Kom in Akos a Akkalemye Pulaik Oana Jisus el Oru

“Komwos in pulaik! Nga kutangla tari fwalu.”​—JON 16:33.

1. Fuka Jisus el akkalemye akosten lal nu sin God?

JISUS KRAIST el oru ma lungse lun God pal nukewa. Pal nukewa el tia nunku in seakos Papa tumal su oasr in kosrao. (Jon 4:34; Hibru 7:26) Tusruktu ke ma upa puspus sikyak nu sel fwin fwalu oru in tia fusrasr nu sel in akos. Mutawauk ke pal se Jisus el oru orekma lal in luti peng mwo, met lokwalok lal, welulang Setan, elos srike in kufusulla, ku kiapella Jisus in fuleak oiyen oaru lal. (Mattu 4:1-11; Luk 20:20-25) Met lokwalok nukewa inge elos oru Jisus elan pulakin ngal a keok ke nunak a oayapa nu ke manol. Ke saflaiye, elos unilye Jisus fwin sak soko. (Mattu 26:37, 38; Luk 22:44; Jon 19:1, 17, 18) Ke ma upa a me keok nukewa su sikyak nu sel Jisus, el srakna “akos nu ke mise.”​—Ridi Filippai 2:8.

2, 3. Mea kut ku in lotela kel Jisus su akos fwinne el sun me keok puspus?

² Ma sikyak nu sel Jisus ke pal se el oasr fwin fwalu kasrel in kalem ka la mea kalmen akosten ke me keok nukewa su soenna sikyak ke moul lal in pal somla. (Hibru 5:8) Saap kut ku in nunku mu wangin oiya saye su Jisus el enenu in lotela ke orekma in kulansap lal nu sin Jeova. Ke sripen el engankin tari asrouki mwomwo lal yurin Jeova ke lusen pal loeloes a el orekma yurin God oana sie “met orekma usrnguk” ke pal in orala ma nukewa. (Soakas 8:30) Tusruktu, ke sripen el muteng ke lulalfongi lal oana sie met fwinne el sun me keok upa paenang ma inge sang me akpayeye ke oiyen oaru lal. Jisus, Mwen nutin God, el akkeye ke inkanek yok fototo lal nu sin God. Mea kut ku in lotela ke ma sikyak ke moul lal?

³ Fwinne el sie met sumwosmwos, Jisus el tia srike in akpayeye akosten lal ke ku lal sifwana. El pre siyuk ke kasru sin God pal nukewa in sruokye akosten lal. (Ridi Hibru 5:7.) Kut enenu pa in inse pusisel, pre a siyuk ke kasru sin God, tu kut in ku in akos pal nukewa. Ke sripe se inge, met sap Poul el sang kas in kasru nu sin met Kristian nukewa: “Nunak se inge in on in komwos, su ouyepa on in Kraist Jisus,” su “sifwana akpusiselyel, a el akos nu ke mise.” (Filippai 2:5-8) Inkanek mwo ke moul lun Jisus el sang me akpayeye la metu elos ku in akos fwinne elos oasr inmasrlon met koluk puspus. Aok, Jisus el met sumwosmwos, tusruktu a mea nu sin met sesumwos oana kut?

Kut Ku in Akos Fwinne Kut Sesumwos

4. Mea oiyen sukosok su oasr yurosr in oru sulela el kalmekin nu sesr?

⁴ God el oralla Adam a If oana ma orekla mwo a lalmetmet a oasr sukosok lalos in oru sulela lalos sifwana. In oana elos, oasr pa oiyen sukosok lasr in oru sulela lasr sifwana. Mea kalmen ma inge? Kalmen ma inge pa kut ku in oru sulela lasr in oru ma mwo ku ma koluk. Ke kas saye, God el ase nu sesr sukosok in oru sulela lasr in aksol ku in tia aksol. Lela kut in esam la fwinne oasr sukosok lasr in oru sulela tusruktu kut fwa eis nununku ke sulela nukewa su kut oru. Aok, sulela nukewa lasr el ku in kalmekin moul ku mise nu sesr. Ma inge ku in sang pa kasru nu sin met nukewa su wi kut, ku ku in akkolukyelos.

5. Ma upa fuka kut nukewa sun, a fuka kut ku in kutangla ma inge?

⁵ Ke sripen kut usrui oiyen sesumwos, paenang tia fusrasr nu sesr in akkalemye akosten lasr. Tia fusrasr in akos masap lun God ke pal puspus. Poul el kaifwe yok in akkalemye akosten lal. El simusla kas inge: “A nga liye siena lo in laak, su meuni nu ke lo lun nunkuk, a nga sruo ka ye masap lun ma koluk su on in laak.” (Rom 7:23) Aok fusrasr in akos fwin tia enenu in kisekin kutena ma, fwin wangin me keok, ku tia akkemkatuye sie met. Mea kut e fwa oru kut fwin lungse in akos tusruktu kut pula pa la oasr me akkoluk su tuku ke “lung koluk lun ikwe a lung koluk lun muta”? Kut pulakin kena koluk inge ke sripen kut sesumwos a ke sripen me akkoluk su tuku ke “ngun lun fwalu” su oasr yen nukewa, a kena koluk arlana fokoko. (1 Jon 2:16; 1 Korint 2:12) In lain ma inge, kut enenu in ‘akola insiesr’ meet liki kut sun sie me srufwe a kut in oru sulela lasr la kut fwa akos Jeova ke kutena ma upa su sikyak. (Sam 78:8) Oasr me srikasrak lun met puspus su akkalemyeyuk in Baibel ke elos akos pal nukewa meyen elos akola tari insielos.​—Ezra 7:10; Daniel 1:8.

6, 7. Sang me pupulyuk la fuka lutlut lasr sifwana ke Baibel ku in kasre kut in oru sulela mwomwo.

⁶ Sie inkanek su kut ku in akola insiesr pa ke inkanek in lutlutkin ma Simusla a me rid nukewa su tuku in Baibel. Srike nunku ke kutu oiya su sikyak nu sum. Ke fong se su kom oru lutlut lom sifwana, kom tufwana pre ke ngun mutal lun Jeova in kasre kom in orekmakin ma kom lotela ke Kas lal. Oasr pa akwuk lom in liye petsa mukuikui ku TV ke ekun lutu. Kom long sin met puspus mu petsa inge el arlana mwo, tusruktu kom etu pa la el akkalemye pa ke orekma fokfok a akmas.

⁷ Nunku ke kas in kasru lal Poul oasr in Efesus 5:3: “A kosro, a fokfok nu kemwa, a rapku, in tia sikme elos yurumwos, oana fwal yurin met mwo.” Kom esam pa ke kas in kai lal Poul in Filippai 4:8. (Ridi.) Ke kom nunku yok ke kas in kasru mwomwo inge, kom siyuk sum sifwana, ‘Fwin nga lungse na paye in liye petsa mukuikui inge, ya nga akos me srikasrak lun Jisus in akos God pal nukewa?’ Mea kom fwa oru? Ya kom srakna liye movie se inge?

8. Efu ku kut enenu in sruokye pal nukewa oiyen moul nasnas lasr a akwuk sumwosmwos nukewa lun God?

⁸ Sie ma tafongla yok kut fwin tia akos ke inkanek nukewa akwuk sumwosmwos lun God. Saap kut nunku mu kut arlana fokoko in lain me akkoluk su tuku ke me asrouki koluk, fwinne ma inge tuku ke petsa mukuikui su akkalemye ke akmas a orekma lun kosro. A, kut enenu in karungin kut sifwana a tulik natusr liki me akkoluk nukewa su tuku ke ngun koluk lal Setan. Met puspus su orekmakin computer elos kafweang yok in karungin ma inge in wangin kutena kain in virus ku program koluk su ku in kunausla data, a oru program nukewa in tia orekma. A computer lalos inge ku in orekmakin sin met koluk fwinne elos oasr in an loeloes ke inkanek lun internet in srike in kunausla computer lun met puspus saye. Kut fwin kafweang yok in karungin computer lasr tu met koluk elos in tia akkolukye ma inge, ke inkanek ouinge, kut enenu pa in karungin kut sifwana liki orekma “kutasrik” nukewa lal Setan.​—Efesus 6:11.

9. Efu ku kut enenu in akpayeye sulela lasr in akos Jeova len nukewa?

⁹ Apkuran len nukewa, ke kutu oiya kut enenu in oru sulela lasr kut fwin e oru ma puspus ke inkanek lun Jeova ku tia. Tu kut in eis molela, kut enenu in akos God a moulkin akwuk sumwosmwos nukewa lal. Ke kut etawi me srikasrak lun Kraist ke el akos “nu ke mise,” kut akkalemye la lulalfongi lasr paye. Jeova el fwa akinsemwomwoye kut ke sripen kut oaru. Jisus el mwulela: “El su muteng nu ke safla, el nu fwa moul.” (Mattu 24:13) Kalem la, oasr ma eneneyuk nu sesr in akkeye kain in pulaik paye, oana ke ma Jisus el akkalemye.​—Sam 31:24.

Jisus Pa Me Srikasrak Mwo Emeet ke Pulaik

10. Ma upa puspus fuka kut sun ke pal inge? A oiya fuka kut enenu in akkalemye ka?

¹⁰ Yen nukewa fwalu oasr met puspus su akkalemye oiya a ella koluk, a pa inge ma paenang kut enenu in pulaik in lain orekma lalos su akkolukye kut. Met Kristian elos sun me akkoluk a ma upa su tuku ke moul koluk, ma upa ke mani, a me lain lun alu puspus su ku in oralos in fwasr liki inkanek sumwosmwos lun Jeova. Oasr met Kristian puspus su sun me lain upa lun sou lalos. In kutu an, loom lutlut puspus akkeye yok me luti lun evolution, a yokyokelik pisen met su lulalfongi mu wangin God. Kut tia muta na ke wangin kutena ma kut oru in lain me akkoluk nukewa inge. A kut enenu in orekmakin inkanek mwo puspus in lain ma inge nukewa a in karungin kut ka. Me srikasrak lun Jisus akkalemye nu sesr la fuka kut ku in eis kutangla ka.

11. Fuka orekma lasr in nunku yok ke me srikasrak lun Jisus el ku in oru kut in pulaik na paye?

¹¹ Jisus el fwak nu sin met tuma lutlut lal: “Fwin fwalu komwos fwa ongoiye, tusruktu komwos in pulaik na! Nga kutangla fwalu tari.” (Jon 16:33, NW) El lain pal nukewa me akkoluk lun fwalu. El tia lela fwalu in tulokinilye in akpayeye orekma lal in luti peng mwo ku in oru lan tia oaru in akos akwuk sumwosmwos ke alu paye a ke oiya mwo a fwal. Kut enenu pa in etawi me srikasrak lal inge. Ke el pre, el fwakak kas inge ke met tuma lutlut lal: “Elos tia ma lun fwalu, aok oanu Nga tia ma lun fwalu.” (Jon 17:16) Orekma lasr in lutlutkin me srikasrak lun Kraist ke oiyen pulaik a nunku yok ke ma inge ku in kasre kut in akkalemye pa pulaik tu kut in tia pa ma lun fwalu.

Lutlut Kel Jisus ke Pulaik

12-14. Sang me pupulyuk ke orekma lun Jisus in akkalemye pulaik.

¹² Jisus el akkalemye oiyen pulaik ke lusen pal su el oru orekma in luti lal. El su Mwen nutin God, el orekmakin ku lal, el tia sangeng ke el “ilyuk nu in tempel lun God, a siselosla nu kemwa su kuka a moli in tempel, a topkakunla tebu lun met su kukakunla mwuleoa.” (Mattu 21:12) Ke pal se met meun elos tuku in sruokilye Jisus ke fong se safla lal fwin fwalu, el pulaik in loangela met tuma lutlut lal, a el fwak: “Komwos fwin suk yu, lela elos inge in som inkanek lalos.” (Jon 18:8) Tok kutu, el fwak nu sel Piter elan filiye kutlas natul in ma nukumye. Ke ma inge Jisus el akkalemye la el lulalfongi yok nu sin Jeova, a tia ke kutena kofwen me meun fwin fwalu.​—Jon 18:11.

¹³ Jisus el akkalemye pulaik la ke pal se el fwakak ke met luti puspus in len lal su tia kulang a ke me luti kikiap lalos. “A we nu sumwos, met sim a met Farisi, mwosounkas! tu komwos kaliye togusrai in kosrao liki metu,” Jisus el fwak nu selos. “Komwos . . . tia oru ma yok in Masap, nununku sumwos, a pakoten, a lulalfongi. . . . Tu komwos aknasnasye likin kup a pulet, a seselanu an lu ke ma pusr a ma koluk.” (Mattu 23:13, 23, 25) Met tuma lutlut nukewa lun Jisus elos enenu pa pulaik inge meyen met kol puspus ke alu kikiap elos fwa kalyaelos a uniye kutu selos.​—Mattu 23:34; 24:9.

¹⁴ Jisus el akkalemye pa pulaik lal nu sin dimon puspus. Ke sie pal, oasr sie met su oasr ngun fokfok yurol a arlana fokoko wangin kutena met ku in kaprilye ke sie chain sonol Jisus. El tia sangeng, a Jisus el fulela dimon puspus liki met se inge. (Mark 5:1-13) Ke pal inge, God el tia sang ku nu sin met Kristian in orala mwenmwen puspus oana Jisus el oru. Ne ouinge, ke orekma lasr in luti peng mwo, kut enenu pa in lainul Setan, su “akkunye nunak lun met selulalfongi.” (2 Korint 4:4) In oana ke ma Jisus el oru, kofwen me meun lasr el “tia ma lun ikwe, a ku ye mutun God nu ke sukela lun an ku” su kalmekin nu ke me luti kikiap su orekmakin yok sin alu puspus. (2 Korint 10:4) Kafweang lasr in orekmakin kofwen me meun inge, ku in kasre kut in lotela ke me srikasrak lun Jisus.

15. Pulaik lal Jisus el fwal nu ke mea?

¹⁵ Pulaik lun Jisus tuku ke lulalfongi lal, a tia ke oiyen pulaik lal sifwana. Oiyen pulaik lasr el oapana. (Mark 4:40) Fuka kut ku in eis lulalfongi paye? Me srikasrak lun Jisus el ku in kasre kut in eis lulalfongi paye. El akkalemye ke etauk yok lal ke ma Simusla a ke lulalfongi yok lal ka. In oana ke kofwen me meun, Jisus el orekmakin, tia sie kutlas paye, tusruktu el orekmakin Kas lun God su kutlas in ngun. Ke pal puspus el akpayeye me luti lal la el fwal nu ke ma Simusla. Ke pal puspus el fwak: “Ma simusla,” in akkalemye la ma el luti oasr ke Kas lun God.a

16. Fuka kut ku in eis lulalfongi yok?

¹⁶ In akkeye lulalfongi su ku in tu ku ke me srufwe puspus su sikyak ke sripen kut kulansap nu sin God, kut enenu in rid a lutlutkin Baibel len nukewa. A kut enenu pa in wi ke meeting nukewa lun congregation, a in filiye ke nunak lasr ma paye nukewa su oana pelung lun lulalfongi. (Rom 10:17) Kut enenu pa in sifwilpa nunku yok ke ma kut lotela tari, a oru ma inge in sun insiesr. Lulalfongi su moul mukena ku in oru kut in pulaik. (Jemes 2:17) A kut enenu in pre siyuk ke ngun mutal meyen lulalfongi el fwako lun ngun.​—Galetia 5:22.

17, 18. Fuka sie mutan Kristian fwusr el akkalemye pulaik lal ke loom lutlut?

¹⁷ Oasr sie met Kristian fwusr su pangpang Kitty el pulakin la lulalfongi paye ku in akpulaikyel. Ke el tulik srisrik me, el etu la el tia enenu in “mwekin ke mwosasu” ke el oasr ke loom lutlut. A el lungse na paye in sang ma lo mwomwo nu sin tulik lutlut wiyel. (Rom 1:16) Yea nukewa, el kafweang yok in sramsram nu sin tulik lutlut puspus ke peng mwo, tusruktu el tia oru ke sripen wangin pulaik yurol. Ke pal se el matula kutu, el wi ke loom lutlut saye. El fwak, “Ke pal inge, nga fwa akpayeye ma nga tia ku in oru in pal somla.” Kitty el pre ke pulaik oana ke oiya su Kraist el akkalemye, a ke lalmetmet, a ke pal mwomwo su el ku in oru sulela lal.

¹⁸ Ke len se meet ke loom lutlut, met luti el sapkin tulik lutlut nukewa elos akkalemyelos sifwana nu sin class lalos. Oasr tulik lutlut puspus elos akkalemye pa ke alu su elos wi ka, a elos fwak pa la elos tia wi pal nukewa ke alu lalos. Kitty el etu a akilen la pa inge pal mwomwo su el siyuk ke pre lal. Ke pal in sramsram lal tuku, el fwak ouinge, “Nga sie sin Met Lo lun Jeova, a Baibel el kasre yu ke orekma luk in alu nu sin God a in akmwoye oiya mwomwo luk.” Ke el oru sramsram lal, kutu sin tulik lutlut elos nunku mu lulalfongi lal tia mwo. Tusruktu tulik lutlut puspus saye elos loang akmwoye a tok elos siyuk kusensiyuk puspus. Met luti lal el orekmakunul Kitty oana sie me srikasrak mwomwo ke oiyen pulaik in sang me top mwomwo nu ke kusensiyuk nukewa ke lulalfongi lal. Kitty el arlana engan meyen el lotela ke me srikasrak lun Jisus ke pulaik.

Akkalemye Lulalfongi a Pulaik Oana Ma Kraist el Akkalemye

19. (a) Mea eneneyuk nu ke lulalfongi paye? (b) Fuka kut ku in akinsemwomwoye Jeova?

¹⁹ Met sap nukewa elos akilen pa la pulaik lalos el tuku ke lulalfongi paye. Ke sripe se inge elos siyuk sin Jisus: “Akyokye lulalfongi lasr.” (Ridi Luk 17:5, 6.) Lulalfongi paye el yok liki lulalfongi mu oasr God. Oasr ma eneneyuk in akkeye sie fototo mwomwo nu sin Jeova, su oana fototo lun sie tulik srisrik nu sin papa tumal su kulang a mwo. Ke kasru lun ngun lun God, Solomon el simusla: “Mwen nutik, insiom fwin lalmetmet, insiuk fwa engun, aok, insiuk. Aok, insiuk fwa engun, ke ngoasrom fwak ma sumwos.” (Soakas 23:15, 16) Ke inkanek ouinge, oiyen pulaik lasr in orekmakin akwuk mwomwo a sumwos ku in akinsemwomwoye Jeova, a ke sripen kut etu la el engan ka paenang ma inge akyokye pulaik lasr. Ke ma inge, lela kut in etawi pal nukewa me srikasrak lun Jisus, in tu na ku in akkalemye pulaik in oru ma sumwosmwos!

[Footnote]

Ya Kom Ku In Akuteye?

• Mea fwa kasre kut in akosten pal nukewa fwinne kut met sesumwos?

• Lulalfongi paye el fwal nu ke mea? A fuka ma inge ku in kasre kut in pulaik?

• Mea fwako mwo lun akosten lasr pal nukewa a kut fwin akkalemye pulaik oana ke Kraist el oru?

[Picture on page 15]

Ya kom ‘akola insiom’ in lain me srufwe nukewa?

[Picture on page 17]

Oana Jisus, kut ku in akkalemye pulaik fwal nu ke lulalfongi