Met Fwusr, Ya Komwos Musaela Sie Foundason Mwo Nu Ke Pal Fwasru?
“Nga etu nunak su Nga nunku keyumwos, . . . nunak lun misla, a tia lun ma koluk, in sot nu sumwos fwinsrak lun saflaiyomwos.”—JEREMAIA 29:11.
1, 2. Ke inkanek puspus fuka su tia oana sie ke len in fwusr ku in liyeyuk?
PUS sin met matu elos nunku mu lusen pal in fwusr lun sie met pa sie pal mwomwo lun moul. Elos esam ku a insemwomwo lalos ke pal se elos srakna fwusr. Elos engunkin in nunku ke pal se elos soenna eis kunokon puspus lalos, su yok engun lalos ke pal fwasru.
2 Nu selos su met fwusr sie na liye lalos nu ke kalmen moul lun met fwusr. Kom ku in sun ma upa ke pulakin lom a ke ekla puspus ke mano lun met fwusr. Ke loom lutlut, kom ku in sun ma upa su tuku sin met asruoki lom. Kom enenu in akkalemye kaifweang ke ku lom in lain orekmakinyen ono koluk, nimnim wain, a orekma lun kosro. Pus sumwos sun me keok ke sripen neutrality ku kutu pa me keok su kupasr nu ke lalalfongi lomwos. Aok, moul lun met fwusr ku in sun kain in ma upa puspus. Tusruktu, pa inge sie pal fwal a mwo. Kusensiyuk‘u pa, Fuka kom ku in orekmakin pal mwomwo inge?
Engunkin Moul in Met Fwusr Lom
3. Kain in kas in kai a kas in sensen fuka Solomon el sang nu sin met fwusr puspus?
3 Met matu elos ku in fwak nu sum la moul lun met fwusr fwa tia on pat, su paye fwak lalos inge. Ke lusen yea na ekasr, kom fwa tille met fwusr. Paenang lela kom in engunkin ma inge ke srakna oasr pal lom! Pa inge me kai lal Togusra Solomon, su el simusla: “Engun met fwusr, in fwusr lom, a lela insiom in akinsemwomwoye kom in len in fwusr lom, a fwasr inkanek lun insiom a in liyaten lun mutom.” Tusruktu, Solomon el sensenkin pa met fwusr: “Ke ma inge eis asor liki insiom, a sisla ma koluk liki ikwom.” Oayepa, el fwak: “Tu pal in fwusr a lenelik lun moul ma lusronten.”—Ekklisiastis 11:9, 10.
4, 5. Efu ku inkanek lalmetmet se nu sin met fwusr in akola mwo ke pal fwasru? Sang me pupulyuk.
4 Ya kom kalem ka la mea kalmen kas lal Solomon inge? In kasre kom in kalem ke kas lal Solomon inge srike nunku ke sie met fwusr su eis sie me sang yok, saap ke sie me usru yok ke mani. Mea el fwa oru ke ma inge? El ku in orekmakin mani inge in moli kain in ma puspus in sang akinsemwomwoyel sifwana—oana ma tulik engunyar sa oru ke me pupulyuk lun Jisus. (Luk 15:11-23) Tusruktu mea fwa sikyuk ke pal se mani inge wanginla? Aok el fwa auli yok ke sripen el tia na karunganang! Nu ke luma saye, pa fwin el orekmakin me sang mwomwo inge ke inkanek mwo in akola nu ke pal fwasru, saap yokiyen mani inge orekmakinyuk ke inkanek mwomwo in sang kasrel. Tokin yea puspus, el eis me insemwomwo ke inkanek in karungin lal, ya kom nunku mu el auli ke sripen el tia na orekmakin mani lal inge ke me akengun ku in akinsemwomwoyel sifwana in len in fwusr lal? Aok el fwa tia asor ku auli ke sripen el orekmakin mani lal inge ke inkanek lalmetmet!
5 Nunku ke len in fwusr lom oana me sang su tuku sin God me, su me sang na paye lun God. Kom e orekmakin fuka ma inge? Kom ku in tia aksaokye ku nukemwa lom a suk in orekmakin me akinsemwomwoye kom sifwana, oru me akengun pal nukemwa a tia nunku ke pal fwasru. Tusruktu, kom fwin oru oinge, kom ku in akpayeye la “pal in fwusr a lenelik lun moul” lom fwa oana “ma lusronten.” Arulanu mwo in orekmakin len in fwusr lom in akola nu ke pal fwasru!
6. (a) Me kai fuka lal Solomon sang kasru nu sin met fwusr? (b) Mea Jeova el lungse in oru nu sin met fwusr, a fuka met fwusr elos ku in akinsemwomwoyeyuk ke ma inge?
6 Solomon el akkalemye ke sie akwuk mwo su ku in kasre kom in orekmakin len in fwusr lom ke inkanek lalmetmet. El fwak: “Esam pa Met Orekomla in len in fwusr lom.” (Ekklisiastis 12:1) Me kai lal Solomon inge pa key mwomwo nu ke inkanek in kutangla—in akos Jeova a oru ma lungse lal. Jeova el fwak nu sin met Israel ma el lungse in oru nu selos: “Tu etu nunak su Nga nunku keyumwos, . . . nunak lun misla, a tia lun koluk, in sot nu sumwos fwinsrak in saflaiyomwos.” (Jeremaia 29:11) Jeova el lungse pa in kasre kom ke “pal fwasru a ke sie fwinsrak” mwomwo. Kom fwin esamul ke orekma lom, nunak lom, a sulela lom, pal fwasru a me fwinsrak ke pal fwasru fwa akpayeyuk.—Fwakyuk 7:16, 17; 21:3, 4.
“Kalukyun nu yurin God”
7, 8. Fuka sie met fwusr el ku in futoto nu sin God?
7 Jemes el akkeye kut in esam Jeova God ke el fwak: “Kalukyun nu yurin God a El fwa kalukot nu yuromwos.” (Jemes 4:8) Jeova pa Met Orekutla, el Fulatlanu, fwal in eis kaksak a mwolanu. (Fwakyuk 4:11) Tusruktu, kut fwin kalukyun nu yurol, el fwa kalukot nu yurumwos. Ya lungse oinge tia me akinsemwomwoye insiom?—Mattu 22:37.
8 Kut ku in kalukyun nu sin Jeova ke inkanek puspus. Ke sie me pupulyuk, met sap Poul el fwak: “Komwos in sekalani in pre, a sano ka wi sang kulo.” (Kolosse 4:2) In kas saye, akyokye oiya mwo lun pre. Nik kom insemwomwo in fwak amen mukena tokin papa tumom ku sie met lili in congregation el pre. Ya kom akilen nunak a pulakin paye lom nu sin Jeova a akkalemye nu sel ma kom nunku, ma kom sangeng ka, a ma upa pus kom sun? Ya kom akkalemye nu sel ma puspus su kom mwekin ka in aketeye nu sin kutu met? Sumwos, a pre su tuku ke insiom kemwa, a orala misla paye. (Filippai 4:6, 7) Ma inge kasre kut in futoto nu sin Jeova a in pulakin la el futoto nu sesr.
9. Fuka sie met fwusr el ku in akos Jeova?
9 Kut liye sie pa inkanek in futoto nu sin Jeova ke kas inge su tuku ke ngun lun God: “Long papu a eis me lutlut, tu kom fwa lalmetmet in len safla lom.” (Soakas 19:20) Aok, kom fwin long Jeova a aksol, kom akola mwo nu ke pal fwasru lom. Kom akkalemye fuka la kom akos Jeova? Paye la kom wi pal nukemwa ke meeting lun met Kristian a kom loang mwo ke program nukemwa. Paye pa la, kom “sunakin papa a nine kiom” ke kom wi ke lutlut lun sou ke Baibel. (Efesus 6:1, 2; Hibru 10:24, 25) Ma inge fwal in kaksakinyuk. Tusruktu, in wekunang, ya kom ‘molela pal’ in akola nu ke meeting, in ridi Baibel pal nukemwa, a in oru research? Ya kom srike in orekmakin ma kom ridi, tu kom in fwasr oana sie ‘met lalmetmet’? (Efesus 5:15-17; Sam 1:1-3) Kom fwin oru ma inge, kom futoto nu sin Jeova.
10, 11. Kain in me lane puspus fuka met fwusr elos ku in eis fwin elos akos Jeova?
10 Ke kas in mutamwauk in buk lun Soakas, met sim el aketeye akwuk lun buk inge Soakas. El fwak, “in eis lalmetmet a lutlut, in akilen kas in etauk, in eis lutlut in oru lalmetmet, in sumwosmwos, a nununku sumwos a mwo, in sang lalmetmet nu sin met nukin, nu sin met fwusr etauk a lalmetmet.” (Soakas 1:1-4) Paenang ke kom ridi a orekmakin kas puspus lun Soakas—a koanon Baibel nukemwa—kom ku in akyokye oiya sumwosmwos a mwo, a Jeova el fwa engankin kom in futoto nu sel. (Sam 15:1-5) Ke kom akyokye nununku sumwos, liyaten, etauk, a lalmetmet ke inkanek yok, kom ku in orala sulela mwomwo su mwo liki meeta.
11 Ya tia fwal in tupan sie met fwusr in akkalemye lalmetmet ke inkanek inge? Mo, meyen met Kristian fwusr puspus elos ku in oru sulela fwal. Paenang, kutu met elos akkalemye sunak nu selos a ‘elos tia pilesru moul in fwusr lalos.’ (1 Timote 4:12) Papa a nine kiyelos elos insemwomwo kelos, a Jeova el akkalemye la met Kristian fwusr inge elos oru insiel engun. (Soakas 27:11) Fwinne elos fwusr, elos ku in lalalfongi la kas inge kasrelos: “Akilenye met sumwosna a suiye met sumwos, tu oasr insemwomwo in saflaiyen met lun misla.”—Sam 37:37.
Oru Sulela Mwo
12. Mea sie me sulela yok sripe su met fwusr elos oru, a efu ku sulela inge ku in sang kasru ke lusen pal loes?
12 Len in fwusr pa sie pal in oru sulela, su kutu sulela lalos oasr ke me fosrnga su tia ku in wanginla. Kutu sulela kom oru in pal inge fwa kasre kom ke lusen pal loes ke pal fwasru. Sulela mwo ku sulela lalmetmet sang kasru mwo in oasr moul insemwomwo a wangin me lain ka. Sulela koluk ku in akkolukye moul nukemwa lom. Nunku la fuka akpayeyen ma inge nu ke sulela luo su kom fwa oru. Ma se meet: Su kom sulela in asruoki nu se? Efu ku ma inge yok sripe? In akpayeye, soakas el fwak: “Fwafwasryesr yurin met lalmetmet, a kom fwa lalmetmet, a el su wi met lalfon fwa ngal ka.” (Soakas 13:20) Nu ke kas saye, kut ku in ekla oana met su kut asruoki nu se—fwin lalmetmet ku lalfon. Piyeka ke ma luo inge kom lungse in ekla nu ka?
13, 14. (a) Sayen asruoki nu sin met puspus, mea pa asruoki el weang? (b) Kain in ma tafongla fuka met fwusr elos enenu in fwasr liki?
13 Ke kom fwin nunku ke asruoki, saap kom nunku ke met kom asruoki nu se. Fwal in nunku oinge, tusruktu asruoki el tia orek nu sin met mukena. Kom fwin liye program ke television, long on, ridi sie me sramsram ke buk, liye pitse mukuikui, ku orekmakin internet, kom asruoki nu ke ma inge nukemwa. Fwin nien sun lun asruoki inge pa in akinsemwomwoye kena lun orek kosro ku orekma sulallel ku akkeye sie met in orekmakin ono koluk, me srui, ku kutu pa ma saye su lain akwuk fulat lun Baibel, kom orek asruoki nu sin “met lalfon,” su oru orekma oana Jeova el wangin ku tia etu ma lungse lal.—Sam 14:1.
14 Saap ke sripen kom wi meeting lun met Kristian pal nukemwa a kom moniyuk ke congregation, saap kom nunku mu kom fukoko tari paenang fwinne mukuikui su akkalemye orekma sulallel, ku on su mwo tunes ka tusruktu oasr kas tia mwo ka tia ku in akkolukye kom. Saap kom nunku pa mu wangin ma koluk kom fwin liye ke kitin pal na sie pitse su orekma lun kosro sikyuk ka ke Internet. Met sap Poul el akkalemye nu sum la kom tafongla! El fwak: “Aenguni yurin met kawuk koluk me akkolukye oiya mwo.” (1 Korint 15:33) Sie me asor yok, meyen pus sin met Kristian fwusr elos lela oiya mwo lalos in akkolukyeyuk ke sripen asruoki koluk lalos. Ke sripe se inge, kaifweang, in fwasr liki kain in asruoki koluk nukemwa. Kom fwin oru oinge, kom ku in akos me kai lal Poul: “A komwos in tia oana luman met fwal se inge, a komwos in ekla ke aksasu lun nunak lomwos, tu komwos in srike lungse lun God, su mwo a me akinsemwomwo a sumwosmwoslanu.”—Rom 12:2.
15. Mea me sulela se akluo su met fwusr elos enenu in oru, a me akkeok fuka elos sun kutu pal ke elos oru ma inge?
15 Pa inge sulela akluo lom. Ke pal fwasru kom enenu in oru sulela lom ke ma kom lungse in oru tokin kom srola liki lutlut. Kom fwin muta ke sie an su arulanu upa in koneak orekma, saap kom silaklak in suk sie orekma su ikakla a fwal nu sum. Kom fwin muta ke sie an kasrup, oasr orekma puspus su kom ku in sulela, kutu ma inge arulanu mwo. Ke sripen oasr karunginyom selos, paenang met luti puspus lom ku papa a nine kiyom elos kaifwe kom in suk sie orekma su yok molo, saap kom ku in eis me kasrup ka. Tusruktu, in eis lutlut in akpa nu ke orekma inge saap ku in eisla pal yok lom in paenang srikla pal lula lom in orekmakin nu sin Jeova.
16, 17. Aketeye la fuka ma simusla puspus ku in kasru met fwusr in srukye nunak sumwos ke orekma.
16 Esam in orekmakin Baibel meet liki kom orala sie sulela. Baibel el akkeye kut in oru orekma in kasru me enenu lun moul, tu kut in ku in kasru moul lasr sifwana in moli mongo, nuknuk, a kutu pa me enenu saye. (2 Tessalonika 3:10-12) Fwinne oinge, in oru sulela nu ke sie orekma oasr pa ma saye eneneyuk. Kut kaifwe komwos in ridi ma simusla puspus inge a nunku ka la fuka ma inge ku in kasru met fwusr in srukye nunak mwo in sang sulela sie orekma: Soakas 30:8, 9; Ekklisiastis 7:11, 12; Mattu 6:33; 1 Korint 7:31; 1 Timote 6:9, 10. Tokin fus inge nukemwa ridiyuk tari, ya kom ku in liye nunak lun Jeova nu ke ma inge, in oru sulela nu ke sie orekma?
17 Orekma lun mano tia enenu in arulanu yok sripe liki orekma in kulansap lasr nu sin Jeova. Fwin lutlut su kom eis ke high school ku in kasre kom in eis sie orekma, ma inge mwo. Kom fwin enenu kutu pa akpa tokin kom srola liki high school, kom a nine a papa tumom enenu in sramsramkin ma inge. Tusruktu, nikmet mwulkunla in liye mwo ke “ma yok sripe puspus”—ke orekma su wise ma lane yok ke ma lun ngun. (Filippai 1:9, 10) Nikmet mwulkunla ma tafongla su Beruk, met sim lal Jeremaia, el orala. El tille engunkin kunokon lal ke orekma mwo in kulansap lal a el ke pengpeng ‘suk ma lulap nu sel sifwana.’ (Jeremaia 45:5) El srike in mwulkunla la wangin ‘ma lulap’ fwin fwalu ku in akfutotoyel nu sin Jeova a tia pa ku in kasrel in molela liki pal in kunanela lun Jerusalem. Kain in luma inge ku pa in sikyuk nu sesr in len inge.
Karunganang Ma Puspus lun Ngun
18, 19. (a) Ma upa fuka met tulan puspus lom elos keok ka, a mea kom pula kelos? (b) Efu ku met puspus elos tia pula la elos musrinsral in ngun?
18 Ya kom liye pitse lun tulik puspus su musrinsral in an puspus su sral sikyuk nu we a akkalemyeyuk ke television ku magasin? Kom fwin liye tari, kalem la oasr nunak in pakomuta lom ka. Ya insiom pula pa kain in pulakin inge nu sin met tulan lom? Efu ku kom pakomutalos? Meyen pus selos musrinsral pa. Elos pula sral su Emos el palye: “ ‘Liye len e fwa tuku,’ Leum Jeova el fwak, ‘a Nga fwa supwela sie sral fwin fwal se inge, tia sral ke bred, ku sie malu ke kof, a ke long kas lun Jeova.’ ”—Emos 8:11.
19 Paye, pus sin met su musrinsral ke ma lun ngun elos tia “nunku ke ma enenu lalos ke ma lun ngun.” (Mattu 5:3) Pus sin met elos tia pulakin la elos musrinsral in ngun. Kutu met elos pulakin mu elos eis me mongo fwal a elos kup. Fwin pa inge ma kom pula, saap ma inge elos eis ke “lalmetmet lun fwalu,” su wangin sripe oana me kasrup, nunak lun science, kena lun mano, a kutu pa ma saye. Kutu sin met elos pulakin mu “lalmetmet” in pal inge ke me luti puspus lun Baibel sufwal nu ke pal inge. Tusruktu, “fwalu tia etu God ke lalmetmet la.” Lalmetmet lun fwalu tia ku in kasre kom in futoto nu sin God. Ma inge “ma lalfon yurin God.”—1 Korint 1:20, 21; 3:19.
20. Efu ku tia sumwos in etawi met puspus su tia alu nu sin Jeova?
20 Kom fwin liye pitse lun tulik puspus su musrinsral inge, ya kom lungse in oana elos? Aok kom srunga! Oasr kutu sin met fwusr ke sou lun met Kristian elos akkalemye kena lalos in oana met musrinsral su raunelosla inge. Paye, met fwusr inge elos nunku mu met fwusr lun fwalu wangin ma upa lalos, elos engunkin moul. Elos mwulkunla la met fwusr inge elos tia fwafwasryesr wi Jeova. (Efesus 4:17, 18) Elos mwulkunla pa, ke fwako koluk su sikyuk ke sripen musrinsral lun ngun. Kutu fwako koluk inge pa puteteyuk lun mutan fwusr a fwako koluk nu ke mano a lungse koluk ku nunak su tuku ke orekma lun kosro, sismok, srui, a orekmakinyen ono koluk. Sral in ngun el orala pa in oasr nunak in srunga a in suk in lain sie sin sie, wanginla lun fwinsrak, a wanginla me kasru lun moul.
21. Kut karungin kut sifwanu fuka in tia srukye ku etawi ella koluk lun met su tia alu nu sin Jeova?
21 Ke sripe inge, kom fwin muta in loom lutlut wi tulik fwusr puspus su tia kulansap nu sin Jeova, nikmet lela oiya lalos in kutangkomla. (2 Korint 4:18) Kutu selos fwa kaskas koluk ke ma lun ngun. In wekunang ma inge, media el orala pa me sramsram kikiap, suk in kiapela metu mu wangin ma koluk in orek kosro, in srui, ku in orekmakin kas fokfok. Lain me kutong nukemwa inge. Tafwela in wi pal nukemwa met su “srukye lalalfongi a ella mwo.” Pal nukemwa kom oru “orekma nu sin Leum.” (1 Timote 1:19; 1 Korint 15:58) Oru kom in sifwana kafofo in wi meeting ke Kingdom Hall a wi orekma lun forfor pal nukemwa. Ke lusen pal kom srakna lutlut ke loom lutlut, srike kom in wi ke orekma lun auxiliary pioneer ke sie pal nu ke sie pal. Akkeye kom ke ma lun ngun ke inkanek se inge, a kom fwa tia munasla in nunak mwo lom.—2 Timote 4:5.
22, 23. (a) Efu ku sie met Kristian fwusr fwa oru sulela puspus su kutu met elos tia kalem ka? (b) Met fwusr elos akkeyeyuk in oru ma fuka?
22 Nunak in ngun mwo lom ku in kol kom in orala sulela puspus su kutu met elos tia kalem ka. Ke sie me pupulyuk, sie met Kristian fwusr su arulanu sumat oana sie musician a sie tulik lutlut lalmetmet su eis four points ke subject nukemwa ke loom lutlut. Ke el srola, el wi papa tumal ke business in aknasnasye-windo lun loom tu elan ku in oru orekma mwo su el sulela oana sie met luti lun peng mwo, ku full-time pioneer. Met luti puspus lal tia kalem ke sripe puspus su el orala ke sulela lal, tusruktu kom fwin futoto nu sin Jeova, kut lalalfongi mu kom ku in kalem ke sulela lal.
23 Ke kom srike in nunku ka la fuka orekmakinyen mano fukoko a ku lun nunak in len in fwusr lom esam in, ‘elosak nu sum sifwanu sie pelung mwo nu ke pal se su fwa tuku, tu kom fwa ku in srukye moul ma patpat su moul paye.’ (1 Timote 6:19) Kaifweang in ‘esam Met Orekomla’ in len in fwusr lom—a in lusen moul lom. Pa inge inkanek sefwanna ku in orek nu ke pal fwasru in mwo, su fwa wangin saflaiye.
Mea Kom Ku In Fwak?
• Me kai fuka su ngun lun God el kasru met fwusr in akola nu ke pal fwasru lalos?
• Mea kutu inkanek su met fwusr elos ku in “futoto nu sin God”?
• Mea kutu sulela lun met fwusr su ku in kasrelos ke pal fwasru lalos?
[Pictures on page 23]
Ya kom lela me kafofo lom sifwanu in eisla ku a engun ke moul in fwusr lom?
[Picture on page 25]
Met Kristian fwusr su lalmetmet elos karunganang moul in ngun lalos mwo a kalem