Met Fwusr, Esam Met Orekomla Ingena

“Esam pa Met Orekomla in len in fwusr loom.”​—EKKLISIASTIS 12:1.

1. Fuka Jeova el akkalemye lulalfongi lal nu sin met fwusr nukewa su alu nu sel?

JEOVA el akfulatye met Kristian fwusr oana ma saok a me akinsemwomwoye oana aunfong. Aok, el palye ka la in len in “ku” lun Mwen natul, mokul fwusr a mutan fwusr elos “insemwomwo in esaloswot sifwana” ke orekma in kulansap nu sin Kraist. (Sam 110:3) Kas palu inge akpayeyuk ke pal se met nukewa elos tia akos God, elos kafofo in nunku kelos sifwana a ke lungse lun mani, a seakos. Tusruktu, Jeova el etu la met fwusr su alu nu sel elos siena. Paye oasr yurol kain in lulalfongi inge nu sin brother a sister fwusr nukewa!

2. In esam Jeova el wekunang mea?

² Nunku ke lupan me insemwomwo su Jeova el ku in pulakin fwin el liye la met fwusr nukewa elos esamul oana Met Oralosla. (Ekklisiastis 12:1) Paye la, in esam Jeova tia pa in nunkel mukena. Kalmen ma inge pa in oru kutena kain in orekma​—oru mea me akinsemwomwoyel, in lela masap lal a akwuk nukewa lal in kol kut ke moul len nukewa. Ma inge ku in kalmekin pa nu ke oiyen lulalfongi Jeova, la el arulana nunku yok ke ma mwo nu sesr a in kasre kut. (Sam 37:3; Isaia 48:17, 18) Ya pa inge ma kom pula ke met Orekomla?

“Lulalfongi Jeova Ke Insiom Kemwa”

3, 4. Fuka Jisus el akkalemye lulalfongi lal nu sin Jeova, a efu ku arulana yok sripe in lulalfongi Jeova ke pal inge?

³ Me srikasrak mwomwo lun sie met su lulalfongi God, pa Jisus Kraist. El moulkin moul fwal nu ke kas lun Soakas 3:5, 6: “Lulalfongi Jeova ke insiom kemwa, a tia fungla nu ke etauk lom sifwana. Kom fwakulak inkanek lom nu kemwa, a el fwa akkalemye inkanek lom.” Tia pat tokin baptais lal, Setan el sunol Jisus, su srike in srifwel in sang mwal a mwolana lun fwalu. (Luk 4:3-13) Jisus el tia kiapeyukla. El etu la “me kasrup a sunak a moul” paye el tuku ke oiyen “fwokpap a sangeng sin Jeova.”​—Soakas 22:4.

⁴ Oiyen rapku a in nunku kelos sifwana pa oiya yok lun metu ke pal inge. Ke kain in ma puspus su sikyuk inge, mwo kut in fwasr tokin me srikasrak lun Jisus. Nunku pal nukewa pa la, Setan el kafweang yok pal nukewa in oru kutena ma in sang srifwe met kulansap nukewa lun Jeova in som liki inkanek ousriksrik su kol nu ke moul. El lungse in liye met nukewa in fwufwasryesr ke inkanek sralup su kol nu ke kunausten. Nikmet lela kom in kiapeyukla sel! A, lela kom in oru sulela in esam Met Orekomla. Lulalfongel ke insiyom kemwa, a sruokye ku “moul paye,” su fwa akpayeyuk ke pal na sa.​—1 Timote 6:19.

Met Fwusr, Komwos in Lalmetmet!

5. Mea pulakin lom ke pal fwasru lun fwal se inge?

⁵ Met fwusr su esam Met Orelosla elos lalmetmet liki met fwusr puspus su oana matwelos. (Ridi Sam 119:99, 100.) Meyen oasr yurolos nunak lun God, paenang elos etu na paye la fwal koluk se inge fwa tia pat wanginla. Fwinne ke lusen pal na fototo, wangin alolo ka la komwos akilen la metu sangeng a nunkala yok ke pal fwasru. Kom fwin srakna lutlut ke loom lutlut, saap kom long ke me akfokfokye yen engyengu, global warming, kunausla lun insak, a ma upa puspus su oapana ma inge. Metu elos nunku yok ke ma sikyuk nukewa inge, tusruktu Met Lo lun Jeova elos kalem ka na paye la ma sikyuk inge nukewa akkalemye me akul nu ke saflaiyen fwal ku akwuk lal Setan.​—Fwakyuk 11:18.

6. Fuka kutu sin met fwusr elos kiapeyukla?

⁶ Oasr me asor yok, meyen kutu sin met kulansap fwusr lun God elos tui tila sano pal nukewa a elos mulkunla ma paye se inge la fwalu el oasr ke pal na fototo lula. (2 Piter 3:3, 4) Kutu selos srifweyukla nu ke orekma koluk upa ke inkanek lun met asrouki koluk a petsa fokfok. (Soakas 13:20) Sie me asor yok na paye fwin kut tula liki me insemwomwo lun God ke pal inge ke sripen kut arulana fototoyang nu ke saflaiyen ma nukewa! Sayen ma inge, fwin kut esamak ke ma kut lotela ke oiyen ma sikyuk nu sin met Israel ke pal se elos muta ke an Tupasrpasr lun an Moab in yea 1473 B.C.E., elos arulana fototoyang in utyuk nu ke Fwal Mwulela. Mea orek ku sikyuk we?

Elos Srifweyukla Ke Elos Apkurun In Akpayeye Nien Sun Lalos

7, 8. (a) Inkanek ku akwuk fuka Setan el orekmakin in an Tupasrpasr lun an Moab? (b) Inkanek ku akwuk fuka Setan el orekmakin ke pal inge?

⁷ In pal se ingo, arulana kalem la Setan el lungse in sruokye met Israel in tia eis me usru su mwuleyukla nu selos. Tokin el tia ku in srifwelosla ke inkanek in selngawi lun met palu Belum, Setan el sifwilpa orekmakin inkanek kutasrik yok, el srike in akkolukyelos in tia fwal in eis me insemwomwo lun Jeova. El orekmakin mutan kosro koluk in an Moab in srifwelos, a ke pal inge Devil el srifwela kutu selos. Metu elos mutamwauk in orek kosro yurin an nutin Moab a epasr nu sin Beal-pior! Fwinne me usrui saok lalos, ke Fwal Mwulela, el arulana fototoyang, tusruktu oasr met Israel 24,000 kutu elos mise in pal se inge. Sie me asor yok na paye pa inge!​—Oekyuk 25:1-3, 9.

⁸ Ke pal inge, kut arulana fototoyang nu ke fwal mwulela su mwo liki​—pa inge akwuk sasu. Ke inkanek oapana su el orekmakinyuk in pal meeta, Setan el sifwilpa orekmakin orekma lun kosro in akkolukye met lun God. Oiyen moul nasnas fwin fwalu ekla arulana koluk paenang metu nunku mu orekma lun kosro el mwo a fwal a wekunang pa orekma koluk lun mokul nu sin mokul nunkeyuk mu fwal a mwo a met se sifwana el mu ku in oru sulela lal in oru ma inge. Oasr sie mutan Kristian el fwak, “Ke loom sesr a ke Kingdom Hall mukena pa tulik nutik elos lotela ka la orekma koluk lun mokul nu sin mokul a orek kosro nu sin mokul ku mutan fwin elos tia payuk el sie orekma koluk ye mutan God.”

9. Mea ku in sikyuk ke pal se met fwusr oasr lungse yok lun ikwe, a fuka met fwusr elos ku in kutangla ma inge?

⁹ Met fwusr su esam Met Oralosla Lulap elos etu la osun ke mano lun mokul a mutan pa me sang mutal su kupasr nu ke moul a akwuk in orala fwako. Ke ma inge, elos etu na paye la osun ke mano lun mokul a mutan el ku in orek mukena fwin fwal nu ke ma Jeova el sapkin​—pa ke akwuk lun payuk. (Hibru 13:4) Tusruktu, ke “lungse yok lun ikwe lun met fwusr”​—el ekla nu ke kena yok oasr me sensen su oiya inge ku in akkolukye nunak a liyaten lun sie met—​paenang arulana upa in sruokye oiyen moul nasnas. (1 Korint 7:36, NW) Mea kom ku in oru fwin nunak koluk inge oasr ke nunak lom? Kafweang in pre nu sin Jeova ke me kasru in karungin yok me sensen nu ke moul nasnas. Jeova el lungse in loang pal nukewa nu ke me siyuk a kena lun met nukewa su forla nu sel ke paye. (Ridi Luk 11:9-13.) In sramsramkin moul nasnas a ma su mwo in akkeye el ku in sang kasru yok in sifwilpa akmwoye inkanek nu ke orekmakinyen nunak.

Sulela Nien Sun Lom Ke Inkanek Lalmetmet!

10. Nunak sesumwos fuka kut enenu in fwasr liki, a kas in kai fuka mwo kut in loang nu ka?

¹⁰ Sie sripe su met fwusr puspus fwin fwalu elos tia ku in kutongye a moulkin moul nu ke kena lun ikwe pa wangin yurulos “aruruma”​—kalme pa wangin kolyuk lun God ke moul lalos a fwinsrak mwomwo nu ke pal fwasru lalos. (Soakas 29:18) Elos oana met Israel su tui tia sifwil akos me kolyuk lun God in len lal Isaia ke elos moulkin moul “engun a insemwomwo, . . . mongo ikwe a nim wain.” (Isaia 22:13) Tia mwo in lemta sin kain in met inge, a ke luma saye, mwo in nunku akmwoye ke fwinsrak saok su Jeova el oakiye ye mutun met kulansap oaru lal. Kom fwin sie met kulansap fwusr lun God, ya kom sruokye fwinsrak paye a ku nu ke me insemwomwo nukewa ke pal fwasru fwin fwalu sasu akwuki? Ya kom kafweang yok pal nukewa in moulkin “moul sumwos . . . ke [kom] tupan fwinsrak su akinsemwomwoye” sin Jeova su filiyuki ye mutum? (Taitus 2:12, 13) Topuk lom nu ke ma inge fwa sang kasru niyen sun lom a ke ma yok sripe nu ke moul lom su kom oakiye nu sum sifwana.

11. Efu ku met Kristian fwusr su srakna lutlut ke loom lutlut elos enenu in kafweang in lutlut yok?

¹¹ Fwalu lungse met fwusr in orekmakin ku lalos kemwa nu ke ma puspus lun fwalu ku nu ke niyen sun puspus lalos ke inkanek in orekma. Paye la, komwos nukewa su srakna lutlut ke loom lutlut enenu in kafweang in lutlut yok in eis sie lutlut mwomwo. Kom enenu in esam la, nien sun lom tia in koneak orekma mwo a fwal mukena tusruktu in orekmakinyuk kom a kom in me akkeye nu sin congregation a met luti nu ke Togusrai su oasr fwako mwomwo ka. In sun nien sun inge, kom enenu in etu ke inkanek mwo in sramsram mwo kalem, in orekmakin nunak lalmetmet, a in etu in akuteye ke inkanek misla a sunak nu sin met puspus saye. Ne oinge, met fwusr su lutlut Baibel a kafweang in orekmakin akwuk puspus ke moul lalos elos eis lutlut mwomwo su yok sripe a oakiye sie pelung mwo nu ke me insemwomwo a moul mwomwo nu tok ma patpat ke pal fwasru.​—Ridi Sam 1:1-3.a

12. Me srikasrak fuka sou lun met Kristian elos enenu in oru mwo a in etawi?

¹² Nu in an Israel, lutlut lun tulik sin papa a nine kiyelos pa ma yok sripe se su enenu in nunkeyuk yok ka. Papa a nine elos luti tulik natulos nu ke ma paye ke oiya nukewa lun moul, yokna ke ma su kupasr nu ke orekma lun alu nu sin God a masap lal. (Duteronomi 6:6, 7) Ke ma inge, met Israel nukewa su fwusr elos loang akmwoye nu sin papa a nine kiyelos a kutupa met matou su sangeng sin God elos in eis tia etauk mukena tusruktu elos in eis pa lalmetmet, liyaten, kalem yok, a ku in orekmakin nunak ke inkanek mwo​—oiya puspus su ku in eis sin met ke sripen elos lutlutkin ke God a masap nukewa lal. (Soakas 1:2-4; 2:1-5, 11-15) Sou lun met Kristian ke pal inge elos enenu in loang akmwoye nu ke me lutlut sepana inge.

Long Met Nukewa Su Lungse Kom

13. Kain in kas in kasru fuka kutu met fwusr elos eis, a efu ku elos enenu in taran ku sensenkin?

¹³ Met fwusr elos eis kas in kasru su tuku sin kain in met nukewa​—wekunang met luti puspus ke high school su orekma oana met papu, su sang kas in kasru nu sin tulik mukena ke oiyen inkanek in eis kapkapek nu ka ke akwuk lun fwalu se inge. Nunak munas pre siyuk sin God in kasre kom in oasr nunak mwomwo ka ke kom nunku akmwoye ke kas in kasru su oasr in Baibel a ke me rid nukewa su orekla sin met kulansap oaru a lalmetmet. Ke kom lutlutkin Baibel, kom etu la met fwusr a met su soenna eis etauk yok ku met su nukin elos pa Setan el kafweang yok nu se in kiapela. Ke sie me pupulyuk, ke imae lun Eden, If su soenna oasr etauk yok yuru el fusrasr in long ke ma su Setan el fwakak nu sel, sie metsa su tia akkalemye kutena kain in lungse nu sel If. Arulana yok ma tia oana sie nu ke ma su fwa sikyuk fwin If el akos Jeova, sie su akkalemye tari lungse lal nu sel ke inkanek puspus!​—Genesis 3:1-6.

14. Efu ku kut enenu in loang nu sin Jeova a nu sin papa a nine se su lungse na paye Jeova?

¹⁴ Met Orekomla el lungse pa kom, a el oru oinge ke sie oiya su nasnas a paye. El lungse kom in insemwomwo ma patpat, a tia ke pal inge mukena! Ke ma inge, ke karunginyuk lun sie papa ku nine su nunku ke tulik natulos, el ku in fwak nu sum a nu sin met nukewa su alu nu sel: “Pa inge inkaneku. Komwos fwasr we.” (Isaia 30:21) Fwin papa a nine kiyom elos lungse na paye Jeova, kom ku in eis kutupa me kasru nu sum. Pal nukewa elos fwak kas in kasru lalos nu sum in oakiye ma yok sripe emeet nu ke moul a nien sun lom, mwo kom in akkalemye nunak pusisel pal nukewa a loang akmwoye ka kas in kasru lalos. (Soakas 1:8, 9) Paye la, elos lungse kom in eis moul, ma se su yok liki me kasrup ku oiyen pengpeng lun fwal se inge.​—Mattu 16:26.

15, 16. (a) Kain in lulalfongi fuka oasr yurosr kel Jeova? (b) Me lutlut yok sripe fuka kut ku in lotela ke ma sikyuk nu sel Beruk?

¹⁵ Nu sin met nukewa su esam Met Oralosla elos kafweang in oru moul lalos in fusrasr, elos lulalfongi la Jeova el fwa “tiana” fililosla “tiana” som lukelos. (Ridi Hibru 13:5.) Meyen oiya mwo inge el tia oana sie nu ke nunak lun fwalu, paenang kut enenu in taran in tia lela ngun lun fwal se inge in kufusla ku akkolukye kut. (Efesus 2:2) Ke oiya inge, srike in nunku yok ke me srikasrak lun met sim lal Jeremaia, su inel pa Beruk, su muta ke len safla lun ma upa puspus fwin an Jerusalem su kol nu ke kunanela lun siti inge in yea 607 B.C.E.

¹⁶ Saap Beruk el lungse in orala sie moul mwomwo nu sel sifwana ke ma lun fwalu ku ke me kasrup. Jeova el liye ma inge a el sang kas in sensen ke inkanek kulang nu sel Beruk in tia kafweang in suk “ma lulap” nu sel sifwana. Beruk el akpayeye la el sie met pusisel a lalmetmet, ke sripen el loang nu sin Jeova a moulla ke kunanela lun an Jerusalem. (Jeremaia 45:2-5) Ke oiya saye, met nukewa su moul in len lal Beruk su elos eis “ma lulap” ke ma lun fwalu ku me kasrup, su oru alu lalos nu sin Jeova in ma se akluo, tia pat ma inge nukewa tula ye poun met Kaldia (met Babulon). Pus sin met inge tula pa moul lalos. (2 Kronikel 36:15-18) Ma sikyuk nu sel Beruk inge ku in kasre kut in liye oiyen fototo nu sin God la el yok sripe emeet liki me kasrup a oiyen pengpeng lun fwal se inge.

Fungla nu ke Me Srikasrak Mwomwo Emeet

17. Efu ku Jisus, Poul, a Timote elos me srikasrak mwomwo nu sin met kulansap nukewa lun Jeova ke pal inge?

¹⁷ In kasre kut in fwasr ke inkanek lun moul, Kas lun God el kasre kut in fwufwasryesr ke inkanek nu ke moul ke el ase nu sesr me srikasrak mwomwo puspus. Ke sie me pupulyuk, Jisus, su sie met lalmetmet emeet su moul fwin fwalu, tusruktu el orekmakin ku lal kemwa in akyokye “mwo sasu lun togusrai” su fwa sang kasru nu sin met nukewa in eis moul ma patpat. (Luk 4:43) In sang nu sin Jeova ma yok emeet lal, met sap Poul el sisla sie orekma mwomwo a orekmakin pal lal a ku lal in luti mwo sasu. Timote, “tulik paye in lulalfongi,” el etawi me srikasrak mwomwo lal Poul. (1 Timote 1:2) Ya Jisus, Poul, a Timote elos auli ke inkanek lun moul lalos? Tia oinge! Ke ma paye, Poul el akkalemye mu el nunku ke ma fwalu el ku in use “oana kutkut” fwin srikeyuk nu ke kunokon in kulansap nu sin God.​—Filippai 3:8-11.

18. Me ekla yok fuka sie brother fwusr el orala, a efu ku el tia auli ka?

¹⁸ Met Kristian fwusr puspus ke pal inge elos etawi lulalfongi lal Jisus, Poul, a Timote. Ke sie me pupulyuk, sie brother fwusr su oasr orekma mwomwo se lal meet el simusla: “Ke sripen Nga moulkin moul fwal nu ke akwuk puspus lun Baibel, tia pat Nga eis kilukyuk lun orekma nu ke orekma luk. Fwinne oasr ma mwomwo sikyuk ke mani, Nga pulakin mu Nga orekma oana ukweyen engu. Ke pal se Nga sramsram nu sin met su karungin company a srike in akkalemye kena luk in suk meet orekma in kulansap pal nukewa oana sie pioneer, elos silaklak na in akkalemye nu sik ke mani pukanten, in fwinsrakkin mu Nga fwa muta na. Tusruktu Nga oru tari sulela luk. Met puspus elos tia kalem ka na paye la efu ku Nga sisla orekma mwomwo se luk in suk meet orekma in kulansap pal nukewa oana sie pioneer. Topuk luk nu ka pa Nga lungse na paye in akpayeye mwulela luk nu sin God. Ke sripen ma yok ke moul luk ke pal inge oasr ke orekma in kulansap nu sin God, oasr yuruk insemwomwo yok a inse misla su wangin lupan mani ku oiyen pengpeng ku in use nu sik.”

19. Mea sulela lalmetmet a mwo su met fwusr elos akkeye in oru?

¹⁹ Fwin fwalu nufon, tausan puspus sin met fwusr elos orala sulela lalos ke inkanek lalmetmet oapana inge. Ke ma inge, met fwusr, ke komwos fwin nunku akmwoye nu ke pal fwasru lomwos, esam pal nukewa ke len lun Jeova. (2 Piter 3:11, 12) Nik komwos sok nu sin met nukewa su kapkapek a engunkin moul mwomwo ke fwal se inge. A, loang akmwoye nu sin met nukewa su lungse kom na paye. Orekma in elosak “ma saok nu sumwos in kosrao” pa ma saok mwo emeet su kom ku in orala a ma sefwanna su oasr moul ma patpat ka. (Mattu 6:19, 20; ridi 1 Jon 2:15-17.) Aok, esam Met Orekomla. Ke kom oru ou inge, Jeova el akinsemwomwoye kom.

[Footnote]

Ya Kom Ku In Esam?

• Fuka kut ku in akkalemye lulalfongi nu sin God?

• Mea se inge lutlut mwomwo emeet?

• Me lutlut puspus fuka kut ku in lotela kel Beruk?

• Su met puspus su akpayeye oana me srikasrak mwomwo, a efu?

[Picture on page 17]

Jeova el ase lutlut mwomwo emeet