Pulaik Nu Ke Kasru Lun Lulalfongi A Sangeng Sin God

“Kom in ku a pulaiknu . . . Jeova God lom el wi kom.”​—JOSUA 1:9.

1, 2. (a) Ke nunak lun met sifwana, ya oasr fwinsrak lun met Israel in eis kutangla sin met Kenan? (b) Josua el eis kas in akkeye fuka?

IN YEA 1473 B.C.E., mutanfwal lun Israel elos akola in ilyuk nu in Fwal Mwulela. Ke sripen oasr ma upa puspus su fwa sikyak, Moses el akesmakinye met nukemwa inge: “Kom fwa fwasr alukela Jordan misenge, in utyuk a sisla mutanfwal su yok a ku liki kom, siti ku su oasr pot fulat nu lung we, met lulap a fulat, mwen nutin met Enak, su kom . . . long kalos, ‘Su fwa ku in tu ye mutun mwen nutin met Enak?’” (Duteronomi 9:1, 2) Aok, met meun yok a fulat nukemwa inge elos arlana eteyuk! Sayen ma inge, kutu sin un met meun in an Kenan inge oasr kofwen me meun mwomwo lalos, oasr ors puspus a sariot su oasr mwusra ka oana mitmit kosra su oasr ke wil in sariot inge.​—Met Nununku 4:13.

² Ke luma saye, met Israel elos met sruo ke lusen yea puspus a elos tufwana orekmakin yea 40 yen mesis. Ke ma inge, in oana ke nunak lun metu, arlana srikla pal mwomwo lalos in eis kutangla ke meun su ku in sikyak. Tusruktu, oasr lulalfongi lal Moses; el ku in ‘liye’ Jeova el kololos. (Hibru 11:27) “Jeova God lom el fwasr alukela ye mutom,” Moses el fwak nu sin metu. “El a fwa kunauselosla, a el a fwa akpusiselyelos ye mutom.” (Duteronomi 9:3; Sam 33:16, 17) Tokin Moses el mise, Jeova el akkeyel Josua El lan kasrel, a el fwak: “Tukakek inge a alukela Jordan se inge, kom, a met inge nu kemwa, nu ke fwal se su Nga sang nu selos, aok nu sin tulik natul Israel. Wangin sie met fwa ku in tu ye mutom in len in moul lom nu kemwa. Oana Nga oelul Moses, oinge Nga fwa wi kom.”​—Josua 1:2, 5.

3. Mea kasrel Josua in oasr lulalfongi a pulaik?

³ In eis me kasru a me kolyuk lun Jeova, Josua el enenu in rid a nunku yok ke Masap lun God a orekmakin ma inge ke moul lal. “Na kom fwa oru inkanek lom in kapkapak, a na kom fwa akinsemwomwoyeyuk [kom fwa lalmetmet in oru orekma lom, NW],” Jeova el fwak. “Ya Nga tia sapkin nu sum? Kom in ku a pulaiknu. Nikmet sangeng a nik kom fosrnga, tu Jeova God lom el wi kom yen nu kemwa kom fwasr nu we.” (Josua 1:8, 9) Ke sripen Josua el porongo a akos God, paenang el ku in akkalemye la el pulaik, ku, a eis me insemwomwo. Tusruktu, pus sin met su oana matwel in len lal elos tia long. Ke ma inge, elos tia eis kutangla a me insemwomwo, a elos mise yen mesis.

Sie Un Met Su Wangin Pulaik Yuru

4, 5. (a) Fuka oiya su akkalemyeyuk sin met kalngeyuk sengoul su tia oana sie nu ke oiya lal Josua a Keleb? (b) Oiya fuka Jeova el akkalemye nu ke oiya lun metu su wangin lulalfongi yuru?

⁴ Yea angngoul somla ke pal se met Israel elos sun an Kenan ke pal se meet, Moses el supwela met 12 in oru kalngeyuk lalos nu ke anu. Met sengoul elos folokla sangeng. “Met e nu kemwa kut liye we elos met na lulap,” elos fwak. “A ingo kut liye met Nefilim, mwen natul Enak, su tuku ke met Nefilim; a kut oana kwot ye mutasr sifwana.” Ya “met nukemwa”​—tia met Enak mukena—​elos met yok a fulat? Mo. Ya met Enak elos tulik nutin met Nefilim su moul meet liki Sronot? Mo tia onge! Ne oinge, ke sripen kas tia paye inge nukemwa, paenang met puspus ke u se inge elos pulakin sangeng. Metu elos lungse pa in folokla nu in an Ijipt, an se su elos muta we oana met sruo!​—Oekyuk 13:31–14:4.

⁵ Tusruktu, luo sin met kalngeyuk inge, Josua a Keleb, elos arlana lungse in ilyuk nu ke Fwal Mwulela inge. Met Kenan “elos munas,” elos fwak. “Tu me loeyuk lalos som lukelos, a Jeova el muta yurosr. Nik komwos sangeng selos.” (Oekyuk 14:9) Ya Josua a Keleb elos fwak ma mwomwo inge fwinne tia paye? Mo, tia oinge! Elos, a wekunang met nukemwa ke mutanfwal se inge, elos liye tari orekma lun Jeova in akmwekinye an Ijipt su arlana ku a god puspus lun an se inge ke inkanek lun Me Keok Sengoul. Tokin ma inge elos liye orekma lun Jeova in oru Fero a met meun nukemwa lal in walomla ke Mwea Srusra. (Sam 136:15) Kalem la, sangeng su akkalemyeyuk sin met kalngeyuk sengoul a lun met nukemwa su elos akkolukyeyukla ka tia mwo fwal in eis me kai upa. “Putaka elos fwa tia lalalfongi Yu, ke me akul nu kemwa su Nga orala in masrlolos?” Jeova el fwak, ke el akkalemye pulakinyen toasr lal.​—Oekyuk 14:11.

6. Ke inkanek fuka oiyen pulaik el kupasr nu ke lulalfongi, a fuka ma inge liyeyuk ke pal inge?

⁶ Jeova el akkalemye sripe yok se emeet ke ma upa inge​—oiyen sangeng lun metu akkalemye la wangin lulalfongi lalos. Aok, lulalfongi a oiyen pulaik kupasr nu sin sie sin sie, aok arlana fokoko kupasr lalos nu sin sie sin sie paenang met sap Jon el ku in simusla ke congregation lun met Kristian a ke meun in ngun su enenu in orek: “Pa inge kutangla se su kutangla fwalu, lulalfongi lasr.” (1 Jon 5:4) Misenge, lulalfongi su oana lulalfongi lal Josua a Keleb su akkalemyeyuk sin Met Lo lun Jeova su pus liki million onkosr, met fwusr a met matu, met ku a met munas, oralos in akpayeye orekma in luti peng mwo lun Togusrai fwin fwalu nufon. Wangin kutena met lokwalok ku in tulokinye a akmunasyela orekma lun un met meun inge su pulaik, a ku.​—Rom 8:31.

Nik Komwos Fuleak a “Tapulla”

7. Mea kalmen in “tapulla”?

⁷ Met kulansap nukemwa lun Jeova ke pal inge elos pulaik in sulkakin peng mwo meyen oasr yurolos nunak se su met sap Poul el akkalemye, su el simusla: “A kut tia sie selos su tapulla nu ke kunausla, a kut sie selos su lalalfongi nu ke molela lun ngun.” (Hibru 10:39) In fuleak a “tapulla” oana Poul el akkalemye, tia kalmekin nu ke pulakinyen sangeng ke kitin pal, meyen met kulansap oaru puspus nu sin God oasr pal elos pulakin pa sangeng. (1 Samuel 21:12; 1 Togusra 19:1-4) Tusruktu, kalmeyen ma inge pa “in tui ke orekma, tari,” in “tia oru in sruokye ma paye,” sie dictionary lun Baibel el akuteye. El akkalemye pa la “tapulla” el ku in orekmakinyuk nu ke sie me akul ku pupulyuk su tuku ke “kukinye kutu nes lun oaku a oru ma inge in semuila ke kasrusr lal” su orekmakinyuk in oana ke oiyen alsrangesr in oru orekma in kulansap nu sin God. Aok, nu selos su oasr lulalfongi fukoko lalos elos tia nunku in “oru orekma in semuila ku patla” ke pal se su oasr ma upa sikyak​—fwinne ma upa inge pa me kalyai, mas upa, ku kutu pa me srife. A, elos tafwela na in kulansap nu sin Jeova, meyen elos etu la el karunginelos na paye a el etu me munas lalos ku ma su elos tia ku in oru. (Sam 55:22; 103:14) Ya oasr yurum kain in lulalfongi oinge?

8, 9. (a) Fuka Jeova el akkeye lulalfongi lun met Kristian in pal meeta? (b) Mea kut ku in oru in akkeye lulalfongi lasr?

⁸ Oasr pal se met sap elos pulakin mu lulalfongi lalos munasla, paenang elos fwak nu sin Jisus: “Akyokye lalalfongi lasr.” (Luk 17:5) Me siyuk lalos inge su tuku ke insielos topukyuk, yokna ke Pentecost 33 C.E., ke pal se ngun mutal su mwuleyukla el tuku nu fwin met tuma lutlut puspus a kasrelos in oasr etauk yok ke Kas lun God a ke akwuk lal. (Jon 14:26; Orekma 2:1-4) Lulalfongi lalos akkeyeyuk, ke sripe se inge met tuma lutlut elos mutamwauk in oru orekma in luti, a fwinne oasr me lain nu ke orekma inge peng mwo el lutiyuk nu sin “met e nu kemwa ye kosrao.”​—Kolosse 1:23; Orekma 1:8; 28:22.

⁹ In musai ku akkeye lulalfongi lasr a in tafwela in oru orekma in luti lasr, kut enenu pa in lutlut a sifwilpa nunku ke ma Simusla a pre siyuk ke ngun mutal. Ke inkanek in sruokye a oru ma paye lun God in oan ke nunak lasr a insiesr​—oana kel Josua, Keleb, a met tuma lutlut puspus lun Kraist elos oru in pal meeta—​fwa kasre kut in oasr lulalfongi su use nu sesr pulaik su eneneyuk in muteng ke me meun lasr in ngun a tu kut in eis kutangla.​—Rom 10:17.

Tia Fwal in Lulalfongi Mukena la Oasr God

10. Mea eneneyuk nu ke lulalfongi paye?

¹⁰ In oana ke ma akkalemyeyuk nu sin met kulansap oaru nukemwa in pal meeta, kain in lulalfongi su kol nu ke pulaik a mongfusesr oasr ma eneneyuk yok nu ka liki na in lulalfongi la oasr God. (Jemes 2:19) Kut enenu in etu Jeova oana sie met in ngun a in oasr lulalfongi nu sel ke inkanek nukemwa. (Sam 78:5-8; Soakas 3:5, 6) Kalmen ma inge pa kut in lulalfongi ke insiesr kemwa la in akos masap a akwuk mwo nukemwa lun God ku in ase ma lane yok nu sesr. (Isaia 48:17, 18) Lulalfongi eneneyuk pa in oasr lulalfongi paye ke inkanek nukemwa la Jeova el fwa akpayeye mwulela nukemwa lal a “tu el met sang moul nu selos su sokol.”​—Hibru 11:1, 6; Isaia 55:11.

11. Ke inkanek fuka Josua a Keleb akinsemwomwoyeyuk ke sripen lulalfongi a pulaik lalos?

¹¹ Lulalfongi oinge el ku in yokelik. Ma inge kapkapek ke kut moulkin ma paye, “pulakin” me insemwomwo puspus, “liye” me top nu ke pre lasr a, ke kutupa inkanek, in pulakin me kolyuk lun Jeova ke moul lasr. (Sam 34:8; 1 Jon 5:14, 15) Kut ku in lulalfongi la lulalfongi lal Josua a Keleb akkeyeyuk ke elos pulakin ku liye oiya mwo lun God. (Josua 23:14) Nunku ke me lutlut inge: Elos moulla liki fwufwasryesr lalos yen mesis ke lusen yea 40, oana ma God el mwulela nu selos ka. (Oekyuk 14:27-30; 32:11, 12) Oasr kunokon mwo itukyang nu selos ke orekma in sruokye an Kenan ke lusen yea-onkosr. Ma se safla, pa elos engankin moul loeloes a mano fukoko a elos eis pa me usru lalos sifwana. Jeova el arlana akinsemwomwoye met nukemwa su kulansap nu sel ke inkanek oaru a pulaik!​—Josua 14:6, 9-14; 19:49, 50; 24:29.

12. Fuka Jeova el ‘akfulatye kas lal’?

¹² Lung-kulang lun God nu sel Josua a Keleb akesmakinye kut nu ke kas lun met sim lun sam: “Kom akfulatye kas lom yok liki Em na fon.” (Sam 138:2) Ke pal se Jeova el orekmakin el in oana me akpayeye ke sie me mwulela, me akpayeyen mwulela inge el “akfulatyeyuk” meyen el yok liki fwinsrak ku me tawi nukemwa. (Efesus 3:20) Aok, Jeova el tia akasorye met nukemwa su “engunak in” el.​—Sam 37:3, 4.

Oasr Mokul Se Su “Arlana Akinsemwomwoye God”

13, 14. Efu ku Inuk el enenu lulalfongi a pulaik?

¹³ Oasr ma yok su kut ku in lotela ke lulalfongi a oiyen pulaik ke kut nunku ke me srikasrak su akkalemyeyuk sin sie pa met lo meet liki pal lun met Kristian​—el pa Inuk. Fwinne meet liki el mutamwauk ke orekma in palu lal, Inuk el etu la lulalfongi a pulaik lal fwa srikeyuk. Ke inkanek fuka? Meyen Jeova el akkalemye tari in ima Eden la oasr me lokwalok ku srunga, su fwa sikyak in masrlon met nukemwa su kulansap nu sin God a nu selos su kulansapu Setan su Devil. (Genesis 3:15) Inuk el etu pa la oiyen srunga inge el sikyak tari ke mutamweyen me sramsram lun metu ke pal se Kein el uniye tumalel wiyel su pangpang Ebel. Aok, papa tumalos, Adam, el moul ke lusen yea 310 tokin Inuk el isusla.​—Genesis 5:3-18.

¹⁴ Tusruktu, fwinne oasr kain in ma sikyak inge, Inuk el pulaik in “fwufwasryesr yurin God” a el akkalemye metin met koluk nukemwa “ke ma upa nu kemwa” su elos kaskaskin in lain Jeova. (Genesis 5:22; Jud 14, 15) Oiya mwomwo inge lal Inuk su tia sangeng in oru alu paye paenang in oasr met lokwalok puspus lal, aksensenye moul lal. Nu ke luma a ma sikyak inge, Jeova el orala inkanek tu met palu lal inge el tia mise ke poun met lokwalok lal. Tokin el akkalemye nu sel Inuk “tu el akinsemwomwoye God tari,” Jeova el “utukyak” el a oru elan mise, saap ma inge sikyak ke sie pal el liye ke kas palu ku aruruma sikyak ke el motul.​—Hibru 11:5, 13; Genesis 5:24.

15. Me srikasrak mwo fuka Inuk el akkalemye nu sin met kulansap nukemwa lun Jeova ke pal inge?

¹⁵ Tokin Poul el akkalemye ke orekma lun God in usalla Inuk, el sa na in sifwilpa akkalemye ke yok sripaiyen lulalfongi, el fwak: “A fwin wangin lulalfongi met elos koflanu akinsemwomwoye [God].” (Hibru 11:6) Aok, lulalfongi su oasr yurol Inuk sang pulaik nu sel in fwasr wi Jeova a in fwakak kas in nununku Lal nu sin met fwin fwalu su tia alu nu sin God in len lal. Ke ma inge, Inuk el akkalemye me srikasrak mwomwo nu sesr. Oasr pa orekma oinge kut enenu in oru nu ke sie fwal su lain alu paye a nenela ke kain in ma koluk nukemwa.​—Sam 92:7; Mattu 24:14; Fwakyuk 12:17.

Oiyen Pulaik el Tuku ke Sangeng sin God

16, 17. Su mokul se inge su pangpang Obedaia, a oiya fuka el sifwana sun?

¹⁶ Sayen lulalfongi, oasr siepa oiya mwomwo su musai ku akkeye oiyen pulaik, pa inge sangeng mwomwo nu sin God. Lela kut in akuteye ke sie me srikasrak na mwomwo ke sie met su oasr sangeng mwo nu sin God su moul in len lun met palu Elaija a in len lal Togusra Ehab, su kol togusrai lun met Israel ke leyen eir. Ke pal in kolyuk lal Ehab, orekma in alu nu sel Beal arlana akkolukye met puspus ke togusrai leyen eir inge su wangin ma oana. Aok, oasr met palu 450 lun Beal a met palu 400 lun sru mutal elos “mongo ke tebu lal Jesebel,” mutan kiyel Ehab.​—1 Togusra 16:30-33; 18:19.

¹⁷ Jesebel, el sie met lokwalok lun Jeova su wangin pakomuta yuru, el srike in kunausla a akwanginyela alu paye liki anu. El uniye kutu sin met palu lun Jeova a el srike pa in unilye Elaija, su ke kas in kasru lun God el kaengla som sasla infwal Jordan. (1 Togusra 17:1-3; 18:13) Ya kom nunku ka la arlana upa in sruokye a oru alu paye ke togusrai lun leyen eir in pal ingo? Ya kom nunku pa ke ma upa inge la, fuka pulakinye fwin kom orekma ke loom sin togusrai se inge? Pa inge oiya se su sikyak nu sel Obedaiaa sie met su oasr sangeng lal nu sin God, el sie met orekma in loom sel Ehab.​—1 Togusra 18:3.

18. Mea oral Obedaia el an oana sie met su alu nu sin Jeova su arlana mwo?

¹⁸ Wangin alolo ka la, Obedaia el arlana karungin a akkalemye lalmetmet ke orekma in alu lal nu sin Jeova. Ne oinge, el tia na fuleak lulalfongi lal. Aok, in 1 Togusra 18:3 el akkalemye nu sesr: “Obedaia el arulana sangeng sin Jeova.” Aok, sangeng lal Obedaia nu sin God el arlana paye a mwo! Sangeng mwomwo lal inge, akkeyel in akkalemye pulaik mwomwo, oana ma akkalemyeyuk tia pat tokin Jesebel el uniye met palu puspus lun Jeova.

19. Mea Obedaia el oru in akkalemye pulaik lal?

¹⁹ Kut rid: “Tu oinge, ke Jesebel el otela met palu lun Jeova, na Obedaia el eis met palu siefok, a mwuknalosla kais lumngaul in sie luf, a kitelos ke bred a kof.” (1 Togusra 18:4) Oana ma kom nunku, in sang me mongo nu sin met siofok ke inkanek lukma el sie orekma su arlana sensen. Obedaia el enenu in karungin orekma lal inge tu in tia liyeyukyak sel Ehab a Jesebel a el enenu in taran pa in tia liyeyukyak sin met palu kikiap 850 su tuku pal nukemwa nu ke loom sin togusra. Sayen ma inge, oasr pa met puspus su wi ke alu kikiap inge in an Israel, met srisrik a met lulap puspus, su wangin alolo ka la elos ku in orekmakin kutena pal mwomwo in akkalemye orekma lal Obedaia inge in suk inkanek in eis me insemwomwo lun togusra a mutan kasra inge. Ne oinge, el oru ma inge in masrlon met inge nukemwa su oasr we tusruktu elos tia koneyukyak ka, a Obedaia el pulaik in sang ma enenu lun met palu nukemwa inge lun Jeova. Paye la sangeng sin God el sie me kasru su arlana ku in oru sie met in pulaik!

20. Fuka sangeng lal Obedaia nu sin God kasrel, a fuka me srikasrak lal kasre kom?

²⁰ Meyen Obedaia el akkalemye pulaik ke sripen sangeng sin God, kalem la Jeova el karunganul liki met lokwalok nukemwa lal. Soakas 29:25 el akkalemye: “Sangeng sin met wise me sruf; a el su filiye lulalfongi lal in Jeova fwa moul [karunginyuk, NW].” Obedaia el sie met su oana kut; el sangeng pa la fwin orekma lal liyeyukyak a el fwa anwuki, oana ke ma kut ku in pula pa. (1 Togusra 18:7-9, 12) Ne oinge, sangeng sin God sang pulaik nu sel in kutangla ke kutena sangeng lal nu sin met su el pula. Obedaia el sie me srikasrak mwomwo nu sesr ke pal inge, yokna nu selos nukemwa su alu nu sin Jeova fwinne oasr me sensenkinyuk na paye nu ke sukosok lalos ku moul lalos sifwana. (Mattu 24:9) Aok, lela kut nukemwa in kafweang in kulansap nu sin Jeova “ke sunak mutal a sangeng.”​—Hibru 12:28.

21. Mea fwa akuteyuki ke me lutlut toko?

²¹ Lulalfongi a sangeng sin God el tia oiya mwomwo luo mukena su sang me kasru in musai ku akkeye pulaik; oiya mwomwo inge ke lungse el ku in me kasru na mwomwo su yok liki ma luo inge. “Tu God el tia ase nu sesr ngunin sangeng; a ngunin ku, a lungse, a aksumwosye,” met sap Poul el simusla. (2 Timote 1:7) Ke me lutlut toko, kut fwa liye la fuka lungse el ku in kasre kut in kulansap nu sin Jeova ke inkanek pulaik ke lusen len safla inge su oasr ma upa puspus ka.​—2 Timote 3:1.

[Footnote]

Ya Kom Ku In Topuk?

• Mea sang kasru oiyen pulaik lal Josua a Keleb?

• Mea eneneyuk nu ke lulalfongi paye?

• Efu ku wangin sangeng lal Inuk in fwakak kas in nununku lun God?

• Fuka sangeng sin God sang kasru yok nu ke oiyen pulaik?

[Petsa ke sra 8, 9]

Jeova el sapkin nu sel Josua: “Kom in pulaik a ku”

[Petsa ke sra 10]

Obedaia el sang ma enenu a karungin met palu puspus lun Jeova

[Petsa ke sra 11]

Inuk el pulaik in kaskaskin kas lun God