Alu Su God el Insemwomwo Ka

1. Fuka kut fwa eis me kasru yok kut fwin alu nu sin God ke inkanek paye a sumwos?

JEOVA GOD el karungin kut na paye a el lungse kut in eis ma lane ke me kasru lal. Kut fwin alu nu sel ke inkanek sumwos, kut fwa insemwomwo a kut ku in fwasr liki ma upa puspus lun moul. Kut fwa ku in eis pa me lane a me kasru yok lal. (Isaia 48:17) Tusruktu, oasr alu puspus su piselos oasr ke foko foko su fwak mu elos luti ma paye ke God. Ne ouinge, yok ma tia oana sie ke me luti lalos ke God, la su el a mea el siyuk sesr.

2. Kut ku in lotela fuka ke inkanek sumwos in alu nu sin Jeova? A me pupulyuk fuka ku in kasre kut in akilen ma inge?

² Kom etu fuka ke inkanek paye a sumwos in alu nu sin Jeova? Kom tia enenu in lutlutkin a in eis etauk ke me luti puspus lun alu nukewa. Kom enenu na in lotela la mea Baibel el luti na paye ke akwuk lun alu paye. Ke sie me pupulyuk: In an puspus, oasr ma upa sikyak ke mani kikiap. Fwin kom eis sie orekma su sapkinyuk nu sum in suk a srike in koneak kain in mani kikiap nukewa, ya kom ku in akilen la piya ka mani kikiap? Ya kom akilen ma inge ke kom esamye kain in mani kikiap nukewa? Mo. Mwo fwin pal yok lom orekmakinyuk nu ke lutlutkinyen mani paye liki na in esamye mani kikiap. Tokin kom etu ke aten mani paye, kom ku in akilen mani kikiap. Ke inkanek ouinge, kut fwin lotela la fuka in akilen alu paye, kut ku pa in akilen ke alu nukewa su kikiap.

3. In fwal nu sel Jisus, mea kut enenu in oru fwin kut lungse in eis me insemwomwo lun God?

³ Arlana yok sripe kut fwin alu nu sin Jeova ke inkanek su el insemwomwo ka. Met puspus elos lulalfongi mu alu nukewa ku in akinsemwomwoye God, tusruktu Baibel el tia luti ma inge. Sie met el tia ku in fwak mukena mu el sie met Kristian. Jisus el fwak: “Tia met nukemwa su fwak nu sik, ‘Leum, Leum,’ fwa ilyuk nu in togusrai in kosrao, a el na su oru ma lungse lun Papa tumuk su in kosrao.” Ke ma inge, in eis me insemwomwo lun God, kut enenu in lotela ke ma God el siyuk sesr a oru ma inge. Jisus el pangon met puspus su tia oru ma lungse lun God oana “met orek ma koluk.” (Mattu 7:21-23) In oana ke mani kikiap su tia ku in orekmakinyuk, alu kikiap el tia pa yok sripe a tia saok. Koluk liki nukewa, kain in alu inge el me sensen na paye.

4. Mea kalmen kas lun Jisus ke inkanek luo inge? A kais soko inkanek inge el kol nu ke mea?

⁴ Jeova el sang pal mwomwo nu sin met nukewa fwin fwalu in eis moul ma patpat. Tusruktu in eis moul ma patpat ke Paredais, kut enenu in alu nu sin God ke inkanek fwal a moulkin moul fwal a mwo nu sel ke pal inge. Oasr me asor yok ke sripen met puspus elos srunga in oru ma inge. Paenang Jisus el fwak: “Komwos ilyuk ke mutunpot ousriksrik; tu sralup mutunpotu, a sralup pa inkaneku, su kol nu ke kunausten, a met puspus elos ilyuk nu we. Tu ousriksrik mutunpotu, a ousriksrik inkaneku, su kol nu ke moul, a met punu elos konoiyuk.” (Mattu 7:13, 14) Alu paye el kol nu ke moul ma patpat. Alu kikiap el kol nu ke kunausten. Jeova el tia lungse kutena met in kunausyukla, a pa inge sripe su paenang el sang pal mwomwo nu sin met yen nukewa in eis etauk kel. “Leum el tia patla ke mwuleang lal, oana kutu nunku patla; tu el mongfusesr nu sumwos, meyen el tia lungse tu kutena met in tula, a tu met nukemwa in auliyuk.” (2 Piter 3:9) Ke ma inge, paye la, ke inkanek su kut alu nu sin God ku in kalmekin nu ke moul ku mise nu sesr.

FUKA KOM KU IN AKILEN ALU PAYE

5. Kut ku in akilen fuka met nukewa ma wi ke alu paye?

⁵ Fuka ‘inkanek su kol nu ke moul’ ku in koneyukyak? Jisus el fwak ke alu paye la el ku in akilenyuk na paye ke moul lun met puspus su oru ma paye. El fwak: “Komwos fwa etalos ke fwako lalos . . . Ouinge sak mwo nu kemwa isus fwako mwo.” (Mattu 7:16, 17) Kas lal inge el kalmekin la, nu selos nukewa su wi ke alu paye fwa akilenyuk elos ke lulalfongi lalos a ke oiya lalos. Aok, elos tia met sumwosmwos a elos oru ma tafongla, ne ouinge in oana sie u su wi alu paye elos kafweang in oru ma nukewa fwal nu ke lungse lun God. Lela kut in akuteye ke oiya onkosr in kasre kut in akilen met nukewa ma wi ke alu paye.

6, 7. Mea nunak lun met kulansap nukewa lun God ke Baibel? A Jisus el akkalemye fuka me srikasrak nu ke oiya inge?

⁶ Me luti nukewa lun met kulansap lun God fwal nu ke Baibel. Baibel el akkalemye: “Baibel nukemwa etuku ke ngun lun God a oasr sripe in luti, in kai, in aksumwosye, a in aketeye ma sumwosmwos nu sin met, tu met lun God in sumwosna, a akola fwal nu ke orekma mwo nu kemwa.” (2 Timote 3:16, 17) Nu sin met Kristian wiyel nukewa, met sap Poul el simusla: “Ke komwos eis sesr kas lun God, komwos eis, tia oana kas lun met, a oana paye, kas lun God.” (1 Tessalonika 2:13) Ke ma inge, lulalfongi a orekma nukewa ke alu paye tia tuku ke nunak ku fasin lun metu. Ma inge nukewa tuku ke Kas lun God, Baibel.

⁷ Jisus el akkalemye me srikasrak mwomwo ke el oru me luti lal fwal nu ke Kas lun God. Ke el pre nu sin Papa tumal in kosrao, el fwak: “Kas Lom ma paye.” (Jon 17:17) Jisus el lulalfongi Kas lun God, a ma nukewa su el luti fwal nu ke ma Simusla. Ke pal puspus Jisus el fwak: “Tu ma simusla.” (Mattu 4:4, 7, 10) Tokin el fwak ma inge el orekmakin ma simusla. Ke inkanek ouinge, met kulansap lun God ke pal inge elos tia luti ke nunak lalos sifwana. Elos lulalfongi la Baibel el Kas lun God, a elos akfwalye me luti lalos nu ke ma Baibel el akkalemye.

8. Mea eneneyuk ke orekma in alu nu sin Jeova?

⁸ Nu selos nukewa su oru alu paye elos alu nu sin Jeova mukena a oru inel in eteyuk. Jisus el fwak: “Kom fwa alu nu sin Jeova God lom, a kulansap nu sel mukena.” (Mattu 4:10) Ke ma inge, met kulansap lun God elos alu nu sin Jeova mukena. Wekunang nu ke orekma lun alu paye pa in kasru metu in etu pa ke inen God paye a ke oiya mwomwo nukewa su oasr yurol. Sam 83:18 el akkalemye: “Kom mukena, su em pangpang Jeova, kom el su Fulatlanu fwin fwalu nufon.” Jisus el akkalemye ke me srikasrak in sang kasru met puspus in etu ke God, oana ke ma el fwak ke pre: “Nga fwakak em nu sin met su kom ase nu sik liki fwalu.” (Jon 17:6) Ke inkanek ouinge, met nukewa su oru alu paye ke pal inge elos enenu in luti met puspus ke inen God, ke akwuk lal, a ke oiya mwo nukewa lal.

9, 10. Ke inkanek puspus fuka met Kristian paye elos akkalemye lungse lalos nu sin sie sin sie?

⁹ Met kulansap lun God elos akkalemye lungse paye nu sin sie sin sie. Jisus el fwak: “Ke ma se inge met e nukewa fwa etu tu komwos met Tumuk lutlut, komwos fwin lungsumwos sie sin sie.” (Jon 13:35) Oasr yurin met Kristian in century se meet kain in lungse inge. Kain in lungse inge su fwal nu ke akwuk lun Baibel el kutangla kutena ma upa su tuku ke sruf, oiya lun moul, oiya lun mutanfwal puspus a fwa ku in orani metu nu sie in tukeni nu ke me kapur lun met lili paye su tia ku in musalla. (Kolosse 3:14) Wangin yurin met puspus su wi ke alu kikiap kain in oiya lun met lili inge su oasr lungse yok a paye ka. Kut etu fuka ma inge? Meyen elos ku in uniye sie sin sie ke sripen tia oana sie mutanfwal selos ku sruf lalos. Met Kristian elos tia us a orekmakin me meun in sang uniye met Kristian wiyelos ku kutena met. Baibel el akkalemye: “In ma se inge fwakyuk tari tulik nutin God a tulik nutin devil: Kutena met su tia oru ma sumwosmwos, el tia sin God me, a ouyepa el su tia lungse met lel. . . . Kut in lungse sie sin sie; tia oana Kein su ma lun el su koluk, a uniye met lel.”​—1 Jon 3:10-12; 4:20, 21.

¹⁰ Aok, ke sripen lungse paye lun met Kristian paenang elos tia uniye met puspus, sayen ma inge oasr pa ma eneneyuk nu ka. Met Kristian paye elos orekmakin na paye pal lalos, ku lalos, a ma saok lalos in sang kasru a akkeye sie sin sie. (Hibru 10:24, 25) Elos kasru sie sin sie ke pal in me keok, a elos akkalemye oiya paye nu sin met puspus. Paye, la elos orekmakin ke moul lalos kas in kasru lun Baibel in “oru mwo nu sin met nukewa.”​—Galetia 6:10.

11. Efu ku yok sripe in eis Jisus Kraist oana inkanek lun God nu ke me molela?

¹¹ Met Kristian paye elos lulalfongi kel Jisus Kraist oana inkanek lun God nu ke me molela. Baibel el akkalemye: “A wangin lango ke siena, tu wangin siena e ye kosrao eyeyung nu sin metu, tu kut fwa moul ka.” (Orekma 4:12) Oana ke ma kut liye ke Sapta 5, Jisus el sang moul lal oana sie me lango nu sin met nukewa su lungse in akos God. (Mattu 20:28) In wekunang ma inge, Jisus el Togusra se su srusrngiyuki sin God ke Togusrai in kosrao su fwa kol fwalu nufon. A God el sapkin nu sesr in akos Jisus a orekmakin me luti nukewa lal kut fwin lungse in eis moul ma patpat. Pa inge sripe su paenang Baibel el akkalemye: “El su lulalfongi Mwen moul ma patpat lal; a el su tia lulalfongi Mwen fwa tia liye moul.”​—Jon 3:36.

12. Mea kalmen in tia ma lun fwalu?

¹² Met nukewa su wi ke alu paye elos tia ma lun fwalu. Ke pal se el nununkeyuk sin met kol lun an Rom su pangpang Pailat, Jisus el fwak: “Togusrai luk, tia ma lun fwal se inge.” (Jon 18:36) Yen nukewa fwin fwalu su elos muta we, met nukewa su fwasr tokin Jisus elos muta ye koko lun Togusrai lal in kosrao a ke ma inge elos karunginyuk pal nukewa in tia wi ke kutena u su oasr ke akwuk lun politic lun fwalu. Elos tia wi ke orekma in alein lun u nukewa inge. Tusruktu, met kulansap nukewa lun Jeova elos tia tulokinye met puspus ke oiyen sulela su elos lungse in oru ke orekma in wi ke sie u lun politic, ku in wi oana sie candidate lun politic, ku in orek vote. Paye la, met kulansap paye nukewa lun Jeova elos tia wi ke akwuk lun politic, a sayen ma inge elos akos pa ke masap lun an u. Efu? Meyen Kas lun God el sapkin nu selos in “akos” nu ke “ku su fulat lukelos” ku ke guferment. (Rom 13:1) Fwin masap lun metu ku lun politic el lain masap lun God, met su wi ke alu paye elos etawi me srikasrak lun met sap puspus, su fwak: “Mwo tu kut akos God yok liki metu.”​—Orekma 5:29; Mark 12:17.

13. Fuka nunak lun met kulansap paye lun Jisus elos akkalemye ke Togusrai lun God? A ke ma inge orekma fuka elos oru?

¹³ Met kulansap paye nukewa lun Kraist elos sulkakin Togusrai lun God oana fwinsrak sefwanna lun metu. Jisus el fwak: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.” (Mattu 24:14) Met kulansap paye lun Kraist elos tia akkeye met puspus in lulalfongi ke met kol puspus in akmwoye ma upa puspus, a elos akkalemye ke Togusrai lun God in kosrao oana fwinsrak sefwanna lun metu. (Sam 146:3) Jisus el luti kut in pre ke sie guferment sumwosmwos inge ke el fwak: “Togusrai lom in tuku. Ma lungse lom in orek, oana in kosrao, ouinge fwin fwalu.” (Mattu 6:10) Kas lun God el palye la Togusrai in kosrao el “fwa kanausla togusrai inge nu kemwa, a a fwa tu ma patpat.”​—Daniel 2:44.

14. U fuka se ke alu kom lulalfongi mu akpayeye akwuk nukewa ke alu paye?

¹⁴ In fwal nu ke ma kut tufwana akuteye ka, siyuk sum sifwana: ‘U fuka ke alu elos akfwalye me luti nukewa lalos ke Baibel a akkalemye inen Jeova? U fuka akkalemye kain in lungse su God el sapkin in orek, a akkalemye lulalfongi lalos kel Jisus, tia ma lun fwalu, a in sulkakin la Togusrai lun God mukena pa fwinsrak paye sefwanna nu sin metu? Ke alu nukewa fwin fwalu, piya ka u se su akpayeye akwuk nukewa inge?’ Me akpayeye puspus akkalemye la u se inge pa Met Lo lun Jeova.​—Isaia 43:10-12.

MEA KOM FWA ORU?

15. Sayen lulalfongi lasr la el oasr, mea pa God el siyuk sesr?

¹⁵ In lulalfongi mukena ke God el tia fwal in akinsemwomwoyel. Aok, Baibel el akkalemye la fwinne dimon puspus elos lulalfongi la oasr God. (Jemes 2:19) Tusruktu, kalem la, elos tia oru ma lungse lun God a wangin insemwomwo lun God yurolos. Kut fwin lungse God lan akinsemwomwoye kut, oasr ma eneneyuk nu sesr in lulalfongi la el oasr a moul a kut enenu pa in oru ma lungse lal. Kut enenu pa in srikutla liki alu kikiap a in insemwomwokin in wi ke alu paye.

16. Ke orekma in kupasr nu ke alu kikiap, mea enenu in orek ka?

¹⁶ Met sap Poul el akkalemye la kut tia enenu in wi ke alu kikiap. El simusla “‘Ke ma inge, Komwos in illa liki in masrlolos, a komwos in srikomwosla,’ Leum [“Jeova,” NW] el fwak, a tia kalye kutena ma tia nasnas; a Nga fwa eis komwos.” (2 Korint 6:17; Isaia 52:11) Ke ma inge met Kristian paye elos fwasr liki kutena ma su kupasr nu ke alu kikiap.

17, 18. Mea se inge “Babulon Lulap,” a efu ku yok sripe in silaklak “illa lukel”?

¹⁷ Baibel el akkalemye la kain in alu kikiap nukewa el wi ke “Babulon Lulap.”a (Fwakyuk 17:5) E se inge el akesmakinye kut ke sie siti in pal meeta su pangpang Babulon, su alu kikiap nukewa tuku ka tokin Sronot in len lal Noa. Me luti a orekma puspus su oasr ke alu kikiap el tuku ke Babulon mutamwauk in pal meeta. Ke sie me pupulyuk, met Babulon elos alu nu ke trinity, ku god tolu in ma sefwanna. Ke pal inge, me luti yok emeet lun alu puspus pa ke Trinity. Tusruktu Baibel el luti na paye la oasr God paye sefwanna, el pa Jeova, a Jisus pa Mwen natul. (Jon 17:3) Met Babulon elos lulalfongi mu oasr ngun lun metu su tia ku in mise su srakna moul tokin mano el mise a ku in akkeokyeyuk ke sie an in isis. Ke pal inge, lulalfongi ke ngun su tia ku in mise su ku in keok ke isis lutiyuk sin alu puspus.

¹⁸ Ke sripen lulalfongi lun met Babulon in pal meeta fwasrelik nu fwin fwalu nufon, paenang Babulon Lulap ke pal inge ku in akkalemyeyuk oana u lun alu kikiap nukewa. A God el palye tari la u lun alu kikiap inge fwa sa in musalsallu. (Fwakyuk 18:8) Ya kom liye la efu ku yok sripe in srikomla liki alu nukewa lun Babulon Lulap? Jeova God el lungse kom in sa in “illa lukel” ke srakna oasr pal.​—Fwakyuk 18:4.

19. Mea kom fwa eis fwin kom kulansap nu sin Jeova?

¹⁹ Ke sripen sulela lom in tui liki orekma lun alu kikiap, kutu metu elos sulela pa in tui liki in asrouki nu sum. Tusruktu in kulansap nu sin Jeova wi met kulansap nukewa lal, oasr ma puspus su kom fwa ku in eis su yok liki ma su tula liki kom. In oana met tuma lutlut puspus lun Jisus in pal meeta su filiye ma puspus lalos in fwasr tokol, tia pat e fwa oasr pa met lili puspus wiyom su wi pa kulansap nu sin God. Kom fwa wi sie sou lulap fwin fwalu nufon ke met Kristian paye su piselos oasr ke million puspus, su akkalemye nu sum lungse paye. A fwa oasr fwinsrak mwolena lom nu ke moul ma patpat “in pal se su fwa tuku.” (Mark 10:28-30) Saap ke pal fwasru, met in sou lom, met kawuk puspus lom su som liki kom ke sripen lulalfongi lom elos fwa liye a suk ke ma Baibel el luti a lungse pa wi met puspus su alu nu sin God.

20. Met nukewa su wi ke alu paye elos fwa ku in engankin kain in oiya fuka ke pal fwasru?

²⁰ Baibel el luti la tia pat God el fwa aksafyela akwuk koluk puspus lun fwalu a aolla ma inge ke sie fwal sumwosmwos ye kolyuk lun Togusrai lal. (2 Piter 3:9, 13) Sie fwal mwolena na paye pa inge! A ke akwuk sasu sumwosmwos inge, e fwa oasr alu sefwanna, sie alu paye. Ya tia sie inkanek lalmetmet nu sum in eis oiya puspus su eneneyuk in asrouki ka a wi met nukewa su wi ke alu paye ke pal inge?