Akos Ku Lun Jeova
“Tu pa inge lungse lun God, tu kut in liaung masap lal; a masap lal tia toasr.”—1 JON 5:3.
1, 2. (a) Efu ku nunak nu ke oiyen akpusiselye nu ke ku el tia ma mwomwo se nu sin met puspus ke pal inge? (b) Ya met puspus su fwak mu elos srunga in insese nu ke kutena ku elos sukosokla na paye? Akuteye.
“KU” EL sie kas su tia pengpeng ke pal inge. Met puspus ke pal inge elos srunga in akpusiselyelos ke ma lungse lun met saye. Oasr met puspus su tia insese nu ke ku lun met saye a elos akkalemye kain in nunak oinge, “Wangin kutena met fwa sapkin nu sik ma nga enenu in oru.” Tusruktu ya kain in met inge elos sukosokla na paye liki kutena kain in ku? Mo tia oinge! Met puspus inge elos etawi kain in oiya ku akwuk nu ke moul lun met puspus su “oana luman met lun fwal se inge.” (Rom 12:2) Elos tia sukosokla liki kutena kain in ku, a elos “met kos lun kulamwi,” oana met sap Piter el akkalemye. (2 Piter 2:19) Elos fwasr “tokin inkanek lun fwal se inge, fwal nu ke leum lun ku lun engyengu,” oana Setan su Devil.—Efesus 2:2.
2 Sie met sim ke pal inge el lungse in konkun a fwak: “Nga tia lela papa a nine kiyuk ku sie met kol lun kutena alu ku Baibel in fwak nu sik la mea ma sumwos a paye.” Aok, oasr kutu met su orekmakin ku lalos ke inkanek koluk a sufwal a tia fwal kut in akos ku lalos. Tusruktu ya pa inge me aksumwos nu ka tu kut in fwak mu kut tia enenu kutena me kasru nu ke inkanek in kolyuk? Srike liye ke ma su akkalemyeyuk ke newspaper la ma inge fwa sang me top nu ka. Sie me asor yok la ke pal se metu elos enenu na paye me kolyuk, met puspus elos srunga in eis me kasru ku me kolyuk inge.
Nunak Lasr nu ke Ku
3. Ke inkanek fuka met Kristian in century se meet elos akkalemye la elos tia akpusiselyelos nu ke inkanek sufwal su tuku ke ku lun met kol puspus?
3 In oana met Kristian, kut akkalemye nunak su tia oana sie nu ke nunak lun met puspus lun fwalu. Kut tia oru kutena ma su sapkinyuk nu sesr a kut tia kusensiyuk ka. Ke luma su tia oana sie, ke pal puspus kut srunga in akpusiselye kut nu ke ma lungse lun met saye fwinne oasr mwal a ku lalos. Kain in oiya inge el orek pa sin met Kristian in century se meet. Ke sie me pupulyuk, ke pal se met sap elos sapkinyuk in tui in fwakak peng mwo, elos tia sangeng ku fuleak ke ma met tol a met kol puspus su wi ke u lun met puspus ke Sanhedrin elos sapkin. Elos tia fwasr liki oiya a akwuk mwo a fwal tu elos fwa ku in insese nu ke ku lun metu.—Ridi Orekma 5:27-29.
4. Me srikasrak puspus fuka ke Baibel el akkalemye la met kulansap puspus lun God elos tia insese nu ke ma lungse lun met puspus?
4 Oasr met kulansap puspus lun God meet liki pal lun Jisus elos akkalemye pa kain in oiya inge. Ke sie me pupulyuk, Moses “el srangesr in pangonyuk el mwen nutin an natul Fero, tu el nunku tu keok yurin met lun God,” fwinne in oru ma inge el ku in purakak “mulat lun togusra.” (Hibru 11:24, 25, 27) Josef el lain a kaengla liki lungse koluk lun mutan kiyel Potifar, fwinne el etu la oasr ku lal in akkolukyel. (Genesis 39:7-9) Daniel el “papu insiel tu lan tia sifwana akfokfokyel ke me mongo eueu lun togusra,” fwinne ma el lungse oru inge tia fusrasr nu sin leum lun met yunuk lun Babulon in akos. (Daniel 1:8-14) Me srikasrak puspus inge akkalemye la, in pal meeta, met kulansap lun God elos tu na ku ke ma sumwosmwos, fwinne oasr kutena ma su ku in sikyak nu selos. Elos tia akos ma lungse lun kutena met in eis me insemwomwo lalos. Lela kut in tia pa oru.
5. Fuka nunak lasr nu ke ku el tia oana sie ke nunak lun met puspus?
5 Oiyen pulaik lasr in tu na ku el tia oana oiyen likkeke; ku kut tia oana kutu met su oru orekma in lain in akkalemye la elos tia insese nu ke akwuk lun politic. A, kut lungse in akos a orekmakin ku lun Jeova liki kutena kain in ku lun metu. Fwin masap lun met el lain masap lun God, kut etu na paye la piya sulela lasr nu ka. In oana ke met sap puspus in century se meet elos oru, kut fwa oru oayepa in akos God yok liki metu.
6. Efu ku mwo pal nukewa kut in akos masap lun God?
6 Mea fwa kasre kut in akpusiselye kut sifwana nu ke ku lun God? Kut ku in insese nu ke oiya su akkalemyeyuk in Soakas 3:5, 6: “Lulalfongi Jeova ke insiom kemwa, a tia fungla nu ke etauk lom sifwana. Kom fwakulak inkanek lom nu kemwa, a El fwa akkalemye inkanek lom.” Kut lulalfongi la ma nukewa su God el sapkin nu sesr fwa akinsemwomwoye kut pal nukewa. (Ridi Duteronomi 10:12, 13.) Aok, Jeova el akkalemyel sifwana nu sin met Israel oana El “su luti nu sum ma kom fwa insemwomwo ka, su kol kom ke inkanek su fwal tu kom in fwasr we.” A el fwak pa: “O ke kom in nu porongo masap luk! Na misla lom oana sie infwal, a sumwosmwos lom oana noa in mwea.” (Isaia 48:17, 18) Kut lulalfongi kas nukewa inge. Kut insese ka la oasr me insemwomwo yok nu sesr kut fwin akos masap lun God.
7. Mea kut enenu in oru kut fwin tia kalem ke sie masap su akkalemyeyuk ke Kas lun God?
7 Kut akpusiselye kut nu ke ku lun Jeova a aksol fwinne kut tia kalem na paye ke sripe lun kutu masap su akkalemyeyuk ke Kas lal. Kain in lulalfongi inge tia fwal in nunkeyuk nu ke ninukin lasr; tusruktu pa inge lulalfongi paye a sumwos. Kain in lulalfongi inge el akkalemye la kut lulalfongi na paye la Jeova el etu ma mwo nu sesr. Akosten lasr el sie me akkalemye oiyen lungse lasr, meyen met sap Jon el simusla: “Tu pa inge lungse lun God, tu kut in liaung masap Lal.” (1 Jon 5:3) Tusruktu oasr pa sie kain in oiya lun akosten lasr su kut tia enenu in mulkunla.
Akpaye Ku Lasr in Orekmakin Nunak
8. Fuka “ku lasr in orekmakin nunak su eis akpa mwo” el kupasr nu ke orekma lasr in akilen ku lun Jeova?
8 Baibel el akkalemye nu sesr la kut enenu “ku lasr in orekmakin nunak su eis akpa mwo ka a in ku in akilen ma mwo a ma koluk.” (Hibru 5:14, NW) Ke ma inge, akwuk su kut lungse in oru pa in akos masap lun God tia ke sripen pa inge ma sapkinyuk nu sesr kut in oru a kut tia nunku yok ka; mo tia oinge, a kut lungse in oasr ku lasr in “akilen ma mwo a ma koluk” fwal nu ke akwuk lun God. Kut lungse in liye etauk ke inkanek nukewa lun Jeova, in oru kut in fwak pa ma met sim lun sam el fwak: “Masap Lom on insiuk.”—Sam 40:8.
9. Fuka kut ku in akmwoye conscience lasr in fwal nu ke akwuk mwomwo lun Jeova, a efu ku yok sripe kut in oru ma inge?
9 In etu a akilen saokiyen masap lun God oana met sim lun sam el oru, kut enenu in sifwilpa nunku yok ke ma kut ridi tari in Baibel. Ke sie me pupulyuk, kut fwin lotela ke sie masap lun Jeova, kut ku in siyuk: ‘Efu ku masap se inge ku akwuk mwomwo inge el mwo? Efu ku oasr me kasru yok ka fwin Nga akos ma inge? Kain in ma koluk fuka sikyak nu selos su pulesru kas in kai lun God?’ Fwin conscience lasr el fwal nu ke inkanek puspus lun Jeova, paye la kut ku in oru sulela lasr su fwal nu ke ma lungse lal. Kut ku in “etu mea lungse lun Jeova” a akpayeye ma inge ke inkanek in akosten lasr. (Efesus 5:17) Ma inge tia fusrasr pal nukewa.
Setan el Suk Inkanek in Akkolukye Ku lun God
10. Piya sie inkanek su Setan el suk in akkolukye ke ku lun Jeova?
10 Setan el suk inkanek in akkolukye ku lun God ke lusen pal loeloes. Oiyen sukosok lal akkalemyeyuk ke inkanek puspus. Ke sie me pupulyuk, nunku akmwoye la fwin wangin akkalemyeyen sunak nu ke akwuk lun God nu ke marut ku moul lun payuk. Kutu mokul a mutan elos oru sulela lalos in tukeni muta fwinne elos tia payuk, a oasr kutu met payuk elos lungse in orala lemlem in aksafyela moul in payuk lalos. Met puspus inge elos ku in insese nu sin sie actress su pengpeng a eteyuk su fwak: “Akwuk in payuk nu sin sie met el tia ku in orek nu sin mokul a mutan.” El fwak pa: “Nga nukin kutena met su oaru a paye nu sin mokul ku mutan kiyel.” Oasr sie actor su pengpeng su nunku pa ke moul in payuk lal su tia mwo el fwak oinge: “Nga nukin fwin pa inge oiya su fwal nu sesr kut in payuk nu sin sie mokul ku mutan ke lusen moul lasr na fon.” Paenang kut enenu in siyuk sesr sifwana, ‘Ya Nga orekmakin ku lun Jeova ke akwuk lun payuk, ku nunak lun met puspus ke oiyen moul in payuk la ma inge el fwal nu ke kitin pal na a tia ke pal nukewa el akkolukye nunkuk?’
11, 12. (a) Efu ku upa nu sin met fwusr puspus in akos ku lun Jeova? (b) Akkalemye sie experience su akkalemye ke fwako koluk su tuku ke orekma in seakos masap a akwuk mwomwo lun Jeova.
11 Ya kom sie met fwusr su wi ke u lun Jeova? Fwin aok, Setan el lungse kom in nunku yok mu ku lun Jeova el tia me akinsemwomwoye kom. “Lung koluk lun met fwusr” a me akkoluk su tuku sin met asrouki lom ku in oru kom in nunku mu masap lun God el arulana upa in akpayeye. (2 Timote 2:22) Nik kom lela ma inge in sikyak. Kom ku in kafweang in liye ke inkanek lalmetmet a ke mwoiyen masap lun God. Ke sie me pupulyuk, Baibel el akkalemye nu sum in “kaengla liki kosro.” (1 Korint 6:18) In sramsramkin oiya se inge, kom ku in sifwil siyuk sum sifwana kusensiyuk puspus inge: ‘Efu ku masap se inge el mwo? Fuka akosten luk nu ke masap inge fwa akinsemwomwoye yu?’ Saap kom etu ke kutu met su pulesru kas in kasru lun God a elos pulakin fwako koluk puspus su sikyak ke ma koluk inge. Ya elos insemwomwo na paye ke pal inge? Ya oasr moul mwomwo lalos sayen moul su elos engankin ke elos asrouki nu sin u lun Jeova? Ya elos koneak inkanek mwomwo in pulakin kutena me insemwomwo su met kulansap puspus lun God elos tia ku in koneak?—Ridi Isaia 65:14.
12 Loang akmwoye nu ke ma Sharon sie mutan Kristian el fwak ke kutu pal somla: “Ke sripen Nga tia akos masap lun Jeova, paenang nga eis kain in mas upa inge su pangpang AIDS. Nga esam pal nukewa ke yea puspus su Nga insemwomwokin in kulansapu Jeova.” El akilen la oasr sie ma tafongla yok su el orala ke el kunausla masap lun God a tokin ma inge el enenu in akilen ke yok sripaiyen ma inge. Masap lun Jeova el ku in karungin kut na paye. Sharon el mise tokin wik itkosr ke el simusla kas su el akkalemye lung inge. In oana ke ma upa su sikyak nu sel el akkalemye, la wangin kutena ma mwo Setan el ku in sang nu sin met nukewa su wi ke akwuk koluk lun fwal se inge. Oana “papa tuman ma kikiap,” el orala mwulela puspus, tusruktu el tia akpayeye ma inge oana ke ma el oru nu sel If. (Jon 8:44) Aok, arulana mwo pal nukewa in akos ku lun Jeova.
Karungin Kut Liki Oiya lun Sukosok
13. Mea sie oiya su kut enenu in karungin kut liki ke oiya lun sukosok?
13 Orekma lasr in akos ku lun Jeova, oasr ma eneneyuk nu sesr in karungin kut liki oiya lun sukosok. Inkanek in oiyen fulang el ku in oru kut in nunku mu kut tia enenu me kasru ku kolyuk lun kutena met. Ke sie me pupulyuk, kut ku in lain kas in kasru lun met su liaung met kulansap puspus lun God. God el orala akwuk mwomwo ke el orekmakin sie u lun met kulansap oaru a lalmetmet in akola me mongo lun ngun ke pal fwal. (Mattu 24:45-47) Kut enenu in inse pusisel in akilen la pa inge inkanek su Jeova el orekmakin in sang karungin met kulansap nukewa lal ke pal inge. Mwo kut in etawi met sap oaru nukewa. Ke pal se oasr met tuma lutlut puspus elos aktukulkulyeyuk, Jisus el siyuk sin met sap puspus: “Ya komwos lungsumwos pa in som?” Piter el topuk nu sel: “Leum, kut fwa som nu yurin su? Kas lun moul ma patpat oasr yurum.”—Jon 6:66-68.
14, 15. Efu ku kut enenu in akpusiselye kut nu ke kas in kai lun Baibel?
14 Oasr ma eneneyuk nu sesr in orekmakin kas in kasru su fwal nu ke Baibel kut fwin akos ku lun Jeova. Ke sie me pupulyuk, met kulansap oaru a lalmetmet elos kaifwe kut pal nukewa in “tia motul a kut in sano a efwal.” (1 Tessalonika 5:6) Kain in kas in kasru inge el arulana fwal nu ke len safla inge su oasr met puspus su “sifwana lungselos, lungse mani.” (2 Timote 3:1, 2) Ya kain in oiya inge ku in kufusla nunak a oiyesr? Aok. Kut fwin kafweang in akpayeye akwuk puspus su tia kupasr nu ke orekma in kulansap lasr nu sin God su ku in oru kut in tui in nunku akmwoye ke fototo lasr nu sin God, ku kut fwa ku in akkalemye pa kain in oiya su lungse ma puspus lun fwalu. (Luk 12:16-21) Ke ma inge, arulana mwo kut in eis a orekmakin kas in kasru lun Baibel a in tia moulkin moul in akinsemwomwoye kut sifwana su arulana pengpeng ke fwal lun Setan inge!—1 Jon 2:16.
15 Met elder puspus su srusrngiyuki nu ke congregation puspus elos akkalemye nu sesr me lutlut mwomwo su ku in akkeye lulalfongi lasr su tuku sin met kulansap oaru a lalmetmet. Baibel el kaifwe kut: “Komwos in akos met kol lomwos, a akpusiselye komwos nu selos, tu elos sano nu ke ngunumwos, oana elos su fwa fwakak orekma lalos; tu elos fwa ku in fwakak ke engun, a tia ke asor; tu ma inge tia mwo nu sumwos.” (Hibru 13:17) Ya ma inge kalmekin la met elder elos tia ku in oru kutena ma sito ku ma tafongla? Mo tia oinge! God el liye orekma sesumwos lalos ke inkanek kalem liki na kutena met elos ku in liye. Ne oinge el tupan kut in akpusiselye kut nu selos. Kut fwin akos akwuk lun met elder puspus, fwinne elos sesumwos, ku in sang me akpayeye nu ka la kut akos ku lun Jeova.
Yok Sripaiyen Inse Pusisel
16. Fuka kut ku in akkalemye sunak nu sin Jisus oana Sifwen congregation lun met Kristian?
16 Lela kut in esam pal nukewa la Jisus pa Leum ku Sifwen congregation. (Kolosse 1:18) Pa inge sie sripe fwal su paenang kut in akpusiselye kut nu ke akwuk lun met elder, a akkalemye nu selos in “arulana akfulatyelos in lungse, ke orekma lalos.” (1 Tessalonika 5:12, 13) Aok, met elder ke congregation elos ku in akkalemye la elos inse pusisel pa ke elos arulana taran in akkalemye nu sin congregation kas lun God, tia nunak lalos sifwana. Elos tia akkalemye nunak lalos sifwana paenang elos “tia alukela liki ma simusla.”—1 Korint 4:6.
17. Efu ku oiyen inse fulat el arlana sensen?
17 Met nukewa ke congregation elos enenu in etu ke me sensen su tuku ke orekma in suk mwolena lalos sifwana. (Soakas 25:27) Kalem la, ma inge el sie me sruf nu sin sie met tuma lutlut su met sap Jon el sun. El simusla: “Diotrefis su lungse in akfulatyel sifwana in maslolos, el tia eis kut. Ke ma inge, nga fwin tuku, nga fwa akesmakinye orekma lal su el oru in kaskas koluk lain kut.” (3 Jon 9, 10) Oasr me lutlut yok su kut ku in lotela ka fwinne ke pal inge. Oasr sripe mwomwo lasr in kunausla kutena kain in nunak sesumwos su kut ku in liye oasr in kut. Baibel el akkalemye nu sesr: “Fulang fwasr meet liki kunausten, a sie inse fulat meet liki putatla.” Elos nukewa su akos ku lun God enenu in lain me sruf ke oiyen fulang, meyen ma inge ku in kol nu ke kunausten.—Soakas 11:2; 16:18.
18. Mea fwa ku in kasre kut in akos ku lun Jeova?
18 Aok, orala niyen sun lom in lain ngun lun fwalu ke oiyen lungse in sukosok a in akos ku lun Jeova. Pal nukewa, nunku akmwoye ke kunokon yok lom in oru orekma in kulansap nu sin Jeova. Ke sripen kom sie sin met kulansap lun God, ma inge el sie me akpayeye la el kasre kom ke inkanek lun ngun mutal lal. (Jon 6:44) Nikmet nunku mu tia yok sripe fototo lom nu sin Jeova. Kafweang in akkalemye ke moul lom la kom srunga a pulesru kain in oiya lun sukosok a kom akos ku lun Jeova.
Ya Kom Esam?
• Mea eneneyuk nu ke orekma lasr in akos ku lun God?
• Fuka orekma in akpaye ku lasr in orekmakin nunak el kupasr nu ke orekma lasr in akos ku lun Jeova?
• Ke inkanek puspus fuka Setan el srike in akkolukye ku lun God?
• Efu ku inse pusisel el yok sripe nu ke orekma lasr in akos ku lun Jeova?
[Picture on page 18]
“Kut enenu in akos God yok liki metu”
[Picture on page 20]
Arulana mwo pal nukewa in akos masap a akwuk nukewa lun God