Nikmet Tui In Kapkapek Ke Oiya Lom In Sang Kulo
“Fuka saokeyen nunak lom! O God, fuka pusiye fwin toeni nu sie!”—SAM 139:17.
1, 2. Efu kut enenu in aksaokye Kas lun God, a fuka met sim lun Sam el akkalemye la el aksaokye ma inge?
OASR ma se su arlana mwo koneyukyak. Ke pal se orek onon nu ke temple lun Jeova in an Jerusalem, Met Tol fulat Hilkaia el koneak “buk in ma sap lun Jeova etukyung nu sel Moses,” wangin alolo ka la pa inge ma simusla su simusyukla in yea 800 kutu somla! Ya kom ku in nunku ke pulakin lal Togusra Josaia su sangeng sin God ke pal se buk inge filiyuki ye mutal? Paye la, el aksaokye ma inge a el sa na in sapkin Sefan, sie met sim, in ridi ma inge ke pusra yok.—2 Kronikel 34:14-18.
2 Ke pal inge, billion puspus sin met elos ku in ridi ke Kas lun God. Tusruktu ya ma inge oru ma Simusla in tia saok, ku tia yok sripe? Mo tia oinge! Aok, koanon ma simusla pa nunak nukewa lun God Fulatlanu, su simusyukla in ase ma lane nu sesr. (2 Timote 3:16) Devid el akkalemye pulakin lal ke Kas lun God, el simusla: “O fuka saokeyen nunak lom nu sik! O God, fuka pusiye fwin toeni nu sie.”—Sam 139:17.
3. Mea akkalemye la Devid el sie met su oasr etauk yok ke fototo lal nu sin God?
3 Kaksak wi sang kulo lal Devid kel Jeova, ke Kas lal, a ke akwuk mwolana lal nu ke alu paye tia akmunasyeyukla. On kato nukewa su Devid el orala akkalemye ke pulakin lal. Ke sie me pupulyuk, in Sam 27:4, el simusla: “Nga siyuk sie ma sin Jeova—ma se inge nga e fwa suk, tu nga fwa ku in muta in loom sin Jeova in len nukewa in moul luk, in liye mwoiyen Jeova, a in ngetla in kaksakin wi sang kulo nu ke temple lal.” Kas Hibru nu ke kas inge “in ngetla in kaksakin wi sang kulo” kalme pa in nunku ka pal nukewa, in tuni mwo, in liye wi engan, insemwomwo, sang kas in kaksak nu ka. Kalem la, Devid el sie met su oasr etauk yok ke futoto lal nu sin God a el aksaokye na paye akwuk nukewa su Jeova el oru in akkeye lulalfongi lal a el engankin yok kais sie kas ke ma paye lun ngun su God el akkalemye. Me srikasrak lal in akkalemye kulo wi kas in kaksak lal arlana fwal in etawiyuk.—Sam 19:7-11.
Akkalemye Kulo Lom nu ke Pal Mwomwo in Etu ke Ma Paye lun Baibel
4. Mea oru Jisus lan “engan ke ngun mutal”?
4 Orekma in eis etauk ke Kas lun God tia tuku ke sripen lutlut yok lun met puspus ku lalmetmet lun fwalu, su oasr nunak lun insefulat a fulang ka. A, lalmetmet paye el fwal nu ke kulang lun Jeova alukela ma fwal, su el sang nu sin met pusisel, mwo inse su nunku yok ke ma enenu lalos ke ma lun ngun. (Mattu 5:3; 1 Jon 5:20) Ke pal se Jisus el nunku ke oiyen ma su sikyak in akkalemye la oasr kutu sin met sesumwos su elos simusla in kosrao, “el engun ke ngun mutal, a fwak: ‘Nga sot kulo nu Sum, O Papa, Leum lun kosrao a fwalu, tu kom mwukunla ma inge liki met lalmetmet a met lalkung, a fwakak nu sin tulik fwusr.’”—Luk 10:17-21.
5. Efu ku met tuma lutlut lun Jisus elos in tia akkalemye kain in nunak su tia nunku yok ke ma paye nukewa ke Togusrai lun God su akkalemyeyuk nu selos?
5 Tokin el fwakak ke kaksak pre mwomwo inge su tuku ke inse, Jisus el forla nu sin met tuma lutlut lal a fwak nu selos: “Insemwomwo muta nukewa su liye ma komwos liye. Tu Nga fwak nu sumwos, tu met palu a togusra Puspus elos kena liye ma komwos liye, a tia liye ma inge, a in long ma komwos long, a tia long ma inge.” Aok, Jisus el akkeye met kulansap oaru nukewa lal in tia akkalemye kain in nunak su tia nunku yok ke ma paye nukewa su saoklana ke Togusrai lun God su akkalemyeyuk nu selos. Ma paye nukewa inge tia akkalemyeyuk nu sin fwil lun met kulansap lun God in pal meeta, a ma inge tia akkalemyeyuk nu sin “met lalmetmet a lalkung” nukewa in len lal Jisus!—Luk 10:23, 24.
6, 7. (a) Sripe puspus fuka oasr yurosr su oru kut in aksaokye ma paye lun God? (b) Mea ma tia oana sie in masrlon alu paye a alu kikiap ku in liye ke pal inge?
6 In len lasr inge, oasr sripe puspus lasr su yok liki pal meeta in paenang kut in akkalemye kulo lasr nu ke ma paye, nu sin Jeova, ke orekma lun “met kulansap oaru a lalmetmet,” su sang kasru nu sin met kulansap nukewa lal in oasr etauk yok ke Kas lal. (Mattu 24:45; Daniel 12:10) Met palu Daniel el simusla ke ma su sikyuk ke len safla: “Met puspus fwa kasrot kasrmu, a etauk fwa yokelik.” (Daniel 12:4) Ya kom tia insese ka la ke pal inge etauk ke God el “yokelik” a met kulansap nukewa lun Jeova elos engankin me mongo lun ngun paenang elos tia sral ka?
7 Arlana yok ma tia oana sie su kut liye in masrlon oiya mwomwo ke ma lun ngun sin met kulansap nukewa lun God a ke me akfos su oasr ke alu puspus lun Babulon Lulap! Ke sripe se inge, oasr met puspus su akkalemye srunga yok lalos ke alu kikiap paenang elos forla nu ke alu paye. Met puspus inge elos oana sip su “srunga in wi ke ma koluk lun [Babulon Lulap]” ku “in eis ipen ma koluk lal.” Jeova a met kulansap nukewa lal elos suli met nukewa su oana sip elos in wi ke congregation paye lun met Kristian.—Fwakyuk 18:2-4; 22:17.
Met Nukewa su Aksaokye Ma Paye Elos Tuku nu Yurin God
8, 9. Fuka kas palu su oasr in Haggeai 2:7 akpayeyuk ke pal inge?
8 In sramsramkin temple lal in ngun, Jeova el palye: “A Nga fwa mokle mutanfwal nu kemwa, a ma saok lun mutanfwal nu kemwa fwa tuku; a Nga fwa nekla loom se inge ke mwolanu.” (Haggeai 2:7) Kas palu mwolana inge akpayeyuk in len lal Haggeai ke pal se met lula sin met kulansap lun God elos sifwilpa musaela temple in an Jerusalem. Ke pal inge, kas palu lal Haggeai ke temple lulap in ngun lun Jeova el akpayeyuk ke inkanek yok.
9 Oasr million puspus sin met elos wi tari ke temple lun ngun tu elos in alu nu sin God “ke ngun a paye,” a kais sie yea oasr tausan puspus sin “ma saok lun mutanfwal nukewa” elos tuku nu ke temple lun ngun inge. (Jon 4:23, 24) Ke sie me pupulyuk, report ke orekma in kulansap ke yea 2006 fwin fwalu nufon akkalemye la oasr met 248,327 mwulela moul lalos nu sin Jeova a eis baptais. Pise inge akkalemye la oasr met 680 eis baptais lalos ke kais sie len! Lungse lalos ke ma paye a lungse lalos in kulansap nu sin Jeova oana met orekma lun Togusrai sang me akpayeye nu ka la elos kolyuk na paye sin God.—Jon 6:44, 65.
10, 11. Srumon sie experience su akkalemye la fuka met puspus elos mutamwauk in aksaokye ma paye lun Baibel.
10 Pus sin met inge su paye insielos lungse ma paye meyen elos “akilen in maslon met sumwosmwos a met koluk, in maslon el su orekma nu sin God a el su tia orekma nu sel.” (Malakai 3:18) Nunku ke ma sikyak nu sel Wayne a nu sel Virginia, sie siyanyen su wi ke alu lun Protestant tusruktu oasr kusensiyuk puspus lalos su elos tia ku in koneak me top nu ka. Elos srunga meun a elos kemwana fos a toasr ke elos liye met kol lun alu elos akinsemwomwoye met meun a kofwen me meun. Ke siyanyen se inge elos matu u, elos pula mu met puspus ke alu lalos tia nunku kelos, fwinne Virginia el luti ke Sunday school ke lusen yea puspus. “Wangin sie met muteta nu yurosr ku akkalemye insemwomwo nu ke oiyen orekma lasr in alu nu sin God,” elos fwak. “Ma nukewa su alu lasr el lungse yok pa mani lasr. Kut arlana fosek.” Elos toasr yok ke pal se alu lalos lela a tia selngawi orekma koluk lun mokul nu sin mokul.
11 In pal sana, oasr sie an nutin an natul Wayne a Virginia, a sie sin an natulos ekla Met Lo lun Jeova. Fwinne Wayne a Virginia elos toasr ke ma sikyak inge ke mutamwauk, tusruktu tok elos ekulla nunak lalos a insese la in mutamwauk oru sie lutlut ke Baibel. “Ke lusen malem tolu na,” Wayne el fwak, “oasr ma puspus su kut lotela yok ka liki na ma kut lotela ke yea 70 somla ke moul lasr! Kut tia long in pal somla la inen God pa Jeova, a wangin ma kut etu ke Togusrai a Paredais fwin fwalu.” Tia pat, siyanyen se inge su lungse ma paye elos mutamwauk in wi ke meeting nukewa lun Met Lo lun Jeova a elos wi oru orekma in luti peng mwo. “Kut lungse in fwakak nu sin met nukewa ke ma paye,” Virginia el fwak. Ke elos yea 80 matwe, elos kemwana baptaisla in yea 2005. “Kut koneak u lun met Kristian paye su kut pula na paye la kut sie selos,” elos fwak.
Akkalemye Kulo Lasr ke Sripen kut “Fwal Nu Ke Orekma Mwo Nukewa”
12. Mea Jeova el sang nu sin met kulansap nukewa lal pal nukewa a mea kut enenu in oru in eis ma lane ka?
12 Jeova el kasru pal nukewa met kulansap lal ke orekma lalos in oru ma lungse lal. Ke sie me pupulyuk, Noa el eis masap su arlana kalem ke orekma in musaela soko oak—sie orekma yok su enenu in orekla sumwos in fwal na paye ke pal se meet! A pa inge ma sikyak su arlana sumwos nu ke orekma in musa. Efu? Meyen Noa “el oru oana ma nu kemwa God El sapkin nu sel. Oinge el orala.” (Genesis 6:14-22) Ke pal inge, Jeova el oru pa met kulansap nukewa lal in fwal a sumwos in oru ma lungse lal. Paye la, orekma se emeet lasr pa in sulkakin peng mwo lun Togusrai lun God su oakiyuki tari a in kasru met su paye insielos in ekla met tuma lutlut lun Kraist. A in oana ke ma Noa el oru, kutangla lasr fwa fwal nu ke akosten lasr. Kut enenu in akos masap su Jeova el ase nu sesr ke inkanek lun Kas lal a u lal.—Mattu 24:14; 28:19, 20.
13. Ke inkanek fuka Jeova el orala akwuk in ase me akpa nu sesr?
13 In kasre kut in akpayeye orekma se inge, kut enenu in lutlut in ‘orekmakin sumwos’ kofwen me orekma se meet lasr inge—Kas lun God—su “oasr sripe in luti, in kai, in aksumwosye, a in aketeye ma sumwosmwos nu sin met, tu met lun God in sumwosna, a akola fwal nu ke orekma mwo nu kemwa.” (2 Timote 2:15; 3:16, 17) In oana ke ma Jeova el oru in century se meet, el ase me akpa nu sesr ke pal inge ke inkanek lun congregation lun met Kristian. Ka pal inge, in congregation nukewa fwin fwalu su pise oasr ke 99,770 Theocratic Ministry School a Service Meeting orek ke kais sie week in kasre kut nu ke orekma lasr in luti. Ya kom akkalemye la kom aksaokye meeting yok sripe nukewa inge ke kom wi pal nukewa a ke kom orekmakin ma puspus su kom lotela?—Hibru 10:24, 25.
14. Fuka met kulansap nukewa lun Jeova elos akkalemye kaksak wi sang kulo lalos nu ke kunokon lalos in kulansap nu sin God? (Weang me top puspus ke chart su oasr in sra 23 nu ke 26.)
14 Oasr million puspus sin met fwin fwalu nu fon su kafweang yok in oru orekma in luti peng mwo elos akkalemye kaksak wi kulo lalos nu ke me akpa su elos eis. Ke sie me pupulyuk, ke lusen yea in orekma ke 2006 oasr 6,741,444 met orekma lun Togusrai su orekmakin ao 1,333,966,199 ke kain in orekma nukewa in luti peng mwo, a orekma in lutlut Baibel nu sin met 6,286,618 orek pa. Pa inge kutu ma mwomwo su oasr ke report fwin fwalu nufon. Kut suli kom in nunak munas liye akmwoye ke report se inge a eis me akkeye ka, in oana ke me akkeye su met lili wiyesr in century se meet elos eis ke report puspus ke oiyen yokyokelik lun orekma in luti in pal lalos.—Orekma 1:15; 2:5-11, 41, 47; 4:4; 6:7.
15. Efu ku wangin kutena met enenu in munasla ke orekma in kulansap lal nu sin Jeova ke inse kemwa lalos?
15 Kas in kaksak nukewa su saoklana nu sin Jeova ke kais sie yea akkalemye la met kulansap nukewa lun Jeova elos aksaokye na paye kunokon lalos in etu Jeova a in orek ma lo nu sel. (Isaia 43:10) Paye, orekma in sang me kise ke kas in kaksak lun met lili wiyesr su matou tari, mas ku sekapas, ku in pupulyukkinyuk nu ke cent luo lun mutan katinmas sa. Tusruktu lela kut in tia mulkunla la Jeova a Wen natul elos aksaokye na paye met nukewa su kulansap nu sel ke inse kemwa lalos, ke elos oru ma nukewa su elos ku in oru.—Luk 21:1-4; Galetia 6:4.
16. Kain in kofwen me orekma in luti fuka God el ase nu sesr ke yea puspus somla?
16 Sayen el ase nu sesr me akpa nu ke orekma in luti, Jeova el ase nu sesr kofwen me orekma in luti puspus su arlana mwo nu ke inkanek lun u lal. Ke yea puspus somla, wekunang ma inge pa buk puspus inge Ma Paye Su Kol nu ke Moul Ma Patpat, Kom Ku In Moul Ma Patpat in Paredais Fwin Fwalu, Etauk Su Kol nu ke Moul Ma Patpat a, oasr pa buk inge su orekmakinyuk ke pal inge, What Does the Bible Really Teach? (Mea Baibel el Luti Na Paye?) Elos nukewa su aksaokye me sang nukewa inge elos orekmakin mwo kofwen me orekma inge ke orekma in luti lalos.
Orekmakin Mwo Buk se Inge Bible Teach (Baibel el Luti)
17, 18. (a) Me sramsram fuka oasr ke buk inge Bible Teach (Baibel el Luti) kom lungse in orekmakin yok ke orekma in luti lom? (b) Mea sie circuit overseer el liye ke buk inge Bible Teach?
17 Buk se inge What Does the Bible Really Teach? (Mea Baibel el Luti Na Paye?) su oasr sapta 19 ka, a oasr me lutlut mwomwo puspus ke appendix, a oasr kas arlana kalem a fusrasr ke buk inge in oana me sang nu sesr in orekmakin ke orekma in luti. Ke sie me pupulyuk, sapta 12 el akkalemye ke sifwe se inge “Moulkin Moul Fwal nu ke Inkanek su God el Insemwomwo Ka.” Me lutlut se inge el akuteye nu sin tulik lutlut la fuka el ku in ekla sie met kawuk lun God, sie ma su met puspus elos nunku mu tia ku in orek ku sikyak. (Jemes 2:23) Oiya fuka akkalemyeyuk ke buk inge in oana me kasru nu ke orekma in lutlut?
18 Oasr sie circuit overseer in an Australia el reporti la buk se inge Bible Teach el “arlana mwo su ku in oru met puspus in loomu in akkalemye insemwomwo lalos in orek sramsram ka.” El fwak pa la buk se inge fusrasr in orekmakinyuk a ma inge “sang kasru nu sin met orekma puspus lun Togusrai in aksasuye ku lalos a engan lalos ke orekma in luti peng mwo. Paenang oasr kutu met elos pangon buk se inge oana Ma Saok su oana Gold!”
19-21. Akkalemye kutu experience su akkalemye yok saokiyen buk inge Bible Teach.
19 “God el supwekomwosme,” sie mutan in an Guyana el fwak nu sin sie pioneer su tu ke srungal ke loom sel. Oasr mokul se su muta yurin mutan se inge fwinne elos soenna payuk el tufwana som lukel a liki tulik luo natultal. Pioneer se inge el ikasla buk inge Bible Teach ke sapta 1 a ridi ke pusra lulap paragraph 11, ke sifwe sirsrik inge “Mea Pulakin lun God ke Orekma Sesumwos su Kut Sun?” “Me lutlut inge sun na paye insiel,” pioneer sa el fwak. “Aok, el tuyuk a el som nu ke sie an tokin shop se lal, a el tung upa we.” Mutan se inge el insese nu ke sie lutlut Baibel in orek nu sel pal nukewa sin sister se su muta in an se inge a el kapkapek mwo.
20 Oasr mokul se su pangpang José, su muta in an Spain, su mutan kiyel mise ke sie accident ke inkaneku. Tokin ma inge el suk me akpwarye ke inkanek lun ono koluk a el suk me kasru lun sie taktu nu ke oiyen nunak su pangpang phychologist. Tusruktu, psychologist se inge el tia ku in sang me top nu ke kusensiyuk lal José su el nunku yok ka: “Efu ku God el lela mutan kiyuk in mise?” Oasr sie len José el sun mokul se inge su inel pangpang Francesc, el orekma pa ke company se su el orekma ka. Fancesc el fwak nu sel la elos akuteye sapta 11 ke buk inge Bible Teach, su oasr ke sifwe se inge “Efu ku God el Lela Me Keok in Sikyak?” Me akuteye lun ma Simusla a me pupulyuk lun sie met luti a sie tulik lutlut sang me kasru na paye nu sel José. El mutamwauk in lutlut ke inse paye lal, wi ke sie toeni lun circuit, a ingena el wi ke meeting nukewa ke Kingdom Hall in an sel.
21 Oasr sie met su orek business in an Poland su yea-40-matwel, el pa Roman el akkalemye sunak nu ke Kas lun God pal nukewa. Tusruktu ke sripen el kafofo na paye ke orekma lal, paenang kapkapek lal nu ke lutlut lal ke Baibel arlana srikla. Ne oinge, el wi ke sie toeni lulap lun district a el eis buk se inge Bible Teach. Tokin ma inge, arlana kalem la el orala kapkapek yok. “Ke buk sasu inge,” el fwak, “me luti sramtauk nukewa lun Baibel oasr ka in orala sie petsa kalem, oana sie jigsaw puzzle.” Ingena Roman el oru lutlut Baibel lal pal nukewa a el kapkapek ke lutlut lal.
Tafwela in Kapkapek in Aksaokye Fwinsrak Lasr
22, 23. Fuka kut ku in tafwela in akkalemye la kut aksaokye fwinsrak su filiyuki ye mutasr?
22 In oana ke ma akuteyuki ke toeni lulap lun District su oasr ke sifwe se inge “Molela Apkurun Me!,” met Kristian paye elos enenu in sano a tupan nu ke “molela ma patpat” su mwuleyukla sin God a akpayeyuk ke inkanek lun sran Jisus Kraist. Wangin inkanek saye su mwo emeet liki in akpayeye la kut arlana aksaokye fwinsrak saok inge ke kut tafwela in sruokye oiyen nasnas lasr “liki orekma lun mise, tu komwos in orekma nu sin God moul.”—Hibru 9:12, 14.
23 Aok, ke sripen oasr met orekma lun Togusrai su piselos pus liki million onkosr su oaru a mongfusesr in oru orekma in kulansap lalos nu sin God ke pal inge fwinne oasr me srife upa nu ke nunkeyen moul lun met se sifwana el ku in lumeyuk oana akwuk lun mwenmwen. Oiya inge el me akul pa la met kulansap nukewa lun Jeova elos aksaokye kunokon mwomwo inge in kulansap nu sin God, elos etu “tu orekma lalos tia pilesr in Leum.” Lela oiya lasr inge su akkalemye lungse in aksaokye fwinsrak lasr in kapkapek pal nukewa!—1 Korint 15:58; Sam 110:3.
Kom E Topuk Fuka?
• Mea met sim lun sam el luti kut ke orekma in sang kaksak wi sang kulo nu sin God a nu ke me sang nukewa lal in ngun?
• Fuka kas palu su oasr in Haggeai 2:7 el akpayeyuk ke pal inge?
• Fuka Jeova el oru met kulansap nukewa lal elos in fwal in oru kulansap lalos nu sel ke inkanek mwo?
• Mea kom ku in oru in akkalemye la kom aksaokye mwoiyen Jeova?
[Chart on page 23-26]
2006 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Petsa ke sra 21]
Jeova el oru kut in fwal ke inkanek nukewa in oru ma lungse lal