Jeova El Sie God Su Aksaokye Orekma Lasr
“God el tia sesumwos in mulkunla orekma lomwos, a lungse su komwos fwakak nu ke el.”—HIBRU 6:10.
1. Fuka Jeova el akkalemye la el aksaokye oiya mwo lun mutan Moab se inge su pangpang Rut?
JEOVA el aksaokye na paye kafweang lun met nukewa su suk in oru ma lungse lal, a el akinsemwomwoyelos yok. (Hibru 11:6) Met oaru se inge Boas el etu ke oiya mwomwo lun God, meyen el fwak nu sin mutan Moab se su pangpang Rut, su kulang in kurungin nine kiyen mokul tumal su katinmasla: “Jeova lan moli orekma lom, a ma lane yok in etukot nu sum sin Jeova.” (Rut 2:12) Ya Rut el akinsemwomwoyeyuk sin Jeova? Aok! Ma na paye se la, me sramsram kel simusyukla in Baibel! Sayen ma inge, el payukyak nu sel Boas a el ekla nine matu kiyen Togusra Devid a Jisus Kraist. (Rut 4:13, 17; Mattu 1:5, 6, 16) Me pupulyuk inge el sie sin me pupulyuk puspus su oasr in Baibel su akkalemye ke oiya mwo lun Jeova su lungse in aksaokye orekma lun met kulansap nukewa lal.
2, 3. (a) Mea oru oiya mwomwo lun Jeova su lungse in aksoakye orekma lun met kulansap lal arulana yok sripe? (b) Efu ku Jeova el ku in akkalemye oiya paye lal in aksaokye orekma mwo lun met kulansap lal? Sang me pupulyuk.
2 Jeova el nunku ma inge oana orekma sesumwos nu sel fwin el tia aksaokye orekma mwomwo lun met kulansap lal. Hibru 6:10 el akkalemye: “God el tia sesumwos in mulkunla orekma lomwos, a lungse su komwos fwakak nu ke el, ke komwos kasru met mwo meeta, a ouyepa inge.” Ma mwo su oru kas ke fus inge arulana yok sripe pa ke sripen God el akkalemye la el aksaokye lungse yok lun met kulansap nukewa lal fwinne elos sesumwos a tia sun mwolana lal.—Rom 3:23.
3 Ke sripen sesumwos lasr, kut ku in pula mu orekma mutal lasr in alu nu sin God tia yok sripe a tia fwal nu ke me insemwomwo lun God. Fwinne ou inge, Jeova, el etu na paye kena ku lungse lasr a ma sikyuk nu ke moul lasr, a el aksaokye na paye orekma in kulansap lasr su kut oru ke ngunasr kemwa. (Mattu 22:37) In pupulyukkin: Sie nine el koneak sie me sang—sie necklace su tia arulana yok molo—su oasr fwin tepu lal. El ku in nunku ke me sang inge la tia arulana yok sripe a pilesru me sang inge. Tusruktu, ke sripen card se su oasr ka el akkalemye la me sang inge ma tuku sin tulik mutan srisrik se natul, su orekmakin mani nukewa su el saviye in sang molela ma inge. Inge nine se inge el nunku yok ke me sang inge ke siena oiya. Saap el tung a sronin mutal surorla, a el srukak tulik se natul inge nu iniwel a akkalemye kulo yok lal su tuku ke insiyel na paye.
4, 5. Fuka Jisus el etawi Jeova in akkalemye la el aksaokye orekma mwo?
4 Jeova su etu na paye nunak ku lungse lasr a me munas lasr, el aksaokye ma inge ke kut sang nu sel ma mwo emeet lasr, fwinne ma srisrik ku ma lulap. Ke oiya inge, Jisus el etawi na paye Papa tumal in aksaokye orekma mwo nukewa. Esam me sramsram ke Baibel su akkalemye ke ipen mani srisrik luo lun mutan katinmas sa. “A el [Jisus] ngetak, a liye met kasrup su filiye me sang lalos nu in nien mani. A el liye sie katinmas sekasrup su filiye nu lu luo ipen mani srisrik, a el fwak: ‘Paye Nga fwak nu sumwos, Katinmas sekasrup se inge el filiye nu lu yok lukelos nu kemwa. Tu elos inge nu kemwa ke ma puspus lalos elos filiye nu lu nu ke me kise, a el ke sekasrup lal filiye me moul lal nu kemwa nu lu.’”—Luk 21:1-4.
5 Aok, ke sripen el etu ma sikyuk ke moul lun mutan sa—la el katinmas se a el sekasrup—paenang Jisus el etu saokiyen me sang lal, a el aksaokye na paye ma inge. Kut ku in fwak pa ou inge nu sin Jeova. (Jon 14:9) Ya tia sie me akkeye in etu la kutena luma a ma sikyuk nu sum, kom ku in eis insemwomwo ka ye mutun God lasr a ye mutun Wen natul su aksaokye orekma mwo lom?
Jeova El Akinsemwomwoye Met Itiopia se su Sangeng nu Sel
6, 7. Efu a fuka Jeova el akkalemye la el aksaokye orekma mwo lal Ibed-milek?
6 Orekma lun Jeova in aksaokye orekma mwo lun met nukewa su oru ma lungse lal el akkalemye in ma Simusla ke pal puspus. Nunku akmwoye ke oiya su el akkalemye nu sin met Itiopia se su sangeng sin God pangpang Ibed-milek, su moul in len lal Jeremaia a sie met kulansap ke loom sin Togusra Zedekaia su seoaru in an Juda. Ibed-milek el lotela la met fwisrak in an Juda elos fwakak kas kikiap ke met palu Jeremaia la el lain guferment a la pa inge sripe se su paenang elos sisella nu in sie luf, elan mise ke sripen wangin me mongo we. (Jeremaia 38:1-7) El etu la elos srungel na paye Jeremaia ke sripen peng se su el akkalemye, ke ma inge Ibed-milek el filiye moul lal sifwana ke me sensen a el sramsramkin nu sin togusra. Ke pulaik, met Itiopia sa el kaskas: “Togusra leum luk, met inge elos sitoela in ma nu kemwa elos oru nu sel Jeremaia met palu, su elos sisye nu in lufu, a el apkuran in mise yen el muta we, meyen srala.” Ke masap lun togusra, Ibed-milek el eis mokul 30 a molela met palu se lun God inge.—Jeremaia 38:8-13.
7 Jeova el liye la Ibed-milek el oru ma oinge meyen oasr lulalfongi lal, su kasrel in kutangla kutena kain in sangeng su saap oasr yurol. Ke ma inge, Jeova el akkalemye la el aksaokye orekma inge a el fwak nu sel Ibed-milek ke inkanek lal Jeremaia: “Liye, Nga fwa wise kas luk nu fwin siti se inge ke koluk, a tia ke mwo . . . A Nga fwa molikomla in len sa, . . . a kom fwa tia etukyung nu in poun met su kom sangeng se. Tu paye Nga fwa molikomla . . . ; a moul lom fwa oana sie ma kuna nu sum; tu kom filiye lalalfongi lom in Nga.” (Jeremaia 39:16-18) Aok, Jeova el molella Ibed-milek, welulang Jeremaia, liki met fwisrak koluk lun an Juda a tok liki met Babulon, su kunausla an Jerusalem. “[Jeova] El liaung ngunin met mwo lal; el molelosla liki poun met koluk,” Sam 97:10 el fwak.
“Papa Tumom Su Liye In Lukma Fwa Sot Me Mol Nu Sum”
8, 9. Oana akkalemyeyuk sin Jisus, kain in pre fuka Jeova el aksaokye?
8 Siepa me akpayeye la Jeova el aksaokye lungse paye lasr nu sel el ku in liyeyuk ke ma Baibel el fwak ke pre. “Pre lun met sumwos me insemwomwo Lal,” met lalmetmet sa el akkalemye. (Soakas 15:8) In len lun Jisus met kol ke alu puspus elos pre ye mutun met puspus, tia ke sripen elos moniyuk na paye ke alu, tusruktu elos oru ma inge in oru met in nunku mu elos mwo. “Elos eis tari me mol lalos,” Jisus el fwak. El sapkin nu sin met tuma lutlut lal, “a kom, ke kom pre, utyuk nu infwokil sum su on lu, a ke kom kaliye srungul lom, pre nu sin Papa tumom su in lukma; a Papa tumom su liye in lukma fwa sot me mol nu sum.”—Mattu 6:5, 6.
9 Paye, Jisus el tia akkalemye mu koluk in pre ye mutun met puspus, meyen el sifwana pre ye mutun met puspus ke kutu pal. (Luk 9:16) Jeova el aksaokye na paye ma inge fwin kut pre nu sel ke inse paye, a kut tia nunku in oru met puspus in kaksakin kut. Aok, pre lasr sifwana, sie me akul mwo ke lungse paye lasr nu sin God a ke lulalfongi lasr nu sel. Ke ma inge, tia sie me lut la Jisus el suk pal nukewa an su wangin met we el an oru pre lal. Sie pal, el oru ma inge “ke lututang, el tukakek meet liki lenelik.” Ke sie pa pal, “el mukena som nu fwin eolu in pre.” A meet liki el sulela met sap 12 lal, Jisus el orekmakin fong fon se mukena muta in pre.—Mark 1:35; Mattu 14:23; Luk 6:12, 13.
10. Fwin pre lasr el akkalemye oiya paye su tuku ke inse a oasr kena yok in akinsemwomwoye God, kut ku in lulalfongi nu ke mea?
10 Nunku ke oiyen loang mwomwo lun Jeova ke el loang akmwoye nu ke ma akkalemyeyuk sin Mwen natul su tuku na paye ke insiel! Paye, la oasr pal Jisus el pre a el “tung ma lulap a sroninmet, a longyuk tari el ke sangeng lal sin God.” (Hibru 5:7; Luk 22:41-44) Fwin pre lasr akkalemye kain in oiya paye inge su tuku ke inse a oasr kena yok lasr in akinsemwomwoye God, kut ku in etu la Papa tumasr su in kosrao el loang akmwoye a aksaokye ma inge. Aok, “Jeova el apkuran nu selos nu kemwa . . . su pang nu sel in paye.”—Sam 145:18.
11. Mea pulakin lun Jeova ke ma kut oru ke kut mukelanu muta?
11 Fwin Jeova el aksaokye pre lasr ke kut pre nu sel in lukma, el aksaokye pa pre lasr ke inkanek yok ke kut aksol in lukma! Aok, Jeova el etu ke ma kut oru ke kut mukelanu muta. (1 Piter 3:12) Paye, oaru lasr a akosten lasr ke kut mukena muta el sie me akpayeye la oasr yurosr “inse sumwos” nu sin Jeova, sie inse su paye, mwo a tu na ku ke ma sumwos. (1 Kronikel 28:9) Kain in oiya inge oru insiyen Jeova in engun na paye!—Soakas 27:11; 1 Jon 3:22.
12, 13. Fuka kut ku in karunganang nunak lasr a insiesr a ekla oana Natanael sie met tuma lutlut oaru?
12 Ke ma inge, met Kristian oaru elos kuranginelos liki ma koluk su orek in lukma su kanausla nunak a inse, oana orekma in liye pornography ku petsa fokfok a in liye orekma sulallel. Fwinne kutu ma koluk ku in wukunyukla ye mutun metu, kut etu la “ma nu kemwa koflufol a lemtulaiuk ye mutun El, Su kut fwa fwakak oiyesr nu Sel.” (Hibru 4:13; Luk 8:17) In kafweang in fwasr liki ma puspus su aksupwarye Jeova, kut enenu in sruokye sie oiya ku pulakin nasnas a kut in insemwomwo in etu la oasr yurosr insemwomwo lun God. Aok, wangin alolo ka la Jeova el aksaokye na paye met “su fwafwasryesr in sumwos, a orekma sumwosmwos, a kaskas paye insiel.”—Sam 15:1, 2.
13 Tusruktu, fuka kut ku in karungin nunak lasr a insiesr ke sie fwal su tingtingi ke ma koluk? (Soakas 4:23; Efesus 2:2) In wekunang nu ke orekmakinyen akwuk nukewa su Jeova el use nu sesr in akkeye lulalfongi lasr, kut enenu in kafweang yok pal nukewa in srunga ma koluk a oru ma mwo, kut in sa in aksumwosye kena koluk in tia kapkapak a oswela orekma koluk. (Jemes 1:14, 15) Nunku ke lupan insemwomwo lom fwin Jisus el fwak nu sum ke ma el fwakak kel Natanael: “Liye, sie met Israel paye, su wangin kutasrik in el.” (Jon 1:47) Natanael, su ouyepa pangpang Bartolomu, tok el eis pal mwomwo lal in ekla sie sin met sap 12 lun Jisus.—Mark 3:16-19.
“Met Tol Fulat Su Kulang a Oaru”
14. Fuka oiya su akkalemyeyuk sel Jisus nu ke orekma lal Mari su tia oana sie nu ke oiya su akkalemyeyuk sin met sap puspus?
14 Meyen el “luman God se su koflanu liyeyuk,” oana Jeova, paenang Jesus el etawi na paye Papa tumal pal nukewa in aksaokye orekma mwo lun met nukewa su kulansapu God ke inse nasnas a paye. (Kolosse 1:15) Ke sie me pupulyuk, len limekosr meet liki el sang moul lal, Jisus a kutu sin met tumal lutlut elos tuku muteta ke loom sel Saimon in an Betani. Ke ekela, Mari, ma wiyel Lazarus a Marta, “el eis sie paun in me akmusra, arulana saok” (molin sie met orekma ke yea se), okoala ma inge nu fwin sifwel a niyel Jisus. (Jon 12:3) A kutu fwak: “Piye sripen sinuntei ma inge?” Tusruktu, Jisus, el liye orekma lal Meri ke oiya saye. El nunku ma inge oana sie inkanek in akkalemye kulang yok a yok sripe nu ke mise a pukpuki lal su apkuran in sikyak. Ke ma inge, el tia akkolukyel Meri, a Jisus el akfulatyel. El fwak “Yen nu kemwa metu fwa luti mwosasu se inge fwin fwalu na fon, elos fwa fwakak pa ma mutan se inge el oru tu elos in esmakunul.”—Mattu 26:6-13.
15, 16. Fuka kut ku in eis ma lane ke Jisus el moul a kulansap nu sin God oana sie met?
15 Sie me insemwomwo yok nu sesr in oasr sie met su lungse in aksaokye orekma lasr oana Jisus Met Kol lasr! Aok, moul lun Jisus fwin fwalu oana sie met kasrel in akola nu ke orekma su Jeova el filiyuki nu sel—pa in kulansap oana sie Met Tol Fulat a Togusra, ma se meet nu sin congregation lun met akmusrala a nu sin met puspus fwin fwalu.—Kolosse 1:13; Hibru 7:26; Fwakyuk 11:15.
16 Meet liki el tuku nu fwalu, Jisus el pulakin tari lungse yok a engun yok nu sin metu. (Soakas 8:31) In moul oana sie met, ma inge kasrel in kalem yok ke me keok kut sun a orekma lasr in muteng ke me srife ke kut oru orekma in kulansap lasr nu sin God. Met sap Poul el simusla: “[Jisus] el fwal nu sel in ma nu kemwa tu lan orekla oana ‘ma lel,’ tu el fwa Met Tol Fulat su kulang a oaru . . . Tu ke el sifwana keok ke srifweyuk el, el ku in kasrelos su srifweyuk.” Jisus el ku in akkalemye “kulang ke munas lasr” meyen el “sie su srifweyuk tari in ma nu kemwa oana kut, a wangin ma koluk Lal.”—Hibru 2:17, 18; 4:15, 16.
17, 18. (a) Mea leta puspus nu sin congregation itkosr in an Asia Minor akkalemye ke oiya mwo lun Jisus ke akkalemyeyen oiya mwo lal su lungse in aksaokye orekma mwo lalos? (b) Nu ke mea met Kristian akmusrala elos akola tari nu ka?
17 Etauk yok lal Jisus ke me srife puspus lun met kulansap nukewa lal arulana kalem tokin el akmoulyeyukyak. Loang akmwoye nu ke leta puspus lal nu sin congregation itkosr in an Asia Minor, su simusyukla sel met sap Jon. Nu sin congregation in an Smurna, Jisus el fwak: “Nga etu asor lom a sekasrup lom.” Ke fus se inge, kalmeyen kas lun Jusus el oana kas inge, ‘Nga kalem na paye ke ma upa lom; Nga etu na paye ke ma sikyuk nu sum.’ A, ke sripen el sifwana sun me keok nu ke mise, Jisus el tafwela in fwak kas inge wi pakoten a mwulela paye lal: “Kom in oaru nu ke mise, a Nga fwa sot nu sum tefuro lun moul.”—Fwakyuk 2:8-10.
18 Ke leta puspus lal nu sin congregation itkosr oasr kas mwomwo puspus ka su akkalemyeyuk ke etauk yok lal nu ke ma upa nukewa lun met tuma lutlut lal a ke oiya paye lal in aksaokye inkanek paye a oaru su elos orekmakin ke moul lalos. (Fwakyuk 2:1–3:22) Esam la met nukewa su Jisus el sramsram nu se pa met Kristian akmusrala su oasr fwinsrak lalos in muta yurol in kolyuk lal in kosrao. In etawi Leum lalos, ke elos akkalemye pakoten yok paenang elos akola in oru kunokon mwomwo lalos in sang kasru metu in eis ma lane nukewa lun me kise lun lango lun Kraist.—Fwakyuk 5:9, 10; 22:1-5.
19, 20. Fuka nu selos nukewa su orala “u lulap” elos akkalemye kulo lalos nu sin Jeova a nu sin Mwen natul?
19 Aok, lungse lun Jisus nu sin met kulansap akmusrala lal el akkalemye pa nu sin “sip ngie” oaru lal, su million puspus selos ke pal inge orala nu ke “u lulap . . . sin mutanfwal nu kemwa,” su e fwa moulla liki “ongoiye lulap” su fwa tuku. (Jon 10:16; Fwakyuk 7:9, 14) Met inge nukewa elos welul Jisus meyen elos aksaokye pa ke me kise lun lango lal a ke fwinsrak lalos nu ke moul ma patpat. Fuka elos akkalemye kulo lalos? Elos oru ma inge ke “elos kulansap nu sin God len a fong.”—Fwakyuk 7:15-17.
20 Report ke orekma in kulansap fwin fwalu nufon ke yea 2006, akkalemyeyuk ke sra 23 nu ke 26, sang me akpayeye ka la met orekma oaru inge elos oru “orekma mutal in kulansap len a fong” nu sin Jeova. Aok, ke lusen yea fon se inge, elos wekunang met lula sin met Kristian akmusrala elos kisekin 1,333,966,199 ao ke orekma in luti peng mwo—su oana sie nu ke lusen pal su pus liki yea 150,00!
Tafwela in Akkalemye Kaksak Wi Kulo!
21, 22. (a) Ke orekma in akkalemye kulo, efu ku met Kristian elos enenu in liyelosyang in orekmakin ma inge yokna ke pal inge? (b) Mea e fwa akuteyuki ke me lutlut toko?
21 Jeova a Mwen natul elos akkalemye la elos lungse na paye in aksaokye orekma mwomwo lun metu ke inkanek yok. Fwinne oinge, oasr sie me asor yok meyen pus sin met elos tia nunku yok ke God, a elos loang yok na nu ke nunak lalos sifwana. Poul el akkalemye oiya lun met su moul ke “len safla,” el simusla: “Met elos fwa sifwana lungselos, elos met lungse mani . . . Met elos tia sang kulo paye.” (2 Timothy 3:1-5, Philiips) Yok na paye ma tia oana sie nu sin kain in met inge a nu sin met Kristian paye, su ke inkanek lun pre ke inse kemwa lalos, in akos ke inse mulala lalos, a orekma in kulansap ke inse kemwa, elos akkalemye kulo lalos ke ma nukewa su God el oru nu selos!—Sam 62:8; Mark 12:30; 1 Jon 5:3.
22 Ke me lutlut toko, kut efwa kalweni kutu akwuk puspus su Jeova el ase nu sesr ke inkanek kulang. Ke kut nunku yok ke ‘me kite mwo nu kemwa’ inge, lela kut in akkalemye la kut lungse in aksaokye ma inge nukewa ke inkanek in akyokyelik.—Jemes 1:17.
Kom E Topuk Fuka?
• Fuka Jeova el akkalemye la el sie God su lungse in aksaokye orekma mwo lun metu?
• Ke kut mukelanu muta, fuka kut ku in oru insien Jeova in engun?
• Ke inkanek puspus fuka Jisus el akkalemye la el aksaokye orekma mwomwo lun met?
• Fuka moul lal Jisus oana sie met sang kasrel in ekla sie met kol su akkalemye pakoten a lungse in aksaokye orekma mwo?
[Petsa ke sra 15]
In oana ke sie nine el lungse in aksaokye me sang fusrasr lun tulik natul, Jeova el aksaokye me sang lasr kut fwin sang nu sel ma mwo emeet lasr