Ya Yok Sripe La Piya Ka Alu Su Kom Sulela?
PUS in masrlosr lungse in eis a sulela ma mwo puspus fwin kut som moul. Fwin oasr sie market el kukakin kain in fwokun sak puspus, kut ku in sulela fwokun sak su kut lungse na paye a mwo nu sin sou lasr. Fwin sie sto in nuknuk el kukakin nuknuk ke kain in style a tun pukanten, kut ku in sulela ke nuknuk su fwal na paye nu sesr. Kutu oiya nu ke sulela su kut oru ke moul lasr el fwal nu ke lungse lasr sifwana oana met se met se. Tusruktu, kutu sulela su kut oru, el kasre kut, ke sie me pupulyuk fwin pa kut oru sulela nu ke me mongo mwomwo ku nu ke met kawuk mwomwo. Na, e fuka nu ke alu se su kut sulela? Ya inkanek lasr in alu el sie oiya in akkalemye lungse lasr sifwana nu ka? Ku el sie ma su sang kasru nu ke oiyesr ke inkanek yok?
Oasr kain in alu puspus su kut ku in sulela. In an puspus ke pal inge oasr masap su sang sukosok nu ke alu, a metu elos pulakin la elos arlana sukosok in som liki alu lun papa a nine kiyelos. Oasr sie akwuk oakiyuki in sokak a in akkalemye nunak lun met puspus orek in an United States su akkalemye la oasr percent 80 sin met Merika elos “lulalfongi mu pus liki alu sefwanna ku in kol nu ke inkanek in molela.” In fwal nu ke akwuk sepana inge su akkalemye la, “met se in masrlon met limekosr su siyukyak selos el fwak mu el ekulla alu lal ke pal se el matula.” Oasr sie survey fwin an Brazil el akkalemye la apkurun percent 25 sin met Brazil elos ekulla alu lalos.
In pal somla, metu lungse in orek akukuin nu ke me luti su akkalemye ke sie alu liki sie alu. Ke pal inge nunak pengpeng yok nu ka pa, ‘Tia yok sripe in suk la piya ka alu kom sulela.’ Tusruktu ya paye ma inge? Ya orekma lom in sulela ke alu el kasre kom ku akkolukye kom?
In oana ke sie met lalmetmet su som moul el enenu in siyuk kusensiyuk puspus ke me kuka inge la tuku ya me, ke ma inge mwo nu sum kom in n siyuk ke kusensiyuk inge, ‘Fuka mutamweyen alu nukewa inge su tia oana sie, a efu?’ Baibel el sang me top puspus.
Fuka Alu Puspus Mutamwauk?
In an Israel in pal meeta, Togusra Jeroboam el mutamwauk in orala sie alu sasu ke sie tausan yea meet liki Jisus el tuku nu fwalu. Jeroboam el pa togusra se meet ke togusrai lun met Israel leyen eir su tila wi ke togusrai lun sruf luo fwin an Jerusalem. Oasr kunokon upa lal in oru met nukewa in akpayeye niyen sun lal. “Ke ma inge togusra el papu, a oru lugwe kaf ke gold a el fwak nu selos: ‘Arulana upa nu sumwos in utyuk nu Jerusalem. Liye God lom, O Israel.’” (1 Togusra 12:28) Kalem la, togusra inge el lungse in orekmakin akwuk ke alu in kufusla met nukewa inge in tila akkalemye oaru lalos in som nu Jerusalem, nu yen su elos pala tari in orek alu we. Alu se su Jeroboam el mutamwauk ka inge el oru ke lusen century puspus a kol nu ke sruo ku mise lun million puspus sin met ke pal se God el sang nununku nu sin mutanfwal lun Israel su som liki alu paye. Alu lal Jeroboam el oakiya nu ke sie akwuk in sang kasru akwuk in kolyuk lal sifwana. Oayepa kutu alu lun mutanfwal puspus su srakna orekmakinyuk a oasr nu ke pal inge sramteyukyak in sang akkeye akwuk lalos ke politic ku kolyuk lalos.
Met sap Poul el akkalemye siepa nunak su oasr yurin metu in sang sramteak sie alu sasu ke el fwak: “Nga etu tu tokin nga som liki komwos, kosro wolf silolel fwa utyuk in masrlomwos a tia karunganang u sa, a liki in masrlomwos sifwana kutu met fwa tuyuk, a luti ma sesumwos, in amakin met lutlut in fwasr tukolos.” (Orekma 20:29, 30) Met kol puspus su inse fulat elos lungse in orala u lun met puspus in orek akwuk nu ke alu ke sripen elos lungse in akfulatyelos sifwana. Alu puspus su ekin ku fwakak mu elos met Kristian el sun oiya su wanginla inse sefwanna yurolos ke sripen oasr u puspus in masrlolos su alein sie sin sie.
Su Alu Puspus Elos Lungse in Akinsemwomwoye?
Orekma in akinsemwomwoye nunak a lungse lun met puspus ku in akkeye kutu met elos in sramteak akwuk nu ke sie alu sasu. Ke sie me pupulyuk, oasr sie magasin su pangpang Economist el reporti ke alu puspus su eteyuk oana alu su arlanu yok in an United States. Ma simusla inge el akkalemye la alu nukewa inge elos kapkapek ke sripen ma inge “fwal nu ke akwuk mwo su oana sie nu ke akwuk lun business mwomwo nukewa: in akinsemwomwoye met moul lalos meet.” Kutu sin alu lulap elos oru “kain in orekma in alu su oasr me akengan ke video puspus, drama, a me on su oasr ke pal inge.” Kutu met kol ke alu puspus inge elos luti met su wi ke alu lalos in ekla “met kasrup, in engankin mano fukoko, a wangin me fosrnga lalos.” Fwinne alu nukewa inge elos akkolukyeyuk pana ke sripen elos wi orekmakinyen entertainment industry ku elos “sifwana orek buk ku video in oana me kuka lalos,” magasin inge el akkalemye pa la, “elos lungse na paye in oru ma lungse lun met nukewa su wi ke alu lalos.” Report se inge el aksafyeyukla ke kas inge: “Toeni lun business a alu el kutangla na paye.”
Fwinne kutu alu elos tia arlanu oru oana ke akwuk lun business, alu puspus su “oru ma lungse lun metu” elos akesmakinye kut ke sie kas in sensen lal Poul. El simusla: “Tu pal se fwa tuku ke elos fwa tia muteng me luti paye, a meyen srelos srung, elos fwa akpusye nu selos met luti su oana lung koluk lalos sifwana; a forokla srelos liki ma paye, a kufla nu ke sramsram lusrongten.”—2 Timote 4:3, 4.
Ke sripen oasr alu puspus su sikyak ke sripen lungse lalos ke ku su kupasr nu ke akwuk lun politic, oiyen pengpeng, a ke ma lungse lun met liki na in akinsemwomwoye God, paenang tia me lut fwin alu el wi pa oru orekma koluk oana orekma in akkolukye tulik srisrik, orekma kutasrik, meun, ku orekma lun terrorist. Ke pal puspus, alu el sie ma su tia paye ku mwo. Fuka kom ku in fwasr liki in tia kiapeyukla?
[Blurb on page 4]
Alu puspus sikyak ke sripen lungse ke ku su kupasr nu ke akwuk lun politic, ke oiyen pengpeng, ke ma lungse lun met yok liki na in akinsemwomwoye God