Meac Ac Fah Sikyak Nuh Ke Alu Pucspucs?

1. Yac alu nuhkewa wo?

Arlac yohk orekma kuhtasrihk ac suhlallacl ke alu pucspucs ac mwet ma wi ke alu ingacn. Ke alu nuhkewa inge, kuhtuh mwet kac uh eltahl inse pwacye nuh sin God. Sie pweng na wowo se lah God el liye mwet inge ac karuhnguhnuhltahl. (Luo Corinth 4:3, 4; 11:13-15) Fal nuh ke news report, kuhtuh alu uh wi ke mukuikui luhn terrorist, orekma suhlallacl in uniyac mwet pucspucs, ac mweun. Mwet kol ke kuhtuh alu inge eltahl ahkkulukye tuhlihk srihsrihk. Ma inge ahktoasrye mwet nuhkewa suc inse pwacye ke luhlahlfongi laltahl nuh sin God.​—Riti Matthew 24:3-5, 11, 12.

Orekma luhn alu pwacye sang wolacna nuh sin God, tuhsruhktuh alu kikiacp uh ahktoasrye insiacl. Alu kikiacp inge luti ma suc tiac oan in Bible, oacna mwe luti kikiacp ke God ac ke mwet misac. Tuhsruhktuh Jeova el luhngse mwet uh in etuh ma pwacye kacl.​—Riti Ezekiel 18:4; Sie Timothy 2:3-5.

2. Meac ac fah sikyak nuh ke alu pucspucs?

Kuht engan lah God el tiac kiacpweyucklac sin alu kikiacp ac mwet kac uh ke eltahl fahk muh eltahl luhngse God, tuh ma na pwacye uh pa eltahl luhngse oakwuck lal Satan. (James 4:4) Kahs luhn God el pahngon alu kikiacp nuhkewa “Babylon Luhlahp.” Tukun Sronot ke lwen lal Noah ah, muhtwacwack in oasr alu kikiacp ke city se inge, pahngpahng Babylon. Ke pacl na sa, God el ac fah kuhnauslah alu kikiacp nuhkewa suc kiyacpuh mwet ac kacfweltahl in oruh facsin luhn alu kikiacp.​—Riti Fwackyuk 17:1, 2, 5, 16, 17; 18:8.

Sie ma wo uh pa, Jeova el tiac muhlkuhnlah mwet inse pwacye suc srackna oasr ke alu kikiacp nuhkewa. Ke el lotweltahl ke ma pwacye, El ac kahsruh kain in mwet inge in illac liki alu kikiacp.​—Riti Micah 4:2, 5.

3. Meac mwet suc inse pwacye nuh sin God eltahl enenuh in oruh?

Jeova el nuhnkuh mwet suc luhngse in etuh ma pwacye ac luhngse in oruh ma wo. El sensenkihn mwet inge nuhkewa in fahsr liki alu kikiacp. Mwet ma luhngse God uh ac srihke in ekuhllah moul laltahl in ahkinsewowoyacl.​—Riti Fwackyuk 18:4.

Tukun Jesus el misac, oasr mwet inse pwacye suc lohng mwe luti luhn Bible sin mwet sap uh ac engan in ahkos. Eltahl lotelah inkacnek sasuc se sin Jeova in moulkihn moul laltahl ke sie inkacnek wowo, suc oasr srihpac ac finsrak. Eltahl mwe srihkasrak na wowo nuh sesr mihsenge mweyen eltahl ahkos mwe luti ke Bible inge ke eltahl fihliyac ma luhngse luhn Jeova emeet ke moul laltahl.​—Riti Sie Thessalonica 1:8, 9; 2:13.

Jeova el paing mwet nuhkewa suc fahsr liki alu kikiacp nuh ke sucu in luhlahlfongi lal. Kom fin oruh ma Jeova el siyuck sum uh, kom ac fah eis moul ma pahtpaht, eklac kawuck lal, ac sucu sasuc suc yohk luhngse la. Suc sucu sasuc se inge? Sucu se inge pa mwet lili wiyacsr suc alu nuh sin Jeova.​—Riti Mark 10:29, 30; Luo Corinth 6:17, 18.

4. Meac God el ac oruh in use mwe insewowo nuh sin mwet ke acn nuhkewa?

Kuhnanuclac luhn alu kikiacp nuhkewa suc apkuhran me sie pweng na wowo. Ma inge ac use monglac ac mislac ke ma upac ac mwe ahkkuluk nuhkewa. Wacngihn sie pacl alu kikiacp uh ac fah sifwil pac kiacpwelah kuh oraclihk inmahsrlon mwet uh. Mwet nuhkewa suc moullac ac fah inse sefanna ke alu nuh sin God pwacye sefanna.​—Riti Fwackyuk 18:20, 21; 21:3, 4.