Kas lun Jeova el Moul
Kas Fulat su Tuku ke Buk lun Malakai
TEMPLE fwin an Jerusalem su sifwilpa musaeyukla el aksafyeyukla in yea 70 kutu somla. Tusruktu, tokin kutu pal, fototo lun met Ju nu sin God arulana munas. Fwinne met tol elos ekulla oiya lalos su ekla koluk. Su fwa akkalemye nu selos oiya paye lalos a in kasrelos in akmwoye fototo lalos nu sin God? Jeova el sang kunokon inge nu sin met palu Malakai.
Malakai el simusla buk safla inge ke ma Simusla in kas Hibru su oasr kas palu ka su tuku sin God. Kut fwin loang akmwoye nu ke kas palu lal Malakai kas palu inge ku in kasre kut in akola nu ke “len lulap se a me aksangeng lun Jeova,” ke pal se saflaiyen akwuk koluk inge tuku.—Malakai 4:5.
MET TOL ELOS “ORU MET PUSPUS IN TUKULKUL IN MASAP”
Jeova el akkalemye pulakin lal nu sin met Israel, fwakang: “Nga lungse komwos.” Tusruktu met tol elos aklusrongtenye inen God. Ke inkanek fuka? Ke elos “kisekin bred tia nasnas” a elos kisekin “ma ul a mas.”—Malakai 1:2, 6-8.
Met tol elos “oru met puspus in tukulkul in masap.” Met elos “oru kutasrik kais sie met lain met lel.” Kutu selos eis metsa su tia met Ju in mutan kiyelos. Kutu met elos orekma kutasrik nu sin “mutan kiyelos ke elos fwusr.”—Malakai 2:8, 10, 11, 14-16.
Kusensiyuk Puspus Ke Ma Simusla Eis Top Ka:
2:2—Ke inkanek fuka Jeova el “selngawi me insemwomwo” lun met tol su tia akos masap? God el oru ma inge ke oiya su me insemwomwo el akkalemyeyuk sin met tol el ekla me selngawi.
2:13—Sronin muta lun su afwunye loang lun Jeova? Ma inge el sronin met lun mutan puspus su tuku nu ke loang a akkalemye asor yok lun insielos nu sin Jeova. Mea oru elos in arulana asor? Mokul tumalos su met Ju elos orala akwuk in divorce nu selos ke sripe su tia fwal a som lukelos, elos in eis mutan kiyelos su fwusr a tia mutan Ju.
Me Lutlut Nu Sesr:
1:10. Jeova el tia insemwomwo ke me kise lun met tol puspus su rapku, ke elos siyuk ke me moul fwinne ke orekma na srisrik su elos oru oana ke elos kaliye srungul ku in ta e ke loang. Arulana yok sripe nu ke oiyen orekma lasr in alu, wekunang ma kut oru nu ke orekma in sulkakin a luti peng mwo, kut oru ma inge meyen oasr lungse paye lasr nu sin God a nu sin met tulan lasr, a tia nunku ke inkanek in eis mani ku me moul ka!—Mattu 22:37-39; 2 Korint 11:7.
1:14; 2:17. Jeova el tia lela oiya su tia paye in orek ke orekma in alu nu sel.
2:7-9. Met lili nukewa su eis kunokon in luti ke congregation elos enenu in akpayeye la ma elos luti el fwal nu ke Kas lun God, ke Ma Simusla Mutal, a ke me rid nukewa su tuku in Baibel su orekla sin “met kulansap oaru.”—Luk 12:42; Jemes 3:11.
2:10, 11. Jeova el lungse met nukewa su alu nu sel elos in nunku yok a orekmakin ke moul lalos masap lun payuk “in Leum mukena.”—1 Korint 7:39.
2:15, 16. Met nukewa su alu nu sin Jeova God elos enenu in akfulatye mwuleang ke akwuk lun payuk nu sin mutan kiyelos ke elos fwusr me.
‘LEUM PAYE EL FWA TUKU NU KE TEMPLE LAL’
“Leum [Jeova] fwa sa tuku nu ke temple Lal; a met roso lun mwuleung [Jisus Kraist].” God el “fwa kuluku nu yurolos in nununku” a el fwa sa in orek lo in lain met nukewa su orek ma koluk. Sayen ma inge, oasr “sie buk in esmakin” su fwa simusyukla nu selos nukewa su sangeng sin Jeova.—Malakai 3:1, 3, 5, 16.
Len se su “furur oana sie fwunyu” fwa tuku a fwa kunausla met koluk nukewa. Meet liki tuku lun len sa, oasr sie met palu su fwa supweyukla in “furokla insien papa nu sin tulik natu, a insien tulik nu sin papa tuma.”—Malakai 4:1, 5, 6.
Kusensiyuk Puspus Ke Ma Simusla Eis Top Ka:
3:10—Ya orekma in wise “tafwu sengoul nukewa,” ku tithing, el lumeyuk nu ke orekma lasr in sang ma nukewa lasr nu sin Jeova? Masap lal Moses el aksafyeyukla ku akwanginyeyukla ke mise lun Kraist, ke ma inge in sang tafwu sengoul ke mani lasr el tia sapkinyuk nu ke alu lasr nu sin God ke pal inge. Tusruktu oasr kalme saye lun tithing. (Efesus 2:15) Ma inge el tia lumeyuk nu ke orekma lasr in sang ma nukewa lasr. Paye la sie tafwu sengoul el eneneyuk in sang nu ke temple ke yea nukewa, tusruktu kut sang ma nukewa lasr nu sin Jeova ke pal sefwanna—ke pal se su kut mwulela moul lasr nu sel a eis baptais lasr ke kof. Mutamwauk in pal san, ma nukewa su oasr yurosr el ma lun Jeova. Ne oinge, el lela kut in sang ma su oasr yurosr—sie tithe oana me pupulyuk—in orekmakin nu ke orekma in alu lasr nu sel. Me sang lasr inge el ma tuku ke insiesr. Me kise su kut sang nu sin Jeova pa pal lasr, ku lasr, a ma saok lasr su kut orekmakin nu ke orekma in sulkakin peng mwo lun Togusrai a in oru met tuma lutlut. Wekunang orekma lasr in wi meeting nukewa lun met Kristian, muteta nu yurin met mas a met lili wiyesr su matou tari, a in sang me kasru nu ke orekma nukewa ke alu paye.
4:3—Ke inkanek fuka met nukewa su alu nu sin Jeova elos fwa “longye met koluk”? Met kulansap lun God fwin fwalu elos fwa tia “longye met koluk” ke inkanek paye, a elos tia wi in oru nununku lal nu selos. A, ma inge akkalemye la met kulansap lun Jeova fwin fwalu elos fwa oru ma inge ke inkanek lun me pupulyuk ke elos wi ke inse kewa lalos in akfulatye kutangla su fwa sikyak tokin saflaiyen fwal lal Setan.—Sam 145:20; Fwakyuk 20:1-3.
4:4—Efu kut enenu in “esam . . . masap lal Moses”? Masap inge el tia sapkinyuk nu sin met Kristian nukewa, ne oinge ma inge el oana “ngun in ma mwo su a fwa tuku.” (Hibru 10:1) Ke ma inge, in loang akmwoye nu ke Masap lal Moses ku in kasre kut in liye la fuka ma puspus su simusyukla ka el akpayeyuk. (Luk 24:44, 45) Sayen ma inge, Masap inge el akkalemye ke “me etawi lun ma in kosrao.” Arulana yok sripe in lutlutkin ma inge kut fwin lungse in eis etauk ke me luti a oiya mwo lun met Kristian.—Hibru 9:23.
4:5, 6—“Elaija met palu” el lumeyuk nu sin su? Oasr kas palu kel “Elaija” la el fwa oru orekma in sifwil folokonak orekma mwomwo, su orekma inge pa in akola a sang kasru insien metu. In century se meet C.E., Jisus Kraist el akkalemyel Jon Baptais oana “Elaija.” (Mattu 11:12-14; Mark 9:11-13) Elos su lumeyuk nu sel ke pal inge pa elos su supweyukla “meet liki tuku lun len lulap a me aksangeng lun Jeova.” Elaija ke pal inge el lumeyuk nu sin “met kulansap oaru a lalmetmet.” (Mattu 24:45) Elos inge su oana u lun met Kristian akmusrala elos arulana alken in oru orekma in sifwil folokonak ma mwo puspus ke ma lun ngun.
Me Lutlut Nu Sesr:
3:10. Kut fwin tia sang nu sin Jeova ma mwo emeet lasr el fwa oana kut in kosrala me insemwomwo lal liki kut.
3:14, 15. Ke sripen me srikasrak koluk lun met tol puspus, paenang met Ju puspus elos mutamwauk in liye a nunku ke orekma in kulansap lalos nu sin God mu tia ma yok sripe se. Elos nukewa su oasr kunokon in kol lalos ke congregation enenu in oakiya me srikasrak mwomwo nu sin met nukewa.—1 Piter 5:1-3.
3:16. Jeova el karungin sie record ke met nukewa su sangeng a oaru nu sel. El esamalos a el fwa molelosla ke pal se el kunausla fwal koluk lal Setan. Ke ma inge, lela kut in tia akmunasyela sulela lasr in sruokye oiyen oaru a paye lasr nu sin God.—Job 27:5.
4:1. Ke len in oru nununku lun Jeova, “oka” a “laa” fwa oana sie ke ma su fwa sikyak ka—tulik srisrik fwa eis nununku oapana nu ke nununku lun nine a papa tumalos su elos fwa eis. Oasr na paye kunokon lun papa a nine nu sin tulik srisrik natulos! Papa a nine nukewa su met Kristian elos enenu in kafweang yok in suk me insemwomwo lun God a in sruokye oiya mwomwo ye mutal.—1 Korint 7:14.
“Sangeng sin God Paye”
Su fwa moliyukla liki “len lulap a me aksangeng lun Jeova”? (Malakai 4:5) “Nu sumwos su sangeng ke ek,” Jeova el fwak, “fwat lun sumwosmwos fwa takak wi kela in po soksok la; a komwos fwa illa, a kasrusr srosro oana kaou.”—Malakai 4:2.
“Fwat lun sumwosmwos,” pa Jisus Kraist, ke el sang kalem in tolak met nukewa su sangeng ke inen God, a elos engankin me insemwomwo lun Jeova. (Jon 8:12) Nu selos, oasr pa “kela in po soksok”—su lumeyuk nu ke orekma in akmwoye fototo lalos nu sin Jeova ke pal inge a me akkeye nu ke mano, a nunak, a pulakin su fwa sikyak ke fwalu sasu lun God. (Fwakyuk 22:1, 2) Elos arlana insemwomwo paenang elos oana “kao” fwusr. Ke kut sano ke me insemwomwo nukewa inge, lela kut in filiye ke insiesr kas in kai lun Togusra Solomon: “Sangeng sin God a liaung masap lal. Tu pa inge orekma mwo kemwa lun met.”—Ekklisiastis 12:13.