Oiya Mwomwo Puspus Su Kut Enenu In Akkeye

“Kafweang in fwasr tokin sumwosmwos, lungse yok nu sin God, lulalfongi, lungse, mongfusesr, [a] fwokpap.”​—1 TIMOTE 6:11, NW.

1. Sang me pupulyuk ke kalmeyen kas se inge “kafweang” in ukwe.

MEA kom nunku kom fwin long kas se inge “kafweang”? Saap kom nunku ke len lal Moses ke pal se un met meun lun an Ijipt elos “kafweang” ukwe in sruokye met Israel, a pa inge sripe su paenang elos sun me keok ke Mwea Srusra. (Exodus 14:23, NW) Ku saap kom esam ke me sensen su oasr yurin sie met fwin el uniye sie met ke inkanek in ninukin lal in an Israel. El enenu in silaklak som nu ke sie sin siti onkosr su orekla nu ke inkanek in molela . Fwin el tia, saap “met foloksak ke sra, ukwe met su uniye met sa ke insiel fwolak, a sonol meyen inkanek loesla a unilye.”​—Duteronomi 19:6, Tanakh.

2. (a) Kain in me sang fuka God el akkalemye nu sin kutu met Kristian elos in kafweang nu ka? (b) Kain in fwinsrak fuka Jeova el akkalemye nu sin met Kristian puspus ke pal inge?

² Ke me pupulyuk puspus su tia oana sie nu ke me pupulyuk su oasr in Baibel su akkalemyeyuk lung inge, srike nunku ke me kaifwe mwomwo su met sap Poul el simusla: “Nga akmwot [“kafweang,” NW] nu ke nien sun me sang lun pang fulat lun God in Kraist Jisus.” (Filippai 3:14) Baibel el akkalemye la oasr met Kristian akmusrala su piselos oasr ke 144,000, su Poul el wi ka, elos eis me sang ke moul in kosrao. Elos fwa welul Jisus Kraist ke Kolyuk lal ke lusen Tausan Sie Yea in liaung akwuk nukewa fwin fwalu. Sie niyen sun mwomwo pa inge nu sin met nukewa su suleyukla sin God in kafweang! Tusruktu, pus sin met Kristian paye ke pal inge, oasr fwinsrak, ku niyen sun saye lalos. Jeova el kulang in akkalemye nu selos ma Adam a If elos akwanginyela, su kalmekin la ma inge pa, in fwinsrak nu ke moul ma patpat a in oasr mano fukoko wangin mas ke sie paredais fwin fwalu.​—Fwakyuk 7:4, 9; 21:1-4.

3. Fuka kut ku in akkalemye kulo wi kas in kaksak lasr nu ke lung kulang lun God?

³ Met nukewa su sesumwos tia ku in eis moul ma patpat ke inkanek lun kafweang lalos in oru ma sumwos. (Isaia 64:6) In eis moul ma patpat fwa ku in akpayeyuk mukena ke inkanek sefwanna pa in filiye lulalfongi paye nu ke akwuk mwomwo lun God ke me molela lun Jisus Kraist. Mea kut enenu in oru in akkalemye kulo yok lasr nu ke lung kulang lun God? Sie ma su kut ku in oru pa in akos masap inge: “Kafweang in fwasr tokin sumwosmwos, lungse yok nu sin God, lulalfongi, lungse, mongfusesr, [a] fwokpap.” (1 Timote 6:11, NW) Orekma lasr in nunku yok ke kain in oiya mwomwo puspus inge fwa ku in kasru kais sie sesr in akkalemye lungse yok nu ke kafweang lasr in “yokyokelik nu ka.”​—1 Tessalonika 4:1.

“Kafweang in Fwasr Tokin Sumwosmwos”

4. Efu kut ku in lulalfongi la kafweang in fwasr tokin “sumwosmwos” el yok sripe, a mea sie met el enenu in oru meet in kafweang in fwasr tokin ma inge?

⁴ Ke leta luo lal nu sel Timote, met sap Poul el simusla ke oiya mwomwo puspus su eneneyuk nu ke kafweang mwomwo in orekmakinyuk, a ke kais sie pal el akkalemye ke oiyen “sumwosmwos” meet. (1 Timote 6:11; 2 Timote 2:22) Sayen ma inge, ke kutupa fus in Baibel el akkeye kut pal nukewa in kafweang in fwasr tokin sumwosmwos. (Soakas 15:9; 21:21; Isaia 51:1) Sie inkanek in oru ma inge pa in ‘eis etauk ke God paye mukefwanna, a Jisus Kraist su el supalma.’ (Jon 17:3) Kafweang in fwasr tokin sumwosmwos fwa akkeye sie met​—in auliyuk ke ma koluk lalos meet a in “forla” in oru ma lungse lun God.​—Orekma 3:19.

5. Mea kut enenu in oru in eis a in karungin pal nukewa ke oiyen sumwosmwos ye mutun God?

⁵ Million puspus su kafweang na paye in fwasr tokin ma sumwosmwos elos mwulela moul lalos nu sin Jeova a elos eis baptais. Fwin kom baptaisla ingena oana met Kristian, ya kom nunku ke ma paye la inkanek su kom moulkin moul, el fwal nu ke kafweang lom ke pal inge in fwasr tokin sumwosmwos? Sie inkanek kom ku in oru ma inge pa etauk lom su tuku ke Baibel la mea “ma mwo a ma koluk” ke pal nukewa su kom enenu in oru sulela lom. (Ridi Hibru 5:14.) Ke sie me pupulyuk, fwin kom sie sin met Kristian su oasr ke matwe fwal in payuk, ya kom orala tari sulela lom in tia oru kutena kain in oiya fototo nu sin sie met su tia met Kristian baptaisla se? Aok kom ku, fwin kom kafweang in fwasr tokin sumwosmwos.​—1 Korint 7:39.

6. Kafweang paye in fwasr tokin sumwosmwos el kalmekin nu ke mea?

⁶ In moulkin moul sumwosmwos el tia oana sie nu ke oiyen sumwosmwos ye mutom sifwana ku “sumwosmwos liki ma fwal.” (Ekklisiastis 7:16) Jisus el sang kas in sensen nu sesr in tia orek luma ke kain in sumwosmwos inge in oru kut in mwo liki met puspus saye. (Mattu 6:1) Aok, orekma in fwasr tokin sumwosmwos enenu in oasr ke inse​—su kalmekin nu ke oiya in aksumwosye nunak koluk, ella koluk lasr, a kena koluk lasr. Kut fwin kafweang in oru ma inge, ma inge fwa kasre kut in tia oru ma koluk upa. (Ridi Soakas 4:23; srike liye pa Jemes 1:14, 15.) Sayen ma inge, Jeova el fwa akinsemwomwoye kut a el fwa kasre kut ke kut kafweang in akkeye kutupa oiya mwomwo lun met Kristian.

“Kafweang in Akkalemye . . . Lungse Yok Nu sin God”

7. Mea se inge “lungse yok nu sin God”?

⁷ Lungse nu sin God el oasr ma eneneyuk nu sin met elos in mwulela moul lalos nu sel ka a in akkalemye oaru pal nukewa. Sie dictionary lun Baibel el akkalemye la kas Grik se su lungasyukla nu ke “lungse yok nu sin God” el akuteye nu ke “ella a oiya mwomwo in arulana taran in tia lela kutena ma in akmunasyela sangeng lasr nu sin God.” Met Israel elos tia akkalemye ke pal puspus kain in lungse inge, oana ma liyeyuk ke orekma in seakos lalos fwinne tokin God el aksukosokyelosla liki an Ijipt.

8. (a) Ma koluk su Adam el orala el orala kain in kusensiyuk fuka? (b) Fuka me top nu ke “ma lukma mutal” inge akkalemyeyuk?

⁸ Ke lusen yea tausan puspus tokin Adam el oru ma koluk, kusensiyuk se inge el soenna eis me top mwomwo nu ka, “Ya kutena met el ku in akkalemye lungse mwo a paye nu sin God?” Ke lusen century puspus, wangin kutena met el moulkin moul su akkalemye ke lungse mwo a paye nu sin God. Tusruktu, ke pal pakiyuki lal sifwana, Jeova el akkalemye me top nu ke “ma lukma mutal” se inge. El filiye moul lun Mwen kulo sefwanna natul in kosrao nu insiel Mary in oswela sie met sumwosmwos. Ke lusen moul lal fwin fwalu a ke mise lal ke inkanek upa su oasr me mwekin ka, Jisus el akkalemye la mea kalmen mwulela paye a arulana oaru nu sin God paye. Pre nukewa lal akkalemye sunak a lungse yok in alu nu sin Papa tumal in kosrao su kulang. (Mattu 11:25; Jon 12:27, 28) Ke ma inge, Jeova el kasrel Poul in kaskas ke lungse yok nu sin God ke el akuteye ke me srikasrak lun Jisus ke lusen moul lal.​—Ridi 1 Timote 3:16.a

9. Fuka kut ku in kafweang in akkalemye lungse yok nu sin God?

⁹ Ke sripen kut met sesumwos, panang kut tia ku in akkalemye lungse sumwosmwos nu sin God. Tusruktu kut ku in oru kafweang yok in akkalemye ma inge. Oasr ma eneneyuk nu sesr kut in kafweang in etawi ke me srikasrak lun Kraist. (1 Piter 2:21) Ke ma inge, kut tia oana sie nu sin met mwuosonkas puspus su oana ‘met srukye luman sumwosmwos, a lafwekin ku lun sumwosmwos insielos.’ (2 Timote 3:5) Ma inge tia kalme la lungse paye nu sin God el tia kupasr nu ke ate a luma ke likin metu. Oiye ku lumasr el eneneyuk nu ke lungse paye nu sin God. Ke sie me pupulyuk, kut fwin sulela sie nuknuk nu ke marut ku oru sulela la mea kut fwa nukom kut fwin som moli ma puspus, atesr a lumasr enenu in fwal nu ke ma kut fwak la kut “sunakin God.” (1 Timote 2:9, 10) Aok, kafweang lasr in akkalemye lungse yok nu sin God oasr ma eneneyuk nu sesr kut in orekmakin nu ke akwuk mwomwo lun God ke moul lasr len nukewa.

“Kafweang in Akyokye . . . Lulalfongi”

10. Mea kut enenu in oru nu ke lulalfongi lasr in fukoko?

¹⁰ Ridi Rom 10:17. In akkeye a karungin lulalfongi fukoko, sie met Kristian el enenu in sifwilpa nunku yok ke ma paye nukewa su arlana saok a oasr ke Kas lun God. “Met kulansap oaru a lalmetmet” elos orala me rid mwomwo puspus. Buk tolu inge su arulana mwo pa The Greatest Man Who Ever Lived (Met Su Yok Emeet Su Moul Ke Kutena Pal), Learn From the Great Teacher (Lutlut Ke Met Luti Lulap), a “Come Be My Follower (Fwasru Fwasr Tukuk Oana Met Tumuk Lutlut),” a oasr buk lulap puspus su orekla in kasre kut in eis etauk yok kel Kraist su kasre kut in etawel. (Mattu 24:45-47) U lun met kulansap inge elos orala pa akwuk nu ke meeting, assembly, a toeni lulap puspus, su me lutlut nukewa srumonyuk ka akkalemye yok “kas ke Kraist.” Ya kom liye kutena inkanek puspus su kom ku in orekmakin ma inge ke kom “loang akmwoye” nu ke akwuk nukewa inge su God el orala?​—Hibru 2:1.

11. Pre a akos lasr el sang kasru fuka nu ke kafweang in akyokye lulalfongi lasr?

¹¹ Pre el sie pa me kasru in akkeye lulalfongi lasr. Oasr pal se su met tuma lutlut lun Jisus elos siyuk sel: “Leum, akyokye lulalfongi lasr.” Kut ku in inse pusisel in siyuk pa ma inge nu sin God. (Luk 17:5) In akyokye lulalfongi lasr, kut enenu in pre siyuk ke kasru lun ngun mutal lun God; lulalfongi el sie “fwako lun ngun.” (Galetia 5:22) Sayen ma inge, orekma lasr in akos masap nukewa lun God el akkeye lulalfongi lasr. Ke sie me pupulyuk, kut ku in orekmakin pal yok lasr in wi pal nukewa ke orekma in sulkakin a luti peng mwo. Ma inge fwa oru kut in pulakin me insemwomwo yok. A ke kut nunku ke me insemwomwo puspus su tuku ke orekma in “suk meet togusrai lun [God] a ma sumwosmwos lal,” lulalfongi lasr fwa yokyokelik.​—Mattu 6:33.

“Kafweang in Akkalemye . . . Lungse”

12, 13. (a) Mea masap sasu lun Jisus? (b) Ke inkanek yok sripe puspus fuka kut enenu in kafweang in etawi kain in lungse su oana lungse lun Kraist?

¹² Ridi 1 Timote 5:1, 2. Poul el akkalemye ke kas in kasru mwomwo la fuka met Kristian elos ku in akkalemye lungse nu sin sie sin sie. Lungse yok lasr nu sin God el oru kut in akkalemye akos nu ke masap sasu lun Jisus in “lungse sie sin sie” oana ke oiya se su el lungse kut ka. (Jon 13:34) Met sap Jon el akkalemye sumwos kas inge: “A kutena met su oasr me kasrup lun fwalu yurol, a el liye enenu lun met lel, a el srungilye pakomuta insiel lukel, na fuka lungse lun God on in el?” (1 Jon 3:17) Ya kom ku in nunku ke pal puspus su kom akkalemye kain in lungse inge ke inkanek mwomwo?

¹³ Sie pa inkanek su kut kafweang in akkalemye lungse nu ka pa kut fwin sang nunak munas, tia sruokye toasr lasr nu sin met lili wiyesr. (Ridi 1 Jon 4:20.) A, kut lungse in akos kas in kai mwomwo inge: “Muteng nu sin sie sin sie, a nunak munas nu sin sie sin sie, fwin oasr yurin kutena met kas in lain siepa. Oana Leum [“Jeova,” NW] el nunak munas nu sumwos, komwos in ouyepa oru oinge.” (Kolosse 3:13) Ya oasr sie met lili ke congregation su kom ku in orekmakin kas in kai inge nu sel? Ya kom fwa sang nunak munas nu sel?

“Kafweang in Akkalemye . . . Mongfusesr”

14. Mea kut ku in lotela ke congregation in an Filadelfia?

¹⁴ Arulana yok sripe kut in oru ke ku lasr kewa in akpayeye niyen sun lasr fwinne ke ma srisrik tusruktu siepa ma yok sripe fwin niyen sun lasr el upa in sun ku srakna ku in akpayeye ke pal loeloes fwasru. Aok, in kafweang in sun niyen sun lasr ke moul ma patpat oasr ma eneneyuk kut in muteng ka. “Meyen kom srukye kas lun mongfusesr luk, Nga fwa ouyepa sruokkomi liki aur in srifwe,” Leum Jisus el fwak nu sin congregation in an Filadelfia. (Fwakyuk 3:10, NW; ftn.) Paye, Jisus el luti ke ma eneneyuk in akkalemye mongfusesr​—su sie oiya mwomwo su ku in kasru kut in tia fuleak fwin kut sun ma upa ku me srufwe puspus. Met lili puspus ke congregation in Filadelfia in century se meet elos akkalemye mongfusesr yok ke sripen elos sun me srufwe puspus ke lulalfongi lalos. Ke ma inge, Jisus el mwulela nu selos ke me kasru yok fwin elos sun me srufwe upa puspus.​—Luk 16:10.

15. Mea Jisus el luti ke oiyen mongfusesr?

¹⁵ Jisus el etu la met tuma lutlut lal elos fwa srungeyuk sin met puspus ke sou lalos su tia wi ke lulalfongi a sin met puspus lun fwalu, ke sripe inge oasr pal luo, el akkeyelos ke kas inge: “A el su muteng nu ke safla, el nu fwa moul.” (Mattu 10:22; 24:13) Jisus el akkalemye pa in pal se ingo nu sin met tuma lutlut lal ke inkanek su elos ku in eis me akkeye su eneneyuk tu elos in ku in muteng. Ke sie me pupulyuk, el pupulyukkin sie yen eot eot nu sin met puspus su “eis kas [lun God] ke insemwomwo yok” tusruktu putatla ke pal se elos sun me srufwe lun lulalfongi. Tusruktu, el pupulyukkin met tuma lutlut oaru lal nu ke fok mwo meyen elos “sruokye ku” kas lun God a “isus fwako wi mongfusesr.”​—Luk 8:13, 15.

16. Kain in me kasru mwomwo fuka sang kasru nu sin million puspus sin met elos in mongfusesr?

¹⁶ Ya kom liye ke inkanek mwomwo su ku in kasre kut in mongfusesr? Kut enenu in “sruokye ku” kas lun God, oru in kalem ke insiesr a nunkesr. Orekmakinyen leng lun Baibel su pangpang New World Translation of the Holy Scriptures​—el sie leng lun Baibel su sumwos, fusrasr in rid—​su orekla ke kas puspus. Orekma lasr in sifwilpa nunku ke ma simusla ke Kas lun God su kut ridi len nukewa fwa kasre kut in eis ku su eneneyuk tu kut in isus fwako “wi mongfusesr.”​—Sam 1:1, 2.

“Kafweang in Akkalemye . . . Fwokpap” a Misla

17. (a) Efu ku oiyen “fwokpap” el yok sripe na paye? (b) Fuka Jisus el akkalemye la el fwokpap?

¹⁷ Wangin kutena met ku in insemwomwo fwin oasr kutu met fwak mu el oru ma koluk fwinne el tia fwak ku oru. Pal nukewa metu ku in akkalemye oiyen mulat lalos ke pal se elos sang me top nu ke kas in akkoluk nu selos. Ke ma inge arulana yok sripe in esam in akkalemye oiyen “fwokpap.” (Ridi Soakas 15:1.) Oasr ma eneneyuk nu ke orekmakinyen ku yok in akkalemye nu ke oiyen fwokpap in sang me top nu ke kain in kaskas koluk nukewa. Jisus Kraist el akkalemye me srikasrak mwomwo nu ke oiya se inge. “Su ke kaskouyuk, a el tia sifwil kas kou. Su ke el keok el tia aksangeng tu el sifwana esalang nu sel su nununku sumwos.” (1 Piter 2:23) Kut tia ku in oru ma inge oana ke Jisus el oru, tusruktu ya kut ku in kafweang yok in akmwoye oiya se inge tu kut fwa ku in akkalemye oiyen fwokpap ke inkanek yok?

18. (a) Mea ma mwo su oiyen fwokpap el ku in akpayeye? (b) Mea kutupa oiya mwomwo su kut enenu in kafweang in akkalemye?

¹⁸ In etawi Jisus, lela kut in “akola pal nu kemwa in topuk nu sin met nu kemwa su siyuk sesr sripen fwinsrak se su on in komwos, a ke fulpap a sunak yok.” (1 Piter 3:15, NW) Aok, kut fwin akkalemye oiyen fwokpap el ku in sang inkanek in kasru ke pal se fwin tia oana sie oiyen nunak a in tia oasr akukuin sikyak, sin met puspus su kut sun ke orekma in luti lasr a nu sin met lili wiyesr. (2 Timote 2:24, 25) Oiyen fwokpap el kasre kut in akkalemye misla. Saap pa inge sripe se su paenang Poul, ke leta akluo lal nu sel Timote, el simusla “misla” ke oiya puspus su enenu in orek in akkalemye ke oiyen kafweang yok. (2 Timote 2:22; srike liye pa 1 Timote 6:11.) Aok, “misla” el siepa oiya mwomwo su ma Simusla el akkeye kut in kafweang nu ka.​—Sam 34:14; Hibru 12:14.

19. Tokin kut lutlutkin oiya mwomwo itkosr lun met Kristian inge, mea kom lungse na paye in kafweang nu ka in akkalemye, a efu?

¹⁹ Kut akuteye tari ke oiya mwomwo itkosr lun met Kristian su kut eis me akkeye in kafweang in orekmakin ke moul lasr​—oiyen sumwosmwos, lungse yok nu sin God, lulalfongi, lungse, mongfusesr, fwokpap, a misla. Me insemwomwo yok pa inge nu ke kais sie congregation fwin met lili nukewa elos kafweang yok in akkalemye oiya mwomwo nukewa inge! Ma inge fwa akfulatye Jeova a lela elan lumala kais sie sesr tu kut fwa ku in sang kaksak nu sel.

[Footnote]

Me Lutlut Mwomwo in Sifwil Nunku Yok Ka

• Mea eneneyuk in kafweang nu ka in akkalemye ke oiyen sumwosmwos a lungse yok nu sin God?

• Mea ku in kasre kut in kafweang in akkalemye lulalfongi a mongfusesr?

• Fuka lungse el ku in kasre kut in akkalemye oiya mwomwo nu sin met puspus?

• Efu ku kut enenu in kafweang in akkalemye oiyen fwokpap a misla?

[Picture on page 14]

Jisus el sang kas in sensen in tia orek luma in akkalemye ke oiyen sumwosmwos in oru met in kaksakin kut

[Picture on page 15]

Kut ku in kafweang in akkeye lulalfongi lasr kut fwin nunku yok ke ma paye ke Kas lun God

[Picture on page 17]

Kut ku in kafweang in akkeye lungse a oiyen fwokpap lasr