Lungse El Akkeye Oiyen Pulaik
“God el tia ase nu sesr ngunin sangeng, a ngunin ku a lungse, a nunak mwo a sumwos.”—2 TIMOTE 1:7, NW.
1, 2. (a) Mea lungse el ku in akkeye sie met in oru? (b) Efu ku lungse lun Jisus wangin ma oana?
OASR siyanyen se su tufwana payukyak elos oru kain in turong inge scuba diving apkurun nu ke sie siti nu leyen kutulap lun an Australia. Elos akola in otyak liki inkofa a ke pal se inge oasr soko pako lulap a fasrfasr su kasrusr sumwos nu yurin mutan se inge. Ke sripen el lungse in molela mutan kiyel, mokul se inge el sulaklak in sinukunla mutan se kiyel inge a el lela pako soko inge in kangulla. “El sang moul lal keik,” mutan se kiyel inge el fwak ke funeral lun mokul tumal su mise tari.
2 Aok, lungse el ku in oru met in akkalemye pulaik mwomwo. Jisus Kraist el sifwana fwak: “Wangin lungse yurin met yok liki lungse se inge, tu sie met fwa filiye moul lal ke met kawuk lal.” (Jon 15:13) Tia pat ke ao 24 tokin Jisus el fwak kas inge, el sang moul lal sifwana, tia ke sie met mukena, a nu sin met nukemwa. (Mattu 20:28) Sayen ma inge, Jisus el tia sang moul lal ke sripen oasr ma enenu sikyak in akkalemye ke orekma lun pulaik. El etu tari meet liki ma inge sikyak la el fwa aksruksrukyeyuk, akkolukyeyuk, eis nununku sesumwos, a in anwuki fwin soko sak. El akola pa met tuma lutlut nukemwa lal nu ke ma su fwa sikyak inge, ke el fwak: “Liye, kut fwasyuk nu Jerusalem, a Mwen nutin met El fwa etukyung nu sin met tol fulat a met sim, a elos fwa lusella nu ke mise, a fwa esalang nu sin met Pegan, a elos fwa aksruksruk El, a fwa anel, a fwa srunglul, a fwa unilye.”—Mark 10:33, 34.
3. Mea sang kasru pulaik yok lun Jisus?
3 Mea sang kasru oiyen pulaik mwomwo lun Jisus inge? Lulalfongi a sangeng sin God sang kasru yok nu ka. (Hibru 5:7; 12:2) Tusruktu, ma yok sripe emeet pa, oiyen pulaik lun Jisus el tuku ke lungse, nu sin God a nu sin met nukemwa. (1 Jon 3:16) Kut fwin akyokye ku akkeye kain in lungse inge wekunang nu ke lulalfongi a sangeng sin God, kut ku in akkalemye pa pulaik inge lun Jisus. (Efesus 5:2) Fuka kut ku in akyokye kain lungse inge? Kut enenu in akilen ke Sropon ma inge.
“Lungse El Ma Sin God Me”
4. Efu ku kut ku in fwak la Jeova el pa Sropon lungse?
4 Jeova el orekmakin lungse pal nukemwa a el pa Sropon ma inge. “Met kulu,” met sap Jon el simusla, “lela kut in lungse sie sin sie, tu lungse ma sin God me, a elos nu kemwa su lungse, elos isusla sin God, a etu God. El su tia lungse el tia etu God; tu God el lung.” (1 Jon 4:7, 8) Ke ma inge, lungse su oana lungse lun God, el ku in kapkapek fwin sie met el kafweang in futoto ku kalukyang nu sin Jeova ke inkanek lun etauk sumwos a oru orekma fwal nu ke etauk inge a akkalemye akosten su tuku ke inse.—Filippai 1:9; Jemes 4:8; 1 Jon 5:3.
5, 6. Mea sang kasru nu sin met tuma lutlut puspus lun Jisus in pal meeta in akkeye lungse lalos oana lungse lun Kraist?
5 Ke pre safla lal yurin met sap oaru 11 lal, Jisus el akkalemye la in etu God a in kapkapek ke lungse el kupasr nu sin sie sin sie, el fwak: “A Nga fwakak tari Em nu selos, a fwa fwakak, tu lungse su kom lungsum Nga ka fwa on in elos, a Nga in elos.” (Jon 17:26) Jisus el kasru met tuma lutlut puspus lal in akkeye kain in lungse inge su oasr in masrlol a Papa tumal, su akkalemyeyuk ke kas a ke me srikasrak la en God el aoliyen ma mwo nukemwa—pa inge oiya mwomwo puspus lun God. Ke ma inge, Jisus el ku in fwak: “El su nuna liye yu el nu liyel Papa.”—Jon 14:9, 10; 17:8.
6 Lungse su oana lungse lun Kraist el fwako lun ngun mutal lun God. (Galetia 5:22) Ke pal se met Kristian in century se meet elos eis ngun mutal ke len in Pentecost 33 C.E., elos tia esamye mukena ma puspus su Jisus el luti nu selos a elos ouyepa eis etauk mwomwo nu ke inkanek in eis kalem yok ke ma Simusla. Kalem la etauk yok lalos inge akkeye lungse lalos nu sin God. (Jon 14:26; 15:26) Mea fwokin ma inge? Fwinne oasr pal ke moul lalos sifwana sun me sensen upa, elos akkalemye pulaik a moniyuk in fwakak peng mwo.—Orekma 5:28, 29.
Pulaik a Lungse Akkalemyeyuk
7. Mea Poul a Barnabas elos enenu in muteng ka ke orekma in fwufwasryesr lalos oana missionary?
7 Met sap Poul el simusla: “God el tia ase nu sesr ngunin sangeng, a ngunin ku, a lungse, a nunak mwo a sumwos.” (2 Timote 1:7, NW) Poul el kaskaskin ke ma sikyak nu sel sifwana. Nunku ke ma sikyak nu sel a nu sel Barnabas ke elos tukeni fwufwasryesr in oru orekma lun missionary. Elos fwakak peng mwo nu ke siti puspus, wekunang an Antiok, Aikonium, a Listra. Ke kais sie siti, oasr kutu met ekla met lulalfongi, tusruktu, oasr met puspus su ekla met lain upa. (Orekma 13:2, 14, 45, 50; 14:1, 5) In an Listra oasr un met puspus tanglal Poul, amakunalla nu likin siti nunku mu el mise tari! “A, ke met lutlut elos tu raunella, el tuyuk, a utyuk nu in siti. A ke len toko el oelul Barnabas som nu Derbe.”—Orekma 14:6, 19, 20.
8. Fuka oiyen pulaik su akkalemyeyuk sel Poul a Barnabas akkalemye lungse yok lalos nu sin metu?
8 Ya orekma inge in kafweang in suk in unilye Poul aksangengyel a Barnabas in fuleak oru orekma in fwakak peng mwo? Mo tia oinge! Tokin elos “luti mwosasu a oru met lutlut puspus” in siti lun Derbe, mokul luo inge elos “folokla nu Listra, a nu Aikonium, a nu Antiok.” Efu? In akkeye met tuma lutlut sasu inge in tu na ku ke lulalfongi. “Tu kut fwa ilyuk nu in togusrai lun God ke kolya puspus,” Poul a Barnabas elos fwak. Kalem la, pulaik lalos tuku ke lungse yok a paye lalos nu sin “sip” lun Kraist. (Orekma 14:21-23; Jon 21:15-17) Tokin elos pakiye met elder puspus ke congregation sasu puspus inge, met lili luo inge elos kisekin pre a “elos esalosyung nu sin Jeova, su elos lulalfongi.”
9. Ke oiya fuka akkalemyeyuk sin met elder puspus su tuku liki an Efesus ke oiyen lungse lal Poul nu selos?
9 Poul el sie met su akkalemye lungse a pulaik pal nukemwa paenang pus sin met Kristian in pal meeta elos akkeye lungse lalos nu sel. Esam ke ma sikyak ke sie toeni su Poul el pangon met elder puspus liki an Efesus, su ke an se inge el orekma ke lusen yea tolu a el pulakin me kalyai upa. (Orekma 20:17-31) Tokin el akkeyelos in karungin u lun God su itukyang nu selos, Poul el sikukmutunti a pre yurolos nu kemwa. Tokin ma inge “elos nu kemwa arulana tung, a kui nu in kaiwel Poul a ngokmutal, a toasrlanu ke kas se su el fwak tu elos fwa tia sifwil liye mutal.” Oasr na paye lungse yok lun met lili nukemwa inge nu sel Poul! Paye, la ke sun pal lalos in som, Poul a met su welul fwufwasryesr elos ‘fwasr lukelos,’ met elder nukemwa inge elos srunga elos in som.—Orekma 20:36–21:1.
10. Fuka Met Lo lun Jeova ke pal inge elos akkalemye lungse nu sin sie sin sie ke inkanek pulaik?
10 Ke pal inge, oasr lungse yok su akkalemyeyuk nu sin traveling overseer puspus, met elder ke congregation, a met lili puspus ke sripen oiyen pulaik su elos akkalemye in sang kasru nu sin sip lun Jeova. Ke sie me pupulyuk, in mutanfwal puspus su musalla ke meun su orek sin met puspus ku ke an puspus su oasr masap in tia oru orekma in luti peng mwo, traveling overseer puspus a mutan kiyelos elos filiye moul lalos a sukosok lalos tu elos in oru muteta lalos nu ke congregation puspus. Oayepa, oasr Met Lo puspus su pulakin me keok sin met kol koluk a sin met puspus su sang kasru nu sin met kol sulallel inge ke sripen Met Lo inge elos tia tukakin Met Lo wiyelos ku elos tia akkalemye la elos eis me mongo in ngun inge oya. Tausin puspus sin met Lo elos kalyaiyuk, akkolukyeyuk, a anwuki meyen elos srunga in tui in fwakak peng mwo ku in tui in asrouki yurin met lili wiyelos ke meeting nukemwa lun met Kristian. (Orekma 5:28, 29; Hibru 10:24, 25) Lela kut in etawi lulalfongi a lungse lun met lili mokul a mutan nukemwa inge!—1 Tessalonika 1:6.
Nikmet Lela Lungse Lom in Oula
11. Ke inkanek puspus fuka Setan el orek meun lain met kulansap nukemwa lun Jeova, a mea elos enenu in oru?
11 Ke pal se Setan el sisila nu fwalu, el arlana lungse in akkalemye mulat lal nu sin met kulansap nukemwa lun Jeova meyen elos “liaung masap lun God, a srukye lo lun Jisus.” (Fwakyuk 12:9, 17) Sie inkanek lun Devil el oru pa ke me kalyai. Tusruktu, ma inge tia akmunasyelos a oasr fwako mwo tuku ke orekma kutasrik inge, meyen ma inge oru met kulansap puspus lun God in futoto nu sin sie sin sie ke me kapur lun lungse lun met Kristian a mokle met puspus selos in akkalemye moniyuk yok. Siepa inkanek kutasrik lal Setan pa in purakak kena koluk lun met. In lain orekma inge enenu in akkalemyeyuk siena kain in pulaik meyen orekma in lain inge oasr luen mano, in lain kena koluk su oasr ke inse ‘kutasrik a koluk’ lasr sifwana.—Jeremaia 17:9; Jemes 1:14, 15.
12. Fuka Setan el orekmakin “ngun lun fwalu” in akmunasyela lungse lasr nu sin God?
12 Oasr siepa kofwen me meun fukoko lal Setan—pa “ngun lun fwalu,” su kalmekin nu ke oiya ku me akkeye fukoko lun fwalu, su arlana lain ngun mutal lun God. (1 Korint 2:12) Ngun lun fwalu el akkeye nunak in rapku a lungse ke ma puspus—su pa inge “lung lun muta.” (1 Jon 2:16; 1 Timote 6:9, 10) Fwinne tia koluk ma puspus a mani, tusruktu fwin lungse lasr nu ke ma inge el yok liki lungse lasr nu sin God, pa inge inkanek ku in akkalemye la Setan el kutangla. “Ku” nu ke ngun lun fwalu oasr ke ku lun ma inge su purakak lung koluk lun ikwe, oasr ke oiyen kutasrik lal, su oasr pal nukemwa, a oana engu, ma inge pulakinyuk yen nukemwa. Nikmet lela ngun lun fwalu in akkolukye insiom!—Efesus 2:2, 3; Soakas 4:23.
13. Fuka oiyen pulaik lasr nu ke moul nasnas ku in srifeyukla?
13 Tusruktu, in lain a in akkalemye srunga yok nu ke ngun koluk lun fwalu, enenu in akkalemye pulaik in moulkin oiyen moul nasnas pal nukemwa. Ke sie me pupulyuk, sie met el enenu in pulaik el an tuyak a som liki sie theater ku in kunela computer ku TV ke pal se fwin oasr petsa koluk sikyak. Pulaik eneneyuk in tu na ku in lain me akkoluk su tuku sin met kawuk a in tui tila suk in oru asrouki koluk. Oayepa, pulaik eneneyuk nu ke inkanek in sruokye ku masap a akwuk mwomwo nukemwa lun God ke pal se su oasr kas in aksruksruk, su tuku sin tulik lutlut su wi kom ke loom lutlut, a met ke niyen orekma, ku sin sou.—1 Korint 15:33; 1 Jon 5:19.
14. Mea kut enenu in oru fwin kut akkolukyeyuk ke ngun lun fwalu?
14 Ke ma inge, arlana yok sripe kut in akkeye lungse lasr nu sin God a nu sin met lili mokul a mutan wiyesr nukemwa in ngun! Orekmakin pal yok in tuni akmwoye ma kut lungse in oru ke pal fwasru a ke inkanek lun moul lasr in liye fwin ngun lun fwalu el akkolukye kom ke kutena inkanek. Fwin ma inge akkolukye kut—fwinne ke inkanek srisrik—mwo in pre nu sin Jeova siyuk in akpulaikye kut in sisla a in akwanginyela ma inge. Jeova el fwa tia pilesru kain in me siyuk paye inge. (Sam 51:17) Sayen ma inge, ngun mutal lal fukoko liki ngun lun fwalu.—1 Jon 4:4.
Pulaik In Muteng ke Ma Upa Puspus Lasr Sifwana
15, 16. Fuka lungse su oana lungse lun Kraist ku in kasre kut in muteng ke ma upa puspus lasr sifwana? Sang sie me pupulyuk.
15 Kutu pa ma upa su met kulansap lun God elos enenu in muteng ka pa ke fwako koluk su tuku ke oiyen sesumwos a matou, su ku in oru sie met in fusrasr in pulakin mas, ke oiyen sekapas, asor yok, a kutupa ma upa saye. (Rom 8:22) Lungse su oana lungse lun Kraist ku in kasre kut in muteng ke ma upa nukemwa inge. Nunku ke me srikasrak lal Namangolwa, su matula a karunginyuk sin sie sou Kristian fwin an Zambia. Ke pal se el yea luo matwe, Namangolwa el sun sie kain in mas su paenang elan ekla tulik sekapas se. “Nga nunku keik sifwana,” el fwak, “Nga nunku mu metu fwa lut ke ate luk. Tusruktu met lili wiyuk elos kasreyu in ekulla nunak luk. Oasr fwako mwo lun ma inge, meyen Nga kutangla kutena kain in oiya luk in muta nunku keik sifwana, a tokin kutu pal Nga eis baptais.”
16 Fwinne Namangolwa el orekmakin wheelchair lal sifwana, ke pal puspus el enenu in orak orekmakin paul a intel ke inkanek u su arlana pusraksrak. Ne oinge, el kafweang in wi orekma in luti peng mwo oana sie auxiliary pioneer ke lusen malem luo ke kais sie yea. Oasr met se in loomu el tung ke pal se Namangolwa el orek lo nu sel. Efu? Meyen el mokleyukyak na paye ke lulalfongi a pulaik lun sister se wiyesr inge. Oasr me akpayeye ke me insemwomwo lun Jeova nu ke orekma lal, meyen oasr tulik lutlut limekosr lal Namangolwa ke Baibel baptaisla, a sie selos oru orekma in kulansap oana sie met elder ke congregation. “Niyuk ngal upa ke pal pus,” el fwak, “tusruktu Nga tia lela ma inge in tulokinyu wi.” Sister se inge el sie sin Met Lo puspus fwin fwalu su munas ke mano a fukoko in ngun ke sripen lungse lalos nu sin God a nu sin met tulan lalos. Met nukemwa inge elos arlana saok ye mutun Jeova!—Haggeai 2:7.
17, 18. Mea kasru met puspus in muteng ke mas a ke ma upa puspus? Sang kutu me pupulyuk ke congregation lom an.
17 Mas upa el ku in sropon me akmunas, ku me akasor. Sie met elder ke congregation el fwak, “Ke sie book study su Nga wi ka, oasr sie sister el keok ke sripen mas lal inge diabetes a kidney lal musalla, siepa sister oasr cancer lal, oasr sister luo su oasr arthritis upa lalos, oasr pa sister se su oasr lupus a fibromyalgia lal. Kutu pal elos asor a arlana pulakin munasla lalos. Tusruktu, fwin oasr pal elos tia wi ke meeting ma inge sikyak ke sripen elos pulakin mas upa ku kaul ke loom ono. Elos nukemwa wi ke orekma lun forfor pal nukemwa. Elos akesmakinye yu kel Poul, ke el fwak: ‘Ke Nga munas, na Nga ku.’ Nga kaksakin na paye lungse a pulaik lalos. Saap oiya su sikyak nu ke manolos inge kasrelos in oasr nunak mwo nu ke moul lalos a ke ma puspus su yok sripe na paye.”—2 Korint 12:10.
18 Kom fwin kafweang in muteng ke oiya lun sekapas, mas, ku ke kutupa ma upa, kom “pre tia sisla” in siyuk ke me kasru tu kom in tia pulakin me asor upa. (1 Tessalonika 5:14, 17) Aok, saap kom pulakin ke kutu pal la oasr pal kom engan mwo a oasr pal kom arlana asor, tusruktu kom kafweang in loang akmwoye pal nukemwa nu ke ma mwomwo, ke ma paye nukemwa ke God, yokna ke fwinsrak lasr nu ke Togusrai su arlana saok. Oasr sie sister el fwak: “Nu sik, orekma in luti peng mwo el oana ono se.” Orekma in fwakak peng mwo nu sin met puspus kasrel in sruokye sie nunak a fwinsrak mwomwo.
Lungse el Kasru Met Orekma Koluk in Sifwil Foloku nu sin Jeova
19, 20. (a) Mea ku in kasru met puspus su oru orekma koluk in akkalemye pulaik in foloku nu sin Jeova? (b) Mea fwa akuteyeyuki ke me lutlut toko?
19 Oasr met puspus su munasla ke orekma in alu lalos nu sin God ku srufla in oru ma koluk upa nu selos sifwana su paenang elos tia fusrasr in foloku nu sin Jeova. Tusruktu oiyen pulaik lun inse su eneneyuk ku in sang me kasru fwin met puspus inge elos akkalemye auliyak paye a sifwilpa akkeye lungse lalos nu sin God. Nunku kel Mario,a su muta in an Merika. Mario el som liki congregation lun met Kristian, el ekla met su lungse na paye in orekmakin me srui lun wain a ono koluk, a tokun yea 20, el kalbous. “Nga mutamwuk in nunku yok ke pal fwasru luk a in sifwilpa ridi Baibel,” Mario el fwak. “Tokin kutu pal, Nga aksaokye oiya mwomwo puspus lun Jeova, yokna ke oiyen pakoten lal, su Nga pre ka pal nukemwa. Tokin Nga sukosokla liki niyen prison, Nga kafweang in tia sifwil asrouki nu sin met kawuk luk meeta, Nga mutamwauk in som nu ke meeting lun met Kristian, a Nga sifwilpa foloku nu ke congregation. Nga kosrani me akkoluk nu ke mano fwako lun ma koluk su Nga taknelik, ne oinge ke pal inge oasr fwinsrak mwomwo luk. Nga sang kulo nu sin Jeova alukela ma fwal nu ke pakoten a nunak munas lal.”—Sam 103:9-13; 130:3, 4; Galetia 6:7, 8.
20 Paye la, met puspus su oasr kain in ma upa puspus su sikyak nu selos in oana ke ma su sikyak nu sel Mario la elos enenu in kafweang na paye in suk in sifwil foloku nu yurin Jeova. Tusruktu lungse lalos su sifwilpa akkeyeyuk—ke inkanek lun lutlut Baibel, pre, a in sifwilpa nunku yok—fwa sang nu selos oiyen pulaik a sulela mwomwo su eneneyuk. Mario el akkeyeyuk pa ke fwinsrak lun Togusrai. Aok, wekunang lungse, lulalfongi, a sangeng sin God, wikin fwinsrak el ku in ase ku su arlana fukoko in akinsemwomwoye moul lasr. Ke me lutlut toko, kut fwa tuni akmwoye me sang saok inge lun ngun.
[Footnote]
a Inen met ikulyukla.
Kom Ku In Topuk?
• Fuka lungse el sang me kasru nu ke oiya pulaik mwomwo lun Jisus?
• Fuka lungse nu sin met lili puspus sang me kasru nu sel Poul a Barnabas ke pulaik mwomwo?
• Ke inkanek puspus fuka Setan el srike in kunausla lungse lun met Kristian?
• Lungse nu sin Jeova ku in ase nu sesr pulaik in muteng ke ma upa puspus fuka?
[Petsa ke sra 15]
Lungse lal Poul nu sin metu sang pulaik nu sel in mongfusesr
[Petsa ke sra 16]
Oiyen pulaik eneneyuk in orekmakin pal nukemwa nu ke akwuk sumwosmwos lun God
[Petsa ke sra 16]
Namangolwa Sututu