Wangin Me Meun Su Lumeyuk Lain Kom Fwa Eis Kutangla
“Wangin me meun su lumeyuk lain kom fwa kapkapek.”—ISAIA 54:17.
1, 2. Fuka ma puspus su sun Met Lo lun Jeova fwin an Albania el sang me akpayeye nu ke payeiyen Isaia 54:17?
YEA PUSPUS somla, oasr sie mutanfwal srisrik su oasr eol puspus we in an Europe, su oasr u lun met Kristian pulaik we. Communist Government in an se inge tia lulalfongi ka la oasr God elos oru ke ku lalos kewa in kunauselosla. Fwinne elos suk in orekmakin me akkoluk upa, niyen prison, a kaskas koluk lun media, ma inge nukewa tia ku in kunauselosla. Su u se inge? Elos pa Met Lo lun Jeova in an Albania. Fwinne ke akwuk in oru tukeni lalos a orekma in luti lalos upa a yok lainye, elos muteng wi kafweang yok lalos ke lusen yea puspus in akfulatye alu lun met Kristian paye a sang kaksak nu ke en Jeova. Ke yea taria ke kise lun branch ofus sasu lalos, oasr sie Met Lo su oaru ke lusen pal loeloes el fwak: “Fwinne Setan el kafweang yok in kunauskutla, tusruktu el kuf a tia kutangla pal nukewa a Jeova pa kutangla pal nukewa!”
2 Ma inge nukewa akkalemye me akpayeye mwomwo nu ke payeiyen mwulela lun God nu sin met kulansap nukewa su simusyukla in Isaia 54:17: “Wangin me meun su lumeyuk lain kom fwa kapkapek; a loa nu kemwa su fwa tuyuk lain kom in nununku kom fwa lusla.” Me sramsram ke ma puspus su sikyak fwin fwalu sang me akpayeye nu ka la wangin kutena ma su fwal lun Setan el ku in oru in sang kunausla a in tulokinye alu paye nu sin Jeova God su orek sin met kulansap lal su mwulela moul lalos nu sel.
Setan el Orala Me Meun Puspus Tusruktu el Tia Kutangla
3, 4. (a) Mea weang pa me meun puspus lun Setan? (b) Ke inkanek puspus fuka sang me akpayeye nu ka la me meun nukewa lun Setan tia ku in eis kutangla?
3 Me meun su orekla in orekmakinyuk nu sin met puspus su wi ke alu paye pa masap su orekla in sang tulokinye orekma in alu lalos, orekma sulallel nu selos, elos kalbous, a ‘oru me akkoluk ke inkanek lun masap.’ (Sam 94:20) Aok, in kutu an, fwinne ke pal inge, Met Lo lun Jeova su lutlutkin me lutlut inge, elos oana met Kristian paye su “srifweyuk” ke oiyen oaru a paye lalos nu sin God.—Fwakyuk 2:10.
4 Ke sie me pupulyuk, oasr sie branch ofus lun Met Lo lun Jeova el reporti ka la ke lusen yea sefwanna, oasr case 32 su met kulansap lun God elos akkolukyeyuk ke mano ke elos wi oru orekma lun forfor in luti. In wekunang ma inge, oasr pa oiya 59 ke ma police elos oru in sruokye a filiye ke niyen prison met fwusr a met matou, mokul a mutan puspus su oru orekma in luti nu sin met puspus. Kutu selos eis fingerprint lalos, petsaiyukla elos, a filiyuki elos in niyen prison in akkalemye mu elos oana met koluk. Kutu selos akkolukyeyuk ke kain in me akngalye su orek nu ke manolos. Ke sie pa an, ke pal inge oasr documented cases su pise ka oasr ke 1,100 ke Met Lo lun Jeova su kapuri ke iwen kapur, oasr masap nu selos in sang mani oana molin ma koluk su akkalemyeyuk mu elos, ku sringsring upa orek nu selos. Pus liki case 200 sikyak ke len se su elos tukeni nu sie in akfulatye mise lun Jisus! Ne oinge, ngunin Jeova el akkeye met nukewa lal tu elos in moulla fwinne oasr ma upa puspus su elos sun, in an se inge a in an puspus saye. (Zekaraia 4:6) Mulat upa lun met lokwalok nukewa tia ku in tulokinye met nukewa su kaksakin Jeova. Aok, kut lulalfongi la wangin kutena me meun ku in kunausla akwuk lun God.
Loa Kikiap Nukewa Fwa Kunausyukla
5. Kain in kas kikiap fuka orekmakinyuk in sang lain met kulansap lun Jeova in century se meet?
5 Isaia el palye la met kulansap lun God elos fwa kunausla kutena loa su lainelos. In century se meet, met Kristian elos akkolukyeyuk pal nukewa ke kaskas kikiap lun met su lainelos, a elos akkalemyeyuk pal nukewa oana met orekma koluk. Kas su simusyukla in Orekma 16:20, 21 el akkalemye oiya inge: “Met inge su met Ju, eltal arulana akangonye siti sesr, a fwakak ma lo su tia fwal nu sesr in eis ku in liaung, meyen kut met, Rom.” Ke sie pa ma sikyak, met puspus lun alu su lain elos srike in kufusla nunak lun met kol puspus lun siti se in lain met tuma lutlut nukewa lun Kraist, elos fwak mu: “Met inge su lungasla fwalu, elos tuku pa nu yenu, a elos inge nu kemwa oru me lain ma sap lun Sisar.” (Orekma 17:6, 7) Met sap Poul el akkalemye oana “met angang” a sie met kol lun alu srisrik su purakak tunyuna “fwin fwalu.”—Orekma 24:2-5.
6, 7. Mea sie inkanek su met Kristian paye elos ku in kutangla ke kas kikiap a kas in akkolukyelos?
6 In fwal nu ke ma sikyak inge, tia me aklutye fwin met Kristian ke pal inge elos sun pa kain in kaskas kikiap nukewa in akkolukye e a oiya mwomwo lalos. Ke inkanek fuka kut ku in kutangla kain in kas kikiap inge su akkolukye kut?—Isaia 54:17.
7 Kain in kaskas kikiap a orekma in akkoluk nukewa inge akpayeyuk la tia paye ke inkanek lun ella a orekma mwomwo lun Met Lo lun Jeova. (1 Piter 2:12) Pal nukewa met Kristian elos kafweang in akpayeye la elos akos masap lun anu a oasr oiya nasnas nu ke moul lalos su akkalemyeyuk ke nunak mwomwo lalos in sang kasru met puspus, kaskas kikiap lun met lokwalok lalos pal nukewa akpayeyuk la arulana sito a tia paye. Ella mwomwo lasr el me akpeyeye la kut sumwos tia oru ma koluk in oana ke ma met lokwalok elos fwak. Ke met puspus elos liye kafweang lasr nu ke orekma mwomwo, elos akkeyeyuk pal nukewa in kaksakin Papa tumasr su oasr in kosrao a elos akilen oiya mwomwo ke moul lun met kulansap puspus lal.—Isaia 60:14; Mattu 5:14-16.
8. (a) Mea eneneyuk kutu pal in sang loangela lulalfongi lasr fwal nu ke ma Simusla? (b) In etawi Kraist, fuka kut ku in kutangla ku lain loa kikiap su lain kut?
8 In wekunang ella mwomwo lasr oana met Kristian, kutu pal saap oasr ma eneneyuk in akkalemye nu ke inkanek pulaik in sang loangela lulalfongi lasr fwal nu ke ma Simusla. Sie inkanek su eneneyuk pa in orek appeal nu sin government a nu sin court in wise me kasru nu sesr. (Ester 8:3; Orekma 22:25-29; 25:10-12) Ke pal se Jisus el oasr fwin fwalu, oasr kutu pal el lain met kaskas koluk, a el akkalemye la kaskas kikiap lalos tia paye. (Mattu 12:34-37; 15:1-11) In etawi Jisus, kut ku in orekmakin pal mwomwo lasr in akkalemye nu sin met puspus me akuteye kalem a sumwos nu ke lulalfongi paye lasr. (1 Piter 3:15) Lela kut in oru sulela mwomwo in tia kaskaskou ke loom lutlut, ke niyen orekma, ku kaskaskou lun met puspus in sou su tia lulalfongi in tulokinkuti in tia akkalemye ma paye ke Kas lun God.—2 Piter 3:3, 4.
Jerusalem—“Sie Eot Toasr”
9. Jerusalem fuka el lumeyuk nu ke “eot toasr” su akkalemyeyuk in Zekaraia 12:3, a su aolyen ma inge nu fwin fwalu?
9 Kas palu lal Zekaraia akkalemye ke sripe su paenang mutanfwal puspus elos lain met Kristian paye. Loang akmwoye nu ka la mea Zekaraia 12:3 el akkalemye: “A a fwa te oru in len sa, Nga fwa oru Jerusalem sie eot toasr nu sin mutanfwal nu kemwa.” Nu ke kain in Jerusalem fuka kas palu inge el sramsramkinyuk? Kas palu lal Zekaraia ke Jerusalem el orekmakinyuk nu ke “Jerusalem in kosrao,” ku Togusrai in kosrao su met Kristian akmusrala pangonyuk elos nu ka. (Hibru 12:22) Oasr ma lula sin met su fwa usrui Togusrai lun Messaia srakna oasr fwin fwalu. Wekunang met nukewa su oasr ke u lun “sip ngie” su welulos in kulansap nu sin God, elos akkeye met puspus in forla nu ke Togusrai lun God ke pal inge su srakna oasr pal lula. (Jon 10:16; Fwakyuk 11:15) Oiya fuka met in mutanfwal puspus elos akkalemye nu ke me solsol nu selos inge? Kain in me kasru fuka Jeova el sang nu sin met nukewa su wi ke alu paye ke pal inge? Lela kut in liye me top nu ka ke kut tuni ke kalmeyen Zekaraia sapta 12. In oru ma inge, kut ku in akkeye lulalfongi lasr la ‘wangin kutena me meun fwa kapkapek’ in lain met akmusrala nukewa lun God a met nukewa su welulos su mwulela moul lalos nu sin God.
10. (a) Efu ku met kulansap lun God elos akkolukyeyuk? (b) Mea sikyak nu sin met puspus su srike in akwanginyela “eot toasr” inge liki inkanek lalos?
10 Zekaraia 12:3 el akkalemye la mutanfwal puspus elos “arulana kinet.” Fuka sikyak lun ma inge? God el sapkin ke peng mwo lun Togusrai in fwa sulkakinyukelik. Met Lo lun Jeova elos arulana akpayeye kunokon inge in sulkakin peng mwo. Tusruktu, orekma in sulkakinelik Togusrai se inge su oana me fwinsrak sefwanna lun metu el ekla “sie eot toasr” nu sin mutanfwal puspus. Elos kafweang in kunausla ku eisla ma inge ke elos srike in tulokinye met orekma lun Togusrai inge. In oru ma inge, mutanfwal puspus su lain met orekma lun Togusrai elos “arulana kinet” nu selos sifwana, su kinet inge oasr ke an puspus. Fwinne ke oiya lalos su musalelik ke sripen elos tia eis kutangla pal nukewa su orala me mwekin yok nu selos. Elos tia ku in oru met nukewa su wi ke alu paye in misla a tia kaskas, su aksaokye kunokon lalos in sulkakin “mwo sasu ma patpat” lun Togusrai lun God meet liki saflaiyen akwuk koluk inge. (Fwakyuk 14:6) Ke pal se oasr sie met liaung ke prison fwin an Africa el liye orekma sulallel su orek nu sin met kulansap lun Jeova, el fwak: ‘Komwos sisla pal lomwos ke wangin sripe ke komwos kafweang in kalyai met puspus inge. Elos tia ku in fuleak. Tusruktu elos puseni na paye.’
11. Fuka God el akpayeye mwulela lal su simusyukla in Zekaraia 12:4?
11 Ridi Zekaraia 12:4. Ke kas in pupulyuk Jeova el orala mwulela lal la el fwa akunye a uni ors nukewa ke “langungung, [“me fosrnga,” NW]” su lain met tutafpo pulaik nukewa lun Togusrai. El akpayeye mwulela lal inge. Ke sie me pupulyuk, ke sie an su oasr masap su tia lela alu paye in orek we, met lain inge elos tia ku in kosrala met kulansap lun God in eis me mongo nalos in ngun. Oasr sie newspaper el akkalemye mu Met Lo lun Jeova elos orekmakin balloon puspus in us me rid lalos nu ke mutanfwal! Mwulela lun God nu sin met kulansap oaru lal akpayeyuk: “Nga fwa ikasla mutuk nu fwin loom sel Juda, a fwa uni ors nukewa nutin mutanfwalu ke kun.” Oana met kun ke sripen mulat lalos, paenang met lokwalok lun Togusrai elos nukin la mea elos fwa oru. Tusruktu nu sesr, kut lulalfongi la Jeova el fwa molela met kulansap lal oana sie u a el fwa karunginelos a sang ma enenu lalos.—2 Togusra 6:15-19.
12. (a) Ke oiya fuka Jisus el ta e ke pal se el oasr fwin fwalu? (b) Fuka met lula sin met akmusrala elos ta e ke me pupulyuk, a mea fwokin ma inge?
12 Ridi Zekaraia 12:5, 6. “Met suksuk lun Juda” el lumeyuk nu sin met puspus su oru kolyuk lalos in masrlon met kulansap lun God. Jeova el akkeye met nukewa inge elos in ku in moniyuk in sang kasru nu ke orekma nukewa lun Togusrai fwin fwalu. Ke sie pal, Jisus el fwak nu sin met tuma lutlut lal: “Nga tuku in sisye e nu fwin fwalu.” (Luk 12:49) Aok, el mutamwauk in oru sie e in kas pupulyuk. Ke moniyuk lal in sulkakin peng mwo, Jisus el oakiya Togusrai lun God in pa me sramsram se su yok sripe emeet su el akkalemye nu sin met puspus. Ma inge orala met Ju puspus in oasr akukuin yok ka. (Mattu 4:17, 25; 10:5-7, 17-20) Ke oiya inge, “oana sie pan in e in masrlon etong a oana sie kap furrur in masrlon kapin witu,” met kulansap nukewa lun Kraist ke pal lasr inge elos ta e oana ke kas in pupulyuk. In yea 1917 buk se inge The Finished Mystery (Ma Lukma Akkalemyeuk Tari)a el akkalemye inkanek yok ke oiya koluk lun Kristendom. Ma inge oru met kol puspus lun alu elos in akkalemye mulat lalos. Ke kutu pal somla, Kingdom News No. 37, su oasr ke sifwe se inge “Saflaiyen Alu Kikiap Apkurun Me!” el mokle met puspus in akkalemye oiya na paye lalos fwin elos lungse in sang kasru nu ke Togusrai ku elos lain ma inge.
“Loom Nuknuk lun Juda” Moliyukla
13. Mea kalmen kas se inge “loom nuknuk lun Juda,” a efu ku Jeova el molela met nukewa su muta we?
13 Ridi Zekaraia 12:7, 8. In an Israel in pal meeta, loom nuknuk el liyeyuk pal nukewa fwin anu, ke pal puspus orekmakinyuk sin met liaung sip a sin met imae. Met inge pa met se emeet su ku in akkolukyeyuk a elos enenu me karungin yok fwin oasr sie mutanfwal su met lokwalok fwin tuku in kunausla siti lun Jerusalem. Kas se inge “loom nuknuk lun Juda” el akkalemye la met lula sin met akmusrala ke pal inge elos oasr in imae, oana ke kas in pupulyuk, a elos tia muta lun siti su oasr pot ka. In pal ingo elos tia sangeng in sang me karungin yok nu ke orekma nukewa lun Togusrai lun Messaia. Jeova lun un met meun el fwa molela “loom nuknuk lun Juda meet” meyen elos pa u se meet su Setan el lungse in akkolukye.
14. Fuka Jeova el sang me karungin nu sin met nukewa su oasr in “loom nuknuk lun Juda” a kasrelos in tia aktukulkulyeyuk?
14 Aok, oasr ma simusla ke ma sikyak puspus la Jeova el sang kasru a me karungin nu sin met akmusrala inge oana met tutafpo lun Togusrai su oasr in “loom nuknuk” selos in imae.b El karunginelos in tia “munas” ku aktukulkulyeyuk ke el akkeyelos a orelos in pulaik oana Devid, togusra su arulana pulaik.
15. Efu ku Jeova el “suk in kunausla mutanfwal nukewa,” a nge el fwa oru ma inge?
15 Ridi Zekaraia 12:9. Efu ku Jeova el “suk in kunausla mutanfwal nukewa”? Meyen elos lungse na paye in lain Togusrai lun Messaia. Ke sripen elos lungse in akkolukye a kalyai met kulansap nukewa lun God, paenang elos eis nununku. Tia pat met nukewa su oru ma lungse lal Setan elos fwa kafweang in kunausla met nukewa su alu nu sin God, su orekma lalos inge fwa kol nu ke ma su fwa sikyak oana akkalemyeyuk in Baibel ke Armagedun. (Fwakyuk 16:13-16) Met Nununku su Fulatlanu el fwa molela met kulansap nukewa lal a el fwa akmutalye inel in masrlon mutanfwal nukewa.—Ezikiel 38:14-18, 22, 23.
16, 17. (a) Mea se inge “me usru lun met kulansap lun Jeova”? (b) Mongfusesr lasr nu ke me akkoluk lun Setan el me akpayeye nu ke mea?
16 Wangin me meun lun Setan su ku in akmunasye lulalfongi ku kunausla moniyuk lun met kulansap nukewa lun God fwin fwalu nufon. Misla lasr ke ma lun ngun, su tuku ke ku lun Jeova in molela met lal, “pa inge me usru lun met kulansap lun Jeova.” (Isaia 54:17) Wangin kutena met su ku in eisla misla lasr a kapkapek ke ma lun ngun su oasr yurin met kulansap lun God ke pal inge. (Sam 118:6) Setan el fwa tia tui in akyokye me lain a el kafweang in akyokye ongoiye puspus. Mongfusesr lasr fwinne oasr kas in akkoluk puspus el me akpayeye la ngunin God el oasr yurosr. (1 Piter 4:14) Peng mwo ke Togusrai lun Jeova su oakiyuki tari el sulkakinyuk fwin fwalu nufon. Oana ma puspus su orekmakinyuk ke me meun, a ma puspus su lumeyuk oana “eot lun me fut” orek in me lain su orekmakinyuk nu sin met lun God. Tusruktu, ke ku lun Jeova met kulansap nukewa lal elos kutangla kutena kain in eot inge, a kunausla pa me akkoluk nukewa lalos. (Zekaraia 9:15) Met lula sin met akmusrala a met nukewa su welulos tia ku in tulokinyuki!
17 Kut fwa ngetla a tupan nu ke pal se su molela lasr fwa akpayeyuk ke inkanek nukewa liki me akkoluk nukewa lun Devil. Oasr na paye me akkeye yok lasr nu ke mwulela se inge la ‘wangin me meun su lumeyuk in lain kut fwa eis kutangla, a loa nu kemwa su fwa tuyuk lain kut in nununke kut fwa selngawiyuk’!
[Footnotes]
a Orekla sin Met Lo lun Jeova tusruktu ke pal inge lusr.
b Ke kutupa me akuteye, srike liye buk se inge Jehovah’s Witnesses—Proclaimers of God’s Kingdom (Met Lo lun Jeova—Met Fwakak Tokusrai lun God), sra 675-6, orekla sin Met Lo lun Jeova.
Kom E Topuk Fuka?
• Mea akkalemye la me meun nukewa lun Setan fwa tia eis kutangla?
• Fuka Jerusalem su oasr in kosrao el “sie eot toasr”?
• Fuka Jeova el molela “loom nuknuk lun Juda”?
• Ke kut fototoeni nu ke Armagedun, mea kom ku in lulalfongi ka?