“Karungin Komwosyung in Lungse lun God”
“A karungin komwosyung in lungse lun God, a tupan pakomuta lun Leum lasr Jisus Kraist, nu ke moul ma patpat.”—JUD 21.
1, 2. Fuka Jeova el akkalemye lungse lal nu sesr? A kut etu fuka la el tia sruok kuti na pal nukewa ke lungse lal?
JEOVA GOD el akkalemye lungse lal nu sesr ke inkanek puspus su kut tia ku in oekla. Wangin alolo ka la, me akpayeye yok emeet la Jeova el lungse kut pa ke me kise lun lango. Lungse lal nu sin metu arlana yok paenang el supwema Wen kulo natul nu fwalu in mise kesr. (Jon 3:16) Jeova el orala ma inge meyen el lungse kut in moul ma patpat, a el lungse kut pa in eis me insemwomwo ke lungse lal ma patpat!
2 Tusruktu, ya paye la Jeova el fwa sruok kuti na ke lungse lal fwinne kutena ma kut sulela in oru? Mo. Meyen in Jud fus 21, kut rid kas in kaifwe inge: “A karungin komwosyung in lungse lun God, a tupan pakomuta lun Leum lasr, Jisus Kraist, nu ke moul ma patpat.” Kas se inge “karungin komwosyung in lungse lun God” kalmekin la oasr kutu orekma su eneneyuk kut in oru. Ke ma inge, mea kut enenu in oru tu kut in muta na in lungse lun God?
Fuka Kut Ku In Muta Na in Lungse lun God?
3. Mea Jisus el fwak su kasrel na paye in muta na in lungse lun Papa tumal?
3 Kut ku in koneak me top ke kusensiyuk se inge ke kas lal Jisus sifwana, el kaskaskin ke fong safla lun moul lal fwin fwalu. El fwak: “Komwos fwin liaung ma sap luk, komwos fwa muta na in lungse luk, aok oana Nga liaung ma sap lun Papa Tumuk, a muta na in lungse lal.” (Jon 15:10) Oana fus se inge el akkalemye, Jisus el etu la in liaung masap lun Jeova arlana eneneyuk in sruokye sie oiya mwomwo nu sin Papa tumal. Ingena, fwin ma inge paye nu sin Wen nutin God su sumwosmwos, ya ma inge fwa tia paye pa nu sesr?
4, 5. (a) Mea inkanek se meet kut ku in akkalemye la kut lungse Jeova? (b) Efu ku tia mwo kut in nunku in tia akos masap lun Jeova?
4 Yok liki nukewa, kut akkalemye la kut lungse Jeova ke kut aksol. Met sap Jon el akkalemye ma inge ke inkanek inge: “Tu pa inge lungse lun God, tu kut in liaung masap lal; a masap lal tia toasr.” (1 Jon 5:3) Paye, met puspus ke pal inge elos srunga in akos kutena met. Tusruktu, loang akmwoye nu ke polo kas inge: “A masap lal tia toasr.” Jeova el tia siyuk kut in oru ma se su arlana upa nu sesr.
5 Ke sie me pupulyuk: Ya kom fwa siyuk sin sie met kawuk lom in us ma se su kom etu la arlana toasr elan srukak? Paye la kom tia oru ma inge! Jeova el kulang liki kut a oasr etauk yok lal ke ma kut tia ku in oru. Baibel el akkalemye nu sesr la Jeova el ‘esam tu kut kutkut.’ (Sam 103:14) El tia siyuk sesr yok liki ma kut ku in oru. Ke ma inge tia mwo kut in nunku in pulesru masap lun Jeova. Ke inkanek saye, kut akilen la akosten lasr nu sin Jeova el sie pal mwomwo nu sesr in akkalemye nu sin Papa tumasr in kosrao la kut lungsel na paye a kut lungse pa in karungin kut in lungse lal.
Sie Me Sang Mwomwo su Tuku Sin Jeova
6, 7. (a) Mea se inge conscience? (b) Sang me pupulyuk la fuka conscience ku in sang kasru in karungin kut ke lungse lun God.
6 Ke fwal se inge su kut oasr ka, kut enenu in akkalemye la kut lungse in akos God ke sulela nukewa su kut oru. Kut etu fuka la sulela nukewa su kut oru el fwal nu ke ma lungse lun God? Jeova el ase nu sesr sie me sang su ku in kasre kut yok in akpayeye akosten lasr nu sel. Me sang se inge pa conscience ku nunak a ella lasr. Mea se inge conscience? Ma inge el ma se su oasr in kut su ku in etu fwin orekma lasr el mwo ku koluk. Ma inge ku in nununke kut, oru kut in tuni akmwoye ke sulela nukewa kut sun ke moul ku in akkalemye orekma nukewa su kut oru tari a in tuni ma inge nukewa fwin ma mwo ku ma koluk.—Ridi Rom 2:14, 15.
7 Ke inkanek fuka conscience lasr ku in kasre kut? Nunku ke me pupulyuk inge. Ke sie fong su kom fwufwasyesr fwin eolu a arlana losr. Oasr luf puspus su loal a eot lulap su ku in aktukulkulye kom, a ku in oru kom in putatla nu ten. Ne ouinge, kom etu la piya ka an mwo kom ku in fwasr we. Efu? Meyen kom orekmakin tengki se nutum su sang tolak nu ke inkanek lom. Paye la fwin wangin tengki nutum moul lom oasr na paye ke me sensen. Ke inkanek ouinge, sie met su wangin conscience mwomwo el tia ku in orala sulela mwo ke oiyen moul nasnas, ke ma mwo a ma koluk pal nukewa ke moul lal.
8, 9. (a) Mea kut enenu in sruokye ke nunak lasr ke ma conscience lasr ku in oru? (b) Mea kut ku in oru in etu na paye la conscience lasr ku in kasre kut na paye?
8 Tusruktu, ella ku nunak lasr oasr pal el tafongla. Efu? Lela kut in sifwilpa nunku ke me pupulyuk ke tengki. Fwin battery ke tengki nutasr munasla tari, el tia ku in sang tolak inkanek lasr. Oiya se inge ku pa in sikyak ke nunak a ella lasr kut fwin tia na lutlutkin kas lun God, kut tia ku in akilen ma tia oana sie inmasrlon ma koluk a ma mwo. (Sam 119:105) Oayepa, kut fwin tia tulokinye kena koluk lun insiesr in kufusla sulela lasr ma inge ku in akkolukye conscience lasr. Baibel el akkalemye nu sesr la “inse kutasrik yok liki ma nu kemwa, a arulana koluk.” (Jeremaia 17:9; Soakas 4:23) Sie me asor yok, meyen oasr met puspus ke pal inge elos lungse na in akpayeye kena koluk lun insielos a elos tia loang akmwoye ke akwuk sumwosmwos su oasr ke Kas lun God. (Ridi Efesus 4:17-19.) Pa inge sripe paenang oasr met puspus, fwinne oasr nunak a ella su itukyang nu selos, tusruktu elos srakna oru kain in ma koluk puspus.—1 Timote 4:2.
9 Kut enenu in sulela in tia ouinge! A, kut in tafwela in lela Kas lun God in luti a sang akpa nu ke conscience lasr tu ma inge ku in me kasru na paye nu sesr. Kut enenu in loang nu ke conscience lasr su akpayeyuk fwal nu ke akwuk mwomwo lun Baibel a tia lela nunak lasr sifwana in kol ma inge. Ke pal sepana inge, kut enenu in kafweang in akkalemye sunak ke conscience lun met lili Kristian mokul a mutan wiyesr. Kut kafweang yok pal nukewa in tia aktukulkulyelos, esam pal nukewa la conscience lun met lili wiyesr el fusrasr in akngalyeyuk ku aktukulkulyeyuk yok liki conscience lasr.—1 Korint 8:12; 2 Korint 4:2; 1 Piter 3:16.
10. Mea oiya tolu lun moul kut fwa akuteye ingena?
10 Lela kut in akuteye ingena oiya tolu lun moul su kut ku in akkalemye ke lungse lasr nu sin Jeova ke inkanek lun akosten. Aok, ke oiya tolu nukewa inge, conscience lasr el weang nu ka, tusruktu tu ma inge ku in sang me kasru mwomwo nu sesr, conscience lasr enenu in kolyuk ke akwuk sumwos lun Baibel ke oiya mwo. Oasr inkanek tolu su kut ku in akkalemye la kut lungse Jeova a aksol: (1) Kut lungse met nukewa su Jeova el lungse, (2) kut akkalemye sunak nu ke ku, a (3) kut kafweang in nasnas ye mutan God pal nukewa.
Lungse Met Nukewa Su Jeova El Lungse
11. Efu ku kut enenu in lungse met nukewa su Jeova el lungse?
11 Ma se meet, kut enenu in lungse met nukewa su Jeova el lungse. Ke oiyen asrouki nu sin sie sin sie, metu elos oana sponge puspus. Kut sruokye kutena ma su raunekutla. Met Orekutla el etu na paye la me asrouki lasr ku in me sensen nu sesr a ku pa in me kasru yok nu sesr. Ke ma inge, el ase nu sesr kas in kasru mwomwo inge: “Fwufwasryesr yurin met lalmetmet, a kom fwa lalmetmet, a el su wi met lalfon fwa ngal ka.” (Soakas 13:20; 1 Korint 15:33) Wangin kutena met lungse in “ngal ka.” Kais sie sesr lungse in “lalmetmet.” Jeova el lalmetmetlana, wangin kutena met su ku in akkolukye oiya mwomwo lal. Tusruktu, el akkalemye me srikasrak mwomwo nu sesr ke kut oru orekma in sulela met kut asrouki nu se. Nunku ke kitin pal, su ka Jeova el sulela in met kawuk lal?
12. Kain in kawuk fuka Jeova el sulela?
12 Jeova el sramsramkunul Ebream oana “met kawuk luk.” (Isaia 41:8) Mokul se inge el sie me srikasrak mwomwo ke lulalfongi, sumwosmwos, a akosten, el moulkin moul fwal nu ke lulalfongi lal nu sin God. (Jemes 2:21-23) Pa inge kain in kawuk su Jeova el sulela. El lungse in kawuk nu sin met mwomwo ke pal inge. Fwin Jeova el sulela kain in kawuk inge, arlana yok sripe pa kut in sulela ouinge, tu kut in fwufwasryesr yurin met lalmetmet a kut in lalmetmet pa.
13. Ke orekma in sulela met kawuk, mea ku in kasre kut in orala sulela mwomwo?
13 Mea ku in kasre kom in orala sulela mwomwo lom ke ma inge? In lutlutkin me srikasrak lun Baibel ku in me akkeye. Nunku akmwoye ke oiyen kawuk inmasrlol Rut a nine kiyen mokul tumal Neomi, inmasrlol Devid a Jonetan, ku inmasrlol Timote a Poul. (Rut 1:16, 17; 1 Samuel 23:16-18; Filippai 2:19-22) Elos met kawuk fototo ke sripe yok se meet inge: Ma inge fwal nu ke lungse paye lalos nu sin Jeova. Ya kom ku in koneak kawuk su lungse Jeova oana lungse lom nu sel? Aok kom ku in koneak kain in met kawuk mwomwo inge ke congregation lun met Kristian. Kain in met kawuk inge elos tia kaifwe kom in oru kutena ma su fwa aksupwarye Jeova. A, elos fwa kasre kom in akos Jeova, in fototo nu sel, a in taknelik orekma mwomwo nukewa nu sin God. (Ridi Galetia 6:7, 8.) Elos fwa kasre kom in muta na in lungse lun God.
Akkalemye Sunak Nu Ke Ku
14. Ma puspus fuka orala in upa nu sesr in akkalemye sunak nu ke ku?
14 Inkanek akluo kut ku in akkalemye lungse lasr nu sin Jeova pa ke ku. Kut enenu in akkalemye sunak nu ke ku. Efu ku arlana upa nu sesr in oru ma inge kutu pal? Ke sie sripe, metu su oasr mwal a ku elos met sesumwos. In wekunang ka, kut sifwana met sesumwos. Kut kafweang in lain kena lasr in lain.
15, 16. (a) Efu ku arlana yok sripe nu sesr in akkalemye sunak nu sin met su Jeova el sang ku in karungin met lal? (b) Me lutlut saok fuka kut ku in lotela ke nunak lun Jeova ke orekma in tunyuna lun met Israel lainul Moses?
15 Ke ma inge, saap kom nunku a siyuk, ‘Fwin ma inge arlana upa nu sesr in akkalemye sunak ke ku fulat, efu ku kut enenu in oru ma inge?’ Me top nu ka pa weang ke kusensiyuk ke sumwos lun God in kol. Su ka fwa kom sulela oana met kol lom? Kut fwin sulela Jeova oana Met Kol lasr, kut enenu in akkalemye sunak ke ku lal. Fwin kut tia oru, ya kut ku in pangnol na paye la el pa Met Kol lasr? Sayen ma inge, Jeova el orekmakin ku lal pal nukewa ke inkanek lun met sesumwos su el sang kunokon in karungin met lal. Kut fwin lain met nukewa inge, mea nunak lun Jeova ke orekma lasr inge?—Ridi 1 Tessalonika 5:12, 13.
16 Ke sie me pupulyuk, ke pal se met Israel elos torkaskas a lainul Moses, Jeova el nunku orekma in lain lalos oana el pa lainelos. (Oekyuk 14:26, 27) God el tia ekyek. Kut fwin lain met su God el srusrngiye in kol kut, kalmen ma inge pa kut lainul pa!
17. Kain in nunak sumwos fuka kut enenu in kafweang in akkeyeyuk nu sin met liuang nukewa ke congregation?
17 Met sap Poul el akkalemye ke nunak sumwos in akkeye nu sin met su oasr kunokon ke congregation lun met Kristian. El simusla “Komwos in akos met kol lomwos, a akpusiselye komwos nu selos, tu elos sano nu ke ngunumwos, oana elos su fwa fwakak orekma lalos; tu elos fwa ku in fwakak ke engun, a tia ke asor, tu ma inge tia mwo nu sumwos.” (Hibru 13:17) Arlana paye la kut enenu in kafweang yok in akkeye kain in oiyen akosten a pusisel. Esam la, kut orekma in muta na in lungse lun God. Ya niyen sun inge tia fwal kafweang yok lasr nukewa?
Kafweang in Nasnas Ye Mutan Jeova Pal Nukewa
18. Efu ku Jeova el lungse kut in kafweang in nasnas?
18 Inkanek aktolu kut akkalemye lungse lasr nu sin Jeova pa kut kafweang in nasnas ye mutal. Papa a nine elos orekma upa in etu na paye la tulik natulos elos nasnas. Efu? Ke sie sripe, oiyen nasnas arlana eneneyuk nu ke moul a mano fokoko lun tulik. Sayen ma inge, sie tulik su nasnas sang mwolana nu sin sou, a akkalemye ke lungse a karungin yok lun papa a nine nu sel. Ke sripe sepana inge, Jeova el lungse kut in nasnas. El etu la nasnas el arlana yok sripe ke oiyen moul lasr. El etu pa la nasnas lasr sang mwolana nu sin Papa tumasr in kosrao. Ma inge arlana yok sripe, tu metu ku in lungse in kulansap nu sin God meyen elos liye a akilen la kut tia oana sie nu sin met lun fwal fokfok inge.
19. Kut etu fuka la nasnas in mano el arlana yok sripe?
19 Ke inkanek puspus fuka kut enenu in kafweang in nasnas? Aok, ke inkanek nukewa lun moul lasr. In an Israel in pal meeta, Jeova el orala kalem nu sin met lal la nasnas in mano arlana eneneyuk. (Livitikus 15:31) Weang ke Masap lal Moses pa masap in aknasnasye alu, wonla pau, nie, a nuknuk, a in pukinye a afwunye ma fwasr lukelos. (Exodus 30:17-21; Livitikus 11:32; Oekyuk 19:17-20; Duteronomi 23:13, 14) Met Israel elos akesmakinyeyuk la God lalos, Jeova el mutal, su kalme pa el “nasnas,” a “wangin kutena ma koluk yurol.” Met kulansap nukewa lun God mutal inge elos enenu in mutal pa.—Ridi Livitikus 11:44, 45.
20. Ke inkanek fuka kut enenu in nasnas pal nukewa?
20 Ke ma inge, kut enenu in nasnas ke manosr a ke insiesr. Kut kafweang in oru nunak lasr in nasnas. Kut oaru in orekmakin masap nukewa lun Jeova ke oiyen moul nasnas, fwinne met puspus elos lungse in moulkin moul fokfok yen nukewa fwalu nufon. Yok sripe nukewa, kut kafweang in oru alu lasr in nasnas, fwasr liki kutena me akkoluk lun alu kikiap. Kut tia mulkunla kas in sensen su simusyukla in Isaia 52:11: “Komwos som, komwos som, komwos fwasr liki an ingo, nikmet kaliye kutena ma tia nasnas; komwos som liki in maslol, aknasnasye komwos.” Ke pal inge, kut oru alu lasr in nasnas ke inkanek in tia oru kutena ma ke alu kikiap. Ke sie me pupulyuk, kut enenu in etu na paye la kut tia wi ke me akfulat nukewa lun alu a me akfulat puspus su arlana pengpeng ke pal inge fwin fwalu. Paye, sie ma upa in sruokye nasnas pal nukewa. Tusruktu met lun Jeova elos kafweang in oru ouinge meyen ma inge kasrelos in muta na in lungse lun God.
21. Fuka kut ku in etu na paye la kut fwa muta na in lungse lun God?
21 Jeova el lungse kut in muta na in lungse lal ma patpat. Tusruktu kais sie sesr enenu in etu na paye la kut oru ma nukewa in muta na in lungse lun God. Ma inge kut ku in oru ke kut fwasr tokin me srikasrak lun Jisus a akpayeye lungse lasr nu sin Jeova ke kut akos masap nukewa Lal. Kut fwin oru ouinge, kut ku in lulalfongi la wangin kutena “fwa ku in srikutla liki lungse lun God, su in Kraist Jisus Leum lasr.”—Rom 8:38, 39.
Ya Kom Esam?
• Fuka conscience lasr ku in kasre kut in muta na in lungse lun God?
• Efu ku kut enenu in lungse met nukewa su Jeova el lungse?
• Efu ku arlana yok sripe in akkalemye sunak nu ke ku?
• Efu ku arlana yok sripe oiyen nasnas nu sin met nukewa lun God?
[Picture on page 28]
“Komwos fwin liaung ma sap luk, komwos fwa muta na in lungse luk, aok oana Nga liaung masap lun Papa Tumuk, a muta na in lungse lal”