Suk Me Kolyuk lun God ke Ma Nukewa
“God se inge el God lasr nu tok ma patpat. El fwa Met Kol lasr nu ke pal se kut mise.”—SAM 48:14.
1, 2. Efu ku kut enenu in akos kolyuk lun Jeova liki na in lulalfongi ke lalmetmet lasr sifwana, a kusensiyuk puspus fuka siyukyak?
KUT ku in nunku ke ma puspus su wangin sripe ku ma puspus su oasr me sensen ka mu ma mwomwo a tia koluk. (Soakas 12:11) Kut fwin lungse na paye in oru ma se su tia fwal nu sin sie met Kristian in oru, insiesr ku in suk ke sripe puspus pal nukewa in oru ma inge. (Jeremaia 17:5, 9) Ke ma inge, met sim lun sam el akkalemye lalmetmet yok ke el pre nu sin Jeova: “O supala kalem lom a paye lom. Lela ma inge in kol yu.” (Sam 43:3) El lulalfongi Jeova, a tia ke lalmetmet lal sifwana su arulana srikla, a Jeova pa sropon me kolyuk mwo emeet su ku in kasrel. In oana met sim lun sam, kut enenu pa in ngetak nu sin God in kol kut.
2 Tusruktu, efu ku kut enenu in lulalfongi kolyuk lun Jeova yok liki ma nukewa? Ngea kut enenu in suk ma inge? Oiya puspus fuka kut enenu in akkeye tu kut in eis ma lane puspus ka, a ke inkanek fuka Jeova el kol kut ke pal inge? Kusensiyuk yok sripe nukewa inge fwa akuteyuki ke me lutlut se inge.
Efu ku Kut in Lulalfongi ke Kolyuk lun Jeova?
3-5. Efu ku kut ku in lulalfongi yok ke me kolyuk lun Jeova?
3 Jeova pa Papa tumasr su oasr in kosrao. (1 Korint 8:6) El etu na paye kais sie sesr a el ku in etu pa ma oasr ke insiesr. (1 Samuel 16:7; Soakas 21:2) Togusra Devid el fwak nu sin God: “Kom etu mutenguk a tu luk. Kom etu nunkuk omeet me. Tu wangin sie kas ke oalik, a kom! O Jeova, kom etu nu kemwa.” (Sam 139:2, 4) Ke sripen Jeova el ete kut na paye, fuka kut ku in alolo ka la el etu ma mwo emeet nu sesr? Sayen ma inge, Jeova el lalmetmet liki ma nukewa. El liye ma nukewa, el tuni yok liki kutena met, a el etu saflaiyen ma puspus ke mutamwauk me. (Isaia 46:9-11; Rom 11:33) El “God, su mukena lalmetmet.”—Rom 16:27.
4 In wekunang, Jeova el lungse kut a el lungse pal nukewa ma mwo u in emeet nu sesr. (Jon 3:16; 1 Jon 4:8) Oana sie God su oasr lungse yok yuro, el arulana kulang nu sesr. Met tuma lutlut Jemes el simusla: “Me kite mwo nu kemwa a kite fwal ma lung me, a tuku lung me yurin Papa tumun kalem.” (Jemes 1:17) Elos nukewa su lela God lan kololos elos eis me insemwomwo yok ke kulang lal.
5 Ma se safla, Jeova el God kulanu. Ke ma inge, met sim lun sam el fwak: “El su muta in an lukma sin El su Fulatlanu, el fwa mutanu ye lulin El su Kulanu. Nga fwa fwak nu sin Jeova: ‘Kom me loeyuk luk a seng luk, God luk, su nga lulalfongi.’” (Sam 91:1, 2) Kut fwin akos kolyuk lun Jeova, kut suk me loeyuk mwo emeet, meyen el akpayeye akwuk lal nukewa. Fwinne oasr pal kut sun me lain, Jeova el fwa kasre kut. Pal nukewa, el fwa tia akasorye kut. (Sam 71:4, 5; Ridi Soakas 3:19-26.) Aok, Jeova el etu ma mwo emeet nu sesr, el lungse ma mwo emeet nu sesr, a oasr ku lal in ase ma mwo emeet nu sesr. Aok fuka lupan tafongla in nunak kut fwin tia eis a akilen me kolyuk lal! Tusruktu, ngea kut enenu kain in kolyuk inge?
Ngea Kut Enenu Me Kolyuk?
6, 7. Ngea kut enenu me kolyuk lun Jeova?
6 Aok, kut enenu kolyuk lun God ke lusen moul lasr, mutamwauk ke kut tulik srisrik nu ke kut matou. Met sim lun sam el fwak: “God se inge El God lasr nu tok ma patpat. El fwa Met Kol lasr nu ke pal se kut mise.” (Sam 48:14) In oana met sim lun sam, met Kristian nukewa su lalmetmet elos fwa tia tui in pang nu sin God ke me kolyuk lal.
7 Paye la, oasr pal su kut pulakin la kut enenu na paye me kasru yok. Kutu pal kut sun “ongoiye,” saap ke sripen kut sun me kalyai, sie mas upa, ku kut sisila liki orekma lasr. (Sam 69:16, 17) Ke pal in ma upa oinge, arulana mwo in forla nu sin Jeova, kut enenu in lulalfongi la el fwa akkeye kut in muteng ka a in kasre kut in oru sulela mwomwo puspus. (Ridi Sam 102:17.) Tusruktu, kut enenu pa kasru lal ke pal puspus saye. Ke sie me pupulyuk, kut fwin sramsram nu sin met tulan lasr ke peng mwo lun Togusrai, kut enenu me kolyuk lun Jeova kut fwin lungse in oru orekma lasr in sang ma lo ke inkanek mwomwo. A ke kutena pal su kut enenu in oru sulela lasr—fwin ke me akengan, ke nuknuk a me yun lasr, ke asrouki lasr, lutlut lasr, ku ke kutena ma—kut ku in akkalemye lalmetmet ka kut fwin akos a orekmakin akwuk mwomwo nukewa lun Jeova nu ka. Aok, kut enenu me kolyuk lal nu ke oiya nukewa ke moul lasr.
Me Sensen Fwin Tia Suk Me Kolyuk lun God
8. Mea orekma lal If el akkalemye ke pal se el kang fwokinsak se su God el sapkin nu sel elan tia kang?
8 Tusruktu, esam la kut enenu in akos me kolyuk lun Jeova ke inse mulala lasr. God el tia patok kut in akos kolyuk lal kut fwin srunga in oru. Met se meet su oru sulela lal in tia akos kolyuk lun Jeova pa If, a me srikasrak lal el akkalemye la oasr fwako koluk ke kain sulela tia mwo inge. Nunku pa, ke kalmeyen orekma lal. If el kang fwokinsak se su God el tia lela elan kang ke sripen el lungse in “oana God su etu ma mwo a ma koluk.” (Genesis 3:5) Orekma lal el akkalemye la el lungse in oru sie kunokon su fwal nu sin God mukena, a el oru sulela lal sifwana ke ma mwo a ma koluk a el tia akos masap lun Jeova. Ke ma inge, el pulesru kolyuk lun Jeova. El lungse in oru el an sifwana leum lal. Mokul tumal, Adam, el oru pa orekma in lain oapana inge.—Rom 5:12.
9. Kut fwin pulesru me kolyuk lun Jeova, mea kut oru na paye, a efu ku oiya se inge tia inkanek lalmetmet?
9 Ke pal inge, kut fwin tia akos me kolyuk lun Jeova, kut tia pana akilen sumwos lun God in oru sulela lal ke ma mwo a ma koluk. Ke sie me pupulyuk, nunku ke sie met su akkeye sie oiya su lungse in liye me rid a petsa fokfok. Fwin el wi ke congregation lun met Kristian, el etu tari masap lun God ka. Ma fokfok el tia enenu in akkalemyeyuk in masrlolos, a paye pa la met Kristian elos tia enenu in engankin in liye ku ngetnget nu ka. (Efesus 5:3) Fwin el tia akos masap lun Jeova ka, met inge el srunga in akilen me kolyuk lun Jeova, a el pulesru God in el pa sifwe ku leum Lal. (1 Korint 11:3) Ma inge el tia inkanek lalmetmet se, meyen oana ke ma Jeremaia el fwak, “tia ma lun met su fwasr in aksumwosye fwalkel.”—Jeremaia 10:23.
10. Efu ku kut enenu in orekmakin sukosok lasr in oru sulela ke inkanek fwal a mwo?
10 Oasr kutu met saap elos tia insese nu ke kas lal Jeremaia, elos nunku mu ke sripen God el ase nu sesr sukosok in oru sulela lasr, paenang el tia toasr sesr kut fwin orekmakin sukosok lasr inge. Tusruktu, nikmet mulkunla la sukosok in oru sulela el sie kunokon a sie me sang. Kut ku in eis nununku ke ma puspus su kut fwak a oru. (Rom 14:10) Jisus el fwak: “Tu oalu kaskas ke ma puspus su on insie.” El fwak pa: “Tu nunak koluk, akmas, kosro, pukus, pusr, kikiap, enum, tuku insie me.” (Mattu 12:34; 15:19) Ke ma inge, kas a orekma lasr akkalemye ma oasr ke insiesr. Ma inge akkalemye oiya paye lasr. Pa inge sripe mwomwo nu sin sie met Kristian el an suk me kolyuk lun Jeova ke ma nukewa. Ke inkanek se inge, Jeova el ku in koneak la met oinge el ‘sumwos insiel’ a fwa ‘oru mwo’ nu sel.—Sam 125:4.
11. Mea kut ku in lotela ke ma sikyak nu sin met Israel?
11 Esam ke me sramsram ke ma sikyak nukewa ke met Israel. Ke pal se mutanfwal se inge el orala sulela mwomwo lalos, in akos masap nukewa lun Jeova, Jeova el karunginelos. (Josua 24:15, 21, 31) Tusruktu, ke pal puspus, elos orekmakin sukosok lalos in oru sulela ke inkanek tia fwal. In len lal Jeremaia, Jeova el fwak kelos: “A elos tia long, ku kolang srelos, a fwasr inkanek in papu lalos sifwana, a in likkeke lun inse koluk lalos, a kololtuluk, a tiu fwasr nu meet.” (Jeremaia 7:24-26) Sie me asor na paye! Lela kut in tia pulesru me kolyuk lun Jeova a fwasr ke nunak lasr sifwana a ekla sie met “kololtuluk a tui fwasr nu meet” ke sripen oiyen likkeke a kena koluk lasr!
Mea Ma Eneneyuk nu ke Akosyen Papu lun God?
12, 13. (a) Kain in oiya mwo fuka kasre kut in akos me kolyuk lun Jeova? (b) Efu ku lulalfongi el yok sripe?
12 Lungse lasr nu sin Jeova oru kut in akos me kolyuk lal. (1 Jon 5:3) Tusruktu, Poul el akkalemye ke ma se su kut enenu yok ke pal se el fwak: “Tu kut fwufwasryesr ke lulalfongi, a tia ke liye.” (2 Korint 5:6, 7) Efu ku lulalfongi el yok sripe? Aok, Jeova el kol kut ke “inkanek sumwosmwos,” tusruktu inkanek inge tia kol kut nu ke me kasrup ku oru kut in oasr mwal yok puspus ke fwal se inge. (Sam 23:3) Ke sripe se inge, mutun lulalfongi lasr enenu in loang akmwoye nu ke me insemwomwo puspus su tuku ke orekma lasr in kulansap nu sin Jeova. (Ridi 2 Korint 4:17, 18.) A lulalfongi el kasre kut in akfwalye ma oasr yurosr tari in sang kasru nu ke me enenu lasr.—1 Timote 6:8.
13 Jisus el akkalemye la in wi ke alu paye kut enenu in kisekin kut sifwana, a enenu pa lulalfongi lasr in orekmakin oiya inge. (Luk 9:23, 24) Kutu sin met oaru su alu nu sin God elos oru kafweang yok lalos in kisekinelosla sifwana, elos muteng ke moul sekasrup, me lain, srisri, a me kalyai upa puspus. (2 Korint 11:23-27; Fwakyuk 3:8-10) Lulalfongi yok mukena ku in kasrelos in pulakin me insemwomwo ke elos muteng. (Jemes 1:2, 3) Lulalfongi fukoko el oru kut in lulalfongi na paye la in akos me kolyuk lun Jeova pa inkanek mwo emeet pal nukewa. Ma inge el ku in akinsemwomwoye kut pal nukewa. Wangin kutena kain in nunak in alolo lasr la me insemwomwo nu selos su oaru in muteng el yok liki kutena me keok ke pal inge.—Hibru 11:6.
14. Efu ku Hegar el enenu in akkalemye inse pusisel?
14 Nunku pa ke oiyen inse pusisel la fuka ma inge ku in kasre kut in akos me kolyuk lun Jeova. Me srikasrak lal Hegar, mutan kulansap lal Sera, el akkalemye ma inge. Ke pal se Sera el akilen la el tia ku in orek tulik, el sang Hegar nu sel Ebream, a Hegar el pututuyuk nu sel Ebream ke sie tulik. Tokin ma inge, Hegar el ekla insefulat nu sin mutan leum lal. Ke ma inge, Sera el “akkeokyel,” a Hegar el kaengla lukel. Oasr sie lipufan lun Jeova osun nu sel Hegar a el fwak nu sel: “Folokla nu yurin mutan kato lom, a akpusiselye kom ye paul.” (Genesis 16:2, 6, 8, 9) Saap Hegar el lungse in long ke kas in kolyuk saye. Kalem la in akos kas in kolyuk lun lipufan, el enenu in sisla oiyen insefulat lal. Aok, Hegar el akkalemye inse pusisel a el oru ma lipufan sa fwak nu sel, a tulik mokul se natul, su pangpang Ismael, el isusla ke loom sin papa tumal su oasr moul mwomwo a misla we.
15. Akkalemye ke kutu oiya su kut enenu in akkalemye inse pusisel in akos me kolyuk lun Jeova nu ka.
15 Kut enenu pa in akpusiselye kut sifwana ke kut akos a orekmakin me kolyuk lun Jeova. Kutu sin met Kristian saap elos enenu in etu a insese nu ka la me akengan su elos insemwomwokin el tia me akinsemwomwoye Jeova. Sie met Kristian saap el aktukulkulye sie met a el enenu in taltal koluk nu sel. Ku el orala ma tafongla a el enenu in akkalemye ma inge a siyuk nunak munas ka. Na fuka fwin sie met el orala sie ma koluk upa? El enenu in akpusiselyel sifwana a akkalemye ma koluk lal nu sin met elder puspus. Sie met lili saap el ku in sisila ka. Tusruktu el ku in sifwilpa foloku nu ke congregation, el fwin akpusiselyel in auliyuk a forla liki ma koluk lal. Ke oiya nukewa inge a ke kutupa ma sikyak su oapana inge, oasr kas in akkeye yok in Soakas 29:23 su fwak: “Fulang lun sie met fwa akpusiselyel, a el su inse fwokpap fwa sang nunak.”
Fuka Jeova el Kol Kut?
16, 17. Fuka kut ku in eis ma lane yok ke Baibel oana sropon kas in kasru su tuku sin God?
16 Sropon me kasru ku me kolyuk yok lun God pa Baibel, su Kas Lal. (Ridi 2 Timote 3:16, 17.) In eis ma lane yok ke Kas lun God, mwo kut fwin tia sano in oasr ma upa sikyak meet liki kut suk kas in kasru ke ma Simusla. A, kut enenu in oru sie akwuk mwomwo in ridi Baibel len nukewa. (Sam 1:1-3) Ke inkanek oinge, kut ku in etu ma oasr ke Kas lun God. Ke ma inge kut ku in etawi nunak lun God, a ma inge ku in kasre kut in tu na ku a muteng fwin oasr ma upa puspus su sikyak ke pal su kut tia nunku ka mu ku in sikyak.
17 In wekunang, arulana yok sripe in nunku yok ke ma kut rid tari ke ma Simusla a kut in pre ka. Kut fwin nunku yok ke fus puspus in Baibel, kut ku in nunku akmwoye la fuka me lutlut ka el ku in orekmakinyuk nu ke oiya puspus. (1 Timote 4:15, NW) Kut fwin sun ma upa puspus, kut pre nu sin Jeova, siyuk ke kasru tu kut in koneak me kolyuk su kut enenu. Ngun mutal lun Jeova fwa kasre kut in esam me lutlut mwomwo a akwuk mwomwo puspus lun ma Simusla su kut ridi tari ka in Baibel ku ke me rid puspus su tuku ke Baibel.—Ridi Sam 25:4, 5.
18. Ke inkanek fuka Jeova el orekmakin u lasr oana met Kristian in kol a kasre kut?
18 U lasr oana met lili el siepa inkanek mwo in suk ke kas in kasru lun Jeova. Yok sripe lun u se inge pa “met kulansap oaru a lalmetmet” wekunang Governing Body lal, su akola a supwelik kas in kasru su oasr ke me rid puspus a program nu ke meeting a toeni lulap nukewa. (Mattu 24:45-47; Orekma 15:6, 22-31) In wekunang, nu ke u lasr oana met Kristian oasr met lili puspus su fukoko lulalfongi lalos, yokna met elder nukewa, su arulana fwal in sang me kasru a kas in kasru su tuku ke ma Simusla. (Isaia 32:1) Met fwusr puspus ke sou lun met Kristian puspus oasr yurulos kutupa me kasru su elos ku in orekmakin. Papa a nine kiyelos sapkinyuk sin God elos in akkalemye kas in kolyuk lal nu selos, a tulik fwusr elos enenu in suk kas in kasru sin papa a nine kiyelos.—Efesus 6:1-3.
19. Kain in me insemwomwo fuka kut engankin ke sripen kut suk pal nukewa me kolyuk lun Jeova?
19 Aok, ke inkanek puspus, Jeova el sang me kasru, a kut enenu in orekmakin yok me kolyuk inge. Ke pal se met Israel elos akpayeye oaru lalos, Togusra Devid el fwak: “Papa tumasr elos lulalfongi kom; elos lulalfongi a kom molelosla. Elos pang nu sum, a eis molela, elos lulalfongi kom a tia akmwekinyeyuk.” (Sam 22:3-5) Kut fwin akkalemye lulalfongi in akos me kolyuk lun Jeova, kut tia pana “akmwekinyeyuk.” Kut fwa tia akasoryeyuk ke fwinsrak lasr. Kut fwin tia fungfung nu ke lalmetmet lasr sifwana, a ‘esung inkanek lasr nu sin Jeova,’ ma inge fwa ase me insemwomwo yok fwinne ke pal inge. (Sam 37:5) A kut fwin kafweang in muteng pal nukewa ke inkanek mwo inge, kut ku in engankin me insemwomwo nukewa inge nu tok ma patpat. Togusra Devid el simusla: “Tu Jeova el lungse nununku sumwos, a tia fwasr liki met mwo lal. Elos karunginyuk ma patpat . . . Met sumwosmwos elos fwa usru fwalu, a muta we ma patpat.”—Sam 37:28, 29.
Ya Kom Ku In Akuteye?
• Efu kut lulalfongi me kolyuk lun Jeova?
• Kut fwin pulesru me kolyuk lun Jeova, ma inge el akkalemye mea?
• Mea kutu oiya su sie met Kristian el enenu in akkalemye ke inse pusisel?
• Fuka Jeova el kasre kut ke pal inge?
[Pictures on page 12]
Ya kom ngetak nu sin Jeova ke oiya nukewa lun moul lom?
[Picture on page 13]
If el forla liki kolyuk lun Jeova
[Picture on page 14]
Kain in oiya fuka Hegar el enenu fwin el lungse in akos masap lun lipufan nu sel?