Fuka in Akilen Alu Paye
OASR alu puspus su ekin mu ma elos luti el ma tuku sin God me. Ke ma inge, kut enenu in porongo akmwoya nu ke kas lal Jon met sap lun Jisus, su simusla: “Met kulu, komwos in tia lalalfongi ngun nu kemwa, a akpayeye ngun, elos fwin ma sin God me, ku tia; tu met palu kikiap puspus elos fwasrelik nu fwalu.” (1 Jon 4:1) Fuka kut ku in srike sie ma in liye fwin ma inge ma tuku sin God me?
Ma nukewa su tuku sin God el akkalemye oiya mwo lal, yokna oiya mwo emeet lal, pa lungse. Ke sie me pupulyuk, pulakin lasr nu ke ngok, su kasre kut in insemwomwokin foul mwomwo lun herbs, ros puspus, ku bread su tufwa manmanla, el sie me akkalemye nu ke lungse lun God. Ku lasr in liye ke fwatu tilli, sie sacliki, ku israsr lun sie tulik srisrik akkalemye lungse lun God nu sesr. Akpayeyuk pa ma inge nu ke ku lasr in long on kato, pusren sie mwon, ku pusren sie met su kut lungse. Ke oiyesr sifwana oana sie met, fwinne kut sesumwos, el akkalemye ke lungse lun God. Pa inge sripe su oru kut in pulakin pal nukewa ma paye ke kas lun Jisus inge: “Insemwomwo in sang yok liki insemwomwo in eis.” (Orekma 20:35) Kut insemwomwokin in akkalemye lungse meyen kut orekla ke “luman God.” (Genesis 1:27) Fwinne oasr oiya mwomwo saye puspus lun Jeova, lungse pa oiya mwo emeet lal.
Ma simusla nukewa su tuku sin God el akkalemye lungse lal. Alu puspus lun fwalu oasr ma simusla puspus lalos su simusyukla in pal meeta. Fuka ma simusla nukewa inge akkalemye na paye ke lungse lun God?
Payeiye pa, ma simusla puspus ke alu in pal meeta el akuteye kutu srisrik ke inkanek la fuka God el lungse kut ku fuka kut ku in lungse God. Ke ma inge, million puspus sin met elos tia eis me top ke elos siyuk, “Efu ku kut liye me akpayeyen lungse lun God ke ma orekla nukewa tusruktu me keok a ma koluk srakna sikyak pal nukewa?” Ke oiya su tia oana sie, Baibel mukena pa oasr ma simusla ke alu su akuteye ke inkanek yok ke lungse lun God. Ma inge luti kut pa ke inkanek in akkalemye lungse.
Sie Buk Ke Oiyen Lungse
Kas lun God, Baibel, el akkalemye kel Jeova oana “God lun lungse.” (2 Korint 13:11) Baibel el akuteye ke inkanek fuka lungse el moklel Jeova in sang nu sin siyanyen se meet moul su wangin me sensen nu ka ke oiyen mas a mise. Tusruktu orekma in lain ku lun God sang ma upa a me keok nu sin metu. (Duteronomi 32:4, 5; Rom 5:12) Jeova el orala inkanek in sifwilpa folokunma ma su tula. Kas lun God el akkalemye: “Tu God El lungsel fwalu oinge, tu El ase Mwen siefwanna isusla natul, tu el su lalalfongel fwa tia tula, a el fwa eis moul ma patpat.” (Jon 3:16) Ma Simusla Mutal el akkalemye lungse lun God ke inkanek yok ke el akuteye ke oiyen inkanek su God el fwa orala akwuk in orala sie gufernment sumwosmwos ye kolyuk lun Jisus in sifwilpa folokonma misla nu sin met akosten nukewa.—Daniel 7:13, 14; 2 Piter 3:13.
Baibel el akkalemye na paye kunokon lun metu ke kas nukewa inge: “‘Kom fwa lungse Jeova God Lom ke insiom kemwa, a ke ngunum kemwa, a ke nunkom kemwa.’ Pa inge masap se yok a masap se meet. A ma se akluo oana inge, ‘Kom fwa lungse met tulan lom oanu kom sifwana.’ Masap nu kemwa a ma palu sripsripyuk fwin masap luo inge.” (Mattu 22:37-40) Baibel el akkalemye la el simusyukla ke kasru lun ngun mutal lun God. Ke sripen el akkalemye na paye ke oiya mwomwo lal, kut ku in lulalfongi la ma inge tuku sin “God lun lungse.”—2 Timote 3:16.
In orekmakin akwuk se inge, kut ku in akilen la piye ke ma simusla in pal meeta el tuku na paye sin God. Lungse el akkalemye pa ke met nukewa su oasr ke alu paye, meyen elos etawi God in akkalemye lungse.
Fuka in Akilen Met Nukewa Su Lungse God
Elos nukewa su lungse God liyeyuk na paye, yokna ke pal inge su kut moul ka su Baibel el pangon “len safla.” Metu “elos fwa sifwana lungselos, elos fwa met lungse mani, . . . met lungse me akengun yok liki lungse God,” a oiya inge yokyokelik.—2 Timote 3:1-4.
Fuka kom ku in akilen met nukewa su lungse God? Baibel el akkalemye: “Tu pa inge lungse lun God, tu kut in liaung masap Lal.” (1 Jon 5:3) Lungse nu sin God mokle metu elos in akkalemye sunak nu ke masap lun Baibel ke oiya nasnas. Ke sie me pupulyuk, Kas lun God el oasr masap nu ke oiyen osun ke mano lun mokul a mutan a ke akwuk nu ke payuk. Osun ke mano lun mokul a mutan ku in leyuk in masrlon met su payukyak tari mukena, a moul in payuk el on pal nukewa tia ke kitin pal na. (Mattu 19:9; Hibru 13:4) Ke pal se sie mutan in an Spain su lutlutkin theology ku akwuk ke alu el wi ke sie meeting lun Met Lo lun Jeova su lungse na paye in lutlutkin masap lun Baibel ke oiyen nasnas, el fwak: “Meeting inge el oru me akkeye nu sik, tia ke inkanek lun me sramsram mwomwo ke ma Simusla mukena a ke inse sefwanna pa su oasr in masrlon met nukewa inge, ke oiya nasnas lalos, a ke ella mwomwo lalos.”
In wekunang nu ke lungse lalos nu sin God, met Kristian paye elos ku in akilenyuk ke sripen inkanek mwomwo lalos in akkalemye lungse nu sin met atulani lalos. Orekma yok sripe emeet lalos pa in kaskas nu sin met puspus ke fwinsrak sefwanna lun metu, ke Togusrai lun God. (Mattu 24:14) Wangin kutena ma su ku in sang me insemwomwo puspus su oasr pal nukewa nu sin met tulan lalos liki na orekma in kasrelos in eis etauk ke God. (Jon 17:3) Met Kristian paye elos akkalemye lungse lalos ke inkanek puspus saye. Elos sang kasru mwo su eneneyuk nu selos su pulakin me keok. Ke sie me pupulyuk, ke pal se oasr sie kusrusr su orala me ongoiye nu fwin an Italy, a oasr sie newspaper in an we el akkalemye la Met Lo lun Jeova elos “orekma ke inkanek mwomwo, sang me kasru nu selos su sun me keok, a elos sang kasru nu sin met keok puspus fwinne elos wi ke kain in alu puspus.”
Sayen in akkalemye lungse nu sin God a nu sin met tulan lalos, met Kristian elos lungse sie sin sie. Jisus el fwak: “Sie masap sasu Nga sot nu sumwos, tu komwos in lungse sie sin sie; aok oana Nga lungse komwos, tu komwos in ouyepa lungse sie sin sie. Ke ma se inge met e nu kemwa fwa etu tu komwos met tumuk lutlut, komwos fwin lungse sie sin sie.”—Jon 13:34, 35.
Ya lungse su met Kristian paye elos akkalemye nu sin sie sin sie liyeyuk na paye la wangin ma oana? Oasr sie mutan kulansap su oru orekma ke loom su pangpang Ema el nunku ou inge. El orekma in an La Paz, Bolivia, su oasr nunak in srunga a alein in masrlon sruf puspus su srealik met kasrup liki met sekasrup ke pal puspus. El fwak: “Ke pal se meet Nga wi ke meeting lun Met Lo lun Jeova, Nga liye sie mokul su nuknukyang ke nuknuk mwo el muta a sramsram nu sin sie mutan India ku met na paye lun an sa a tia tuku liki mutanfwal saye. Nga soenna liye kain in oiya inge meet. In pal sa, Nga etu la met nukewa inge elos met lun God.” Ke inkanek oapana inge, oasr sie mutan Brazil fwusr su in el pa Miriam el fwak: “Nga tia insemwomwo, fwinne in masrlon sou luk. Pa inge pal se meet Nga liye lungse el akkalemyeyuk ke orekma yurin Met Lo lun Jeova.” In an United States, oasr sie news director ke sie station lun television el simusla: “Fwin oasr met puspus elos moulkin inkanek in moul oana ke met ke alu lom, mutanfwal se inge tia ku in oasr ke oiya su sikyak ke pal inge. Nga sie sin met orekma ke news su etu la u lom el oakiyuki ke lungse a ke lulalfongi fukoko nu sin Met Orala ma nukewa.”
Suk Alu Paye
Lungse el sie me akul su kalem ke alu paye. Jisus el lumala orekma in suk alu paye nu ke orekma in suk inkanek sumwos a sulela in fwasr ka. Pa inge inkanek sefwanna su ku in kol nu ke moul ma papat. Jisus el fwak: “Komwos ilyuk ke mutunpot ousriksrik; tu sralup mutunpotu, a sralup pa inkaneku, su kol nu ke kunausten, a met puspus elos ilyuk nu we; tu ousriksrik mutunpotu, a ousriksrik inkaneku, su kol nu ke moul, a met punu elos konoiyuk.” (Mattu 7:13, 14) Oasr u sefwanna lun met Kristian paye elos fwufwasryesr wi God ke inkanek lun alu paye. Ke ma inge, arlanu yok sripe in tuni mwo ke alu su kom sulela. Kom fwin koneak inkanek inge a kom oru tari sulela lom in fwasr ka, kom fwa ku in koneak la pa inge inkanek mwo emeet nu ke moul lom, meyen pa inge inkanek lun lungse.—Efesus 4:1-4.
Nunku ke me insemwomwo yok su kom ku in pulakin ke kom fwasr ke inkanek lun alu paye! Ma inge el oapana in fwasr wi God. Kom ku in lotela a eis lalmetmet a lungse sin God in engankin fototo mwomwo in masrlon met puspus. Kom ku in lotela pa sel ke akwuk lun moul, a kom ku in kalem pa ke mwulela nukewa lun God a in sruokya fwinsrak nu ke pal fwasru. Kom fwa tia asor ku auli in suk alu paye.
[Picture on page 5]
In masrlon ma simusla nukewa ke alu puspus su simusyukla in pal meeta, Baibel mukena el akkalemye ke lungse lun God
[Picture on page 7]
Met Kristian paye ku in akilenyuk meyen elos orekmakin lungse