Kom Ku In Kutangla Ke Pal su Oasr Ma Upa
KE PAL inge su oasr ma upa puspus, oasr met puspus elos muteng ke ma upa nukewa su oana paka upa. Tusruktu, nu sin met Kristian nukewa, lungse nu sin God a oiyen oaru nu ke akwuk mwomwo ke kas lal kasrelos in muteng. Fuka? Me top nu ka oasr ke sie me pupulyuk su akkalemyeyuk sin Jisus Kraist. El pupulyukkin met tuma lutlut akosten nukewa lal nu sin “sie met lalmetmet, su musaela loom sel fwin eot ku.” Jisus el fwak: “A af kakla, a sronot tuku, a eng tume, a fungulye loom sa; a tia ikori; tu musa fwin eot ku.”—Mattu 7:24, 25.
Loang akmwoye nu ka la fwinne mokul sa ke me pupulyuk inge el lalmetmet, el srakna sun ma upa puspus—su pupulyukkinyuk nu ke af upa, sronot, a eng upa. Ke ma inge, Jisus el tia akkalemye la met tuma lutlut lal elos fwa kaengla liki ma upa puspus a engankin sie moul su oasr misla a mwo pal nukewa. (Sam 34:19; Jemes 4:13-15) Tusruktu el fwak la met kulansap oaru nukewa lal elos ku in akoelosla nu ka a ku in kutangla in muteng ke kain in ma upa a me keok upa nukewa.
Jisus el mutamwauk ke me pupulyuk lal ke el fwak: “Ke ma inge met e nu kemwa su long kas luk inge, a oru, fwa lumeyuk elos oana sie met lalmetmet, su musai loom sel fwin eot ku.” Aok, Jisus el kaskaskin, tia ke orekma in musai lom na paye, a ke orekma in musai ku akkeye nunak a orekma mwo lun met Kristian. Elos su porongo kas lun Kraist elos orekmakin lalmetmet a orekmakin pa nunak mwomwo. Elos musai nunak mwo a orekma lalos fwin eot ku ke me luti nukewa lun Kraist ke elos orekmakin ma lutiyuk nu selos. Paye, la me pupulyuk inge ke eot ku el tia oasr fwe. Mokul se ke me pupulyuk inge el enenu in pukanak “an loal” in sun ma inge. (Luk 6:48) Ke inkanek oana sie, met tuma lutlut lal Jisus elos enenu in kafweang pal nukewa in akyokye ku a akkeye oiya mwomwo su on pal nukewa in kasrelos in fototo nu sin God.—Mattu 5:5-7; 6:33.
Mea sikyak ke pal se fwin oasr ma upa puspus su oana paka upa el sikyak in srike la fuka kuiyen pelung nu ke lulalfongi lun met Kristian nukewa su fwasr tukin Jisus? Akosten ke inse paye lalos nu ke me luti nukewa lun Kraist a ke oiya mwomwo puspus lalos in oana met Kristian el akpayeye la pa inge sropon me akkeye nu ke pal ou inge su oasr ma upa ka, a yok sripe emeet, nu ke pal in paka upa lun Armagedun se su apkurun in tuku. (Mattu 5:10-12; Fwakyuk 16:15, 16) Aok, in akos me luti nukewa lun Kraist, oasr met puspus su eis me insemwomwo in kutangla ma upa puspus su oana paka. Kom ku in oru pa ou inge.—1 Piter 2:21-23.