Sangeng sin Jeova a Moulkin Moul Insemwomwo
“O sangeng sin Jeova, komwos met mwo lal, tu wangin enenu lalos su sangeng sel.”—SAM 34:9.
1, 2. (a) Kain in inkanek fuka luo su tia oana sie Kristendom elos nunku ke oiyen sangeng sin God? (b) Kusensiyuk puspus fuka kut fwa akuteyuki ke pal inge?
MET luti puspus lun Kristendom su luti la metu enenu in sangeng sin God elos oru ma inge pal nukewa ke sie me luti su tia fwal nu ke ma simusla la God el sang kai nu sin met koluk ma patpat ke e in isis. Kain in me luti inge el lain ma Baibel el luti kel Jeova oana sie God lun lungse a nununku sumwos. (Genesis 3:19; Duteronomi 32:4; Rom 6:23; 1 Jon 4:8) Kutu met luti lun Kristendom elos orekmakin inkanek in luti su tia oana sie. Elos tia luti ke oiyen sangeng sin God. A, elos luti mu God el lela a eis kutena met fwinne el moulkin inkanek in moul mwomwo ku inkanek in moul koluk. Baibel el tia pa luti kain in nunak ou inge.—Galetia 5:19-21.
2 Aok, Baibel el akkeye kut in sangeng sin God. (Fwakyuk 14:7) Me luti inge lun Baibel el orala kusensiyuk puspus. Efu ku sie God lun lungse el lungse kut in sangeng sel? Kain in sangeng fuka God el siyuk? Fuka orekma lasr in akkalemye sangeng sin God el use ma lane nu sesr? Kut fwa akuteye kusensiyuk puspus inge ke kut tafwela in sramsramkin ku akuteye Sam ak 34.
Efu ku in Sangeng sin God
3. (a) Nunak fuka kom akkalemye nu ke masap in akkalemye oiyen sangeng sin God? (b) Efu ku met su sangeng sin God elos insemwomwo?
3 Oana sie Met Orala Ma Nukewa a Met Kol Fulatlanu in kosrao a fwalu, paenang metu fwal in akkalemye sangeng lalos nu sin God. (1 Piter 2:17) Tusruktu, kain in sangeng inge el tia na me aksangeng upa oana nu sin sie god su sulallel. Ma inge el sie kain in pulakin su oasr sunak mwomwo ka ke sripen oiya mwomwo lun Jeova. Ma inge el sie kain in sangeng in aktoasryel. Kain in sangeng ou inge nu sin God el mwo emeet a ku in akmwoye oiya lun sie met, a ma inge tia me akasor se ku me aksangeng upa se. Jeova, el “God su insemwomwo,” el lungse metu in engankin moul. (1 Timote 1:11) Tusruktu, in oru ou inge, kut enenu in moulkin moul fwal nu ke masap nukewa lun God. Nu sin met puspus, kalmeyen ma inge pa in ekulla inkanek in moul lalos. Met nukewa su ekulla inkanek in moul lalos fwal nu ke ma su eneneyuk elos liye a pulakin payaiyen kas lal Devid sie met sim lun sam: “O pulakin a liye tu Jeova El mwo; insemwomwo met se su eis nien moul lal in el. O sangeng sin Jeova, komwos met mwo [mutal, NW] lal, tu wangin enenu lalos su sangeng sel.” (Sam 34:8, 9) Meyen oasr fototo mwomwo lalos nu sin God, paenang met nukewa su sangeng sin Jeova wangin me enenu lalos.
4. Mea mwulela su Devid a Jisus elos akkalemye?
4 Loang akmwoye nu ka la Devid el akfulatye met nukewa lal ke el panglolos “met mwo” ku met mutal. Elos wi ke mutanfwal mutal lun God. Elos filiye pa moul lalos ke me sensen ke elos fwasr tokol Devid. Fwinne elos kakaeng la lukel Togusra Soul, Devid el akkalemye lulalfongi lal la Jeova el fwa tafwela in sang ma enenu yok lalos. Devid el simusla: “Oasr enenu lun laion fwusr a elos musrinsral; a elos su suk Jeova fwa tia enenu kutena ma mwo [ma mwo nukewa fwa oasr yurolos, NW].” (Sam 34:10) Jisus el akkalemye pa mwulela se su oapana inge nu sin met tuma lutlut nukewa lal.—Mattu 6:33.
5. (a) Kain in moul a oiya fuka lun met tuma lutlut puspus lun Kraist? (b) Mea kas in kai su Jisus el sang nu selos ke oiyen sangeng?
5 Met puspus su longol Jisus elos met sekasrup, met pusisel in masrlon met Ju. Ke sripe inge, Jisus “el pakomutalos, tu elos ongoiye, a fwasrelik, oana sip su wangin met sropu.” (Mattu 9:36) Ya met pusisel inge oasr pulaik lalos in fwasr tokol Jisus? In oru ou inge, elos enenu in akkeye sangeng lalos nu sin Jeova, tia sangeng sin met. Jisus el fwak: “Nik komwos sangeng selos su uniye mano, a tok wangin ma elos ku in oru. A Nga fwa fwakak nu sumwos su komwos fwa sangeng se: Sangeng sel, su tokin el uniye oasr ku lal in sisla nu in hell [ke kas Grik, Gehenna]. Aok, Nga fwak nu sumwos, sangeng Sel. Ya tia kukakinyuk sparro limekosr ke penni luo? A wangin sie selos mulkinyukla ye mutun God. A aunsifwomwos nu kemwa oaoala. Nik komwos sangeng; komwos mwo liki sparro puspus.”—Luk 12:4-7.
6. (a) Kas fuka lal Jisus akkeye met Kristian nukewa? (b) Efu ku Jisus el pa me srikasrak mwomwo emeet ke akkalemyeyen sangeng sin God?
6 Fwin met puspus su sangeng sin God sapkinyuk sin met lokwalok lalos elos in tui ke kulansap lalos nu sin God, elos ku in esamek kas in kasru lal Jisus: “Kutena met su fwa fwakyuyuk ye mutun metu, Mwen nutin met el fwa ouyepa fwakulak ye mutun lipufan lun God. A el su lafwekin yu ye mutun metu fwa lafwekunul ye mutun lipufan lun God.” (Luk 12:8, 9) Kas inge akkeye met Kristian puspus, yokna in an puspus su wangin sukosok in orek alu paye we. Kain in met nukewa inge elos tafwela in kaksakin Jeova ke inkanek lalmetmet ke meeting nukewa lun met Kristian a ke orekma in luti lalos. (Orekma 5:29) Jisus el akkalemye me srikasrak mwomwo emeet ke akkalemyeyen “sangeng sin God.” (Hibru 5:7) In kaskas kel, oasr Kas palu su palyeyuk: “A ngunin Jeova fwa on fwel, ngunin . . . sangeng sin Jeova; a engun lal a fwa in sangeng sin Jeova.” (Isaia 11:2, 3) Ke ma inge, Jisus el fwal na paye in luti kut ke ma lane puspus ke sangeng sin God.
7. (a) Fuka met Kristian elos ku in akkalemye oiya mwomwo ke me solsol su oapana nu ke ma Devid el akkalemye? (b) Fuka papa a nine elos ku in etawi me srikasrak mwo lal Devid?
7 Met nukewa su etawi me srikasrak lun Jisus a elos su akos me luti lal, kalme pa, elos akkalemye oiya mwomwo nu ke sie me solsol su oapana nu ke ma Devid el akkalemye: “Fwasru, komwos tulik, poronge yu; nga fwa luti nu sumwos sangeng sin Jeova.” (Sam 34:11) Devid el ku in fwak mu met nukewa su welul pa “tulik puspus natul” meyen elos akkalemye sunak nu sel oana met kol lalos. Ke ma inge, Devid el kasru met nukewa lal in sangeng sin God tu elos fwa ku in inse sefwanna a engankin me insemwomwo lun God. Sie me srikasrak na mwomwo pa inge nu sin papa a nine nukewa su met Kristian! Jeova el sang ku nu selos ke oiyen karunginyen mwen a an nukewa natulos in “karunginelos ke me kai a me kasru nu ke nunak lun Jeova.” (Efesus 6:4, NW) Ke inkanek in sramsramkin ma lun ngun len nukewa nu sin tulik a in oru sie lutlut lun Baibel nu selos len nukewa, papa a nine elos ku in kasru tulik srisrik natulos in sangeng sin Jeova a engankin moul mwomwo.—Duteronomi 6:6, 7.
Fuka in Orekmakin Sangeng sin God ke Moul Lasr
8, 9. (a) Efu ku sie inkanek in moul in akkalemye sangeng sin God el arlana me akinsemwomwoye? (b) Mea eneneyuk nu ke orekma in karungin loasr?
8 Oana ma akkalemyeyuk tari, in sangeng sin Jeova tia oru kut in tila insemwomwo. Devid el siyuk: “Su met se su kena [engankin, NW] moul, a lungse len puspus tu lan ku in liye ma mwo?” (Sam 34:12) Kalem la, sangeng sin Jeova pa key in engankin sie moul loeloes a moul insemwomwo. Tusruktu, fusrasr in fwak mu, “Nga sangeng sin God.” Tia fusrasr in akpayeye sangeng lasr nu sin God ke oiyesr a ella lasr. Ke ma inge, Devid el tafwela in akuteye ke inkanek su kut ku in akkalemye nu ke sangeng sin God.
9 “Srukye loum liki ma koluk, a ngoasrom liki kaskas kutasrik.” (Sam 34:13) Met sap Piter el eis kasru lun ngun mutal in orekmakin fus se inge ke Sam 34 tokin el sang kas in kasru nu sin met Kristian puspus in akkalemye lungse oana met lili. (1 Piter 3:8-12) In sruokye loasr liki ma koluk kalmekin la kut fwa tia akkalemye kas in lesrik su ku in akkolukye met. A, kut fwa kafweang pal nukewa in sang me akkeye nu sin met puspus ke kut sramsram nu selos. Sayen ma inge, kut fwa kafweang in pulaik a kaskaskin ma paye.—Efesus 4:25, 29, 31; Jemes 5:16.
10. (a) Akuteye la mea kalmen in forla liki ma koluk. (b) Orekma puspus fuka weang in oru ma mwo?
10 “Fwasr liki ma koluk, a oru ma mwo; suk misla a ukwe.” (Sam 34:14) Kut fwasr liki ma puspus su God el srunga ku selngawi, oana orekma lun kosro, petsa ku me rid fokfok, pusrapasr, orekma lun inutnut, orekma sulallel, srui, a orekmakinyen ono koluk. Kut srunga pa me akengan su akkalemye kain in me srungeyuk nukewa inge. (Efesus 5:10-12) A, kut orekmakin pal lasr in oru ma mwo. Ma mwomwo emeet su kut ku in oru pa in wi pal nukewa ke orekma in luti peng mwo lun Togusrai a ke orekma in oru met tuma lutlut, kasru met puspus in eis molela. (Mattu 24:14; 28:19, 20) Orekma in akola a wi ke meeting nukewa lun met Kristian, in sang me kasru nu ke orekma in luti fwin fwalu nufon, sang kasru in karungin Kingdom Hall lasr, a in nunku yok ke ma enenu puspus lun met Kristian wiyesr su oasr ke me enenu, ma inge nukewa weang pa ke orekma mwo.
11. (a) Fuka Devid el orekmakin kas lal nu ke oiyen misla? (b) Mea kom ku in oru in ‘kafweang a in orekmakin misla’ ke congregation?
11 Devid el akkalemye sie me srikasrak mwomwo nu ke moul in misla. Oasr pal mwomwo luo lal in unilye Soul. Ke pal luo inge, el suk elan tia oru orekma lun akmas a tok el akkalemye inkanek in sunak ke el sramsram nu sin togusra, a el fwinsrakkin in sifwilpa oasr misla. (1 Samuel 24:8-11; 26:17-20) Mea ku in orek ke pal inge fwin oasr ma sikyak su oru me sensen su ku in kunausla misla lun congregation? Kut enenu in “suk misla, a kafweang in orekmakin misla.” Ke ma inge, kut fwin pulakin mu fototo lasr nu sin sie met lili el tia mwo, kut enenu in akos kas in kai lun Jisus: “Meet kom in iumwela nu sin met lim.” Tokin ma inge kut tafwela in oru orekma puspus ke alu paye.—Mattu 5:23, 24; Efesus 4:26.
In Akkalemye Sangeng sin God Use Me Insemwomwo Puspus
12, 13. (a) Me insemwomwo puspus fuka met nukewa su sangeng sin God elos engunkin ke pal inge? (b) Me insemwomwo yok fuka a tia pat fwa engankinyuk sin met oaru nukewa su alu nu sin God?
12 “Mutun Jeova on nu sin met sumwosmwos, a srel igakla nu ke pang lalos.” (Sam 34:15) Ma simusla ke orekma lun God in kasrel Devid sang me akpayeye nu ka la kas nukewa ke fus inge el paye. Ke pal inge, kut pulakin insemwomwo yok a inse misla meyen kut etu la Jeova el karungin a liyekutyang. Kut lulalfongi la el fwa ase ma enenu lasr, fwinne ke kut pulakin me fosrnga yok su tuku ke ma upa puspus. Kut etu la tia pat met nukewa su wi ke alu paye fwa pula a liye me akpayeyen kas palu ke orekma lun Gog lun Magog in akkolukye kut a ke “len a me aksangeng lun Jeova.” (Joel 2:11, 31; Ezikiel 38:14-18, 21-23) Ke kutena oiya su kut sun ku pula in pal se, kas lal Devid fwa ku in akpayeyuk nu sesr: “Met sumwosmwos elos wowoyuk, a Jeova el long, a molelosla liki ongoiye lalos nu kemwa.”—Sam 34:17.
13 Sie me insemwomwo yok ke pal se in liye Jeova ke el akfulatye e mwolana lal! Insiesr fwa nenela ke me sunak yok liki meeta, a met lokwalok nukewa elos fwa sun safla lalos su oasr me mwekin yok ka. “Mutun Jeova on lainelos su orek ma koluk, in otela esmakinyelos liki fwalu.” (Sam 34:16) Sie me insemwomwo yok na paye pa inge in pulakin molela mwomwo ke fwal sasu a sumwosmwos lun God!
Mwulela Nukewa sin Jeova su Kasre Kut in Muteng
14. Mea ku in kasre kut in muteng fwinne oasr ma upa puspus?
14 Ke pal inge, in tafwela in akos Jeova ke sie fwal su oasr oiyen kutasrik a oiya koluk yok enenu in oasr mongfusrasr. Sangeng sin God el sie me kasru yok ke kut akyokye oiyen akosten lasr. Ke sripen pal in ma upa su kut muta ka inge, kutu sin met kulansap lun Jeova elos pulakin ma upa yok su orelos in tia insemwomwo a in akmunasyelos. Tusruktu, elos ku in lulalfongi na paye la fwin elos tupan Jeova, el fwa kasrelos in muteng. Kas lal Devid el akkalemye me akkeye paye: “Jeova el muta apkuran nu selos su inse musalla, a molelosla su toasr in ngun ke ma koluk lalos.” (Sam 34:18) Devid el tafwela in fwak, a oasr me akkeye ka: “Keok lun met sumwosmwos pusna, a Jeova El molella liki ma inge nu kemwa.” (Sam 34:19) Fwinne oasr ma upa puspus su sun kut, Jeova el ku na paye in molikutla.
15, 16. (a) Ma upa fuka Devid el eteak la tia pat tokin el simusla Sam 34? (b) Mea fwa kasre kut in muteng ke ma upa puspus?
15 Tia pat tokin el simusla Sam 34, Devid el long ke ma upa su sikyak nu sin met puspus su muta in an Nob, ke pal se Soul el onelosla nukewa a wekunang met tol puspus. Fuka lupan asor lal ke el esamak la ke sripen muteta lal nu in an Nob su oru Soul lan kasrkusrak! (1 Samuel 22:13, 18-21) Wangin alolo ka la Devid el siyuk kasru sin Jeova, a el eis me akkeye nu ke fwinsrak lun sifwil moulyuk lun “met sumwos” ke pal fwasru.—Orekma 24:15.
16 Ke pal inge, fwinsrak ke sifwil moulyuk el akkeye kut pa. Kut etu la ma nukewa su met lokwalok lasr elos oru tia ku in akkolukye kut na paye nu tok. (Mattu 10:28) Devid el akkalemye ke lulalfongi fukoko oapana nu ke kas lal inge: “El srukye srel nu kemwa; wangin soko koptelik.” (Sam 34:20) Fus se inge akpayeyuk nu sel Jisus. Fwinne Jisus el anwuki ke inkanek sulallel, tusruktu wangin soko sri kal “koptelik.” (Jon 19:36) Ke pal lasr inge, Sam 34:20 el akkalemye nu sesr la kutena ma upa su met Kristian akmusrala a “u lulap” su welulos elos sun, elos fwa tia akkolukyeyuk ma patpat. Ke kas in pupulyuk, sri kalos fwa tia koptelik.—Jon 10:16.
17. Me keok fuka sano met puspus su tia auliyuk a srunga na paye met nukewa lun God?
17 Nu sin met koluk, ma sikyak nu selos tia oana sie. Tia pat elos fwa kosrani ma elos taknelik. “Ma koluk fwa uniye met koluk; a elos su srunga met sumwosmwos fwa lisyukla.” (Sam 34:21) Met nukewa su lain met lun God elos fwa sun me keok su upa a koluk emeet. Ke fwakyuk lun Jisus Kraist, elos “fwa keok ke kaiyuk, aok, kunausla ma patpat.”—2 Tessalonika 1:9.
18. Ke oiya fuka “u lulap” elos loangoyukla tari, a mea elos fwa sun ke pal fwasru?
18 On lal Devid aksafyeyukla ke kas mwomwo inge: “Jeova el molela ngunin met kulansap lal; a wangin sie selos su eis nien moul lalos in el fwa lisyukla.” (Sam 34:22) Apkurun nu ke saflaiyen kolyuk lal ke lusen yea-40, Togusra Devid el fwak: “[God] el molela ngunik liki ongoiye nu kemwa.” (1 Togusra 1:29) In oana Devid, met nukewa su sangeng sin Jeova tia pat elos fwa esamak in pal meeta a pulakin insemwomwo ke sripen elos loangoyukla liki kutena pulakin a nunak su tia mwo ke sripen ma koluk a elos moliyukla liki ma upa nukewa lalos. Pus sin met Kristian akmusrala elos eis tari me insemwomwo lalos in kosrao. Oasr “sie u lulap” su tuku liki mutanfwal nukewa elos wi met lula sin tamulel nukewa lun Jisus in kulansap nu sin God a ke sripe se inge elos engankin oiya nasnas a mwo ye mutun Jeova ke pal inge. Ma inge sikyak ke sripen elos akkalemye lulalfongi lalos nu ke ku lun sran Kraist su aksuroryeyukla in molela met nukewa. Ke lusen Tausan Sie Yea Kolyuk lun Kraist su fwa tuku, ma lane yok lun me kise lun lango fwa orekmakinyuk nu selos, kasrelos in ekla met sumwosmwos.—Fwakyuk 7:9, 14, 17; 21:3-5.
19. Mea met nukewa su wi ke “u lulap” elos lungse na paye in oru?
19 Efu ku me insemwomwo nukewa inge tuku nu sin “u lulap” lun met nukewa su alu nu sin God? Meyen elos lungse na paye in tafwela in sangeng sin Jeova, elos kulansap nu sel ke sunak yok a akosten mwomwo. Aok, sangeng sin Jeova oru moul in insemwomwo ke pal inge a kasre kut in “srukye ku moul paye”—su fwa moul ma patpat ke fwal sasu lun God.—1 Timote 6:12, 18, 19; Fwakyuk 15:3, 4.
Ya Kom Esam?
• Efu kut enenu in sangeng sin God, a mea kalmen in sangeng sel?
• Fuka sangeng sin God ku in kasru ella lasr?
• Ma lane puspus fuka tuku ke sripen sangeng sin God?
• Mwulela puspus fuka kasre kut in muteng?
[Picture on page 18]
Met nukewa su sangeng sin Jeova elos orekmakin lalmetmet fwin wangin sukosok in oru alu paye
[Picture on page 20]
Ma mwo emeet kut ku in oru nu sin met atulani lasr pa in akkalemye nu selos peng mwo lun Togusrai