Dimon Nukewa—Fuka Kut Ku In Lainelos?
“Lipufan, su tia srukye togusrai lalos, a elos som liki an selos, el fulelosi nu ke len in nununku lulap in kapur ma patpat in losr.”—JUDE 6.
1, 2. Kusensiyuk puspus fuka sikyak kel Setan su Devil a ke dimon puspus?
“KOMWOS in efwal, komwos in sano,” met sap Piter el sang kas in sensen inge. “Met lokwalok lomwos Devil, el oana soko laion ngutngut, el fwafwasryesr, in suk su el fwa kangla.” (1 Piter 5:8) Met sap Poul el fwak pa ke dimon puspus “Nga tia lungse tu komwos in sie sin sie yurin dimon. Komwos tia ku in nim kup lun Jeova, a kup lun dimon; komwos tia ku in mongo ke ‘tebu lun Jeova’ a tebu lun dimon.”—1 Korint 10:20, 21.
2 Tusruktu, su Setan su Devil a dimon nukewa lal? Fuka a nge mutamweyen Setan a dimon nukewa? Ya God el oralosla? Fuka lupan ku lalos in akkolukye metu? Me karunginyuk fuka oasr yurosr in sang lainelos?
Fuka Mutamweyen Satan a Dimon Nukewa lal?
3. Fuka sie lipufan lun God el ekla Setan su Devil?
3 Ke mutamweyen me sramsram lun metu, a ke mutamweyen moul lun metu in imae Eden, oasr sie lipufan lun God el lungse in orek alein a seakos. Efu? Meyen el tia insemwomwokin ku fwalkin kunokon lal ke u lun Jeova in kosrao. Ke Adam a If orekla, el liye sie pal mwomwo lal in kufusla oaru lalos a alu lalos liki God paye a in forla nu sel sifwana. Ke orekma in lain lal nu sin God a in srifwela siyanyen se meet elos in eis nu ke moul lalos sie inkanek in seakos, lipufan se inge el orel sifwana Setan su Devil. Oasr pal, su lipufan puspus elos wi ke orekma in lain lal inge. Fuka?—Genesis 3:1-6; Rom 5:12; Fwakyuk 12:9.
4. Mea kutu sin lipufan koluk inge elos oru meet liki Sronot in len lal Noa?
4 Ma simusla su tuku ke ngun el akkalemye nu sesr la oasr pal meet liki Sronot lulap in len lal Noa, kutu sin lipufan inge elos mutamwauk in nunku yok ke mutan puspus fwin fwalu. Nu ke akwuk koluk, “tu tulik nutin God [in kosrao] elos liye an nutin met tu elos oasku,” Baibel el akkalemye, “a elos eis mutan kiyelos liki nu kemwa su elos sulela.” Tukeni lun mutan a lipufan el tia fwal, paenang elos oswela tulik puspus su fulat a yok su eteyuk oana Nefilim. (Genesis 6:2-4) Ke ma inge ma orekla nukewa in ngun inge elos seakos God a elos wela orekma lal Setan in lain Jeova.
5. Mea sikyak nu sin lipufan koluk nukewa ke pal se Jeova el orala me kunausla ke inkanek lun Sronot lulap?
5 Ke pal se Jeova el orala Sronot nu fwin metu, Nefilim nukewa a nine kiyelos elos mise. Lipufan koluk nukewa inge elos enenu in ekulla manolos su oana met a tu elos fwa ku in folokla nu in an lun ngun in kosrao. Tusruktu, elos tia ku in sifwil folokla nu ke “an selos” yurin God. A, elos filiyuki ke “an losr upa [in ngun],” su eteyuk oana an Tartarus.—Jud 6; 2 Piter 2:4, NW.
6. Fuka dimon nukewa elos kiapela metu?
6 Mutamwauk ke pal se lipufan koluk elos tula liki “an selos,” elos ekla nu ke dimon puspus su welul Setan a elos sang kasru nu ke nunak koluk lal. Ke pal ingo fwasru, wanginla ku lun dimon nukewa in sifwilpa ekululosla nu ke monin met. Tusruktu, elos ku in srife mokul a mutan puspus in wi oru kain in orekma lun kosro su tia mwo a tia fwal. Ke pal inge dimon nukewa elos kiapela metu ke inkanek in orekmakin inutnut, su ku in weang nu ke ma puspus ka oana magic in akkolukye met, voodoo, a met inutnut su sramsram nu sin ngun fokfok. (Duteronomi 18:10-13; 2 Kronikel 33:6) Saflaiyen lipufan koluk nukewa oana sie nu ke ma su e fwa sikyak nu sel Devil—pa in kunausyukla ma patpat. (Mattu 25:41; Fwakyuk 20:10) Tusruktu, ke pal inge, kut enenu in tu na ku a in lainelos. Mwo kut in nunku a akuteye ke lupan kuiyel Setan a fuka kut ku in kutangulla ke inkanek in lainul a dimon nukewa lal.
Fuka Kuiyel Satan?
7. Ku fuka oasr yurol Setan nu fwin fwalu?
7 Ke inkanek in kaskas kikiap lal Setan el akkolukyel Jeova mutamwauk in pal meeta nu ke pal inge. (Soakas 27:11) A el akkolukyela tari met puspus. “Fwalu nu fon on ke ku lun met koluk se,” 1 Jon 5:19, (NW) el akkalemye. Pasis Devil el ku in srifel Jisus ke el srike in sang nu sel ku a mwolanu lun “togusrai lun fwalu nu kemwa.” (Luk 4:5-7) Kel Setan, met sap Poul el fwak: “A fwin mwukla mwosasu lasr, el mwukla nu selos su tula, in elos su god lun fwal se inge el akkunye nunak lun met selalalfongi tu kalem lun mwosasu lun mwolanu lun Kraist, su luman God, tia tololosyuk.” (2 Korint 4:3, 4) Setan el “sie met kikiap, a papa tumun ma kikiap,” tusruktu el akkalemyel sifwana oana “sie lipufan lun kalem.” (Jon 8:44; 2 Korint 11:14) Oasr ku lal a el etu ke inkanek puspus su eneneyuk in sang akkunye nunak lun met kol nukewa lun fwalu a lun met lalos. Ke inkanek lun etauk su tia paye a me luti lun me sramsram lusrongten oana pihlenfong a me luti kikiap lun alu, el kiapela metu ka.
8. Mea Baibel el akkalemye ke ku lal Setan?
8 Ku a me akkoluk lal Setan liyeyuk in pal lun met palu Daniel, ke yea lumfoko kutu meet liki pal lasr su pangpang Common Era. Ke pal se Jeova el supwela sie lipufan in sang peng in akkeyel Daniel, lipufan se inge el lainyuk sin sie “met [ngun] fwisrak lun togusrai Persia.” Lipufan oaru se inge el sruu ke lusen len 21 nu ke pal se “Maikael, sie sin met fwisrak fulat,” el tuku in kasrel. Ma simusla se inge el sramsramkin pa ke “met fwisrak [dimon] lun Greece.” (Daniel 10:12, 13, 20) A in Fwakyuk 13:1, 2, Setan el akkalemyeyuk oana sie “dragon” su sang “ku lal, a tron lal, mwal lulap” nu sin kosro lemnak soko su lumeyuk nu ke akwuk lun politic.
9. Su met Kristian elos fwa meuni ku lain?
9 Ke ma inge met sap Poul el simusla: “Tu asruoki [apurak, NW] lasr tia lain ikwe a sra, a lain togusrai, lain met ku, lain leum in losr lun fwal se inge, lain un ngun koluk yen engyengu.” (Efesus 6:12) Fwinne ke pal inge, u lun dimon puspus ye kolyuk lun Setan su Devil elos tia liyeyuk, elos kafweang a tia tui in kufus nunak lun met kol puspus a nu sin met puspus, elos kafweang in purakak met nukewa inge in oru orekma su arlana koluk in uniya met puspus, orekma in aksangengye metu, a akmas. Lela kut in tuni ingena la fuka kut ku in lain u lun ngun koluk puspus inge.
Kain in Me Loeyuk Fuka Oasr Yurosr?
10 Kut tia ku in lainul Setan a lipufan koluk nukewa lal ke ku lasr sifwana, fwinne ke ku lasr ke mano a ku lasr ke nunak. Poul el kai kut: “Komwos in ku in Leum, a in ku lun ku lal.” Kut enenu in forla nu sin God ke me kasru yok a karunginyuk lal. Poul el fwak pa: “Komwos in nukomang me meun nu kemwa lun God, tu komwos in ku in tu lain kutasrik lun Devil . . . Ke ma inge komwos in eis nu sumwos me meun nukewa lun God, tu komwos ku in tu lain in len koluk, a tokin komwos orala ma nukewa ke inkanek nukewa, komwos in tu na ku.”—Efesus 6:10, 11, 13, NW.
10, 11. Fuka kut ku in lainul Setan a lipufan koluk nukewa lal?
11 Poul el kaifwe met lili Kristian wiyel pal luo in nukomang “me meun nukewa sin God.” Kas inge “nukewa” el akkalemye la fwin sie met el tia arlanu insemwomwo ku el inse luo in eis me meun, ma inge tia ku in lain me akkoluk lun dimon puspus. Ke ma inge, mea me meun nukewa lun ngun su eneneyuk yok nu sin met Kristian elos in orekmakin ke pal inge tu elos in ku in lain dimon nukewa?
“Tu na Ku”—Fuka?
12. Fuka met Kristian elos ku in lolani ku kapriya folo lalos ke ma paye?
12 Poul el akuteye: “Tu oinge, komwos in tuyuk [tu na ku, NW], ke lolani tari in folo lomwos ke paye a komwos in nukomang me loeyuk in ium lun sumwosmwos.” (Efesus 6:14) Me meun luo su sramsramkinyuk ke fus inge pa belt srulap se, a sie me loeyuk nu in iwa. Sie met meun el enenu in oru belt srulap lal in tingting pal nukewa in sang karungin folo lal ku infwulwel (fono, groin, a kapinsie) a in us kutlas lal su toasr. Ke inkanek oinge, ma paye lun Baibel eneneyuk in losyukeni ku kapriyuki in tingilkuti, in oana kas in pupulyuk, tu kut in moulkin moul fwal nu ka. Ya oasr akwuk mwo lasr in ridi Baibel len nukewa? Ya met nukewa ke sou elos wi oru akwuk inge? Ya oasr akwuk mwo lasr in sramsramkin a akuteye text ke kais sie len oana sie sou? In wekunang, ya kut sruokye a etu ke me akuteye su oasr ke me rid puspus su orekla sin “met kulansap oaru a lalmetmet”? (Mattu 24:45) Fwin oinge, kut kafweang in orekmakin kas in kasru lal Poul. Oasr pa yurosr video a DVD puspus su ku in akkalemye ke kas in kolyuk lun ma Simusla. Orekma in sruokye ku ma paye ku in kasre kut in oru sulela mwomwo a karungin kut in tia fwasr ke sie inkanek koluk ku oru sie orekma koluk.
13. Fuka kut ku in karungin insiesr?
13 Me loeyuk paye lun iwa el sang me loeyuk nu ke iwa, heart, a kutupa organ yok sripe lun met meun. Met Kristian el ku in karungin insiel—su pupulyukkinyuk nu ke oiya paye lal su oasr in el—ke inkanek in akkeye lungse nu ke ma sumwosmwos lun God a in sruokye pal nukewa masap sumwos lun Jeova. Me pupulyuk nu ke me loeyuk lun iwa el ku in karungin in tia aksrikyeyukla yok sripaiyen Kas lun God. Ke kut akkalemye in “srunga ma koluk, a lungse ma mwo,” kut karungin ku sruokye niyesr “liki inkanek koluk nukewa.”—Emos 5:15; Sam 119:101.
14. Mea kalmen kas inge “fwalkeang niyomwos ke me ako lun mwosasu lun misla”?
14 Niyen sie met solse lun an Rom el falkeang sie faluk mwomwo a fukoko ke sripen elos fwufwasyesr ke lusen foko puspus mile ke highway ku inkanek srulap a fulat puspus lun met Rom su oasr yen nukewa a inkanek srulap puspus inge elos osun nu sie in an puspus ye koko lun an se inge. Mea kalmen kas inge “fwalkeang niyomwos ke me ako lun mwosasu lun misla” nu sin met Kristian? (Efesus 6:15) Kalmen ma inge pa kut akola nu ke orekma. Kut akola in sulkakin peng mwo lun Togusrai lun God ke pal mwomwo nukewa. (Rom 10:13-15) Moniyuk ke orekma in luti lun met Kristian el sie me karungin liki “orekma kutasrik” nukewa lun Setan.—Efesus 6:11.
15. (a) Mea akkalemye la me loeyuk lulap lun lulalfongi el arlanu yok sripe? (b) “Mwusra e” fuka ku in akkolukye na paye lulalfongi lasr?
15 “Yok liki nukewa,” Poul el tafwela, “komwos in kolak me loeyuk lulap lun lulalfongi, tu komwos fwa ku in kunela mwusra e nukewa lun el su koluk sa.” (Efesus 6:16) Kas in kai inge in eis me loeyuk lulap lun lulalfongi el akkalemyeyuk ke kas se inge “yok liki nukewa,” kas inge el akkalemye la ipen me meun se inge el arlanu yok sripe. Eneneyuk na paye nu ke lulalfongi lasr su mwo a fukoko tia munas. In oana ke me loeyuk lulap, su oana lulalfongi lasr ke el karungin kut liki “mwusra e” lun Setan. Mea ma inge el lumeyuk nu ka ke pal inge? Mwusra e nukewa ku in lumeyuk nu ke kas in akkoluk su arlana upa, kas kikiap, a kas su kutu ka paye tusruktu pusiya tia paye su simusyukla ku akkalemyeyuk sin met lokwalok puspus a met apostates su lungse in akmunasye lulalfongi lasr. “Mwusra e” nukewa inge ku in kalmekinyuk pa nu ke me srife puspus nu ke lungse lun ma puspus lun fwalu, su oru kut in arlanu kafofo in moli ma puspus inge a ku in oru kut in akkeye met puspus in etawi met puspus su lungse ma mwolanu lusrongten nukewa lun moul. Saap elos musai loom lulap mwomwo a kato liki loom selos meeta a eis sitosa su yok a mwo liki ma meeta ku in akkalemye nu sin met puspus ke jewelry ku me mwalmwal su yok molo a ke style in nuknuk sasu. Ke kutena oiya su met puspus elos oru ku akkalemye, kut enenu in sruokya lulalfongi su fukoko in kasre kut in fwasr liki “musra e” nukewa inge. Fuka kut ku in musai a sruokye sie lulalfongi fukoko?—1 Piter 3:3-5; 1 Jon 2:15-17.
16. Mea ku in kasre kut in musai lulalfongi fukoko?
16 Kut ku in fototo nu sin God ke inkanek lun lutlut lasr sifwana ke Baibel a ke pre su tuku ke insiesr. Kut ku in pre siyuk sin Jeova ke lulalfongi fukoko a kafweang in akpayeye pre lasr ke kut oru orekma su eneneyuk nu ka. Ke sie me pupulyuk, ya kut akola na paye ke Lutlut lun Tauer in San week nukewa in wi sang me top nu ka? Lulalfongi lasr fwa ku in fukoko kut fwin lutlutkin Baibel a me rid nukewa su tuku ke Baibel.—Hibru 10:38, 39; 11:6.
17. Fuka kut ku in “eis helmet lun lango”?
17 Poul el aksafyela me akuteye lal ke me meun nukewa in ngun ke kas in kasru inge: “A komwos in eis helmet lun lango, a kutlas lun Ngun, su kas lun God.” (Efesus 6:17) Sie helmet el loangela ku karungin sifwe a nunak ku brain lun met meun, su ku lun sie met in oru sulela oasr ka. Oayepa, fwinsrak lasr oana met Kristian el karungin ku in nunak lasr. (1 Tessalonika 5:8) Kut enenu in nunku akmwoye nu ke fwinsrak lasr su God el ase nu sesr, oana ke ma Jisus el oru, a tia nekla nunak lasr ke niyen sun lun fwalu a lungse ke ma puspus lun fwalu.—Hibru 12:2.
18. Efu kut tia enenu in mulkunla akwuk lasr in ridi Baibel pal nukewa?
18 Me loeyuk safla lasr liki me akkoluk lal Setan a dimon nukewa lal pa kas, ku peng lun God, su simusyukla in Baibel. Pa inge siepa sripe la efu kut enenu in tia mulkunla akwuk lasr in ridi Baibel pal nukewa. Etauk sumwos a yok ke Kas lun God el karungin kut liki kas kikiap lal Setan a ke etauk tia sumwos su akkalemyeyuk sin dimon puspus a kas kikiap su akkalemyeyuk ke me rid puspus su orekla sin met apostates ku met puspus su som liki alu paye a luti ma kikiap.
“Pre a Kaifwe Siyuk Pal e Nukewa”
19, 20. (a) Mea sanoyuk sin Setan a dimon nukewa lal? (b) Mea fwa akkeye kut ke ma lun ngun?
19 Orekma in akwanginyela Setan a dimon nukewa lal, a fwal koluk inge el apkurun. Setan el etu la oasr “pal futoto lal.” El mulat ma lulap a el orek meun nu sin met nukewa “su liaung masap lun God, a srukye lo lun Jisus.” (Fwakyuk 12:12, 17) Arlanu yok sripe kut in lainul Setan a dimon nukewa lal.
20 Kut arlanu engan a sang kulo ke kas in kaifwe in nukomang me meun nukewa lun God! Poul el aksafyela me akuteye lal ke me meun in ngun ke kas in kasru inge: “Ke pre nu kemwa a kaifwe siyuk pal e nu kemwa lun ngun. A sano nu ke ma inge in oaru a pre ke met mwo nu kemwa.” (Efesus 6:18) Pre el ku in akkeye kut ke ma lun ngun a kasre kut in tia motul in ngun. Lela kut in eis kas lal Poul a orekmakin ma inge ke insiesr ku moul lasr a pre pal nukewa, meyen ma inge fwa kasre kut in lainul Setan a dimon nukewa lal.
Mea Kom Lotela?
• Fuka mutamwauk lal Setan a dimon nukewa lal?
• Fuka lupan ku lun Devil?
• Me loeyuk fuka oasr yurosr in lain Setan a dimon nukewa lal?
• Fuka kut ku in nukomang me meun nukewa sin God?
[Picture on page 27]
“Tulik puspus nutin God paye elos liye an nutin met”
[Picture on page 29]
Ya kom ku in akkalemye ip onkosr ke me meun lasr in ngun?
[Picture on page 31]
Fuka in wi oru orekma nukewa inge el sie me loeyuk in lainul Setan a dimon nukewa lal?