Ya Kom Akkalemye Nunak Lun Jeova Ke Ma Mutal Puspus?
“Komwos in arulana liaung . . . tu in wangin kutena met kosro ku kutena met su tia aksaokye ma mutal nukewa.”—HIBRU 12:15, 16, New World Translation.
1. Oiya ku ella fuka ke pal inge tia akkalemyeyuk sin met kulansap lun Jeova?
MET fwin fwalu elos tia loang mwo nu ke ma mutal puspus a wanginla pa karunginyen ma inge nukewa. Oasr mokul French se su pangpang Edgar Morin su oasr etauk yok lal ku lutlut yok lal ke akwuk nu ke moul lun met el fwak: “Foundeson nukewa nu ke oiyen moul nasnas su oakiyuki—sin God, wikin ma orekla moul nukewa, an u, me sramsram matu lun fwalu, a sripe nukewa—wanginla me akkalemye ka la ma inge nukewa tia enenu in oasr nunak in alolo ka. . . . Metu oru sulela nu selos sifwana ke kain in akwuk puspus su elos lungse in orekmakin pal nukewa.” Ma inge akkalemye ke “ngun lun fwalu,” ku “ngun se su orekma inge in mwen nutin seakos.” (1 Korint 2:12; Efesus 2:2) Met nukewa su mwulela moul lalos nu sin Jeova a lungse in akpusiselyelos sifwana nu ke kolyuk sumwos lal elos tia eis ku insese nu ke kain ella ku oiya koluk inge. (Rom 12:1, 2) A, met kulansap lun God elos etu la oiyen mutal, nasnas el yok sripe nu ke orekma in alu lalos nu sin Jeova. Mea ma puspus su mutal nu ke moul lasr? Me lutlut inge el fwa akuteye ma limekosr su mutal nu sin met kulansap nukewa lun God. Me lutlut toko e fwa akkalemye yok ke mutaliyen meeting nukewa lasr oana met Kristian. Tusruktu mea kalme paye nu ke kas se inge “mutal”?
2, 3. (a) Fuka ma Simusla el akkalemye yok ke oiyen mutal lun Jeova? (b) Fuka kut ku in liye ku nunku ke en Jeova la el mutal?
2 In Baibel kas Hibru inge, “mutal” el akkalemye ke sie oiya ku nunak in srela. Ke orekma in alu, kas se inge “mutal” el orekmakinyuk nu ke ma se su sriyukla liki kutena kain in nunak ku akwuk sukosok su wangin karunginye ku in sruokye akwuk mutal nukewa. Jeova el mutal na paye. El pangpang “El su Mutal Emeet.” (Soakas 9:10; 30:3, NW) In an Israel in pal meeta, met tol fulat el orekmakin maiter ku turban su oasr plet gold nasnas ka su kas inge simusyukla ka “Mutal nu sin Jeova.” (Exodus 28:36, 37) Kerubim a seraf nukewa in kosrao elos oasr ke yen apkurun nu ke tron lun Jeova elos akkalemyeyuk in ma Simusla la elos fwakak kas inge: “Mutal, mutal, mutal, Leum Jeova.” (Isaia 6:2, 3; Fwakyuk 4:6-8) Kas inge su akkalemyeyuk ke pal tolu el akkalemye yok la Jeova el arlana mutal, nasnas, a wangin meta. Paye la, El pa Sropon ma mutal nukewa.
3 Inen Jeova el mutal. Met sim lun Sam el fwak: “Lela elos in kaksakin em. Su yok a me aksangeng, el mutal.” (Sam 99:3) Jisus el luti kut in pre oinge: “Papa tumasr su in kosrao, Em in akmutalyeyuk.” (Mattu 6:9) Nine kiyel Jisus, Mari, el fwak: “Ngunik kaksakin Leum [Jeova, NW] . . . tu El su ku el oru ma lulap nu sik; a el mutal.” (Luk 1:46, 49) In oana met kulansap lun Jeova, kut liye a nunku ke inel oana ma mutal a kut tia oru kutena ma su ku in akkolukye e mutal inge. Sayen ma inge, kut akkalemye pa nunak lun Jeova ke oiyen mutal, kut nunku ke ma mutal nukewa su mutal nu sel.—Emos 5:14, 15.
Efu ku Oasr Sunak Paye Lasr nu sin Jisus
4. Efu ku Baibel el akkalemye Jisus oana sie “Met Mutal”?
4 In oana “mwen sefwanna” nutin Jeova, God mutal, Jisus el orekla mutal. (Jon 1:14; Kolosse 1:15; Hibru 1:1-3) Ke ma inge el pangpang “Sie su Mutal lun God.” (Jon 6:69) El sruokye oiyen mutal lal ke pal se moul lal itukla liki an in kosrao a tuku nu fwalu, ke sripen ku lun ngun mutal el sang kasru tu Mari el an oswella Jisus. Oasr lipufon se su fwak nu sel: “Ngun mutal a fwa tuku nu fwom . . . ma mutal se su tufwa isusla fwa pangpang Mwen nutin God.” (Luk 1:35) Ke pre lalos nu sin Jeova, met Kristian in an Jerusalem elos sramsramkin Mwen nutin God oana “Jisus met kulansap mutal Lom” ke pal luo.—Orekma 4:27, 30.
5. Orekma mutal fuka Jisus el akpayeye fwin fwalu, a efu ku sral arlana saok?
5 Oasr orekma mutal lun Jisus su enenu in akpayeyuk fwin fwalu. Ke pal se el baptaisla in yea 29 C.E., Jisus el srusrngiyuki oana sie Met Tol Fulat ke temple in ngun lulap lun Jeova. (Luk 3:21, 22; Hibru 7:26; 8:1, 2) In wekunang, el enenu in mise oana sie me kise. Sral su aksuroryeyukla fwa sang me lango ku me molela su ke inkanek inge met koluk nukewa elos ku in moliyukla. (Mattu 20:28; Hibru 9:14) Ke ma inge kut nunku ke sran Kraist oana ma mutal, “ma saok.”—1 Piter 1:19.
6. Oiya ku nunak fuka oasr yurosr kel Jisus, a efu?
6 In akkalemye la oasr sunak mwomwo lasr nu sin Jisus Kraist, Togusra a Met Tol Fulat lasr, met sap Poul el simusla: “God El ouyepa arulana akfulatyel [Wen natul], a sang nu Sel sie e su fulat liki e nu kemwa, tu nu sin en Jisus inti nu kemwa fwa sikukmutunti, sin ma in kosrao, a ma on fwalu, a ma on ten fwalu, a tu loa nu kemwa fwa fwakak tu Jisus Kraist El Leum, nu ke mwolanu lun God Papa.” (Filippai 2:9-11) Kut akkalemye la oasr pa yurosr nunak lun Jeova ke ma mutal ke kut insemwomwo in akpusiselye kut sifwana nu sin Leum lasr a Togusra lasr, Jisus Kraist, su Sifwen congregation lun met Kristian.—Mattu 23:10; Kolosse 1:18.
7. Fuka kut ku in akkalemye akosten lasr nu sin Kraist?
7 Ke orekma lasr in akos Kraist kut enenu pa in akkalemye sunak fwal nu sin met nukewa su el orekmakin in oru me kolyuk ke orekma su el kol ke pal inge. Kunokon lun met lili akmusrala puspus su wi ke u lun Governing Body a lun met liaung nukewa elos pakiyuki in liaung orekma ke branch ofus, district nukewa, circuit nukewa, a congregation nukewa enenu in liyeyuk a akilenyuk oana sie kunokon mutal. Ke ma inge akwuk inge sapkinyuk nu sesr in akkalemye sunak mwomwo a akosten mwomwo lasr.—Hibru 13:7, 17.
Sie Mutanfwal Mutal
8, 9. (a) Ke inkanek fuka met Israel elos mutal? (b) Fuka Jeova el luti nu sin met Israel akwuk mwo ke oiyen mutal?
8 Jeova el orala sie mwuleang nu sin met Israel. Oiyen futoto se inge el sang nu sin mutanfwal sasu se inge sie oiya ku akwuk mwolana. Elos akmutalyeyuk, ku sriyukla elos. Jeova el sifwana fwak nu selos: “Komwos fwa mutal nu sik, tu Nga Jeova, Nga mutal; a Nga srikomwosla liki mutanfwalu, tu komwos fwa ma luk.”—Livitikus 19:2; 20:26.
9 Ke pal se su mutanfwal lun Israel oakiyuki, Jeova el luti nu sin met Israel akwuk mwomwo ke oiyen mutal. Elos tia enenu in ilyak a kal fwin eol soko su Masap sengoul itukyang nu sel Moses we ke sripen elos fwa anwuki. In pal se ingo Eol Sainai el liyeyuk oana sie an mutal. (Exodus 19:12, 23) Akwuk ke met tol, ke temple, a ma nukewa su oasr ka liyeyuk oana ma mutal. (Exodus 30:26-30) Nunak fuka enenu in akkalemyeyuk nu ke congregation lun met Kristian?
10, 11. Efu ku ku in fwak mu congregation lun met akmusrala el mutal, a mea ma inge ku in orala nu sin “sip ngie”?
10 Congregation lun met Kristian akmusrala el mutal ye mutan Jeova God. (1 Korint 1:2) Aok, u nukewa lun met Kristian akmusrala fwin fwalu ke kutena pal el pupulyukkinyuk nu ke sie temple mutal, fwinne temple lulap in ngun lun Jeova in kosrao tia oakiyuki ke sripen u se inge. Jeova el muta ke temple inge ke inkanek lun ngun mutal lal. Met sap Poul el simusla: “A in el [Jisus Kraist] me musa nu kemwa, fwal nu sin sie sin sie, elos kapak nu ke sie tempel mutal in Leum. A in el komwos ouyepa tukeni musa nu ke nien muta lun God in ngun mutal.”—Efesus 2:21, 22; 1 Piter 2:5, 9.
11 Poul el simusla pa nu sin met Kristian akmusrala nukewa: “Ya komwos tia etu tu komwos tempel lun God, a ngun lun God muta in komwos? . . . Tu tempel lun God mutal, a komwos tempel se inge.” (1 Korint 3:16, 17) Ke inkanek lun ngun mutal lal, Jeova el ‘muta’ yurin met akmusrala a ‘fwufwasryesr in elos.’ (2 Korint 6:16) El sang kasru a kol “met kulansap” oaru lal pal nukewa. (Mattu 24:45-47) Oasr u lun “sip ngie” su aksaokye kunokon lalos in wi a asrouki nu sin u lun met akmusrala inge su lumeyuk nu ke sie temple mutal.—Jon 10:16; Mattu 25:37-40.
Ma Mutal Puspus Nu ke Moul Lasr oana Met Kristian
12. Ma puspus mutal fuka nu ke moul lasr, a efu?
12 Aok tia me lut, oasr ma puspus nu ke moul lun met nukewa su wi ke congregation lun met Kristian akmusrala a lun met nukewa su welulos su aksaokyeyuk oana ma mutal. Futoto lasr nu sin Jeova el mutal. (1 Kronikel 28:9; Sam 36:7) Ma inge el arulana saok nu sesr paenang kut tia lela kutena ma a kutena met in akmunasye futoto lasr nu sin Jeova, God lasr. (2 Kronikel 15:2; Jemes 4:7, 8) Pre el sie me kasru na yok in karungin pal nukewa futoto lasr nu sin Jeova. Pre el arlana mutal nu sel Daniel met palu se inge paenang fwinne oasr me sensen ke moul lal, el tafwela na in akkalemye oaru lal in pre nu sin Jeova oana ke el oru pal nukewa. (Daniel 6:7-11) “Pre lun met mwo [met mutal, NW],” ku lun met Kristian akmusrala, el pupulyukkinyuk nu ke sie me keng su orekmakinyuk nu ke orekma in alu in temple. (Fwakyuk 5:8; 8:3, 4; Livitikus 16:12, 13) Me akul ku me pupulyuk inge el akkalemye yok la pre el arlana mutal. Sie kunokon na mwomwo nu sesr meyen pa inge pal kut ku in sramsram nu sin God Fulatlanu in kosrao a fwalu! Aok pre el sie ma mutal nu ke moul lasr!
13. Kain in ku fuka el mutal, a fuka kut lela ma inge in orekma nu ke moul lasr?
13 Oasr sie akwuk lun ma ku nu ke moul lun met Kristian akmusrala nukewa a ke moul lun met nukewa su welulos su elos nukewa aksaokye ma inge oana ma mutal—ku se inge pa ngun mutal. Ngun se inge pa ku lun Jeova, a ke sripen ma inge orekma pal nukewa fwal nu ke lungse lun God mutal, paenang arulana fwal in pangonyuk oana “ngun mutal,” ku “ngun lun mutal.” (Jon 14:26; Rom 1:4) Ke inkanek lun ngun mutal, Jeova el sang nu sin met kulansap nukewa lal ku in sulkakin peng mwo. (Orekma 1:8; 4:31) Jeova el sang ngun mutal “nu selos su aksol oana met kol,” a nu selos su “fwafwasryesr ke ngun,” a tia fwal nu ke kena koluk lalos. (Orekma 5:32; Galetia 5:16, 25; Rom 8:5-8) Ku se inge su arlana fukoko el oru met Kristian in orala ku akkalemye “fwako lun ngun”—su oasr ke oiya mwomwo puspus—a in moulkin “moul mutal a sumwosmwos.” (Galetia 5:22, 23; 2 Piter 3:11) Fwin kut nunku ke ngun mutal oana ma saok se sesr, kut fwa tia oru kutena ma su ku in akkolukye ngun inge, ku kunausla orekma lun ma inge nu ke moul lasr.—Efesus 4:30.
14. Kain in kunokon fuka aksaokyeyuk sin met akmusrala oana ma mutal, a fuka met su wi ke u lun sip ngie wi pa oru kunokon se inge?
14 Kunokon lasr in orekmakin e mutal lun God, Jeova, a in oana Met Lo lal el sie ma su kut aksaokye oana ma mutal. (Isaia 43:10-12, 15) Met Kristian akmusrala nukewa elos orekla sin Jeova in fwal “in oana met orekma in mwuleang sasu.” (2 Korint 3:5, 6) In oana met luti, su sapkinyuk elos in sulkakin “peng mwo inge lun togusrai” a in “oru met in mutanfwal nukewa tu elos in met tumal lutlut.” (Mattu 24:14; 28:19, 20) Elos oaru in akpayeye kunokon inge, a oasr million puspus sin met oana sip su porongo, su in oana ke kas in pupulyuk elos fwak nu sin met akmusrala: “Kut fwa wi komwos som, tu kut long tu God El oasr yurumwos.” (Zekaraia 8:23) Met fwokpap nukewa inge elos insemwomwokin in oru orekma in kulansap su in oana ke kas in pupulyuk elos oana “met imae” a “met liaung imae grep” su sang kasru nu sin met akmusrala oana “met orekma lun God.” Ke inkanek inge, met nukewa su wi ke u lun sip ngie elos sang kasru yok nu sin met akmusrala nukewa in akpayeye orekma in luti lalos fwin fwalu nu fon.—Isaia 61:5, 6.
15. Kain in orekma fuka met sap Poul el aksaokye oana ma mutal, a efu ku oasr pa yurosr kain in nunak oinge?
15 Met sap Poul, ke sie me pupulyuk, el nunku ke orekma in luti lal nu sin met puspus in oana sie orekma mutal ku nasnas nu sin God. El sramsram kel sifwana oana “sie met orekma lun Jisus Kraist nu sin mutanfwal puspus, in orekma mutal in mwosasu lun God.” (Rom 15:16, NW) Ke pal se el simla nu sin met Kristian in an Korint, Poul el akkalemye ke orekma in kulansap lal oana sie “ma saok.” (2 Korint 4:1, 7) Ke inkanek lun orekma in luti lasr nu sin met puspus, kut oru “kas mutal lun God” in eteyuk. (1 Piter 4:11) Ke ma inge, fwinne kut wi ke u lun met akmusrala ku u lun sip ngie, kut nunku ka oana sie kunokon mutal in wi ke orekma in sang ma lo.
“Akmwoye Ma Mutal in Sangeng sin God”
16. Mea fwa kasre kut in tia ekla oana met su “tia aksaokye ma mutal puspus”?
16 Met sap Poul el sang kas in sensen nu sin met Kristian lili wiyel in tia ekla oana met su “tia aksaokye ma mutal puspus.” A, el sang kas in kai nu selos tu elos in ‘oru orekma in akmutalyelos,’ “arulana liaung . . . tu wangin kutena oka men sikyak in aktoasryelos a ma puspus fwa tia fokfokla ka.” (Hibru 12:14-16) Kas se inge “kutena oka men” el sramsramkin nu sin kutu met in congregation lun met Kristian su saap lungse in suk ma tafongla ke inkanek puspus su orek. Ke sie me pupulyuk, saap elos fwa tia insese nu ke nunak lun Jeova ke oiyen mutal lun payuk ku ke ma enenu in moulkin ke oiyen nasnas. (1 Tessalonika 4:3-7; Hibru 13:4) Ku saap elos wi sramsramkin a akkalemye nu sin met puspus ke me luti kikiap, a “sramsram lusrongten su kunausla ma mutal,” su akkalemyeyuk sin met puspus su kufla ku “sitoela liki ma paye.”—2 Timote 2:16-18.
17. Efu ku met Kristian akmusrala elos enenu in kafweang yok in akkalemye nunak lun Jeova ke oiyen mutal a nasnas?
17 Nu sin met lili akmusrala wiyel, Poul el simusla: “Met kulu, ke mwuleung inge oasr yurosr, lela kut in sifwana aknasnasye kut liki ma fokfok nu kemwa in ikwe a ngun, a in akmwoye ma mutal in sangeng sin God.” (2 Korint 7:1) Kas inge akkalemye la met Kristian akmusrala, su “met ipeis in pang in kosrao me,” elos enenu in kafweang pal nukemwa in akpayeye la elos akkalemye pa nunak lun Jeova ke ma mutal a nasnas ke oiya nukewa ke moul lalos. (Hibru 3:1) Ke oiya sepana inge, met sap Piter el kaifwe met Kristian akmusrala wiyel nukewa: “A oana tulik nutin akosten, a tia sifwana oru komwos in ou lung koluk lomwos meeta ke komwos nukin, a oana El su pangon komwos El Mutal, a komwos in ouyepa mutal in ma nu kemwa komwos oru in moul lomwos.”—1 Piter 1:14, 15.
18, 19. (a) Fuka met nukewa su wi ke “u lulap” elos akkalemye la elos akkalemye pa nunak lun Jeova ke ma mutal? (b) Mea kutupa ma mutal ke moul lasr oana met Kristian fwa akuteyuki ke me lutlut toko?
18 Nunak fuka enenu in akkalemyeyuk sin met nukewa su wi ke “u lulap,” su fwa moulla liki “ongoiye lulap”? Elos enenu pa in akpayeye la oasr yurolos nunak lun Jeova ke ma mutal nukewa. In buk lun Baibel su pangpang Fwakyuk, elos akkalemyeyuk la elos oru “orekma mutal” nu sin Jeova in kalkal lun temple in ngun lal fwin fwalu. Elos lulalfongi ke me kise ke lango lun Kraist, a ke kas in pupulyuk elos ‘owo nuknuk lalos a akfwosfwosye in sran Lam.’ (Fwakyuk 7:9, 14, 15) Ma inge oralos in nasnas ye mutan Jeova a oru elos in oasr kunokon in “aknasnasyelos sifwana liki ma fokfok nu kemwa in ikwe a ngun, a in akmwoye ma mutal in sangeng sin God.”
19 Sie ma yok sripe ke moul lun met Kristian akmusrala a ke moul lun met nukewa su welulos pa ke orekma in oru tukeni ku meeting pal nukewa in alu nu sin Jeova a ke Kas Lal. Jeova el nunku ke tukeni lun met kulansap lal oana ma mutal. Kut fwa akuteye ke me lutlut toko la fuka a efu kut fwa akkalemye pa nunak lun Jeova ke ma yok sripe inge oana ma mutal nukewa.
Ke Inkanek lun Kalweni
• Nunak fuka lun met nukewa lun fwalu tia akkalemyeyuk sin met kulansap nukewa lun Jeova?
• Efu ku Jeova el pa Sropon ma mutal nukewa?
• Kut akkalemye fuka la kut sunakin oiyen mutal lun Kraist?
• Ma puspus fuka kut aksaokye oana ma mutal ke moul lasr?
[Petsa ke sra 5]
In an Israel in pal meeta, akwuk ke orekma lun met tol, ke temple, a ke ma nukewa su oasr ka nunkeyuk oana ma mutal
[Petsa ke sra 6]
Met Kristian akmusrala nukewa fwin fwalu elos oana sie temple mutal
[Petsa ke sra 7]
Pre a orekma in luti lasr nu sin met puspus el kunokon mutal