Tupan Jeova, A Pulaik Na

“Tupan Jeova; kom in ku a akpulaikye insiom. Aok, kom in tupan Jeova.”​—SAM 27:14.

1. Fuka lupan yok sripaiyen fwinsrak, a fuka kas inge orekmakinyuk ke ma Simusla?

FWINSRAK paye el oana sie lam su arlana kalem. Ma inge kasre kut in liye pal fwasru ke nunak pulaik a engan fwinne oasr ma upa puspus ke pal inge. Jeova mukefanna ku in use nu sesr sie fwinsrak paye, su el oru ke inkanek lun Kas lal. (2 Timote 3:16) Aok, kas inge “fwinsrak,” a “tupan” sikyak ke pal puspus in Baibel a sramsramkin nu ke oiya in tawi ku sano ke ma mwo a nu ke ma su oasr ke fwinsrak inge.a Kain in fwinsrak inge el yok liki kutena kain in lungse su akkalemyeyuk, su tia etu fwin ku in akpayeyuk.

2. Ke inkanek fuka fwinsrak el sang me kasru nu ke moul lun Jisus?

² Ke pal se el sun me srife puspus a me keok puspus, Jisus el ngetla nu ke pal fwasru a tia liye ke ma sikyak in pal lal mukena a el fwinsrak nu sin Jeova. “Su ke engun filiyuki ye mutal, El keok fwin sak soko, a pilesru mekin, a muta lepo leyut lun tron lun God.” (Hibru 12:2, NW) Meyen el loang akmwoye ke fwinsrak nu ke akmutalyeyen sumwos lun Jeova in kol a in akmutalye en Jeova, paenang Jisus el tia suk in som liki inkanek lal in akkalemye akosten lal nu sin God, fwinne oasr ma upa puspus sikyak nu sel el muteng ka.

3. Fuka fwinsrak el kasru met kulansap nukemwa lun God?

³ Togusra Devid el akkalemye la fwinsrak a pulaik el kupasr nu sin sie sin sie, el fwak: “Tupan Jeova; kom in ku a akpulaikye insiom. Aok, kom in tupan Jeova.” (Sam 27:14) Kut fwin lungse insiesr in ku a fukoko, kut tia enenu in lela fwinsrak lasr in munasla a kut in akkeye ma inge in kalem ke nunak lasr a in aksaokye fwinsrak inge ke insiyesr. In oru oinge ku in kasre kut in etawi Jisus in akkalemye pulaik a moniyuk ke kut wi ke orekma su el sapkin nu sin met tuma lutlut nukemwa lal in oru. (Mattu 24:14; 28:19, 20) Aok, fwinsrak el akkalemyeyuk in Baibel in wekunang lulalfongi a lungse oana sie oiya mwomwo su yok sripe, a oasr pal nukemwa su met kulansap nukemwa lun God elos enenu in akkalemye yok.​—1 Korint 13:13.

Ya Kom “Yokelik in Fwinsrak”

4. Met Kristian akmusrala nukemwa a met nukemwa su welulos su oasr ke u lun sip ngie elos ngetla nu ke oiya fuka ke pal fwasru?

⁴ Oasr sie pal mwomwo nu sin met kulansap lun God ke pal fwasru. Met Kristian akmusrala nukemwa elos sano nu ke pal se su elos fwa ku in welul Kraist in oru orekma in kulansap lalos in kosrao, a oasr me fwinsrak lun “sip ngie” in “taltalla liki sruo lun ma kulamwi nu ke sukosok lun mwolanu lun tulik nutin God [fwin fwalu].” (Jon 10:16; Rom 8:19-21; Filippai 3:20) Molela liki ma koluk a liki fwako koluk nukemwa lun ma inge el oasr ke “sukosok lun mwolanu” inge. Paye la, Jeova​—Met Sang lun “me kite mwo nu kemwa a kite fwal”—​el fwa sang mukena me sang mwo emeet nu sin met kulansap oaru nukemwa lal.​—Jemes 1:17; Isaia 25:8.

5. Fuka kut ku in “yokelik in fwinsrak”?

⁵ Fuka lupan me kasru nu ke fwinsrak lun met Kristian oasr ke moul lasr? In Rom 15:13, kut ku in ridi kas inge: “Inge God lun fwinsrak lan nek komwosla ke engun nu kemwa a misla in lulalfongi, tu komwos fwa yokelik in fwinsrak, a in ku lun ngun mutal.” Aok, fwinsrak el ku in pupulyukkinyuk, tia nu ke sie candle ku lam su oasr ke yen losr, a el lumeyuk nu ke kalem su tuku ke fwatu ke lututang, su sang misla, engan, akwuk mwo, a pulaik nu ke moul lun sie met. Loang akmwoye nu ka la kut “yokelik in fwinsrak” ke kut lulalfongi ke Kas lun God a eis ngun mutal lal. Rom 15:4 el akkalemye: “Tu ma nu kemwa su simusla meet simla in luti kut, tu ke mongfusesr a parak lun ma simusla fwa oasr fwinsrak lasr.” Ke ma inge siyuk sum sifwana: ‘Ya Nga karungin fwinsrak luk in kalem pal nukemwa ke Nga akkalemye la Nga sie sin tulik lutlut mwomwo lun Baibel, ridi ma inge len nukemwa? Ya Nga pre siyuk ke ngun lun God pal nukemwa?’​—Luk 11:13.

6. In kasre kut in sruokye fwinsrak lasr in kalem, mea kut enenu in taran ka?

⁶ Jisus, Me Srikasrak Mwo lasr, el eis ku lal ke Kas lun God. Ke kut nunku yok kel, ma inge ku in kasre kut in tia ‘totola a mulalla in ngunasr.’ (Hibru 12:3) Ke ma inge kut ku in fwak la fwisrak lasr su God el ase nu sesr fwin tila kalem ku munasla ke nunak a insiesr ku fwin nunak lasr el akkolukyeyukla ke ma puspus saye​—saap ke ma puspus lun fwalu ku ke akwuk lun orekma puspus—​tia pat kut ku in pulakin mu kut ke motul ku lungse in tui in oru orekma in kulansap nu sin God, su ke saflaiye ku in oru kut in tula liki ku lasr a pulaik lasr in moulkin oiyen moul nasnas. Fwin kut akkalemye ella oinge, kut ku in pulakin “kunausla lalalfongi [lasr] oana soko oak musalla.” (1 Timote 1:19) Nu ke luma saye, fwinsrak paye el ku in akkeye lulalfongi lasr.

Fwinsrak—Yok Sripe nu ke Lulalfongi

7. Ke inkanek fuka fwinsrak el yok sripe nu ke lulalfongi?

⁷ “Inge, lalalfongi el me etauk lun ma su a fwinsrak ka, a me eyeinse lun ma su tia liyeyuk,” Baibel el akkalemye. (Hibru 11:1) Ke ma inge, fwinsrak el ma se su tia srik liki lulalfongi, a ma inge el sie ip yok sripe nu ke lulalfongi. Nunku kel Ebream. Fwin nunkeyuk nu ke nunak lun met, el a mutan kiyel Sera, elos matu tari a alukela tari matwe se su ku in orek tulik ke pal se Jeova el mwulela nu selos ke me usru lun sie tulik. (Genesis 17:15-17) Oiya fuka Ebream el akkalemye ka? “Fwinne fwinsrak lal [in orek tulik] alukela tari, tusruktu fwal nu ke fwinsrak in paenang el an lulalfongi, tu el fwa ku in papa tumun mutanfwal puspus.” (Rom 4:18, NW) Aok, fwinsrak se su God el akkalemye nu sel Ebream sang foundeson na mwomwo nu ke lulalfongi lal la e fwa oasr sie tulik natul su fwa isusla. Ke ma inge, lulalfongi lal sang me kasru a akkeye fwinsrak lal. Aok, Ebream a Sera elos akkalemye pa pulaik lalos in som liki loom selos a sou lalos a elos muta ke loom nuknuk ke mutanfwal saye ke lusen na moul lalos!

8. Fuka oiyen mongfusesr paye el akkeye fwinsrak?

⁸ Ebream el karungin fwinsrak lal in ku pal nukemwa ke el akos Jeova ke inkanek nukemwa, fwinne in oru ma inge arlana upa. (Genesis 22:2, 12) Ke inkanek oinge, akosten lasr a muteng lasr in oru orekma in kulansap nu sin Jeova, kut ku in lulalfongi la oasr me insemwomwo ka. “Mongfusesr” Poul el simusla, el orala “oiya su oasr me insemwomwo ka,” a oiya inge orala fwinsrak, “a fwinsrak tia me akmekin.” (Rom 5:4, 5, NW) Pa inge sripe paenang Poul el simusla: “A kut lungse tu komwos nukemwa in oaru nu ke seseslanu lun fwinsrak, aok, nu ke saflaiye.” (Hibru 6:11) Kain in nunak mwomwo inge, su fwal nu ke akwuk futoto mwo nu sin Jeova, ku in kasre kut in pulaik, a insemwomwo in muteng ke kutena ma upa su ku in sun kut.

“Engan ke Fwinsrak”

9. Mea kut ku in oru pal nukemwa in kasre kut in “engan in fwinsrak”?

⁹ Fwinsrak lasr su God el ase nu sesr el arlana mwo liki kutena ma su fwalu el ku in akkalemye. Sam 37:34 el fwak: “Tupan Jeova a liaung inkanek lal, a el a fwa akfulatye kom in usru fwalu. Ke met koluk elos mwotla, kom fwa liye.” Aok, oasr sripe mwomwo lasr in “engan in fwinsrak.” (Rom 12:12) Tusruktu, in oru oinge, kut enenu in nunku ke fwinsrak lasr pal nukemwa. Ya kom nunku pal nukemwa ke fwinsrak su God el use? Ya kom ku in lume komla sifwana ke kom muta in Paredais, kom arlana insemwomwo ke mano fukoko su oasr yurum, wanginla me fosrnga, met puspus su kom lungse in muta wi kom, a kom wi oru orekma su oasr sripe na paye? Ya kom muta nunku ke petsa a luma puspus ke paredais su akkalemyeyuk ke me rid nukemwa natusr? Kain in orekma inge in sifwilpa nunku pal nukemwa ke fwinsrak mwomwo oinge ku in pupulyukkinyuk nu ke orekma in aknasnasye glass ke sie windo su sie met el ku in ngetla liye ke luma lun sie an kato. Kut fwin mulkunla in aknasnasye glass ke windo, tia pat oasr kutkut su fwa sremla ka a ma inge fwa kosrala kut in tia ku in liye an kato se inge. Oasr ma puspus saye su ku in sruokye nunak lasr. Lela kut in tia fulela ma inge in sikyak!

10. Efu ku orekma lasr in ngetak nu ke me insemwomwo el arlana akkalemye futoto lasr nu sin Jeova?

¹⁰ Aok, sripe se su yok emeet lasr in kulansapu Jeova pa lungse lasr nu sel. (Mark 12:30) Tusruktu, kut enenu in ngetak akmwoye nu ke me insemwomwo lun me moul. Paye la, Jeova el tupan kut in oru ma inge! Hibru 11:6 el akkalemye, “A fwin wangin lalalfongi met elos koflanu akinsemwomwoye God, tu el su tuku nu yurin God el fwa lalalfongi tu El God, a tu el met sang moul nu selos su sokol.” Efu ku Jeova el lungse kut in liyel oana Met Sang moul? Meyen kut fwin oru, kut akkalemye la kut arlana etu Papa tumasr in kosrao. El kulang, a el lungse tulik nukemwa natul. Nunku ke lupan asor lasr a kut arlana fusrasr in akmunasyeyukla fwin wangin “akwuk nu ke pal fwasru a wikin sie fwinsrak paye” lasr.​—Jeremaia 29:11, NW.

11. Fuka fwinsrak su God el sang nu sel Moses kasrel in oru sulela mwomwo?

¹¹ Sie me srikasrak mwo emeet ke sie met su nunku yok ke oiyen fwinsrak su tuku sin God pa Moses. In oana ke el sie “mwen nutin an natul Fero,” Moses el oasr ku, mwal mwomwo, a oasr pa me kasrup lun an Ijipt su el ku in orekmakin. Ya el lungse in tafwela in suk a orekmakin ma puspus inge, ku el kulansapu Jeova? Moses el akkalemye pulaik in oru sulela lal in kulansap nu sin God. Efu? Meyen el “nunku yok ke mol lun ma lane.” (Hibru 11:24-26) Aok, Moses el tia akkalemye la wangin insemwomwo lal nu ke fwinsrak su Jeova el filiye ye mutal.

12. Efu ku fwinsrak lun met Kristian el pupulyukkinyuk nu ke sie helmet ku me susu?

¹² Met sap Poul el pupulyukkin fwinsrak nu ke sie helmet ku me susu. Me susu lasr inge ku in karungin ku lun nunak lasr, kasre kut in oru sulela mwomwo, in oakiye ma yok sripe emeet ke moul, a in sruokye oiyen oaru a paye lasr. (1 Tessalonika 5:8) Ya kom orekmakin helmet ku me susu lom pal nukemwa? Fwin aok, in oana Moses a Poul, kom fwa oakiye me fwinsrak lom, “tia nu fwin ma ekyek oana me kasrup, a in God, su ase yok nu sesr ma nukemwa tu kut in engan ka.” Paye la, oiyen pulaik eneneyuk in tia eis a tia orekmakin inkanek pengpeng puspus ke kom kafweang in tia suk in oru orekma nukemwa in akinsemwomwoye kom sifwana, tusruktu arlana mwo a yok sripe in lain kain in inkanek inge! Ke ma inge, efu ku in eis kutena ma sayen “moul paye,” su akoeyukla nu sin met nukemwa su tupan a lungse Jeova?​—1 Timote 6:17, 19.

“Nga Tiana Som Liki Kom”

13. Mwulela fuka Jeova el akkalemye nu sin met kulansap oaru lal?

¹³ Met nukemwa su filiye fwinsrak lalos nu ke akwuk puspus lun fwalu ke pal inge enenu in nunku yok ke ma upa puspus su ku in sikyak nu selos, ke sripen oasr “me asor”, [me keok, NW], su yokyokelik fwin fwalu. (Mattu 24:8) Tusruktu nu selos su tupan a fwinsrak in Jeova wangin kain in nunak in sangeng inge yurulos. Elos fwa tafwela in “muta mwo, a fwa misla liki sangeng ke ma koluk.” (Soakas 1:33) Meyen fwinsrak lalos tia fungfung nu ke akwuk lun pal inge, elos insemwomwo in porongo kas in kai lal Poul: “Komwos in tia lungse mani, komwos in insemwomwo ke ma su on yurumwos. Tu El sifwana fwak: ‘Nga tiana filikomla, a Nga tiana som liki kom.’”​—Hibru 13:5.

14. Efu ku met Kristian elos tia enenu in nunku yok ke ma enenu lalos nu ke moul?

¹⁴ Wangin alolo ka la kas in mwulela mwomwo inge el akkalemye la God el fwa karungin kut. Jisus el mwulela pa nu sesr ke karungin mwomwo lun God, el fwak: “A komwos suk meet togusrai lal, a ma inge nukemwa [ma enenu lun moul] fwa etukot pa nu sumwos. Ke ma inge, nik komwos nununkala ke lutu, tu lutu fwa nunkala ke ma la.” (Mattu 6:33, 34) Jeova el etu la upa nu sesr in oru orekma nu ke Togusrai lal ke inkanek moniyuk a ke pal sepana inge oru orekma in suk ma enenu nukemwa lasr nu ke moul. Ke ma inge lela kut in filiye lulalfongi yok nu ke ku lal a lungse lal in karungin ma enenu lasr.​—Mattu 6:25-32; 11:28-30.

15. Fuka met Kristian elos sruokye sie ‘muta mwo’ pal nukemwa?

¹⁵ Kut akkalemye la kut lulalfongi Jeova fwin kut sruokye ‘muta mwo.’ (Mattu 6:22, 23) Sie muta mwo el paye, nasnas in nunak, a wangin oiyen rapku a nunak in suk ma lal sifwana. In oasr muta mwo tia kalme pa sie met el moulkin moul su arlana sekasrup ku kut tia oru kunokon lasr in karungin ma enenu lasr sifwana. A, kalmen ma inge pa in akkalemye “nunak mwo” ke kut oru orekma in kulansap nu sin Jeova pa ma se emeet ke moul lasr.​—2 Timote 1:7.

16. Efu ku lulalfongi a pulaik eneneyuk nu ke sie muta mwo?

¹⁶ In sruokye pal nukemwa sie muta mwo enenu in oasr lulalfongi a pulaik. Ke sie me pupulyuk, fwin met kol lom ke orekma el sapkin nu sum in oru orekma ke pal nukemwa fwinne ke pal se su oasr meeting lun met Kristian, ya kom fwa pulaik in oru meet akwuk yok sripe nukemwa lom oana met Kristian? Fwin oasr nunak in alolo lun sie met la Jeova el fwa akpayeye mwulela Lal in karungin met kulansap nukemwa Lal, fwin oinge Setan el fwa tafwela na in oru ma upa nu sin met inge a saap met se inge el fwa tui in wi ke meeting nukemwa. Aok, fwin srikla lulalfongi lasr ma inge ku in paenang Setan el an ku in sruokkuti a pa inge sripe la Setan, a tia Jeova, pa oakiye ma yok sripe ke moul lasr. Sie me asor yok na paye pa inge!​—2 Korint 13:5.

“Fwinsrak in Jeova”

17. Fuka met nukemwa su lulalfongi nu sin Jeova akinsemwomwoyeyuk fwinne ke pal inge?

¹⁷ Ma simusla el akkalemye ke pal puspus la nu selos nukemwa su tupan a fwinsrak in Jeova elos tia kuf ku sun me asor. (Soakas 3:5, 6; Jeremaia 17:7) Paye la, oasr pal elos enenu in akfwalye ma srisrik su oasr yurulos, tusruktu elos nunku pa ke ma inge oana me kise srisrik fwin srikeyuk nu ke me insemwomwo puspus su akoeyukla nu selos. Ke ma inge elos akkalemye la elos “fwinsrak in Jeova” a elos lulalfongi la ke saflaiye el fwa sang nu sin met kulansap oaru nukemwa lal ma lungse lun insielos. (Sam 37:4, 34) Ke sripe inge, elos arlana insemwomwo fwinne ke pal inge. “Fwinsrak lun met sumwosmwos a fwa me insemwomwo; a tawi lun met koluk a fwa wanginla.”​—Soakas 10:28.

18, 19. (a) Mwulela mwomwo fuka Jeova el ase nu sesr? (b) Fuka kut ku in sruokye Jeova ke “lepaosr leyut” pal nukemwa?

¹⁸ Ke pal se oasr tulik mokul se su fwasr wi papa tumal a sruokye poun sie sin sie, el pulakin misla a tia sangeng. Kut pulakin pa misla a tia sangeng ke kut fwasr wi Papa tumasr in kosrao. “Nik kom sangeng,” Jeova el fwak nu sin met Israel, “tu Nga wi kom. . . . Aok, Nga fwa kasre kom. . . . Tu Nga, Jeova God lom, fwa sruokye lepoum leyot a fwak nu sum, ‘Nikmet sangeng. Nga fwa kasre kom.’”​—Isaia 41:10, 13.

¹⁹ Sie me pupulyuk na mwomwo su akkalemye la Jeova el sruokye poun sie met! “Nga filiye Jeova ye mutuk pal e nu kemwa,” Devid el simusla. “Meyen El muta lepo leyut sik, nga fwa tia mukuikui.” (Sam 16:8) Fuka kut ku in sruokye Jeova ke “lepaosr leyut” pal nukemwa? Kut oru ma inge ke inkanek luo. Ma se meet, kut lela Kas lal in kol kut ke oiya nukemwa ke moul lasr; a ma se akluo pa, kut in ngetla ku loang akmwoye nu ke ma lane mwolana su Jeova God el filiye ye mutasr. Asap sie met sim lun sam el akkalemye kas inge ke on lal: “Nga wi kom pal e nu kemwa; kom srukye lepouk leyut. Kom fwa kol yu ke papu Lom, a tok eis yu nu in mwolanu.” (Sam 73:23, 24) Ke kas in mwulela inge, kut ku in ngetla nu ke pal fwasru wi lulalfongi.

“Molela Lom Apkurun Me”

20, 21. Pal fwasru fuka akoeyukla nu sin met nukemwa su fwinsrak in Jeova?

²⁰ Ke kais sie len somla, arlana eneneyuk nu sesr in sruokye Jeova pal nukemwa ke lepo leyut lasr. Tia pat, mutamwauk ke pal in kunanela lun alu kikap, fwal lal Setan fwa sun ongoiye lulap su tia liyeyuk ke mutamweyen fwalu nu inge. (Mattu 24:21) Oasr sangeng su fwa pulakinyuk sin met nukemwa su wangin lulalfongi yuru. Tusruktu, ke pal se inge su oasr ma upa a me keok puspus, met kulansap nukemwa lun Jeova su pulaik elos fwa insemwomwo ke fwinsrak lalos! “A ke ma inge mutamwauk in sikyuk,” Jisus el fwak, “komwos in ngetak, a keyuk sifwomwos; tu molela lomwos apkuran.”​—Luk 21:28.

²¹ Ke ma inge lela kut in insemwomwokin fwinsrak lasr su God el ase nu sesr a tia lela Setan el an kiapekutla ku srifekutla ke inkanek in me kutasrik lal. Ke pal senpana, lela kut in kafweang yok in akyokye a akkeye lulalfongi, lungse, a sangeng lasr nu sin God. In oru oinge, e fwa oasr yurosr oiyen pulaik in akos Jeova ye oiya nukemwa a in lain Devil. (Jemes 4:7, 8) Aok, “komwos in ku, a lela insiomwos in pulaikna, komwos nu kemwa su fwinsrak in Jeova.”​—Sam 31:24.

[Footnote]

Ya Kom Ku In Topuk?

• Ke inkanek fuka fwinsrak lal Jisus sang me kasru in akpulaikyel?

• Fuka lulalfongi a fwinsrak kupasr nu sin sie sin sie?

• Fuka me fwinsrak wekunang lulalfongi oru sie met Kristian in pulaik in oakiye ma yok sripe emeet ke moul?

• Efu ku elos nukemwa su “fwinsrak in Jeova” ngetla nu ke pal fwasru wi lulalfongi?

[Petsa ke sra 20]

Fwinne kom met fwusr ku met matu, ya kom liye kom sifwana in Paredais?