Ya Kom Akola Ke Me Molela?
“Fwasru inge kom a sou lom nu kemwa nu in arku; tu Nga liye kom sumwosmwos ye mutuk in fwil se inge.”—GENESIS 7:1.
1. Kain in akwuk fuka ke me molela Jeova el orala ke len lal Noa?
JEOVA el “wise sronot nu fwin fwal lun met koluk” ke len lal Noa, tusruktu El orala pa akwuk nu ke me molela. (2 Piter 2:5) God paye el sang nu sel Noa su sie met sumwosmwos ke masap in musaila soko oak in sang molela moul lun ma orekla nu kemwa ke pal se sie sronot lulap el tuku nu fwin fwalu nufon. (Genesis 6:14-16) In oana ma kut tupan nu sin met kulansap oaru lun Jeova, “Noa el oru oapana ma nu kemwa God El sapkin nu sel.” Aok, “oinge el orala.” Ke sripen akosten lal Noa, kut ku in moul ke pal inge.—Genesis 6:22.
2, 3. (a) Mea met puspus ke len lal Noa elos akkalemye ke orekma lal Noa? (b) Ke lulalfongi fuka lal Noa paenang el ilyuk nu ke soko oak?
2 In musai soko oak tia orekma fusrasr se. Kalem la, met puspus elos lut ke ma Noa a sou lal elos akpayeye. Tusruktu, ma inge tia fwal in orala met in len lal Noa elos in lulalfongi la oasr me molela el ku in sikyak ke pal se elos fwin ilyuk nu in oak soko a. Ke saflaiye, mongfusesr lun Jeova nu sin met koluk sun tari pal safla lal.—Genesis 6:3; 1 Piter 3:20.
3 Tokin Noa a soul lal elos kafofo ke orekma ke lusen yea puspus, Jeova el fwak nu sel Noa: “Fwasru inge kom a sou lom nu kemwa nu in arku; tu Nga liye kom sumwosmwos ye mutuk in fwil se inge.” Ke oasr lulalfongi nu ke kas lun Jeova, “Noa el sroak, a mwen natul, a mutan kiel, a mutan kiyen mwen natul oelul.” Jeova el kaliye srungul in sang karungin met kulansap nukemwa lal. Ke pal se Sronot tuku nu fwin fwalu, aok soko su God el sapkin in orek el akpayeyuk a fwal in lulalfongiyuk nu ke me molela lun moul.—Genesis 7:1, 7, 10, 16.
Ma Sikyuk In Len lal Noa el Oapana Ke Ma Sikyuk Ke Len Lasr
4, 5. (a) Ke oiya fuka Jisus el srikeye tuku lal? (b) Mea sikyuk ke len lal Noa su sikyak oapana ke len lasr?
4 “A oana in len lal Noa, a fwa oinge ke Mwen nutin met El tuku.” (Mattu 24:37) Kas lun Jisus inge akkalemye la ke pal se su oasr tari lal su tia ku in liyeyuk fwa sikyak oana ke len lal Noa, a ma inge akpayeyuk. Yok akilenye mutamwauk in yea 1919, ke kas in sensen su oapana ke kas su sapkinyuk nu sel Noa el sulkakinelik nu sin met in mutanfwal nukemwa. Ke ma inge, oiya su metu elos akkalemye el oapana nu ke oiya se su akkalemyeyuk ke len lal Noa.
5 Ke inkanek lun Sronot, Jeova el oru sie akwuk in sang kunausla fwalu in pal meeta su “sesesla ke orekma silolel.” (Genesis 6:13) Noa a sou lal elos srunga in wi ke orekma koluk inge a elos misla a arulana kafofo ke orekma in musai soko oak su arulana kalem nu sin met nukemwa su liyelos. Ke inkanek oapana inge, kut ku in liye ke ma sikyuk ke len lasr. Ke pal inge met fwokpap elos ku in “akilen in maslon met sumwosmwos a met koluk, in maslon el su orekma nu sin God a el su tia orekma nu Sel.” (Malakai 3:18) Oaru, kulang, misla, a moniyuk su akkalemyeyuk sin Met Lo lun Jeova kaksakinyuk sin met su tia sulosol met ke elos liyelos a akilenelos oana met kulansap lun God liki met puspus lun fwalu. Met Lo elos srunga kain in ma koluk nukemwa a elos esalosyang sifwana nu ke ngun lun Jeova in kololos. Ke ma inge elos engankin misla a fwasr ke inkanek sumwosmwos.—Isaia 60:17.
6, 7. (a) Mea tia aksaokyeyuk sin met nukemwa in len lal Noa, a fuka met puspus ke pal inge elos akkalemye pa oiya sepana inge? (b) Me pupulyuk fuka akkalemye la Met Lo lun Jeova elos siena liki met puspus?
6 Met puspus in len lal Noa elos tia akilen la Noa el eis kasru sin God a el fwasr ke kolyuk lun God. Elos tia nunku ke kas in sensen lal Noa la yok sripe a elos tia loang mwo nu ka. Mea nunak lun met fwalu nu sin met kulansap lun God a ke peng su elos sulkakin ke pal inge? Fwinne met puspus elos kaksakin orekma a oiya lun Met Lo lun Jeova, met puspus elos tia nunku yok ku eis orekma in luti a kas in sensen lun Baibel su elos sulkakin. Met tulan, met kol ke orekma, ku sou puspus elos ku in sang kas in kaksak ke oiya mwomwo lun met Kristian paye tusruktu elos akkalemye pulakinyen asor lalos a fwak, “Ma sefwanna su tia mwo pa elos Met Lo lun Jeova!” Ma puspus su tia liyeyuk sin met puspus inge ke Met Lo pa ke oiya mwomwo nukemwa inge oana lungse, misla, kulang, mwo, fwokpap, a sifwana leumi meyen elos kasreyuk sin ngun mutal lun God. (Galetia 5:22-25) Meyen elos akkalemye oiya mwomwo inge paenang oasr me kasru yok in oru met puspus elos in lulalfongi ke peng mwo su elos sulkakin.
7 Ke sie me pupulyuk nu in an Russia, oasr Met Lo lun Jeova elos musai Kingdom Hall. Oasr sie met su tui we a sramsram nu sin sie met orekma a el fwak: “Sie an in musa na mwomwo pa inge—wangin met sismok, wangin met kaskaskin kas koluk, a met nukemwa elos tia srui ke wain! Ya kom sie sin Met Lo lun Jeova?” Met orekma sa el siyuk sel, “Fwin Nga fwak mo, ya kom lulalfongi yu?” Met se inge el sa in topuk, “Mo tia.” In sie pa siti in an Russia, oasr sie mayor el kaksakin na paye ke el liye Met Lo puspus elos musai Kingdom Hall sasu selos. El fwak mu in pal meeta el lulalfongi mu alu nukemwa oana sie, tusruktu tokin el liye oiya mwomwo lun Met Lo lun Jeova nukemwa su tukeni orekma, el tila lulalfongi ka. Pa inge kutu me srikasrak su akkalemye la Met Lo lun Jeova elos siena liki met nukemwa su tia orekmakin masap a akwuk mwomwo lun Baibel.
8. Molela lasr ke saflaiyen fwalu koluk inge fwal nu ke mea?
8 Ke saflaiyen len safla lun “fwalu in pal meeta” su kunausyukla ke Sronot, Noa el oaru in oru orekma oana “sie met luti lun sumwosmwos.” (2 Piter 2:5) Ke len safla lun akwuk lun ma puspus ke pal inge, met kulansap lun Jeova elos akkalemye nu sin met nukemwa ke masap sumwosmwos lal a elos sulkakinelik pa peng mwo ke pal mwo in moliyukla nu ke fwalu sasu. (2 Piter 3:9-13) In oana ke ma sikyak nu sel Noa a sou lal su oasr sangeng lalos nu sin God elos moliyukla ke soko oak, su ke pal inge oasr molela lun met puspus fwal nu ke lulalfongi lalos a elos fwin wi a akkalemye oaru lalos nu ke u lun Jeova fwin fwalu.
Lulalfongi Eneneyuk nu ke Molela
9, 10. Efu ku lulalfongi el eneneyuk fwin kut lungse in moulla ke saflaiyen akwuk lun ma puspus lal Setan?
9 Mea sie met el enenu in oru in moulla liki kunanela lun fwal se inge su on ke ku lal Setan? (1 Jon 5:19) Ma se meet el enenu in akilen la oasr ma eneneyuk nu ke me loeyuk ku karungin lal. Fwin el akilen tari me enenu inge a el kaifweang in orekmakin me karungin inge. Ke len lal Noa met puspus elos oru orekma lalos sifwana ke len nukemwa a elos nunku mu elos tia enenu me karungin nu ke ma upa ku kunausten su fwa tuku. Oasr ma se su wangin yurolos—pa inge lulalfongi lalos nu sin God.
10 Ke oiya saye, Noa a sou lal elos akilen me enenu lalos nu ke me karungin a molela lalos. Elos akkalemye pa lulalfongi lalos nu sin God su Fulatlanu in kosrao a fwalu, Jeova God. “Fwin wangin lalalfongi met elos koflanu akinsemwomwoye God,” met sap Poul el simusla, “tu el su tuku nu yurin God el fwa lalalfongi tu El God, a tu El Met sang moul nu selos su sokol.” Poul el simusla pa: “Ke lalalfongi Noa ke God El kaifwel ke ma su soenna tuku, in sangeng lal sin God el akoela soko oak nu ke molela lun sou lal; a ke ma inge el lusla fwalu, a el ekla met usru nu ke sumwosmwos fwal nu ke lalalfongi.”—Hibru 11:6, 7.
11. Mea kut ku in lotela ke akwuk lun Jeova in sang me karungin in pal meeta?
11 In moulla liki saflaiyen akwuk koluk lun ma puspus ke pal inge, kut enenu in orekma yok liki na in lulalfongi mu ma inge fwa kunausyukla. Kut enenu in akkalemye lulalfongi nu ke akwuk lun Jeova ke molela, a orekmakin ma inge ke inkanek nukemwa. Paye, kut enenu in akkalemye lulalfongi nu ke me kise ke lango lun Mwen nutin God, Jisus Kraist. (Jon 3:16, 36) Tusruktu kut enenu in esam la met nukemwa su oasr luen oak okwel Noa mukena pa moliyukla liki Sronot. Ke oiya sepana inge, siti in molela in an Israel in pal meeta orala me karunginyuk nu sin met akmas ke sripen nunikin lal fwin el lungse in kaeng meet nu ke sie siti inge a muta luen siti inge nu ke pal se met tol fulat el mise. (Oekyuk 35:11-32) Ke me keok aksengoul nu sin an Ijipt in len lal Moses, tulik mokul se meet nukemwa nutin met Ijipt elos mise ku anwuki, tusruk mwuonsie nukemwa sin met Israel elos moliyukla. Efu? Jeova el akkalemye nu sel Moses: “Elos [Met Israel] fwa eis sra [sran lam ke Kofwen Alukela] ka, a filiye fwin sru lukwe sisken mutunoaoa, a fwin sak soko lung ke mutunoaoa, in loom elos fwa mongo we. . . . A wangin sie sumwos fwa illa liki mutunoaoa in loom sel nu ke lututang.” (Exodus 12:7, 22) Su inmasrlon tulik se meet nutin met Israel elos fwa tia loang akmwoye nu se a pilesru masap inge lun God ke elos som liki loom se su markiyuki ke sra ke sru lukwe ke srungul a ke fwin sak soko lung ke mutunoa?
12. Kusensiyuk fuka kais sie sesr enenu in siyuk sesr sifwana, a efu?
12 Ke ma inge oasr sripe mwo lasr in nunku na paye ke oiyen moul lasr sifwana. Ya kut oasr ke akwuk lun Jeova nu ke me karungin lun ngun? Ke pal se ongoiye lulap fwa sikyak, e fwa oasr sronin mutun met nukemwa ke sripen insemwomwo a kulo lalos meyen elos suk a orekmakin me karungin inge. Nu sin met puspus saye e fwa oasr sronin mutalos ke sripen asor a auli lalos.
Me Aksumwos Nukemwa su Orek ke U Akoekutla nu ke Molela
13. (a) Mea nien sun lun me aksumwos nukemwa lun u? (b) Aketeye kutu me aksumwos su sang me kasru nu ke u.
13 Jeova el orala me aksumwos puspus nu ke u lal fwin fwalu. Me aksumwos nukemwa inge sang kasru in akkatoiye, oru in fukoko a akkeye akwuk lal in sang karungin orekma nukemwa lasr in alu nu sin God. Mutamwauk in yea 1870 nu ke 1932, met elder a deacon nukemwa elos voteiyuki nu ke kunokon lalos nu sin met nukemwa ke congregation. In yea 1932 akwuk nu ke met elder puspus su votiyuki elos ayaolla sin service committee su voteiyuki pa sin congregation in sang kasru sie service director su pakiyuki. In yea 1938, oasr akwuk su orekla nu ke orekma in srusrngiye met elder a servant nukemwa lun congregation ke inkanek su oasr me kolyuk lun God ka. Ke kolyuk lun U lun met matu in ngun su oru me kolyuk lun Met Lo lun Jeova, mutamwauk in yea 1972, recommendation nukemwa orekla a congregation nukemwa elos eis leta se su srusrngiye met elder a ministerial servant nukemwa ke inkanek lun theocratic ku ke me kolyuk lun God. Ke lusen yea puspus, kunokon lun Governing Body yokelik, a oasr ma puspus ekla su orekla in sang kasru orekma lalos.
14. Akwuk fuka nu ke me akpa su mutamwauk orekla in yea 1959?
14 In yea 1950, oasr sie orekma su mwo in tuniyuk a in nunkeyuk yok ka in oana ke ma su Sam 45:16 akkalemye a ma inge kol nu ke sie akwuk in akpa. Fus se inge el akkalemye: “Tulik nutum elos fwa aol papa tumom, su kom fwa oru met fwisrak fwin fwalu nu fon.” Met elder nukemwa ke pal inge su oru kolyuk lalos ke congregation elos eis me akpa in kasrelos in sang akpayeye kunokon lalos ke pal inge meet liki a tokin Armagedun. (Fwakyuk 16:14, 16) Kingdom Ministry School el mutamwauk in yea 1959. In pal sepana ingo, oasr sie akwuk orekla in sang kasru luti congregation servant nukemwa ke lusen malem se, pa inge kas su orekmakinyuk in pal ingo ke presiding overseer. School inge srakna orek ke pal inge in sang kasru me luti lun met elder a ministerial servant nukemwa. Tokin met liyeang nukemwa elos eis me kasru ku me akpa inge, elos ku in oru me kolyuk in sang kasru a in oru me akpa nu sin Met Lo lun Jeova nukemwa ke kais sie congregation lalos. Ke ma inge, met lo nukemwa elos eis me kasru lun ngun a eis me kasru in sang akmwoye inkanek mwo lalos nu ke orekma in luti lalos oana met fwakak ke peng mwo lun Togusrai.—Mark 13:10.
15. Mea inkanek luo su orekla in sang kasru karungin oiyen nasnas lun congregation lun met Kristian?
15 Met nukemwa su lungse in wi ke congregation lun met Kristian elos enenu in sun ku akpayeye ma eneneyuk nukemwa. Paye la, met aksruksruk nukemwa ke pal inge tia leyukla in wi ke congregation lun met Kristian, oana in len lal Noa su met oinge tia leyukla in ilyuk nu ke oak okwel Noa. (2 Piter 3:3-7) In yea 1952, Met Lo lun Jeova elos sang me kasru yok nu ke akwuk su sang kasru congregation ke inkanek in sisla met orekma koluk nukemwa su srunga in auliyuk. Aok, met orekma koluk nukemwa su akkalemye auliyuk paye lalos elos eis kasru in ‘orala inkanek sumwos nu ke niyelos.’—Hibru 12:12, 13; Soakas 28:13; Galetia 6:1.
16. Oiya lun ngun fuka sikyak nu sin met kulansap nukemwa lun Jeova?
16 Oiyen kapkapek lun ngun su engankinyuk sin met kulansap nukemwa lun Jeova el tia sie me lut ku sifwana sikyak ke wangin kasreye. Ke inkanek lun met palu Isaia, Jeova el fwak: “Liye! Met kulansap Luk fwa mongo, a komwos fwa musrinsral. Liye! Met kulansap Luk fwa nimnim, a komwos fwa malu. Liye! Met kulansap Luk fwa engun, a komwos fwa akmekinyeyuk. Liye! Met kulansap Luk fwa on ke engun insie, a komwos fwa tung ke toasr insie, a fwa wowoyuk ke inse musalla.” (Isaia 65:13, 14) Jeova el tafwela in use nu sesr me mongo mwomwo lun ngun su arulanu yok in oru kut in fukoko in ngun pal nukemwa.—Mattu 24:45.
Akola Pal Nukemwa nu ke Molela
17. Kain in kas fuka sapkinyuk nu sin met kulansap nukemwa lun Jeova elos in oru, a mea kas inge el akkeye kut in oru?
17 Pa inge pal mwo, in “nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oana lia lun kutena, a kut in kaifwe sie sin sie, a akyokye, oana komwos liye tu len apkuran me.” (Hibru 10:23-25) In wi pal nukemwa a moniyuk ke orekma nukemwa lun congregation su oasr ke 98,000 kutu lun Met Lo lun Jeova su fwa kasre kut in akola nu ke molela. Met lili wiyesr elos fwa kasre kut ke kut kaifweang in akkalemye “oiyen met sasu” a kut in kasru met puspus ke insiesr kemwa in lutlut ke akwuk lun Jeova ke molela.—Efesus 4:22-24; Kolosse 3:9, 10; 1 Timote 4:16.
18. Efu ku kom arulanu lungse in wi pal nukemwa ke congregation lun met Kristian?
18 Setan a fwal koluk lal elos arulanu lungse in srife kut a oru kut in som liki congregation lun met Kristian. Tusruktu, kut ku in wi ke congregation lun met Kristian pal nukemwa a kut ku in moulla ke saflaiyen akwuk koluk lun ma puspus ke pal inge. Lela lungse lasr nu sin Jeova a kulo lasr nu ke akwuk mwomwo lal in akkeye kut in tu na ku in kutangla kutena kain in orekma in kaifweang lal Setan. In sifwilpa nunku ke me insemwomwo nukemwa su kut eis oana met Kristian fwa akkeye sulela lasr. Kutu sin me insemwomwo inge fwa aketeyuki ke me lutlut toko.
Mea Me Top Lom?
• Efu ku ma sikyak ke pal lasr el oana sie nu ke ma sikyak in len lal Noa?
• Kain in oiya mwo fuka eneneyuk nu ke molela?
• Me aksumwos puspus fuka sang kasru ke akwuk lun Jeova nu ke me karungin lasr?
• Fuka kut in ku in sifwana akoekutla nu ke molela?
[Petsa ke sra 18]
Met puspus in len lal Noa elos tia lulalfongel Noa
[Petsa ke sra 19]
Oasr me insemwomwo yok in loang mwo nu ke kas in sensen lun God
[Petsa ke sra 20]
Mea paenang in akwuki Kingdom Ministry School?
[Petsa ke sra 21]
Pa inge pal in wi ke congregation lun met Kristian pal nukemwa