yok ka, su ku in orala ongoiye yok nu ke planet se inge.”​—NASA, Goddard Institute for Space Studies.

Ma Baibel el palye tari pa: peng mwo lun Togusrai lun God fwa sulkakinyuk fwin fwalu nufon​—Mattu 24:14; Fwakyuk 14:6, 7.

Mea report su tufwana orek el akkalemye: In yea 2007, Met Lo lun Jeova su piselos oasr ke 6,957,854 elos orekmakin ao 1.4 billion in sulkakin peng mwo ke Togusrai lun God ke an 236.​—2008 Yearbook of Jehovah’s Witnesses.

In oana ma akkalemyuk tari ke me lutlut inge, Baibel el palye tari la fwinne oasr peng koluk puspus, oasr sripe mwomwo in fwinsrakkin ma mwo ke pal fwasru. Jisus el fwakak ke “peng mwo” ke Togusrai lun God. Mea se inge Togusrai lun God? Efu ku ma inge el ku in sang fwinsrak mwomwo ke pal fwasru? A mea Togusrai lun God el ku in oru nu sum?

[Blurb on page 3]

Baibel el akkalemye ke ma sikyak puspus fwin fwalu su kut liye ke pal inge