Akkalemye Sunak Nu Ke Tukeni Mutal Nukewa Lasr
“Aok nga fwa wiselos nu fwin eol mutal luk a akengunyelos in imwen pre sik.”—ISAIA 56:7.
1. Sripe mwo fuka in ma Simusla su oasr yurosr paenang kut akkalemye sunak nu ke tukeni nukewa lasr?
JEOVA el oreni met kulansap lal, met Kristian akmusrala a met nukewa su welulos, in alu nu sel in “eol mutal” lal. El akenganyelos luen “imwen pre” lal, temple lal in ngun, su “imwen pre nu sin mutanfwal nu kemwa.” (Isaia 56:7; Mark 11:17) Ma nukewa su Jeova el oru in oreni met kulansap lal nukewa el akkalemye ka la orekma lasr in alu nu sel el mutal, nasnas, a akfulatyeyuk. Orekma in akkalemye sunak mwo nu ke meeting nukewa lasr in lutlut a alu, kut akpayeye la kut akkalemye pa nunak lun Jeova ke ma mutal nukewa.
2. Mea akkalemye la Jeova el akmutalye an se su el sulela in oru alu nu sel we, a fuka Jisus el akkalemye pa oiya inge?
2 In an Israel in pal meeta, an se su Jeova el sulela in orek alu nu sel we liyeyuk oana an mutal se. Imwen aktuktuk a ma nukewa su oasr ka a alu nukewa enenu in akmusraiyukla a akmutalyeyuk ‘tu in mutal na mutal.’ (Exodus 30:26-29) Inkalkal luo su oasr ke imwen aktuktuk el pangpang “an Mutal” a “an Mutal na Mutal.” (Hibru 9:2, 3) Imwen aktuktuk inge ke pal tok ayaolla ke temple in an Jerusalem. Ke sripen Jerusalem el ekla an in orek alu nu sin Jeova paenang el pangpang “siti mutal.” (Niemaia 11:1; Mattu 27:53) Ke lusen pal in orekma in luti lal Jisus fwin fwalu, el sifwana akkalemye sunak mwo a fwal nu ke temple. El mulat nu sin met nukewa su tia akkalemye sunak ke inkanek lalos in orekmakin inkalkal lun temple ke akwuk lalos nu ke business a orekmakin in fwasr sasla ke kalkal lun temple in akfototoye fwufwasryesr lalos ke elos us ma puspus lalos nu ke an puspus saye in an Jerusalem.—Mark 11:15, 16.
3. Mea me pupulyuk nu ke oiyen mutal lun tukeni lulap nukewa lun met Israel?
3 Met Israel elos oru tukeni lalos pal nukewa in alu nu sin Jeova a in long ke orekma in rid Masap lal. Oasr len puspus ke len in akfulat lalos su pangpang tukeni mutal lulap, su akkalemye ke oiyen mutal lun tukeni nukewa inge. (Livitikus 23:2, 3, 36, 37) Ke sie tukeni lulap lun met puspus in len lal Ezra a Niemaia, met Livai “elos aketeye ma sap nu sin metu.” Ke sripen “met e nu kemwa tung, ke elos long kas in ma sap,” paenang met Livai “elos akmisye met e nu kemwa, a fwak: ‘Komwos misla! tu len se inge mutal.’” Tokin ma inge met Israel elos akfulatye Kofwa lun Imwen Aktuktuk su “oasr engan lulap ka.” Sayen ma inge, “len nu len, len se meet me nu ke len se safla, el rid in buk in ma sap lun God, a elos liaung kofwa len itkosr; a in len se akoalkosr oasr sie tukeni mutal, fwal nu ke ma sap.” (Niemaia 8:7-11, 17, 18) Paye la ke pal in tukeni inge met nukewa su oasr we elos in akkalemye sunak a loang akmwoye nu ka.
Meeting Nukewa Lasr el Mutal
4, 5. Oiya puspus fuka ke meeeting lasr akpayeye la ma inge nukewa tukeni mutal?
4 Paye, ke pal inge wangin siti mutal paye lun Jeova fwin fwalu, su oasr temple yok sripe mwuleyukla in orek alu nu sel. Ne oinge, kut tia enenu in mulkunla la meeting nukewa in alu nu sin Jeova pa tukeni mutal nukewa. Pal tolu ke kais sie week, kut oru tukeni lasr in rid a in lutlutkin ma Simusla. Kas lun Jeova “akuteyuki,” a oana in len lal Niemaia, oasr orekma in “akuteye a sang kalme ke masap lun God.” (Niemaia 8:8, NW) Meeting nukewa lasr el mutamwauk a aksafyeyukla ke pre, a ke meeting puspus inge, kut onkin on in kaksak nu sin Jeova. (Sam 26:12) Meeting nukewa lun congregation el ipen orekma lasr in alu a oasr ma eneneyuk nu sesr in pre pal nukewa a kut in akkalemye oiya mwomwo nu ka a in akkalemye sunak ke kut loang akmwoye nu ka.
5 Jeova el akinsemwomwoye met kulansap lal ke elos tukeni nu sie in orek alu nu sel, in lutlutkin Kas lal, a in engankin asrouki mwomwo yurin met lili Kristian. Ke pal se su oasr tukeni ku meeting, kut ku in lulalfongi la ke inkanek lun meeting inge pa ‘Jeova El sapkin me insemwomwo [in oasr pal nukemwa, NW].’ (Sam 133:1, 3) Kut eis me insemwomwo inge kut fwin oasr ke meeting a loang akmwoye nu ke program nukewa lun ngun inge. Sayen ma inge, Jisus el fwak: “Tu yen luo ku tolu tukeni in Ek, Nga muta in maslolos we.” Ma simusla inge el orekmakinyuk nu sin met Kristian elder nukewa su tukeni nu sie in aksumwosye ma upa in masrlon met puspus, tusruktu akwuk inge el fwal pa in orekmakinyuk nu ke meeting nukewa lasr. (Mattu 18:20) Fwin Kraist, ke inkanek lun ngun mutal, el oasr ke pal su met Kristian elos tukeni nu sie ke inel, ya tukeni nukewa inge tia liyeyuk oana ma mutal se?
6. Mea ku in fwak ke an su kut oru tukeni lasr, an lulap ku an srisrik kewana?
6 Paye la Jeova el tia muta ke temple su musaiyukla sin met. Ne oinge, Kingdom Hall sesr nukewa pa an su alu paye orek we. (Orekma 7:48; 17:24) Kut oru tukeni lasr we in lutlutkin Kas lun Jeova, pre nu sel, a onkin on in kaksak nu sel. Oiya inge paye pa ke Assembly Hall pupus lasr. Loom lulap su kut rent in orekmakin nu ke toeni lulap nukewa—oana auditoriums, exhibition halls, ku sports stadiums—pa an in alu lasr ke pal se loom lulap nukewa inge orekmakinyuk nu ke tukeni mutal nukewa lasr. Oiya nukewa inge in orek alu, tukeni srisrik ku tukeni lulap, fwal kut in akkalemye sunak nu ka, a ma inge akkalemyeyuk ke oiyesr a ella lasr.
Inkanek Puspus in Akkalemye Sunak nu ke Tukeni Nukewa Lasr
7. Ke inkanek fuka kut ku in akkalemye sunak lasr nu ke tukeni nukewa lasr?
7 Oasr inkanek puspus su ku in liyeyuk ke kut akkalemye sunak nu ke tukeni lasr. Sie inkanek inge pa ke pal in onkin on nu ke Togusrai su kut enenu in oasr tari ka. Pus ke on nukewa inge oasr kas su orekmakinyuk nu ke pre a pa inge sripe kut in onkin ma inge wi sunak lasr. Met sap Poul el orekmakin Sam 22 oana kas lal Jisus: “Nga fwa fwakak Em nu sin ma lik; in maslon surs (congregation, NW) nga fwa on a kaksakin kom.” (Hibru 2:12) Ke ma inge, kut enenu in aksaye pal nukewa in oasr tari ke an in muta lasr meet liki pal se chairman el akkalemye on su fwa onkinyuk a in nunku yok ke kalmeyen kas nukewa ka ke pal in on. Lela inkanek lasr in on akkalemye pulakin lun met sim lun sam su simusla kas inge: “Nga fwa sang kulo nu sin Jeova ke insiuk na fon, in pal in papu lun met sumwos, a in mwalil lulap.” (Sam 111:1) Aok, orekma in onkin on in kaksak nu sin Jeova el sie sripe mwo su yoklana me enenu ka in sa tuku nu ke meeting nukewa lasr a in wi muta ka nu ke pal se aksafyeyukla tukeni lasr.
8. Me pupulyuk fuka in Baibel akkalemye la pre nukewa lasr ke pal in meeting fwal kut in akkalemye sunak lasr nu ka?
8 Sie pa inkanek su akyokye saokiyen tukeni nukewa lasr pa ke pre su tuku ke inse paye su fwakak me akinsemwomwoye met nukewa su tukeni nu sie. Oasr sie pal, met Kristian in century se meet in an Jerusalem elos tukeni nu sie a “elos srukak pusralos nu sin God ke inse siefwanna” ke inkanek lun pre mwo lalos. Oasr fwako mwo lun ma inge, meyen fwinne oasr me kalyai “elos pulaik in fwak kas lun God.” (Orekma 4:24-31) Ya kut nunku mu met nukewa su oasr ke tukeni lalos elos lela nunak lalos in forfor ku akkolukyeyuk ke kutena ma ke pal elos pre? Mo, elos pre “ke inse sefwanna.” Pre nukewa su orek ke pal in meeting nukewa lasr akkalemyeyuk ke nunak a pulakin lun met nukewa su oasr ka. Kut enenu in loang akmwoye in akkalemye sunak lasr nu ke pre nukewa inge.
9. Fuka kut ku in akkalemye sunak lasr nu ke tukeni mutal nukewa ke inkanek lun nuknuk lasr a oiyesr?
9 Sayen ma inge, kut ku in akkalemye lupan sunak lasr nu ke tukeni mutal nukewa lasr ke nuknuk su kut nukum. Ate mwo lasr ke kut orekmakin nuknuk fwal a ke style ke aunsifesr ku in sang kutupa kasru nu ke oiyen mutal lun tukeni nukewa lasr. Met sap Poul el sang kas in kasru inge: “Nga lungse tu met elos in pre yen nu kemwa, in kolak po mutal, a wangin mulat ku akukuin. A ouyepa, tu mutan elos in nukomang nuknuk fwal a tia ratrat, wi tonong a efwal, a tia yunala purak in sifwelos, ke gold, ku mwek, ku nuknuk su yok molo, a oana ma fwal nu sin mutan su fwakak lalalfongi lalos ke orekma mwo.” (1 Timote 2:8-10) Ke pal se kut wi ke tukeni lulap nukewa su orek ke stadium ku loom lulap, kut ku in nukomang nuknuk su fwal nu ke pulanpal a fwinne nu ke pulanpal su arlana fwol enenu in orekmakin nuknuk fwal. In wekunang ma inge, sunak lasr nu ke toeni inge fwa kasre kut in tia kang kutena mongo ku kang gum ke lusen pal in me sramsram nukewa orek. Nuknuk su arlana fwal a ella lasr nu ke tukeni nukewa akfulatye Jeova, orekma in alu nu sel, a met lili wiyesr.
Oiya Mwo Fwal nu sin Met Kulansap Nukewa lun God
10. Fuka met sap Poul el akkalemye ke me enenu su mwo in akkalemyeyuk ke oiya a ella mwo nu ke tukeni nukewa lasr oana met Kristian?
10 In 1 Korint, sapta 14, oasr ke sapta inge kas in kai mwomwo tuku sin met sap Poul ke oiyen meeting nukewa lun met Kristian la fuka in orek. El aksafyela kas in kai lal ke el fwak: “A lela ma nu kemwa in orek in oiye fwal, a in takla.” (1 Korint 14:40) Meeting ku tukeni nukewa lasr el sie orekma yok sripe lun congregation nu sin met Kristian, a oiya ku ella mwomwo su fwal nu sin met kulansap nukewa lun Jeova enenu in akkalemyeyuk ke meeting nukewa inge.
11, 12. (a) Mea enenu in on ke nunak lun tulik nukewa su wi ke meeting lasr? (b) Mea inkanek fwal tulik elos in ku in akkalemye lulalfongi lalos ke pal in meeting lasr?
11 Tulik nukemwa, enenu in lutiyuk pa ke oiya mwo su elos enenu in etu in akkalemye ke pal in tukeni lasr. Papa a nine nukewa su met Kristian elos enenu in akuteye nu sin tulik natulos la Kingdom Hall a an se in Lutlut lun Congregation ke Buk el tia an in sritel se. Pa inge an su kut oru alu lasr nu sin Jeova a lutlutkin Kas lal. Togusra Solomon el simusla: “Liaung niom ke kom som nu ke loom sin God; tu kalukyung in long mwo.” (Ekklisiastis 5:1) Moses el luti met Israel, met matu a “tulik srisrik” elos in tukeni nu sie. El fwak: “Suloini metu nu sie . . . tu elos fwa ku in long, a tu elos fwa ku in lutlut, a sangeng sin Jeova God lomwos, a liaung in oru kas nu kemwa in ma lo se inge. A tu tulik natulos, su tia etu ka, fwa ku in long, a lutlut in sangeng sin Jeova.”—Duteronomi 31:12, 13.
12 Oapana ke pal inge, tulik srisrik nukewa elos wi papa a nine kiyelos nu ke meeting nukewa ke sripen elos enenu in long a in lutlut. Ke elos sun tari matwe su elos ku in loang akmwoye nu ka a ku in kalem ke me luti sramtauk lun ma paye lun Baibel, tulik srisrik elos ku in “fwakak” pa ke lulalfongi lalos nu sin met puspus ke elos wi sang me top futoto lalos. (Rom 10:10) Sie tulik srisrik el ku in mutamwauk in akkalemye kutu kas oana me top lal nu ke sie kusensiyuk su el kalem ka. Ke mutamwauk, el ku in ridi me top, tusruktu ke pal toko, el fwa srike in akkalemye nunak lal sifwana ke kas lal sifwana. Ma inge ku in sang me insemwomwo a me akengan nu sin tulik, a kain in orekma inge in akkalemye lulalfongi lalos el ku in akinsemwomwoye insien met matu nukewa su oasr ka. Aok, papa a nine elos akkalemye me srikasrak mwomwo ke elos sifwana sang me top lalos. Mwo nu sin tulik nukewa in oasr Baibel, buk in on, a me rid su tuku ke Baibel natulos sifwana in orekmakin ke pal in meeting. Elos enenu in lotela in akkalemye sunak fwal nu ke me rid nukewa inge. Oiya nukewa inge fwa on ke nunak lun tulik nukewa la meeting nukewa lasr el mutal.
13. Mea kut fwinsrakkin nu selos nukewa su wi ke meeting lasr ke pal se meet?
13 Aok, kut srunga tukeni lasr in orek oana ke oiya puspus su orek ke loom alu lun Kristendom. Ke orekma nukewa inge ku in wangin akkalemyeyen insemwomwo orek ke alu, a met puspus elos orek luma na nunku mu elos arlana mutal ku oasr orekma su arlana mwo orek we ku oasr sie orekma in on su arlana wowon su ku in motkoeyuk nu ke sie an in rock concert. Kut lungse meeting nukewa lasr ke Kingdom Hall in oasr akkalemyeyen insemwomwo a kulang a ke oiyen kawuk tusruktu ma inge tia orek in oana sie tukeni lun u ke sie otah. Kut oru tukeni lasr tu kut in orek alu nu sin Jeova, ke sripe se inge kut enenu in akkalemye sunak nu ke meeting nukewa lasr. Kut lungse fwin oasr met su wi ke meeting ke pal se meet, tokin elos long me sramsram su akkalemyeyuk a tokin elos liye oiya mwomwo lasr a lun tulik srisrik natusr, elos ku in fwak kas inge: “God el muta in masrlomwos.”—1 Korint 14:25.
Sie Akwuk Nu Tok ke Oiyen Alu Lasr
14, 15. (a) Fuka kut ku in tia ‘fwasr liki loom sin God lasr’? (b) Fuka Isaia 66:23 el akpayeyuk?
14 Oana ke ma akkalemyeyuk tari ke me lutlut se inge, Jeova el oreni met kulansap nukewa lal a oru elos in insemwomwo engan lun “imwen pre” sel, ke temple in ngun lal. (Isaia 56:7) Niemaia su sie met oaru el akesmakinye met Ju su oana el la elos enenu in akkalemye sunak mwo a fwal nu ke temple paye ke elos sang ma saok lalos in sang kasru. El fwak: “Kut fwa tia fwasr liki loom sin God lasr.” (Niemaia 10:39) Sayen ma inge, kut tia pilesru ku akkalemye la kut srunga me solsol lun Jeova in orek alu nu sel luen “imwen pre” sel.
15 Isaia el akkalemye ma enenu in orek ke pal nukewa tukeni nu sie in alu, paenang el palye: “‘A a fwa te oru, liki sie malem sasu nu ke siepa, a liki sie Sabat nu ke siepa, ikwe nu kemwa fwa tuku in alu ye mutuk,’ Jeova el fwak.” (Isaia 66:23) Ma inge akpayeyuk ke pal inge. Pal nukewa, kais sie week ke kais sie malem, met Kristian nukewa su mwulela moul lalos elos tukeni in orek alu nu sin Jeova. Elos oru ma inge ke inkanek in wi meeting nukewa lun met Kristian a in wi ke orekma in luti peng mwo nu sin met nukewa, wekunang orekma saye nukewa in alu nu sin God. Ya kom sie sin met inge su ‘tuku a epasr ye mutun Jeova’?
16. Efu ku orekma in wi pal nukewa ke meeting nukewa el sie orekma su kut enenu in oru pal nukewa ke moul lasr ke pal inge?
16 Isaia 66:23 fwa akpayeye oiyen moul ke fwalu sasu su Jeova el mwulela ka. In pal sa, “ikwe nukewa,” ke oiya paye, nu ke kais sie week a kais sie malem, “fwa tuku in epasr,” ku orek alu, ye mutun Jeova ma patpat. Ke sripen orekma in tukeni nu sie in alu lasr nu sin Jeova fwa sie akwuk su fwa orek pal nukewa nu ke moul lasr ke akwuk sasu, ya kut tia kafweang in wi pal nukewa ke tukeni mutal nukewa lasr in oana sie orekma su kut oru pal nukewa ke moul lasr ke pal inge?
17. Efu ku kut enenu in wi ke tukeni nukewa lasr ke “kut liye tu len apkurun me”?
17 Ke safla lun akwuk inge futotoeni, kut enenu in akkalemye lungse yok lasr liki meeta in wi ke tukeni nukewa lasr oana met Kristian in alu nu sin God. Ke kut kafweang in akkalemye la meeting nukewa el arlana mutal, paenang kut tia lela kutenakain in orekma lasr, oana homework ke loom lutlut lasr, ku lutlut ke fong in akyokye me lutlut lasr in kutongkuti in tia wi ke meeting pal nukewa yurin met lili wiyesr. Kut enenu in eis ku su tuku ke asrouki mwomwo lasr. Meeting nukewa lun congregation lasr el ase nu sesr pal mwomwo in aetuila sie sin sie, in sang me akkeye, a in akkeye sie sin sie in akkalemye “lungse a orekma mwo.” Kut enenu in oru ma inge meyen “kut liye tu len apkuran me.” (Hibru 10:24, 25) Ke ma inge, lela kut in akkalemye pal nukewa sunak mwo a fwal nu ke tukeni mutal nukewa lasr ke kut wi pal nukewa, nukomang nuknuk fwal, a ke kut akkalemye oiya a ella mwo. Oinge, kut akkalemye la oasr pa yurosr nunak lun Jeova ke ma mutal nukewa.
Ke Inkanek lun Kalweni
• Mea akkalemye la tukeni nukewa lun met kulansap lun Jeova enenu in liyeyuk oana ma mutal?
• Orekma puspus fuka ke meeting lasr akpayeye la tukeni inge mutal?
• Fuka tulik srisrik elos ku in akkalemye la elos sunakin oiyen akwuk mutal lun meeting lasr?
• Efu ku orekma lasr in wi ke meeting pal nukewa el sie orekma su kut enenu in oru pal nukewa ke moul lasr?
[Petsa ke sra 10]
Tukeni nukewa in alu nu sin Jeova pa tukeni mutal yen nukewa su ma inge orek we
[Petsa ke sra 13]
Tulik srisrik natusr elos wi meeting nukewa in long a in lutlut