Kas lun Jeova el Moul

Kas Fulat su Tuku ke Buk lal Isaia—II

ISAIA el oaru in akpayeye kunokon lal oana sie met palu. Kas palu nukewa su el palye in lain togusrai lun sruf sengoul lun Israel akpayeyuk tari. Inge oasr kutupa kas su el akkalemye ke pal fwasru lun an Jerusalem.

Siti lun an Jerusalem fwa musalla, a met nukewa su muta we fwa utukla nu in an saye oana met sruo. Tusruktu, kunanela lun an se inge tia on ma patpat. Tokin lusen sie pal, alu paye e fwa sifwilpa folokinyukyak. Pa inge peng ku kas su oasr in Isaia 36:1–66:24.a Kut ku in eis ma lane ke kut nunku yok ke ma akkalemyeyuk in sapta nukewa inge meyen pus ke kas palu nukewa ke ip se inge el akpayeyuk yok in len lasr inge ku e fwa akpayeyuk ke pal na fototo fwasru. Oasr pa kas palu mwomwo ke Messaia su akkalemyeyuk ke ip ak luo inge ke buk lal Isaia.

“LIYE! LEN E FWA TUKU”

(Isaia 36:1–39:8)

In yea ak 14 ke kolyuk lal Togusra Hezekaia (732 B.C.E.), met Assiria elos sruokye an Juda. Jeova el mwulela in sang kasru nu ke an Jerusalem. Me sensen ke orekma in sruo inge aksafyeyukla ke pal se sie lipufon lun Jeova el uniye met meun lun an Assiria su piselos oasr ke 185,000.

Hezekaia el maskin mas upa. Jeova el topuk pre lal a akkeyella, sang yea 15 nu ke moul lal. Ke pal se togusra lun an Babulon el supwela met tutafpo lal in akkalemye insemwomwo lalos ke kutangla lal, Hezekaia el akkalemye nu selos me kasrup nukewa lal ke sie orekma su tia mwo. Isaia el akkalemye kas lun Jeova nu sel Hezekaia, a el fwak: “Liye! Len a fwa tuku, ke ma nu kemwa su on in loom sum, a ma papa tumom elos elosak nu ke len se inge, fwa utukla nu Babulon.” (Isaia 39:5, 6) Yea 100 kutu tokin pal sa, kas palu se inge akpayeyuk.

Kusensiyuk Puspus Ke Ma Simusla Eis Top Ka:

38:8​—Mea se inge “me fwan” su oru lul in oetume? Ke sripen sundials ku me fwan in me srikasrak ao su orekmakinyuk in an Ijipt a an Babulon in century akoalkosr B.C.E., me fwan puspus inge el ku in sramsramkinyuk nu ke me srikasrak lun sie sundial su Ehas, papa tumal Hezekaia el eis. Ku saap oasr me fwan luen loom kato sin togusra. A oasr soko sru musaiyukla sisken me fwan su saap orala me lul nu ke step puspus lun me fwan, su orekmakinyuk nu ke me srikasrak ao ku pal.

Me Lutlut Nu Sesr:

36:2, 3, 22. Fwinne el sisila liki orekma lal oana sie met su karungin akwuk nukewa ke loom sin togusra, Sebna el leyukla in tafwela in oru kulansap nu sin togusra oana sie met sim lun met su aolul. (Isaia 22:15, 19) Kut fwin sisila liki sie kunokon lun met kol ke u lun Jeova ke kutena sripe, ya kut fwa tia tafwela in kulansap nu sin God ke kut oru kutena orekma su el lela kut in oru?

37:1, 14, 15; 38:1, 2. In pal su oasr me keok upa, mwo kut in forla nu sin Jeova ke pre a filiye lulalfongi lasr nu sel ke inkanek nukewa.

37:15-20; 38:2, 3. Ke pal se met Assiria elos aksangengye a akkolukye an Jerusalem, nunak yok lal Hezekaia pa fwin an Jerusalem kunausyukla ma inge fwa akkolukye inen Jeova. Ke pal se el etu la mas lal arlana upa, oasr ma puspus su Hezekaia el nunku yok ka su yok liki in nunku kel sifwana. Ma el nunku yok ka pa fwin el mise a wangin tulik natul su fwa usrui tron lal e fwa kunausyukla sruf lun togusra puspus su tuku kel Devid. El nunku yok pa la su e fwa kol orekma in lain met Assiria. In oana Hezekaia, kut nunku ke orekma in akmutalye inen Jeova a in akpayeye akwuk nukewa lal pa ma yok sripe se meet liki molela lasr sifwana.

38:9-20. On soko lal Hezekaia el luti kut ka la wangin kutena ma ke moul lasr su yok sripe liki orekma in sang kaksak nu sin Jeova.

“EL FWA SIFWIL MUSAIYUK”

(Isaia 40:1–59:21)

Tia pat tokin Isaia el palye ke kunanela lun an Jerusalem, a ke muta lalos in an Babulon oana met sruo, el palye ke sifwil folokla lalos. (Isaia 40:1, 2) “El [Jerusalem] fwa musai,” Isaia 44:28 el akkalemye. Ma srolela nukewa oana god lun met Babulon fwa itukla oana “me ap nukewa,” ku me utuk puspus. (Isaia 46:1, NW) An Babulon e fwa musalsallu. Kas palu nukewa inge akpayeyuk tokin yea luofoko.

Jeova el oru met kulansap lal oana “sie kalem nu sin met Pegan [mutanfwal puspus, NW].” (Isaia 49:6) U lun met puspus in an Babulon su oana “kosrao,” ku u lun met kol, “fwa wanginla oana kulas,” a met nukewa su oasr ye kolyuk lalos “elos fwa mise oana won srisrik”; tustukru ‘an nutin Saion su sruo el fwa sifwana tulala me kapur su oasr inkewel.’ (Isaia 51:6; 52:2) Nu sin met nukewa su tuku nu yurol a longol, Jeova el fwak: “Nga fwa oru sie mwuleung nu tok yurumwos su kupasr nu ke lung-kulang nukewa nu sel Devid.” (Isaia 55:3, NW) In moulkin moul fwal nu ke masap sumwosmwos lun God ku in me “akenganyel sifwana in Jeova.” (Isaia 58:14) Ke luma saye, ma koluk nukewa lun met ‘srielosla liki God lalos.’​—Isaia 59:2.

Kusensiyuk Puspus Ke Ma Simusla Eis Top Ka:

40:27, 28​—Efu ku met Israel elos fwak: “Inkanek luk mwukla liki mutun Jeova, a nununku sumwos su fwal nu sik alfukfukla liki God luk”? Kutu sin met in an Babulon saap elos pula mu orekma sesumwos su elos keok ka el wukla ye mutun Jeova ku el tia liye ma inge. Elos akesmakinyeyuk la Met Orala fwalu su tia totola ku mulalla el ku in liye ma sikyak in an Babulon.

43:18-21​—Efu ku met sruo nukewa su folokla nu in an selos akkalemyeyuk kas inge nu selos la ‘elos in tia esam ma meeta’? Ma inge tia sramsramkin ke oiya su elos fwa mulkunla ke orekma nukewa lun Jeova in pal somla wekunang orekma lal in molelosla. A, Jeova el lungse elos in sang kaksak nu sel ke sripen “ma sasu” su elos fwa sun a liye nu selos sifwana, oana ke oiyen misla wangin me sensen ke fwufwasryesr lalos som nu Jerusalem, saap ke sie inkanek yen mesis som sumwos nu yen selos. “Sie u lulap” su tuku liki “ongoiye lulap” oasr sripe sasu lalos in sang mwolena nu sin Jeova.​—Fwakyuk 7:9, 14.

49:6​—Fuka Messaia el “sie kalem nu sin mutanfwal puspus,” fwinne orekma in luti lal fwin fwalu orek nu sin tulik nukewa nutin Israel mukena? Sripe su paenang in oinge kalem ke ma sikyak tokin Jisus el mise. Baibel el orekmakin Isaia 49:6 nu sin met tuma lutlut nukewa lal. (Orekma 13:46, 47) Ke pal inge, met Kristian akmusrala, elos orekma oana “kalem nu sin mutanfwal puspus,” a u lulap sin met su alu nu sin God kasrelos ke orekma inge in sang kalem nu sin met nukewa “nu ke saflaiyen fwalu.”​—Mattu 24:14; 28:19, 20.

53:10​—Ke oiya fuka Jeova el insemwomwo in itngilye Mwen natul? Ma inge akngalye Jeova, God su pakomuta a kulang, in liye Wen kulo natul pulakin keok. Ne oinge, el insemwomwo ke oiya mwo lun Jisus su lungse in akos a ke ma nukewa su fwa akpayeye ke sripen mise lal.​—Soakas 27:11; Isaia 63:9.

53:11​—Mea se inge lalmetmet ku etauk su akkalemyeyuk ke fus inge su pa inge inkanek Messaia el fwa orekmakin “in aksumwosyela met puspus”? Pa inge lalmetmet ku etauk su Jisus el eis ke pal se el tuku nu fwalu, ekla sie met, a el ngal keok upa nu ke el mise. (Hibru 4:15) Ke ma inge el orala me kise lun lango, su eneneyuk in kasru met Kristian akmusrala a u lulap in eis sie oiyen moul sumwosmwos ye mutun God.​—Rom 5:19; Jemes 2:23, 25.

56:6​—Su “metsa puspus,” a ke oiya fuka elos “sruokye ku mwuleang lun Jeova”? “Metsa puspus” inge pa “sip ngie” lun Jisus. (Jon 10:16) Elos sruokye ku mwuleang meyen elos akos masap nukewa su kupasr nu ke mwuleang, elos akkalemye akesrui lalos nu ke akwuk nukewa ka, elos eis pa me mongo in ngun oana met Kristian akmusrala elos oru, a kasrelos ke orekma in luti peng mwo lun Togusrai a ke orekma in oru met tuma lutlut.

Me Lutlut Nu Sesr:

40:10-14, 26, 28. Jeova el ku a kulang, kulanu a lalmetmetlanu, a etauk lal arlana yok liki kutena ma su kut ku in kalem ka.

40:17, 23; 41:29; 44:9; 59:4. Oiyen kawuk nu ke akwuk lun politic a ma srolela el ‘ma lusrongten.’ In filiye lulalfongi nu selos wangin sripe.

42:18, 19; 43:8. Kut fwin pulesru Kas lun God a kut fwin srunga in long masap lal ke inkanek lun met “kulansap oaru a lalmetmet” el fwa oru kut in kun a selongkas ke ma lun ngun.​—Mattu 24:45.

43:25. Jeova el ela ma koluk puspus kel sifwana. Sukosok lasr liki sruo lun ma koluk a mise a in eis moul el ma se akluo nu ke akmutalyeyen en Jeova.

44:8. Oasr kasru lun Jeova nu sesr, el su arlana ku a fukoko oana sie eot ku. Kut tia enenu in sangeng in sang ma lo ke God lasr inge!​—2 Samuel 22:31, 32.

44:18-20. Orekma in alu nu ke ma srolela el sie me akul nu ke kolukla lun inse. Lela kut in sakunla in oasr an sin Jeova ke insiesr a in wangin kutena ma in eisla ma inge.

46:10, 11. Ku lal in oru ‘papu lal in tu,’ kalme pa in akpayeye akwuk lal, pa me akpayeye fukoko la Jeova el pa God paye.

48:17, 18; 57:19-21. Kut fwin ngetla ku tupan Jeova nu ke molela, suk in kalukyang nu sel, a loang akmwoye nu ke masap nukewa lal, na misla lasr e fwa oana kof su arlana yok a loal ke soko infwal a orekma sumwosmwos lasr el oana noa in mwea su oasr pal nukewa. Met nukewa su tia loang akmwoye nu ke Kas lun God elos oana “mwea pulkulak.” Wangin misla lalos.

52:5, 6. Met Babulon elos sitoela ku tafongla na paye in fwak mu God paye el munas. Elos tia akilen la sripe fuka paenang met Israel elos muta in an selos oana met sruo su ma inge akkalemye la God el tia insemwomwo ke met kulansap lal. Ke pal se oasr ma upa sun met puspus, tia mwo kut in sulaklak in fwak mu ma ke sripen me keok lalos.

52:7-9; 55:12, 13. Oasr sripe tolu lasr in akkalemye insemwomwo lasr in wi ke orekma in luti ke peng mwo lun Togusrai a in oru met tuma lutlut. Niyesr arlana mwo nu sin met nukewa su inse pusisel a musrinsral in ngun. Kut liye Jeova ke kut “liye a ngetani nu sin sie sin sie,” ku oasr futoto mwo lasr nu sel. Kut engankin pa oiya mwo a kapkapek mwo ke ma lun ngun.

52:11, 12. Kut fwin nunku mu kut fwal in us “alu lun Jeova”​—su ke pal inge lumeyuk nu ke akwuk nukewa lal nu ke orekma mutal lasr nu sel—​kut enenu in nasnas ye moul in ngun lasr a moulkin oiyen moul nasnas.

58:1-14. In akkalemye lungse lasr nu sin God a oiyen sumwosmwos lasr oana me lumala se mukena lela in kalem la ma inge tia mwo a el oana ma lusrongten se. Met nukewa su wi ke alu paye elos enenu in akkalemye pulakin paye nu ke orekma lasr in alu nu sin God a ke orekma nukewa lasr in akkalemye lungse nu sin met lili.​—Jon 13:35; 2 Piter 3:11.

59:15b-19. Jeova el liye orekma nukewa lun metu a el fwa oru me aksumwos lal ke pal pakiyuki lal.

EL FWA “SIE TEFURO LUN OASKU”

(Isaia 60:1–66:24)

In sramsramkin orekma in sifwil folokunak alu paye in pal meeta a ke pal lasr inge, Isaia 60:1 el akkalemye: “Tukakek, [O mutan, NW] tolak, tu kalem lom summu, a mwolanu lun Jeova takak nu fwom.” Saion el fwa “tefuro lun oasku in poun Jeova.”​—Isaia 62:3.

Isaia el pre nu sin Jeova ke met Israel su akkalemye la elos auliyuk ke pal se elos muta in an Babulon oana met sruo. (Isaia 63:15–64:12) Tokin el akkalemye ma tia oana sie in masrlon met kulansap paye a met kulansap kikiap, met palu inge el akkalemye la fuka Jeova el fwa akinsemwomwoye met nukewa su kulansap nu Sel.​—Isaia 65:1–66:24.

Kusensiyuk Puspus Ke Ma Simusla Eis Top Ka:

61:8, 9​—Mea se inge “mwuleang nu tok,” a su “fute”? Mwuleang nu tok inge pa mwuleang sasu su Jeova el orala nu sin met Kristian akmusrala nukewa. “Fute” pa “sip ngie” nukewa​—su lumeyuk nu sin million puspus ke met su long a porongo nu ke peng mwo lalos.​—Jon 10:16.

63:5​—Ke inkanek fuka mulat lun God akkeyel? Mulat lun God el sie pulakin su ku in kutongyuki​—pa inge mulat sumwos lal. Mulat lal kasrel a akkeyel in oru nununku sumwos lal.

Me Lutlut Nu Sesr:

64:6. Met sesumwos elos tia ku in molelosla sifwana. Ke orekma in sang me iuwe nu ke ma koluk, orekma sumwos lalos el oana nuknuk fokfok.​—Rom 3:23, 24.

65:13, 14. Jeova el akinsemwomwoye met kulansap oaru nukewa lal, el sang ma enenu lalos in ngun ke inkanek yok.

66:3-5. Jeova el srunga orekma mwosounkas.

“Komwos Insemwomwo”

Kas palu ke sifwil folokla el sie me akkeye na paye nu sin met Ju oaru nukewa su moul in an Babulon oana met sruo! “Komwos insemwomwo,” Jeova el fwak, “a engan ma patpat in ma Nga orekla. Tu liye, Nga oru Jerusalem me insemwomwo, a met lal me engun.”​—Isaia 65:18.

Kut moul pa ke pal inge su oasr losr afwunla fwalu a losr matoltol mutanfwalu. (Isaia 60:2) Oasr “ongoiye puspus” ke pal inge. (2 Timote 3:1) Ke ma inge, Kas lun Jeova ke molela su oasr in buk lal Isaia el sie me akkeye na yok nu sesr.​—Hibru 4:12.

[Footnote]

[Petsa ke sra 28]

Ya kom etu sripe se yok la efu ku Hezekaia el pre nu sin God in molella liki met Assiria?

[Petsa ke sra 31]

“Fuka mwoiyen fwin eolu niyen el su use kas mwo!”