Marut a Kunokon lun Papa a Nine ke Saflaiyen Len Safla Inge

“Tu pal lula fototo.”​—1 KORINT 7:29, NW.

1. (a) Ma ekla puspus fuka ke pal inge pa kutu sin “ongoiye” puspus? (b) Efu kut in nunku yok ke ma ekyek ke oiya mwo lun sou?

KAS lun God el palye la ke “len safla” e fwa oasr meun, kusrusr, sral, a kain in mas upa. (Daniel 8:17, 19; Luk 21:10, 11) Baibel el sang pa me sensen la lusen pal upa se inge ke me sramsram lun metu e fwa sie pal su oasr ma ekyek yok ke inkanek in moul lun met. Me akfos puspus ke moul lun sou pa kutu sin “ongoiye” puspus ke “len safla” inge. (2 Timote 3:1-4) Efu kut in nunku yok ke ma ekla puspus inge? Meyen ma ekla nukewa inge oasr yen nukewa a arulana upa paenang ma inge ku in akkolukye nunak lun met Kristian ke akwuk lun payuk a ke kunokon lalos oana papa a nine. Ke inkanek fuka?

2. Mea nunak lun met puspus fwin fwalu ke marut a divorce ku fwasrelik?

² Ke pal inge, divorce el arulana fusrasr a orek yen nukewa, a pisen met su fwasrelik el yokyokelik. Tusruktu, kut enenu in esam pal nukewa la Jeova God el nunku yok ke akwuk lun marut a divorce ku fwasrelik el tia oana nunak lun met puspus su raunekutla ke pal inge. Ke ma inge, mea nunak lun Jeova ka?

3. Mea nunak lun Jeova a Jisus Kraist ke akwuk lun marut?

³ Jeova God el lungse met nukewa su payuk tari elos in sruokye oaru lalos nu ke mwulela lalos ke marut. Ke pal se el fwalseni mokul a mutan se meet, Jeova el fwak la “sie met . . . el fwa fulyung nu sin mutan kiel, a eltal fwa ikwe siefwanna.” Tokin yea puspus Jisus Kraist el kalweni kas inge, a el fwak: “Ke ma inge ma God el fwalseni, lela met in tia eselik.” Jisus el fwak pa: “El su fwa sisla mutan kiel, fwin tia ke kosro, a fwa mari siena, el orek kosro.” (Genesis 2:24; Mattu 19:3-6, 9) Ke ma inge, Jeova a Jisus elos liye akwuk ke marut oana sie me kapur nu ke fototo lun mokul a mutan ke lusen moul lalos a ma inge aksafyeyukla fwin sie selos mise. (1 Korint 7:39) Ke sripen marut el akwuk mutal, paenang mokul a mutan su payuk tari elos enenu in nunku yok a tia sa in orek divorce. Aok, Kas lun God el akkalemye la Jeova el srunga divorce su tia fwal nu ke akwuk lun ma Simusla.a​—Ridi Malakai 2:13-16; 3:6.

Nunku Yok a Aksaokye Akwuk lun Marut

4. Efu ku kutu met Kristian su srakna fwusr su silaklak in payukyak elos auli ke kutu pal tok?

⁴ Met puspus fwin fwalu ke pal inge su tia kulansap nu sin God elos nunku yok ke orekma fokfok pal nukewa. Len nukewa, kut ku in liye la oasr petsa fokfok puspus su akkalemyeyuk pal nukewa. Kut tia ku in fwak la ma inge tia ku in akkolukye kut, yokna nu sin met lili wiyesr ke congregation lasr su srakna fwusr. Oiya fuka met fwusr Kristian elos enenu in akkalemye nu ke me akkoluk inge, su ku in purakak lungse lalos in orek kosro fwinne kafweang in lain kena koluk inge? Kutu sin metu elos srike in aksumwosye ma inge ke elos payukyak ke elos srakna fwusr. Ke inkanek inge, elos fwinsrakkin la ma inge ku in kasrelos in tia orek kosro. Tusruktu, oasr met fwusr puspus su tokin elos oru ma inge elos auli ke sulela lalos inge. Efu? Ke pal se oiyen insemwomwo lalos ke sripen elos tufwana payukyak el tula ke kutu pal tok, elos ku in akilen la mokul ku mutan kiyelos tia na sun oiyen lungse lalos ke len nukewa fwal nu ke ma elos lungse a ma elos srunga. Kalem la, siyanyen oinge elos sun ma upa yok ke moul in payuk lalos.

5. Mea fwa kasru siyanyen nukewa su sruokye oaru lalos nu ke mwuleang lun payuk lalos? (Srike liye pa footnote.)

⁵ Fwin payukyak nu sin sie met​—fwinne nu sin sie met Kristian—​su tia oana sie ke ma kom nunku el ku in orala ma upa. (1 Korint 7:28) Tusruktu, fwinne oasr ma upa yok ke moul in payuk lalos, met Kristian paye se el etu la tia in orek divorce su tia fwal nu ke akwuk lun ma Simusla pa inkanek fwal nu ke ma upa puspus ke moul in payuk su wangin insemwomwo ka. Ke ma inge, elos nukewa su kafweang yok in sruokye oaru a paye lalos nu ke mwulela lalos ke payuk arulana fwal in kaksakinyuk a kasreyuk sin congregation lun met Kristian.b

6. Nunak fuka met Kristian fwusr se el enenu in akkalemye ke fwinsrak in payukyak?

⁶ Ya kom srakna fwusr a soenna payuk? Fwin oinge, mea nunak lom nu ke akwuk lun marut? Kom ku in tia sun me asor yok kom fwin sano nu ke pal se kom akola na paye nu ka ke monum, nunak lom, a kom fwin etu a akola tari in orekmakin akwuk lun God ke moul in payuk meet liki kom mutamwauk in orek fototo nu sin sie mutan ku mokul Kristian. Aok, ma Simusla el tia akkalemye ke matwe mu fwal in payukyak.c Tusruktu, Baibel el akkalemye la mwo kom fwin sano nu ke pal se su kena yok ke moul lun met in orek fototo nu sin sie mokul ku mutan el alukela tari. (1 Korint 7:36, NW) Efu? Meyen kena koluk in orek fototo nu sin sie mokul ku mutan el ku in akkolukye nunak mwomwo a ku in oru kom in oru sulela tia mwo su saflaiye me aktoasrye inse. Esam la, kas in kasru lun Jeova su oasr in Baibel ke akwuk lun payuk el ku in akinsemwomwoye kom.​—Ridi Isaia 48:17, 18.

Kunokon Mwo a Yok Sripe lun Papa a Nine

7. Mea kutu siyanyen su srakna fwusr elos sun, a efu ku ma inge ku in sang me aktoasr nu ke moul in payuk lalos?

⁷ Kutu siyanyen elos ekla papa a nine ke elos srakna fwusr. Wangin pal loeloes lalos in aetuila na paye nu sin sie sin sie meet liki isusla lun tulik srisrik natulos, su enenu in karunginyuk ke lusen ao 24 ke kais sie len. Arulana fwal a mwo la nine se el orekmakin pal nukewa lal in karunganang tulik srisrik natul, a ke sripe se inge mokul tumal su srakna fwusr el ku in mutamwauk in lemta. Sayen ma inge, fong puspus su elos tia ku in motul meyen elos karunganang tulik srisrik natulos el ku in orala ma upa a ku in orala me aktoasr nu ke fototo lalos nu sin sie sin sie. Ke pal inge siyanyen fwusr se inge elos akilen la wanginla sukosok nu ke moul lalos. Ingena elos tia ku in som nu ke an puspus a tia ku in oru ma puspus su elos sukosok nu ka in oru meet liki oasr tulik natulos. Nunak fuka elos enenu in akkalemye ke ma ekyek inge su sikyak nu selos?

8. Nunak fuka enenu in akkalemye sin siyanyen ke kunokon lalos oana papa a nine, a efu?

⁸ Kunokon lun papa a nine in karungin sou a tulik el oana akwuk ke payuk su enenu in nunkeyuk oana kunokon mwomwo su God el sang nu selos. Kutena me aksumwos su eneneyuk in orek ke moul lun sie siyanyen su met Kristian ke sripen isusla lun tulik srisrik natulos, elos enenu in akfwalye moul lalos nu ke ma ekyek nukewa inge ke ku lalos kemwa. Ke sripen Jeova el sang nu sin metu ku lalos in orek tulik, paenang papa a nine elos enenu in aksaokye tulik srisrik se su tufwana isusla oana “me usru sin Jeova.” (Sam 127:3) Sie nine ku papa su met Kristian elos fwa kafweang in oru kunokon lalos oana “papa a nine in Leum.”​—Efesus 6:1.

9. (a) Mea weang nu ke orekma in karungin tulik srisrik? (b) Mea mokul tuma ku in oru in kasru mutan kiyel in sruokye ku fototo lal nu sin God?

⁹ Oasr ma eneneyuk in akkalemye nu ke oiya lun lafwekinelos sifwana ke orekma in karungin tulik srisrik. Oasr ma eneneyuk nu sin papa a nine in orekmakin ke pal a ku yok lalos in karungin tulik natulos. Sie mokul payuk su met Kristian el enenu in etu a kalem ka la ke lusen yea puspus tokin sie tulik srisrik el isusla, mutan kiyel el tia ku in loang akmwoye ke pal in meeting nukewa a saap wanginla pal mwomwo lal in oru lutlut lal sifwana ke Baibel a in nunku yok ka. Ma inge ku in akmunasye fototo lal nu sin God. Sie mokul payuk el enenu in etu la kunokon mwomwo lal in oana sie papa pa in sang kasru in karungin tulik natulos. El enenu in kafweang in kalweni nu sin mutan kiyel me lutlut puspus su el tia sruokye ke pal in meeting a akuteye ma inge nu sel ke elos oasr tari in loom selos. El ku in sang kasru pa in karungin tulik natulos in sang pal mwomwo nu sin mutan kiyel in wi ke orekma in luti peng mwo lun Togusrai.​—Ridi Filippai 2:3, 4.

10, 11. (a) Fuka tulik elos karunginyuk a lutiyuk ke “kai a kaiyuk” lun Jeova? (b) Efu ku papa a nine puspus su met Kristian fwal in kaksakinyuk?

¹⁰ Oasr ma eneneyuk yok saye ke kunokon mwomwo lun papa a nine liki na in sang ma enenu lun tulik srisrik ke mongo, nuknuk, loom, a in karunganang mano fukoko lun tulik. Yokna ke len safla inge su oasr ma upa puspus, tulik fwusr elos enenu in lutiyuk ke elos srakna tulik srisrik ke akwuk lun moul nasnas su elos enenu in moulkin. Tulik srisrik elos enenu in lutiyuk ke kas in “kai a kaiyuk lun Jeova.” (Efesus 6:4) Ke orekma in luti ke kas in “kai” inge oasr pa ma eneneyuk yok in filiyuki ke nunak lun sie tulik srisrik pa ke masap a nunak nukewa lun Jeova ke pal se el srakna awowo nu ke pal el matula.​—2 Timote 3:14, 15.

¹¹ Ke pal se Jisus el fwak nu sin met tuma lutlut nukewa lal la elos enenu in “oru met in mutanfwal nukewa tu elos in met tuma lutlut,” el sapkin pa la papa a nine elos enenu in kasru tulik natulos in ekla met tuma lutlut. (Mattu 28:19, 20) Oasr ma upa ka meyen oasr me akkoluk puspus lun fwalu nu sin met fwusr nukewa. Ke ma inge, papa a nine su eis kutangla lalos in karungin tulik natulos in ekla met Kristian su baptais elos fwal na paye in eis kas in kaksak sin met lili nukewa ke congregation. Elos “kutangla” me akkoluk lun fwalu ke inkanek lun lulalfongi lalos a ke paye a oaru lalos oana papa a nine mwomwo su oru kunokon lalos.​—1 Jon 5:4.

Tia Payuk ku Wangin Tulik ke Sripen Akwuk Mwomwo

12. Efu ku kutu sin met Kristian elos oru sulela lalos in tia payuk ke lusen sie pal?

¹² Ke sripen “pal fototo” a “ma sikyak fwin fwalu el ekyek pal nukewa,” paenang Kas lun God el akkeye kut in nunku yok ke ma mwomwo fuka fwin sie met el tia payuk. (1 Korint 7:29-31) Ke ma inge, kutu sin met Kristian elos oru sulela lalos in tia payuk ke lusen moul lalos ku elos oru sulela lalos in lolap na ke lusen yea puspus meet liki elos payukyak. Arulana fwal in kaksakinyuk elos, meyen elos tia orekmakin pal sukosok lalos inge in oru ma lungse lalos sifwana. Elos oru sulela lalos in tia payuk ke sripen elos lungse in kulansap nu sin Jeova in “wangin me ikolkolosi.” (Ridi 1 Korint 7:32-35.) Kutu met Kristian su lolap elos oru orekma lun pioneer ku kulansap ke Bethel puspus. Oasr brother puspus elos orekmakin ku a pal yok lalos nu ke u lun Jeova ke elos sun ma eneneyuk tu elos in ku in wi ke Ministerial Training School. Aok, elos nukewa su kulansap oana pioneer ke kutupal ke elos srakna lolap a tok elos oru sulela lalos in payukyak elos koneak la me lutlut mwomwo puspus su elos lotela ke yea puspus su elos soenna payuk sang kasru yok nu ke moul in payuk lalos.

13. Efu ku kutu sin siyanyen su met Kristian elos sulela in tia orek tulik?

¹³ Ke kutu an, oasr siepa ma ekyek ke moul lun sou su sikyak​—kalme pa oasr siyanyen puspus su oru sulela lalos in tia orek tulik. Kutu selos oru ma inge ke sripen upala lun moul; kutu elos oru ma inge ke sripen elos lungse in orekmakin pal nukewa lalos in kapkapek ke orekma mwomwo lalos. In masrlon met Kristian puspus oasr pa siyanyen puspus su oru sulela lalos in tia orek tulik. Tusruktu, elos oru ma inge ke sripen elos lungse in sukosok yok in orekmakin pal nukewa lalos in kulansap nu sin Jeova. Tia kalme pa siyanyen puspus inge wangin moul in payuk mwomwo lalos. Payaiye pa elos insemwomwokin moul in payuk lalos. Ne oinge, elos lungse in suk meet Togusrai yok liki in eis kutena me insemwomwo su tuku ke moul in payuk lalos. (1 Korint 7:3-5) Kutu sin siyanyen puspus inge elos kulansap nu sin Jeova a nu sin met lili wiyelos oana met liaung ke circuit a district a ke Bethel. Kutu selos oru orekma lun pioneer ku oana missionary. Jeova el fwa tia mulkunla orekma lalos a ke lungse su elos akkalemye ke inel.​—Hibru 6:10.

‘Keok in Ikwe’

14, 15. Me “keok in ikwe” fuka papa a nine Kristian elos ku in pulakin ku sun?

¹⁴ Met sap Poul el akkalemye nu sin met Kristian nukewa su payuk tari la elos fwa sun me “keok in ikwe.” (1 Korint 7:28) Me keok in ikwe pa mas ku munasla lun mano lun siyanyen se, mas lun tulik natulos, ku mas lun papa a nine kiyelos su matou tari. Ma inge ku in sikyak pa ke sripen ma upa puspus a me aktoasr su tuku ke orekma in karungin tulik srisrik natulos. In oana ke ma akkalemyeyuk tari ke mutamweyen me lutlut se inge, Baibel el palye tari la ke “len safla” e fwa oasr “ongoiye” puspus su upa in muteng nu ka. In wekunang nu ke ongoiye puspus su upa in muteng ka inge pa ke tulik elos “seakos papa a nine” kiyelos.​—2 Timote 3:1-3.

¹⁵ Sie ma upa nu sin papa a nine su met Kristian pa in karungin tulik natulos. Kut ku in pulakin pa ma koluk puspus ke ‘pal koluk’ inge. Ke ma inge, papa a nine nukewa su met Kristian elos enenu in meuni ku lain pal nukewa me akkoluk upa puspus su “inkanek lun fwal se inge” ku in oru nu sin tulik natulos. (Efesus 2:2, 3) A tia fusrasr pal nukewa in kutangla ke kain in meun inge! Fwin sie tulik mokul ku tulik mutan ke sie sou su met Kristian el tui in kulansap nu sin Jeova, paye la, ma inge el sie “me toasr” nu sin papa a nine nukewa su kafweang yok in luti nu sel ma paye lun God mutamwauk ke el tulik me.​—Soakas 17:25.

“Tu In Pal Sa A Fwa Ongoiye Lulap”

16. Kain in me “keok” fuka Jisus el palye ka?

¹⁶ Tusruktu, kutena me “keok” su pulakinyuk ke moul in payuk a ke orekma in karungin tulik, el ma na srisrik fwin srikeyuk nu ke siepa me keok su ku in sikyak ke inkanek yok. Ke kas palu lun Jisus ke oasr tari lal a ke saflaiyen akwuk puspus lun fwalu, Jisus el fwak: “Tu in pal sa a fwa ongoiye lulap, oana tia liyeyuk ke mutamweyen fwalu nu inge, mo, a fwa tia nu tok.” (Mattu 24:3, 21) Tokin yea puspus Jisus el akkalemye la oasr sie u lulap su fwa moliyukla liki “ongoiye lulap” inge. Tusruktu, akwuk nukewa lal Setan fwa kafweang in oru meun safla lalos nu sin Met Lo nukewa lun Jeova su moulkin moul misla. Wangin alolo ka la, pal se inge el sie pal in ma upa nu sesr nukewa​—met matou a tulik srisrik nukewa.

17. (a) Efu kut ku in lulalfongi la kut a tulik natusr e fwa moliyukla ke pal fwasru? (b) Mea ku in sang kasru nunak lasr ke akwuk lun payuk a ke kunokon lun papa a nine?

¹⁷ Fwinne oinge, kut tia enenu in arulana sangeng ke pal fwasru. Papa a nine su oaru nu sin Jeova elos ku in fwinsrakkin la oasr me karungin a me molela nu selos a nu sin tulik srisrik natulos nukewa. (Ridi Isaia 26:20, 21; Zefenaia 2:2, 3; 1 Korint 7:14) Tusruktu, ke pal inge, lela etauk lasr in kalem la kut moul tari ke pal koluk inge su ku in sang kasru nu ke nunak lasr ke akwuk lun payuk a ke kunokon lun papa a nine ke saflaiyen len safla inge. (2 Piter 3:10-13) Ke ma inge, moul lasr​—fwinne kut lolap ku payuk tari, oasr tulik ku wangin tulik natusr—​fwa mwo in akfulatye a sang kaksak nu sin Jeova a nu ke congregation lasr oana met Kristian.

[Footnotes]

Ke Inkanek lun Kalweni

• Efu ku met Kristian su srakna fwusr tia enenu in silaklak in payukyak?

• Mea oiya puspus su weang nu ke karunginyen tulik srisrik?

• Efu met Kristian puspus elos oru sulela lalos in tia payuk, ku fwin elos payuk elos tia orek tulik srisrik?

• Kain in me “keok” fuka papa a nine nukewa su met Kristian elos sun?

[Picture on page 21]

Efu ku inkanek mwo a lalmetmet nu sin met Kristian su srakna fwusr elos in sano nu ke elos matu kutu meet liki elos payuk?

[Picture on page 22]

Sie mokul payuk el ku in sang kasru yok nu sin mutan kiyel in oasr pal yok lal in wi ke orekma nukewa in kulansap nu sin God

[Picture on page 23]

Efu ku kutu sin met Kristian su payuk tari elos oru sulela lalos in tia isus tulik?