Fuka Lupan Lungse Lom?

“Kom fwa lungse met tulan lom oanu kom sifwanu.”​—MATTU 22:39.

1. Kut fwin lungse Jeova, efu kut enenu pa in lungse met tulan lasr?

KE pal se siyukyuk sel Jisus piye ma sap yok emeet, el topuk: Kom fwa lungsum Jeova God lom ke insiom kemwa, a ke ngunom kemwa, a ke nunkom kemwa.” Tokin ma inge, el srukak ma sap se akluo su apkurun in oanu ma se meet: “Kom fwa lungsum met tulan lom oanu kom sifwanu.” (Mattu 22:37, 39) Aok, lungse nu sin met tulan el sie akul lun sie met Kristian. Paye, kut fwin lungse Jeova, kut enenu in lungse met tulan lasr. Efu? Meyen kut akkalemye lungse lasr nu sin God ke pal se kut akos Kas lal, a kas lal sapkinyuk nu sesr in lungse met tulan lasr. Ke ma inge, kut fwin tia lungse met lili wiesr, na lungse lasr nu sin God tia ku in paye.​—Rom 13:8; 1 Jon 2:5; 4:20, 21.

2. Kain in lungse fuka kut enenu in akkalemye nu sin met tulan lasr?

² Ke pal se Jisus el fwak la kut enenu in lungse met tulan lasr, el tia siyuk sesr in kamwuk nu selos mukena. A el sramsram ke sie kain in lungse su tia oanu sie ke ma oasr yurin sou ku inmaslon sie mokul a sie mutan. A, el sramsram ke kain in lungse su Jeova el akkalemye nu sin met kulansap lal su mwolela tari a kain in lungse su met kulansap lal elos akkalemye pa nu sel. (Jon 17:26; 1 Jon 4:11, 19) Sie met sim Ju​—su, oanu Jisus el akilen, el sramsram ke lalmetmet—​insese yurin Jisus la lungse nu sin God enenu in tuku ke “inse nu kemwa lun sie met, nunuk nu kemwa, a ku nu kemwa.” (Mark 12:28-34) El paye. Toeni nu ke lungse su met Kristian elos akkapye nu sin God a nu sin met tulan pa pulakin a lalmetmet lasr. Ma inge kut pulakin ke insiesr a mokle kut ke inkanek lun nunuk.

3. (a) Fuka Jisus el luti “mokul se su yok etauk ke Ma Sap” in srukye nunuk yok ke su met atalani lal? (b) Fuka me pupulyuk lal Jisus fwal pa nu sin met Kristian ke len inge?

³ Oanu Luk el reporti, ke pal se Jisus el fwak la kut enenu in lungse met tulan lasr, “sie met su etu Ma Sap el tuyuk “ a siyuk: “A su met tulan lasr?” Jisus el topuk ke inkanek lun me pupulyuk. Sie met sun met koluk su onel, pusrela ma lal, a fililye apkurun in mise sisken inkanek. Met se meet, met tol el oatui inkanek sa a met se akluo pa met Livai. Elos kemwanu tia loang nu sel. Ke saflaiye, sie met Samaria el oatui ke inkanek sa, a el liye mokul inge su kinet, el akkalemye kulang yok nu sel. Su sin met tolu inge met tulan nu sel su sun kinet upa? Topuk ke kusensiyuk inge arulanu kalem. (Luk 10:25-37) Mokul inge su arulanu etu Ma Sap el arulanu lut ke pal se el long ma Jisus el fwak la met Samaria el sie met atalani su mwo liki sie met tol a sie met Livai. Arulanu kalem la, Jisus el kasre mokul inge in lungse met tulan lal ke sie inkanek mwo. Met Kristian elos akkalemye lungse pa ke inkanek inge. Loang akmwoye ke met nu kemwa su eis lungse lalos inge.

Lungse ke Sou

4. Ma se meet, oya, sie met Kristian el enenu in akkalemye lungse?

⁴ Met Kristian nu kemwa elos lungse met nu kemwa in sou lalos​—mutan kie elos lungse mukol tumalos, mokul tuma lungse mutan kielos, papa a nine lungse tulik nutulos. (Ekklisiastis 9:9; Efesus 5:33; Taitus 2:4) Paye, me kapur lun lungse oasr yurin sou nu kemwa. Tusruktu, report puspis ke moul su payuk su musalla, orekma silolel nu sin mutan kie ku mokul tuma, a tulik su akkolukyeyuk a pilesreyuk akkalemye la sou nu kemwa elos sun ma upa ke len inge, a pulakin lun kais sie met in sou nu sin sie sin sie luman tia ku in insese in tukeni muta. (2 Timote 3:1-3) Tu in kutangla ke moul in sou lalos, met Kristian nu kemwa elos enenu in akkalemye kain in lungse su oasr yurin Jeova a Jisus.​—Efesus 5:21-​27.

5. Nu sin su papa a nine elos ku in siyuk ke kasru in kurunganang tulik nutulos, a mea fwokin ma inge nu sin met puspis?

⁵ Papa a nine Kristian elos nunku tulik nutulos oanu ma saok se su Jeova el filiye nu ke kurungin lalos, a elos ku siyuk sel ke kasru in kurunginelos. (Sam 127:3-5; Soakas 22:6) Ke inkanek se inge elos akpayeye lungse lun met Kristian, su kasrelos in kurunganang tulik nutulos liki me purakak koluk su saap met fwusr elos ku in sremla ka. Ke sripe se inge, met Kristian papa a nine puspis elos pulakin insemwomwo oanu ma sie nine fwin an Netherlands el pula. Tokin el liye baptais lun tulik mokul nutul​—sie sin 575 met su eis baptais fwin an Netherlands ke yiu tari’a—​el simusla kas inge: “Ke pal inge, investment luk ke lusen yiu 20 somla arulanu kapek. Pal a ku nu kemwa​—wekunang ngal, kaifweung, a asor—​mulkunyukla ke pal inge.” Yok me insemwomwo lal meyen tulik nutul, ke sulela lal sifwanu, el sulela in kulansap nu sin Jeova. Toeni nu ke pise lulap sasu lun met orekma su oasr ke 31,089 su reporti fwin an Netherlands ke yiu tari’a pa met puspis inge eis lutlut sin papa a nine kielos in lungse Jeova.

6. Fuka lungse lun met Kristian sang kasru in akkeye me kapur lun moul payuk?

⁶ Poul el pangon lungse el oanu “sie me kapur lun sumwosna,” a ma inge ku in karunganang moul in payuk ke pal in ma upa puspis sikyuk. (Kolosse 3:14, 18, 19; 1 Piter 3:1-7) Ke pal se sie mokul fwin an Rurutu, sie tuka srisrik su oasr ke mail 450 lun an Tahiti, el mutamwauk in lutlut Baibel sin Met Lo lun Jeova, mutan kiel arulanu srunga. Ke saflaiye el eis tulik nutul a som lukel, a muta fwin an Tahiti. Ne ou inge, el srakna akkalemye lungse lal ke el supwela mani nu sel pal nu kemwa a pang ke telefon a siyuk fwin oasr kutena ma el enenu ku tulik nutul enenu kutena ma. Ke ma inge, el srakna oru ma nu kemwa ke ku lal in akpayeye kunokon lal oanu met Kristian. (1 Timote 5:8) El pre pal nu kemwa a siyuk ke sifwil tukeni nu sie lun sou lal, ke saflaiye mutan kiel el foloko. Tokin el foloko, el akkalemye nu sel “lungse, mongfwusesr, fwokpap.” (1 Timote 6:11) In 1998, el baptaisla a tok el arulanu engun ke pal se mutan kiel el insese in lutlut Baibel. Lutlut se inge ke Baibel pa sie sin 1,351 lutlut ke Baibel su orek ke territory su muta ye koko lun ofus fwin an Tahiti ke yiu tari’a.

7. Fwal nu ke ma mokul se fwin an Germany el fwak, mea ma inge su akkeye moul in payuk lal?

⁷ In an Germany sie mokul el arulanu srunga ke mutan kiel el lungse ma paye lun Baibel a el lalalfongi mu Met Lo lun Jeova elos lungse in keapella. Tusruktu, tok, el sim leta nu sin Met Lo su osun nu sin mutan kiel meet: “Kulo ma lulap ke orekma lom in akkalemye mutan kiuk nu sin Met Lo lun Jeova. Ke mutamwauk, Nga arulanu fosrnga meyen Nga long kain in kas koluk pukanten su lainelos. Tusruktu, ke pal inge, ke Nga wi meeting yurin mutan kiuk, Nga akilen la Nga tafongla na paye meet. Nga etu la ma Nga long pa ma paye, a ma inge oru moul in payuk lasr in arulanu fukoko.” Toeni nu ke Met Lo lun Jeova fwin an Germany su oasr ke 162,932​—a 1,773 Met Lo ke tuka puspis ye koko lun ofus fwin an Tahiti—​pa sou puspis su muta inse siefwunnu ke lungse su tuku sin God.

Lungse Nu Sin Met Lili Kristian Wiesr

8, 9. (a) Su luti kut in lungse met lili wiesr, a mea lungse mokle kut in oru? (b) Sang me srikasrak fuka lungse ku in kasre un met lili in akkeye sie sin sie.

⁸ Poul el fwak nu sin met Kristian fwin an Tessalonika: “God el sifwanu luti nu sumwos, tu komwos in lungse sie sin sie.” (1 Tessalonika 4:9) Aok, elos nu kemwa su “lutiyuk sin Jeova” elos lungse sie sin sie. (Isaia 54:13) Lungse lalos akkalemyeyuk ke orekma, oanu Poul el akkalemye ke pal se ma el fwak: “Ke lungse komwos in kulansap nu sin sie sin sie.” (Galetia 5:13; 1 Jon 3:18) Ma inge elos oru, ke sie me pupulyuk, ke pal se elos muteta nu yurin met lili wielos su mas, akkeye met asor, a sang kasru nu sin met munas. (1 Tessalonika 5:14) Lungse paye Kristian lasr sang kasru yok ke kapkapek lun paredais lasr in ngun.

⁹ Ke congregation lun Ancón​—sie ke congregation fwin an Ecuador su oasr congregation 544—​met lili elos akkalemye lungse lalos ke sie inkanek mwo. Sie ma upa pa mani fwin an we oru upa in oru orekma in suk mani, ke ma inge met orekma lun congregation elos oakiye in suk mani ke inkanek in kukakin mongo nu sin met patur fwin an we ke pal in tuku lalos tokin elos patur ke eku. Met nu kemwa in congregation akesrui, wekunang tulik srisrik. Elos enenu in mutamwauk orekma ke aur 1:00 a.m. in akola mongo ke aur 4:00 a.m. ke pal in foloko lun met patur. Mani su met lili elos eis elos oralik inmaslolos fwal nu ke enenu. Kain in akesrui in kasru sie sin sie inge akkalemye lungse paye lun met Kristian.

10, 11. Fuka kut ku in akkalemye lungse nu sin met lili su kut tianu futoto?

¹⁰ Tusruktu, kut tia akkalemye lungse lasr nu sin met Kristian mukena su kut etu. Met sap Piter el fwak: “Komwos in lungse met lili nu kemwa.” (1 Peter 2:17 New World Translation) Kut lungse met lili wiesr nu kemwa meyen elos wi kut alu nu sin Jeova God. Pal in ma upa nu selos ku in sang pal mwo in akkalemye lungse inge. Ke sie me pupulyuk, ke lusen 2000 yiu lun orekma, sronot upa kunausla ma puspis fwin an Mozambique, a meun inmaslon met fwin an we oru an Angola in arulanu sikasrup. Pise lulap lun met lili su wi ke 31,725 met orekma fwin an Mozambique a 41,222 fwin an Angola sun ma upa ke sripen ma sikyuk inge. Ke ma inge, Met Lo lun Jeova su muta ke an futoto lun South Africa elos supwela me kasru yok in akfwusesrye ma upa lun met lili wielos su muta ke an luo inge. Insemwomwo lalos in sang kasru ke ma “yokyokelik” lalos nu sin met lili wielos su oasr enenu akkalemye lungse lalos.​—2 Korint 8:8, 13-15, 24.

¹¹ Lungse ku in liyeyuk pa, ke pal se met lili in an puspis elos sang kasru ke orekma in musa Kingdom Hall a Assembly Hall puspis in an sikasrup puspis. Sie me srikasrak pa an Solomon Islands. Ne oasr meun orek fwin an we, an Solomon Islands el kapek ke percent 6 ke met orekma ke yiu tari’a, pise sasu lalos oasr ke 1,697. Elos orala plan in musa sie Assembly Hall. Fwinne met puspis fwin an we elos som liki an Solomon Islands ke sripen meun, tusruktu met orekma puspis su wangin molo fwin an Australia elos tuku in sang kasru ke musa. Tok met volunteer inge nu kemwa enenu in som, tusruktu elos tia oru ou inge nu ke pal elos sang akpa nu sin met lili fwin an we in aksafyela foundeson. Prefabricated steel nu kemwa lun loom se inge supweyukme fwin an Australia me, a safla lun loom alu kato inge​—ke pal se loom lulap puspis fwin an we wanginla met meyen elos kaeng—​fwa sang ma lo lulap ke en Jeova a ke lungse lun met lili.

Oanu God, Kut Lungse Fwalu

12. Fuka kut etawi Jeova in oiye su kut akkalemye nu selos nu kemwa su tia wi kut in lalalfongi?

¹² Ya lungse lasr fwal mukena nu sin sou lasr a met tulan lasr? Mo, kut fwin “met etawi God.” Jisus el fwak: “Tu God el lungsel fwalu ou inge, tu el ase Mwen siefwunnu isusla natul, tu el su lalalfongel fwa tia tula, a el fwa eis moul ma patpat.” (Efesus 5:1; Jon 3:16) Oanu Jeova God, kut orekma ke lungse nu sin met nu kemwa​—wekunang met nu kemwa su tia wi ke lalalfongi lasr. (Luk 6:35, 36; Galetia 6:10) Ke sripe se inge, yokna, ke kut luti ke peng mwo lun Togusrai a fwakak nu sin kutu met ke orekma lulap lun God ke lungse nu selos. Ma inge ku in kol nu ke molela nu sin kutena met su porongo.​—Mark 13:10; 1 Timote 4:16.

13, 14. Mea kutu experience lun met lili wiesr su akkalemye lungse nu sin kutu met su tia Met Lo, fwinne ma inge sang ma elya nu selos?

¹³ Loang akmwoye ke met kulansap akosr su special pioneer fwin an Nepal. Elos inge pakiyuki in oru orekma ke sie siti ke leyen southwest lun an’u, a ke lusen yiu limekosr, elos akkalemye lungse lalos ke pal se elos mongfwusesr in orek ma lo ke siti se inge a ke mura puspis su loes ke siti se inge. In oru territory lalos, pal nu kemwa elos fwafwasyesr ke lusen aur puspis ke bicycle ke sie pulanpal fol su oasr ke 100 degrees kutu Fahrenheit. Lungse lalos a “muteng in oru mwo” oswela fwako mwo ke pal se un sie buk study lun met oakiyuki ke sie mura. (Rom 2:7) In March 2000, 32 met elos tuku in long public talk lun sie circuit overseer. Oasr pise sasu ke met orekma su oasr ke 430 fwin an Nepal ke yiu tari’a​—sie kapek pa inge su oasr ke percent 9. Arulanu kalem la Jeova el akinsemwomwoye moniyuk a lungse lun met lili ke an inge.

¹⁴ In an Colombia, temporary special pioneer elos som in luti nu sin Wayuu Indians. In oru ou inge, elos enenu in lutlut ke sie kas sasu, tusruktu lungse a pwar lalos akinsemwomwoyeyuk ke pal se met 27 elos wi ke public talk fwinne af upa. Kain in lungse a moniyuk inge su akkalemyeyuk sin pioneer sang kasru nu ke kapkapek su oasr ke percent 5 in an Colombia a sie pise yok sasu lun met orekma su oasr ke 107,613. In an Denmark sie sister matuo el lungse in sramsramkin peng mwo nu sin kutu met, tusruktu el sie met ul se. Meyen el srunga ma inge in kutongyel, el osun nu sin met puspis su lungse in lutlut ke inkanek in sim leta. Ke pal inge, el sim leta nu sin met 42 a oru Baibel study nu sin met 11. El sie sin met ke pise sasu lun met orekma su oasr ke 14,885 su reporti fwin an Denmark ke yiu tari’a.

Lungse Met Lokwalok Lom

15, 16. (a) Fuka lupan lungse lasr fwal nu ke ma Jisus el fwak? (b) Fuka met lili wiesr su fwal elos aksumwosye ke inkanek lun lungse kas kikiap lun sie met lain Met Lo lun Jeova?

¹⁵ Jisus el fwak nu sin sie met su yok etu ke Ma Sap la met Samaria ku in nunkeyuk oanu sie met atalani. Ke Me Sramsram lal Fwin Eol, Jisus el akyokye sramsram lal ke pal se el fwak: “Komwos long ma fwak tari, kom fwa lungsum met tulan lom, a srunga met lokwalok lom.’ A Nga fwak nu sumwos: lungse met lokwalok lomwos, a pre kelos su kolyai komwos; tu ou inge, komwos fwa tulik nutin Papa tumumwos in kosrao.” (Mattu 5:43-45) Fwin kutu met elos lain kut, kut kaifweung in “kutangla ma koluk ke ma mwo.” (Rom 12:19-21) Fwin ku, lela kut in sang nu selos ma saok su oasr yurosr, pa inge, ma paye.

¹⁶ Fwin an Ukraine sie me sramsram ke Kremenchuk Herald newspaper se akkalemye la Met Lo lun Jeova elos sie kain in alu srisrik ye koko lun met su sang me sensen nu sin met. Tia kas fwusesr pa inge meyen fwin an Europe kutu sin met elos kaskas ou inge in purakak kutu met in kutongye orekma lun Met Lo lun Jeova. Ke ma inge oasr siyuk nu sin editor in siyuk sel in orala news in aksumwosye me sramsram lal. El insese, tusruktu ke pal se el oru ou inge, el simusla la me sramsram se meet lal tuku ke lutlut paye. Ke ma inge brother elos sifwil sonol a wis me akpayeye pukanten nu sel. Ke saflaiye, editor el akilen la me sramsram se meet lal tafongla, a el orala news su akkalemye la me sramsram lal tafongla. Inkanek lun aksumwos nu sel ke kulang pa inganek in lungse in aksumwosye ma upa inge, a ma inge kol nu ke ma mwo.

Fuka Kut Ku In Akkapye Lungse?

17. Mea ma inge su akkalemye la saap tia fwusesr pal nu kemwa in akkalemye lungse nu sin kutu met?

¹⁷ Ke pal se awowo el isusla, papa a nine kiel elos sa in pulakin lungse nu sel. Tusruktu nu sin met matu tia ou inge ma sikyuk pal nu kemwa. Pa inge sripe efu Baibel el fwak pal nu kemwa nu sesr in lungse sie sin sie​—kut enenu na paye in orekma a akkapye ma inge. (1 Piter 1:22; 4:8; 1 Jon 3:11) Jisus el etu la lungse lasr fwa sun me srifwe ke pal se el fwak la kut enenu in sang nunuk munas nu sin met lili wiesr nu ke “itngoul pal itkosr.” (Mattu 18:21, 22) Poul el ouyepa kaifwe kut in tafwela in “muteng sie sin sie.” (Kolosse 3:12, 13) Tia me lut paenang sapkinyuk nu sesr in: “Fwasr tokin lungse”! (1 Korint 14:1) Kut ku in oru ou inge fuka?

18. Mea ma inge su ku in kasre kut in akkapye lungse nu sin kutu met?

¹⁸ Ma se meet, kut ku in esam pal nu kemwa lungse lasr nu sin Jeova God. Kain in lungse se inge sie me kasru yok nu sesr in lungse met tulan lasr. Efu? Meyen kut fwin oru ou inge, ma inge akkalemye akfulat nu sin Papa tumasr in kosrao a sang mwolanu a kaksak nu sel. (Jon 15:8-10; Filippai 1:9-11) Ma se akluo, kut ku in srike in liye ma puspis oanu inkanek in liye lun Jeova. Pal nu kemwa kut oru ma koluk, kut oru ma koluk lain Jeova; fwinne ou inge, pal puspis el nunuk munas nu sesr a el tafwela in lungse kut. (Sam 86:5; 103:2, 3; 1 Jon 1:9; 4:18) Kut fwin akkapye nunuk lun Jeova, kut akola in lungse kutu met a nunuk munas ke ma koluk lalos su lain kut. (Mattu 6:12) Ma se aktolu, kut ku in oru nu sin kutu met ma kut lungselos in oru pa nu sesr. (Mattu 7:12) Meyen kut sesumwos, pal nu kemwa kut enenu nunuk munas. Ke sie me pupulyuk, ke pal se kut fwak ma puspis su akngalye kutu met, kut fwinsrak la elos esam la met nu kemwa oru ma koluk kais kutu pal ke sripen kas sufwal. (Jemes 3:2) Kut fwin lungse kutu met in akkalemye lungse nu sesr, kut enenu in akkalemye lungse nu selos.

19. Fuka kut ku in siyuk kasru lun ngun mutal in akkapye lungse?

¹⁹ Ma se akakosr, kut ku in siyuk kasru lun ngun mutal meyen lungse el ipen fwako lun ngun mutal. (Galetia 5:22, 23) Orek kamwuk, lungse inmaslon met nu kemwa in sou a lungse lun mokul nu sin mutan ku mutan nu sin mokul ma inge nu kemwa sifwanu tuku pal nu kemwa. Tusruktu, kut enenu ngun mutal lun Jeova in akkapye lungse su oasr yurin Jeova, kain in lungse su me kapur lun sumwosna. Kut ku in siyuk kasru lun ngun mutal ke kut ridi Baibel su etuku ke ngun lun God. Ke sie me pupulyuk, kut fwin lultut ke moul lal Jisus, kut ku in liye oiye su el akkalemye nu sin met, a kut ku in lutlut in etawi el. (Jon 13:34, 35; 15:12) Sayen ma inge, kut ku in siyuk sin Jeova ke ngun mutal, yokna ke pal se kut pulakin ma upa in akkalemye lungse. (Luk 11:13) Safla, kut ku in fwasr tokin misla kut fwin muta na futoto ke congregation lun met Kristian. Asrouki lasr nu sin met lili mokul a mutan ku in kasre kut in akkapye lungse.​—Soakas 13:20.

20, 21. Kain in orekma mwo fuka ke inkanek lun lungse Met Lo lun Jeova elos oru ke lusen 2000 yiu lun orekma?

²⁰ Ke yiu tari’a, oasr pise yok sasu su oasr ke 6,035,564 met orekma lun peng mwo fwin fwalu nu fon. Met Lo lun Jeova elos orekmakin 1,171,270,425 aur in suk met puspis in fwakak nu selos peng mwo inge. Lungse pa moklelos in muteng ke pal fol, af, oyuo ke pal se elos oru orekma inge. Lungse pa moklelos in sramsram nu sin tulik lutlut in loom lutlut a nu sin met orekma ke nien orekma lalos a in osun nu sin metsa ke inkanek puspis a ke an puspis. Met puspis sin met su Met Lo elos muteta nu sa elos tia lungse, kutu elos lain. Tusruktu, kutu sin met elos akkalemye pwar, paenang oasr ke 433,454,049 return visit elos oru nu sin met a 4,766,631 Baibel study orekla.a

²¹ Ma inge nu kemwa inkanek in akkalemye lungse su Met Lo lun Jeova elos oru nu sin God a met tulan lalos! Kain in lungse inge tia ku in oyou la. Kut lalalfongi na paye la ke 2001 yiu lun orekma kut fwa liye sie ma lo lulap nu sin met nu kemwa su yok liki. Lela insemwomwo lun Jeova in tafwela nu sin met nu kemwa su alu nu sel ke moniyuk a oaru ke elos ‘oru orekma lalos nu kemwa in lungse’!​—1 Korint 16:14.

[Footnote]

Ya Kom Ku In Aketeye?

• Su kut etawi ke pal se kut lungse met tulan lasr?

• Fuka lupan lungse su kut enenu in akkalemye?

• Mea kutu experience su akkalemye lungse lun met Kristian?

• Fuka kut ku in akkapye lungse Kristian?

[Chart on page 14-17]

2000 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Pictures on page 11]

Lungse lun met Kristian ku in oru sie sou in tukeni muta ke inse siefwunnu

[Pictures on page 13]

Lungse mokle kut in akkalemye fwinsrak lasr nu sin kutu met