Kom In Lalmetmet​—Akkalemye Sangeng Sin God!

“Sangeng sin Jeova mutamweyen lalmetmet.”​—SOAKAS 9:10.

1. Efu ku met puspus elos nunku mu upa in etu ku kalem ke oiyen sangeng sin God?

IN PAL meeta, fwin kom fwak mu sie met el oasr sangeng lal sin God, ma inge nunkeyuk oana kas in kaksak. Ke pal inge, met puspus elos nunku mu nunak in sangeng sin God el fwal nu ke pal meeta mukena tusruktu upa in kalem ku eteyuk. ‘Fwin God el lungse’ saap elos ku in siyuk, ‘efu ku Ngan sangeng sel?’ Nu selos, sangeng el sie oiya lun pulakin su tia mwo, a ku in oru met in munasla. Tusruktu, oasr kalme puspus nu ke oiyen sangeng paye nu sin God, oana ma kut ku in liye, el tia sie oiya lun pulakin mukena.

2, 3. Mea eneneyuk nu ke sangeng paye nu sin God?

² Baibel el orekmakin sangeng sin God ke sie oiya mwomwo. (Isaia11:3) Ma inge el sie oiya lun sangeng mwomwo a sunak paye nu sin God, a sie lungse mwomwo in tia akasoryel. (Sam 115:11) Wekunang nu ke ma inge pa in eis a in akos masap fulat lun God ke inkanek nukemwa a in orala sie sulela mwo in aksumwosye moul fwal nu ke ma God el fwak ke ma mwo a ke ma koluk. Oasr sie buk el akkalemye la kain in sangeng mwomwo inge el akkalemye “oiya mwo nu sin God su kol ke ella mwo a in fwasr liki kain in ma koluk nukemwa.” Arulanu fwal, Kas lun God el akkalemye nu sesr kas inge: “Sangeng sin Jeova mutamweyen lalmetmet.”​—Soakas 9:10.

³ Paye la sangeng sin God el kupasr nu ke orekma puspus lun metu. El kupasr tia nu ke lalmetmet mukena a el kupasr pa nu ke engan, misla, moul mwomwo, moul loeloes, fwinsrak, lulalfongi. (Sam 2:11; Soakas 1:7; 10:27; 14:26; 22:4; 23:17, 18; Orekma 9:31) Ma inge el kupasr yok nu ke lulalfongi a lungse. Aok, el eneneyuk nu ke futoto lasr nu sin God a nu sin met tulan lasr. (Duteronomi 10:12; Job 6:14; Hibru 11:7) Sangeng sin God el wekunang in lulalfongi na paye la Papa tumasr in kosrao el karungin kut a el akola in nunak munas ke ma koluk lasr. (Sam 130:4) Met koluk mukena su srunga in auliyak pa oasr sripe yok nu selos in sangeng upa ke God.a​—Hibru 10:26-31.

Lutlut in Sangeng Sin Jeova

4. Mea ku in kasre kut in “lutlutkin sangeng sin Jeova”?

⁴ Ke sripen sangeng sin God el yok sripe in oru sulela mwomwo a in eis me insemwomwo lun God, fuka kut ku in “lutlutkin sangeng sin Jeova” ke inkanek fwal a sumwos? (Duteronomi 17:19) Oasr me srikasrak puspus lun mokul a mutan puspus su sangeng sin God simusyukla in ma Simusla “in luti kut.” (Rom 15:4) In kasre kut in eis kalem mwo ka la mea kalme na paye nu ke sangeng sin God, lela kut in nunku ke oiyen moul lun sie sin met puspus su orala me srikasrak mwomwo, kel Togusra Devid lun an Israel in pal meeta.

5. Fuka orekma in liuang sip el sang me kasru mwo in lotel Devid ke oiyen sangeng sin Jeova?

⁵ Jeova el pilesrel Soul, togusra se meet lun an Israel, ke sripen sangeng lal nu sin metu a srikeni sangeng paye lal nu sin God. (1 Samuel 15:24-26) Ke luma a ma sikyak inge su tia oana sie, nu ke inkanek in moul lal Devid a futoto paye lal nu sin Jeova ku in akilenyuk kel oana sie met su sangeng sin God paye. Mutamwauk ke pal se el srakna fwusr, oasr pal puspus Devid el muta ke imae ke lusen pal loeloes in liyeang sip nutin papa tumal. (1 Samuel 16:11) Ke fong puspus su oasr itu pukanten ke pal Devid el liaung sip u ma inge kasrel in kalem ke oiyen sangeng sin Jeova. Fwinne Devid el ku in liye mukena ke kutu ma in kosrao su arlena yok, oasr sie kain in nunak mwomwo su el akkalemye ka​—su arulanu fwal in akkalemyeyuk sunak a lungse nu sin God ka. “Ke nga nunku ke kosrao lom, orekma lun kufinpoum, malem a itue ma kom pakiye, el simusla tok, “mea met tu kom in esmakunul, a mwen nutin met tu kom in tuku nu yurol?”​—Sam 8:3, 4.

6. Mea Devid el pula ke el etu a kalem ke yokiyen Jeova?

⁶ Paye la, Devid el arulanu lut ke el srike ke oiyen srikla lal sifwana nu ke ma sakuruk puspus in kosrao su arulanu yok a oasr itu pukanten ka. Etauk lal inge akkeyel in kaksakin Jeova a ma inge tia aksangengyel, a el fwak: “Kosrao fwakak ke mwolana lun God; a yen engyengu fwakak ke orekma lun paul.” (Sam 19:1) Sunak a sangeng inge lal Devid kasrel in futoto na paye nu sin Jeova a oral Devid in oasr lungse in lutlut a in akos inkanek sumwosmwos Lal. Nunku ke pulakin lal Devid ke el onkakin on soko inge nu sin Jeova: “Tu Kom yok a oru ma sakuruk; kom mukena God. Luti nu sik inkanek lom, O Jeova. Nga fwa fwasr in paye lom. Oru insiuk inse siefwanna in sangeng ke em.”​—Sam 86:10, 11.

7. Ke inkanek fuka sangeng lal Devid sin God kasrel in lainul Golaiat?

⁷ Ke pal se met Filistia elos sruokye an Israel, met meun lulap lalos su pangpang Golaiat, su fulatel oasr ke fit yuh tafwu, el akangonye met Israel nukemwa, su kas lal pa oinge: ‘Sulela sie mokul in lainyu, Nga a el mukena! Fwin el kutangla, kut fwa kulansupe komwos.’ (1 Samuel 17:4-10) Soul a met meun nukemwa lal elos sangeng​—tusruktu Devid el tia sangeng. El etu la el enenu in sangeng sin Jeova a tia sin kutena met, fwinne elos arulanu ku. “Nga fwasrot nu yurum in En Jeova lun un met meun,” Devid el fwak nu sel Golaiat, “a tu mwalil se inge nafon fwa ku in etu tu Jeova El tia molela ke kutlas a mwusra; tu meun se inge ma lun Jeova.” Devid el orekmakin me fut lal a sie eot​—a ke kasru lun Jeova—​Devid el uniye met yok a fulat se inge.​—1 Samuel 17:45-47.

8. Mea me srikasrak puspus su oasr in Baibel ke met nukemwa su sangeng sin God luti kut ka?

⁸ Kut ku in sun ma upa a me kutong puspus ku met lokwalok su arulanu upa oana ma Devid el sun. Mea kut ku in oru? Kut ku in lain a kutangla ma inge oana ke inkanek mwo su Devid a kutupa met kulansap oaru in pal meeta elos oru​—elos akkalemye sangeng lalos nu sin God. Sangeng sin God el ku in kutongye sangeng sin met. Niemaia sie met kulansap oaru lun God el kaifwe met Israel nukemwa, su pulakin pa ma upa su tuku sin met lokwalok puspus: “Nik komwos sangeng selos. Esam Jeova su yok a me aksangeng.” (Niemaia 4:14) Ke me kasru lun Jeova, Devid, Niemaia, a kutupa met kulansap oaru lun God elos kutangla in akpayeye kunokon lalos su tuku sin God. Kut ku in oru pa ma inge ke kut akkalemye sangeng lasr nu sin God.

Lain Ma Upa Nukemwa Ke Sangeng sin God

9. Ke ma sikyak puspus fuka Devid el akkalemye sangeng sin God?

⁹ Tokin Devid el futilya Golaiat, Jeova el kasrel in kutangla ke meun puspus. Tusruktu, Soul su pulakin sok, el srike in unilye Devid​—ma se meet pa ke inkanek sulallel, tokin ma inge ke inkanek kutasrik, a saflaiye oasr un met meun welul. Fwinne Jeova el mwulela nu sel Devid la el e fwa ekla togusra, tusruktu ke lusen yea puspus Devid el enenu in kakaeng, a in meuni, a in tupan ke pal lun Jeova in oral oana sie togusra. Ke oiya nukemwa inge, Devid el akkalemye la el sangeng sin God paye.​—1 Samuel 18:9, 11, 17; 24:2.

10. Devid el akkalemye fuka sangeng sin God ke pal se su oasr me sensen?

¹⁰ Oasr sie pal, Devid el suk me loeyuk yurol Ekish, togusra lun met Filistia ke siti lun Gat, an sel Golaiat. (1 Samuel 21:10-15) Met kulansap puspus lun togusra elos fwak mu Devid el sie met lokwalok lun mutanfwal selos. Oiya fuka Devid el akkalemye? El pre nu sin Jeova a akkalemye ma oasr ke insiel. (Sam 56:1-4, 11-13) Fwinne el enenu in orek luma la el met wel se in oru el an kaengla, Devid el etu la Jeova pa molella na paye ke el akinsemwomwoye kafweang nukemwa lal. Lulalfongi lal Devid ke inse kemwa lal nu sin Jeova akkalemye la oasr sangeng lal Devid nu sin God.​—Sam 34:4-6, 9-11.

11. Fuka kut ku in akkalemye sangeng sin God ke pal su oasr me srife, oana ma Devid el oru?

¹¹ In oana Devid, kut ku in akkalemye sangeng lasr nu sin God ke kut akkalemye lulalfongi lasr nu ke mwulela lal in kasre kut in muteng a in kutangla ma upa nukemwa lasr. “Esung inkanek lom nu sin Jeova; kom in ouyepa lalalfongi El, a El a fwa oru,” Devid el fwak. (Sam 37:5) Tia kalme pa wanginla kutena ma kut enenu in oru a kut sang na nu ke poun Jeova ma upa nukemwa lasr a tupanul mukena in aksumwosye ma upa lasr. Devid el tia pre nu sin God ke me kasru a tokin ma inge wanginla ma el oru. El orekmakin ku in mano lal a lalmetmet su Jeova el sang nu sel a el kafweang in aksumwosye ma upa lal. Ne oinge, Devid el etu la kafweang lun met mukena tia ku in kol nu ke kutangla ku me insemwomwo. Ma inge paye pa nu sesr. Tokin kut aksumwosye ma upa lasr ke ku lasr kemwa, kut enenu in sang kutupa ma nu sin Jeova. Paye la, ke pal puspus wangin ma kut ku in oru a kut enenu in tupan Jeova. Ke pal oinge kut ku in akkalemye sangeng lasr sifwana nu sin God. Kut ku in eis me akkeye ke kas lal Devid: “Kawuk lun Jeova oasr yurolos su sangeng sel.”​—Sam 25:14.

12. Efu ku kut enenu in nunku yok ke pre lasr, a kain in ella fuka tia enenu in oasr yurosr?

¹² Ke ma inge, kut enenu in nunku ke pre a futoto lasr nu sin God oana ma su arlena yok sripe. Ke kut pre nu sin Jeova, kut enenu in “lulalfongi tu El God, a tu El Met-sang-moul nu selos su sokol.” (Hibru 11:6; Jemes 1:5-8) A ke pal se el kasre kut, kut enenu in akkalemye la kut lungse in ‘sang kulo,’ oana ke met sap Poul el kai kut. (Kolosse 3:15, 17) Kut tia enenu in oana elos su akkalemyeyuk sin sie met Kristian akmusrala su yok experience la: “Elos nunku ke God oana sie kain in met kulansap su oasr in kosrao,” el fwak. “Ke pal se elos enenu kutena ma, elos arulanu silaklak in siyuk ma enenu lalos a elos lungse in eis me top sin God ke pal sa. A ke pal se elos eis ma elos lungse, elos lungse God in som lukelos.” Kain in oiya inge akkalemye la wangin sangeng lalos nu sin God.

Fwin Sangeng sin God el Munasla

13. Nge Devid el tia akkalemye sunak mwo ke Masap lun God?

¹³ Ke pal se Devid el pulakin me kasru yok lun Jeova ke pal in me keok a asor yok, ma inge akkeye sangeng lal nu sin God a akkeye lulalfongi lal nu sel. (Sam 31:22-24) Tusruktu, oasr ma tolu sikyak, su paenang sangeng lal Devid nu sin God in munasla, su kol nu ke ma upa puspus su sikyak. Ma se meet pa ke pal se el orala akwuk in wisla tuptup in mwuleang lun Jeova nu Jerusalem fwin wagon soko a tia fwin pisen met Livai puspus, oana Masap lun God akkalemye. Ke pal se Uzza, su fwasr meet liki wagon, el sruokye Tuptup in Mwuleang in oru ma inge in tia ikori, tusruktu el mise ke pal se inge ke sripen “orekma lal su wangin sunak.” Aok, Uzza el oru ma koluk upa, tusruktu, oasr ma koluk lal Devid ke ma sikyak inge meyen el tia sruokye sie nunak mwo in akkalemye sunak mwo a paye nu ke Masap lun God su paenang ma upa inge in sikyak. Kalmeyen sangeng sin God pa in oru ma puspus in fwal nu ke akwuk lal.​—2 Samuel 6:2-9; Oekyuk 4:15; 7:9.

14. Mea fwokin orekma lal Devid ke el oekla met Israel nukemwa?

¹⁴ Tok kutu, srifeyuk el sin Setan, Devid el oekla met meun nukemwa lun an Israel. (1 Kronikel 21:1) In oru ma inge, Devid el akkalemye la sangeng lal nu sin God el munasla, paenang fwako koluk lun orekma lal inge pa oasr met Israel 70,000 mise. Fwinne Devid el auliyuk ye mutun Jeova, el a elos nukemwa su raunella sun me keok upa.​—2 Samuel 24:1-16.

15. Mea paenang Devid el oru orekma lun kosro?

¹⁵ Sie pa ma sikyak su sangeng lal Devid nu sin God munasla ke lusen sie pal su kol nu ke orekma lun kosro nu sel Batsiba, mutan kiyel Uraia. Devid el etu la orekma lun kosro ku fwin rapkui mutan kiyen mokul saye el orekma koluk se. (Exodus 20:14, 17) Ke pal se Devid el liyel Batsiba ke pal se mutan se inge el yuyu, pa inge mutamweyen ma upa sa. Sangeng mwo nu sin God enenu in moklel Devid in ngetla liye a nunku ke ma saye. El tia oru ma inge, a el ‘tafwela in liyel’ a kena koluk lal kutongye sangeng lal nu sin God. (Mattu 5:28; 2 Samuel 11:1-4) Devid el mulkunla la Jeova el welul ke inkanek nukemwa lun moul lal.​—Sam 139:1-7.

16. Fwako koluk puspus fuka Devid el keok ka ke sripen ma koluk lal?

¹⁶ Orekma koluk inge lal Devid nu sel Batsiba el orala sie tulik mokul. Tia pat tokin ma inge, Jeova el supwela met palu lal su pangpang Netan in akkalemye ma koluk lal Devid. Tokin nunak lal aksumwosyeyuk, Devid el sifwilpa akkalemye sangeng sin God a el auliyuk. El siyuk sin Jeova in tia pilesrel ku eisla ngun mutal Lal lukel. (Sam 51:7, 11) Jeova el sang nunak munas nu sel Devid a el aksrikyela me kai nu sel, tusruktu El tia sang me loeyuk nu sel Devid ke fwako koluk nukemwa su tuku ke orekma koluk lal. Tulik mokul natul Devid el mise, a oasr me asor a ma upa puspus su sikyak ke sou lal mutamwauk in pal sa. Sie me mol yok pa inge ke sripen munasla lun sangeng sin God ke kitin pal!​—2 Samuel 12:10-14; 13:10-14; 15:14.

17. Sang me pupulyuk ke pulakinyen inse toasr su tuku ke orekma koluk.

¹⁷ Ke pal inge, fwin sangeng sin God ke inkanek in akkalemye oiyen moul nasnas el tia akosyuk ma inge ku in orala ma upa puspus a fwa on ke pal loeloes. Nunku ke inse toasr lun sie mutan payuk fwusr ke pal se el lotela la mokul tumal su met Kristian el tia oaru nu sel ke pal se el orekma ke mutanfwal saye. Ke sripen el arulanu lut a asor, el tung na paye. Putaka mutan payuk inge el ku in sifwilpa lulalfongi a akkalemye sunak lal nu sin mokul tumal? Kain in ma upa puspus inge ku in tia sikyak fwin oasr inkanek in akkalemye sangeng paye nu sin God.​—1 Korint 6:18.

Sangeng sin God Kutongkuti Liki Ma Koluk

18. Mea niyen sun a inkanek lal Setan?

¹⁸ Setan el kafweang yok ke pal sa in kunausla oiyen nasnas lun fwalu ku met puspus, a el arulanu lungse in oru me akkoluk yokna nu sin met Kristian paye nukemwa. In oru oinge, el lungse in akkolukye inkanek in sun insiesr a nunak lasr​—ke inkanek lun sense nukemwa lasr, yokna mutasr a insrasr. (Efesus 4:17-19) Oiya fuka kom e fwa akkalemye ke kom liye petsa fokfok, long kas fokfok, ku met kosro?

19. Fuka sangeng sin God sang kasru nu sin sie met Kristian in kutangla ke me srife?

¹⁹ Nunku ke ma sikyak nu sel André,b sie met Kristian elder, sie papa, a taktu ke loom ono in an Europe. Ke pal se André el orekma ke lusen fong fon se ke sie loom ono, mutan puspus su welul ke niyen orekma elos simusla kutena kain in kas in srifel ke sie papu​—a fulusya ke ilul lal—​su oasr me sroal ku akul oana aten inse, a sulel in on yurolos ke inkanek in orek kosro. André el tu na ku a el pilesru nunak a kena koluk lalos inge. Sayen ma inge, in kasrel elan ku in fwasr liki asrouki koluk inge, el suk elan som orekma ke an saye. Sangeng sin God akpayeyuk la sie inkanek lalmetmet a mwo na paye a kol nu ke me insemwomwo puspus, meyen ke pal inge el orekma ke kais kutupal ke branch ofus lun Met Lo lun Jeova in an sel.

20, 21. (a) Fuka sangeng sin God ku in kasre kut in tia oru ma koluk? (b) Mea fwa akuteyuki ke me lutlut toko?

²⁰ Fwin sie met el tia sisla nunak koluk lal ma inge ku in oru sie met in kunausla ku fuleak futoto lal nu sin Jeova su arulanu saok in aolla nu ke ma se su tia fwal nu sel. (Jemes 1:14, 15) Nu ke luma saye, kut fwin sangeng sin Jeova, kut fwa tia wi​—ku som liki—​metu, an nukemwa, orekma nukemwa a me akengan su ku in oru kut in akmunasye sulela lasr in sruokye oiyen nasnas lasr. (Soakas 22:3) Kutena me akmwekin ku ke oiyen sifwana lafwekin su weang nu ka, ma inge arulanu srikla fwin srikeyuk nu ke tula lun futoto lasr nu sin God. (Mattu 5:29, 30) Ma eneneyuk nu ke sangeng sin God pa in fwasr liki kutena oiya su ku in akkalemye kut sifwana nu ke kutena orekma fokfok, wekunang petsa fokfok ke inkanek nukemwa, a kut enenu in oru mutasr “in tia ngetang nu ke ma lusrongten.” Kut fwin oru ma inge, kut ku in fuliya lulalfongi lasr nu sin Jeova in ‘molikutla’ a ase nu sesr ma nukemwa su kut enenu na paye.​—Sam 84:11; 119:37.

²¹ Paye la, in akkalemye sangeng paye nu sin God pa inkanek mwo pal nukemwa. Ouyepa orekma inge nukemwa el sropon me insemwomwo paye. (Sam 34:9) Ma inge fwa akuteye ke me lutlut toko.

[Footnotes]

Ya Kom Ku In Akuteye?

• Oiya mwomwo fuka lun met Kristian eneneyuk nu ke sangeng sin God?

• Fuka sangeng sin God el kutangla sangeng sin met?

• Fuka kut ku in akkalemye la oasr nunak sumwos lasr ke pre?

• Fuka sangeng sin God el kasre kut in tia oru ma koluk?

[Petsa ke sra 9]

Devid el lotela sangeng sin God ke pal se el liye a tuni orekma lun poun Jeova

[Petsa ke sra 10]

Oiya fuka kom e fwa akkalemye ke pal se oasr me srife sikyak nu sum?